January 2020

ཤྲཱིཿགླུ་རྫོགས་པ་ཆེན་པོ།།
ཨ༔
ཨ་བྷྱེ་རྒྱལ་བ་ཀུན་འདུས་ཨ་ཏིའི་བདག།
ལཀྵཾ་ཀ་ར་མ་ལུས་འགྲོ་བའི་མགོན།།
གུཧྱེ་སིདྡྷི་དམ་ཚིག་མ་ཎི་ཀ།
ཙིཏྟ་རཏྣ་མཎྜལ་རྟག་ཏུ་རྒྱལ།།
ཀ་དག་ལྟ་བའི་གདར་ཤ་ཆོད་པའི་ཚེ།།
སྟོང་རྐྱང་མ་ཡིན་སྤྲོས་མཐའ་བརྒྱད་དང་བྲལ།།
དོན་དམ་རིག་པ་དབྱིངས་སུ་ཆུབ་པའི་ཚེ།།
ཕྱོགས་དུས་བདེ་གཤེགས་སྲས་བཅས་ཐུགས་ཐིག་མཇལ།།
ལྷུན་གྲུབ་སྒོམ་པའི་འཇའ་ཟེར་ཐིག་ལེའི་ཀློང་།།
ཞིང་དང་དཀྱིལ་འཁོར་དག་པ་རབ་འབྱམས་ཀུན།།
ཀུན་བཟང་ཚོགས་བརྒྱད་འཕོ་ཆེན་སྐུར་བཞེངས་ཚེ།།
འབྱུང་བ་རང་དག་ཡེ་ཤེས་རྡོ་རྗེ་འཆང་།།
ཡེ་གྲོལ་ཀ་དག་ཡེ་ཤེས་སྐུར་འཆང་བ།།
རང་གྲོལ་ཐོད་རྒལ་ལྷན་སྐྱེས་གཞལ་ཡས་ཁང་།།
གཅེར་གྲོལ་རིག་པ་བདེ་གཤེགས་མ་ཎི་ཀ།
སྨིན་གྲོལ་ཀུན་གཞི་གདོད་མའི་མགོན་པོ་དངོས།།
བྱམས་པ་ཆེན་པོ་རྣམ་འདྲེན་ལྔ་བ་དང་།།
སྙིང་རྗེ་ཆེན་པོ་སྤྱན་རས་གཟིགས་དབང་དང་།།
དགའ་བ་ཕུན་ཚོགས་ཧ་ཤང་མ་ཧཱ་ཡ།།
འཇམ་དཔལ་གཞོན་ནུ་མཉམ་ཉིད་རིག་པའི་ལྷ།།
ལམ་དང་འབྲས་བུ་རྩོལ་བས་བྱར་མེད་ལ།།
དོན་དམ་ལྷུན་གྱིས་གྲུབ་པ་རྒྱལ་བའི་སྐུ།།
ལམ་དང་རིམ་པའི་མདོ་སྔགས་རྩོལ་མེད་པར།།
ལྷུན་གྲུབ་མཐར་ཐུག་རྫོགས་ཆེན་ཁོ་ན་ཉིད།།
གདོད་མའི་མགོན་པོ་དཔལ་ལྡན་བླ་མ་ལ།།
མཉམ་ཉིད་ཆོས་སྐུར་ལྟ་བའི་མོས་གུས་ཀྱིས།།
དོན་བརྒྱུད་དགོངས་པའི་བྱིན་རླབས་སྙིང་ལ་འཕོས།།
རིག་པ་རྩལ་གྱི་དབང་ཆེན་ཐོབ་པར་གསུངས།།
རྣམ་རྟོག་ཆོས་སྐུ་ལྟ་བའི་འཁྲུལ་རྟོག་མེད།།
ཟག་བཅས་བདེ་ཆེན་གོམས་པའི་ཕྱག་སྲོལ་མེད།།
ལྟ་སྒོམ་མ་ཤེས་འཁོར་འདས་དབྱེར་མེད་ཟེར།།
གཞུང་ལུགས་འགོ་སྟོང་དེ་དག་སྤངས་ན་ལེགས།།
