༄༅། །ཉག་བླ་པདྨ་བདུད་འདུལ་གྱི་གདུང་ཁང་སྐོར་མཐོང་ཐོས། ༒ འདི་ནི་ཧ་ཅང་ངོ་མཚར་བ་ཞིག་རེད། རྫུན་ཚིག་དང་གང་ཟག་རེ་འགའ་ཞིག་གིས་དག་པའི་སྣང་བ་བཤད་པ་ཙམ་གཏན་ནས་མ་ཡིན་པར། འགྲོ་བ་ནད་ཀྱིས་མནར་བ་ཁྲི་སྟོང་མང་པོར་མཐོང་ཆོས་མངོན་གྱུར་དང་མིག་མཐོང་ལག་ཟིན་དུ་འབྱུང་བཞིན་ཡོད་པ་ཞིག་རེད། ནད་དང་རྐྱེན་ངན་མི་འདོད་པའི་སྡུག་བསྔལ་སྣ་ཚོགས་ལས་གྲོལ་བའི་ཐབས་ལེགས་སྐྱེས་དཔེ་མེད་པ་ཞིག་རེད་ཟེར་ཀྱང་མི་ཆོག་པ་མི་འདུག་སྙམ། དེ་ནི་ཁམས་དཀར་མཛེས་ཁུལ། དཔལ་ཡུལ་རྫོང་། ཁྲོམ་ཐར་ཆུས།ཨ་འཛི་ཡུལ་ཚོ། སྙིང་ཁོག་ལུང་པ་ན། རབ་བྱུང་བཅུ་བཞི་པ་མེ་ཕོ་བྱི་ལོར་བྱོན་པའི་ཉག་བླ་པདྨ་བདུད་འདུལ་ཟེར་བ་ཁོང་སྐུ་འཇའ་ལུས་སུ་དེངས་ནས་སྐྲ་སེན་ཤུལ་དུ་བཞག་པའི་ནང་རྟེན་ཅན་གྱི་གདུང་ཁོང་ངོ་མཚར་ཅན་ཉིན་མོ་མི་བསྐོར་བ་དང་མཚན་མོ་ལྷ་འདྲེས་བསྐོར་བའི་མཆོད་རྟེན་ཞིག་འདུག །དམ་པ་ཁོང་ནི་སངས་རྒྱས་སྟོང་གི་ཐུགས་སྤྲུལ། སྤྱན་གཟིགས་སྣང་མཐའི་གསུང་སྤྲུལ། ཨོ་རྒྱན་པདྨའི་སྐུ་སྤྲུལ་འཁྲུལ་མེད་ཅིག་ཡིན་པར་ཁུང་ལུང་ཚད་ལྡན་མང་པོ་ཀུན་གྱི་བརྗོད་བཞིན་འདུག་ཀྱང་། ཁོང་གི་རྣམ་ཐར་སོགས་ལས་སྐུ་ཆུང་ངུ་བྱིས་པའི་དུས་ནས་བཟུང་རྫུ་འཕྲུལ་དང་མངོན་ཤེས་བྱམས་སྙིང་རྗེ་སོགས་ཡོན་ཏན་བརྗོད་མི་ཤེས་པ་དག་ལས་ར་སྤྲོད་བྱས་འདུག ཁོང་འཇའ་ལུས་སུ་དེངས་པའི་ས་རུ་སློབ་བུ་དག་གིས་གདུལ་བྱ་སེམས་ཅན་གྱི་ཆེད་དུ་དབུ་སྐྲ་ཕྱག་ཞབས་ཀྱི་སེན་མོ་དང་ཆོས་གོས་སོགས་དམ་པ་ཁོང་གི་ཅ་ལག་ཀྱི་ནང་རྟེན་བྱས་པའི་གདུང་ཁང་མཆོད་རྟེན་ཞིག་རེད། རྟེན་འདི་དཀར་ཕྱོགས་སྐྱོང་བའི་ལྷ་དང་སྲུང་མ་སོགས་ཀྱིས་གཡེལ་བ་མེད་པར་བསྲུང་ཡོད་ཚུལ། སྔོན་ཆད་ཇག་རྒྱག་མཁན་ཕྱག་ཕྲེང་ཞེས་པ་དང་རིག་གསར་སྐབས་སོགས་སུ་མ་རུང་བའི་གང་ཟག་འགའ་ཞིག་གིས་རྟེན་འདི་རློག་པར་བརྩམ་ཚེ་རྟགས་ཁྱད་པར་ཅན་མང་དུ་བསྟན་པའི་སུས་ཀྱང་གནོད་སྐྱོན་སྤུ་ཙམ་བྱེད་མ་ཐུབ་པའི་ལོ་རྒྱས་གསོན་པོ་འདུག་ལ། ས་གནས་དེ་གར་གནས་པའི་རྒན་པོ་དག་གིས་ཀྱང་ངོ་མཚར་བ་མང་པོ་མིག་མཐོང་ལག་ཟིན་བཤད་རྒྱུ་འདུག ད་སྐབས་ཡང་ཉིན་མོ་མིས་བསྐོར་བ་དང་། མཚན་མོ་མི་མིན་དག་གིས་བསྐོར་བཞིན་ཡོད་པ་མཐོང་ཐོས་ཅན་མང་པོ་བཤད་རྒྱུ་འདུག ལྷག་པར་དུ་ཨ་འཛི་རྒད་ཕོ་ཞིག་གིས་མཚན་མོ་སྐོར་བ་བྱེད་སྐབས་རྗེས་མི་ཟིན་པའི་བསྐོར་བ་བྱེད་མཁན་ཞིག་ཡོད་པའི་ཁོས་ལྷམ་སྒྲོག་བཅིང་མདོག་བྱས་ཏེ་སྒུག་བསྡད་སྐབས་མི་ནག་པོ་ལུས་ཆེ་བ་ཡ་མཚན་པ་ཞིག་ལ་ཐུག་སྟེ་ཤིན་ཏུ་སྐྲག་ནས་ཁྱོད་སུ་ཡིན་གང་ནས་འོང་སོགས་དྲིས་སྐབས། ཁོ་རྡོ་རྗེ་གདན་ནས་འོང་བ་ཡིན་མིང་ལ་རྨ་གཡུ་འབྲུག་ལྕགས་རྩེ་ཟེར། ངའི་ལུས་འདི་ལས་འཕོ་བ་ལས་ཐབས་མེད་ཀྱི་ནད་ཞིག་གིས་ཐེབས་སྟེ་འཛམ་གླིང་གི་གནས་དག་ལ་བསྐོར་བ་ཕྱིན་ཀྱང་ཕན་ཆེར་མ་བྱུང་། དེ་ནས་རྡོ་རྗེ་གདན་ནས་མི་མིན་དག་གིས་བོད་ཡུལ་ན་འཇའ་ལུས་པའི་གདུང་ཁང་ངོ་མཚར་བ་ཞིག་འདུག་ཟེར་ནས་འོང་བ་ཡིན། འདིར་བསྐོར་བ་བྱས་ནས་ཞག་འགའ་ཡིན་ད་ནི་ནད་ལས་གྲོལ་སོང་། ང་དང་འཕྲད་པ་གཞན་ལ་མ་བཤད་བཤད་ན་ཆག་སྒོ་ཡོང་ཟེར་ནས་ནམ་ལངས་ཁར་རླུང་འཚུབ་ཞིག་དང་ལྷན་དུ་མེད་སོང་ཟེར། འདི་ལྟ་བུའི་རྟེན་ཁྱད་འཕགས་དེ་ལ་ཕྱག་བསྐོར་བྱས་པའི་ཕན་ཡོན་མདོར་བསྡུས་ཞིག་བདག་གིས་གཞན་ལས་བཏུས་པ་ནི། དམ་པ་ཁོང་གཤེགས་ནས་བགྲང་བྱ་དྲུག་ཅུ་བརྒལ་སྐབས་སྤྲུལ་འཇིགས་མེད་འོད་ཟེར་ལ་བད་ཀན་གྲེ་བའི་ནད་བྱུང་དེ་བསྐོར་བ་བྱེད་སྐབས་ཐོ་རངས་གི་ཆ་ལ་ལྷོ་ཕྱོགས་འཇའ་འོད་ཀྱི་དཀྱིལ་དུ་སེང་གེ་དཀར་མོའི་སྟེང་རིན་ཆེན་སྣ་ལྔའི་ཁྲིའི་སྟེང་ན་རས་པ་ལྕང་ལོ་གོས་དཀར་པོ་ཕྱག་གཉིས་ཤེལ་བུམ་རྡོར་དྲིལ་ཅན་དང་བུད་མེད་དཀར་གསར་མདངས་ཅན་ཕྱག་གཉིས་ཌཱ་དྲིལ་ཅན་གྱི་ཞལ་གཟིགས་ནས། ༧ སྙིང་ནང་དཔལ་གྱི་རི་བོ་དེཿརྔ་ཡབ་དཔལ་རི་དངོས་དང་མཉམཿ མིག་གི་མཐོང་དང་རྣ་བས་ཐོསཿ གང་ཞིག་ངན་སོང་གནས་ལས་ཐརཿ གང་འདོད་བདེ་ཆེན་ཞིང་སོགས་བགྲོདཿ ང་ཡི་པུར་ཁང་མཆོད་རྟེན་ལཿ ཕྱག་སྐོར་བརྒྱ་རྩ་རེ་རེ་ལཿ སངས་རྒྱས་སྟོང་གི་གཟུགས་བརྙན་བཞེངསཿ སིདྡྷི་འབུམ་ཐེར་བཅུ་གསུམ་དངཿ ཚེ་ཐར་དུང་ཕྱིར་ཕན་ཡོན་ཡོདཿ མི་རྟ་བཅུ་གསུམ་བསད་སྒྲིབ་འདགཿ ཕྱག་སྐོར་སྟོང་ལ་དེ་བདུན་འགྱུརཿ སྟེང་དུ་ཡིག་བརྒྱ་མ་ཎི་གཉིསཿ དུང་ཕྱུར་བཅུ་གསུམ་ཕན་ཡོན་ཐོབཿ ཕྱག་སྐོར་ཁྲི་ལ་དེ་བཅུ་འགྱུརཿ སྟེང་དུ་ཡིག་བརྒྱ་མ་ཎི་དངཿཆོས་ཆེན་ཚར་བཅུའི་ཕན་ཡོན་ཐོབཿ ཚེ་རབས་བདུན་གྱི་སྡིག་སྒྲིབ་འདགཿ ཕྱག་སྐོར་འབུམ་ལ་དེ་གསུམ་གྱིཿ ཕན་ཡོན་དེ་གསུམ་བརྒྱ་འགྱུར་ཐོབཿ ཚེ་རབས་བསགས་པའི་སྡིག་ལྟུང་བྱངཿ འཕོ་མེད་འཇའ་ལུས་འོད་སྐུར་གྲོལཿ རྡོ་རྗེ་འཆང་གི་ས་ལ་སྐྱེལཿ ༼ ཞེས་སོགས་གསུངས་འདུག ཁྱད་པར་དུ་བད་ཀན་ཕོ་ཐོག་གྲེ་ཐོག གྲིབ་ནད། མཁྲིས་ནད། སྙིང་ནད། མགོ་ནད། སྨྱོ་ནད། དུས་ཀྱི་ནད་རིགས་སོགས་ཀྱིས་མཚོན་ནད་རིགས་བཞི་བརྒྱ་རྩ་བཞི་དང་། བགེགས་རྐྱེན་ངན་པ་སོགས་ལས་མི་གྲོལ་བ་མི་འདུག་ཅེས་གནས་དེས་བདག་པོ་ཚོས་ཡང་ཡང་བཤད་པ་དང་དངོས་སུ་མཐོང་བ་བགྲང་ལས་འདས་ཟེར། ཁྱད་པར་དུ་ཕོ་ཁའི་ནད་ལ་དམ་པ་ཁོང་གི་སྨོན་ལམ་ཀྱིས་ཐེབས་ཡོད་པའི་མིད་པར་ཆུ་ཡང་མི་འགྲོ་བ་འཆི་བར་ཐག་བཅད་པ་མང་པོ་ཞིག་ནད་སང་དྲགས་སུ་སོང་བ་མང་པོ་འདུག