ཨེ་ཝྃ་ཧོ།

གླིང་རྗེ་གེ་སར་སྐྱེས་བུ་དོན་གྲུབ་ཀྱི་རྣམ་ཐར་བསྡུས་པ་རིན་ཆེན་ནོར་བུའི་དོ་ཤལ་བཞུགས།           ན་མོ་གུ་རུ་སེངྷ་མ་ཎི་རཱ་ཛ་ཡེ། སྣང་མཐའི་ཡེ་ཤེས་པདྨའི་ཐུགས་ཀྱི་སྲས། །རིགས་གསུམ་སྒྱུ་འཕྲུལ་ཁྲི་སྲོང་སྤྲུལ་བའི་གར། །གླིང་དཀར་རྒྱལ་མཆོག་ནོར་བུ་དགྲ་འདུལ་ཞེས། །མི་རྗེ་ལྷ་ཡི་དགོངས་སྤྱོད་ཅན་ལ་འདུད། །བྱིན་རླབས་གཏེར་མཛོད་བླ་མ་སེང་ཆེན་རྗེ། །དངོས་གྲུབ་ཀུན་སྩོལ་ཡི་དམ་གེ་སར་རྒྱལ། །འཕྲིན་ལས་གཡེལ་མེད་དོན་གྲུབ་དགྲ་བླའི་གཙོ། །ཀུན་བཟང་ཨ་དཀར་འོད་ཀྱི་ཝེར་མ་དྲན། །གང་ཉིད་གདོད་ནས་བྱང་ཆུབ་མཆོག་བརྙེས་ཀྱང་། །སྙིགས་མའི་འགྲོ་ལ་ཐུགས་བརྩེ་རྗེས་ཆགས་ཏེ། །འཛམ་གླིང་འདི་རུ་གསང་གསུམ་འཕྲིན་ལས་ཀྱིས། །འགྲོ་དོན་མཛད་ཚུལ་རྣམ་ཐར་བརྗོད་ལས་འདས། །དེ་ཡི་ནང་ཚན་བསིལ་ལྡན་གངས་རིའི་ལྗོངས། །སིལ་འཐོར་དུཿཁས་གདུང་སྐབས་གླིང་ཡུལ་དུ། །མི་དབང་བདུད་འདུལ་དཔའ་བོའི་གར་བཟུང་བའི། །ངོ་མཚར་མཛད་བཟང་བཀའ་དྲིན་ལྷག་ཏུ་ཆེ། །དང་པོ་དགའ་ལྡན་དག་པ་ལྷ་ཡུལ་དུ། །བདེ་མཆོག་ཚངས་པ་དཀར་པོའི་སྐུར་སྣང་བའི། །སྲས་ཀྱི་མཆོག་གྱུར་ཐོས་པ་དགའ་བའི་ཚུལ། །ཀུན་བཟང་དགོངས་པའི་ཀློང་ན་ཉམས་རེ་དགའ། །དེ་ཚེ་ཕྱོགས་བཅུའི་སངས་རྒྱས་བྱང་སེམས་རྣམས། །དགོངས་དབྱངས་གཅིག་གིས་མི་ཡུལ་བདུད་སྲིན་ཚོགས། །འདུལ་ལ་ཚངས་སྲས་བུ་ཏོག་ཁྱེད་གཅིག་ཅེས། །བཀའ་ཡི་མེ་ཏོག་བདེ་ཆེན་འཁོར་ལོར་བསྩལ། །གང་དུ་འཁྲུང་བའི་ཡུལ་དང་ཡབ་ཡུམ་དང་། །ཕུ་ནུ་དཔའ་གྲོགས་གདུལ་བྱའི་ཡུལ་གྱུར་ཀུན། །མ་འདྲེས་གསལ་བོར་གཟིགས་པ་དུ་མ་ཡིས། །འགྱུར་མེད་རྡོ་རྗེའི་ལུང་གི་རོལ་མོ་བསྒྲགས། །འགྲོ་མགོན་པདྨའི་དབང་སྐུར་བྱིན་གྱིས་རླབས། །རིགས་ལྔའི་མཁའ་འགྲོས་ཐབས་གྲོགས་ཞལ་གྱིས་བཞེས། །ལྷ་གཉན་ཀླུ་སོགས་དཀར་ཕྱོགས་སྐྱོང་རྣམས་ཀྱིས། །མི་ཡུལ་འགྲོ་དོན་གྲོགས་དན་གཡར་དམ་མཛད། །སྔོན་སྨོན་ཐུགས་བསྐྱེད་དུས་སུ་བབས་པ་བཞིན། །མདོ་ཁམས་གནས་མཆོག་ལྕི་སོས་ཡག་གི་མདོར། །ལྡོང་རིགས་གླིང་གི་སེང་བློན་རིགས་སྲས་སུ། །མཚན་དཔེའི་མཛེས་ཞལ་འགྲོ་བའི་དཔལ་དུ་བཞད། །ལྷ་ཡི་ཐུགས་སྲས་མི་ཡི་བུ་མཆོག་དང་། །གཉན་གྱི་བླ་རྡོ་ཀླུ་མོའི་གཅེས་ཕྲུག་ཅིག །དཀར་པོ་གླིང་གི་རྒྱན་དུ་འཁྲུངས་སོ་ཞེས། །བདུད་རྣམས་རབ་བསྔངས་ལྷ་རྣམས་རྒྱལ་རྔ་བརྡུངས། །དེ་དང་ལྷན་གཅིག་མཚོ་སྐྱེས་རྡོ་རྗེ་དང་། །གྲུབ་རྒྱལ་མ་དང་རླངས་སྟོན་ཆེན་པོ་སོགས། །ཚེ་དབང་གྲུབ་བརྙེས་རིག་པ་འཛིན་རྣམས་ཀྱིས། །རྡོ་རྗེའི་སྐུ་ཁྲུས་ཚེ་དབང་ཤིས་བརྗོད་བསྩལ། །འཁྲུངས་མ་ཐག་ནས་ཡུམ་ལ་ཞལ་མཆིད་བཅས། །འཇིགས་མེད་སྐུ་ལུས་ཀྲོང་ངེར་ཇོ་རེ་རུ། །བཞུགས་ཚུལ་སོགས་ཀྱིས་མཚན་གྱི་ཐོག་མ་ནི། །ཕུ་བོ་ཞལ་ལུས་ལྷ་སྲས་ཇོ་རུ་གསོལ། །སྐུ་ན་ཞག་གྲངས་གསུམ་ལས་མ་རྫོགས་གོང་། །བདུད་ཀྱི་སྟོབས་མཚོན་བྱ་ནག་སྤུན་གསུམ་གྱིས། །ཐོ་འཚམ་མཛད་ཚེ་ཏིང་འཛིན་འཕྲུལ་འཁོར་གྱིས། །བདུད་བླ་སར་ཕབ་གཡུལ་རྒྱལ་རྟེན་འབྲེལ་འགྲིགས། །ཁུ་བོ་ཁྲོ་ལུས་ཕྲག་དོག་ལས་བརྩམས་ཀུན། །ལྟ་སྣང་མ་གཏོགས་འཕྲིན་ལས་སྒོ་འབྱེད་ཀྱི། །མཐུན་རྐྱེན་ཉིད་གྱུར་ལྕི་ཕུག་བྲག་ནག་ནས། །མུ་སྟེགས་རཱ་ཛ་བཏུལ་ཏེ་མནན་གཏད་མཛད། །རྫུ་འཕྲུལ་གར་དགུས་ཁྲོ་རྒྱལ་ཡིད་བསླུས་ནས། །དམ་སྲིའི་ངན་སེམས་སྐྱུག་བཅུག་དམ་བཅའ་བླངས། །གཡང་གི་སྒྱེ་དང་ལྕང་དཀར་བེར་ཀ་སོགས། །ཐུན་མོང་དངོས་གྲུབ་རྫས་རྣམས་བདག་གིར་བཞེས། །རྒྱ་བཟའི་གདུག་སེམས་རླུང་ཚུབ་ཞི་བའི་ཆེད། །ཡུམ་སྲས་གཉིས་པོས་ལྕི་ཡི་སྨན་ལུང་བརྒྱུད། །ས་བཙན་སྦྲུལ་མགོར་ཕེབས་ཏེ་མ་རུང་རྣམས། །ཨར་ལ་གཏད་ཕྱིར་བརྟུལ་ཞུགས་སྲིན་སྤྱོད་བསྐྱངས། །མཚོ་རྒྱལ་སྒྱུ་འཕྲུལ་དབྱིངས་ཕྱུག་ནེའུ་ཆུང་མས། །དགྲ་བླའི་ཕྱག་ཆ་ཡོངས་ཀྱི་དང་པོ་མཆོག། འུར་རྡོ་ཕ་བོང་སྟོང་ཁོར་ལེགས་ཕུལ་བས། །མི་བསྲུན་ཟིལ་ནོན་རྟེན་འབྲེལ་སྒོ་འཕར་ཕྱེས། །ཐབས་ཀྱི་འུར་ལ་ཤེས་རབ་རྡོ་སྦྱར་ཏེ། །སེ་ཡུ་རི་ནས་བསེ་རག་རྒོ་འདྲེ་སོགས། །ཡུལ་གྱི་ཕྱུགས་ཐན་ཐམས་ཅད་མཐར་བྱས་ནས། །མཚན་འཛིན་བྲལ་མཚོན་རྒོ་ཞྭ་བེའུ་སླག་གསོལ། །གོ་ཚང་ནགས་ནས་སྟག་རོང་རྔོན་པ་བདུན། །བསད་ཚུལ་སྒྱུ་མས་སྒ་བཟའི་མིག་བསླུས་སྟབས། །གེ་ཐུང་དཔོན་གྱིས་ཁྲིམས་ལས་ལ་གཏུགས་སྐབས། །བཀའ་བློན་འདན་མས་ལྷ་སྲས་དེ་ཉིད་མཇལ། །མཛད་འཕྲིན་མངའ་ཁོངས་མཐའ་རྒྱ་བསྐྱེད་པའི་ཡུལ། །རྨ་ཡུལ་དབང་དུ་མཛད་པའི་དགོས་ཆེད་ཀྱིས། །སྤྱི་དཔོན་རོང་ཚའི་བློ་གྲོས་འཕྲུལ་ཐབས་ལྟར། །ཡུམ་སྲས་མཐའ་རུ་སྤྱུག་པ་དང་དུ་བླངས། །འབུམ་པ་དཔོན་དང་སྐྱ་ལོ་ཡབ་སྲས་ཀྱིས། །རྟེན་འབྲེལ་ལེགས་པའི་སྐྱེལ་ཐུང་དཀར་པོར་འགྲོགས། །སྐྱིད་ཀྱི་ཉི་མ་ཡང་ཤར་ལ་རྩེ་བརྒྱུད། །རྨ་སྨད་གཡུ་ཡི་ལུང་བར་དལ་གྱིས་ཕྱོགས། །རྗེ་ཡི་མགུར་ལྷ་རྨ་རྒྱལ་སྤོམ་ར་སོགས། །དཀར་ཕྱོགས་ལྷ་རྣམས་དགའ་བའི་འདུ་འགོད་ཀྱིས། །སྦས་པའི་ལྷ་ཕྲུག་མི་ཡི་མེ་ཏོག་ཅིག །གཡུ་ལུང་སུམ་མདོའི་མཛེས་སྡུག་དཔལ་དུ་བསུས།…

འཁྲུངས་སྐར་བསམ་པའི་དོན་གྲུབ། ཨེ་མ་ཧོ། ། ཡ་ཆེན་ཨོ་རྒྱན་བསམ་གཏན་ཆོས་གླིང་ནས།། གྲུབ་དབང་བླ་མ་དམ་པའི་བརྒྱུད་འཛིན་ཆེ།། གསང་སྔགས་བསྟན་འཛིན་ཞབས་ལ་གསོལ་བ་འདེབས།། བཀའ་གཏེར་བསྟན་པ་འཛིན་སྐྱོང་སྤེལ་ནུས་ཤོག། སྐུ་ལྔ་ཡེ་ཤེས་ལྷུན་གྲུབ་ཀུན་ཏུ་བཟང་།། གསུང་རབ་གདམས་པའི་མཛོད་འཛིན་རྡོ་རྗེ་འཆང་།། ཐུགས་རྗེ་མཚུངས་མེད་ཨོ་རྒྱན་པདྨ་འབྱུང་།། ཡོན་ཏན་ཕྲིན་ལས་ཁྱབ་བདག་རྒྱལ་གྱུར་ཅིག། མཚན་དཔེའི་ལང་ཚོའི་འོད་སྣང་རྟག་ཏུ་བརྟན།། ཟབ་རྒྱས་ཚངས་པའི་ཆོས་སྒྲ་རྒྱུན་མི་ཆད།། སངས་རྒྱས་ཡེ་ཤེས་འགྲོ་དོན་མཁའ་དང་མཉམས།། ཕྲིན་ལས་ཀུན་བཟང་ཞིང་ཀུན་ཁྱབ་གྱུར་ཅིག། ཅེས་པ་རབ་གནས་ཆུ་སྟག་རྒྱལ་ཟླའི་ཡར་ངོའི་གཟའ་ཚེས་དགེ་བའི་འཁྲུངས་སྐར་གྱི་ཉིན།  སྤྱི་ལོ་༢༠༢༢་ཟླ་བ་༢་ ཚེས་༡༥་ལ་རྡོ་རྗེ་ཕུར་བུའི་བཀའ་བབས་རིག་འཛིན་དཀོན་མཆོག་དཔལ་མོས་ངོར་ཨེ་མ་ཧོས་ཨེ་ཝྃ་བདེ་མཆོག་ཕོ་བྲང་ནས་སྨོན་པར་དོན་དང་ལྡན་པར་གྱུར་ཅིག་གུ།། སརྦ་མངྒ་ལྃ།།

