ཨེ་ཝྃ་ཧོ།

རྫོགས་ཆེན་སྐྱབས་མགོན་ལྔ་པ་ཐུབ་བསྟན་ཆོས་ཀྱི་རྡོ་རྗེའི་དག་སྣང་།࿑ གྲུབ་དབང་རྫོགས་ཆེན་པ་སྐྱབས་མགོན་ལྔ་བ་ཐུབ་བསྟན་ཆོས་ཀྱི་རྡོ་རྗེ་དག་པའི་སྣང་བར་ཟངས་མདོག་དཔལ་རིར་བྱོན་པའི་ལོ་རྒྱུས་འབྲེལ་ཚད་ཐར་ལམ་འདྲེན་པའི་ལམ་སྒྲོན་ཞེས་བྱ་བ་བཞུགས་སོ།། ལྕགས་སྤྲེལ་ལོར་མཚམས་སྤྲུལ་རིན་པོ་ཆེས་ལུང་བསྟན་ལ། ད་ལོའི་རང་ལོའི་སྟེང་འདན་སེང་གེ་གནམ་རྫོང་ལྟ་བུ་ཞིག་ལ་བསྡད་ན་གསུངས་པ་ལྟར། སེང་གེ་གནམ་རྫོང་དང་པདྨ་རི་མཐོ་གཉིས་ཀྱི་མདུན་ཞོལ་དུ་གནས་འབྲེལ་བསྡད་སྐབས། སྤྲེལ་ལོ་སྤྲེལ་ཟླ་ར་བའི་ཚེས་བཅུའི་ནུབ་མོའི་མནལ་ལམ་དུ་སྐད་ཅིག་གིས་རོལ་བའི་མཚོ་བདུན་ཞིག་གི་མཚོ་འགྲམ། རི་དང་བྱེ་མ་ཐམས་ཅད་གསེར་ཅན་རེད་ཡོད་པ་ཞིག་ཏུ་ཤར་ཕྱོགས་སུ་བྲག་ཕུག་ཤིན་ཏུ་ཆེ་བ་ཡོད་པའི་ནང་དུ་གུ་རུ་རིན་པོ་ཆེ་བདེ་བ་ཆེན་པོའི་ཆས་ཅན་གྱི་མདུན་དུ་སླེབས། དེའི་མདུན་ན་གཡས་སུ་འཇམ་མགོན་བླ་མ་འཇམ་དབྱངས་མཁྱེན་བརྩེ་དབང་པོ། གཡོན་དུ་ཀོང་སྤྲུལ་ཡོན་ཏན་རྒྱ་མཚོ་སོགས། གཞན་ཡང་འཇམ་མགོན་མི་ཕམ་རིན་པོ་ཆེ། དཔལ་སྤྲུལ་འཇིགས་མེད་ཆོས་ཀྱི་དབང་པོ། ཀུན་བཟང་ཐེག་མཆོག་རྡོ་རྗེ། འཇིགས་མེད་ཆོས་དབྱིངས་འོད་གསལ། མཁན་ཆེན་པདྨ་བཛྲ། དགེ་བཤེས་ལུང་རྟོགས་རྒྱ་མཚོ། རྡོ་གྲུབ་ཀུན་བཟང་གཞན་ཕན། རྫ་རྒྱལ་མཚམས་སྤྲུལ་པདྨ་ཀུན་བཟང་སོགས་བདག་ཅག་གི་རྩ་བའི་བླ་མ་རྣམས་ཀྱིས་གཙོས་པའི་བླ་སྤྲུལ་ངོ་མི་ཤེས་པ་མང་པོ་བཞུགས་པའི་གྲལ་མཐར་རང་འདུག