ཡེ་ནས་གནས་ཕྱིར་རྩོལ་བསྒྲུབ་བྲལ་བའི་ཆོས།།
དམན་དང་དབང་རྣོན་ཁྱད་པར་མི་ལྟོས་ནས།།
ཡིད་ཆེས་སེམས་ཀྱི་གསང་བ་རིག་པའི་ཚེ།།
བླ་སློབ་དགོངས་པ་གཅིག་པུས་མན་ངག་རྟོགས།།
མངོན་སུམ་དབང་པོས་སྤྲོས་ཤིང་དཔྱད་ཡུལ་མེད།།
རྗེས་དཔག་ཀུན་རྟོག་སྣོན་མས་བཙལ་བྱ་དབེན།།
གཟུང་འཛིན་དགག་སྒྲུབ་ལས་འདས་རིག་པའི་ཀློང་།།
ཆེ་ཆོས་དྲུག་ལྡན་ཀུན་བཟང་རིག་པའི་དོན།།
ཐ་སྙེད་ཞེན་པར་རང་ཉིད་ངལ་བའི་རྒྱུ།།
དམིགས་བསྒོམ་ཁོ་ན་རང་སེམས་འཆིང་བའི་གཟེབ།།
ཟུག་རྔུའི་སྤྲོས་པ་ནང་ནས་མ་ཆོད་ཚེ།།
འཁོར་འདས་དབྱེར་མེད་འདོད་པ་འཁྲུལ་བའི་གཞི།།
སྨྲ་བསམ་བརྗོད་བྲལ་འདོད་པའི་དབུ་མ་དང་།།
ཐབས་ལམ་བདེ་ཆེན་རོལ་བའི་ཕྱག་ཆེན་ལས།།
ཁྱད་དུ་འཕགས་པའི་འོད་གསལ་རྫོགས་པ་ཆེ།།
མཐར་ཐུག་ཀུན་བཟང་དགོངས་པ་འདི་ཁོ་ན།།
མཐོང་བ་གང་མེད་གཉུག་མའི་ཡེ་ཤེས་ལ།།
མ་མཐོང་ལྷག་མར་གྱུར་བ་གང་ཡང་མེད།།
རང་རིག་ཁོ་ཐག་ཆོད་པའི་ཟབ་དོན་ཉིད།།
སྐལ་བཟང་སློབ་མས་བརྡ་དོན་དཔེ་ཡིས་རྟོགས།།
ཀ་དག་སྤྲོས་པ་བྲལ་ཕྱིར་ཡོད་མཐའ་སྤངས།།
ལྷུན་གྲུབ་རིག་གདངས་གསལ་ཕྱིར་མེད་མཐའ་བྲལ།།
ཟུང་འཇུག་ངོ་བོ་རང་བཞིན་ཐུགས་རྗེའི་རྩལ།།
རང་རིག་ཡེ་ཤེས་བླ་མ་འདི་ཁོ་ན།།
ཤེས་བྱའི་གཞི་ལ་སྒྲོ་འདོགས་མཐའ་ལས་གྲོལ།།
བགྲོད་བྱེད་ལམ་ལ་རེ་དོགས་འཁྲི་བ་ཆོད།།
ཐོབ་བྱ་འབྲས་བུའི་ཆོས་སྐུའི་རྒྱལ་ས་ཟིན།།
ཡེ་གྲོལ་ཀུན་ཏུ་བཟང་པོ་ཨེ་མ་ཧོ།།
ངོ་བོ་སྟོང་ཉིད་སྤྲོས་པའི་དྲྭ་ཟུར་དབེན།།
རང་བཞིན་གཤིས་ལ་ནམ་མཁའི་གོ་རིམ་བཞིན།།
ཐུགས་རྗེ་ཀུན་ཁྱབ་བདག་པོ་མ་ཎི་ཀ།།
ཀུན་བཟང་གདོད་མའི་མགོན་པོ་དེ་ཀ་ལགས།།
