ཨེ་ཝྃ་ཧོ།

བཛྲ་གུ་རུ་ཉམས་སུ་ལེན་པའི་ཐབས།ཧོར་ཟླ་གསུམ་པ་དབྱར་ར་སྦྲུལ་ནག་ཟླར་གྱི་ཚེས་བཅུ་ནི་གུ་རུ་རིན་པོ་ཆེས་ཟ་ཧོར་རྒྱལ་པོ་གཙུག་ལག་འཛིན་གྱི་སྲས་མོ་ཡེ་ཤེས་ཀྱི་མཁའ་འགྲོ་ལྷ་ལྕམ་མནྡ་ར་བ་ཕྱག་རྒྱར་མཛད་དེ་འཆི་མེད་ཚེ་ཡི་རིག་འཛིན་མངོན་དུ་མཛད་པའི་ཚུལ་དང་དེ་ཉིད་ཀྱི་རྒྱལ་ཁམས་ཆོས་ལ་འགོད་པར་མཛད་པའི་དུས་སུ་རྒྱལ་བློན་རྣམས་ཀྱིས་མེ་དཔུང་རབ་ཏུ་འབར་བ་ཆེན་པོར་གསོན་བསྲེག་བྱས་པའི་ཚེ་ན་འབར་བའི་མེ་ཡང་བསིལ་བའི་ཆུར་བསྒྱུར་ཏེ་མེ་དཔུང་ཆེན་པོ་འབར་བའི་དབུས་སུ་དྭངས་པའི་མཚོ་ཆེན་པོ་པདྨའི་སྡོང་པོར་བལྟ་བས་མི་ངོམ་པའི་ཁྱེའུ་འཇའ་འོད་ཀྱི་ཀློང་དུ་ངོ་མཚར་རྨད་དུ་བྱུང་བ་རྫུ་འཕྲུལ་གྱི་བཀོད་པ་སུ་རྩེན་ཏེ་སུམ་ཅུ་རྩ་གསུམ་གྱི་ལྷ་ཡིས་མཆོད་ཅིང་བསྟོད་པའི་རྣམ་རོལ་མཐའ་ཡས་པ་བསྟན་པས་རྒྱལ་བློན་འཁོར་བཅས་ཀྱིས་ཀྱང་རབ་ཏུ་གནོང་འགྱོད་ཀྱིས་ཕྱག་དང་མཆོད་བསྟོད་བསྙེན་བཀུར་ཞུས་ཏེ་ཆོས་ཀྱིས་སྨིན་པར་མཛད་པས་འཆི་མེད་པདྨ་འབྱུང་གནས་སུ་གྲགས་པའི་དུས་ཆེན་ཏེ། འདི་བཟུང་བས་ཕྱོགས་གང་དུ་འགྲོ་ཡང་བསམ་པའི་དོན་ཐམས་ཅད་འབད་མེད་དུ་འགྲུབ་ཅིང་བཀྲ་མི་ཤིས་པ་མ་ལུས་ཞི་ཞིང༌། མཐར་ཐུག་ཚེ་དབང་རིག་འཛིན་འཐོབ་པར་གྱུར་བ་དང༌། སྟོན་པས་འདིའི་ཚེས་བཅོ་ལྔ་ལ་དཔལ་ལྡན་འབྲས་སྤུང་གི་མཆོད་རྟེན་ཆེན་པོར་ཆོས་རྒྱལ་ཆེན་པོ་ཟླ་བ་བཟང་པོ་ལ་སོགས་པར་དཔལ་གཉིས་སུ་མེད་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོ་གསུང་བར་མཛད་པའོ།། ༄༅། །བཛྲ་གུ་རུ་ཉམས་སུ་ལེན་པའི་ཐབས་མན་ངག་ཡིད་བཞིན་ནོར་བུ་ཏོག་གི་བློ་གྲོས་ཞེས་བྱ་བ་བཞུགས་སོ། ། ༄༅། །ན་མོ་གུ་རུ་བཛྲ་མ་ཧཱ་མུ་དྲཱ་ཡ། རྒྱལ་ཀུན་མཚན་དཔེ་གཅིག་ཏུ་འདུས་པའི་དཔྱིད། །རྒྱལ་གསུང་རབ་འབྱམས་རྒྱ་མཚོ་འདུས་ཐིག་ལེ། །རྒྱལ་ཀུན་ཡེ་ཤེས་ངོ་བོ་ཀུན་ཏུ་བཟང་། །རྒྱལ་མཆོག་པདྨ་ཐོད་ཕྲེང་རྩལ་ལ་འདུད། །ཚེ་གཅིག་བྱང་ཆུབ་མཆོག་གི་དོན། །གཅིག་ཆོག་བློ་བདེ་ཟབ་པའི་བཅུད། །བཛྲ་གུ་རུའི་ཉམས་ལེན་ཚུལ། །རང་གི་འདོད་བཞིན་བརྗོད་པར་བྱ། །དེ་ཡང་དལ་འབྱོར་རྙེད་དཀའ་དང་མི་རྟག་འཆི་བ་ལས་རྒྱུ་འབྲས་འཁོར་བའི་ཉེས་དམིགས་ཐར་པའི་ཕན་ཡོན་རྣམས་ཀྱིས་བློ་རྒྱུད་འཁོལ་ཞིང་འཁོར་བས་དུབ་པ་དང་། མྱང་འདས་ལ་ངེས་པར་འབྱུང་བའི་བསམ་པ་དང་ཁྱད་པར་ལྷག་པའི་བསམ་པ་མི་དམན་པ་སྙིང་ཐག་པ་ནས་སྐྱེ་བ་གལ་ཆེ་ཞིང་། དེ་ནས་རྡོ་རྗེ་ཐེག་པའི་འཇུག་ངོགས་དབང་བསྐུར་གང་རུང་ཞིག་ལེགས་པར་ཐོབ་ཅིང་དེའི་དམ་ཚིག་བཅས་པ་མ་ཉམས་པས་ལམ་ཉམས་སུ་ལེན་པའི་སྙིང་པོ། སྤྱིར་འདུལ་དཀའ་བའི་འགྲོ་བ་མཐའ་དག་དང་། ཁྱད་པར་གདོང་དམར་བོད་ཀྱི་གདུལ་བྱ་རྣམས་ཀྱི་བླ་མ་དང་དཀྱིལ་འཁོར་ལྷའི་ངོ་བོ་ཐ་མི་དད་པ། སངས་རྒྱས་གཟི་བརྗིད་འོད་དཔག་ཏུ་མེད་པའི་ངོ་བོ་ཨོ་རྒྱན་གྱི་སློབ་དཔོན་ཆེན་པོའི་ཚུལ་བསྟན་པ་གུ་རུ་པདྨ་འབྱུང་གནས་སུ་ངེས་ཤིང་གྲུབ་ལ། དེའི་སྒྲུབ་ཐབས་ཀྱི་རིམ་པ་བསམ་གྱིས་མི་ཁྱབ་པ་ལས། འདིར་ཚིག་བདུན་གསོལ་འདེབས་ཀྱི་མན་ངག་དང་མཐུན་པར་ཉམས་སུ་ལེན་པའི་ཚུལ་ནི།ཐོག་མར་བདག་དང་མཁའ་ཁྱབ་ཀྱི་སེམས་ཅན་ཐམས་ཅད་སྐྱབས་གནས་དཀོན་མཆོག་རྩ་གསུམ་ཀུན་འདུས་ཀྱི་ངོ་བོ་གུ་རུ་པདྨ་འབྱུང་གནས་ལ་སྐྱབས་སུ་མཆིའོ་སྙམ་ཞིང་ངག་ནས། ཨོཾ་ཨཱཿཧཱུྃ། དུས་འདི་ནས་བཟུང་བྱང་ཆུབ་མ་ཐོབ་བར། །སྐྱབས་གནས་མཆོག་གྱུར་རྣམས་ལ་སྐྱབས་སུ་མཆིའོ། །ཞེས་བརྗོད། ནམ་མཁའི་མཐའ་དང་མཉམ་པའི་སེམས་ཅན་འདི་རྣམས་འཁོར་བའི་སྡུག་བསྔལ་བཟོད་གླགས་མེད་པ་ཉམས་སུ་མྱོང་དགོས་པ་སྙིང་རེ་རྗེ། ཀུན་དྲིན་ཆེ་བ་ཕ་མའི་རང་བཞིན་ཡིན་པས་བདག་གིས་ཅི་ནས་ཀྱང་སངས་རྒྱས་ཀྱི་ས་ལ་འགོད་དགོས། དེའི་ཆེད་དུ་ཡང་ཟབ་བླ་མའི་སྒྲུབ་པ་ལ་འབད་པར་བྱའོ་སྙམ་ནས། སེམས་བསྐྱེད་འགྲོ་བ་ཀུན་དོན་དུ། །ཡང་གསང་བླ་མ་བསྒྲུབས་ནས་ནི། །གང་ལ་གང་འདུལ་ཕྲིན་ལས་ཀྱིས། །འགྲོ་དྲུག་བསྒྲལ་བར་དམ་བཅའ་འོ། །ཞེས་བརྗོད་ཅིང་དབུགས་གཏོང་རྔུབ་དགེ་སྡིག་གཏོང་ལེན་གྱི་དམིགས་པ་ཡང་ཅི་ནུས་བྱའོ། །དེ་ནས་མཁའ་ཁྱབ་རྒྱལ་བའི་དཀྱིལ་འཁོར་ཀུན་གྱི་ངོ་བོ་གུ་རུའི་སྐུ་ལས་བདུད་རྩིའི་རྒྱུན་བྱུང་། དེས་བདག་གི་སྡིག་སྒྲིབ་དག་པར་བསམས་ལ། ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་ཌཱི་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུྃ། ཧ་ཧ་ཧ་ཧ་ཧོཿབྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །ཞེས་བརྗོད། བླ་མ་བདུད་རྩིའི་རང་བཞིན་དུ་བདག་ལ་ཐིམ། བདག་གི་མ་དག་པའི་ཕུང་པོ་ཁམས་དང་སྐྱེ་མཆེད་ཀུན་བརྟགས་ཀྱི་རྟེན་དང་བརྟེན་པར་བཅས་པ་རྣམས་བདག་མེད་པ་རང་བཞིན་གྱིས་སྟོང་པར་གྱུར། སྟོང་པའི་ངང་ལས་སེམས་ཉིད་ཀྱི་རང་མདངས་གཉུག་མའི་ལུས་ཡི་དམ་ལྷའི་སྐུར་གྱུར། དེ་ཡང་རྒྱུད་སྡེ་བཞི་དྲུག་གི་ཡི་དམ་ལྷ་གང་འདོད་པ་ཞིག་གསལ་གདབ། དེའི་མདུན་གྱི་ནམ་མཁའི་གནས་སམ་ཡན་ལག་ལྔ་ཡི་མཆོག་དང་སྙིང་གའི་དབུས་སོགས་གང་ཡང་རུང་བར། སྐྱབས་གནས་ཀུན་འདུས་རྩ་བའི་བླ་མ་དང་དབྱེར་མ་མཆིས་པ་གུ་རུ་པདྨ་འབྱུང་གནས་ཀྱི་རྣམ་པ་སྐུའི་ཆ་ལུགས་སྤྱི་དང་མཐུན་པར་ཚིག་འདིས་གསལ་བཏབ་སྟེ། ཆོས་དབྱིངས་མཁའ་ཁྱབ་ཡེ་ཤེས་འོད་སྣང་དབུས། །སེང་ཁྲི་པདྨ་སྟོང་ལྡན་ཉི་ཟླའི་གདན། །རྒྱལ་ཀུན་སྐུ་གསུང་ཐུགས་ཀྱི་རྡོ་རྗེ་སེམས། །པདྨ་འབྱུང་གནས་སངས་རྒྱས་འོད་དཔག་མེད། །སྐུ་མདོག་དཀར་དམར་མཚན་དཔེ་ཡོངས་སུ་རྫོགས། །ཕྱག་གཉིས་རྡོ་རྗེ་ཐོད་པ་ཚེ་བུམ་བསྣམས། །ཁ་ཊྭཱཾ་གྲུ་འཁྱུད་ཞབས་གཉིས་རྡོ་རྗེའི་སྐྱིལ། །གསང་ཕོད་ཆོས་གོས་ཟ་འོག་བེར་ཕྱམ་བཀླུབས། །དབུ་ལ་པད་ཞུ་ཌཱ་ཀིའི་སྤྲིན་ཕུང་གསོལ། །རྒྱན་ཚོགས་བསམ་འཕེལ་ནོར་བུ་དུ་མས་སྤྲས། །གནས་གསུམ་རྡོ་རྗེ་གསུམ་གྱུར་ཨོཾ་ཨཱཿཧཱུྃ། །ལྟེ་བར་ཡེ་ཤེས་རྡོ་རྗེ་ཧྲཱིཿཡིས་མཚན། །དེ་ལྟར་གུ་རུའི་གནས་གསུམ་དང་ལྟེ་བའི་ཧྲཱིཿལས་འོད་ཟེར་ལྕགས་ཀྱུའི་དབྱིབས་ཅན་འཕྲོས་ཏེ། མཁའ་ཁྱབ་ཀྱི་བླ་མ་ཡི་དམ་སངས་རྒྱས་བྱང་སེམས་རིག་འཛིན་དཔའ་བོ་མཁའ་འགྲོ་རྣལ་འབྱོར་ཆོས་སྐྱོང་སྲུང་མའི་ཚོགས་མ་ལུས་མི་ལུས་ལུས་པ་མེད་པ་ཐམས་ཅད་དཔུང་གིས་བྱོན་ཏེ་གུ་རུའི་སྐུ་ལ་ཐིམ་པར་བསམས་ནས་ཚིག་བདུན་གྱིས་གསོལ་བ་གདབ་པ་ནི། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃ། །ཞེས་ཚར་གྲངས་ཅི་ལྕོགས་བརྗོད། དེ་ནས་སྐྱབས་ཡུལ་ཀུན་འདུས་གུ་རུའི་དྲུང་དུ་རང་གི་ཡིད་ལས་སྐྱེས་པའི་ཏིང་ངེ་འཛིན་གྱི་མཆོད་པའི་སྤྲིན་གྱིས་ཀུན་ནས་མཆོད་པར་བྱ་སྟེ། དེ་ཡང་། མཁའ་ཁྱབ་ཀུན་བཟང་རོལ་པའི་སྤྲིན་ཕུང་ཉིད། །དགྱེས་མཆོད་སྤྱི་དང་ཁྱད་པར་དམ་ཚིག་རྫས། །བདེ་སྟོང་ཁ་སྦྱོར་རོལ་པའི་མཆོད་པར་བཅས། །ཟབ་གསལ་བདེ་ཆེན་དབྱིངས་སུ་མཆོད་པར་བགྱི། །ཞེས་དང་། ཁྱད་པར་དུ་གདུང་ཤུགས་དྲག་པོ་བསྐྱེད་དེ། བདག་གི་འཁོར་གཉེན་གཅེས་པའི་ལུས་དོན་དབང་། །ཚེ་སྲོག་བསོད་ནམས་དུས་གསུམ་དགེ་ཚོགས་བཅས། །སྐྱབས་གནས་ཀུན་འདུས་གུ་རུ་མཆོག་ལ་འབུལ།…

