February 2020

གཙང་སྦྲར་འབོད།
ཨེ་མ་ཧོ།།
ཕྱི་རོལ་འགྲོ་ཚེ་ཁ་གཡོར་ལེགས་པོར་གྱོན།།
ནང་འཁོར་ཡོང་ཚེ་རྐང་ལག་ཡག་པོར་ཁྲུས།།
གསང་དོན་རྩ་གསུམ་བསྙེན་སྒྲུབ་རྟག་འབད་ན།།
ནད་གདོན་བགེགས་ལས་རྒྱལ་བའི་རྟེན་འབྲེལ་ཡོད།།
ཀུན་སློང་མི་རྟག་སྒོམ་ནས་ངེས་འབྱུང་སྣོན་མ་དང་།།
ཀུན་ལ་བསམས་ནས་སྙིང་རྗེ་བྱང་སེམས་བསྐྱེད།།
ཀུན་ལ་དག་སྣང་སྣང་གྲགས་རིག་པའི་ངང་།།
ཀུན་བཟང་སྤྱོད་པར་དྲན་ཤེས་བག་ཡོད་མཛོད།།
དྲན་པས་སྐྱེ་རྒ་ན་འཆི་གདུང་བར་སོམས།།
ཤེས་བཞིན་རང་བཞན་སྲུང་སྐྱོབས་བྱ་རར་གྱིས།།
བག་ཡོད་བདུད་རྩིས་གནས་ལ་དགྱེས་བཞིན་འཇུག།
བྱང་ཆུབ་སྤྱོད་པ་རྒྱ་མཚོ་མཐར་ཕྱིན་ཤོག།
ལུས་ལ་ན་ཚ་དབེན་པའི་བཀྲ་ཤིས་ཤིང་།།
ངག་ལ་དབུགས་རྒྱུ་རང་བཞིན་བདེ་ལེགས་ཏེ།།
སེམས་ཉིད་ཏིང་འཛིན་ཕུན་སུམ་ཚོགས་པའི་ངང་།།
གང་བསམ་ལྷུན་གྲུབ་སངས་རྒྱས་མྱུར་ཐོབ་ཤོག།
ཅེས་རབ་གནས་ས་ཕག་རྒྱལ་ཟླའི་དཀར་ཕྱོགས་དགའ་བ་གསུམ་པར་རིག་འཛིན་ཨེ་མ་ཧོས་སེངྒྷ་གླིང་ཛྙཱ་ཡན་ཚོང་ཁང་ནས་བགྱིས་པར་དགེའོ།།

Leave a Reply

Your email address will not be published. Required fields are marked *