• June 2019

    ཨ་མ་མ་ལོ།

    ཨ་མ་མ་ལོ།ཨ་མ་དག་པའི་ཞིང་དུ་ཕེབས་ན་ཡང་།།ཨ་མ་མ་བརྗེད་ཨ་མའི་བུ་ང་ཡིས།།ཨ་མ་དགྱེས་པའི་དུས་འཁོར་རི་ཁྲོད་དུ།།ཨ་མའི་སྐུ་གདུང་འཛམ་གླིང་རྒྱན་ཏུ་བཞུགས།།

  • June 2019

    དོན་སྙིང་ལྡན་པའི་ཨ་རིར་རྒྱུ་འགྲུལ།

    དོན་སྙིང་ལྡན་པའི་ཨ་རིར་རྒྱུ་འགྲུལ།བདུན་ཕྲག་དྲུགི་རིང་ལ་བྱང་ཕྱོགས་ཨ་རིའི་ཕྱོགས་སུ་ཆོས་ཕྱོགས་ཀྱི་བྱ་བ་ཚང་མ་ལེགས་གྲུབ་ངང་བདེ་འཚམས་ངང་དུ་ཕ་ཡུལ་གཉིས་པ་དབྱིན་ཡུལ་དུ་བདེ་འཚམས་ངང་འབྱོར་ཟིན། ངས་ཞུ་འདོད་པ་ལ་ཞིག་ལ་ཨེ་ཝཾ་སངས་རྒྱས་སྐྱེད་ཚལ་དང་། ཨེ་ཝཾ་ནང་བསྟན་སློབ་གླིང་དང་། ཨེ་ཝཾ་བོད་སྙིང་ཆོས་ཚོགས་སོགས་ལས་བླ་སློབ་ཡོངས་དང་། དམིགས་བསལ་དུ་༧སྐྱབས་རྗེ་དམ་པ་སྒོ་ཆེན་མཆོག་སྤྲུལ་གསང་སྔགས་བསྟན་འཛིན་དང་མཁན་པོ་གནམ་ལྕགས་རྡོ་རྗེ་དང་མཁན་པོ་ངག་དབང་དགེ་ལེགས་དང་མཁན་པོ་དྲི་མེད་ཟླ་བ་བ་དང་ཀུན་བཟང་ཆོས་སྒྲོན་དང་ཀརྨ་ཆོས་སྒྲོན་དང་། ཁྱད་པར་དུ་རྗེ་བཙུན་མ་འཇམ་དབྱངས་དཔལ་མོ་དང་སྲས་མོ་སངས་རྒྱས་སོགས་ཆོས་དང་འཇིག་རྟེན་ལ་རོགས་དན་གནང་བའི་ཆོས་མཆེད་རྡོ་རྗེ་མཆེད་པོ་ཡོངས་ལ་སྙིང་བས་བཀའ་དྲིན་ཆེ་ཞུ་དང་། ནམ་ཡང་བརྗེད་དུ་དབེན་པའི་བདག་སྐྱོང་དང་བརྩེ་སེམས་དད་གུས་ལ་སེམས་ཁུངས་ནས་རེ་འབྲས་ཡིད་བཞིན་འགྲུབ་པའི་སྨོན་ལམ་དང་། སྐྱེ་ཀུན་བསྟན་འགྲོའི་དོན་ཀུན་བདེ་མྱུར་འགྲུབ་པའི་སྨོན་འདུན་དམ་གསོལ་མཐུན་འགྱུར་བཀྲ་ཤིས་བདེ་ལེགས་བཅས་དབྱིན་ཡུལ་རྒྱལ་སྤྱིའི་མན་ཆི་སི་ཏྲར་གནམ་ཐང་ནས་ཨེ་མ་ཧོས་མྱུར་བྲིས་བགྱིས་པར་དགེའོ།།

