May 2021

ས་གནོན་སྒྲུབ་ཐབས་བྷྲཱུྃཿཡིག་འོད་འབར།

ས་གནོན་སྒྲུབ་ཐབས་བྷྲཱུྃཿཡིག་འོད་འབར།

སྐྱབས་འགྲོ་ནི།

ཨཱཿ 

རང་ཉིད་སྣང་སྲིད་ཟིལ་གནོན་ལ།།

རང་ངོ་ཤེས་པས་སྐྱབས་སུ་མཆི།།

རང་སྣང་འཁྲུལ་བའི་སེམས་ཅན་ཀུན།།

རང་གྲོལ་ཆེན་པོས་སེམས་བསྐྱེད་དོ།།

ལན་གསུམ།།

བྷྲཱུྃ༔བྷྲཱུྃ༔བྷྲཱུྃ༔

རང་ཉིད་སྐད་ཅིག་གུ་རུ་རིན་པོ་ཆེ།།

སྣང་སྲིད་ཟིལ་གནོན་ཨོ་རྒྱན་གསེར་གྱི་མདོག།

ཕྱག་གཡས་ས་གནོན་གཡོན་པ་མཉམ་བཞག་ཅན།།

བྱང་ཆུབ་ཤིང་དབང་དྲུང་དུ་མི་གཡོ་བར།།

སྟོང་ཁམས་ཆེན་པོའི་འཇིག་རྟེན་ཁེབས་པ་ཡི།།

པདྨའི་དབུས་ན་རྡོ་རྗེ་དཀྱིལ་ཀྲུང་གིས།།

ས་མནན་བཞུགས་པའི་བྱིན་རླབས་ནུས་མཐུ་ཡིས།།

ས་གསུམ་འཇིག་རྟེན་བདུན་པོ་སུ་ཡིན་ཡང་།།

བ་སྤུ་ཙམ་ཡང་འགུལ་བསྐྱོད་མི་ནུས་བསམས།།

ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།

ཨོཾ་ཧེ་ཧེ། ཏིཥྛ་ཏིཥྛ། བྷནྡྷ་བྷནྡྷ། དྷཱ་ར་ཡ་དྷཱ་ར་ཡ་ནི་རུནྡྷ་ནི་རུནྡྷ་བྷུ་མི་ཙ་ལ་ཨུརྞྞ་མ་ཎི་ཡེ་སྭཱ་ཧཱ། ། ཞེས་དང་བྷྲཱུྃ་ཅི་ནུས་བསགས། དད་གུས་དག་སྣང་དགེ་བ་ཡིས།།གུ་རུ་ཉིད་ལ་གསོལ་འདེབས་ཚེ།།ཕྱི་ནང་གསང་བའི་བར་ཆད་ཀུན།།བཟློག་གྱུར་འདི་ལ་ཐེ་ཚོམ་མེད།། 

ཨེ་མ་ཧོ༔

རྩ་བརྒྱུད་བླ་མའི་བྱིན་རླབས་སྙིང་ལ་ཞུགས།།

ཡི་དམ་ལྷ་ཡིས་རྗེས་བཟུང་དངོས་གྲུབ་ཐོབ།།

མཁའ་འགྲོ་དམ་ཅན་ལུས་དང་གྲིབ་བཞིན་འགྲོག།

གང་བསམ་ལྷུན་གྱིས་འགྲུབ་པའི་བཀྲ་ཤིས་ཤོག།

ཅེས་པ་རབ་གནས་ལྕགས་གླང་ས་ག་ཟླ་བའི་ཡར་ངོའི་དགའ་བ་གསུམ་པར་ཨེ་ཝྃ་རིག་འཛིན་དང་འོད་གསལ་ཆོས་སྒྲོན་དང་དགེ་བཤེས་བསྟན་འཛིན་ཆོས་རྒྱལ་སོགས་ཀྱིས་སྔོན་གྱི་ལུང་བསྟན་དང་ད་ལྟའི་དུས་བབས་ཀྱི་སྒྲུབ་ཐབས་དགོས་པར་ཡང་ཡང་བསྐུལ་ངོར་གང་ཤར་དག་པའི་ཉམས་རྩལ་ལ་བཅོས་བསྒྱུར་མེད་པར་རིག་འཛིན་ཨེ་མ་ཧོས་ཐོལ་བྱུང་དུ་ཨེ་ཝྃ་ཀུན་བཟང་དུར་ཁྲོད་ནས་བགྱིས་པས་རྒྱལ་ཁམས་བདེ་བའི་རྒྱུ་རུ་གྱུར་ཅིག་གུ། བྷྲཱུྃཿསརྦ་ལོ་ཀ་བི་ཛ་ཡནྟུ།། སྤྱི་ལོ་༢༠༢༡/༥/༢༢་ལ།།