ཨེ་ཝྃ་ཧོ།

ཨེ་མ་ཧོའི་རྣམ་ཐར་དད་པའི་ས་བོན།ལུས་ཀྱི་རང་ཚུགས་ཐུབ་ནས་གནམ་ས་གང་ཞིང་།།ངག་གིས་བདེན་ཚིག་སྒྲོག་པ་ངོ་ལྐོག་མཚུངས་ཕྱིར།།ཡིད་ཀྱི་ཏིང་འཛིན་ཤེས་རབ་ཀུན་ཏུ་བཟང་པོ།།རིག་འཛིན་དཔལ་དགྱེས་རྡོ་རྗེའི་རྣམ་ཐར་ལགས་སོ།།———-ཤྲཱིཿཨེ་མ་ཧོས

བསང་མཆོད་དངོས་གྲུབ་ཀུན་འབྱུང་།རྒྱས་འབྲིང་བསྡུས་གསུམ་བཞུགས། བསང་མཆོད་བསྡུས་པ།རཾ་ཡཾ་ཁཾ། ཨོཾ་ཨྰཿཧྰུྃ། མཆོད་མགོ་གཅིག་ནས་བཅུ་གསུམ་མཆོད། མཆོད་དང་པོ་ལྷ་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཡུལ་ལྷ་གཞི་བདག་ནོར་ལྷ་གཏེར་བདག དྲིན་ཅན་རྩ་བའི་བླ་མ། སྟོན་པ་ཤྰཀྱའི་རྒྱལ་པོ། ཨོ་རྒྱན་པདྨ་འབྱུང་གནས། གྲུབ་ཐོབ་རྗེ་འབངས་ཉེར་ལྔ། འཇམ་མགོན་རྒྱལ་བ་ཡབ་སྲས། རྙིང་མའི་བཀའ་དགོངས་ཕུར་གསུམ། གསར་མའི་བདེ་གསང་འཇིགས་གསུམ། མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ། ཆོས་རྒྱལ་ཕྱི་ནང་གསང་གསུམ། དཔལ་ལྡན་དམག་ཟོར་རྒྱལ་མོ། རྣམ་སྲས་ཛམ་ལྷ་རིགས་ལྔ། མགོན་པོ་ཚོགས་ཀྱི་བདག་པོ། མཐུ་ཆེན་དགྲ་བླ་བཅུ་གསུམ། གཟའ་རྒོད་ཁྱབ་འཇུག་ཆེན་པོ། ཁྱད་པར་དུ་ཁྲག་འཐུང་བདུད་འཇོམས་གླིང་པའི་བཀའ་ཡི་གཏེར་སྲུང་། གནོད་སྦྱིན་ཤན་པ་དམར་ནག ལྷ་ཆེན་དབང་ཕྱུག་ཆེན་པོ། དྲང་སྲོང་གཟའ་བདུད་ནག་པོ། དཀོར་སྲུང་ཟླ་བའི་དབང་པོ། ལྷ་གཉན་རྨ་ཆེན་སྦོམ་ར། ཤར་གྱི་གཉན་པོ་གཡུ་རྩེ། སྒོ་སྲུང་རྫ་ཡི་བསེ་ཁྲབ། དགུ་སྟོར་རྫ་དམར་ཡོན་པོ། སློབ་དཔོན་རྒྱུད་ཀྱི་སྲུང་མ། ཕ་མྱིང་རྒྱུད་ཀྱི་སྲུང་མ། དྲེགས་པ་ལྷ་སྲིན་སྡེ་བརྒྱད། ཁྱེད་རྣམས་ཀྱིས་བདུད་རྩི་གསེར་སྐྱེམས་འདི་བཞེས་ལ། འཆི་མེད་ཚེ་ཡི་དངོས་གྲུབ་སྩོལ། ནད་མེད་སྨན་གྱི་དངོས་གྲུབ་སྩོལ། རྒས་མེད་ལང་ཚོའི་དངོས་གྲུབ་སྩོལ། རྒུད་མེད་འབྱོར་བའི་དངོས་གྲུབ་སྩོལ། གཞིས་ལ་འདུག་དུས་སྲུང་མ་མཛོད། ཕྱི་རུ་འགྲོ་ན་ལམ་སྣ་མཛོད། མགོ་མི་འཕྱུག་རྨོག་དཀར་གྱི་ཏོག་འཕྲུ༼ཁྲིད༽མཛོད། ལས་མི་འཕྱུག་ཁྲབ་དཀར་གྱི་རྒྱུན་ཐག་སྡོམ། སྡང་བར་བྱེད་པའི་དགྲ་སོད། གནོད་པར་བྱེད་པའི་གེགས་ཆོམས། གོང་ནས་ཡར་འཐེན་གྱི་དགྲ་བླའི་འཇུ་ཐག་རྐྱོངས། འགབ་ནས་ཡར་སྐྱོབ་ཀྱི་གྲོགས་ལྷའི་རྟེན་ཕུར་ཚུགས། ཕྱི་ཡི་བར་ཆད་ནང་དུ་མ་གཏང་། ནང་གི་དངོས་གྲུབ་ཕྱི་ལ་མ་ཕུད། མདའ་ལི་མ་འཕེན་ཉིན་གཡས་ཀྱི་འཐེབ་ཤེད་མཛོད། གཞུ་མཆོག་དཀར་བཀང་ཉིན་གཡོན་གྱི་དཔུང་ཤེད་མཛོད། ཆུ་རབ་མེད་ལ་ཟམ་པ་ཚུགས། བྲག་སྐས་མེད་ལ་ཐེམ་པ་ཚུགས། ནད་གདོན་འཇིགས་བརྒྱད་ཉི་ཟེར་དང་འཕྲད་པའི་མུན་པ་བཞིན་དུ་སེལ། ཚེ་དཔལ་བསོད་ནམས་ཆར་ཆུ་དང་འཕྲད་པའི་ལྗོན་ཤིང་བཞིན་དུ་རྒྱས། ཁམས་གསུམ་ཟས་ནོར་ཁབ་ལེན་དང་འཕྲད་པའི་ལྕགས་བྱེ་བཞིན་དུ་བསྡུས། གནོད་བྱེད་དགྲ་བགེགས་ཐོགས་རྒོད་དང་འཕྲད་པའི་བྲག་རི་བཞིན་དུ་ཆོམས། ཁ་རྗེ་འོ་མའི་རྒྱ་མཚོ་མ་སྐམ། བསོད་ནམས་མར་གྱི་རི་བོ་མ་ཞུ། ཁ་ཟས་འདོད་ལྟོ་བཅུད་ཅན་གྱི་ཟས་དང་སྤྲོད། ལག་ནོར་འདོད་གཡང་ཞག་ཅན་གྱི་ནོར་དང་སྤྲོད། རྐང་རྟ་འདོད་བང་རྩལ་ཅན་གྱི་རྟ་དང་སྤྲོད། ཡག་པ་བརྒྱ་དང་སྤྲོད། ངན་པ་སྟོང་དང་བསྣོལ། དབང་ཐང་རྒྱལ་པོ་རིན་ཆེན་གྱི་བསོད་ནམས་མ་ཉམས། ལས་དོན་འཁོར་ལོ་རིན་ཆེན་གྱི་མུ་འཁྱུད་མ་ལྷོད། འཆར་སྒོ་རྟ་མཆོག་རིན་ཆེན་གྱི་འགྲོས་རྩལ་མ་ཞན། ཡོང་སྒོ་ནོར་བུ་རིན་ཆེན་གྱི་དགོས་འདོད་མ་ཉུང་། དགའ་བདེ་བཙུན་མོ་རིན་ཆེན་གྱི་འགྲོགས་ཡུན་མ་ཐུང་། ཕྱི་ནང་བློན་པོ་རིན་ཆེན་གྱི་མདུན་གྲོས་མ་ཉུང་། སྙིང་སྟོབས་གླང་བོ་རིན་ཆེན་གྱི་ཁུར་ཤེད་མ་ཆུང་། ཕོ་ཚོད་དམག་དཔོན་རིན་ཆེན་གྱི་དཔའ་སྙིང་མ་འཆོལ། དབུ་འཕང་རིན་ཆེན་གདུགས་དཀར་གྱི་ཡུ་བ་མ་ཐུང་། ཤེས་སྤྱོད་གསེར་གྱི་ཉ་མོའི་གཤོག་རྩལ་མ་ཞན། བསོད་ནམས་གཏེར་ཆེན་བུམ་པའི་ལྟོ་བ་མ་རལ། དབང་ཐང་པདྨའི་སྡོང་བོའི་ཡལ་ག་མ་འཁྱོག