༧ཀུན་མཁྱེན་བླ་མ་བོད་ལ་བཀའ་དྲིན་ཆེ།།
ན་མོ་མ་ཧཱ་གུ་རུ་ཤི་ལ་མ་ཏི་ཡེ།།
༼༡༽
མིག་དང་བྲལ་བའི་གངས་གཞོན་ཕོ་མོ་རྣམས།།
གཡང་སར་ཁྲིད་མཁས་ཏང་དང་ཞོགས་ཚ་ལས།།
ཐུགས་རྗེས་སྐྱབས་མཁས་ཀུན་མཁྱེན་བླ་མ་ཡིས།།
ལྟ་བའི་སྤྱན་གཉིས་གནང་བར་བཀའ་དྲིན་ཆེ།།
༼༢༽
ཕྱི་རོལ་མུ་སྟེགས་རིགས་པ་ནང་ལ་སྐོར།།
དུག་གསུམ་འཁོར་ལོ་བསྐོར་བའི་བློ་ཆུང་ལ།།
ཆོས་ཚན་ཟུང་དུ་འཇུག་པའི་བཀའ་སློབ་གནང་།།
བདེན་ཚིག་མགོ་རྣ་སྦྱིན་པའི་བཀའ་དྲིན་ཆེ།།
༼༣༽
གདོད་མའི་བོད་ཀྱི་སྐད་ཡིད་སྲོག་རྩ་ཉིད།།
སྣུམ་ཟད་མར་མེ་ལྟ་བུའི་བར་མཚམས་ནས།།
ངེས་དོན་ཡིད་ཀྱི་སྒྲོན་མེ་སྦར་བའི་མགོན།།
ཀུན་མཁྱེན་བླ་མ་བོད་ལ་བཀའ་དྲིན་ཆེ།།
༼༤༽
འབྲོག་པས་ཕྱུགས་དོར་ཞིང་བས་ས་སྟོང་ཚེ།།
ཅོལ་ཆུང་སྤྲེལ་ཕྲུག་ཐུགས་རྗེས་མ་བོར་ནས།།
དགེ་བཅུའི་ཁྲིམས་བཟང་མཛེས་པའི་ཆོས་ལྡན་བོད།།
རྨོངས་པའི་གཉིད་རྟོག་བསལ་བའི་བཀའ་དྲིན་ཆེ།།
༼༥༽
སེམས་ཅན་ཡོངས་ལ་དགོངས་པའི་སངས་རྒྱས་དངོས།།
གངས་ཅན་བོད་འབངས་སྐྱོང་པའི་སེམས་དཔའ་ཆེ།།
ཆོས་ལུགས་ཕྱོགས་ཞེན་མེད་པའི་དྲང་སྲོང་ཉིད།།
བསླུ་མེད་གྲོགས་མཆོག་དམ་པ་བཀའ་དྲིན་ཆེ།།
༼༦༽
བླ་བརྒྱུད་དོར་ནས་ཏང་སྲིད་བསྟོད་མྱོང་མེད།།
ཕ་མེས་བཙོང་སྟེ་སྒེར་སྤྱོད་བྱེད་མྱོང་མེད།།
ནང་ཁུལ་དཀྲུག་པའི་ཁྲེལ་མེད་མཛད་མྱོང་མེད།།
མཐུན་ལམ་སྟོན་པའི་ཀུན་མཁྱེན་བཀའ་དྲིན་ཆེ།།
༼༧༽
སྙིང་རྗེས་འདྲེན་པའི་དཀར་ཟས་ཤིང་རྟའི་སྲོལ།།
ཤེས་རབ་རྩལ་དྲུག་འཛོམས་པའི་ཀུན་མཁྱེན་ཉིད།།
བསམ་བཞིན་འཛམ་གླིང་ཞི་བདེའི་དེད་དཔོན་རུ།།
བྱོན་པ་འདི་ཀོ་མཁན་ཆེན་བཀའ་དྲིན་ཆེ།།
༼༨༽
མདོ་དབུས་ཁམས་ཀྱི་བུད་མེད་སྤྱི་ནད་དང་།།
ཨེ་ཙིའི་ནད་ལས་སྐྱོབ་མཁས་སྨན་གྱི་བླ།།
ཝུའུ་ཧན་ཏོག་དབྱིབས་ནད་སེལ་རྟེན་འབྲེལ་མཛད།།
བཀའ་དྲིན་གཞལ་མེད་ཚུལ་ཁྲིམས་བློ་གྲོས་རྒྱལ།།
ཅེས་པ་འདི་ཡང་རབ་གནས་ས་ཕག་རྒྱལ་ཟླའི་ཡར་ངོའི་བཟང་པོ་གཉིས་པར་རྔ་ཡུལ་གསོན་བསྲེག་གླིང་ནས་ཡིན་པའི་ལུས་ངག་སེམས་པ་དུག་ཚེར་ཏུ་སོང་བའི་སོལ་བ་ནག་པོ་དེ་ལ་གང་ཤར་དུ་སེ་ཁྱུང་དབྲ་རིགས་སུ་གཏོགས་པའི་ཤྲཱིཿཨེ་མ་ཧོས་བདེན་པའི་རང་བཞིན་གྱི་༧ཀུན་མཁྱེན་བླ་མའི་རང་གཤིས་ཀྱི་བཀའ་དྲིན་ལ་དེ་མ་ཐད་ཏུ་ཆེད་དུ་བརྗོད་པའོ།།