  • June 2019

    ༄༅།།མཁའ་འགྲོ་༧རྗེ་བཙུན་མ་འཇམ་དབྱངས་དཔལ་མོའི་བརྟན་གསོལ་ཡིད་བཞིན་ནོར་བུ་ཞེས་བྱ་བ།།

    ༄༅།།མཁའ་འགྲོ་༧རྗེ་བཙུན་མ་འཇམ་དབྱངས་དཔལ་མོའི་བརྟན་གསོལ་ཡིད་བཞིན་ནོར་བུ་ཞེས་བྱ་བ།།ན་མོ་གུ་རུ་དྷཱེ་ཝ་ཌཱ་ཀི་ནི་ཡེ།།ངོ་བོ་ཀ་དག་ཀུན་བཟང་རྒྱལ་བའི་ཡུམ།།རང་བཞིན་འོད་གསལ་སྙིང་པོའི་རྗེ་བཙུན་མ།།ཐུགས་རྗེ་ཀུན་ཁྱབ་འཇམ་དབྱངས་དཔལ་མོ་ཉིད།།གསང་གསུམ་རྟག་བརྟན་ཕྲིན་ལས་མཐར་ཕྱིན་ཤོག།ཅེས་པ་འདི་ཡང་རབ་གནས་ས་ཕག་ས་ག་ཟླ་བའི་ཉི་མ་རིང་བར་མཐར་ཐུག་པའི་སྐབས་སམ་མཁའ་འགྲོ་གསང་བ་ཡེ་ཤེས་ཀྱི་སྒྲུབ་ཆེན་དངོས་གྲུབ་སྐབས་སུ་མཁན་ཆེན་བླ་མ་འམ་ཤྲཱིཿ་ཨེ་མ་ཧོས་ཨེ་ཝཾ་སངས་རྒྱས་སྟོང་གི་སྐྱེད་ཚལ། ཨེ་ཝཾ་སངས་རྒྱས་དགོན་གྱི་ཚོགས་གྲལ་ནས་སྨོན་པ་དེ་དེ་བཞིན་དུ་འགྲུབ་པར་གྱུར་ཅིག་གུ།། །།

  • June 2019

    སྦྱིན་བསྲེག་དང་རྟེན་འབྲེལ་ལེགས་འགྲིགས།

    སྦྱིན་བསྲེག་དང་རྟེན་འབྲེལ་ལེགས་འགྲིགས།གསང་བ་ཡེ་ཤེས་སྒྲུབ་མཆོད་སྐབས་སུ་ལས་གཞུང་ལས། ན་མོ། དུས་གསུམ་སངས་རྒྱས་སྐྱབས་ཡུལ་འགྲོ་བའི་མགོན༔མ་སྲིང་མཁའ་འགྲོའི་ཚོགས་ལ་སྐྱབས་སུ་མཆི༔བདག་གིས་དགེ་འདིས་མ་གྱུར་འགྲོ་ཀུན་ཚོགས༔འཇའ་ལུས་གོ་འཕང་འཐོབ་པར་སེམས་བསྐྱེད་དོ༔ཞེས་སྐྱབས་སེམས་སྔོན་དུ་སོང་ནས་༧སྐྱབས་རྗེ་དམ་པ་སྒོ་ཆེན་སྤྲུལ་སྐུ་གསང་སྔགས་བསྟན་འཛིན་རིན་པོ་ཆེ་དབུ་བཞུགས་ཐོག་ཤར་ན་རྗེ་བཙུན་མ་འཇམ་དབྱངས་དཔལ་མོ་ལ་ཞི་བའི་ལས་དང་། ལྷོ་ན་མཁན་རིན་པོ་ཆེ་ངག་དབང་དགེ་ལེགས་ལ་རྒྱས་པའི་ལས་དང་། ནུབ་ཏུ་བླ་མ་རིན་པོ་ཆེ་དབང་གི་ལས་དང་། བྱང་དུ་དྲག་པོ་ཕྲིན་ལས་ལ་མཁས་དབང་མཁན་པོ་གནམ་ལྕགས་རྡོ་རྗེ་དང་།། ངོས་ཀྱིས་རྒྱས་དབང་དྲག་གི་སྦྱིན་བསྲེག་རྒྱས་པར་མཛད་དོ། ། དེས་སྐབས་རྟེན་འབྲེལ་ལྷུན་གྲུབ་ཏུ་བྱུང་བ་ནི་མཚོ་འཁྲུངས་རྒྱལ་བའི་བཞུགས་གནས་མཁན་སློབ་ཚོས་གསུམ། ཡེ་ཤེས་མཚོ་རྒྱལ། མནྡ་ར་ཝས་རྒྱན་པའི་དྷཱ་ན་ཀོ་ཤའི་མཚོའུའི་མདུན་རོལ་དུ་གཡས་ན་སངས་རྒྱས་ཡེ་ཤེས་དང་། གཡོན་དུ་ཨོ་རྒྱན་རྩ་གསུམ་གླིང་པ་དང་། དཀྱིལ་ན་དྲག་སྔགས་གླིང་པའི་ང་རྒྱལ་ཅན་འབྲས་རྟགས་མངོན་སུམ་དུ་མཇལ། དབང་ཕྱོགས་སུ་༧སྐྱབས་རྗེ་བླ་མ་རིན་པོ་ཆེས་སྣང་སྲིད་བདེ་ཆེན་དབང་གི་མཆོད་སྤྲིན་སྤེལ་བ་དང་ཆར་རླུང་འཇམ་པོས་དྲི་ངེད་དང་བཅས་དབང་བསྡུད་རྟེན་འབྲེལ་ཕུན་སུམ་ཚོགས་པ་འགྲིགས་པ་དང་། ལྷོ་མཁན་རིན་པོ་ཆེའི་ཕྱོགས་སུ་འབྱུང་བའི་དྭངས་བཅུད་འདོད་དགུ་ལོངས་སྤྱོད་ཆར་དུ་བབས་པའི་བརྡ་རྟགས་སུ་སྦྲང་ཆར་སིལ་མ་དང་ཉི་མའི་འོད་ཟེར་རབ་ཏུ་འཕྲོས། ཤར་ན་རྗེ་བཙུན་མས་ཞི་བའི་མཆོད་འབུལ་སྐབས་སུ་ཉི་འོད་དང་འཇའ་སྤྲིན་གཏམས་པའི་ངོ་མཚར་བ་དང་། བྱང་ན་མཁས་དབང་མཆོག་དང་བདག་གིས་དྲག་ལས་ཀྱི་སྦྱིན་བསྲེག་སྐབས་སུ་དྲག་རླུང་དང་སྤྲིན་ནག་གི་སེར་བ་ཐོར་ཅིང་གྲང་ངར་བཅས་དམ་སྲི་གདོན་བགེགས་བསྟན་དགྲ་བསྒྲལ་བའི་རྟེན་འབྲེལ་ལེགས་པའི་ཕྱོགས་སུ་འགྲིགས་སོ།། ཨེ་མ་ཧོས་ སྤྱི་ལོ་19/6/2019

