གཙང་བོའི་ཆིལ་སྒྲ་སེམས་ཀྱི་གསེབ་དུ་འདྲེས།།གཡེར་གྲུའི་དར་ཤིང་ཆར་རླུང་ཁྲོད་ནས་འདར།།ལམ་ཞུག་འགྲུལ་བ་སེམས་སུ་ཚུབ་ཆ་སྐྱེས།།ཕར་ཁའི་གྲོང་ཚོ་སྨུག་པའི་དཀྱིལ་ན་གཡོ།། བྲོ་བས་སྲོག་དམར་འཕྲོགས་པའི་ཐབ་ཇུས་མཁན།།ཉ་བ་རྒད་པོས་ཀ་པད་ཆང་གིས་ཁེངས།།མི་སེམས་ཟས་ལ་གཡེངས་བའི་ཉི་མ་ཚོ།།ལྟོ་དཀར་སྲོག་དམར་ཤོར་བའི་གཏམ་འདི་སྐྱོ།། ཐང་ཤིང་འཕྲེད་དུ་ཉལ་བའི་ལམ་འགྲམ་ན།།སྟ་གྲི་ཡུ་བ་བུད་པའི་ལྟས་ངན་གན།།འདང་ནུབ་ཇག་པས་མཅོམ་པའི་གྲོང་ཚོ་བཞིན།།ལྗོན་པའི་གསེབ་ནས་ངུ་སྐད་གཉོམ་ཐག་ཆོད།། གྲུ་ཤིང་མཚོ་འགྲམ་གཏོང་གི་ཕོ་གཞོན་འགས།།སྨྱུག་ཞྭའི་འོག་ན་སྡང་མིག་ཁྲག་གིས་འཚོས།།དཔའ་དམ་ཤག་སྒྲས་མི་སྲོག་གཅོད་མཁན་སྙམ།།མི་ལྡོམ་སེམས་སུ་སྐྲ་སྣང་ཁད་ཀྱི་སྐྱེས།། གཙང་བོའི་རླབས་རྒྱུན་རིང་མོའི་ཁུག་པ་ལ།།ཕོ་རྒོད་ཟུངས་ཁྲག་ཐིམ་པའི་གནའ་གཏམ་གདའ།།སྐམ་ཐོག་ཆུ་སྲིན་འབོད་པའི་ཆང་ཞུ་བ།།ལེང་ཧྲན་ཇག་པའི་མགོ་གཙོ་ཡིན་ནམ་ཅི།།

འཇའ་གུར་རྟེན་འབྲེལ་་ཉི་ཟླ་རང་ཤར།།ན་མོ་གུ་རུ་བུདྡྷ་ཛྙཱ་ན་ཡེ།།ཀ་དག་ངོ་བོ་དབྱིངས་ཆེན་ངང་ཉིད་ལས།།ལྷུན་གྲུབ་རང་བཞིན་འོད་གསལ་སྙིང་པོས་གར།།ཟུང་འཇུག་ཐུགས་རྗེའི་རྟེན་འབྲེལ་འཇའ་ལུས་དཔལ།།ཨེ་ཝཾ་སངས་རྒྱས་གུ་ཧྱེ་རྣམ་པར་རྒྱལ།།ཨེ་ཝཾ་རྟ་བདུན་དབང་པོས་རོལ་རྩེད་ངོམས།།ཨེ་ཝཾ་ཟླ་བ་གཞོན་ནུས་བདུད་རྩི་འཇོ།།ཨེ་ཝཾ་སྐར་ཚོགས་ཕྲ་མོ་སྤྲིན་བཞིན་བརྡལ།།ཨེ་ཝཾ་འཇའ་ཚོན་སྙིང་པོ་ཡི་གར་འོངས།།ཕྱི་ལྟར་སྦྲང་ཆར་ཀློང་ནས་དག་ཁྲུས་གསོལ།།ནང་དུ་འཇའ་འོད་རྟེན་འབྲེལ་མངོན་དུ་འཆར།།གསང་བ་གསང་སྔགས་འཇའ་ཚོན་དཀྱིལ་འཁོར་ཤར།།ཡང་གསང་བླ་མེད་དམ་གཙང་དགྱེས་དགུས་རྩེན