༄།། ཤར་ཨེ་དང་དིང་རི་བ་ལ་སྨོན་གསོལ་སྙིང་ཉེའི་འཕོ་བ་མཛུབ་བརྡའ། ཀྱེ་མ་ཧོ།། 𝗔 𝗵𝗲𝗮𝗿𝘁𝗳𝗲𝗹𝘁 𝘀𝘂𝗽𝗽𝗹𝗶𝗰𝗮𝘁𝗶𝗼𝗻 𝗳𝗹𝗼𝘄𝘀 𝗲𝗮𝘀𝘁𝘄𝗮𝗿𝗱 𝐓𝐨 𝐒𝐡𝐚𝐫 𝐚𝐧𝐝 𝐃𝐢𝐧𝐠𝐫𝐢, 𝐰𝐢𝐭𝐡 𝐩𝐫𝐚𝐲𝐞𝐫𝐬 𝐚𝐧𝐝 𝐬𝐨𝐫𝐫𝐨𝐰, 𝐎𝐡, 𝐬𝐮𝐜𝐡 𝐠𝐫𝐢𝐞𝐟! 𝐖𝐡𝐚𝐭 𝐬𝐚𝐝𝐧𝐞𝐬𝐬 𝐜𝐨𝐧𝐬𝐮𝐦𝐞𝐬 𝐮𝐬! ༼༡༽ ཨ་ཙི་ཡ་ངའི་འཇིག་རྟེན་གྲུ་ཁ་རུ།། ཧ་བོ་ཕྱི་མའི་བརྡ་རླུང་གངས་ཅན་གྱི།། ས་འགུལ་འཇིག་པའི་སྒྲ་ཡིས་བསུས་པའི་ཚེ།། ཤ་ཁྲག་གཅིག་པའི་སྤུན་ཟླར་ཨ་ཙ་མ།། Alas, this fragile world resembles a broken boat, Tossed by fierce, icy…

༄༅།།བླ་མ་རིན་ཆེན་དཔལ་ལྡན་གྱི་ཞབས་བརྟན་ ཆོས་ཀྱི་འཁོར་ལོ་ཞེས་བྱ་བ་ བཞུགས་སོ།། ཨོྃ་སྭ་སྟི།། བླ་མ་རྒྱལ་བ་སྲས་བཅས་བྱིན་རླབས་དང་།། ཡི་དམ་རིན་ཆེན་གསུམ་གྱི་ཐུགས་རྗེ་མཐུས།། དཔལ་ལྡན་མཁའ་འགྲོ་རྒྱ་མཚོའི་རྟེན་འབྲེལ་གྱིས།། བསྟན་འཛིན་དམ་པའི་སྐུ་ཚེ་བརྟན་གྱུར་ཅིག། འཁོར་འདས་རིན་ཆེན་དཔལ་དང་ལྡན་པའི་སྐུ།། སྣང་སྲིད་ཕན་བདེ་སྤེལ་བའི་བདེན་ཚིག་གསུང་།། ཨེ་ཝྃ་བསྟན་པ་སྐྱོང་བའི་ཐུགས་རྗེ་ཅན།། བླ་མ་རིན་ཆེན་དཔལ་ལྡན་ཞབས་བརྟན་ཤོག། དཀོན་མཆོག་རིན་ཆེན་གསུམ་གྱི་ཐུགས་རྗེ་དང་།། རྟེན་འབྲེལ་བསླུ་བ་མེད་པའི་བདེ་སྟོབས་དང་།། བདག་གིས་ལྷག་བསམ་དག་པའི་སྨོན་ལམ་གྱིས།། སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག། ཅེས་པ་འདི་ཡང་རབ་གནས་ཤིང་འབྲུག་མགོ་ཟླ་བའི་ཡར་ངོའི་ཚེས་བཅུ་དང་འཛམ་གླིང་ཞི་བདེའི་དར་ཅོག་སྒྲོན་པའི་དུས་བཟང་གི་ཉི་མ་ལ་རང་གི་དངོས་སློབ་དང་སྙིང་གྲོགས་ཀྱི་འཁྲུངས་སྐར་ལ་མཁའ་འགྲོ་དམ་པས་གསུང་སྐུལ་བཞིན་ཤྲཱིཿ གླིང་པས་ཨེ་ཝྃ་སྟག་ཚང་ཨ་ནནྟའི་ཕོ་བྲང་ནས་སྨོན་པ་དེ་དེ་བཞིན་དུ་འགྲུབ་པར་གྱུར་ཅིག་གུ།། ཤྲཱིཿ སརྦ་ལོ་ཀ་བི་ཛ་ཡནྟུ།། 8/1/2025

