རིག་འཛིན་བརྒྱད་ཀྱི་གསོལ་འདེབས་ཨེ་ཝྃ་ཀུན་གསལ།།
ན་མོ་མ་ཧཱ་གུ་རུ་བུདྡྷ་ཛྙཱ་ན་ཡེ།།
ཀ་དག་ཆོས་སྐུའི་ངོ་བོ་ཀུན་ཏུ་བཟང་།།
ལྷུན་གྲུབ་ལོངས་སྐུའི་རང་བཞིན་རྡོ་རྗེ་སེམས།།
སྣ་ཚོགས་སྤྲུལ་སྐུའི་ཐུགས་རྗེ་པདྨ་འབྱུང་།།
རིག་འཛིན་དྲག་སྔགས་གླིང་པར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
ཤར་ཕྱོགས་དུར་ཁྲོད་བསིལ་བ་ཚལ་གྱི་གནས།།
ཡང་དག་ཐུགས་ཀྱི་གཏེར་ལ་དབང་འབྱོར་ནས།།
གཉུག་སེམས་ཞི་བདེ་རྡོ་རྗེས་གྲུབ་བརྙེས་པ།།
རིག་འཛིན་ཧཱུྃ་ཆེན་ཀཱ་རར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
ནུབ་ཕྱོགས་དུར་ཁྲོད་ཀུ་ལ་རྫོགས་པའི་གནས།།
འཇམ་དཔལ་སྐུ་ཡི་གཏེར་ལ་དབང་འབྱོར་ནས།།
ཀུན་བྱེད་ཡིད་བཞིན་ནོར་བུའི་གྲུབ་བརྙེས་པ།།
རིག་འཛིན་འཇམ་དཔལ་བཤེས་གཉེན་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
ནུབ་ཕྱོགས་དུར་ཁྲོད་པདྨ་བརྩེགས་པའི་གནས།།
པདྨ་གསུང་གི་གཏེར་ལ་དབང་འབྱོར་ནས།།
སྣང་སྲིད་དབང་དུ་བསྡུད་པའི་གྲུབ་བརྙེས་པ།།
རིག་འཛིན་ཀླུ་སྒྲུབ་སྙིང་པོར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
བྱང་ཕྱོགས་དུར་ཁྲོད་ལངྐ་བརྩེགས་པའི་གནས།།
ཕུར་པ་འཕྲིན་ལས་གཏེར་ལ་དབང་འབྱོར་ནས།།
ཁམས་གསུམ་ཡོངས་སུ་སྒྲོལ་བའི་གྲུབ་བརྙེས་པ།།
རིག་འཛིན་པྲ་བྷ་ཧསྟིར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
ཤར་ལྷོར་དུར་ཁྲོད་ལྷུན་གྲུབ་བརྩེགས་པའི་གནས།།
རྦོད་གཏོང་མ་མོའི་གཏེར་ལ་དབང་འབྱོར་ནས།།
བདེ་ཆེན་ལང་ཚོ་རྒྱས་པའི་གྲུབ་བརྙེས་པ།།
རིག་འཛིན་དྷ་ན་སངཀྲྀར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
ལྷོ་ནུབ་དུར་ཁྲོད་གསང་ཆེན་རོལ་བའི་གནས།།
ཡོན་ཏན་བདུད་རྩིའི་གཏེར་ལ་དབང་འབྱོར་ནས།།
འཕོ་ཆེན་འཇའ་ལུས་མཆོག་གི་གྲུབ་བརྙེས་པ།།
རིག་འཛིན་བི་མ་མི་ཏྲར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
ནུབ་བྱང་དུར་ཁྲོད་ཧེ་ཆེན་བརྡལ་བའི་གནས།།
འཇིག་རྟེན་མཆོད་བསྟོད་གཏེར་ལ་དབང་འབྱོར་ནས།།
བདུད་སྡེའི་གཡུལ་ལས་རྒྱལ་བའི་གྲུབ་བརྙེས་པ།།
རིག་འཛིན་རམ་བུ་གུ་ཧྱར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
བྱང་ཤར་དུར་ཁྲོད་འཇིག་རྟེན་བརྩེགས་པའི་གནས།།
དྲག་སྔགས་དམོད་པའི་གཏེར་ལ་དབང་འབྱོར་ནས།།
ཕས་རྒོལ་མ་ལུས་འཇོམས་པའི་གྲུབ་བརྙེས་པ།།
རིག་འཛིན་ཤིནྟིྃ་གརྦྷར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
འོག་མིན་དུར་ཁྲོད་མེ་རི་འབར་བའི་གནས།།
ཆོས་ཀུན་སྒྲུབ་རྒྱུད་གཏེར་ལ་དབང་འབྱོར་ནས།།
གདོད་མའི་ཀུན་བཟང་སངས་རྒྱས་གྲུབ་བརྙེས་པ།།
རིག་འཛིན་པདྨ་ཀ་རར་གསོལ་བ་འདེབས།།
ཨེ་ཝྃ་ཡེ་ཤེས་གྲུབ་པ་མཐར་ཕྱིན་ཤོག།
སྒོ་གསུམ་རྒྱལ་བའི་ཞིང་ཁམས་རྣམ་པར་དག།
སྐུ་གསུམ་ཡོན་ཏན་ཕྲིན་ལས་རབ་ཏུ་རྫོགས།།
ཁམས་གསུམ་འགྲོ་ཀུན་མ་ལུས་ཡོངས་སུ་སྨིན།།
མཆོག་གསུམ་རྒྱལ་བའི་གོ་འཕང་མྱུར་ཐོབ་ཤོག།
ཅེས་པ་འདི་ཡང་རབ་གནས་འབྱུང་བ་ལྔ་ལྡན་ལྕགས་བྱིའི་དབོ་ཟླ་བའི་དབང་ཕྱོགས་རྒྱལ་བ་དང་པོར་གཏེར་ཆེན་དྲག་སྔགས་གླིང་པའི་ཡང་སྲིད་རིག་འཛིན་ནམ་མཁའ་རྒྱ་མཚོ་རིན་པོ་ཆེ་དང་མཁན་པོ་ཨེ་ཝྃ་རིག་པས་གསུང་བསྐུལ་དང་། འཕགས་བོད་ཀྱི་རིག་འཛིན་ཡོངས་ལ་མི་ཕྱེད་པའི་དད་གུས་ཅན། རྒྱལ་ཁམས་པ་ཨེ་མ་ཧོས་རིག་འཛིན་དགུ་ཡི་མཚན་ཉིད་དབྱིན་ཡིག་གི་༼ Eight Vidyadharas. Manjushrimitra, Nagarjuna, Hungkara,Vimalamitra,Prabhahasti, Dhana Sanskrita, Shintam Garbha, Guhyachandra༽ མཚན་ཙམ་ལ་བརྟེན་ནས་གང་ཤར་ཐོལ་བྱུང་དུ་ཤར་བ་ལ་བཅོས་བསྒྱུར་མེད་པར་ཨེ་ཝྃ་རྫོགས་ཆེན་ཆོས་སྒར་ནས་གསོལ་བ་བཏབས་པས་སྔ་འགྱུར་རིག་འཛིན་རྒྱལ་བའི་བསྟན་པ་རྒྱས་པའི་རྒྱུ་རུ་གྱུར་ཅིག་གུ། སརྦ་ཤྲཱིཿམངྒ་ལྃ་བི་ཛ་ཡནྟུ།།