ཨེ་ཝྃ་ཧོ།

༡༤ ༄༅། ། རིག་འཛིན་འཇིགས་མེད་གླིང་པའི་མཛད་རྣམ་བསྡུས་པ། མཛད་པ་པོ། བདུད་འཇོམས་འཇིགས་བྲལ་ཡེ་ཤེས་རྡོ་རྗེ། ༄༅། །པཎ་ཆེན་བི་མ་ལ་དང་ཆོས་རྒྱལ་ཁྲི་སྲོང་རྒྱལ་སྲས་ལྷ་རྗེ་རྣམས་ཟུང་དུ་འཇུག་པའི་རྣམ་འཕྲུལ་རིག་འཛིན་ཆོས་རྗེ་གླིང་པའི་སྐུའི་སྐྱེ་བ་དེ་མ་ཐག་པ་ཀུན་མཁྱེན་འཇིགས་མེད་གླིང་པ་ནི། གུ་རུ་ཆོས་དབང་། སངས་རྒྱས་གླིང་པ། ཆོས་གླིང་དང་རྭ་སྟོན་ཡབ་སྲས་སོགས་ཀྱི་གཏེར་ལུང་ལས་གསལ་བ་ལྟར་འཕྱོང་རྒྱས་སྲོང་བཙན་བང་སོ་དམར་པོའི་ལྷོ་ཕྱོགས་དཔལ་རི་དགོན་པའི་ཉེ་འདབས་སུ། ཆོས་རྗེ་འབྲུག་པའི་ཐུགས་སྲས་ཆེ་བ་དྲུག་གི་ནང་ཚན། རྒྱ་བྲག་པའི་དབོན་རིགས་སུ་རབ་བྱུང་བཅུ་གཉིས་པའི་ས་མོ་བྱ་ལོ་རྒྱལ་ཟླ་བའི་ཀུན་མཁྱེན་ཆེན་པོའི་སྐུ་མཆོད་ཀྱི་ཉིན་སྔ་དྲོའི་ཆར་སྐུ་འཁྲུངས། ཆུང་ངུ་ནས་གཏེར་ཆེན་སངས་རྒྱས་བླ་མ་དང་། ཆོས་རྗེ་གླིང་པའི་སྔོན་རབས་གསལ་བ་སོགས་དམ་པའི་རིགས་སད། དགུང་ལོ་དྲུག་པར་རྗེ་བཙུན་པྲཛྙཱ་རསྨིའི་འཁོར་ལོ་གསུམ་གྱི་ཕྱག་རྗེས་རྨ་མེད་པའི་གནས་དཔལ་གྱི་རི་བོའི་ཆོས་གྲྭར་བཞུགས། མཚོ་རྒྱལ་སྤྲུལ་སྐུ་ངག་དབང་བློ་བཟང་པདྨར་གཙུག་ཕུད་ཕུལ་བས་མཚན་པདྨ་མཁྱེན་བརྩེའི་འོད་ཟེར་ཞེས་གསོལ༑ ཕྱིས་གནས་གསར་བ་ངག་དབང་ཀུན་དགའ་ལེགས་པའི་འབྱུང་གནས་ཀྱི་དྲུང་ནས་དགེ་ཚུལ་གྱི་སྡོམ་པའང་བཞེས། གནས་བརྟན་ཀུན་བཟང་འོད་ཟེར་ལས་གྲོལ་ཏིག་དང་བླ་མ་དགོངས་འདུས་སོགས་ཀྱི་དབང་ལུང་དང་། ཁྱད་པར་དགུང་ལོ་བཅུ་གསུམ་པར་རིག་འཛིན་ཐུགས་མཆོག་རྡོ་རྗེ་མཇལ་ནས་ཕྱག་རྒྱ་ཆེན་པོ་ཡེ་ཤེས་མཐོང་གྲོལ་སོགས་གསན་པས་ཐོག་མར་རྒྱུད་སྨིན་ཏེ་རྩ་བའི་བླ་མ་མཆོག་གཅིག་ཏུ་མཛད་པ་ལྟར་ཕྱིས་ཡེ་ཤེས་ཀྱི་སྐུས་ཀྱང་རྗེས་སུ་བཟུང་། གཞན་ཡང་སྔ་ཕྱིར་གཏེར་ཆེན་དྲི་མེད་གླིང་པ། ཞང་སྒོམ་དྷརྨ་ཀིརྟི། སྨིན་གླིང་གྲུབ་དབང་ཤྲཱི་ནཱ་ཐ། བསྟན་འཛིན་ཡེ་ཤེས་ལྷུན་གྲུབ། ཐང་འབྲོག་དབོན་པདྨ་མཆོག་གྲུབ༑ མོན་རྫ་དཀར་བླ་མ་དར་རྒྱས་སོགས་ཡོངས་འཛིན་དུ་མ་ལས་སྔ་འགྱུར་བཀའ་མ་དང་། གཏེར་ཁ་གོང་འོག་གཙོ་བོར་གྱུར་པའི་བཀའ་གཏེར་འགངས་ཆེ་བ་རྣམས་དང་། གསར་མའི་སྨིན་གྲོལ་ཡང་ཅི་རིགས་པ་གསན༑ ཞར་བྱུང་སྐར་རྩིས་སོགས་ཐ་སྙད་ཀྱི་རིགས་པའང་ཆ་ཤས་ཙམ་གསན་པ་ལས། ཕྱག་བྲིས་ཀྱིས་མཚོན་མདོ་སྔགས་གཞུང་ལུགས་ཆེན་མོའི་གནད་གསང་དང་། སྙན་འགྱུར་ཕུན་སུམ་ཚོགས་པའི་གསུང་རྩོམ་སོགས་སྐྱེས་ཐོབ་ཀྱི་རྩལ་ལས་རང་བྱུང་བ་མ་གཏོགས་ཐ་སྙད་ལ་སྦྱང་རྩོལ་མ་མཛད་པར་སྙིང་པོའི་སྒྲུབ་པ་ལ་ཐུགས་གཞོལ། དགུང་ལོ་ཉེར་བརྒྱད་པ་མེ་གླང་ཆོ་འཕྲུལ་ཆེན་པོ་ནས་བརྩམ་རང་དགོན་དཔལ་རིའི་སྒོམ་ཁང་ཐིག་ལེ་ཉག་གཅིག་ཏུ་ལོ་གསུམ་གྱི་བཅད་རྒྱ་དམ་བཅའ་བརྟན་པོས། གཙོ་བོར་གཏེར་ཆེན་ཤེས་རབ་འོད་ཟེར་གྱི་ཟབ་གཏེར་གྲོལ་ཏིག་དགོངས་པ་རང་གྲོལ་རིང་བརྒྱུད་དང་། ཉེ་བརྒྱུད་ཀྱི་ཚུལ་དུ་བཀའ་བབས་པ་ལྟར་དེའི་བསྐྱེད་རྫོགས་ཁོ་ན་ཐུགས་ཉམས་སུ་བཞེས་པས་དྲོད་རྟགས་ཁྱད་པར་ཅན་བརྙེས། གཞན་ཡང་གཏེར་ཁ་གོང་འོག་གིས་མཚོན་ཟབ་གཏེར་མང་པོའི་ལྷ་རབ་འབྱམས་ཀྱི་བསྙེན་སྒྲུབ་མཐར་ཕྱིན་པས་རྣམ་པར་སྨིན་པའི་རིག་འཛིན་གྱི་ལྡངས་ཚད་མངོན་དུ་གྱུར། རྩ་རླུང་ཐིག་ལེའི་རྣལ་འབྱོར་ལ་དབང་འབྱོར་པས་མགྲིན་པ་ལོངས་སྤྱོད་ཀྱི་འཁོར་ལོ་རྩ་ཁམས་ཡི་གེའི་སྤྲིན་དུ་དེངས་ཤིང་། སྣང་བ་དཔེ་ཆར་ཤར་བས་ཚིག་དོན་ཕུན་སུམ་ཚོགས་པའི་རྡོ་རྗེའི་གླུ་སོགས་ཆོས་ཀྱི་མཛོད་ཆེན་པོ་རྡོལ། བླ་མ་དགོངས་པ་འདུས་པའི་བསྙེན་སྒྲུབ་སྐབས་སྤྱི་གཙུག་ནས་རྟ་སྐད་ཀྱི་གདངས་འཚེར་ཅིང་ཨོ་རྒྱན་ཆེན་པོས་དཔལ་པདྨ་དབང་ཆེན་ཞེས་མཚན་གྱི་ཅོད་པན་དཔྱངས། སློབ་དཔོན་འཇམ་དཔལ་བཤེས་གཉེན་གྱིས་དངོས་སུ་བྱིན་གྱིས་བརླབས་པའི་མཐུས་མཚོན་བྱེད་དཔེའི་ཡེ་ཤེས་ཇི་བཞིན་པ་ཐུགས་ཉམས་སུ་བསྟར་བས་ཧེ་རུ་ཀའི་ཆས་ཀྱི་བརྗིད་པའི་བརྟུལ་ཞུགས་ཆེན་པོའི་སྤྱོད་པ་བསྐྱངས། ཁྱད་པར་འོད་གསལ་གྱི་སྣང་ཆར་བལ་ཡུལ་མཆོད་རྟེན་བྱ་རུང་ཁ་ཤོར་དུ་ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་མཁའ་འགྲོའི་བརྡ་མངོན་དུ་བསྩལ་བ་ལ་བརྟེན་ནས༑ རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེ་ཞེས་ཡོངས་སུ་གྲགས་པའི་ཆོས་མཛོད་ཆེན་པོར་དབང་སྒྱུར་བ་སོགས་མཁས་གྲུབ་ཀྱི་གོ་འཕང་མཐོན་པོར་གཤེགས་ཀྱང་། དེ་ཙམ་གྱིས་ཀྱང་ཐུགས་མ་ཚིམས་པར་ཕྱོགས་དེའི་ལོ་གསུམ་གྲོལ་འཕྲལ་དཔལ་གྱི་བསམ་ཡས་མཆིམས་ཕུར་བྱོན། གསང་ཆེན་མེ་ཏོག་ཕུག་ཏུ་དཀའ་སྤྱད་དྲག་པོས་སླར་ཡང་ལོ་གསུམ་སྙིང་པོ་དོན་གྱི་སྒྲུབ་པ་ལ་རྩེ་གཅིག་ཏུ་གཞོལ་བའི་སྐབས། སྤྱིར་དག་པའི་གཟིགས་སྣང་མཐའ་ཡས་པ་དང་། ལྷག་པར་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་བཟང་པོའི་ཡེ་ཤེས་ཀྱི་སྐུ་ལན་གསུམ་དུ་མཇལ། སྐུ་གསུང་ཐུགས་ཀྱི་བྱིན་རླབས་དངོས་སུ་འཕོས་ཤིང་གསུང་གི་གནང་བ་ཆེན་པོ་ཐོབ་པ་ལ་བརྟེན། འཕགས་ལམ་དོན་གྱི་ཡེ་ཤེས་རྫོགས་པ་ཆེན་པོའི་བདེན་པ་མཐོང་། གནས་དེར་སྐལ་ལྡན་གྱི་སློབ་མ་བཅོ་ལྔ་ལ་ཐུགས་གཏེར་ཆེན་མོའི་སྨིན་གྲོལ་གྱི་སྒོ་འཕར་དང་པོར་དབྱེ་བ་ནས་བརྩམས་ཟབ་དོན་ཐང་མར་བརྡལ་བས་རྫོགས་པ་ཆེན་པོ་སྙིང་ཐིག་གི་ཤིང་རྟ་གཅིག་པུར་གྱུར། ལོ་གསུམ་གྱི་དམ་བཅའ་མཐར་ཕྱིན་ནས། ཆོས་དབང་རིན་པོ་ཆེའི་ཟབ་གཏེར་མཁའ་རིའི་ཞུས་ལན་ལས། འཕྱོང་རྒྱས་ནང་དུ་ང་སྤྲུལ་དོན་བྱེད་འོང་༔ སུ་ཡིན་མི་ཤེས་གཅིག་ཅར་སྨྲ་བ་འབྱུང་༔ འཕྱིང་བར་མདོ་འམ་བང་སོ་དམར་པོའི་ལྷོར༔ ལྷ་བབས་མཆོད་རྟེན་དགོན་སྡེ་འཆའ་ཡང་སྲིད༔ ཅེས་རྡོ་རྗེའི་ལུང་གི་བདེན་དོན་མངོན་དུ་གྱུར་ཅིང་། རྩེ་ལེ་སྣ་ཚོགས་རང་གྲོལ་གྱི་ཡེ་ཤེས་ཀྱི་སྐུས་དགོངས་པ་མངོན་དུ་གཏད། བརྡ་ཐབས་བསྟན་པ་སོགས་རྒྱུ་རྐྱེན་རྟེན་འབྲེལ་དུ་མ་ལ་བརྟེན་ནས་རང་གནས་སུ་ཕེབས་ཏེ༑ འཕྱོང་རྒྱས་སྲོང་བཙན་བང་སོའི་ལྷོ་ཕྱོགས་སྐུང་གི་རི་སུལ་དོན་མཁར་ལུང་པའི་ཕུར། དཔལ་ཚེ་རིང་ལྗོངས་པདྨ་འོད་གསལ་ཐེག་མཆོག་གླིང་གི་རི་ཁྲོད་རྟེན་དང་བརྟེན་པར་བཅས་པ་གསར་དུ་བཏབ་ནས་སྐུ་ཚེ་དེ་སྲིད་དུ་བྱ་བྲལ་སྦས་པའི་རྣལ་འབྱོར་ཚུལ་གྱིས་བཞུགས་སྟན་ཆགས། གངས་ཅན་མཐའ་དབུས་ཀུན་དང་ལྷོ་མོན་རྒྱ་གར་གྱི་ས་མཚམས་ཚུན་ནས་ལས་ལྡན་གྱི་སློབ་མ་མཐའ་ཡས་པ་ལ། རྙིང་མ་བཀའ་གཏེར་སྤྱི་དང་༑ གཙོ་བོར་སྙིང་ཐིག་གསར་རྙིང་གི་གདམས་པ་རྩལ་དུ་བཏོན་ནས་ཆོས་ཀྱི་ཕྲིན་ལས་རྨད་དུ་བྱུང་། ཆོས་འཁོར་རྣམ་པ་གསུམ་དུ་ཁྲི་མཆོད་མང་པོ་དང་། འཆི་ངེས་པའི་སྲོག་བསླུ་གྲངས་ལས་འདས་པ་སོགས་ལན་དང་རྣམ་སྨིན་ལ་རེ་བ་མེད་པའི་ཆོས་སྦྱིན་རླབས་པོ་ཆེ་གནང་། བསམ་ཡས་ཆོས་འཁོར་ཆེན་པོར་གསེར་སྦྱངས་ཀྱི་འཁོར་ལོ་ཕུལ་ཅིང་རིན་ཆེན་གཉིས་པའི་རྒྱལ་བ་མ་ཕམ་པའི་སྣང་བརྙན་ཆེན་པོ་བཞེངས། རབ་གནས་བསྐྱར་བ་སོགས་དང་། བསྟན་དགྲ་གོརྵའི་དཔུང་ཆེན་བོད་དུ་ལྷགས་པའི་སྐབས་དམག་ཟློག་རྟགས་ཐོན་མཛད་པས་མཚོན་བྱ་བ་ལས་ཀྱི་འཁོར་ལོ་དང་བསྟན་སྲིད་བདེ་ཐབས་ཀྱི་མཛད་པ་རྨད་དུ་བྱུང་བས་གཞུང་ས་ཆེན་པོ་ནས་ཀྱང་མཐོང་བཀུར་ཕུལ་དུ་བྱུང་བ་གནང༌། ཁྱད་པར་ཕྱོགས་གང་དུའང་སྔ་འགྱུར་གྱི་བསྟན་པ་ཉག་ཕྲ་བར་གྱུར་པས་སྤྲུལ་པའི་ཆོས་རྒྱལ་ལོ་པཎ་རྣམས་ཀྱི་ཐུགས་བསྐྱེད་རྒྱ་ཆེན་པོའི་ཕྲིན་ལས་ཆུད་འཛའ་བ་དང་༑ དེ་རྣམས་ཀྱི་ཕྱག་རྗེས་རྨ་མེད་པ་ཟུབ་ཏུ་ཉེ་བ་ཐུགས་ཀྱིས་མ་བཟོད་དེ། རྙིང་རྒྱུད་རིན་པོ་ཆེ་སྨིན་གླིང་གི་དཔེ་གང་བཞུགས་ཚང་མ་དབུ་ཤོག་ལྔ་རིན་པོ་ཆེ་སྣ་ལྔས་བྲིས་ཤིང་དེ་ཕྱིན་སྐྱ་ཆོས་པུསྟི་ཉེར་ལྔ་སྐོར་ཡོ་བྱད་དང་རྒྱུ་དངོས་ཕུན་སུམ་ཚོགས་པས་བསྒྲུབས་པར་མཛད། སྔོན་ཆད་ཕྱོགས་འདིར་དཀར་ཆག་ཏུ་འདེབས་པ་དང་གཏན་ཚིགས་ཀྱིས་བསྒྲུབས་པའི་དེབ་ཐེར་རྒྱས་པར་འགོད་པ་མ་བྱུང་མོད། རྗེ་བཙུན་འདི་ཉིད་ཀྱིས་གཏན་ཚིགས་གསུམ་དང་འབྲེལ་བའི་སྤོབས་པ་ཟབ་ལ་རྒྱ་ཆེ་བས་སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་མཛད་དེ་ལུང་རིགས་ཀྱི་སྣང་བ་བཟང་པོས་ལོག་རྟོག་དང་ཐེ་ཚོམ་གྱི་མུན་པས་ཕྱོགས་བསླད་པ་ཐམས་ཅད་དྲུང་ནས་འབྱིན་པར་མཛད་དོ། །གཞན་ཡང་ཐུགས་གཏེར་ཀློང་ཆེན་སྙིང་ཐིག་གཞུང་རྩ་བ་གསལ་བྱེད་དང་བཅས་པ། རླངས་ཆེན་དཔལ་གྱི་སེང་གེས་སྤྲུལ་པའི་དཀྱིལ་འཁོར་དུ་དབང་བསྐུར་ཅིང་གདམས་ངག་བསྩལ་བ་ལ་བརྟེན་བཀའ་ཡི་བསྡུ་བ་གསར་དུ་མཛད་པའི་ཕུར་པ་རྒྱུད་ལུགས། ཀུན་མཁྱེན་ཆེན་པོའི་བྱིན་རླབས་ལ་བརྟེན་དགོངས་གཏེར་བསྟན་བཅོས་ཀྱི་ཚུལ་དུ་སྩལ་བའི་བསྟན་པ་ཡོངས་རྫོགས་ཀྱི་ལམ་རིམ་ཡོན་ཏན་རིན་པོ་ཆེའི་མཛོད་རྩ་འགྲེལ་སོགས་ཕུལ་དུ་བྱུང་བའི་གསུང་འབུམ་གླེགས་བམ་དགུར་ལོངས་པ་བཞུགས། གསུང་ལས་སྐྱེས་པའི་སློབ་མ་ས་སྐྱའི་ཁྲི་ཆེན་ངག་དབང་དཔལ་ལྡན་ཆོས་སྐྱོང་སྐུ་མཆེད། འབྲི་གུང་པའི་སྤྲུལ་སྐུ་རྣམ་གཉིས། རྡོ་རྗེ་བྲག་རིག་འཛིན་མཆོག་གི་སྤྲུལ་སྐུ། ལྷོ་བྲག་གསུང་སྤྲུལ་དང་ཐུགས་སྲས། བོ་དོང་པའི་བསྟན་འཛིན་སྦྱོར་ར་སྤྲུལ་སྐུ། རི་བོ་དགའ་ལྡན་པའི་རིང་ལུགས་འཛིན་པ་དགའ་ལྡན་ཤར་བྱང་རྣམ་གཉིས་དང་། མོན་མཚོ་སྣ་དགོན་རྩེ་སྤྲུལ་སྐུ་སོགས་བླ་ཆེན་དང་མི་ཆེན་དྲེགས་པ་ཅན་རྣམས་ནས་བཟུང་། བྱ་བྲལ་སྒྲུབ་བཙུན་གྱིས་མཐའ་བརྟེན་པ་གྲངས་ཀྱིས་མི་ལངས་ཤིང་། ཁམས་ཕྱོགས་རྙིང་མའི་བླ་སྤྲུལ་ཕལ་ཆེར་གྱིས་ཀྱང་ཞབས་ལ་གཏུགས། ཁྱད་པར་ནང་ཐུགས་ཀྱི་སྲས་གཅིག་པུ་ལྷ་སྲས་མུ་རུབ་བཙད་པོའི་རྣམ་འཕྲུལ་གྲུབ་དབང་འཇིགས་མེད་ཕྲིན་ལས་འོད་ཟེར༑ བྱང་སེམས་ཆེན་པོ་འཇིགས་མེད་རྒྱལ་བའི་མྱུ་གུ། མོན་མཁས་གྲུབ་འཇིགས་མེད་ཀུན་གྲོལ་སོགས་ཀྱི་ཕྲིན་ལས་ལ་བརྟེན་ལྷོ་ཕྱོགས་རྒྱ་གར་གྱི་ས་མཚམས་དང་། ཤར་ཕྱོགས་རྒྱ་སོག་གི་བར་ཆོས་ཀྱི་སྣང་བས་ཁྱབ་པའི་ཕྲིན་ལས་ནི་ཕྱི་དུས་འདིར་སུས་ཀྱང་འགྲན་ཟླར་མ་གྱུར་པ་མ་ཟད། རྗེ་ཉིད་ཀྱིས་ཁོ་བོས་དབེན་པའི་རིར་ལོ་བདུན་བྱང་ཆུབ་ཀྱི་སེམས་རྩེ་གཅིག་ཏུ་བསྒོམས་པས་བསྟན་པ་དར་རྒྱས་སུ་འབྱུང་བར་ཞལ་གྱིས་བཞེས་པ་ལྟར། དེང་སང་ཡང་སྙིང་ཐིག་གི་སྨིན་གྲོལ་ཉམས་ལེན་ཕྱོགས་ཐམས་ཅད་དུ་མ་ཁྱབ་པ་མེད་པ་ལྟ་བུས་ཇེ་དར་དུ་འགྲོ་བར་སྣང་བས་ལུང་བསྟན་གྱི་བདེན་དོན་མངོན་དུ་གྱུར། དེ་ལྟ་བུའི་འཁོར་ལོ་གསུམ་གྱི་མཛད་པ་མཐར་ཕྱིན་ནས་དགུང་ལོ་བདུན་ཅུར་སོན་པ་ས་རྟ་དབྱུག་པ་ཟླ་བའི་ཚེས་གསུམ་ལ་རང་གནས་ཚེ་རིང་ལྗོངས་ཀྱི་ཡང་དབེན་རྣམ་གྲོལ་ཡང་རྩེར་པདྨ་འོད་ཀྱི་ཞིང་ཁམས་ཆེན་པོར་རྟགས་དང་ཆོ་འཕྲུལ་མངོན་པར་འདུ་མཛད་དེ་གཤེགས་པ་ན། སྔ་ཚུད་ནས་ཞལ་ཆེམས་རྡོ་རྗེའི་ཚིག་ངོ་མཚར་ཅན་ཞིབ་མོ་བསྩལ་བ་ལྟར་རྗེས་ཀྱི་བྱ་བ་རྣམས་དབོན་འོད་ཟེར་ཕྲིན་ལས་སོགས་ཀྱིས་ཐུགས་དགོངས་རྫོགས་པའི་བྱ་བ་རྒྱ་ཆེན་པོ་མཐར་ཕྱིན་པར་མཛད་དོ། ། །…

༄༅།།༸ཀུན་མཁྱེན་རོང་ཟོམ་མ་ཧཱ་པཎྜིཏ་དྲན་པ་ གསུང་རབ་ཀྱི་མེ་ལོང་ཞེས་བྱ་བཞུགས་སོ།། ཨ། ཨ་ལ་ལ་ཧོ་ནམ་མཁའི་དབྱིངས།། མི་ཟད་ཡེ་ཤེས་ཟ་མ་ཏོག། རིག་པ་ཀུན་བཟང་རིན་པོ་ཆེ།། ཀུན་གཟིགས་རྒྱལ་བའི་དབང་པོར་དྲན།། ཨ་ཡིག་ལས་འཁྲུངས་ཀུན་མཁྱེན་རྗེ།། རོང་ཟོམ་མ་ཧཱ་པཎྜིཏ།། སྙིང་གི་མུན་སེལ་ཉི་མའི་འོད།། ཡིད་ཀྱི་མཁའ་ལ་འགགས་མེད་ཤར།། ལེགས་བཤད་གསུང་གི་བདུད་རྩི་ཆེ།། ཟླ་བའི་འོད་བཞིན་བདུད་རྩིའི་བཅུད།། ཚ་གདུང་ཀུན་སེལ་བསིལ་ཟེར་ཅན།། ཀུན་དུང་ཉ་གང་རྫོགས་ཆེན་དྲན།། ཚེ་གཅིག་ཐེག་ཆེན་ཚུལ་འཇུག་གི། ཐོག་མཐའ་བར་དུ་དགེ་བའི་གཏམ།། མཇལ་བའི་སྐལ་བཟང་ཨེ་མ་ཧོ།། ཡིད་བཞིན་ནོར་བུ་འདི་ཀོ་དྲན། ཤེས་བཞིན་ཆེན་པོའི་སྣོད་བཟང་དུ།། བཏང་སྙོམས་ཆེན་པོའི་ངང་དུ་འཇུག། རང་ངོ་ཤེས་ཤིང་རང་བབས་བཞགས།། རང་གྲོལ་ཡེ་ཤེས་གཉུག་སེམས་དྲན།། ཀུན་བཟང་སྤྱོད་པ་རྒྱ་མཚོའི་དཔལ།། དམ་ཚིག་མདོ་རྒྱས་རྒྱལ་བའི་གཞུང་།། མན་ངག་ལྟ་ཕྲེང་རྒྱལ་བའི་སྤྱན།། འགྲོ་ལ་བསྟན་པའི་བཀའ་དྲིན་དྲན།། ཉོན་ཤེས་རང་གྲོལ་སྦྲུལ་མདུད་བཞིན།། སྣང་སྲིད་སྣང་བ་ལྷ་རུ་བསྒྲུབས།། སྒྱུ་འཕྲུལ་རྣམ་གསུམ་བཤད་པའི་མདངས།། ཀུན་ལ་སྣང་བའི་རིག་པ་དྲན།། དྲན་པ་ནམ་མཁའི་ཆོས་རྒྱལ་དྲན།། དྲན་རིག་སངས་རྒྱས་ཡེ་ཤེས་སྐུ།། སྐུ་གསུམ་ཀུན་འདུས་པཎྜིཏ།། ཀུན་མཁྱེན་རོང་ཟོམ་ཆེན་པོ་དྲན།། དྲན་པའི་གདུང་བ་སྙིང་ནས་འབར།། བྱིན་རླབས་དངོས་གྲུབ་ལུས་ལ་ཁྱབ། ཕན་བདེ་མ་ལུས་འགྲོ་ལ་སྨིན།། འཁོར་བ་དོང་ནས་སྤྲུགས་པར་ཤོག། ཅེས་པ་འདི་ཡང་རབ་གནས་ཆུ་ཡོས་ཁྲུམས་སྟོད་ཟླ་བའི་ཡར་ངོའི་རྫོགས་པ་དང་པོ་ལ་རྨི་ལམ་འོད་གསལ་དག་པའི་སྣང་ཆ་དང་ཆོས་མཆེད་ཆོས་དགའི་སྨྲ་བཟང་ཐོས་པའི་རྐྱེན་བྱས་ནས་གང་ཤར་བ་དག་ལ་བཅོས་བསྒྱུར་མེད་པར་ཨེ་ཝྃ་དྷཱིཿ ཧྲཱིྃ་མཁའ་འགྲོའི་གླིང་ནས་ཨེ་མ་ཧོས་དག་དྲན་གླུ་རུ་བླངས་པར་དགེའོ།། །།

བདེན་བརྫུན་རྩོད་པས་རྫོཊ་རྒྱུ་ཅི་ཡང་མེད།། ཡོད་མེད་དཔྱད་པས་ཤེས་རྒྱུ་ཅི་ཡང་མེད།། འགལ་འབྲེལ་བརྩེཊ་པས་གྲོལ་རྒྱུ་ལར་ནས་མེད།། བླ་མ་གོང་མས་བསླུས་པ་གཏན་ནས་མེད།། …. 西安广仁寺

