ཕག་པ་ཚེ་རིང་གི་ཐ་མ་ཁ་ནག་པོ་ཞེས་བྱ་བ།།
ན་མོ་གུ་རུ་ཤ་ས་ན་དྷཱ་ར་ར་ས་ཡེ།།
རྗེ་རྒྱལ་བ་མཆོག་ལ་ཁ་གཡང་གིས་འབོད་བཞིན།།
བོད་གཞི་བྱེས་གཉིས་ཀ་རྩམ་པ་འཐེགས་ནས།།
རྒྱ་ནག་པོའི་ཁ་ལ་བཙན་རྫོང་དུ་བྱས་ཕྱིར།།
ཡུན་མི་འགྱིང་ཕྱི་སས་རྡ་ས་ལ་ཁྱབ་སོང་།།
མགོན་སྤྱན་རས་གཟིགས་དབང་ཕག་ཤ་ལ་དགྱེས་ཕྱིར།།
ཚིལ་དཀར་པོའི་དུས་སུ་ཅི་དགའ་ལ་རོལ་ཀྱང་།།
ཕག་དུད་དྲི་ངན་པ་ཚན་རིག་པས་ཤེས་ཚེ།།
མགོན་རྒྱལ་བའི་དབང་པོས་གད་སྙིགས་སུ་གཡུགས་སོང་།།
ལྷ་སློབ་བཟང་སངས་རྒྱས་མི་མངོན་དུ་བཞུགས་ཀྱང་།།
བདུད་ཕག་ངན་གཏོར་བཤིག་གྲོག་ཚང་བཞིན་བརྡོལ་ཏེ།།
ཞིང་ལྷ་ལྡན་གཉིས་པ་ཁ་མཆུ་ཡིས་བཀངས་ཏེ།།
ལས་རྒྱུ་འབྲས་རྒྱ་མ་རྩ་མེད་དུ་བཏངས་སོང་།།
སྐེག་གྱ་ལྔའི་ཕྲེང་བ་རྩེད་མོ་རུ་རྩེད་བཞིན།།
ལོ་བདུན་ཅུའི་དགའ་སྟོན་རྒྱ་རྔ་དང་བསྒྲགས་ཏེ།།
ཕག་ནག་པོ་དཀར་པོའི་སྒྱུ་འཕྲུལ་གྱི་ཟློས་གར།།
གཏམ་དབུ་མའི་ཚེ་ཚད་དགུང་ཞག་ལ་བསྐྱལ་ལོ།།
གཞི་བཀའ་ཤག་ཟེར་བ་མ་ཉེས་པའི་ཁ་གཡོགས།།
ལམ་དབུ་མ་ཟེར་བ་མི་བདེན་པའི་གཡོ་འཕྲུལ།།
ལས་རྒྱུ་འབྲས་མེད་པའི་འགྲིགས་འཛུགས་གི་གཡོ་སྒྱུ།།
དོན་ཏང་ཡན་ཕྱོགས་ལ་བདེན་ཁ་ཏེ་སྟེར་སོང་།།
ཨ་ཕག་ལོའི་བསམ་པ་ཁུག་རྟ་ཡིས་འདྲེན་ནས།།
དར་དམར་པོའི་ལག་གཡུག་ཅི་དགའ་རུ་ཕྱུར་ཏེ།།
རྒྱ་དམར་པོའི་དྲི་ཆེན་བདུད་རྩི་བཞིན་རོལ་ནས།།
ཕ་མེས་པོས་དུར་ཁུང་ཐ་ནག་གིས་བཀབས་སོང་།
གདན་སེ་འབྲས་དགའ་གསུམ་རིགས་པ་རེ་ཡོད་ན།།
ས་གོང་མ་ཚོ་ལ་མཐུ་དཔུང་རེ་ཡོད་ན།།
དཔལ་སྔ་འགྱུར་པ་ལ་གྲུབ་རྟགས་རེ་ཡོད་ན།།
མགོན་སེངྒེ་རྒྱལ་པོ་དམར་གསོད་དུ་མ་གཏོང་།།
བོན་བན་དེ་ཟེར་བའི་ཐ་སྙད་དེ་ཤི་ཐལ།།
ཆོས་དཀར་པོ་ཞིང་གི་དཔོན་རྒན་དེས་མྱོང་ཐལ།།
ཡུལ་རང་བཙན་ཤོར་བའི་ས་མཐའ་ཡི་ཡུས་ལ།།
ཚིག་བདེན་པ་བཤད་སའི་གོ་སྐབས་ཀུན་བོར་ཐལ།།
ཕ་སྤྲེལ་རྒན་བདེན་པའི་དྲང་གཏམ་ལ་དགྱེས་ན།།
མ་བྲག་སྲིན་སྡུག་པའི་ཁྲིམས་ཁ་ལ་མ་འཇིགས།།
བུ་རང་ཉེས་ངོས་ལེན་བརྗེན་གཅེར་དུ་ནུས་ན།།
བློ་གཟུར་གནས་རྒྱལ་ཁམས་བལྟད་མོ་དེ་ཆེའོ།།
བོད་མི་རིགས་ལ་ཡག་དགའ་ཉེས་སྡུག་འཁན་ཤྲཱིཿསྨྱོན་པས་ཨེ་ཝཾ་མེ་ཏོག་གླིང་ནས་སྨྲས་པར་དགེའོ།།