ཨེ་ཝྃ་ཧོ།

སློབ་དཔོན་སངས་རྒྱས་གཉིས་པའི་གསོལ་འདེབས་ལེའུ་བདུན་མ་བཞུགས་སོ། ། ༄༅། །གུ་རུ་ན་མོ༔ མེ་ཕོ་རྟའི་ལོ་རྒྱལ་གྱི་ཟླ་བ་ལ༔ དཔལ་བསམ་ཡས་སུ་ཚོགས་ཀྱི་མཆོད་པ་རྒྱ་ཆེན་པོ་བཏང་བའི་དུས་སུ༔ སློབ་དཔོན་ཆེན་པོ་པདྨ་འབྱུང་གནས་ལ༔ དགེ་སློང་ནམ་མཁའི་སྙིང་པོ་དང༔ རྒྱལ་པོ་ཁྲི་སྲོང་ལྡེའུ་བཙན་དང༔ མཁའ་འགྲོ་ཡེ་ཤེས་མཚོ་རྒྱལ་དང༔ སྣ་ནམ་རྡོ་རྗེ་བདུད་འཇོམས་དང༔ ལྷ་སྲས་མུ་ཁྲི་བཙན་པོ་དང་ལྔས༔ ཕྱག་དང་སྐོར་བ་བྱས༔ རིན་པོ་ཆེའི་མཎྜལ་ཕུལ་ནས་ཞུས་པ༔ ཀྱེ་སློབ་དཔོན་ཆེན་པོ་ལགས༔ གསང་སྔགས་ཀྱི་ཆོས་གསུངས་པ་ཐམས་ཅད་ཀྱི་ནང་ནས་དམ་ཚིག་བསྲུང་བ་གལ་ཆེ༔ དེའི་ནང་ནས་ཀྱང་བླ་མ་ལ་གསོལ་བ་འདེབས་པ་གཙོ་ཆེ་བར་གསུངས་གདའ་བས༔ བདག་ཅག་རྣམས་ལ་དང་བ་འདྲེན་པ༔ བྱིན་རླབས་ཆེ་བ༔ གང་ཟག་ཐ་མལ་པ་བློ་རྨོངས་པས་ཚིག་གི་ར་མདར་སྦྲན་པས་གསང་སྔགས་ཀྱི་ལྷ་རྣམས་ཀྱི་ཐུགས་དམ་སྐུལ་བ༔ གུ་རུ་ཉིད་ཀྱི་བྱིན་རླབས་འཇུག་པ༔ནང་ནུབ་ཏུ་གསོལ་བ་འདེབས་པ་ལ་ཚིག་ཉུང་ལ་དོན་འདུས་པ་ཞིག་བདག་ཅག་དང་མ་འོངས་པའི་སེམས་ཅན་རྣམས་ལ་སངས་རྒྱས་ཉིད་ཀྱིས་གསུང་བར་ཞུ་ཞེས་ཞུས་པས༔ སློབ་དཔོན་ཆེན་པོས་བཀའ་བསྩལ་པ༔ ཉོན་ཅིག་བོད་ཀྱི་སྐལ་ལྡན་རྣམས༔ གསང་སྔགས་ཀྱི་ཐེག་པ་འདི་འབྱུང་བ་ནི་དཀོན་ཏེ༔ སྔོན་སངས་རྒྱས་འོད་སྲུང་ཆེན་པོས་ཆོས་ཀྱི་འཁོར་ལོ་བསྐོར་བའི་དུས་སུ་ཡང་གསང་སྔགས་རྡོ་རྗེ་ཐེག་པ་འདི་མ་གསུངས༔ སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་ཀྱང་མ་གསུངས༔ མ་འོངས་པའི་སངས་རྒྱས་རྣམས་ཀྱིས་ཀྱང་གསུང་བར་མི་འགྱུར་རོ༔ ཅིའི་ཕྱིར་ཞེ་ན༔ འགྲོ་བ་རྣམས་སྣོད་དུ་མ་གྱུར་པའི་ཕྱིར་རོ༔ སྔོན་བསྐལ་པ་ཐོག་མ་ལ་བསྐལ་པ་ཀུན་བཀོད་ཅེས་བྱ་བ་བྱུང་བའི་ཚེ༔ སངས་རྒྱས་སྔོན་བྱུང་གི་རྒྱལ་པོ་ཞེས་བྱ་བའི་བསྟན་པ་ལ་གསང་སྔགས་རྒྱ་ཆེར་བསྒྲགས་སོ༔ ད་ལྟར་གྱི་སངས་རྒྱས་ཤཱཀྱ་ཐུབ་པའི་བསྟན་པ་འདི་ལ་གསང་སྔགས་བྱོན་པའོ༔ ད་སྟེ་བསྐལ་པ་བྱེ་བ་འདས་པའི་འོག་ཏུ་བསྐལ་པ་མེ་ཏོག་བཀོད་པ་ཞེས་བྱ་བ་འབྱུང་བའི་ཚེ༔ སངས་རྒྱས་འཇམ་དཔལ་དབྱངས་ཞེས་བྱ་བ་ད་ལྟའི་ང་དང་ཚུལ་མཐུན་པ་ཞིག་འབྱུང་སྟེ༔ དེས་གསང་སྔགས་རྒྱ་ཆེར་སྟོན་པར་འགྱུར་རོ༔བསྐལ་པ་དེ་གསུམ་ནི་འགྲོ་བ་རྣམས་སྣོད་དུ་རུང་བའི་ཕྱིར་རོ༔ བསྐལ་པ་དེ་གསུམ་མ་ཡིན་པ་དུས་ནམ་ཡང་གསང་སྔགས་མི་འབྱུང་ངོ༔ དེ་བས་ན་བསྟན་པ་འདི་ལ་དལ་འབྱོར་གྱི་མི་ལུས་ཐོབ༔ གསང་སྔགས་ཀྱི་སྒོར་ཞུགས་པ་རྣམས་ནི་ལེ་ལོ་དང་བཏང་སྙོམས་ཀྱི་དབང་དུ་མ་སོང་བ་གལ་ཆེ༔ ད་གསང་སྔགས་ཉམས་སུ་ལེན་པ་ལ་དགོས་པའི་ཆོས་བཞི་བྱ་བ་ཚང་དགོས༔ དེ་མ་ཚང་ན་དམ་ཚིག་ཉམས་ཏེ་འཁོར་བར་འཁྱམས་ངེས༔ ངན་སོང་དུ་ལྟུང་ངེས༔དེ་ཅིའི་ཕྱིར་ཞེ་ན༔ དུས་གསུམ་གྱི་སངས་རྒྱས་རྣམས་ཀྱིས་ཀྱང་ཉོན་མོངས་པ་རང་རྒྱུད་དུ་སྤྱད་པས་བྱང་ཆུབ་ཐོབ་པར་མ་གསུངས་སོ༔ དགོས་པའི་ཆོས་བཞི་ནི༔ སྒོ་གསུམ་ཐ་མལ་དུ་འཆོར་བ་ལ་འཁྲི་བ་བཙན་ཐབས་སུ་གཅོད་པའི་གདམས་ངག་དགོས༔ ཉོན་མོངས་དུག་ལྔ་སྟོབས་ཆེ་ན༔དུག་ལྔ་རང་གྲོལ་དུ་ཤེས་པའི་གདམས་ངག་དགོས༔ འདུ་འཛི་གཡེང་བའི་དབང་དུ་སོང་ན༔རེ་དོགས་བར་ཆད་དུ་ཤེས་པའི་གདམས་ངག་དགོས༔ དམ་ཚིག་གཙང་མ་བསྲུང་བ་ལ༔སྐྱེས་བུས་གཞུ་འགེངས་པ་ལྟ་བུའི་གདམས་ངག་དགོས༔ དེ་ཡང་གསང་སྔགས་ཀྱི་ཐེག་པ་ནི་ཨུ་དུམྦ་རའི་མེ་ཏོག་ལྟ་བུ་སྟེ་འབྱུང་བར་མི་འགྱུར༔ གལ་ཏེ་འབྱུང་ཡང་ཡུན་དུ་མི་གནས་སོ༔ དེ་ནི་འགྲོ་བ་རྣམས་སྣོད་དུ་མ་གྱུར་པའི་ཕྱིར་རོ༔ ད་ཁྱེད་རྒྱལ་པོས་དབུ་མཛད་པ་རྣམས་ཉོན་ཅིག༔ བསྟན་པ་འདི་ལ་དལ་འབྱོར་གྱི་མི་ལུས་ཐོབ༔ གསང་སྔགས་ཀྱི་སྒོར་ཞུགས༔ཚེ་འདི་ལ་བྱང་ཆུབ་འཐོབ་པར་འདོད་པ་རྣམས་ཀྱིས༔ རྩ་བ་དང་ཡན་ལག་གི་དམ་ཚིག་གཙང་མར་བསྲུང་བ་གལ་ཆེ༔ དེ་མ་བསྲུངས་ན་འཚོ་བྱེད་ཀྱི་སྨན་བཙལ་བས་རེག་ཕུང་གི་དུག་དང་འཕྲད་པ་ལྟ་བུའོ༔ དམ་ཚིག་བསྲུང་བ་ལ་དད་པ་དང་བརྩོན་འགྲུས་ཤེས་རབ་གསུམ་ཚང་དགོས༔ དད་པ་མེད་ན་གསང་སྔགས་ཀྱི་སྣོད་དུ་མི་རུང༔ བརྩོན་འགྲུས་མེད་ན་ལེ་ལོ་ཅན་ཐ་མལ་དུ་འཆོར༔ ཤེས་རབ་མེད་ན་གསང་སྔགས་ཀྱི་ལྟ་སྤྱོད་ཟབ་མོ་དབྱེ་མི་ཤེས༔ གསང་སྔགས་ནི་འགྲོ་བ་དད་གུས་ཅན་གྱི་དོན་དུ་བྱོན་པ་ཡིན༔ དེ་ཡང་རང་ལ་གསང་སྔགས་སྟོན་པའི་བླ་མ་དེ་སངས་རྒྱས་དངོས་སུ་ཤེས་པས་གསོལ་བ་འདི་ལྟར་ཐོབ་ཅིག་གསུངས་སོ༔ ཨེ་མ་ཧོཿ སྤྲོས་བྲལ་ཆོས་ཀྱི་དབྱིངས་ཀྱི་ཞིང་ཁམས་སུཿ ཆོས་ཉིད་དུས་གསུམ་སྐྱེ་འགགས་མེད་པའི་ངངཿ བྱ་བྲལ་ལྷུན་རྫོགས་བདེ་བ་ཆེན་པོའི་སྐུཿ ནམ་མཁའ་བཞིན་དུ་ཐུགས་རྗེ་ཕྱོགས་རིས་མེདཿབླ་མ་ཆོས་ཀྱི་སྐུ་ལ་གསོལ་བ་འདེབསཿ ཨུ་རྒྱན་པདྨ་འབྱུང་གནས་ལ་གསོལ་བ་འདེབསཿ བདེ་ཆེན་ལྷུན་གྱིས་གྲུབ་པའི་ཞིང་ཁམས་སུཿ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱིཿ ཡེ་ཤེས་ལྔ་ལྡན་བདེ་བར་གཤེགས་པའི་སྐུཿ ཐུགས་རྗེའི་བྱེ་བྲག་སྣ་ཚོགས་སོ་སོར་སྟོནཿ བླ་མ་ལོངས་སྤྱོད་རྫོགས་སྐུ་ལ་གསོལ་བ་འདེབསཿ ཨུ་རྒྱན་པདྨ་འབྱུང་གནས་ལ་གསོལ་བ་འདེབསཿ མི་བརྗེད་འཇིག་རྟེན་དག་པའི་ཞིང་ཁམས་སུཿ ཐུགས་རྗེ་ཆེན་པོས་འགྲོ་བའི་དོན་ལ་བྱོནཿ གང་ལ་གང་འདུལ་ཐབས་ཀྱིས་འགྲོ་དོན་མཛདཿ འདས་དང་མ་བྱོན་ད་ལྟ་དུས་གསུམ་གྱིཿ བླ་མ་སྤྲུལ་པའི་སྐུ་ལ་གསོལ་བ་འདེབསཿ ཨུ་རྒྱན་པདྨ་འབྱུང་གནས་ལ་གསོལ་བ་འདེབསཿ དེ་ལྟར་རྒྱུན་ཆད་མེད་པར་གསོལ་བ་ཐོབ༔ ཅེས་གསུངས་སོ༔ཁ་སྐོང་བརྒྱུད་འདེབས་ནི། ཆོས་སྐུ་ཀུན་ཏུ་བཟང་པོ་ལ་གསོལ་བ་འདེབས། །ལོངས་སྐུ་རྒྱལ་བ་རིགས་ལྔ་ལ་གསོལ་བ་འདེབས། །སྤྲུལ་སྐུ་རིགས་གསུམ་མགོན་པོ་ལ་གསོལ་བ་འདེབས། །ཡང་སྤྲུལ་དགའ་རབ་རྡོ་རྗེ་ལ་གསོལ་བ་འདེབས། །སློབ་དཔོན་འཇམ་དཔལ་བཤེས་གཉེན་ལ༴རིག་འཛིན་ཤྲཱྀ་སེང་ཧ་ལ༴པཎ་ཆེན་བི་མ་མི་དྲ་ལ༴རྒྱལ་སྲས་པདྨ་འབྱུང་གནས་ལ༴ཆོས་རྒྱལ་ཁྲི་སྲོང་ལྡེའུ་བཙན་ལ་༴མཁའ་འགྲོ་ཡེ་ཤེས་མཚོ་རྒྱལ་ལ༴དགེ་སློང་ནམ་མཁའི་སྙིང་པོ་ལ༴སྣ་ནམ་རྡོ་རྗེ་བདུད་འཇོམས་ལ༴ལྷ་སྲས་མུ་ཁྲི་བཙད་པོ་ལ༴སྤྲུལ་སྐུ་བཟང་པོ་གྲགས་པ་ལ༴རིག་འཛིན་དངོས་གྲུབ་རྒྱལ་མཚན་ལ༴ཀུན་སྤངས་དོན་ཡོད་རྒྱལ་མཚན་ལ༴བརྒྱུད་འཛིན་བསོད་ནམས་མཆོག་བཟང་ལ༴གྲུབ་ཆེན་ཐང་སྟོང་རྒྱལ་པོ་ལ༴མཚུངས་མེད་དངོས་གྲུབ་དཔལ་ལྡན་ལ༴གྲུབ་ཆེན་ཀུན་དགའ་བཟང་པོ་ལ༴ མི་འགྱུར་ལས་འཕྲོ་གླིང་པ་ལ༴ རྒྱལ་དབང་རིན་ཆེན་ཕུན་ཚོགས་ལ༴ སྤྲུལ་སྐུ་ནམ་མཁའ་བརྒྱ་བྱིན་ལ༴ མཁས་གྲུབ་མདོ་སྔགས་བསྟན་འཛིན་ལ༴ རིག་འཛིན་ཕྲིན་ལས་ལྷུན་གྲུབ་ལ༴ ཆོས་རྒྱལ་གཏེར་བདག་གླིང་པ་ལ༴ འགྱུར་མེད་ཐེག་མཆོག་བསྟན་འཛིན་ལ༴ འགྱུར་མེད་ཀུན་བཟང་རྣམ་རྒྱལ་ལ༴…

རི་བོ་རྩེ་ལྔའི་རྟོགས་བརྗོད། ___ཆོས་རྗེ་ཡིད་བཞིན་ནོར་བུ། སྤྲུལ་བའི་ཞིང་མཆོག་རི་བོ་རྩེ་ལྔའི་གནས་འདིར། ། ཁྲི་ཕྲག་འཁོར་གྱིས་བསྐོར་བ་འཇམ་དཔལ་དཔའ་བོས། ། དཔག་ཡས་སྒྱུ་འཕྲུལ་བཀོད་པ་ལྷམ་མེར་ངོམ་ནས། ། སྐལ་ལྡན་དགའ་བའི་དགའ་སྟོན་ཆད་མེད་བསྙིལ་སོང་། ། གནས་འདིར་སོན་པ་ཙམ་གྱིས་སྡིག་ལྟུང་འདག་ཅེས། ། དྲང་སྲོང་རྒན་པོའི་བདེན་གཏམ་རྣ་བར་སོན་ཚེ། ། དགའ་བས་བརླན་པའི་མིག་ནས་སྦྲང་ཆར་འབེབས་དང་། ། ཆབས་ཅིག་ལུས་ཀྱི་བ་སྤུས་གར་སྟབས་བསྒྱུར་སོང་། ། དད་ལྡན་བོད་རིགས་ཁྲི་ཕྲག་མཉམ་དུ་འཛོམས་ནས། ། ཕྱག་མཆོད་སྨོན་ལམ་ཟབ་མོ་རྒྱ་ཆེར་བྱས་པས། ། རིང་མིན་རང་སྣང་ཞིང་དུ་སྟོན་འཁོར་བཀོད་པ། ། ཚོམ་བུ་གཅིག་ཏུ་འཚོགས་པའི་རྟེན་འབྲེལ་འགྲིགས་སོང་། ། འུ་ཅག་ད་ནས་ཚེ་རབས་ཕྲེང་བ་ཀུན་ཏུ། ། ཕ་གཅིག་འཇམ་དཔལ་གཞོན་ནུ་སྤྱི་བོས་བཀུར་བཞིན། ། སྲིད་པ་སྒྱུ་མའི་གྲོང་ལ་ལྟད་མོ་བྱས་ཏེ། ། མར་གྱུར་འགྲོ་ཀུན་འདྲེན་པའི་ས་བོན་ཐེབས་སོང་། ། མཁྱེན་པའི་རང་གཟུགས་ལྷག་པའི་ལྷ་རུ་ཐོབ་ཕྱིར། ། རྒྱལ་གསུང་ཆོས་ཚུལ་དྲི་བྲལ་ཟག་མེད་བདུད་རྩི། ། མ་ལུས་གཟུངས་སྤོབས་བློ་ཡི་བུམ་པར་བསྐྱིལ་ལ། ། དཀའ་བ་མེད་པའི་སྐལ་བ་བཟང་པོ་ཐོབ་སོང་། ། ཡར་ལ་ལྟོས་དང་འཇའ་འོད་སྤྲིན་གྱི་བཀོད་པ། ། ངལ་བས་བསྒྲུབས་དང་ཚོན་རྩིས་བྱུག་ལས་མཛེས་པའི། ། ལྷ་སྐུ་ཡིག་འབྲུ་ཕྱག་མཚན་འབྱམས་སུ་ཀླས་པ། ། འཇམ་དཔལ་གཞོན་ནུའི་རང་རྩལ་མངོན་སུམ་མཐོང་སོང་། ། ཕར་ལ་ལྟོས་དང་རི་གླིང་རྩི་ཤིང་མེ་ཏོག ། འཇམ་དཔལ་དཔའ་བོའི་རྫོགས་སྨིན་སྦྱངས་པའི་རང་གཟུགས། ། དགའ་ལྡན་འཕྲུལ་དགའི་ཡུལ་ཁམས་མོག་པོར་བྱེད་པའི། ། དག་པའི་ཞིང་འདིར་ལུས་མ་སྤངས་བར་སླེབས་སོང་། ། མར་ལ་ལྟོས་དང་ཞིང་འདིའི་སྐྱེ་བོའི་ཚོགས་རྣམས། ། ཚེ་འདིའི་སྣང་ཤས་ཞེན་པ་རྒྱང་དུ་བསྐྲད་དེ། ། དད་དང་སྙིང་བརྩེའི་རང་གཤིས་གསལ་བར་ངོམ་པའི། ། ཟུར་ཕུད་ལྔ་པའི་གདུལ་བྱ་གསལ་བར་མཐོང་སོང། ། ཚུར་ལྟོས་རང་སེམས་འཇའ་ཚོན་འདྲ་བ་འདི་ཀོ ། བཙལ་བས་མི་རྙེད་བཞག་ན་ས་ལེར་གསལ་བ། ། རང་དང་ཡུན་རིང་འགྲོགས་པའི་འཇམ་དཔལ་གཞོན་ནུ། ། མཇལ་མ་མྱོང་བ་དེ་རིང་གསལ་བོར་མཇལ་སོང་། ། སྡུག་འབད་དཔྱད་པའི་ཁུར་གྱིས་ནོན་པ་མེད་པར། ། སྙིང་དབུས་མི་ཤིགས་གཞོན་ནུ་བུམ་སྐུའི་ཞིང་དུ། ། རང་རིག་འཇམ་དཔལ་སྟོན་འཁོར་མཉམ་དུ་འཚོགས་ཚེ། ། ལེགས་བཤད་ཆོས་ཀྱི་དགའ་སྟོན་འགྲོ་ལ་འགྱེད་སོང་། ། དག་པའི་ཞིང་འདིར་དག་པའི་སེམས་དཔའི་སྤྱོད་པས། ། ཟབ་རྒྱས་གཏམ་གྱིས་ཐར་འདོད་ཡིད་དགའ་སྤེལ་འདི། ། རྨི་ལམ་དུ་ཡང་རྙེད་མ་མྱོང་བའི་སྣང་བ། ། རང་ཅག་དཔོན་སློབ་ཀུན་གྱིས་མཉམ་དུ་རྙེད་སོང་། ། ད་ནི་བག་མེད་ཁོ་ནས་སྐྱིད་ཉལ་བྱས་ཀྱང་། ། དག་པའི་ཞིང་དང་ལྷ་ལ་འབྲེལ་བ་བཞག་ཡོད། །…