བླ་མ་བདེ་མཆོག་འཁོར་ལོའི་ཚོགས་གསུངས་ནས་ཚོགས་ཀྱི་འཁོར་ལོ་རྒྱ་ཆེན་བསྐོར། དེ་ནས་ཡང་རོལ་མཚོའི་གླིང་བར་ཞིག་གི་མཚོ་འགྲམ་དུ་བྲག་ཕུག་ཅིག་གི་ནང་རིན་པོ་ཆེའི་ཁྲི་སྟེང་དུ་འཇམ་དབྱངས་མཁྱེན་བརྩེ་དབང་པོ་རབ་བྱུང་གི་ཆས་ཅན་བཞུགས། མདུན་ངོས་སུ་གུ་རུའི་ཞལ་ཐང་ཞིག་བཤམས། དེའི་མདུན་ནས་བཱི་མ་སྙིང་ཐིག་གི་དབང་ཞིག་ཐོབ་པ་རྨིས། དེ་ནས་རིགས་ཀྱི་བུ་ཁྱོད་རང་ལྷོ་ནུབ་པདྨ་འོད་ཀྱི་ཕོ་བྲང་དུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་མཇལ་བར་འདོད་ན་ད་ལྟ་འགྲོ་གསུངས། བདག་གིས་ཀྱང་དེ་ལྟར་གསོལ་བ་འདེབས་པར་ཞུ་ཞེས་པས། དེ་མ་ཐག་ཏུ་སེང་གེ་དཀར་མོ་སྒ་སྲབ་དང་ལྡན་པ་ཞིག་དང་ རྟ་དཀར་ཞིག་བཅས་མཁའ་འགྲོ་དཀར་སེར་དམར་ལྗང་མཐིང་བཅུ་དྲུག་སྤྲིན་གཏིབས་པ་ལྟར་ཕེབས་ནས། འཇམ་མགོན་བླ་མས་སེང་གེ་བཅིབས་ནས་མཁའ་འགྲོ་མཐིང་ཀ་གཅིག་གིས་ཆིབས་ཁ་ཁྲིད། བདག་ཀྱང་རྟ་དཀར་པོ་ལ་ཞོན་ནས་མཁའ་འགྲོ་རྣམས་སྤྲིན་གཏིབས་པ་ལྟར་དང་མཉམ་དུ་ལྷོ་ནུབ་ཀྱི་ནམ་མཁར་ཕྱིན་ཏེ། སྐད་ཅིག་གིས་བྲག་རི་དམར་པོ་སྙིང་གི་དབྱིབས་ཅན་རྩེ་མོ་གནམ་དུ་ཟུག་པ་དེའི་སྟེང་དུ་ཕོ་བྲང་སུམ་བརྩེགས་གཡས་གཡོན་དུ་ཉི་མ་ཟླ་བ་ཤར་བ། སྐེད་པར་གཡུ་ཡི་ན་བུན་འཁྲིགས་པ། རྩ་བར་རྒྱ་མཚོ་ཆེན་པོས་བསྐོར་བ། མེ་ཏོག་སྣ་ཚོགས་ཀྱི་ཆར་འབེབས་པ། དེའི་ཕྱི་རོལ་ཏུ་སྲིན་པོའི་གྲོང་ཁྱེར་མ་ཡིན་པའི་གྲོང་ཁྱེར་མང་པོས་བསྐོར་བ། དེའི་ཕྱི་རོལ་ཏུ་རྒྱ་མཚོས་བསྐོར་བ། དེའི་ཕྱི་རོལ་ཏུ་བྲག་རི་དམར་པོས་བསྐོར་བ། དེའི་ཕྱི་རོལ་ཏུ་སྲིན་པོའི་གྲོང་ཁྱེར་ཉེར་གཅིག