༄༅།།དབང་ལུང་མན་ངག་རྒྱ་མཚོའི་མཛོད་འཆང་རྡོ་རྗེ་སློབ་དཔོན་ཆེན་པོ་༸ངག་དབང་ཆོས་ཀྱི་བསམ་གཏན་མཆོག་གི་ཞབས་བརྟན་གསོལ་འདེབས་དོན་ལྡན་ངག་གི་རོལ་མོ་ཞེས་བྱ་བ། ་གང་བསམ་ ༡༽བསྐལ་བཟང་གདུལ་བྱ་རྒྱ་མཚོའི་མགོན་གྱུར་པ།།ཐུགས་རྗེ་སྤྱན་ལྡན་ཡེ་ཤེས་སྒྱུ་འཕྲུལ་གར།།རབ་འབྱམས་དཀྱིལ་འཁོར་ལྷ་དང་བསྟན་སྲུང་དང་།།རྩ་བརྒྱུད་བླ་མའི་ཚོགས་ཀྱིས་དགེ་ལེགས་སྩོལ།།༢༽དཔག་མེད་ཚོགས་གཉིས་རྒྱ་མཚོ་བསགས་པའི་མཐུས།།ཆུང་ནས་མཚན་ལྡན་བཤེས་གཉེན་ལེགས་པར་བསྟེན།།ཚུལ་བཞིན་ལམ་གྱི་རིམ་པས་ཐུགས་རྒྱུད་སྦྱངས།།ངག་དབང་ཆོས་ཀྱི་བསམ་གཏན་ཞབས་བརྟན་གསོལ།།༣༽རྫོགས་རིམ་སྦྱོར་དྲུག་ཉམས་ལེན་ལོ་དགུར་བཞུགས།།འཇིགས་བྱེད་ལ་སོགས་བསྐྱེད་རིམ་སྣ་ཚོགས་ལ།།བསྒོམ་སྒྲུབ་མཛད་དེ་བགྲང་བྱ་བཅུ་ཕྲག་བརྒལ།།སྒྲུབ་བརྒྱུད་བསྟན་པའི་རྒྱལ་མཚན་ཞབས་བརྟན་གསོལ།།༤༽གསང་སྔགས་གསར་མའི་རྒྱུད་སྡེ་རབ་འབྱམས་ཀྱི།།དབང་ལུང་གདམས་པའི་ཁྲིད་རྒྱུན་མ་ལུས་པ།།ལེགས་པར་གསན་ཅིང་བསྙེན་སྒྲུབ་ཚད་ལྡན་མཛད།།རྡོ་རྗེ་སློབ་དཔོན་ཆེན་པོ་ཞབས་བརྟན་གསོལ།།༥༽རིས་མེད་བསྟན་འཛིན་དུ་མའི་ཐུགས་བཞེད་ལྟར།།དོལ་པོ་པ་དང་སྒྲོལ་བའི་མགོན་སོགས་ཀྱི།།ཆད་ལ་ཁད་པའི་དབང་སྲོག་ལུང་རྒྱུན་མཐུད།།ངག་དབང་ཆོས་ཀྱི་བསམ་གཏན་ཞབས་བརྟན་གསོལ།།༦༽ཆོས་རྒྱལ་བདུན་དང་རིགས་ལྡན་ཉེར་ལྔ་ཡིས།།ཞལ་གཟིགས་ལུང་བསྟན་སྦྱོར་དྲུག་བསྟན་པའི་བདག།ཀུན་སྤངས་ཐུགས་རྗེ་བརྩོན་འགྲུས་ངོ་བོ་རུ།།མགོན་ཁྱེད་བསྐལ་བརྒྱའི་བར་དུ་ཞབས་བརྟན་གསོལ།།༧༽རྒྱལ་བས་ལུང་བསྟན་ཀུན་མཁྱེན་དོལ་པོ་པའི།།གཞན་སྟོང་རི་ཆོས་ངེས་དོན་རྒྱ་མཚོ་ཡི། རང་ལུགས་སེང་གེའི་ང་རོ་སྒྲོགས་པའི་སླད།།མགོན་ཁྱེད་བསྐལ་པ་རྒྱ་མཚོར་ཞབས་བརྟན་གསོལ།།༨༽ཀུན་མཁྱེན་སྤྱན་སྔར་དུས་འཁོར་འགྲེལ་ཆེན་ལ།།ལན་གྲངས་ཉི་ཤུ་རྩ་ལྔར་གསན་བཞེས་མཛད།།དུས་ཞབས་གཉིས་པ་ཕྱོགས་རྒྱལ་ངོ་བོ་རུ།།མགོན་ཁྱེད་བསྐལ་པ་རྒྱ་མཚོར་ཞབས་བརྟན་གསོལ།།༩༽ངོ་མཚར་མན་ངག་ཟབ་ཁྲིད་བརྒྱ་རྩ་བརྒྱད།།ཞིང་འདིར་གསལ་མཛད་ཀུན་དགའ་གྲོལ་མཆོག་གི།མཛད་བཟང་རྩིབ་སྟོང་འཁོར་ལོ་བསྐོར་བའི་སླད།།མགོན་ཁྱེད་བསྐལ་པ་རྒྱ་མཚོར་ཞབས་བརྟན་གསོལ།།༡༠༽འཕགས་ཡུལ་གྲུབ་ཆེན་སངས་རྒྱས་སྦས་པའི་མདུན།།སྔར་མེད་སྔགས་ཀྱི་བློ་སྐྱེད་ལྔ་བརྒྱ་ཐོབ།།རྗེ་བཙུན་ཏཱ་ར་ནཱ་ཐའི་རྒྱལ་ཚབ་ཏུ།།མགོན་ཁྱེད་བསྐལ་བ་རྒྱ་མཚོར་ཞབས་བརྟན་གསོལ།།༡༡༽དང་པོའི་སངས་རྒྱས་ཡེ་ཤེས་སྒྱུ་མའི་སྐུ།།སྐུ་ཚེ་གཅིག་གིས་མངོན་དུ་བྱེད་མཛད་པའི།།ངག་དབང་རྡོ་རྗེ་བཟང་པོའི་རྒྱལ་ཚབ་ཏུ། །མགོན་ཁྱེད་བསྐལ་པ་རྒྱ་མཚོར་ཞབས་བརྟན་གསོལ།།༡༢༽དུས་ཀྱི་འཁོར་ལོའི་རྣལ་འབྱོར་གྲུབ་པའི་དབང་།།བྱིན་རླབས་མན་ངག་བརྒྱུད་པའི་མཛོད་འཆང་བ།།རྗེ་བཙུན་སྐལ་ལྡན་རྒྱ་མཚོའི་གདུང་འཚོབ་ཏུ།།མགོན་ཁྱེད་བསྐལ་པ་རྒྱ་མཚོར་ཞབས་བརྟན་གསོལ།།༡༣༽ཇོ་ནང་བསྟན་པའི་བསྟི་གནས་ཛམ་ཐང་དུ།།སྔོན་བྱོན་མཁས་གྲུབ་འབུམ་གྱི་ཐུགས་སྨོན་བཞིན།།དབང་ལུང་མན་ངག་རྒྱ་མཚོའི་གཏེར་མཛོད་དུ།།མགོན་ཁྱེད་བསྐལ་པ་རྒྱ་མཚོར་ཞབས་བརྟན་གསོལ།།༡༤༽བདེ་མཆོག་རབ་འབྱམས་ལཱུ་དྲིལ་ནག་གསུམ་དང་།།གཤིན་རྗེ་རབ་འབྱམས་དམར་ནག་འཇིཊ་གསུམ་གྱི།།སྨིན་བྱེད་དབང་མཆོག་རྫོགས་པར་བསྩལ་བ་ཡི།།བཀའ་དྲིན་གཞལ་མཐའ་བྲལ་ཁྱེད་ཞབས་བརྟན་གསོལ།།༡༥༽དུས་ཀྱི་མཐའ་འདིར་བསྟན་སྲོག་གསོ་བའི་སླད།།རིས་མེད་གདུལ་བྱའི་ཞིང་ས་དང་མཐུན་པར།།དབང་ལུང་མན་ངག་གདམས་པའི་གྲུ་ཆར་རྒྱུན།།ཅི་དགར་སྩོལ་བའི་བཀའ་དྲིན་བསྐྱང་དུ་གསོལ།། ཞེས་པ་འདི་ནི་གསར་རྙིང་རིས་མེད་དགོན་སྡེ་དུ་མ་ནས་ཕེབས་པའི་བླ་སྤྲུལ་དང་། རྡོ་རྗེ་སློབ་དཔོན་བཅུ་ཕྲག་དུ་མའི་གྲངས་ལས་བརྒལ་བའི་དགེ་འདུན་འདུས་པ་བརྒྱ་ཕྲག་གསུམ་ལ་ཉེ་བར་ཟླ་བ་གཅིག་ལྷག་གི་རིང་ ༸ རྗེ་བཙུན་ཏཱ་ར་ནཱ་ཐས་ཆོག་སྒྲིག་མཛད་པའི་བདེ་མཆོག་རབ་འབྱམས་ཀྱི་དབང་ཆེན་བཅོ་བརྒྱད་དང་། ལཱུ་དྲིལ་ནག་གསུམ། དམར་ནག་འཇིགས་གསུམ། གསང་འདུས་ཡེ་ཤེས་ཞབས་ལུགས། གཤིན་རྗེ་རབ་འབྱམས་ཀྱི་དབང་ཆེན་བདུན་བཅས་བླ་མ་དམ་པ་གང་གི་མདུན་ནས་ལེགས་པར་ཞུ་བའི་སྐལ་བཟང་བྱུང་སྐབས། གུས་པ་སྨན་ཆར་གྱིས་བོད་རབ་རྒྱན་ཤིང་སྦྲུལ་སྨིན་ཟླའི་དཀར་ཕྱོགས་རྒྱལ་བ་གསུམ་པའི་ཉིན་ཆོས་སྒར་ངེས་དོན་སྒྲུབ་བརྒྱུད་གླིང་ནས་བྲིས་པ་དགེ་ལེགས་འཕེལ། སྤྱི་ལོ་༢༠༢༥་༡༢་༣ལའོ།།