རང་ལ་ཡང་བད་ཀན་གྱི་ནད་ཕོག་སྟེ་རྒྱ་ནག་སྨན་ཁང་ལས་ཟླ་བ་དྲུག་ཙམ་བསྟན་ཡང་ཕན་པ་མ་བྱུང་བར་མ་ཟད་ཉེན་ཁ་ལ་ཕྱོགས་ཚེ་བློ་ཐག་རྦད་ཆོད་ཀྱིས་གདུང་ཁང་དེར་བསྐོར་ཚད་འགའ་བསགས་ཏེ་ནད་ལས་དྭངས་བྱུང་། རང་གི་དངོས་སུ་མཐོང་བའི་ནད་པ་གྲིབ་ནད་ཅན། ཕོ་ཐོག་ནད་པ། མཆིན་ནད་ལྡེམ་བུ། སྙིང་ནད་པ། ཁྲག་ནད་ཚབས་ཆེན་ཅན། མིག་ནད་ཅན་སོགས་རྒྱ་ནག་པེ་ཅིན་ཧྲང་ཧེ་ཕྱི་གླིང་སོགས་ལས་སྨན་པའི་བཅོས་མ་ཐུབ་པ་མང་པོ་ཞིག་ནད་ལས་དྭངས་བཞིན་པ་དངོས་སུ་མཐོང་བྱུང་། དུས་ཀྱི་མཐར་ནད་རིགས་སྣ་ཚོགས་ཀྱི་མི་བཅུ་ལས་དགུ་ནད་པ་ཡིན་སྐབས་འགྲོ་དོན་དུས་ལ་བབས་པ་ཡིན་གསུང་པ་ད་སྐབས་དུས་ཐོག་དུ་ཁེལ་འདུག་ཟེར་གྱིན་འདུག ༼འདི་ལྟ་བུའི་རྟེན་ཁྱད་དུ་འཕགས་པ་བྱིན་རླབས་ཅན་ཞིག་འཛམ་བུ་གླིང་ན་དཀོན་འདུག་ཟེར་བཞིན་སྐོར་བ་བྱེད་མཁན་རྒྱ་བོད་ཕྱི་གླིང་བ་སོགས་མང་པོ་འདུག ཁྱད་པར་ནད་པ་ཚོས་ནད་ཞི་བའི་ཕྱིར་དང་ནད་མེད་ཚོས་སྒྲིབ་སྦྱོང་གི་ཆེད་བསྐོར་བ་བྱས་ཚེ་རྨི་ལམ་དང་སྣང་ཉམས་སོགས་ལ་སྒྲིབ་པ་བྱང་བ་དང་ནད་ལས་གྲོལ་བའི་རྟགས་མེད་མི་སྲིད་པར་འདུག ༒ རྟེན་འདི་ལ་ཕྱག་སྐོར་ལ་འགྲོ་ན། ཁམས་དཀར་མཛེས་རྫོང་甘孜县ནས་མཁན་པོ་ཨ་ཁྱུག་གི་ཆོས་སྒར་ཡ་ཆེན་ལ་ཕེབས་དང་དེ་ནས་ཕར་འགྲོ་མཁན་མང་པོ་འདུག ཐག་ཉེ་བར་འདུག དེར་འགྲོ་ན་ཆ་རྐྱེན་ནི་རང་ཉིད་འདུག་ས་གུར་དང་ཐབ་ཆས་བཟའ་བ་སོགས་ཁུར་དགོས་འདུག གནས་དེ་ན་སྐོར་བ་བྱེད་མཁན་འདུག་ས་རིན་མི་དགོས་པའི་ཁང་པ་འགའ་ཡོད་ཀྱང་། བསྐོར་བ་བྱེད་མཁན་མི་མང་ཆེ་བའི་ཐོབ་དཀའ་བར་འདུག ཆུ་ཚོད་གཅིག་ལ་མི་དར་མ་ཞིག་གིས་སྐོར་བ་ ༡༠༠ ཙམ་ཐུབ་འདུག སྐོར་ཚད་༥༥༥༥ རེད་ཟེར་ཡང་གོང་དུ་བཤད་པའི་སྐོར་བའི་འགྱུར་ཚད་དང་ཕན་ཡོན་ལ་གཟིགས་ཏེ་བསྐོར་ན་ལེགས་སྙམ། ༧ བསྐལ་བཟང་སངས་རྒྱས་སྟོང་གི་ངོ་བོ་ཉིདཿ ལྷང་བྲག་གྲུབ་ཆེན་ཞབས་ལ་གསོལ་བ་འདེབསཿ འདི་ཕྱི་བར་དོ་གསུམ་དུ་ཐུགས་རྗེས་ཟུངསཿ ཐར་བའི་ལམ་སྣ་ཟིན་པར་བྱིན་གྱིས་རློབསཿ
གླག་ཕུར་ཚ་དཀོན་མཆོག་ནས།