༼དྲན་གདུང་གི་སྨེ་ངག༽
གྲང་རླུང་འུར་འུར་ལྡང་བའི་དགུན་གྱི་མཚན་མོ་འདིར།།
མུན་པ་སྟུག་པོ་འཁྱིལ་བའི་གུས་མོའི་ཉལ་ས་ན།།
ཐོབ་དང་རང་དབང་མེད་པའི་ཉམ་ཆུང་དྭ་ཕྲུག་ང་།།
མར་མེའི་འོད་ལ་འཁྲེང་སྟེ་ཞེ་ལ་གདུང་བ་འཁོར།།
ཁ་བ་ལྷབ་ལྷུབ་འབབ་པའི་དགུན་གྱི་མཚན་མོ་འདིར།།
གྲང་ངར་འཁྱགས་པས་བསྡམས་པའི་ཐབ་ཀའི་ཉེ་འགྲམ་ན།།
སད་དང་སེར་བས་བཅོམ་པའི་དྭ་ཕྲུག་ཁེར་རྐྱང་ངས།།
འདས་པའི་ཡབ་ཁྱེད་དྲན་ནས་མགོ་བོ་ཐུར་དུ་སྒུར།།
ལྷག་རླུང་གྲང་ངར་ཆེ་བའི་དགུན་གྱི་མཚན་མོ་འདིར།།
དཀར་གསལ་གློག་འོད་འཕྲོ་བའི་ཉལ་ཁང་གྲུ་བཞི་ན།།
ལུས་པོ་སིག་སིག་འདར་བའི་ནུས་མེད་དྭ་ཕྲུག་ང་།།
རྒྱང་གི་ཡབ་ཁྱེད་དྲན་པས་སེམས་པ་སྐྱོ་བས་གཟིར།།
སྨྱུག་བརྩེ་མས།
༢༠༡༩/༡༡/༢༩ཉིན་བྲིས།
