February 2020

བག་ཡོད་ཀྱིས་རིམས་སེལ་དཀར་པོ་ཆིག་ཐུབ།།
ན་མོ་གུ་རུ་པདྨ་ཀ་ར་ཡེ།།
ཀ་པ་ལ་ཡི་ནང་ལ་ཀླད་རྩ་ཚང་ན།།
ཁ་བ་ཅན་གྱི་མི་རྣམས་གཞན་དང་མི་འདྲ།།
ག་ས་གང་དུ་མཆིས་ཀྱང་གུ་རུའི་བཀའ་དྲིན།།
ང་ཚོ་ཡོངས་ལ་ཡོད་པའི་སྐལ་བཟང་མ་བརྗེད།།
ཅ་ཅོའི་འུར་སྒྲོག་ཕྱོགས་ལ་བདེན་པར་མ་འཛིན།།
ཆ་ལུགས་ཆོས་དང་འགལ་བའི་རིམས་ནད་མ་སྐྱོང་།།
ཇ་ཆང་ཁོ་ནས་ཞེན་པའི་འདུ་འཛིར་མ་སྤེལ།།
ཉ་མོ་ཆུ་ལ་གནས་བཞིན་གཙང་སྦྲ་རེམ་རེམས།།
ཏ་ཐཱ་ག་ཏའི་བསྟན་རྩའི་སྙིང་པོ་མཁྱེན་ནས།།
ཐ་དག་འགྲོ་བ་ཡོངས་ལ་སྙིང་རྗེ་སྒོམ་ནས།།
ད་ལྟ་ཉིད་དུ་སྨིན་གྲོལ་ལམ་བཟང་འབད་ན།།
ན་རྒ་འཆི་བའི་གནས་ལ་སྐྲག་དགོས་མི་འདུག།
པ་ར་མི་ཏའི་སྟོང་ཉིད་གོ་མྱོང་རྟོགས་ན།།
ཕ་ཝང་བྱ་བྱའུའི་རིམས་ནད་འཇིགས་དགོས་མི་འདུག།
མ་ལུས་འགྲོ་ལ་དམིགས་པའི་བྱང་སེམས་ལྡན་ན།།
བ་རྒན་ཟུང་ཟད་བཞིན་དུ་ཉལ་དགོས་མི་འདུག།
ཙ་ར་མ་གཅོད་བག་མེད་སྤྱོད་ལམ་མ་མང་།།
ཚ་རིམས་ནད་ངན་ལུས་ལ་མ་ཁྱབ་མཛད་ནས།།
ཛ་དྲག་དྲན་ཤེས་བག་ཡོད་ར་མདའ་སྒྲོན་ནས།།
ཝ་ལེར་སྔགས་འཆང་རིག་འཛིན་རྟུལ་ཞུགས་མཛོད་ཅིག།
ཞ་བོ་མིན་ཡང་སྒོ་ཐེམ་ཡན་ལ་མ་བརྒལ།།
ཟ་མ་ཉུང་ཡང་འུག་ཧན་མགྱོགས་ཟས་མ་ཟ།།
འ་ཅག་ཕྱོགས་ལྷུང་མེད་པའི་ཚོད་གཅིག་ཟིན་ན།།
ཡ་རབས་རྒྱལ་ཁ་ཐོབ་པའི་རྟེན་འབྲེལ་ཟབ་བོ།།
ར་ལྟར་གྱོང་བའི་རྨོངས་ཞེན་ཁོ་ན་མ་བྱེད།།
ལ་རྒྱ་ཟེར་ནས་མི་འཇིགས་དཔའ་ངོམས་མ་གནང་།།
ཤ་ཁྲག་མི་ལུས་ཐོབ་པ་འདྲ་མཉམས་ཡིན་ཕྱིར།།
ས་ཆ་གང་ལ་ཕེབས་ཀྱང་ནད་རིམས་འཛེམ་རོགས།།
ཧ་ཅང་དཀའ་ངལ་འཕྲད་པའི་ནད་མུག་སྐབས་སུ།།
ཨ་མཚར་རྩེད་མོའི་རིགས་ལ་མགོ་བོ་མ་འཁོར།།
ཧ་ལའི་དུག་བཞིན་ཏོག་དབྱིབས་རིང་དུ་དོར་ནས།།
ཨ་ཞང་གནམ་རྒན་ཚང་ལ་ཡིད་ཆེས་མ་མཛད།།
ཨི་ལྡན་དབྱངས་གསལ་མཛེས་པའི་ཁ་ཏ་འདི་ཉིད།།
ཨུ་ཚུགས་མ་དགོས་གངས་ཅན་ཡོངས་ལ་ཕུལ་ན།།
ཨེ་མ་ཕན་བདེའི་མི་ཚེ་རབ་ཏུ་འཚོ་ཞིང་།།
ཨོ་རྒྱན་པདྨས་ཚེ་རབས་ཀུན་ཏུ་སྐྱོབས་ཤིག།
ཅེས་པར་རབ་གནས་ལྕགས་བྱིའི་རྒྱལ་ཟླའི་ཚེས་བཅུ་ལ་སེ་ཁྱུང་དབྲ་སྲས་རིག་འཛིན་དབྱངས་ཅན་ཡེ་ཤེས་རྡོ་རྗེ་སོགས་ན་གཞོན་བྱིས་པ་དུ་མའི་ངོར་ཤྲཱིཿསྨྱོན་ཨེ་མ་ཧོས་ཨེ་ཝཾ་མནྡ་ར་ཝའི་ཕོ་བྲང་ནས་བགྱིས་པར་དགེའོ།།

Leave a Reply

Your email address will not be published.