སྙན་གྲགས་དུང་དཀར་གཡས་འཁྱིལ་གྱི་རྒྱང་སྐད་མ་ཐུང་། མཛའ་མཐུན་དཔལ་གྱི་བེའུ་མདུད་པ་མ་ཞིག གཟི་བརྗིད་གསེར་སྦྱང་རྒྱལ་མཚན་གྱི་བཀྲག་མདངས་མ་ཡལ། དཔལ་འབྱོར་འཁོར་ལོ་རྩིབས་སྟོང་གི་མུ་འཁྱུད་མ་ལྷོད། ཨ་མཁྱེན་པའི་ཡེ་ཤེས་ཅན། བརྩེ་བའི་ཐུགས་རྗེ་ཅན། མཛད་པའི་འཕྲིན་ལས་ཅན། སྐྱོབས་པའིནུས་མཐུ་ཅན་རྣམ་པ་ཚོ། ཁྱེད་རྣམས་ཀྱི་ཞལ་དུ་བསང་མཆོད་རྒྱ་ཆེན་པོ་གྲངས་མང་བ་འདི་མཆོད་དོ།། བསང་མཆོད་འབྲིང་བོ།རཾ་ཡཾ་ཁཾ། ཨོཾ་ཨྰཿཧྰུྃ། ལན་གསུམ། མཆོད་མགོ་གཅིག་གཉིས་གསུམ་སོགས་ནས་བཅུ་གསུམ། མཆོད་དང་པོ་ལྷ་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཡུལ་ལྷ་གཞི་བདག་ནོར་ལྷ་གཏེར་བདག དྲིན་ཅན་རྩ་བའི་བླ་མ། སྐྱབས་གནས་དཀོན་མཆོག་གསུམ་པོ། སྟོན་པ་ཤྰཀྱའི་རྒྱལ་པོ། ཨོ་རྒྱན་པདྨ་འབྱུང་གནས། རྒྱ་གར་གྲུབ་ཆེན་བརྒྱད་ཅུ། བོད་ཀྱི་རྗེ་འབངས་ཉེར་ལྔ། བཀའ་གཏེར་གསར་རྙིང་གི་བླ་མ།…

༄༅། །ཀི་ཀི་ཀི་བསྭོ་བསྭོ་བསྭོ། ཤར་གྱི་རྨ་རྒྱལ་སྤོམ་ར་བསྭོ། ལྷོ་ཡི་ཁ་བ་དཀར་པོ་བསྭོ། ནུབ་ཀྱི་གངས་དཀར་ཏི་སེ་བསྭོ། བྱང་གི་གཉན་ཆེན་ཐང་ལྷ་བསྭོ། བོད་ཀྱི་མཚོ་ཆེན་རྣམ་བཞི་བསྭོ། བཙན་པོའི་རྒྱལ་རབས་རིམ་བྱོན་བསྭོ། སློབ་དཔོན་པདྨ་འབྱུང་གནས་བསྭོ། རྒྱལ་ཡུལ་རྗེ་བཙུན་སྒྲོལ་མ་བསྭོ། སེང་ཆེན་ནོར་བུ་དགྲ་འདུལ་བསྭོ། ལྷ་ཆེན་ཚངས་པ་དཀར་པོ་བསྭོ། གཉན་ཆེན་སྐུ་ལྷ་གེ་མཛོ་བསྭོ། ཀླུ་རྒྱལ་གཙུག་ན་རིན་ཆེན་བསྭོ། ཕུ་བོ་དུང་ཁྱུང་ཀར་པོ་བསྭོ། ནུ་བོ་ཀླུ་སྦྲུལ་འོད་ཆུང་བསྭོ། སྲིང་ལྕམ་ཐ་ལེ་འོད་འཕྲོ་བསྭོ། ཨ་ནེ་གནམ་སྨན་དཀར་མོ་བསྭོ། དགྲ་ལྷའི་མེ་སྟག