September 2019

དེ་ཡང་བོད་ཟླ་བདུན་པའི་ཡར་ངོའི་ཚེས་པ་བཅུ་ནི་ལྕེ་བཙུན་སེང་གེ་དབང་ཕྱུག་འོད་ལུས་སུ་དེངས་པའི་དུས་ཆེན་ཡིན།

དེ་ཡང་བོད་ཟླ་བདུན་པའི་ཡར་ངོའི་ཚེས་པ་བཅུ་ནི་ལྕེ་བཙུན་སེང་གེ་དབང་ཕྱུག་འོད་ལུས་སུ་དེངས་པའི་དུས་ཆེན་ཡིན། ཇི་སྐད་དུ། ཟག་པ་རང་ཟད་འབྱུང་བ་རང་སར་དེངས༔དྲན་པ་རང་གྲོལ་ཟང་ཐལ་འོད་ཀྱི་ལུས༔སེངྒེ་དབང་ཕྱུག་ཉིད་དང་མཉམ་གྱུར་ནས༔གྲོལ་བ་རྣམ་བཞིས་འཁོར་བ་དོང་སྤྲུགས་ཤོག༔ ཅེས་དང་། ཨེ་མ་སྨྱོན་པ་སེང་དབང་ང་༔ ལས་ཀྱི་རླུང་ཟད་ཡེ་ཤེས་རྒྱས༔ མ་རིག་སྒོ་ངའི་སྦུབས་ལས་གྲོལ༔ རང་རིག་འོད་གསལ་སྦུབས་སུ་ཞུགས༔ སྒོ་གསུམ་གྱི་འཁྲུལ་པ་ཞིག་ཙ་ན༔ འཁྲུལ་གཞི་ཐམས་ཅད་ཡ་རེ་ཆ༔ འཁྲུལ་སྣང་གི་མདུད་པ་ཆོད་ཙ་ན༔ སེམས་འཛིན་ཟེར་བ་ཐང་རེ་ཆད༔ འཁྲུལ་པ་ཡེ་ཤེས་སུ་ཤར་ཙ་ན༔ དག་སྣང་ཐམས་ཅད་བསླུ་བའི་ཆོས༔ ཐམས་ཅད་དབྱིངས་སུ་ཐིམ་ཙ་ན༔ ཅི་ཡང་མ་ཡིན་ཅིར་ཡང་འཆར༔ ཨེ་མ་ཨེ་མ་དམ་པའི་སྐུ་དྲིན་ལགས༔ ཨེ་མ་འདའ་ཀའི་ཚིག་འདི་སྙིང་པོའི་དོན༔ སྙིང་ཕྱུང་ལག་མཐིལ་བཞག་པ་འདི་ལས་མེད༔ ཚིག་གི་ཐ་མ་དུས་མཐར་སྣང་བར་ཤོག༔ ཟག་པ་རང་ཟད་འབྱུང་བ་རང་སར་དེངས༔ དྲན་པ་རང་གྲོལ་ཟང་ཐལ་འོད་ཀྱི་ལུས༔ སེང་གེ་དབང་ཕྱུག་ཉིད་དང་མཉམ་གྱུར་ནས༔ གྲོལ་བ་རྣམ་བཞི་འཁོར་བ་དོང་སྤྲུགས་ཤོག༔ ཅེས་སོ།།
གསོལ་འདེབས་ཀུན་བཟང་རྒྱལ་པོ།
ཨེ་མ་ཧོ།།
འོད་གསལ་འཇའ་ལུས་གྲུབ་པའི་སེངྒེ་དབང་ཕྱུག།
ཕྱི་ནང་གསང་བའི་ཞིང་ཁམས་གང་དུ་བཞུགས་ཀྱང་།།
གསོལ་འདེབས་བུ་ལ་བྱིན་རླབས་མྱུར་ཏུ་སྩོལ་ནས།།
ཟག་བཅས་འོད་ལུས་གྲུབ་པའི་དངོས་གྲུབ་སྩོལ་ཅིག།
དྲན་པའི་ངོ་བོ་རང་བྱུང་ཟང་ཐལ་འཇའ་འོད་ཕུང་པོ།།
ཨེ་ཝཾ་ཡེ་ཤེས་རང་བཞིན་ལྕེ་བཙུན་སེངྒེ་དབང་ཕྱུག།
ཐུགས་རྗེ་རྣམ་དག་རྒྱལ་བ་ཉིད་དང་མཉམས་ཏེ།།
གྲོལ་བ་རྣམ་བཞིའི་འཁོར་བ་དོང་སྤྲུགས་སྨོན་ནོ།།
མཚུངས་མེད་ཆོས་རྗེ་ཡིད་བཞིན་ནོར་བུ་ཡིས།།
སྙིང་ཐིག་ཟབ་མོའི་གདམས་ངག་ལན་གསུམ་གནང་བའི།།
བརྒྱུད་གསུམ་རིག་འཛིན་བླ་མའི་བྱིན་རླབས་དྲན་ཚེ།།
ལས་རླུང་སྲིད་གསུམ་གྲོང་ལ་ཡ་ང་མི་འདུག།
རིག་འཛིན་མཁའ་འགྲོའི་ཐུགས་ཐིག་ཞལ་རླུང་མ་ཡལ།།
དབང་སྐུར་རིག་པའི་ཡེ་ཤེས་རྗེན་གཅེར་གསུང་པའི།།
བཀའ་དྲིན་འཁོར་མེད་བླ་མའི་རྣམ་ཐར་དྲན་ཚེ།།
ཨེ་ཝཾ་ཉི་ཟླའི་དཀྱིལ་འཁོར་སྙིང་ནས་ཤར་འདུག།
སྐུ་མཆོག་རྒྱལ་ཀུན་འདུས་ཞལ་རྩ་བའི་བླ་མ།།
གསུང་དབྱངས་གདམས་པའི་མན་ངག་ཡིད་བཞིན་ནོར་བུ།།
ཐུགས་ཡིད་རང་བྱུང་རིག་པ་དབྱེར་མེད་རྟོགས་པ།།
དུས་གསུམ་རྒྱལ་ཀུན་ངོ་བོ་གཞན་ན་མི་འདུག།
ཨེ་མ་དགའ་བོ་སྐྱིད་དོ་སྐལ་བཟང་ཉི་མ།།
མ་ལུས་འགྲོ་ཀུན་ཕན་བདེའི་ཟླ་བ་གཞོན་ནུ།།
ཨ་ཧོ་འཁོར་འདས་ཚོགས་ཆེན་ཡེ་རྫོགས་རེད་འདུག།
མཁའ་འགྲོ་མ་དཀོན་མཆོག་གཡང་མཛེས་ངོར་ཨེ་མ་ཧོས་ཨེ་ཝཾ་ཡོ་ག་ཆོས་ཚོགས་ནས་གླུ་རུ་བླངས་པར་དགེའོ།། ཤྲཱིཿསརྦ་ལོ་ཀ་བི་ཛ་ཡནྟུ།།

Leave a Reply

Your email address will not be published.