ཆོས་ཀྱི་རྗེ་དང་དིལ་མགོ་མཁྱེན་བརྩེ་རྣམ་གཉིས་ཀྱི་མཇལ་འཕྲད། མཁན་ཆེན་བསོད་དར་རྒྱས། ཡིག་སྒྱུར་པ། ཤེས་རབ་ཉི་མ། ༡༩༩༠ ལོའི་ཟླ་༧ ཚེས་༡༤ སྔ་དྲོ་ཆུ་ཚོད་དགུ་པར། ཆོས་ཀྱི་རྗེ་ཉིད་ཀྱིས་རྒྱ་གར་ལ་སྡོད་པའི་འབྲུག་རྒྱལ་ཁབ་གཞུང་ཚབ་ཁང་གི་སྤྲོ་ཁང་ནང་ནས། དིལ་མགོ་མཁྱེན་བརྩེ་རིན་པོ་ཆེ་ལ་མཇལ་འཕྲད་ཞུས། དིལ་མགོ་མཁྱེན་བརྩེས་སྐུ་སྟོད་གཅེར་བུར་ཕྱུང་ཞིང་མགུལ་དུ་མངོན་གསལ་དོད་པའི་སྒོ་ནས་གའུ་ཆེན་པོ་ཞིག་དང་། གཟི་སོགས་བྱིན་རླབས་ཀྱི་རྟེན་འགའ་རེ་བཏགས་ནས། གཟིམ་ཁྲི་ཆེན་པོ་ཞིག་གི་ཐོག་ལ་བཞུགས་འདུག ངས་ཐོག་མར་རྒྱ་གར་ལ་ཚད་པ་ཤིན་ཏུ་ཆེ་བའི་རྒྱུ་མཚན་གྱིས། རིན་པོ་ཆེས་སྐུ་སྟོད་གཅེར་བུར་ཕུད་པ་ཡིན་རྒྱུ་རེད་བསམས་ཀྱང་། ཕྱིས་འབྲུག་རྒྱལ་ཁབ་ནས་ཁོང་མཇལ་བའི་དུས་སུ་ཡང་སྐུ་སྟོད་ལ་ན་བཟའ་མནབས་མི་འདུག་པས། གཟོད་ཁོང་གི་མཛད་པ་དེ་ལ་དགོས་པ་དང་དགོངས་གཞི་ཁྱད་པར་ཅན་རེ་ཡོད་རྒྱུ་རེད་སྙམ་པ་བྱུང་། རྗེ་ཉིད་གཟིམ་ཁང་གི་སྒོ་ནས་ཡར་བྱོན་མ་ཐག དིལ་མགོ་མཁྱེན་བརྩེ་ལ་ཕྱག་ཕུལ། རིན་པོ་ཆེས་ཕྱག་མ་འཚལ། ཕྱག་མ་འཚལ། ངའི་རྐང་བ་མི་བདེ་བས་ཡར་ལང་མི་ཐུབ་གི ཅེས་གསུངས་ཏེ་ནན་གྱིས་བཀག་ཀྱང་། རྗེ་ཉིད་ཀྱིས་ཕྱག་གསུམ་ཕུལ་བར་བྱས། དེ་རྗེས། སྐྱེས་བུ་དམ་པ་ཁོང་གཉིས་ཀྱིས་དར་ཁ་འབུལ་རེས་མཛད་དེ། ཆོས་ཀྱི་རྗེ་ཉིད་རིན་པོ་ཆེའི་གཟིམ་ཁྲིའི་ཟུར་ལ་འདུག་ཁྲི་ཞིག་ཡོད་པ་དེའི་སྟེང་ལ་བཞུགས། ཁོང་རྣམ་པ་གཉིས་མཇལ་འཕྲད་ཐོག་མར་མཛད་པ་ཡིན་ཡང་། རྒྱུས་ཡོད་ཀྱི་གྲོགས་པོ་བཟང་པོ་གཉིས་འཕྲད་བྱུང་བ་ལྟར་ཐུགས་མཉེས་པའི་གསུང་གླེང་མང་པོ་གནང་། དིལ་མགོ་མཁྱེན་བརྩེ་རིན་པོ་ཆེས་རྗེ་ཉིད་བོད་ནས་བལ་པོ་ལ་ཕེབས་པའི་ལམ་བར་གྱི་གནས་ཚུལ་ལ་ཐུགས་འདྲི་མཛད་ཅིང་། རྗེ་ཉིད་ཀྱིས་དེ་ལ་ལན་ཞིབ་མོའི་སྒོ་ནས་ཞུས། དེ་ནས་རྗེའི་སྐུ་སྲིང་མས་ལུས་ལ་བཅངས་པའི་ཁུག་མའི་ནང་ནས། བོད་མི་རྣམས་ཀྱིས་རིན་པོ་ཆེ་ལ་འབུལ་རྒྱུར་བསྐུར་བའི་དངུལ་བཏུམས་པའི་དར་ཁ་ཕྱིར་བླངས་ཏེ། ཡར་ཕུལ་བ་དང་མཉམ་དུ། རྗེ་ཉིད་ཀྱིས་ཀྱང་འབུལ་བ་འགའ་རེ་མཛད། དེའི་ཚེ། ངས་པར་ཆས་ཡར་བླངས་ནས་པར་ལེན་མགོ་བརྩམས། དང་པོར་ངས་འཁྱུག་སྒྲོན་གྱི་སྒོ་མ་ཕྱེས་པར་པར་ཞིག་བླངས་པས། རྗེ་ཉིད་ཀྱིས་ཅི་ཡང་མ་གསུངས། གཟིམ་ཁང་ནང་ལ་འོད་གསལ་པོ་མི་འདུག་པས་པར་ཡག་པོ་ལོན་ཡོད་རྒྱུ་མ་རེད་བསམས་ཏེ། པར་ཆས་འཁྱུག་སྒྲོན་གྱི་སྒོ་ཕྱེས་ནས་སླར་ཡང་གཅིག་བླངས་པས། རྗེ་ཉིད་ཀྱིས་སྤྱན་འབྲུ་ཚུགས་སུ་ང་ལ་གཟིགས་སོང་། ཡིན་ཡང་པར་དེའི་ནང་ལ་མི་གཞན་ཡང་ཆུད་སོང་བས། དེ་འདྲའི་ཡིད་ཚིམ་མོ་རང་མ་བྱུང་བའི་རྐྱེན་གྱིས། ཟུར་གཞན་ཞིག་ནས་ཡང་བསྐྱར་པར་གཅིག་བླངས་པའི་དུས་སུ། རྗེ་ཉིད་ཀྱིས་དེ་ལ་ཐུགས་མི་དགྱེས་པའི་ཚུལ་མཛད་དེ། ཁྱོད་ལ་པར་མ་ལེན་ཞེས་བཤད་པ་མ་ཡིན་ནམ། ཁྱོད་ཀྱིས་ཅི་བྱེད་བཞིན་ཡོད། ཅེས་བཀའ་བཀྱོན་ཕེབས། ངས་པར་ཆས་མར་བཞག་ཏེ་ལེན་མ་ཕོད། རྗེ་ཉིད་ཀྱིས་བཀའ་བཀྱོན་གནང་བྱུང་ཡང་། ཕྱི་རབས་གདུལ་བྱ་རྣམས་ཀྱི་དྲན་རྟེན་གྱི་ཆེད་དུ། ལོ་རྒྱུས་ཀྱི་རང་བཞིན་ལྡན་པའི་པར་དེ་དེ་ལྟ་བུའི་སྒོ་ནས་ལེན་ཐུབ་པ་བྱུང་བས། ངའི་སེམས་ལ་ནི་དགའ་བ་ལས་མ་སྐྱེས། དིལ་མགོ་མཁྱེན་བརྩེ་རིན་པོ་ཆེས། ངས་ཁྱེད་ལ་འཕྲིན་ཡིག་ཅིག་བྲིས་ཏེ་འཇམ་དཔལ་རྫོགས་པ་ཆེན་པོའི་སྨོན་ལམ་ལ་འགྲེལ་བ་ཞིག་མཛད་དགོས་པའི་བསྐུལ་མ་ཞུས་ཡོད་པས། ཁྱེད་ཀྱིས་མཛད་ཐུབ་པ་ཨེ་བྱུང་། ཞེས་བཀའ་འདྲི་ཕེབས། རྗེ་ཉིད་ཀྱིས་གུས་པ་དང་ལྡན་པའི་སྒོ་ནས། ད་དུང་བྲིས་མེད། ངས་དཔེ་ལྟ་མང་པོ་རེ་བྱས་ཏེ་བྲིས་ན་མང་པོ་འབྲི་རྒྱུ་འོང་ཀྱང་དེ་ལ་དོན་ཆེན་པོ་མེད། གསོལ་འདེབས་རེ་བྱས་ན་རིག་སྟོང་གི་ཀློང་ནས་རྩོལ་མེད་དུ་ཤར་འོང་རྒྱུ་ཞིག་ཡོད་དར་བས། ད་བར་དུ་དེ་ལ་བསྒུགས་པ་ཡིན། དེ་སྔ་ས་བཅད་འདི་ཙམ་ལས་ཡིད་ངོ་ལ་འཆར་རྒྱུ་མི་འདུག་ཅེས་ཞུ་བཞིན། གྲ་སྒྲིག་ཟིན་པའི་ས་བཅད་དེ་དར་ཁ་ཞིག་གིས་བཏུམས་ནས་མཁྱེན་བརྩེ་རིན་པོ་ཆེ་ལ་ཕུལ། རིན་པོ་ཆེ་ཐུགས་ཤིན་ཏུ་དགྱེས་ཏེ། འགྲེལ་བ་དེ་མཐར་ཕྱིན་པར་འབྲི་ཐུབ་པའི་བཀའ་དྲིན་གནང་རོགས་གྱིས། ཞེས་ཡང་ཡང་བསྐུལ་མ་མཛད་ནས་གསོལ་བ་བཏབ་པས། རྗེ་ཉིད་ཀྱིས་དབུ་ལྕོག་ལྕོག་མཛད་བཞིན། ཡ་ཡ། རེད་འོང་ན་ཐང་། ཞེས་གསུངས། མཁྱེན་བརྩེ་རིན་པོ་ཆེས། ཁྱེད་ཀྱིས་རིན་ཆེན་གཏེར་མཛོད་ཀྱི་དབང་ལུང་གསན་ཐུབ་པ་ཨེ་བྱུང་ཞེས་དྲིས་པ་ལ། རྗེ་ཉིད་ཀྱིས་དེ་མ་ཐོབ། ལོ་གཞོན་དུས་དཔེ་ཆ་སྦྱང་རྒྱུ་ཤིན་ཏུ་གལ་ཆེ་བ་ཡིན་ཞིང་། དཔེ་ཆ་ཤེས་ན་དབང་ལུང་ག་ལེར་ལས་སླ་རྒྱུ་རེད་བསམས་པ་ཡིན་ཡང་། ཕྱིས་སུ་ཟིང་འཁྲུག་ཆེན་པོ་ལངས་ནས་སྐྱེས་ཆེན་དམ་པ་མང་པོ་སྐུ་གཤེགས་པའམ་ཕྱི་ཕྱོགས་ལ་བྱོན་སོང་ནས། ཞུ་བའི་སྐལ་བ་མ་ལྡན་པས་ང་ལ་དབང་ལུང་རྒྱ་ཆེན་པོ་ཐོབ་མ་སོང་གསུངས། རྗེ་ཉིད་ཀྱི་ཞལ་ནས་ཡང་། ང་ཆུང་བྱིས་པའི་དུས་ནས་བླ་མ་མི་ཕམ་རིན་པོ་ཆེ་ལ་ཐུན་མོང་མ་ཡིན་པའི་དད་གུས་ཆེན་མོ་ཡོད། དེ་ལྟར་ཡུན་རིང་མོ་ལ་གསོལ་བ་བཏབ་པས། བླ་མ་མི་ཕམ་རིན་པོ་ཆེའི་བྱིན་རླབས་ལ་བརྟེན་ནས་རྫོགས་པ་ཆེན་པོ་ལ་གོ་རྟོགས་ཤར་སྣང་སྐྱེས་ཤིང་། དུས་དེ་ནས་བཟུང་ངས་བསྟན་པ་དང་སེམས་ཅན་གྱི་དོན་ལ་གང་ཐུབ་ཅི་ཐུབ་བྱས་པ་ཡིན་ཞེས་མཁྱེན་བརྩེ་རིན་པོ་ཆེ་ལ་གསུངས། མཁྱེན་བརྩེ་རིན་པོ་ཆེས་གསན་རྗེས་ཕྱག་ཐལ་མོ་སྦྱར་ཏེ། ད་ཧ་ཅང་ཡག་པོ་འདུག ད་ཧ་ཅང་ཡག་པོ་འདུག་གསུངས། ཡང་རིན་པོ་ཆེས། ཁྱེད་ཀྱིས་གཏེར་ག་གེ་མོ་ཞིག་གཏེར་ནས་བཞེས་ཐུབ་པ་ཨེ་བྱུང་གསུངས། རྗེ་ཉིད་ཀྱིས། མ་ལོན་ཐལ། ང་དེའི་དོན་དུ་ཉག་རོང་ལ་སོང་རུང་། རྟེན་འབྲེལ་གཞན་དབང་དུ་གྱུར་ནས་གནས་སྐབས་མི་སྐྱུར་ཀ་མེད་བྱུང་སོང་གསུངས། དེ་དུས།…