་དམར་པོ་བསྭོ། འཛམ་གླིང་སེང་ཆེན་རྒྱལ་པོ་བསྭོ། གླིང་གི་དཔའ་བཏུལ་སུམ་ཅུ་བསྭོ། ཡང་ཐུལ་དམ་པ་མི་བདུན་བསྭོ། ཞེ་ཐུལ་ཁྲ་གླག་སྤྱང་གསུམ་བསྭོ། བསྭོ། བསྭོ། བསྭོ། ཕོ་ལྷ་བསྭོ། དགྲ་ལྷ་བསྭོ། ལས་ལྷ་བསྭོ། ལུས་ལྷ་བསྭོ། ས་གང་སོང་གི་ཡུལ་ལྷ་གཞི་བདག་བསྭོ། ཆུ་གང་ཐུག་གི་ཀླུ་སྨན་དཀར་མོ་བསྭོ། ཕར་འགྲོ་གི་སྐྱེལ་མ་གྱིས། ཚུར་འོང་གི་བསུ་མ་གྱིས། བུ་ལ་དཔའ་རྩལ་སྦྱིན། རྟ་ལ་བང་ཁ་སྩོལ། མཚོན་ལ་རྣོ་ངར་སྐྱེད། དགྲ་མགོ་རྡོག་པས་ནོན། གང་སོང་ལ་ནོར་འཕེལ། གང་བསྡད་ལ་གཡང་ཆགས། གོམ་གསུམ་སྤོས་ན་བཀྲ་ཤིས། ཚིག་གསུམ་བཤད་ན་དོན་འགྲུབ། བསྭོ། བསྭོ། ཀི་ཀི་བསྭོ་བསྭོ་ལྷ་རྒྱལ་ལོ། །

བཀའ་གཉན་རྨི་ལམ་ལུང་བསྟན་ཆོས་སྲུང་བཀའ་ཤོགན་མོ་གུ་རུ་ཨ་ཝ་ལོ་ཀེ་ཤྭ་ར་ཡེ།།དབྱིངས་སྙིང་རྗེའི་རོལ་གར་སྤྱན་མི་གཟིམས།།ཐུགས་ཀུན་གསལ་ཡངས་པ་ཀུན་བཟང་ཡང་།།མ་འགྲོ་བའི་མ་སྨད་རྟེན་འབྲེལ་ཚོགས།།སྤྲིན་མཁའ་རླངས་དུ་བས་བསྒྲིབས་པར་རྨིས།།སྣ་རྡོ་རྗེ་ཁྱབ་བདག་ལོ་ལ་འཆར།།གངས་དཀར་པོའི་དབུ་ཞྭ་རྫ་རུ་ལོག།གཙང་ཀུན་བཟང་ཕོ་ཉར་དྲག་སྐུལ་དང་།།བསང་མནོལ་ཆབ་སྔོན་མོས་བྲན་པར་གཅེས།།སེང་གཡུ་རལ་ཕག་བྲུན་ནག་པོས་སྒྲིབ།།སྟག་འཛུམ་དྲུག་འབྱུང་བ་མེ་རུ་སྒྲོན།།ཁྱུང་རུ་ཐུར་གནམ་ལྕགས་ཐང་ལ་ལྷུངས།།འབྲུག་སྡེར་བཞི་འདམ་ཉོག་བྱིངས་སུ་ནུབ།།རྟ་ཅང་ཤེས་སྒ་འབུ་ནད་ཀྱིས་ཟིན།།སྦྲུལ་ནག་པོས་གད་སྙིགས་ནིར་འཛིན་བཀངས།།ལུག་གཡང་དཀར་མུན་ནག་བཙོན་ལ་བཟུང་།།བྱ་དེ་ཕོའི་མགྲིན་རྩ་ཐག་པས་བསྡམས།།ཁྱི་རྒྱ་ལུས་རྔ་མ་དགུང་དང་མཉམས།།བྱི་སྒོམ་ཆེན་སད་མེད་གཟིམ་དུ་ཐལ།།གླང་རོག་པོ་འཁོར་བའི་འདམ་དུ་ཆགས།།ཡོས་ཁྲ་མོ་སྣ་ཐག་གཞན་ལག་ཤོར།།སྤྲེལ་ཁྲེལ་མེད་ཀླད་པ་ཚོང་ལ་རྔམས།།དུས་ངན་པས་མཐུན་སྒྲིལ་རྨང་ནས་ཐོར།།ས་གོང་མའི་དབུ་ལོ་རླུང་གིས་ཁྱེར།།གནམ་གོང་མའི་སྐར་ལྔ་མེ་སྟག་མཆེད།།ཆུ་མེ་རླུང་རྡུལ་ཚབ་ཚ་ཚ་འུར།།བྷོ་ཊ་མའི་ཕ་ཤུལ་སྟོང་ལ་ཉེ།།རྗེ་པདྨ་ཀ་ར་སྙིང་ལ་སྒོམས།།མ་རྗེ་བཙུན་སྒྲོལ་མ་དུང་ཕྱུར་བསྙེན།།གླིང་གེ་སར་མཆོད་པ་ཚད་གྲུབ་ན།།དུས་ཉེར་གཅིག་རྫོགས་ལྡན་མགྲོན་དུ་ཁུགས།།གཉིད་རྨི་ལམ་འོད་གསལ་དྲྭ་བ་ལས།།དོན་ལུང་བསྟན་འདྲ་མ་དེ་སྐད་ཐལ།།བརྡ་གོ་བར་གྱིས་ཤིག་གངས་ཅན་པ།།སྙིང་ཨི་ཐིམ་རྒྱ་ལ་གཏད་དོ་རྒྱ།།ཤྲཱིཿསྨྱོན་པའི་མི་ཆོས་བླ་མའི་ཚིག།རྫུན་ཕྲ་མའི་གཏམ་གྱིས་མ་ལྷད་པར།།བདེན་རིན་པོ་ཆེ་ཡི་ཕྲེང་བ་ཉིད།།བོད་སྤྱི་བོ་གནམ་བསྟན་ཀུན་ལ་ཕུལ།།ཞེས་པ་རབ་གནས་ས་ཕག་སྣྲོན་ཟླའི་ཉ་ལ་རྨི་ལམ་དབང་ཕྱུག་ཏུ་འབོད་པས་དབྱིན་ཡུལ་ཨེ་ཝཾ་དུར་ཁྲོད་ནས་སྔ་ཕྱི་ཀུན་ལ་ལོ་འདིར་རྨི་ལམ་ངན་ཚོགས་རྣམས་ལེགས་བཅོས་ཐབས་སུ་ཨེ་མ་ཧོས་དེ་ཉིད་དུ་བགྱིས་པར་དགེའོ།། །།

ཚེ་རིང་བརྒྱད་ཅུའི་གཡང་སྟོན།།བཀྲ་ཤིས་སྟོང་གི་ཉིན་མོ།།ལྷན་འཛོམས་སྐྱིད་ཀྱི་དུས་བཟང་།།བདེ་དགའ་དཔལ་གྱིས་ཁྱབས་སོང་།། ཨ་མ་ལགས། སྐུ་ཚེ་རིང་།གྱ་སྟོན་ཕྱོགས་ལས་རྣམ་རྒྱལ།།ཨེ་མ་ཧོ།།གཙང་པ་ཀ་དག་ཡངས་པའི་ནམ་མཁའ་རུ།།སྣང་སྲིད་ལྷུན་གྲུབ་རང་བྱུང་ཉི་མ་ཤར།།གྲུབ་དབང་རིག་འཛིན་རྣལ་འབྱོར་ཟླ་སྐར་ལས།།ཀུན་བཟང་མཁའ་འགྲོའི་ཚོགས་ཀུན་རྒྱལ་གྱུར་ཅིག།ཨོ་རྒྱན་པདྨས་བྱིན་རླབས་བདུད་རྩིའི་མཛོད།།མ་ལུས་འགྲོ་ལ་བསྩལ་བའི་སྒྲོལ་མའི་མཚན།།མཁས་གྲུབ་དུ་མའི་ཡུམ་ཆེན་རྗེ་བཙུན་མ།།སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག།སྐུ་ཁམས་ཡུན་བརྟན་ལང་ཚོ་དར་ཞིང་རྒྱས།།གསུང་ཆོས་བཤད་སྒྲུབ་ཕྲིན་ལས་ཕན་བདེ་འཕེལ།།ཐུགས་བཞེད་མཚུངས་མེད་ཡིད་བཞིན་ནོར་ཉིད།།ནམ་ཡང་འགྲིབ་མེད་བཀྲ་ཤིས་བདེ་ལེགས་ཤོག།ཅེས་པ་རབ་གནས་དབོ་ཟླའི་ཡར