གནམ་གཤིས་དང་སྐྱེད་ཚལ།།ཨེ་མ་ཧོ།།༡༽དྲི་ཞིམ་ཆུ་སྐྱེས་བཞད་པའི་སྐྱེད་ཚལ་ན།།ཁོ་རོ་ན་ཡིས་བཟང་བཙོན་བྱས་པའི་འོག།རྨི་ལམ་ངང་ནས་དག་པའི་ཞིང་ཁམས་མཇལ།།དགའ་སྐྱོ་འདྲིས་མའི་བར་ནས་གཉིད་ལས་སད།།༢༽ཐུན་བཞི་ལས་དྲུག་ཚང་བས་རྩ་གསུམ་བསྙེན།།སེ་ཁྱུང་དབྲ་རིགས་བསམ་ནས་སྔོན་འགྲོ་བཤད།།དམ་པ་གོང་མར་སྙན་འཕྲིན་ཀློང་བས་འབྲེལ།།སྙིང་གི་ཆོས་མཆེད་འགའ་དང་ནང་གཏམ་བགྲོས།།༣༽སྦྲང་ཆར་སིལ་སིལ་བབས་ཏེ་ནོར་འཛིན་བརླན།།རྩི་ཤིང་ནགས་ཚལ་ཡིན་ཡང་སྤྱན་ཆབ་བསིལ།།ནད་རིམས་མྱུར་ཏུ་ཞི་བའི་སྨོན་བཏབས།།འགྲོ་ཀུན་སངས་རྒྱས་ཐོབ་ཕྱིར་བསྔོ་བ་བྱས།།༤༽ཏང་གི་ངོ་ལ་མོའུ་ཕ་ཡིན་བརྗོད།།རྒྱ་འབར་ཐུག་དུས་སྟོན་པའི་འཁྲུངས་སྐར་བརྩིས།།བོད་ནང་འབྲེལ་ཏེ་ཞག་བརྒྱའི་དམ་ཚིག་འབྲེལ།།ཀུན་ལ་རིས་མེད་ཞེས་པའི་གཏམ་བཟང་གླེང་།།༥༽ལྷག་ལ་སྔ་དང་ཆད་ལ་ཕྱི་མ་ཡི།།ཝ་ཡེལ་གྲགས་པའི་ལུག་ཤ་རྒྱག་ཚད་ཟོས།།བདུད་རྩིའི་ཆང་དམར་དེ་ཡང་མཆོད་པས་འཐུང་།།ཚེས་བཅུའི་ཚོགས་འཁོར་དགེ་འདུན་གྲངས་ཚང་ཚོགས།། སྐྱབས་འགྲོ་སྒྲོལ་མ་བྱེ་བ་དུང་ལ་ཉེ།།སིདྡྷི་དུང་ཕྱུར་འགྲུབ་པའི་དགེ་བ་འགྲུབ།།འདས་ལོག་མཁའ་འགྲོའི་ལུང་བསྟན་གསལ་བ་དང་།།དགེ་ལེགས་ས་གསུམ་ཁྱབ་པའི་རྟེན་འབྲེལ་འགྲིགས།།—————-ཨེ་མ་ཧོས

མཆོད་སྨོན་གྱི་ཀུན་བཟང་སྤྲིན་ཆེན།ན་མོ་གུ་རུ་ཨེ་མ་ཧོ།།ཀ་དག་སྤྲོས་བྲལ་འོད་གསལ་རིག་པའི་ཀློང་།།ཀུན་བཟང་སྣང་བ་དག་པ་རབ་འབྱམས་པ།།ཡེ་ཤེས་སྒྱུ་འཕྲུལ་དྲྭ་བའི་དཀྱིལ་འཁོར་ལ།།ཟག་མེད་མཆོད་པའི་སྤྲིན་ཆེན་ཡོངས་སུ་འབུལ།།མཆོད་ཡོན་གཙང་མས་རྒྱལ་ཀུན་མ་ལུས་མཆོད།།ཞབས་གསིལ་དག་པས་ཁྲུས་མཆོག་ཡོངས་སུ་གསོལ།།མེ་ཏོག་སྣ་ཚོགས་རྒྱན་ཕྲེང་མཛེས་པས་ཕྱུག།བདུག་སྤོས་དྲི་བཟང་ཞིང་ཁམས་ཀུན་ཏུ་ཁྱབ།།མར་མེའི་འོད་གསལ་སྣང་བས་ས་གསུམ་གདལ།།དྲི་ཆབ་སྨན་སྣས་སྣང་སྲིད་རིག་རྩལ་བརྟས།།ཞལ་ཟས་འདོད་ཡོན་ཀུན་བཟང་ཚོགས་འཁོར་རོལ།།རོལ་མོའི་སྒྲ་སྙན་རྒྱལ་ཀུན་དགྱེས་ཕྱིར་འབུལ།།རིག་པ་སྐུ་གསུམ་ངོ་བོར་སྐྱབས་སུ་མཆི།།རིག་འཛིན་རྒྱལ་ཀུན་རང་བཞིན་སེམས་མཆོག་བསྐྱེད།།རིག་པའི་གར་ཁྱབ་ཐུགས་རྗེ་འགྲོ་ལ་དམིགས།།རིག་སྟོང་གདོད་མའི་དབྱིངས་སུ་གྲོལ་བར་སྨོན།།ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ།།ཨོ་རྒྱན་རིན་པོ་ཆེ་ལ་གསོལ་བ་འདེབས།།མཆོག་ཐུན་དངོས་གྲུབ་མ་ལུས་མྱུར་སྩོལ་ཅིག།ཀུན་ལ་ཕན་བདེའི་ཕྲིན་ལས་བརླབ་པོ་ཆེས།།ཀུན་བཟང་རྫོགས་ལྡན་ཀུན་གྱིས་ལོངས་སྤྱོད་ཤོག། ————ཤྲཱིས

༄༅།།མཁན་ཆེན་བླ་མ་ཨེ་མ་ཧོ༔སྐུ་ཚེ་བརྟན།།གསང་ཆེན་གསང་བ་ཟབ་མོའི་མཛོད་འཛིན་པ། །རྒྱལ་ཀུན་གསང་བའི་བདག་པོ་ཨེ་མ་ཧོ། །རྒྱལ་བ་ཀུན་ལ་ཡེ་ཤེས་ཕྲིན་ལས་ཏེ། །འགྲོ་བའི་ཁམས་ལ་རིག་སྟོང་རྗེན་པར་བཞུགས། །ཞེས་རབ་བྱུང་བཅུ་བདུན་པའི་ལྕགས་བྱིའི་རང་ཟླ་གསུམ་པའི་ཚེས ༨ ལ་མཁན་ཆེན་བླ་མའི་སྐུ་འཁྲུངས་པའི་ཉིན་བཟང་ལ་བཀྲིས་བདེ་ལེགས་ལྷོ་མོན་པ་སངས་རྒྱས་མགོན་པོ་ནས་སྒོ་གསུམ་གུས་པས་ཕྱག་བཅས་ཕུལ།། ༄༅།།དཔལ་དགྱེས་པ་རྡོ་རྗེ་རིན་པོ་ཆེ།།དཔལ་ཆེན་དགྱེས་རོལ་བདེ་བ་ཆེན་པོའི་འཕྲུལ། །ལྷུན་གྲུབ་འདུས་མ་བྱས་པ་རྡོ་རྗེའི་གར། །སྒྲིབ་བྲལ་སྤྲུལ་བའི་རོལ་པ་འགྲོ་བའི་མགོན། །མཚུངས་མེད་པའི་སྡེ་ལ་གསོལ་བ་འདེབས། །ཨེ་ཝཾ་ཟུང་དུ་འཇུག་པ་ཆུ་ཟླའི་ཚུལ། །མ་བཅོས་མཐའ་གྲོལ་ཀུན་བཟང་བདེ་ཆེན་གར། །ཚངས་ཆེན་བསྐལ་བ་རྒྱ་མཚོའི་མཛེས་རྒྱན་དུ།།རྟག་བརྟན་གཡུང་དྲུང་གཤིས་སུ་ཨ་ཧོ་ཡ། །——མཁས་དབང་དམ་པས༢༠༢༠་༥་༡་ལ།