རྔ་ཡབ་གླིང་པ་དྲན་གདུང་ཡིད་ཀྱི་མུན་སེལ། ཨེ་མ་ཧོ༔ ཨེ། གནས་དབེན་རི་པདྨ་བསམ་འཛིན་གྱི་ཐང་ན།། ཆོས་ཚུལ་བཞིན་སྒྲུབ་སའི་སྤྱིལ་ཆུང་གི་དབུས་ནས།། ཕ་བླ་མ་དྲན་པའི་སེམས་ཉིད་ལ་བལྟས་ཚེ།། མགོན་ཕྱོགས་དུས་སངས་རྒྱས་རིག་ངོ་ལས་མཇལ་སོང་།། ཝྃ། ཞིང་ཆོས་དབྱིངས་རབ་འབྱམས་ཁྱབ་བརྡལ་གྱི་ཀློང་ན།། ཆོས་རྫོགས་པ་ཆེན་པོའི་དབྱངས་སྙན་གྱི་རང་བྱུང་།། དོན་དམ་པ་དྲན་པའི་གྲགས་ཚད་ལ་མཉན་ཚེ།། སྐྱབས་ཀུན་འདུས་དམ་ཆོས་རིག་ངོ་ལས་ཐོས་སོ།། ཧོ། དབྱིངས་ཀ་དག་སྤྲོས་བྲལ་གཉུགས་སེམས་ཀྱི་ངང་ནས།། འོད་ལྷུན་གྲུབ་འཇའ་ཐིག་རྣམ་དག་གི་གཟུགས་བརྙན།། དཔལ་རིག་པའི་ཡེ་ཤེས་རང་གྲོལ་ཉིད་རྟོགས་ཚེ།། གཞི་བདེ་བཤེགས་ཀུན་བཟང་རིག་པ་ལ་ཤར་གདའ།། སྤྱི་ལོ། ༢༠༢༣ ༩ ༡༣ ཉིན་སྔ་དྲོའི་ཆར་ཤྲཱིཿ ཨེ་མ་ཧོས་ཤར་མར་བྲིས།

རྫོགས་པ་ཆེན་པོའི་གསོལ་འདེབས་ཡར་ལུང་གཙང་པོ། ན་མོ་གུ་རུ་ཨེ་མ་ཧོ།། ༼༡༽ ཀུན་བཟང་བཛྲ་བྷོ་དྷི་མཉྫུ་ཤྲཱིཿ ཤྲཱིཿ སེངྷ་ཛྙཱ་ན་སུ་ཏྲ་དང་།། བི་མ་མི་ཏྲ་པདྨ་སམ་བྷ་ཝ།། མཁའ་འགྲོ་ཡེ་ཤེས་མཚོ་རྒྱལ་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༢༽ རྗེ་འབངས་ཉེར་ལྔ་སོ་ཟུར་གནུབས་གཉགས་དང་།། ཏིང་འཛིན་བཟང་པོ་གནས་བརྟན་ལྡང་མ་རྒྱལ།། སེངྷེ་དབང་ཕྱུག་བཀྲ་ཤིས་རྡོ་རྗེ་དང་།། མཁས་པ་ཉི་འབུམ་ཞབས་ལ་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༣༽ གུ་རུ་ཇོ་འབེར་སེངྒེ་རྒྱབ་པ་དང་།། མེ་ལོང་རྡོ་རྗེ་ཀུ་མ་རཱ་ཛ་དང་།། ཀུན་མཁྱེན་རོང་ཀློང་གཏེར་ཆེན་ཡབ་སྲས་བཅས།། རིག་འཛིན་འཇིགས་མེད་གླིང་པར་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༤༽ རྒྱལ་བུ་མྱུ་གུ་འཇིགས་མེད་ཆོས་ཀྱི་དབང་།། ལུང་རྟོགས་རྒྱ་མཚོ་ཀུན་མཁྱེན་མི་ཕམ་པ།། ཡོན་ཏན་རྒྱ་མཚོ་ཐུབ་བསྟན་ཆོས་འཕེལ་དང་།། འཇིགས་མེད་ཕུན་ཚོགས་ཞབས་ལ་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༥༽ ལྟ་བ་ཀ་དག་གདོད་མའི་ངོ་བོ་མཇལ།། སྒོམ་པ་ལྷུན་གྲུབ་ཡེ་ཤེས་རང་བཞིན་གསལ། སྤྱོད་པ་ཟུང་འཇུག་རིག་པའི་ཐུགས་རྗེའི་རྩལ།། འབྲས་བུ་ཀུན་བཟང་རྒྱལ་བའི་དགོངས་པ་བརྙེས།། མཆོག་ཐུན་དངོས་གྲུབ་མ་ལུས་མཐར་ཕྱིན་ཤོག། ————ཨེ་མ་ཧོས། འཇིག་རྟེན་ཆེ་ཆུང་ཡོད་པ་མིན་ན་ཡང་།། གཉོམ་ཆུང་འཚོ་སའི་ལས་དབང་མཐོ་དམན་ཡོད།། ཁྱུང་ཆེན་མཁའ་ལ་ལྡིང་བའི་གཤོག་རྩལ་དང་།། ངང་པས་འདམ་ལ་རོལ་བའི་ཁྱད་པར་ཡོད།། མི་འཇིགས་སྡེར་ཆགས་རྒྱལ་པོའི་ངར་སྐད་དང་།། དངངས་སྐྲག་ཚབ་ཚུབ་བཅས་ཀྱི་ཝ་སྐྱེས་གཉིས།། གཡུ་རལ་ངོམ་པའི་གཟི་བརྗིད་ལྷག་པའི་མདངས།། གང་ལ་བསྡུར་ཡང་གནམ་སའི་ཁྱད་པར་གདའ།། རྫ་ལམ་འབྲོང་ཁྱུ་གཏུམ་པའི་དཔུང་པ་ཅན།། འཕྲུལ་གྱིས་བཟོས་པའི་རྔོན་པའི་འགྱིང་སྟབས་ཀྱིས།། བསླུ་བྲིད་དེ་ཡི་དབང་དུ་མ་སོང་ཚེ།། དགུན་རླུང་ཤ་རུས་ཟུག་ཀྱང་སྐྱོན་མེད་འདུག། ངུ་མ་དགོད་ཀྱི་འཇིག་རྟེན་ཕུན་ཚོགས་དང་།། དོན་ཆུང་ལས་ལ་འབད་པའི་འཁྱམ་པོ་ང་།། འདུ་འཛི་བྲེལ་བའི་འཆར་ཚུལ་མི་འདྲ་ཡང་།། ནོངས་འགྱོད་བསམ་ན་འཚེར་སྣང་ཇེ་ཆེ་རེད།། གསེར་གྱི་བཞུགས་ཁྲིའི་བདག་པོ་ཐོས་ལྡན་དང་།། ཁོག་ན་ཤེས་ཡོན་མེད་པའི་མགོ་རིལ་ང་།། རྐང་མགོ་ས་སྟེང་བརྫིས་པ་འདྲ་ན་ཡང་།། གང་ལ་བསམ་ཡང་ཁྱད་པར་ཤིན་ཏུ་ཆེ།། མཁས་ཚོགས་བརྒྱ་འདུས་དབུས་ཀྱི་ལྷུན་པོ་དང་།། ཡང་ཐ་རྗེས་སུ་ཟིན་པའི་སྤྲང་པོ་ང་།། དབང་པོ་གཟུགས་ཅན་ཡིན་སོ་འདྲ་ན་ཡང་།། སྐྱེ་བོ་ཕལ་བའི་སེམས་ན་ཁྱད་པར་ཡོད།།

མི་ཚེ་གང་གི་གྲོགས་མཆོག་རྣམ་གསུམ། ཨེ་མ་ཧོ༔ དགའ་སྐྱོ་ངེས་འབྱུང་བསྐུལ་བའི་གྲོགས།། ཚེ་གཅིག་ཐར་ལམ་འདྲེན་པའི་གྲོགས།། གསང་ཆེན་ཟབ་གཏེར་འགྱེད་པསི་གྲོགས།། གྲོགས་གསུམ་སྙིང་གི་གྲོགས་མཆོག་ཡིན།། སྐྱབས་ཅིག་འཇིགས་མེད་རྣམ་རྒྱལ་དཔལ།། མ་ཅིག་རྗེ་བཙུན་ཨོ་རྒྱན་དགྱེས།། ཆོས་ཅིག་རྫོགས་པ་ཆེན་པོ་གསུམ།། ཁོ་བོའི་བླ་སྙིང་སྲོག་གསུམ་ཡིན།། སྒྲུབ་བརྒྱུད་གོང་མའི་རྣམ་ཐར་གཅིག། ཀུན་བཟང་རྫོགས་པ་ཆེན་པོ་གཉིས།། སྐྱབས་གཅིག་ཡིད་བཞིན་ནོར་བུ་གསུམ།། བདག་གི་འདི་ཕྱི་བར་དོའི་སྐྱབས།། སངས་རྒྱས་པདྨ་འབྱུང་གནས་གཅིག། དམ་ཆོས་ཀུན་བཟང་བླ་མ་གཉིས།། དགེ་འདུན་མི་ལའི་རྣམ་ཐར་གསུམ།། བསླུ་མེད་ནང་གྲོགས་རྣམ་གསུམ་ལགས།། ——-ཨེ་མ་ཧོས།