་ངོའི་ཚེས་པ་བཅུ་ལ་གཙང་བ་རིག་མཆོག་རིན་པོ་ཆེས་གཙང་བ་མཁའ་འགྲོ་ཨོ་རྒྱན་སྒྲོལ་མའི་གྱ་སྟོན་སྐོར་ལ་ཞབས་བརྟན་སྨོན་གསོལ་དགོས་སྐུན་གསུང་པ་ལ་དེ་ཉིད་ལ་གང་ཤར་དུ་ཤིང་ཀུན་(香港🇭🇰)ཨེ་ཝཾ་འོག་མིན་ཨོ་རྒྱན་རྡོ་རྗེའི་གླིང་ནས་རིག་འཛིན་ཨེ་མ་ཧོས་སྨིན་གྲོལ་བའི་གསོལ་འདེབས་སྨོན་ཚིག་ཏུ་བགྱིས་པར་དགེའོ།། །།

ཀུན་མཁྱེན་བླ་མའི་འཁྲུངས་སྐར་ལ་སྨོན་ཚིག་འགགས་མེད་རྡོ་རྗེའི་སྒྲ་དབྱངས།།ན་མོ་མ་ཧཱ་གུ་རུ་བུདྡྷ་ཛྙཱ་ན་ཡེ།།ཀུན་བཟང་རིག་འཛིན་བརྒྱུད་པར་ནམ་མཁའི་ཁྱོན།།འོད་གསལ་ཉི་ཟླ་གསལ་བའི་ཀུན་མཁྱེན་དཔལ།།སྣ་ཚོགས་སྒྱུ་འཕྲུལ་དྲ་བའི་སྙིང་པོ་ཅན།།ཀུན་མཁྱེན་ཡབ་སྲས་དམ་པས་དགེ་ལེགས་སྩོལ།།གནའ་དེང་མཁྱེན་རབ་ཟས་གཙང་སྲས་ལས་མཁས།།གངས་ཅན་བརྩེ་བར་སྤྱན་རས་གཟིགས་ལས་བཙུན།།འཕགས་མཆོག་མཐུ་སྟོབས་རྡོ་རྗེ་འཛིན་ལས་བཟང་།།མཁས་གྲུབ་ཀུན་མཁྱེན་བླ་མ་ཞབས་བརྟན་ཤོག།མཁན་སློབ་ཆོས་རྒྱལ་བརྒྱུད་པའི་སྔ་འགྱུར་དང་།།ཕྱི་འགྱུར་རྣམས་དང་ཁ་ཆེ་ཡེ་ཤུའི་རིགས།།ཚན་རིག་བཅས་ཏེ་ཆོས་ལུགས་སྣ་ཚོགས་ཀུན།།ཀུན་བཟང་ལམ་དུ་འདྲེན་མཁས་ཞབས་བརྟན་ཤོག།ཚུལ༵་ཁྲིམས༵་རྣམ་དག་དཔག་བསམ་ལྗོན་ཤིང་རྒྱས།།བློ༵་གྲོས༵་མཚུངས་མེད་ཡིད་བཞིན་ནོར་བུའི་དཔལ།།ཀུན་མཁྱེན་ཀློང་ཆེན་ཡེ་ཤེས་སྒྱུ་མའི་འཕྲུལ།།རིགས་ཀུན་ཁྱབ་བདག་བླ་མའི་སྐུ་ཚེ་བརྟན།།མཚན་དཔེའི་ལང་ཚོ་ཡར་ངོའི་ཟླ་བཞིན་རྒྱས།།ཟབ་རྒྱས་ཆོས་འཁོར་དབྱར་གྱི་མཚོ་ལྟར་འཕེལ།།ཐུགས་རྗེ་ཀུན་བཟང་རྒྱལ་བའི་དགོངས་མཐར་ཕྱིན།།ཀུན་ཁྱབ་ཕྲིན་ལས་དོན་ཀུན་ལྷུན་གྲུབ་ཤོག།ཅེས་པ་རབ་གནས་ས་ཕག་སྣྲོན་ཟླའི་ཡར་ངོའི་རྒྱལ་བ་གསུམ་པར་གངས་ཅན་བོད་ཡུལ་ནས་ཌཱ་ཀི་ནི་ཤྲཱིཿམ་ཧཱ་དྷེ་ཝས་ངོར་ཤྲཱིཿཨེ་མ་ཧོས་དབྱིན་ཡུལ་ཨེ་ཝཾ་ཀུན་བཟང་ཆོས་གླིང་ནས་སྨོན་པར་དགེའོ།། །།