དེའི་ཕྱི་རོལ་ཏུ་བྲག་རི་དམར་པོས་བསྐོར་བ། ཆུའི་བར་མཚམས་སུ་རི་རྒྱལ་གྱི་རྩ་བའི་བར་ལྕགས་ཀྱི་ཟམ་པ་ཡོད་པ་ཟམ་སྲུང་ཐམས་ཅད་སྲིན་པོ་མགོ་དགུ་པ་ཅན་མགོ་གསུམ་པ་ཅན་སོགས་སྣ་ཚོགས་ཡོད་པ། ལག་ན་སྟ་རེ། རལ་གྲི། ཐོ་བ་སོགས་འཛིན་པ་སྣ་ཚོགས་ཡོད། ལྷོ་ནུབ་ཀྱི་ནམ་མཁའ་ནས་མར་བབས་སྟེ་ཕོ་བྲང་གཡས་བསྐོར་གྱིས་འཇམ་མགོན་བླ་མ་དང་ལྷན་ཅིག་ཏུ་པདྨ་འོད་ཀྱི་གཞལ་ཡས་ཁང་ཆེན་པོའི་ཤར་ཕྱོགས་སུ་ཐོན། ཐོག་མ་ཕོ་བྲང་ཆེན་པོའི་ཕྱི་རོལ་ནས་གཡས་བསྐོར་གྱིས་གཡུ་འབྲུག་ལྡིར་བཞིན་པ་ནམ་མཁའ་ནས་འཁྱུགས་ཏེ་འོང་བ་དང་། ཁྱུང་སྔོན་པོ་འཕུར་སྟབས་དང་། གངས་ཀྱི་སེང་གེ་དཀར་མོ་རྔམ་སྟབས། རྒྱ་སྟག་མཆོང་སྟབས་ཀྱིས་ཐོན་ཏེ་ཕོ་བྲང་ཤར་ཕྱོགས་སུ་ཐོན། ཕོ་བྲང་གི་འགོ་ཁང་གི་ཤར་སྒོ་ནས་རིམ་བཞིན་སོག་པོ་གཉིས། རྒྱ་གཉིས། ཁ་ཆེ་གཉིས། བལ་བོ་གཉིས། གནོད་སྦྱིན་གཉིས། ཨ་ཙ་ར་གཉིས། ཐོར་ཅོག་ཅན། དགེ་སློང་རྩེ་དྲུང་ཆས་ཅན་གཉིས། རྒྱ་གར་ཨ་ཙ་ར་གོས་སེར་པོ་ཅན་གཅིག གཟན་དམར་པོ། ཞྭ་སེར་པོ། མི་ཚེ་རིང་སྐྲ་དང་རྒྱ་དཀར་པོ། སྟོད་གོས་སྔོན་པོ། སྨད་ཤམ་དམར་པོ་ཅན་བཅས་རིམ་བཞིན་སེར་ཕྲེང་གིས་ཕེབས། ཤར་དུ་སོག་པོ་གཉིས། ལྷོར་རྒྱ་གཉིས། ནུབ་ཏུ་ཨ་ཙ་ར་གཉིས། བྱང་དུ་གནོད་སྦྱིན་གཉིས། ཤར་ལྷོར་ཁ་ཆེ་གཉིས། ལྷོ་ནུབ་བལ་བོ་གཉིས། ནུབ་བྱང་དགེ་སློང་གཉིས། བྱར་ཤར་མོན་པ་གཉིས། ཐམས་ཅད་འགྲེངས་ཏེ་ཁ་ནང་དུ་ཕྱོགས་པ། དེའི་ཕྱི་རོལ་ཕྱོགས་བཞིར་ཤར་དུ་སེང་གེ་རྔམ་སྟབས། ལྷོར་གཡུ་འབྲུག་འཁྱུགས་སྟབས། ནུབ་ཏུ་ཁྱུང་འཕུར་སྟབས། བྱང་དུ་སྟག་མཆོང་སྟབས་བྱེད་པ། དབུས་སུ་ཨ་ཙ་ར། དེའི་མདུན་དུ་མི་ཚེ་རིང་གཉིས་དྲི་བ་དྲིས་ལན་སྣ་ཚོགས་མཛད་པ། དེ་ནས་སེང་གེ་འབྲུག་ཁྱུང་སྟག་རྣམས་གཡས་བསྐོར་གྱིས་ཕྱི་རོལ་གྱི་བྲག་རི་དམར་པོའི་ནང་། ཤར་སེང་གེ། ལྷོར་གཡུ་འབྲུག