༧སྐྱབས་རྗེ་ཉག་རོང་སྤྲུལ་སྐུ་བསོད་ནམས་རྒྱ་མཚོ་རྒྱལ།།ན་མོ་གུ་རུ་པུནྱེ་ས་ར་ཡེ།།བསོད༵་ནམས༵་ཡེ་ཤེས་རྒྱ༵་མཚོ༵འི་བཀྲ་ཤིས་གང་།།ཞིང་འདིར་བསམ་ཡས་ལྷུན་གྲུབ་བདེ་ལེགས་དཔལ།།དགྱེས་དགུར་སྤྱོད་པའི་ཕུན་སུམ་ཚོགས་པར་ཉིད།།རྡོ་རྗེ་ཆོས་བདུན་ངོ་བོར་འཚོ་བཞེས་གསོལ།།མ་ལུས་འགྲོ་ལ་དགོངས་པའི་ཐུགས་དམ་ཅན།།ཆོས་རྗེ་ཡིད་བཞིན་ནོར་བུའི་ཐུགས་ཀྱི་སྲས།།ཐེ་ཝན་སྔ་འགྱུར་བསམ་ཡས་གསར་བསྐྲུན་པའི།།རིག་འཛིན་ཧཱུཾ་གྲུབ་དཔའ་བོ་ཞབས་བརྟན་ཤོག།བཤད་པའི་ཟླ་བ་ཡར་ངོའི་ཟླ་བཞིན་འཕེལ།།སྒྲུབ་པའི་ཉི་མ་རྫོགས་ཆེན་སྣང་བ་བརྟས།།ཕྲིན་ལས་ཡིད་བཞིན་ནོར་བུས་ས་གསུམ་ཁྱབ།།སྔ་འགྱུར་བསྟན་པའི་རྒྱལ་མཚན་བརྟན་གྱུར་ཅིག།ཅེས་པ་འདི་ཡང་རྨི་ལམ་དང་མངོན་སུམ་གྱི་ཉམས་སྣང་དང་ཆོས་མཆེད་དམ་པ་ཉིད་ལ་ཤྲཱིཿཨེ་མ་ཧོས་ཨེ་ཝཾ་སྐུ་གསུམ་རྒྱལ་བའི་ཕོ་བྲང་བས་སྨོན་པར་དགེའོ།། སྤྱི་ལོ༢༠༢༠ ཟླ་བ༢ ཚེས ༨ ལ།།

བརྡ་ཡིག་འགྱོད་མེད་ཀུན་ཏུ་བཟང་པོའི་ནོར་བུ།ན་མོ་མ་ཧཱ་གུ་རུ་བུདྡྷ་ཛྙཱ་ན་ཡེ།༡༽ཁྱབ་བརྡལ་བསིལ་རླུང་དགུན་ལས་གྲང་བའི་དུས།།སྙིགས་ལྔའི་མུན་ལ་ཉེར་དགུའི་དགུན་གཞུང་ལ།།འཇིགས་བྲལ་ཡེ་ཤེས་རྡོ་རྗེའི་འོད་ཀྱིས་གསལ།།སེམས་ཀྱི་རབ་གསལ་ཟླ་བ་དགུང་དང་མཉམས།།༢༽ཁྲི་ཆེན་རྡོ་རྗེ་འཆང་དབང་གཟིམས་མལ་བདེ།།གྲུབ་དབང་ཡིད་བཞིན་ནོར་བུའི་རྒྱལ་མཚན་བསྒྲིངས།།འཁྲུལ་ཞིག་བྱང་གཏེར་བ་དན་ནུབ་ཏུ་བསྐྱོད།།སྣང་ཆུང་གཡུ་སྟག་མེ་ཏོག་སད་ཀྱིས་བཅོམས།།༣༽ལྭ་དཀར་སྔགས་འཆང་ཞྭ་སེར་ཁོ་ནར་ཆགས།།ཞྭ་ལྷམ་རབ་འབྱམས་ཚོགས་མང་ནུས་པར་གསུངས།།རྨི་ལམ་དབང་ཕྱུག་དཀྱིལ་འཁོར་དཔལ་དུ་དགྱེས།།རྟེན་འབྲེལ་སྣང་བ་མི་མངོན་དབྱིངས་སུ་གཟིམས།།༤༽འོད་གསལ་སྣང་བ་འགྱུར་མེད་སེངྒེའི་སྒྲ།།གཅན་གཟན་རི་དྭགས་མགོན་དུ་མཛའ་ན་ཡང་།།ལྷོ་མོན་ཁྲུང་ཁྲུང་སྒྱུ་འཕྲུལ་རོལ་མོའི་གར།།རྔ་དུང་གླིང་བུའི་སྙན་པར་དྲུང་དུ་འཁོར།།༥༽གནམ་ལྕགས་ཆོས་རྒྱལ་གསང་ཆེན་ཕུག་ཏུ་སྦས།།འབྱུང་འགྱུར་རིག་འཛིན་རྒྱུད་པའི་གསེར་ཁྲི་སྟོང་།།རྨ་བྱ་ནེའུ་ཙོའི་འུར་ཟིངས་མངོན་པར་རྣམས།།ཁྱུང་དཀར་ན་གའི་འཚོ་གནས་དབེན་དང་མཚུངས།།༦༽དབང་ཕྱོགས་རི་ནས་རྟ་བདུན་རྒྱ་མཚོར་གཡེངས།།གསང་ཆེན་འོད་སྣང་ཕར་ཕར་ཡལ་བའི་ཚེ།།གྲིབ་ནག་ཡོར་བ་ཚུར་ཚུར་ཉེ་བའི་དུས།།ས་མཐའི་འཁྱར་པོའི་སྙིང་རྩའི་ཁྲག་རླུང་འཕར།།༧༽དད་གུས་དུང་སེམས་འོ་མའི་རྒྱ་མཚོ་ལ།།རྦ་རླབས་འགྱུར་ལྡོག་སྟོང་གིས་མ་གཡོས་ཀྱང་།།སྙིང་དམར་སྟེང་འོག་རྗེས་འདྲའི་སྤྱི་མཚན་ངང་།།རྟེན་འབྲེལ་ཉམས་པའི་ལས་དབང་ཀྱེ་མ་ཧུད།།༨༽གླིང་བུ་སྙན་མོས་ཡིད་ཕམ་གཞི་ནས་སློང་།།རམ་ནག་མེ་ཏོག་འཐོར་བའི་ན་ཐང་ན།།ཅང་ཤེས་རྒྱུགས་རྟའི་བང་ཁ་གཤིབ་འདི་མཚར།།འགྲན་རྩོད་སྣང་ཤེས་སྐྱོ་མགུར་རྣ་བར་གཟན།།༩༽ལྷོ་ནུབ་ཙན་དན་ནགས་སྟུག་ཚང་ཚིང་དབུས།།ཕོ་རྒོད་སྟག་དམར་ཡག་གི་འཚོ་གནས་སྐྱིད།།སྔ་འབངས་འཇོན་པོ་ཡོད་སའི་ཡུལ་ལུང་ནང་།།ཕོ་གཞོན་ལང་གཅིན་མཛད་པའི་རྣམ་ཐར་ཤར།།༡༠༽གངས་སེང་འདམ་ལ་ཚུད་པའི་སྐྱོ་གར་ངང་།།ཁྱུང་ཆེན་སྒྲོ་མཇུག་རལ་བའི་གནམ་དཀྱིལ་ནས།།གཡུ་འབྲུག་ལག་གི་ནོར་བུ་རྒྱ་མཚོར་ལྷུང་།།སྤྲིན་ནག་མོད་པའི་ཉི་མའི་འོད་མི་གསལ།།༡༡༽སེམས་ཁམས་རྨོངས་དད་མེད་པའི་ཡུལ་ལུང་ནང་།།དག་པའི་སྲོལ་རྒྱུན་འཛིན་པ་ཤིན་ཏུ་གལ།།ལྟ་བ་ནམ་མཁའི་དབྱིངས་ལས་མཐོ་ན་ཡང་།།ལས་འབྲས་བསླུ་མེད་འབད་པར་ཤིན་ཏུ་གནད།།༡༢༽རྨི་ལམ་བདེན་འཛིན་ལུང་བསྟན་མངོན་སུམ་ལས།།བསྟན་ལ་ཤ་ཞེན་ཆེ་བའི་ལྷག་བསམ་ངང་།།མི་ཆོས་བླ་མའི་བདེན་གཏམ་བརྡ་རུ་བསྟན།།ལྟ་སྤྱོད་ཡ་མ་བྲལ་ན་ཐུགས་དམ་མཛོད།།༡༣༽བསྟན་དོན་བདག་གིར་བཞེས་པའི་རྟུལ་ཞུགས་བཅས།།དམ་ཆོས་རྒྱུན་མི་ཆད་པའི་འཁོར་ལོ་བསྐོར།།ཆོས་རྗེ་ཡིད་བཞིན་ནོར་བུ་ཇི་བཞིན་དུ།།ཉིད་ལས་བསྟན་འགྲོར་གཅེས་པར་མཛད་དུ་གསོལ།།རྨི་ལམ་དབང་ཕྱུག་གིས་སྔ་འགྱུར་རིག་འཛིན་ཡོངས་ལ་བརྡ་རུ་སྤྲིངས་པར་དགེའོ།། སྤྱི་ལོ་༢༠༢༠ ཟླ་བ༢ ཚེས་༤ ལ།།

༧ཀུན་མཁྱེན་བླ་མ་བོད་ལ་བཀའ་དྲིན་ཆེ།།ན་མོ་མ་ཧཱ་གུ་རུ་ཤི་ལ་མ་ཏི་ཡེ།།༼༡༽མིག་དང་བྲལ་བའི་གངས་གཞོན་ཕོ་མོ་རྣམས།།གཡང་སར་ཁྲིད་མཁས་ཏང་དང་ཞོགས་ཚ་ལས།།ཐུགས་རྗེས་སྐྱབས་མཁས་ཀུན་མཁྱེན་བླ་མ་ཡིས།།ལྟ་བའི་སྤྱན་གཉིས་གནང་བར་བཀའ་དྲིན་ཆེ།།༼༢༽ཕྱི་རོལ་མུ་སྟེགས་རིགས་པ་ནང་ལ་སྐོར།།དུག་གསུམ་འཁོར་ལོ་བསྐོར་བའི་བློ་ཆུང་ལ།།ཆོས་ཚན་ཟུང་དུ་འཇུག་པའི་བཀའ་སློབ་གནང་།།བདེན་ཚིག་མགོ་རྣ་སྦྱིན་པའི་བཀའ་དྲིན་ཆེ།།༼༣༽གདོད་མའི་བོད་ཀྱི་སྐད་ཡིད་སྲོག་རྩ་ཉིད།།སྣུམ་ཟད་མར་མེ་ལྟ་བུའི་བར་མཚམས་ནས།།ངེས་དོན་ཡིད་ཀྱི་སྒྲོན་མེ་སྦར་བའི་མགོན།།ཀུན་མཁྱེན་བླ་མ་བོད་ལ་བཀའ་དྲིན་ཆེ།།༼༤༽འབྲོག་པས་ཕྱུགས་དོར་ཞིང་བས་ས་སྟོང་ཚེ།།ཅོལ་ཆུང་སྤྲེལ་ཕྲུག་ཐུགས་རྗེས་མ་བོར་ནས།།དགེ་བཅུའི་ཁྲིམས་བཟང་མཛེས་པའི་ཆོས་ལྡན་བོད།།རྨོངས་པའི་གཉིད་རྟོག་བསལ་བའི་བཀའ་དྲིན་ཆེ།།༼༥༽སེམས་ཅན་ཡོངས་ལ་དགོངས་པའི་སངས་རྒྱས་དངོས།།གངས་ཅན་བོད་འབངས་སྐྱོང་པའི་སེམས་དཔའ་ཆེ།།ཆོས་ལུགས་ཕྱོགས་ཞེན་མེད་པའི་དྲང་སྲོང་ཉིད།།བསླུ་མེད་གྲོགས་མཆོག་དམ་པ་བཀའ་དྲིན་ཆེ།།༼༦༽བླ་བརྒྱུད་དོར་ནས་ཏང་སྲིད་བསྟོད་མྱོང་མེད།།ཕ་མེས་བཙོང་སྟེ་སྒེར་སྤྱོད་བྱེད་མྱོང་མེད།།ནང་ཁུལ་དཀྲུག་པའི་ཁྲེལ་མེད་མཛད་མྱོང་མེད།།མཐུན་ལམ་སྟོན་པའི་ཀུན་མཁྱེན་བཀའ་དྲིན་ཆེ།།༼༧༽སྙིང་རྗེས་འདྲེན་པའི་དཀར་ཟས་ཤིང་རྟའི་སྲོལ།།ཤེས་རབ་རྩལ་དྲུག་འཛོམས་པའི་ཀུན་མཁྱེན་ཉིད།།བསམ་བཞིན་འཛམ་གླིང་ཞི་བདེའི་དེད་དཔོན་རུ།།བྱོན་པ་འདི་ཀོ་མཁན་ཆེན་བཀའ་དྲིན་ཆེ།།༼༨༽མདོ་དབུས་ཁམས་ཀྱི་བུད་མེད་སྤྱི་ནད་དང་།།ཨེ་ཙིའི་ནད་ལས་སྐྱོབ་མཁས་སྨན་གྱི་བླ།།ཝུའུ་ཧན་ཏོག་དབྱིབས་ནད་སེལ་རྟེན་འབྲེལ་མཛད།།བཀའ་དྲིན་གཞལ་མེད་ཚུལ་ཁྲིམས་བློ་གྲོས་རྒྱལ།།ཅེས་པ་འདི་ཡང་རབ་གནས་ས་ཕག་རྒྱལ་ཟླའི་ཡར་ངོའི་བཟང་པོ་གཉིས་པར་རྔ་ཡུལ་གསོན་བསྲེག་གླིང་ནས་ཡིན་པའི་ལུས་ངག་སེམས་པ་དུག་ཚེར་ཏུ་སོང་བའི་སོལ་བ་ནག་པོ་དེ་ལ་གང་ཤར་དུ་སེ་ཁྱུང་དབྲ་རིགས་སུ་གཏོགས་པའི་ཤྲཱིཿཨེ་མ་ཧོས་བདེན་པའི་རང་བཞིན་གྱི་༧ཀུན་མཁྱེན་བླ་མའི་རང་གཤིས་ཀྱི་བཀའ་དྲིན་ལ་དེ་མ་ཐད་ཏུ་ཆེད་དུ་བརྗོད་པའོ།།

༧རྣལ་འབྱོར་མའི་རང་གཤིས་མེ་ལོང་དྲི་མེད་རབ་གསལ།།ན་མོ་མ་ཧཱ་གུ་རུ་ཡོ་ག་ཏཱ་ར་ཡེ།།མཁྱེན་པའི་ཡེ་ཤེས་ལྷ་ལམ་ཡངས་པར་ཁྱབ།།བརྩེ་ཆེན་སྙིང་རྗེའི་འོད་སྣང་ཕྱོགས་ཀུན་གཏམས།།ནུས་པས་རྨོངས་མུན་ཉེས་ཚོགས་ལེགས་བཅོམ་པའི།།དཔལ་ལྡན་རྣལ་འབྱོར་བླ་མས་རྟག་སྐྱོང་མཛོད།།རི་བོ་རྩེ་ལྔ་རྗེ་བཙུན་འཇམ་དབྱངས་མཇལ།།གླང་ཆེན་འགྱིང་རིར་ཀུན་ཏུ་བཟང་པོར་འཁྱུད།།བྱམས་མགོན་རི་བོར་ཚོགས་ཀྱི་འཁོར་ལོར་བསྐོར།།མཁའ་འགྲོ་དམ་པ་ཁྱེད་དང་མི་འབྲལ་ཤོག།ཤེས་རབ་རལ་གྲི་རྣོན་པོས་འཕྲུལ་ཐབས་ལས།།གཉིས་འཛིན་རྟོག་པའི་འཆིང་ཐག་ཡོངས་སུ་བཅད།།ཇི་ལྟ་ཇི་རྙེད་མཁྱེན་པའི་གཏེར་མཛོད་འཆང་།།རྗེ་བཙུན་རྣལ་འབྱོར་བླ་མ་ཁྱེད་ལ་བསྟོད།།ཨེ་ཝཾ་དྷཱིཿཡིག་དམར་སེར་གཞོན་ནུའི་དཔལ།།བདེ་ཆེན་དབྱངས་ཅན་ལྷ་མོས་བརྩེ་དུང་གར།།སངས་རྒྱས་ཡེ་ཤེས་དགྱེས་པའི་སྒྱུ་འཕྲུལ་ལས།།གཟུངས་སྤོབས་རྡོ་རྗེའི་གོ་ཁྲབ་ཁྱོད་ལ་དབང་།།བླ་མ་ཨོ་རྒྱན་ཆེན་པོས་རྟག་ཏུ་སྐྱོབས།།ཡི་དམ་རྡོ་རྗེ་སེམས་དཔས་བརྟན་ཏུ་སྲུང་།།མཁའ་འགྲོ་རྗེ་བཙུན་སྒྲོལ་མས་རྒྱུན་དུ་སྐྱོང་།།ཆོས་སྐྱོང་གེ་སར་རྒྱལ་པོས་མགོན་དཔུང་མཛོད།།སྐུ་ཕུང་འགྱུར་མེད་འཇའ་ལུས་འཕོ་ཆེན་བཞེངས།།གསུང་ཆོས་འགགས་མེད་ཀུན་ཁྱབ་འགྲོ་ལ་གདལ།།ཐུགས་རྗེ་མཚུངས་མེད་ཕན་བདེས་དངོས་གྲུབ་སྩོལ།།ཡོན་ཏན་ཕྲིན་ལས་ཀུན་བཟང་ལྷུན་གྲུབ་ཤོག།ཅེས་པ་འདི་རབ་གནས་ལྕགས་བྱི་རྒྱལ་ཟླའི་ཡར་ངོས་ཚེས་པ་བཅུ་ལ་སྙིང་ཕྲུག་རྣལ་འབྱོར་མས་ཨ་དཔལ་བསྟན་འགྲོ་ལ་སྨན་པའི་ཐུགས་སྨོན་གནང་རོགས་འཇིག་རྟེན་འདི་ན་སྡུག་བསྔལ་ཤིན་ཏུ་མང་། སྐྱབས་འཇུག་དང་བྱིན་རླབས་གསུང་ནས་བརྙན་མཐོང་ཀས་བཤུམ་པའི་ཚེ། ཨ་དཔལ་དྲན་ནས་འགྲོ་ལ་བྱམས་སེམས་ཅན་ལ་གང་ཤར་དུ་ཤྲཱིཿསྨྱོན་ཨེ་མ་ཧོས་ཨེ་ཝཾ་མནྡ་ར་ཝའི་ཕོ་བྲང་ནས་གསོལ་བར་འདེབས་པར་དགེའོ།། །།

སིདྡྷིའི་ཕན་ཡོན།སློབ་དཔོན་ཆེན་པོས་བཀའ་སྩལ་བཿ འོ་རིགས་ཀྱི་བུ་མོ་ཿབཛྲ་གུ་རུ་ཞེས་པ་ནིཿ ང་གཅིག་པུའི་སྙིང་པོ་མ་ཡིན་ཏེཿ ཡི་དམ་རྒྱུད་སྡེ་བཞི་དང་ཿ ཐེག་པ་རིམ་དགུ་དང་ཿ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་སོགས་པའི་སྲོག་སྙིང་ཿ དུས་གསུམ་སངས་རྒྱས་ཐམས་ཅད་དང་ཿ བླ་མ་ཡི་དམ་མཁའ་འགྲོ་ཆོས་སྐྱོང་ལ་སོགས་པའི་སྙིང་པོ་འདི་ལ་ཚང་བའོཿ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ཨོྃ་ཨཱཿཧཱུྃ་གིས་དུག་གསུམ་ལས་གྱུར་སྒྲིབ་པ་འདགཿ བཛྲ་ཞེ་སྡང་ལས་གྱུར་སྒྲིབ་པ་འདགཿ གུ་རུས་ང་རྒྱལ་ལས་གྱུར་སྒྲིབ་པ་འདགཿ པདྨས་འདོད་ཆགས་ལས་གྱུར་སྒྲིབ་པ་འདགཿ སིདྡྷིས་ཕྲག་དོག་ལས་གྱུར་སྒྲིབ་པ་འདགཿ ཧཱུྃ་གིས་ཉོན་མོངས་ལས་གྱུར་སྒྲིབ་པ་འདགཿ ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱྃཿ བཛྲ་གུ་རུ་ལན་གཅིག་བརྗོད་པ་ཡིཿ དེ་ལ་གཟུགས་མཆིས་འཛམ་གླིང་སྣོད་དུ་ཆུང་ཿ འདི་ཉིད་མཐོང་ཐོས་དྲན་པའི་སེམས་ཅན་ཀུནཿ རིག་འཛིན་ཕོ་མོའི་གྲལ་ལ་འཁོད་པར་ངེསཿ བསླུ་མེད་བཛྲ་གུ་རུའི་བདེན་ཚིག་ལཿ གང་འདོད་བཀའ་བཞིན་འགྲུབ་པར་མ་གྱུར་ནཿ པདྨ་ང་ཡིས་སེམས་ཅན་བསླུ་བ་ཨང་ཿ མི་བསླུ་ངེས་པས་བཀའ་བཞིན་བསྒྲུབ་པར་གྱིསཿ བཟླས་པ་མི་ནུབ་རྒྱལ་མཚན་རྩེ་ལ་ཕྱོརཿ རླུང་ཕོག་སེམས་ཅན་གྲོལ་བར་ཐེ་ཚོམ་མེདཿ ཡང་ན་ས་ཤིང་རྡོ་ཡི་ལོགས་སུ་བྲིཿ རབ་གནས་བྱས་ནས་ལམ་ལ་བཀྲམ་ན་ཡང་ཿ མཐོང་བ་ཙམ་གྱིས་ནད་གདོན་སྒྲིབ་པ་འདགཿ ས་དེར་གནས་པའི་འདྲེ་སྲིན་རྒྱུ་ལམ་ཆོདཿ མཐིང་ཤོག་དག་ལ་གསེར་གྱི་བྲིས་ལ་འདོགསཿ གདོན་བགེགས་འབྱུང་པོས་གནོད་པ་བྱེད་མི་ནུསཿ ཤི་ནས་རོ་དང་མ་བྲལ་བསྲེགས་ན་ནིཿ འཇའ་ཚོན་འཁྱུག་ཅིང་བདེ་ཆེན་འཕོ་བར་ངེསཿ འབྲི་ཀློག་འདོན་པའི་ཡོན་ཏན་ཚད་ལས་འདསཿ མ་འོངས་སེམས་ཅན་དོན་དུ་བཀོད་དེ་སྦསཿ སྐལ་ལྡན་ལས་ཅན་བུ་དང་འཕྲད་པར་ཤོགཿ ས་མ་ཡཿ རྒྱ་རྒྱ་རྒྱཿ ལོག་ལྟ་ཅན་ལ་གསང་རྒྱ་རྒྱ་རྒྱཿ…