འཇའ་ལུས་འཕོ་ཆེན་སྐུ་བཞེངས་བི་མ་ལ།།

འཇའ་ལུས་འཕོ་ཆེན་སྐུ་བཞེངས་བི་མ་ལ།།
ཟགས་ཕུང་འོད་དུ་ཡལ་བའི་ལྕེ་བཙུན་རྗེ།།
ཆོས་ཟད་ཡེ་ཤེས་མངོན་གྱུར་བླ་མ་རྗེ།།
དབྱེར་མེད་རིག་པའི་གཤིས་ལུགས་གཅིག་དུ་གུས།།

མ་སྨད་བསོད་ནམ་ཤེལ་གྱི་ཕྲེང་བ་ལ།།
མི་ཚེའི་ཕྲེང་ཐག་དོན་མེད་མ་ཟད་པ།།
མགོན་པོ་གང་གི་ཞལ་མཇལ་གསུང་ཐོས་སུ།།
ལས་དབང་གོམ་ཁ་མདོ་སྨད་ཕྱོགས་འདི་སྐྱིད།།

བུ་སྐྱེས་དོན་གོ་མ་ཆོད་སྡིག་ཡང་ཆོག།།
མང་སྐམ་གྲགས་པ་མེད་པས་དམོད་ཡང་ཉན།།
ཚེ་མཐའ་མི་འཁྱམས་ལྡོམ་པོ་ཡིན་ཡང་བཟོད།།
ཆོས་དང་བླ་མས་མ་འཕངས་ང་རེ་དགའ།།

ངན་ཡང་བླ་མས་ཚེ་རབ་མི་འབྲལ་གསུང་།།
སྐྱོ་ཡང་ངེས་གསང་ཆོས་ཀྱི་བགོས་སྐལ་ཐོབ།།
འཁྱམས་ཡང་མཆོག་གསུམ་དད་གུས་སེམས་ནས་བརྟན།།
རྒས་ཡང་གདམ་པའི་ཉིང་བཅུད་ཟས་དང་ལྡན།།

ངུས་ན་བླ་མའི་ཞལ་རིས་ཡིད་ལ་འཁོར།།
ཀུན་རྟོགས་སྤྲོས་པའི་རྒྱུན་ཐག་དལ་གཅིག་ཆད།།
དྲན་ན་གདུང་བའི་མུན་པ་དབྱིངས་སུ་དག།
བྱིན་རླབས་ཡེ་ཤེས་ཉི་མ་སྙིང་ལ་ཤར།།

གང་ཤར་རང་གྲོལ་སྟོང་བའི་མཚོན་ཁ་ནས།།
གཉིས་འཛིན་སྤྲོས་པའི་རས་ཡོལ་ཕྱེད་གཤག་ངང་།།
མ་བཅོས་རིག་པ་བླ་མའི་ངོ་བོར་མཐོང་།
བློ་བདེའི་དཔའ་གླུ་རིང་མོ་དབང་མེད་ཤོར།།

སྨྱོན་པའི་གཏམ་ལས་མེད་མོད་ཐུགས་རེ་བདེན།།
སེམས་ཞེན་སྒོམ་ལས་མེད་དོ་གསུང་དེ་རྨད།།
ཆེན་པོའི་ཐུགས་དང་མི་འཚམ་སྨྱོན་རྟག་འགའ།།
ཙོང་ཆུའི་གྲུ་ཟུར་ཉུལ་བས་ཆང་ཕོར་ནས།།