དོན་དམ་བློ་ལས་འདས་པའི་ཡེ་ཤེས་ཉིད་།།
ཀུན་རྫོབ་རྒྱུ་ལས་མ་བྱུང་རྫོགས་པ་ཆེ།།
སྒྲ་ཚིག་ལུང་ལས་མ་བྱུང་མན་ངག་ནི།།
རྟོགས་ལྡན་བླ་མའི་བྱིན་རླབས་ཁོ་ན་ལགས།།
རང་རིག་འགྱུར་མེད་གཞོན་ནུ་བུམ་པའི་སྐུ།།
མཁྱེན་ཆ་རང་འོད་གསལ་བའི་རྫོགས་ཆེ།།
ཤེས་རབ་རང་བྱུང་སྒྲོན་མའི་སྣང་བ་ཅན།།
སྒྲིབ་བྲལ་གདོད་མའི་སངས་རྒྱས་ཡེ་ཤེས་སོ།།
སྣང་སྟོང་བདེན་པའི་མཉམ་པ་ཉིད་ཀྱི་ངང་།།
བདེ་སྟོང་ཡེ་ཤེས་ཐིག་ལེ་ཉག་གཅིག་ལ།།
རིག་སྟོང་རིག་པའི་དབྱིངས་སུ་ཆོས་ཀུན་རྫོགས།།
འཁོར་འདས་རེ་དོགས་ཞིག་པའི་རྣལ་འབྱོར་རྒྱལ།།
སྣང་བ་སྐུ་ཡི་དཀྱིལ་འཁོར་མ་ལུས་དག།
གྲགས་པ་གསུང་གི་ཆོས་འཁོར་ཡོངས་སུ་རྫོགས།།
རིག་པ་ཐུགས་རྗེ་འགྲོ་ཁམས་ཕན་བདེས་སྨིན།།
རྫོགས་པ་ཆེན་པོ་ཡིད་བཞིན་ནོར་བུ་ལགས།།
རྩ་བརྒྱུད་བླ་མ་ཀུན་འདུས་པདྨ་འབྱུང་།།
ཡི་དམ་རྒྱལ་བ་ཀུན་འདུས་ཀུན་ཏུ་བཟང་།།
མཁའ་འགྲོ་ཆོས་སྐྱོང་ཀུན་འདུས་ཡུམ་ཆེན་མོ།།
རྩ་གསུམ་ཀུན་འདུས་ཀུན་གྱིས་རྟོགས་གྱུར་ཅིག།
ཅེས་པ་འདི་ཡང་རབ་གནས་ས་ཕག་མགོ་ཟླའི་ཟླ་བ་ཉ་ཡོངས་སུ་གང་བ་དང་ཆོས་རྗེ་དམ་པ་ཡིད་བཞིན་ནོར་བུའི་འདས་མཆོད་སྐབས་སུ་ཆོས་མཆེད་སློབ་གྲོགས་མང་པོས་སྐུལ་མ་དང་། རང་གིས་རྩ་གསུམ་ཆོས་སྐྱོང་རབ་འབྱམས་ལ་གསོལ་བ་བཏབས་པའི་མཐུ་ལས་གང་ཤར་རིག་པའི་ཀློང་ནས་ཤར་བ་དག་ལ་བཅོས་བསྒྱུར་སྤུ་ཙམ་མེད་པར་ཤྲཱིཿཨེ་མ་ཧོས་ཨེ་ཝཾ་ཛྙཱ་ན་གུ་རུའི་ལྷ་ཁང་དེ་ཉིད་དུ་ཐོ་རངས་སྟག་གི་དུས་སུ་བྲིས་པས་ཀུན་གྱིས་རང་བྱུང་རྫོགས་པ་ཆེན་པོའི་དེ་ཁོ་ན་ཉིད་རྟོགས་པའི་རྒྱུ་རུ་གྱུར་ཅིག་གུ།། །།

Leave a Reply

Your email address will not be published.