January 2020

ནད་སེལ་ཕུར་སྒྲུབ་གནམ་ལྕགས་རྡོ་རྗེའི་ཚ་ཟེར།
སྐྱབས་སེམས་སྔོན་དུ་སོང་ནས།
ཨོཾ་ཨཱཿཧཱུཾ་ཧྲཱི༔
ཨེ་ཝཾ་ངང་ལས་རང་ཉིད་སྐད་ཅིག་གིས༔
ནད་སེལ་དཔལ་ཆེན་རྡོ་རྗེ་གཞོན་ནུའི་སྐུ༔
རབ་ཁྲོས་མཐིང་ནག་ཞལ་གཅིག་ཕྱག་བཞི་བ༔
གཡས་གཡོན་དང་པོས་ཕུར་བུ་ཐོད་ཕོར་གསོལ༔
གཡས་གཡོན་གཉིས་པས་རྡོ་རྗེ་དྲིལ་རྒྱ་བཅས༔
དུར་ཁྲོད་ཆས་བརྒྱན་པདྨ་ཉི་ཟླའི་ཁར༔
རུ་ཏྲ་ཕོ་མོ་བརྫིས་པའི་གདན་སྟེང་དུ༔
ཞབས་བཞི་གྱད་ཀྱི་འདོར་སྟབས་ཚུལ་དུ་བཞུགས༔
དབང་ཕྱུག་སྔོན་མོ་ཞལ་གཅིག་ཕྱག་གཉིས་པ༔
གཡས་པ་ཕུར་བུ་གཡོན་པ་ཐོད་ཁྲག་དང་༔
ཞབས་གཉིས་བདེ་སྟོང་རོལ་བས་ཡབ་ལ་འཁྱུད༔
དམ་ཡེ་མེ་དཔུང་འབར་བའི་ཀློང་ན་གསལ༔
སྣང་སྲིད་རྣམ་དག་སྒྱུ་འཕྲུལ་ལྷ་ཡི་དལ༔
སྒྲ་གྲགས་ཡང་དག་གཟུངས་སྔགས་རོལ་པར་ཤར༔
དྲན་རྟོག་ཀ་དག་ཆོས་ཉིད་འོད་གསལ་ངང་༔
གང་ཤར་ཀུན་བཟང་དགོངས་པའི་ཀློང་ནས་བཟླའ།།
ཨོཾ་བཛྲ་ཀཱི་ལི་ཀཱི་ལ་ཡ་རཀྵ་ཀྲོ་དྷ་ན་ཧཱུྃ་ཕཊ༔
སྲོག་སྡོམ་གཟེར་བཞི་ལྡན་པའི་ངང་།།བརྒྱ་སྟོང་ཁྲི་འབུམ་བརྡ་རྟགས་འབྲས།།རྣལ་འབྱོར་སོ་སོའི་ཉམས་སྦྱོར་དང་།།རྡོ་རྗེ་གཞོན་ནུའི་དངོས་གྲུབ་ཐོབ།། དུས་མིན་ནད་རིགས་ཀུན་སེལ་ནས།།འཆི་མེད་བཙན་ས་ཟིན་པར་ངེས།།ས་མ་ཡ། རྒྱ་རྒྱ་རྒྱ།།
ཕྱི་སྣོད་འབྱུང་བ་ཀྲོ་དྷའི་རིགས་ལྔར་དག།
ནང་བཅུད་ཞི་ཁྲོ་ཕུར་བུའི་དཀྱིལ་འཁོར་རྫོགས།།
གསང་བ་རྫོགས་པ་ཆེན་པོས་འགྲོ་ཀུན་སྨིན།།
ཁམས་གསུམ་ཡོངས་གྲོལ་འཇའ་ལུས་འཕོ་ཆེན་ཤོག།
ཅེས་པ་འདི་ཡང་རབ་གནས་ས་བྱིའི་རྒྱལ་ཟླའི་ཡར་ཚེས་དགེ་བར་ངོས་ལ་དད་དམ་འགྱུར་བ་མེད་པའི་ཆོས་གྲོགས་དམ་པ་སྣང་གསལ་པྲ་ལ་རང་དབང་ཐོབ་པའི་གཙང་བ་གྲུབ་ཆེན་རིག་མཆོག་རིན་པོ་ཆེས་ད་སྐབས་ཀྱི་ནད་ངན་འདི་མྱུར་དུ་ཞི་བའི་ཆེད་དུ་ཁྱེད་ཀྱི་ཐུགས་དམ་བསྲུང་བ་རྭ་གུར་ལས་མི་འདའ་བར་མཛད་དགོས་ཚུལ་དང་། མཛད་ནས་ཀྱང་ཁྱེད་ཀྱི་ཟབ་ཆོས་ཤིན་ཏུ་གལ་ཆེན་ཞིག་ངེས་པར་དུ་གསུང་དགོས། ཅེས་དང་། ཁྱད་པར་དཔལ་མཆོག་ཕུར་བའི་སྒོ་ནས་གསུང་ན་དགའ་ཞེས་ཐུགས་དམ་གཙང་མས་སྐུལ་བ་དང་། བླ་མ་དང་ལྷག་པའི་ལྷ་ལ་གསོལ་བ་དྲག་ཏུ་བཏབས་པའི་མོད་ལ་ཨེ་མ་ཧོས་རིག་ཀློང་ནམ་མཁའ་མཛོད་ཀྱི་ཆོས་སྡེ་ལས་ཕབས་པར་དགེའོ།། །།

Leave a Reply

Your email address will not be published.