༄༅༅།།སྨོན་གསོལ་འདོད་འབྱུང་བུམ་བཟང་།
ཨོཾ་སྭསྟི་བི་ཛ་ཡནྟུ།།
ཚེ་དང་ཡེ་ཤེས་དཔག་མེད་བཅོམ་ལྡན་འདས།།
ཚེ་བདག་རིག་འཛིན་བླ་མ་བརྒྱུད་པར་བཅས།།
ཚེ་ལ་དབང་བའི་ལྷ་ཚོགས་ཐམས་ཅད་ཀྱིས།།
རབ་འབྱམས་རྒྱལ་བའི་དབང་པོ་ཞབས་བརྟན་ཤོག།
སྣང་བ་མཐའ་ཡས་འོད་གསལ་རྡོ་རྗེའི་སྐུ།།
འཆི་བདག་མུན་འཇོམས་དམ་ཆོས་བདུད་རྩིས་གསུང་།།
མི་ཤིགས་གཉུག་མའི་བདེ་ཆེན་ཕྱག་རྒྱའི་ཐུགས།།
གནམ་ལྕགས་གླིང་པའི་བཞེད་དོན་ལྷུན་གྲུབ་ཤོག།
ཆོས་དབྱིངས་ནམ་མཁའ་མཛོད་ལ་མངའ་དབང་བསྒྱུར།།
ཆོས་ཅན་ཕན་བདེའི་ཕྲིན་ལས་རྒྱ་མཚོའི་གཏེར།།
ཆོས་ཉིད་རིག་པའི་དོན་གཟིགས་རྗེ་བཙུན་མ།།
མཉྫུ་གྷོ་ཥ་ཤྲཱིཿཞབས་བརྟན་ཤོག།
སྔ་འགྱུར་རིང་ལུགས་མཆོག་ཏུ་བཀྲ་ཤིས་འཕེལ།།
བསྟན་འགྲོར་སྨིན་པའི་མཛད་བཟང་མཁའ་དང་མཉམ།།
སྙིགས་མའི་རྒུད་པ་ཀུན་ཞི་བདེ་ལེགས་ངང་།།
ཨེ་ཝཾ་གནུབས་ཆེན་ཕུན་སུམ་ཚོགས་པར་ཤོག།
ཅེས་པ་འདི་ཡང་རབ་གནས་ས་ཕག་ཟླ་ཚེས་དགེ་བར་རྨི་ལམ་བཟང་པོ་དང་ཌཱཀྐི་ནི་མཉྫུ་གྷོཥ་ཤྲཱིས་ཐུགས་སྨོན་གྱི་་རྐྱེན་ལས་དབྱིན་ཡུལ་ཨེ་ཝཾ་ཀུན་བཟང་ཆོས་གླིང་ནས་རིག་འཛིན་དཔལ་དགྱེས་པ་རྡོ་རྗེས་གང་ཤར་དབུགས་དབྱུང་གཟེངས་བསྟོད་ཀྱི་སྨོན་ཚིག་ཏུ་བྲིས་ཏེ་ཕུལ་བ་སིདྡྷི་རསྟུ།།