།།ཉིན་མོ་འདི་ན་ཞི་གནས་བདེན་པའི་ཞིང་།།མཚན་མོ་འདི་ལ་ལྷིང་འཇགས་དགའ་མས་འཁྱུད།།ཉིན་མཚན་ཀུན་ཏུ་བདེ་ལེགས་ངང་དུ་འཚོ།།ཨེ་མ་སྐལ་བཟང་ཨེ་ཝཾ་འདུས་སྡེས་མཛེས།།གེ་སར་རྒྱལ་པོའི་བཞད་སྒྲས་ཁམས་གསུམ་འགུགས།།གསང་བ་ཡེ་ཤེས་དགྱེས་པས་བདེ་ཆེན་སྟེར།།དཔའ་བོ་མཁའ་འགྲོའི་བྲོ་གར་རི་ལུང་བསྐངས།།བདུད་བཞི་གཡུལ་ལས་རྒྱལ་བའི་རྒྱལ་རྔ་ ཕྱི་སྣོད་དག་པ་འཇའ་འོད་ཟང་ཐལ་དཔལ།།ནང་བཅུད་རྫོགས་པ་ཡེ་ཤེས་རྩལ་དགྱེས་པ།།གསང་ཆེན་འོད་སྐུར་བཞུགས་པའི་རྡོ་རྗེ་འཆང་།།ཀུན་བཟང་སྣང་བ་མཐའ་ཡས་ཨེ་མ་ཧོ།།སངས་རྒྱས་སྟོང་གི་སྐྱེད་ཚལ་རི་ལུང་ཀུན།།ཀུན་བཟང་འཇའ་འོད་སྣ་བཅུས་ཡོངས་སུ་གཏམས།།བྱིན་རླབས་སྦྲང་ཆར་འཇོ་བའི་བར་གསང་ནས།།དངོས་གྲུབ་ཉམས་རྟོགས་ཉ་གང་ཟླ་ལས་ལྷག།བྱམས་བརྩེ་ཕ་མ་ལས་ལྷག་སངས་རྒྱས་ཐུགས།།མན་ངག་བདུད་རྩི་ལས་ལྷག་དམ་ཆོས་གསུང་།།ལུས་སྦྱོང་སྟོང་ལས་ལྷག་པའི་བདེ་ཆེན་སྐུ།།དྲིན་ཆེན་བླ་མ་ཁྱེད་ཀྱིས་དཔལ་ལས་འཁྲུངས།།སངས་རྒྱས་འཁྲུངས་སྐར་ཚེས་པའི་སྟ་གོན་ཉིན།།སངས་རྒྱས་སྐྱེད་ཚལ་འཇའ་འོད་ཀློང་ནས་མཇལ།།སངས་རྒྱས་བསྟན་པ་རྒྱས་པའི་རྟེན་འབྲེལ་ཤར།།སངས་རྒྱས་ཡེ་ཤེས་ཀུན་གྱིས་རྟོགས་གྱུར་ཅིག།ཅེས་པ་འདི་ཡང་རབ་གནས་ས་ཕག་ས་ག་ཟླ་བའི་ཡར་ཚེས་དགེ་བ་སྟེ་སངས་རྒྱས་བཅོམ་ལྡན་འདས་འཁྲུངས་སྐར་གྱི་ཉིན་མོར་རྟེན་འབྲེལ་དགེ་བའི་ཕྱི་འཇའ་འོད། ནང་གི་ཉམས་རྟོགས། གསང་བ་བླ་མའི་བཀའ་དྲིན་དང་མཆེད་གྲོགས་ཀྱི་བརྩེ་དུང་གི་བསམ་ཡུལ་ལས་འདས་པའི་བདེ་སྐྱིད་ཀྱི་འཚོ་བ་ལ་རོལ་བའི་སྐབས་སུ་གང་ཤར་དུ་ཨེ་ཝཾ་སངས་རྒྱས་སྟོང་གི་དགའ་ཚལ་ནས་རྒྱལ་ཁམས་པ་ཨེ་མ་ཧོས་དེ་ཉིད་དུ་བགྱིས་པར་དགེའོ།། །།