དགེ་མཚན་ལྡན་པའི་གསར་འགྱུར།

དགེ་མཚན་ལྡན་པའི་གསར་འགྱུར།
ཨེ་མ་ཧོ།།
ཨོ་རྒྱན་མཚོ་གླིང་པདྨའི་སྡོང་པོ་ལས།།
སྤྲུལ་བའི་རྣམ་རོལ་རང་བྱུང་འོད་དཔག་མེད།།
རིགས་གསུམ་ཀུན་འདུས་གེ་སར་རྒྱལ་པོ་དང་།།
ཆོས་སྐྱོང་ཝེར་མས་རྟག་ཏུ་གྲོགས་མཛོད་ཅིག།
དེ་རིང་ཨོ་རྒྱན་གྱི་སློབ་དཔོན་པདྨ་འབྱུང་གནས་ཀྱི་འཁྲུངས་སྐར་ལ་སྔ་འགྱུར་རིང་ལུགས་འགའ་ཞིག་གི་འདོད་པ་བཞིན་དུ་ཡར་ངོའི་ཚེས་པ་བཅུ་ལ་རྟེན་འབྲེལ་ཀུན་བཟང་གི་འདོད་དོན་ལྷུན་གྱིས་གྲུབ་སོང་། ལོ་སྔོན་མར་སེ་ཁྱུང་དབྲའི་གཉེན་འབྲེལ་ཡོངས་ལ་འཛམ་གླིང་གེ་སར་རྒྱལ་པོའི་སྐུ་བརྙན་རེ་ནང་བསྟན་དུ་འབུལ་ཐུབ་ན་བསམས་ནས་ཁྱབ་བསྒྲགས་དང་སྨོན་ལམ་བྱས་པ་ཡིན། མཁན་སྤྲུལ་རྒྱ་བླ་དང་ཕྱུག་བདག་གྲངས་མེད་པ་ཞིག་མཆིས་ན་ཡང་དམིགས་བསལ་རོགས་དན་གང་ཡང་བྱུང་བས་བདག་གི་ཉེ་འཁོར་སློབ་མ་བརྒྱ་ཕྲག་གཅིག་ཙམ་ལྷག་གིས་རོགས་དན་བྱས་ཀྱང་རྟེན་འབྲེལ་འཕྲོ་ཅན་དུ་གྱུར། ད་སྐབས་དུས་བཟང་འདི་ལ་བརྟེན་ནས་སེངྒ་གླིང་ནས་དད་ལྡན་སྦྱིན་པའི་བདག་མོ་པདྨ་མཁའ་འགྲོ་དང་རྫོགས་ཆེན་ཆོས་ཚོགས་ཀྱིས་བཀའ་དྲིན་ལས་བདག་གི་རེ་བ་ཡོངས་སུ་གྲུབ་ནས་མན་ཤེལ་གྱི་ཤེལ་རྡོ་ལས་གྲུབ་པའི་བླ་མ་ཨོ་རྒྱན་ཆེན་པོ་མཚོ་སྐྱེས་རྡོ་རྗེ་དང་། ཡི་དམ་གྷ་རུ་ཌཱ། མཁའ་འགྲོ་དང་ཆོས་སྐྱོང་ཝེར་མ་བཅུ་དྲུག་སོགས་མཛེས་བཀོད་ཕུན་སུམ་ཚོགས་གནང་ནས་མཆོད་འབུལ་གནང་བ་ལ་སྙིང་ནས་བཀའ་དྲིན་ཆེ་ཞུ་དང་། སངས་རྒྱས་བསྟན་པ་དང་ཁྱད་པར་སྔ་འགྱུར་རྒྱལ་བའི་བསྟན་པ་དར་ཞིང་རྒྱས་པ་དང་མ་ལུས་སྐྱེ་དགུ་ཀུན་ལ་ཕན་བདེ་འབྱུང་བའི་སྨོན་ལམ་དང་། དམིགས་བསལ་དད་ལྡན་སྦྱིན་པའི་བདག་པོ་རྣམ་ལ་ཕྱི་ནང་གསང་བའི་བར་ཆད་བྲལ་ཞིང་གང་བསམ་ལྷུན་གྱིས་གྲུབ་པའི་སྨོན་ལམ་དང་རང་བཞིན་རྫོགས་པ་ཆེན་པོའི་བསྟན་པ་དར་རྒྱས་ཕུན་ཚོགས་སུ་གསོལ་བ་འདེབས་པར་ལགས་སོ། དབྱིན་ཡུལ་ནས་ཤྲཱིཿཨེ་མ་ཧོས།