  • June 2019

    གླུ།

    གླུ།འཇའ་སྣ་ལྔའི་འོད་ལམ་ཟེར་ཐགས་ནས།།ཡུམ་ཆེན་མོ་མཇལ་བའི་རྟེན་འབྲེལ་ཡག།ཆོས་སྙན་མོ་གླུ་རུ་ལེན་པའི་ཚེ།།མ་མཁའ་འགྲོའི་བྲོ་རར་ཕྱིན་པར་འདྲ།།དབྱར་ས་ག་ཟླ་བའི་དུས་ཆེན་ལ།།གནས་སངས་རྒྱས་སྟོང་གི་སྐྱེད་ཚལ་ན།།ཆོས་ཤེས་རབ་སྙིང་པོའི་ཆོས་འཁོར་བསྐོར།།མགོན་བླ་མ་ཁྱེད་ཀྱི་བཀའ་དྲིན་ཡིན།།དཔལ་མཁའ་འགྲོ་རྗེ་བཙུན་མ་ལ་དད།།ཡུལ་ངེས་མེད་འཁྱམ་པའི་གཅིག་པུ་བར།།དྲིན་མ་ལོ་དྲན་པའི་སྣང་བརྙན་དེས།།སེམས་གཉུག་མའི་ནང་གི་གསང་གཏམ་བཤད།།ཕ་བླ་མ་མཆོད་པའི་མཎྜལ་ཕུལ།།ཕྱོགས་རྣམ་པར་རྒྱལ་བའི་རྒྱལ་གླུ་བླངས།།མཆེད་རྡོ་རྗེའི་ནང་གྲོགས་དགྱེས་པའི་གཏམ།།རྗེ་སངས་རྒྱས་དྲན་པའི་དུས་དྲན་ལགས།།ཤྲཱིཿཨེ་མ་ཧོས

  • June 2019

    སྟབས་གཅིག་ཏུ་སྤྲུལ་སྐུ་གཉིས་ལ་འཁྲུངས་སྐར་བསུ།།

    སྟབས་གཅིག་ཏུ་སྤྲུལ་སྐུ་གཉིས་ལ་འཁྲུངས་སྐར་བསུ།།ཨེ་མ་ཧོ།།ཆོས་བརྒྱད་སྐྱོན་གྱིས་མ་གིས་མཁས་པ་གཉིས།།ལུས་ངག་ཚུལ་འཆོས་དབེན་པའི་དྲང་སྲོང་གཉིས།།འཇིགས་མེད་རྟུལ་ཞུགས་སྤྱོད་པའི་སྔགས་འཆང་གཉིས།།འཛམ་གླིང་མཛེས་པའི་སྤྲུལ་སྐུ་རྣམ་གཉིས་རྒྱལ།།སྐུ་ཚེ་བརྟན་ཅིང་འགྲོ་དོན་ལྷུན་གྱིས་གྲུབ།།གསུང་ཆོས་འཁོར་འདས་བདེན་པའི་རང་བཞིན་སྟོན།།ཐུགས་རྗེས་བསྟན་དང་འགྲོ་ལ་དགོངས་པ་ཅན།།འཁྲུལ་མེད་སྤྲུལ་སྐུ་རྣམ་གཉིས་ཞབས་བརྟན་ཤོག།ཅེས་པ་རབ་གནས་ས་ཕག་ས་ག་ཟླ་བའི་ཉ་གང་ལ་གཙང་བ་གྲུབ་ཆེན་རིག་མཆོག་དང་འཇམ་དབྱངས་མཁྱེན་བརྩེ་གཉིས་ཀ་དུས་ཆེན་སུམ་འཛོམས་པ་འཁྲུངས་པའི་རྟེན་འབྲེལ་བདེ་ལེགས་སུ་ཨེ་མ་ཧོས་མཁས་དབང་དམ་པ་མཁན་པོ་གནམ་ལྕགས་རྡོ་རྗེས་དྲན་སྐུལ་དུ་བགྱིས་པས་བྲིས་པར་དགེའོ།། །།