རྟེན་འབྲེལ་བཟང་པོ་བཅུ་འཛོམས་བྱུང་། ཨེ་མ་ཧོ༔ ༼༡༽ ཆོས་ཀྱི་སྤྲིན་བཞིན་བཟང་པོ་བཅུ་འཛོམས་པ།། ཀ་དག་ངོ་བོ་སྤྲོས་བྲལ་བདེ་ཆེན་དཔལ།། ལྷུན་གྲུབ་རང་བཞིན་འོད་གསལ་དགྱེས་པ་རྩལ།། རང་རིག་ཐུགས་རྗེ་ཀུན་བཟང་རིག་འཛིན་རྒྱལ།། ༼༢༽ བཟང་གཅིག་དྲིན་ཆེན་བླ་མ་ཡུན་རིང་འཚོ།། བཟང་གཉིས་སེམས་ཀྱི་གྲོགས་བཟང་མཉམ་དུ་འཛོམས།། བཟང་གསུམ་ཕུ་ནུ་མིང་སྲིང་མཐུན་སྒྲིལ་ཡོང་།། བཟང་བཞི་བརྩེ་བའི་གྲོགས་དང་ཡང་ཡང་མཇལ།། ༼༣༽ བཟང་ལྔ་རིགས་མཐུན་ཆོས་མཆེད་རང་དབང་ཐོབ།། བཟང་དྲུག་མི་རིགས་ཐམས་ཅད་བསམ་བློ་མཐུན།། བཟང་བདུན་སེམས་ཅན་ཐམས་ཅད་བདེ་བར་འབྱོར།། བཟང་བརྒྱད་སྡུག་བསྔལ་རྒྱུ་བྲལ་བདེ་ལེགས་ཕྱིན།། ༼༤༽ བཟང་དགུ་སྡུག་བསྔལ་གཏན་མེད་བདེ་རྒྱུན་ལྡན།། བཟང་བཅུ་ཉེ་རིང་ཀུན་བྲལ་བཏང་སྙོམས་གནས།། ཀུན་བཟང་ཡིད་བཞིན་ནོར་བུའི་སྨོན་ལམ་གྲུབ།། ཀུན་བཟང་སྙིང་པོའི་བསྟན་པ་འཛིན་སྐྱོང་སྤེལ།། ཞེས་པ་འདི་ཡང་རབ་གནས་ཤིང་འབྲུག་མགོ་ཟླ་བའི་ཡར་ངོའི་བཟང་པོ་གཉིས་པ་ལ་རྗེ་བཙུན་མཁའ་འགྲོ་མ་དཔལ་ས་སྐྱ་ཕུན་ཚོགས་ཕོ་བྲང་གི་རིགས་ཀུན་གྱི་ཁྱབ་བདག་མོ་ཀུན་དགའ་འཇམ་དབྱངས་དཔལ་མོས་ཐུགས་བརྩེས་ཉེར་གཅིག་མའི་བྱིན་ལུང་དང་༸མཁའ་འགྲོ་རྗེ་བཙུན་མ་དཔལ་ས་སྐྱ་ཕུན་ཚོགས་ཕོ་བྲང་གི་གཟིམ་ཁང་ནས་ཤྲཱིཿ ཨེ་མ་ཧོས་བདེན་གཏམ་ནང་མོལ་རྣམས་དེ་ཉིད་དུ་བགྱིས་པར་དགེའོ།། དགེའོ།། དགེའོ།།

༄༅།།ཞེ་ཆེན་མཁན་སྤྲུལ་ཚུལ་ཁྲིམས་རྡོ་རྗེའི་ ཞབས་བརྟན་བྱ་རྒྱལ་ཁྱུང་གི་སྒོང་ང་ ཞེས་བྱ་བ་བཞུགས་སོ།། ན་མོ་མ་ཧཱ་གུ་རུ་པདྨ་ཀ་ར་ཡེ།། བཀའ་གཏེར་ཟབ་དགུའི་སྲོག་འཛིན་སྔ་འགྱུར་པའི།། བསྟན་པ་སྐྱོང་ཞིང་བསྟན་པ་སྤེལ་མཁས་ཞིང་།། ཚུལ༵་ཁྲིམས༵་ཏིང་འཛིན་ཤེས་རབ་གྲུབ་པའི་དབང་།། རྡོ༵་རྗེ༵་ཆོས་བདུན་ངོ་བོར་ཞབས་བརྟན་ཤོག། མི་གཡོ་སྐུ་ཡི་མཚན་དཔེའི་ལང་འཚོ་བརྟས།། མི་འགགས་གསུང་གི་ཚངས་དབྱངས་ས་གསུམ་བརྡལ།། མི་འགྱུར་ཐུགས་རྗེའི་མཁྱེན་བརྩེ་ནུས་སྟོབས་རྒྱས།། མི་ཁྱབ་མེད་པའི་ཕྲིན་ལས་མཐར་ཕྱིན་ཤོག། དཀོན་མཆོག་རིན་ཆེན་གསུམ་གྱི་བྱིན་རླབས་དང་།། རྟེན་འབྲེལ་བསླུ་བ་མེད་པའི་བདེན་སྟོབས་ཀྱིས།། མཁན་སྤྲུལ་དམ་པའི་བཞེད་དོན་ལྷུན་གྲུབ་ནས།། པདྨ་ཀ་རའི་བསྟན་པ་དར་རྒྱས་ཤོག། ཅེས་པ་འདི་ཡང་རབ་གནས་ཤིང་འབྲུག་མགོ་ཟླ་འམ་བོད་ཁམས་གཏེར་གྱིས་གཏམས་པའི་དུས་བཟང་ལ་ཡར་ངོའི་རྒྱལ་བ་དང་པོར་འཇང་སྟག་ཚང་པདྨ་དབང་ཆེན་དགྱེས་པའི་དགའ་ཚལ་ནས་མཁན་པོ་འོད་གསལ་མཐའ་ཡས་ཀྱིས་གསུང་སྐུལ་དང་དབྱིག་ལན་ནས་རྟེན་འབྲེལ་ལེགས་འགྲིགས་དང་མཁན་སྤྲུལ་དམ་པ་ཉིད་ཀྱིས་བསང་མཆོད་ཐུགས་སྨོན་དང་གནས་མཆོག་ལ་འབྲེལ་འཇོག་ལ་ཡི་རང་དང་བཅས་ཤྲཱིཿ ཨེ་མ་ཧོས་གནམ་བདག་ཆེན་མོས་ལོ་སར་ལེགས་སྐྱེས་སུ་དེ་ཉིད་སྙིང་ནས་སྨོན་པ་དེ་དེ་བཞིན་དུ་འགྲུབ་པར་གྱུར་ཅིག་གུ།། ཤྲཱིཿ སརྦ་ལོ་ཀ་བུདྡྷ་བི་ཛ་ཡནྟུ།།

༄༅།གུ་རུ་ཡིད་བཞིན་ནོར་བུའི་གསོལ་འདེབས་ ཀུན་བཟང་མེ་ལོང་ཞེས་བྱ་བ་བཞུགས་སོ།། ན་མོ་མ་ཧཱ་གུ་རུ་པདྨ་ཀ་ར་ཡེ༔ རྒྱལ་བ་ཀུན་འདུས་སངས་རྒྱས་པདྨ་སྐྱེས།། དམ་ཆོས་ཀུན་འདུས་ཆོས་ཉིད་རྫོགས་པ་ཆེ།། དགེ་འདུན་ཀུན་འདུས་རིག་གྲོལ་རྒྱལ་བའི་སྲས།། གུ་རུ་ཡིད་བཞིན་ནོར་བུ་གསོལ་བ་འདེབས།། བཀྲ་ཤིས་དོན་ཀུན་འགྲུབ་པར་བྱིན་གྱིས་རློབས།། ཨོྃ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ གུ་རུ་རྒྱལ་བ་རིགས་ལྔ་ཐོད་ཕྲེང་རྩལ།། སྣང་སྲིད་ཟིལ་གནོན་མཆོག་ཐུན་དངོས་གྲུབ་བདག། མ་ལུས་འགྲོ་ཀུན་འདྲེན་པའི་ཐུགས་རྗེ་ཅན།། བདེ་ཆེན་ཡེ་ཤེས་དབང་རྒྱལ་གསོལ་བ་འདེབས།། བདེ་ལེགས་ཕུན་སུམ་ཚོགས་པར་བྱིན་གྱིས་རློབས།། ཕྱི་ནང་འབྱུང་བའི་ལུས་ངག་བར་ཆར་སོལ།། གསང་ཆེན་མཆོག་གི་ཡེ་ཤེས་བྱིན་རླབས་སྩོལ།། འགྲོ་ཀུན་འཇའ་ལུས་འཕོ་ཆེན་ལྷུན་གྲུབ་ཤོག། ཅེས་འོད་གསལ་དག་པའི་སྣང་ཆ་དང་མཁན་པོ་འོད་གསལ་མཐའ་ཡས་རྡོ་རྗེ་ལྷུན་གྲུབ་ཀྱིས་སྐུལ་ངོར་ཐོ་རངས་སྐབས་ཀྱི་བླ་རྣམ་གྱི་ཐུན་གསེང་གི་ཞོར་དུ་གསོལ་བར་འདེབས་པར་དོན་དང་ལྡན་པར་གྱུར་ཅིག་གུ།། །། ཤྲཱིཿ སརྦ་ལོ་ཀ་བུདྡྷ་བི་ཛ་ཡནྟུ།། 1/1/2025

དགེ་རྩེ་སྐྱེན་པོའི་མཁན་ཆེན་དམ་པ་བཤད་སྒྲུབ་རྒྱ་མཚོའི་ ཞབས་བརྟན་པདྨའི་དྲྭ་བ་ཞེས་བྱ་བ་བཞུགས་སོ། ཨོྃ་སྭ་སྟི།། རྒྱལ་བསྟན་བཤད༵་དང་སྒྲུབ༵་པའི་རྒྱ༵་མཚོ༵་ལས།། ཕན་བདེ་ཡིད་བཞིན་འཇོ་བའི་མཛད་བཟང་ཅན།། སྐུ་གསུམ་མཁའ་སྤྱོད་བསྟན་པའི་ཁྱབ་བདག་རྗེ།། མཁས་བཙུན་བཟང་པོའི་མཁན་ཆེན་ཞབས་བརྟན་ཤོག། ཅེས་པ་འདི་ཡང་རབ་གནས་ཆུ་ཡོས་མགོ་ཟླའི་རྒྱལ་བ་གསུམ་པ་ལ་མཁན་པོ་གངས་རིའི་ཕོ་ཉས་སྐུལ་ངོར་ཨེ་མ་ཧོས་ཨེ་ཝྃ་ཀུན་ཁྱབ་རི་ཁྲོད་ནས་སྨོན་པར་དགེའོ།། །། ࿐ བསུ ཡོན་ཏན་ཀུན་ལ་ཐོགས་མེད་འགྲོ་བའི་མགོན། ། བྱམས་བརྩེ་རང་བཞིན་ཅན་གྱི་མཁན་ཆེན་མཆོག། དགེ་སྡིག་བླང་དོར་འོད་དཀར་ཕྱོགས་བཅུར་འཕྲོས། ། ཐུབ་བསྟན་བཤད་སྒྲུབ་རྒྱ་མཚོའི་འཁྲུངས་སྐར་བསུ། ། ཆོས་ཀྱི་སྦྲང་ཆར་བསིལ་མ་ཕྱོགས་བཞིར་འབབ། ། གནས་ལུགས་དོན་གྱི་རྩ་བ་དོན་དུ་བླངས། ། མ་དག་འཇིག་རྟེན་བྱོན་པ་ཨེ་མ་ཧོ། ། སྐྱེས་ཆེན་བསྟན་པའི་སྲོག་ཤིང་འཁྲུངས་སྐར་བསུ། ། ཁྱེད་ཉིད་སླར་ཡང་བསྟན་འགྲོའི་དོན་སྒྲུབ་ལ།། སྐུ་ལུས་མི་ཤིགས་རྡོ་རྗེ་རབ་བརྟན་ཏེ།། གངས་ཅན་ཁ་བའི་སྨན་ལྗོངས་ཡུལ་དབུས་སུ།། ཉམས་དགའི་སྣང་བཅས་སྐུ་ཚེ་འཚོ་བཞེས་གསོལ།། རྩོམ་པ་པོ།———པདྨ་སྐལ་བཟང་།