ནུབ་ཏུ་ཁྱུང་། བྱང་དུ་སྟག་རྣམས་འཁོད། དེ་ནས་རིམ་བཞིན་ཤར་གྱི་སོག་པོ་ནས་རིམ་བཞིན་གཡས་སྐོར་གྱིས་སྒོ་ནང་ཡར་ཕེབས། དེ་མ་ཐག་ཏུ་ཕོ་བྲང་རིམ་པ་གསུམ་གྱི་ཁང་སྟེང་ནས་དར་། གདུགས། འཕན། རྒྱལ་མཚན། ཕྱེ་ཕུར། བ་དན། རྔ་ཡབ་ནོར་བུའི་ཡུ་བ་ཅན། ལ་ཤགས། རྔ། རོལ་མོ། བསིལ་སྙན། དུང་དཀར། དུང་དམར། རྒྱ་གླིང་།…

རྗེ་བཙུན་འཇམ་དབྱངས་ཡབ་ཡུམ་དྲན་པ་ཡེ་ཤེས་མེ་ལོང་།།ན་མོ་མ་ཧཱ་གུ་རུ་མཉྫུ་ཤྲཱིཿགྷོ་ཥ་ཡ།༡༽ཇི་ལྟ་མཁྱེན་པའི་དབྱིངས་ལ་འབྱམས་སུ་ཀླས།།ཇི་སྙེད་རིག་པའི་འཇམ་དཔལ་ཡེ་ཤེས་དབྱངས།།ཇི་བཞིན་དོན་སྟོན་རྒྱལ་ཀུན་ཡབ་གཅིག་ཉིད།།ཇི་སྲིད་འཁོར་འདས་མ་སྟོང་བར་དུ་བསྙེན།།༢༽ཀ་དག་འཇམ་པའི་ངོ་བོ་ཀུན་ལ་ཁྱབ།།ལྷུན་གྲུབ་དཔལ་གྱི་རང་བཞིན་འོད་དུ་གསལ།།ཟུང་འཇུག་ཡེ་ཤེས་སེམས་དཔའི་གཏེར་ཆེན་པོ།།གཞོན་ནུ་བུམ་སྐུའི་སྙིང་པོ་འཇམ་དཔལ་དབྱངས།།༣༽གནས་ཆེན་རི་བོ་རྩེ་ལྔའི་ཞིང་གི་དབུས།།བྱང་སེམས་བརྟེན་གྱི་ཛམ་བུ་བྲི་ཤིའི་ལས།།གསེར་ལྟར་རྫུས་སྐྱེས་བལྟམས་པའི་འཇམ་དཔལ་དབྱངས།།གཟུངས་སྤོབས་གཏེར་གྱི་བདག་པོ་མཆོག་ལ་གུས།།༤༽མ་རིག་རྨོངས་པ་གཅོད་པའི་རལ་གྲི་འཛིན།།མཁྱེན་རབ་ཡེ་ཤེས་མཚོན་བྱེད་གླེགས་བམ་སྐྱོང་།།རྫོགས་པ་ཆེན་པོའི་རང་བཞིན་སྤེལ་མཁས་ཕྱིར།།མ་ལུས་འགྲོ་ཀུན་ཉིད་དང་མཚུངས་པར་ཤོག།༥༽མེད་སྣང་བདེན་པ་གཟུང་བའི་