༧སྒྲུབ་དཔོན་དམ་པ་ངག་དབང་རྡོ་རྗེ་མྱུར་བྱོན་གསོལ་འདེབས་མ་ལི་ཀའི་ཕྲེང་བ་ཞེས་བྱ་བ།
ན་མོ་གུ་རུ་རཏྣ་ཏྲ་ཡཱ་ཡ།།
ངག་དབང་ཡེ་ཤེས་དམ་པའི་རང་གཟུགས་ཉིད།།
ཚེ་དང་སྒྲུབ་པའི་དཔག་བསམ་ལྗོན་བཟང་བརྟས།།
ཡང་གསང་བསྟན་ལ་སྨན་པའི་རྡོ་རྗེ་འཛིན།།
སྒྲུབ་དཔོན་དམ་པ་ཡང་སྤྲུལ་མྱུར་འབྱོན་གསོལ།།
གནུབས་ཆེན་སངས་རྒྱས་དམ་པའི་བཀའ་མ་དང་།།
གཏེར་ཆེན་གནམ་ལྕགས་གླིང་བའི་གཏེར་མ་ལ།།
ཨེ་ཝཾ་ཚེ་དང་སྒྲུབ་པའི་རྣལ་འབྱོར་བ།།
ངག་དབང་ཡེ་ཤེས་རྡོ་རྗེ་མྱུར་བྱོན་གསོལ།།
ཐུགས་དམ་བདེ་ཆེན་བཙན་ས་ཟིན་པའི་ཕྱིར།།
ངེས་དོན་ཆོས་ཀྱི་སྒྲུབ་དཔོན་རིན་པོ་ཆེ།།
བཀའ་གཏེར་བསྟན་པ་འཛིན་སྐྱོང་སྤེལ་བའི་ཕྱིར།།
རྣལ་འབྱོར་ཉི་གཞོན་གསར་བ་མྱུར་ཕེབས་ཤོག།།
དུས་བཞི་འཕོ་འགྱུར་བྲལ་བ་ཀ་དག་ཟླ།།
འོད་གསལ་ཡེ་ཤེས་ལྷུན་གྲུབ་ཉི་མ་ལ།།
ཀུན་ཕན་སྒྲུབ་དཔོན་ཡིད་བཞིན་ནོར་བུ་ཉིད།།
རྫོགས་ཆེན་བསྟན་པ་སྤེལ་ཕྱིར་མྱུར་བྱོན་གསོལ།།
ཞེས་པ་འདི་ཡང་རབ་གནས་ལྕགས་བྱི་དབོ་ཟླའི་དབང་ཕྱོགས་དགའ་བ་དང་པོར་རྨི་ལམ་ནང་ནས་རིན་པོ་ཆེས་དད་སྐུལ་ལས་གང་ཤར་དུ་དབྱིན་ཡུལ་ཨེ་ཝཾ་རྫོགས་ཆེན་ཆོས་སྒར་ནས་མཁན་ཆེན་བླ་མ་དཔལ་དགྱེས་པ་རྡོ་རྗེ་རུ་འབོད་པས་གསོལ་བ་འདེབས་པར་དེ་དེ་བཞིན་དུ་འགྲུབ་པར་གྱུར་ཅིག་གུ།།