August 2019

རྒས་པ་དོན་ལྡན་གྱི་རྣལ་འབྱོར་ཡིད་བཞིན་ནོར་བུ།།

རྒས་པ་དོན་ལྡན་གྱི་རྣལ་འབྱོར་ཡིད་བཞིན་ནོར་བུ།།
ཨེ་མ་ཧོ།།
གཞི་ངོ་བོ་དག་པས་སྤྲུལ་པའི་སྐུ།།
ལམ་རང་བཞིན་མཐར་ཕྱིན་རྣལ་འབྱོར་པ།།
དོན་ཐུགས་རྒྱུད་སངས་རྒྱས་ཡེ་ཤེས་པ།།
དཔལ་དགྱེས་པ་རྡོ་རྗེ་ཨེ་མ་ཧོ།།
ཡབ་དབྲ་ཆེན་ཞི་ཁྲོ་རབ་འབྱམས་དང་།།
ཡུམ་རྗེ་བཙུན་ཨོ་རྒྱན་སྒྲོལ་ལ།།
སྲས་བལྟམས་པའི་རྟེན་འབྲེལ་ཕུན་ཚོགས་ངང་།།
རྗེ་བླ་མ་དམ་པས་རྗེས་སུ་བཟུངས།།
ཆུང་ཆོས་དང་མཇལ་ནས་མདོ་སྔགས་མཁས།།
ལས་རྒྱུ་འབྲས་ཞིབ་པས་དགེ་འདུན་བཙུན། 
བསྟན་འགྲོ་ལ་ཕན་བདེའི་འདི་ཕྱི་བཟང་།།
དོན་རྒས་པ་ཡིད་བཞིན་ནོར་བུ་ལེགས།།
ལུས་རྒས་པ་སྐྲ་དཀར་གཉེར་མས་གང་།།
ངག་རྒས་པ་དབུགས་རིང་ཐུང་ཐུང་ཧར།།
སེམས་རྒས་པ་མེད་པའི་ཨེ་མ་ཧོ།།
གཞོན་བཅུ་དྲུག་བདག་མོའི་བརྩེ་གྲོགས་ལགས།།
ང་སྐྱེ་བ་གངས་རིའི་ལྗོངས་སུ་བླངས།།
གཞོན་དར་མ་དམ་པའི་ཆོས་ཀྱིས་འཚོ།།
ད་རྒན་པ་རི་ཁྲོད་འཆི་སེམས་བདེ།།
གྲོགས་ངོ་ལྐོག་མཚུངས་ན་མཇལ་ཏུ་ཤོག།
ཚེ་ཟད་ནས་དེ་རིང་འཆི་ན་ཡང་།།
སྒོམ་མཉམ་རྗེས་ཐ་དད་མ་མཆིས་ཕྱིར།།
སེམས་གུ་ཡངས་བློ་བདེ་གཉུག་མའི་ཀློང་།།
ཆོས་རྫོགས་པ་ཆེན་པོའི་ངང་དུ་ཨ།།
——-ཨ་ས་རས་ངོར་ཤྲཱིཿཨེ་མ་ཧོས།།