བྱིས་པ་ལ།།འཇམ་དཔལ་སྒྱུ་འཕྲུལ་དྲ་བའི་དཀྱིལ་འཁོར་ལས།།ཕྱི་ནང་གསང་བའི་ཡེ་ཤེས་དེ་ཁོ་ནས།།སྨིན་གྲོལ་སྐལ་བཟང་སྩོལ་པའི་གཏེར་ཆེན་དྲན།།༦༽བཅུ་དྲུག་ལང་ཚོ་རྒྱས་པའི་དུས་བཟང་ལ།།ཆོས་རྗེ་དམ་པ་ཡིད་བཞིན་ནོར་བུ་དང་།།ཁྲི་ཕྲག་འཁོར་བཅས་བཟང་པོ་སྤྱོད་པའི་དཔལ།།སྨོན་ལམ་རྒྱ་མཚོ་མཉམ་དུ་རོལ་བར་དྲན།།༧༽མདོ་རྒྱུད་མན་ངག་འཇམ་དཔལ་སྙིང་ཐིག་ཆོས།།ཐོས་བསམ་སྒོམ་པའི་སྙིང་གི་གེ་སར་བརྟས།།བཀའ་དྲིན་ཟླ་བྲལ་བླ་མ་རིན་པོ་ཆེས།།བྱིན་རླབས་དངོས་གྲུབ་གནང་བར་ཡང་ཡང་དྲན།།༨༽དད་པའི་ཡིད་ངོར་ཡི་དམ་འཇམ་དཔལ་དབྱངས།།དུང་བའི་ཕྱག་རྒྱ་ལྷ་མོ་དབྱངས་ཅན་མ།།དྲག་སྣང་རིག་པའི་རྒྱན་དུ་གཤིན་རྗེ་གཤེད།།འཇམ་དཔལ་ཡིད་བཞིན་ནོར་བུ་རྟག་ཏུ་བརྟན།།༩༽གདོད་མའི་ཆོས་ཉིད་འཇམ་དཔལ་ཀུན་ཏུ་བཟང་།།བྱང་ཆུབ་སེམས་ཉིད་དོན་དམ་འཇམ་དཔལ་དབྱངས།།རྫོགས་ཆེན་འཇམ་དཔལ་བཤེས་གཉེན་དགོངས་ཀློང་རོལ།།འདུ་འབྲལ་མ་དམིགས་ཆོས་སྐྱོང་དམ་ཅན་རྒྱལ།།༡༠༽བླ་མ་འཇམ་དཔལ་དབྱངས་དངོས་ཀུན་མཁྱེན་རྗེ།།ནམ་ཡང་འབྲལ་བ་མེད་པའི་ལྷག་པའི་ལྷ།།སྐལ་བཟང་རིག་པའི་གཏེར་ཆེན་མ་ཎི་ཀ།དྲན་པ་ཡེ་ཤེས་མེ་ལོང་ཀུན་གསལ་ཤོག།ཅེས་པ་འདི་ཡང་རབ་གནས་ལྕགས་བྱིའུ་ནག་ཟླའི་རྗེ་བཙུན་འཇམ་དཔལ་དབྱངས་ཀྱི་འཁྲུངས་སྐར་ཡིན་པར་མཁའ་འགྲོ་དམ་པའི་གསུང་སྐུལ་བཞིན་དུ་རིག་འཛིན་ཨེ་མ་ཧོས་ཨེ་ཝཾ་ཀ་དག་ཕོ་བྲང་ནས་སྨོན་པར་དོན་དང་ལྡན་པར་གྱུར་ཅིག་གུ།། །།

ཞི་ལྷག་སྒོམ་ཐབས་ཀྱི་མན་ངག་ཡིད་བཞིན་ནོར་བུ།།ན་མོ་མ་ཧཱ་གུ་རུ་ཀཱ་ཡ་ཏྲ་ཡཱ་ཡ།།ཕུང་ཁམས་ཡོངས་བཟང་བདེ་བཤེགས་ངོ་བོར་དག།དབང་ཤེས་མ་ལུས་སེམས་དཔའ་སེམས་མར་རྫོགས།།ཡན་ལག་ཀུན་ཀྱང་ཁྲོ་བོ་ཁྲོ་མོར་སྨིན།།ཞི་ཁྲོ་རྒྱལ་བའི་དཀྱིལ་འཁོར་ཕྱག་འཚལ་ལོ།།སྤྱི་བོའི་གཙུག་ཏུ་བརྒྱུད་གསུམ་བླ་མ་བཞུགས།།ཀླད་པར་ཁྲག་འཐུང་ཁྲོ་བོའི་གཞལ་ཡས་ཁང་།།མགྲིན་པར་རིག་འཛིན་རྨི་ལམ་འོད་གསལ་ཞིང་།།སྙིང་ཀའི་དཀྱིལ་འཁོར་ཞི་བའི་ལྷ་ཚོགས་གསལ།།ལྟེ་བ་ཡེ་ཤེས་རྒྱལ་བའི་ཚོགས་ཞིང་བཀྲ།།གསང་གནས་བདེ་ཆེན་རིག་མའི་སྒྱུ་འཕྲུལ་ངོམས།།རྩ་རླུང་ཐིག་ལེར་སྐུ་གསུམ་གཉུག་མའི་ངང་།།འཁོར་འདས་རྒྱལ་སར་ཕྱིན་པའི་ཞལ་ལ་བལྟའ།།སྣང་སྲིད་རྣམ་པར་དག་པའི་ངོ་བོ་ལས།།བདེ་ཆེན་ལྷན་སྐྱེས་རྫོགས་པའི་རང་བཞིན་རྩལ།།རིག་པ་ཆོས་སྐུར་སྨིན་པའི་ཐུགས་རྗེའི་བདག།དད་དང་དམ་ཚིག་གཙང་མས་སྒོམ་ལ་འཇུག།ལྟ་བ་སྤྲོས་བྲལ་འཛིན་མེད་ཀ་ནས་དག།སྒོམ་པ་འོད་གསལ་སྙིང་པོ་ལྷུན་གྱིས་རྫོགས།།འབྲས་བུ་སངས་རྒྱས་ཡེ་ཤེས་ཡོངས་སུ་སྨིན།།སྤྱོད་པ་རྒྱལ་སྲས་བྱང་ཆུབ་སེམས་དཔའ་གྱུར།།སྣང་བ་ལྷ་ཡི་དཀྱིལ་འཁོར་གསལ་དག་བརྟན།།གྲགས་པ་སྔགས་ཀྱི་བཟླས་པ་ཚད་དུ་ཕེབས།།དྲན་རྟོག་རིག་པ་ཡེ་ཤེས་སེམས་དཔའི་ངང་།།བསྟན་དང་འགྲོ་བའི་དོན་ཀུན་ལྷུན་གྱིས་གྲུབ།།ཅེས་པ་རབ་གནས་ལྕགས་བྱིའི་སྲིད་གསུམ་རྣམ་རྒྱལ་དུས་ཆེན་གྱི་དཀར་ཕྱོགས་རྒྱལ་བ་དང་པོར་མཁའ་འགྲོ་རིག་འཛིན་དབྱངས་ཅན་ལྷ་མོས་ངོར་རྒྱལ་ཁམས་པ་ཨེ་མ་ཧོས་ཨེ་ཝྃ་སྣང་མུན་ཐོད་བརྒལ་སྒོམ་ཁང་དེ་ཉིད་དུ་བགྱིས་པས་འགྲོ་ཀུན་ཞི་ལྷག་ཏིང་འཛིན་རྒྱ་མཚོ་ལ་ལོངས་སུ་སྤྱོད་པའི་རྒྱུ་རུ་གྱུར་ཅིག་གུ།། ཤྲཱིཿསརྦ་ཝི་རི་ཏ་བི་ཛ་ཡནྟུ།། །།