࿑ རིགས་ཀྱི་ཁྱབ་བདག་དཔལ་ལྡན་བླ་མ་དམ་པ་མཆོག་སྤྲུལ་༸་གསང་སྔགས་བསྟན་འཛིན་མཆོག་གི་ རྣམ་པར་ཐར་པ་མདོར་བསྡུས་སུ་ཚིགས་བཅད་ཀྱི་ལམ་ནས་བཀོད་པ་ བྱིན་རླབས་སྒོ་བརྒྱ་འབྱེད་པའི་ལྡེའུ་མིག་ཅེས་བྱ་བ་བཞུགས་སོ། །  ན་མོ་གུ་ར་ཝེ།   གྲངས་མེད་བསྐལ་བའི་ཡར་མཐའ་ཞིག་ནས་ལུས་སྲོག་གཟན་དུ་བོར་བ་དང་། ། བརྩེ་ཆེན་སྙིང་རྗེས་འགྲོ་བ་སྐྱོབ་པའི་ཐུགས་བསྐྱེད་ཉམས་པ་མེད་པའི་མཐུས། ། བདེན་བཞི་ཆོས་ཀྱི་གསང་ལམ་དེད་ནས་ཞི་བར་གཟིམས་པའི་སྟོན་པ་མཆོག ། ཡང་གཅིག་དྲན་པའི་གདུང་དབྱངས་སྙན་མོ་ཚིག་གི་སྟར་ལ་བརྒྱུས་འདི་གསོན། ། ལྷོ་ནུབ་འོ་མའི་རྒྱ་མཚོའི་ཀློང་གི་མདངས་ལྡན་པདྨའི་གེ་སར་དབུས། ། ངོ་མཚར་འབུམ་གྱི་དགེ་མཚན་དང་བཅས་སྤྲུལ་བའི་ཟློས་གར་ཉེར་བསྒྱུར་བ། ། བོད་ཡུལ་མུན་གླིང་ཐབས་ཀྱིས་འདུལ་ལ་རྒྱལ་བ་ལས་ལྷག་བཀའ་དྲིན་ཅན། ། སངས་རྒྱས་གཉིས་པ་པདྨ་ཀཱ་རའི་ཞབས་སེན་སྐྲ་ཡི་རྩེ་རུ་བཀོད། ། རྨད་བྱུང་ཐུགས་བསྐྱེད་འོ་མཚོ་སྐྱོམ་པའི་ཆོས་བཟང་ལྷ་ཡི་མདུན་ས་ནས། ། ཚར་དུ་དངར་བའི་སྐྱེས་རབས་ཕྲེང་བ་ཉི་ཟླའི་འོད་ྣསྣང་འཛུམ་པ་ལས། ། ཆོས་སྲིད་དབུ་འཕང་དགུང་ལ་མཉམ་པའི་གངས་ཅན་ཁ་བའི་རི་སུལ་དུ། ། ཐུགས་ཀྱི་བཀའ་བབས་ནམ་མཁའི་སྙིང་པོའི་ངོ་མཚར་སྒྱུ་འཕྲུལ་གར་དུ་རྩེན། ། གདོད་ནས་འཕོ་མེད་འཇའ་ལུས་རྡོ་རྗེའི་སྐུ། ། རྣམ་པ་འགྲོ་བའི་དོན་དུ་བཞེངས་མཛད་པའི། ། རིགས་ཀྱི་ཁྱབ་བདག་དཔལ་ལྡན་བླ་མ་ཡི། ། བྱིན་རླབས་ཉི་མ་སྙིང་ལ་འཆར་བར་ཤོག ། འདི་ན་རྟོག་བཟོས་སྒྱུ་འཕྲུལ་མ་ཡིན་པར། ། གཟུར་གནས་བློ་ཡིས་ཇི་ལྟར་དཔོག་པ་བཞིན། ། དམ་པའི་མཛད་རྣམ་ཟུར་ཙམ་སྨྲ་ལགས་ན། ། དབྱངས་ཅན་མགྲིན་པའི་ཀློང་ན་བཞུགས་ཤིག་ཀྱེ། ། པདྨ་དངོས་སྣང་རྡོ་གྲུབ་ཀུན་བཟང་དང་། ། ཌཀྐིའི་གཙོ་མོ་དབུས་གཟའ་མཁའ་འགྲོ་སོགས། ། ཚད་མའི་སྐྱེས་ཆེན་དུ་མས་ཡང་དང་ཡང་། ། འཁྲུལ་མེད་ལུང་བསྟན་འོད་ཐིག་ཁྱེད་ལ་ཕོག ། དེའི་ཕྱིར་སྙིགས་དུས་འགྲོ་བ་སྐྱོབས་སླད་དུ། ། མདོ་ཁམས་ཉག་ཡུལ་འཛིན་མའི་ལྟེ་བ་རུ། ། གང་སྐུ་པད་དཀར་འདབ་མ་བཞད་དང་ལྷན། ། ཡུལ་ཁམས་དགེ་བའི་རྟེན་འབྲེལ་མ་ལུས་འགྲིགས། ། རིགས་བཟང་ཡུམ་གྱི་མངལ་ལས་བཙས་མ་ཐག ། ཁང་ཁྱིམ་ཀུན་ལ་འོད་ཀྱིས་ཁྱབ་པ་སོགས། ། ཐུན་མིན་རྟགས་མཚན་བསམ་ལས་འདས་པ་ཡིས། ། དད་ཅན་འབངས་མིའི་བློ་ཁ་དགེ་ལ་བཀོད། ། དེ་ནས་དབུས་འགྱུར་ལྷ་ཡི་ཞིང་ས་དང་། ། གོང་མའི་གདན་ས་མཁར་ཆུ་ལ་སོགས་པ། ། ཞབས་ཀྱིས་ཉུལ་ཚེ་ཐུན་མིན་དད་གུས་བཅས། ། སྔོན་གནས་རྗེས་སུ་དྲན་པའི་མཛད་པ་རྨད། ། ཁྱད་པར་གྲུབ་པའི་ས་མཐོར་གཤེགས་པ་ཡི། ། གསང་སྔགས་ཆོས་འཕེལ་གང་དེའི་མདུན་དྲུང་ནས། ། སྐུ་སྐྱེས་གོང་མའི་སྒྲུབ་རྟེན་སྣ་ཚོགས་པ། ། སུས་ཀྱང་མ་བསླབ་ངོས་འཛིན་གསར་བོར་མཛད། ། དེ་ནས་བླ་མ་གསང་སྔགས་ཆོས་འཕེལ་མཆོག ། ཐུགས་ཚོར་ཆེན་པོས་ཡང་ཡང་གཤུམ་མཛད་དེ། ། ནམ་སྙིང་སྤྲུལ་སྐུ་ཡིན་ཞེས་དབུགས་དབྱུང་དང་། ། གསང་སྔགས་བསྟན་འཛིན་ཞེས་པའི་མཚན་ཡང་གསོལ།…

ཤཱཀྱ་ཐུབ་པས་བོད་ཡུལ་གྱི་བླ་སྤྲུལ་དག་ལ་ཇི་སྐད་དུ། རྩོམ་པ་པོ།   སྒེའུ་ཁུང་། 1   ངས་གསར་གཏོད་བྱས་པའི་ཆོས་ལུགས་འདིས་མིའི་ནང་སེམས་ཀྱི་དགྲ་བོ་སྟེ།  འདོད་ཆགས།  ཞེ་སྡང་།  གཏི་མུག་བཅས་ལ་འཐབ་པར་བྱེད་མོད།  བོད་ཡུལ་གྱི་ངའི་རྗེས་སུ་འཇུག་པར་རློམ་པའི་མཁན་པོ་དང་སྤྲུལ་སྐུ་དག་གིས་ནི།  འདོད་ཆགས་ཀྱི་དབང་གིས་ཆུང་མ་བླངས།  ཞེ་སྡང་གི་དབང་གིས་གྱོད་ངར་བྱེད།   གཏི་མུག་གི་དབང་གིས་ཆོས་ལ་སློབ་སྦྱོང་མི་བྱེད།  ཁྱེད་ཚོ་ནི་ངའི་རྗེས་འཇུག་མ་ཡིན།   2  ང་ནི་སངས་རྒྱས་ནས་རིང་བོར་མ་ལོན་པའི་དུས་དེ་ན།  རྒྱལ་པོ་གཟུགས་ཅན་སྙིང་པོ་འཁོར་དང་བཅས་པས་བཀུར་སྟི་བསམ་གྱིས་མི་ཁྱབ་པ་བྱས་ནས་ཤིང་རྟའི་རིགས་སྣ་ཚོགས་བཤམས་ཏེ་ནང་དུ་བཞུགས་པར་གསོལ་བ་བཏབ་མོད།  ང་རྐང་ཐང་དུ་མ་གྷ་དྷ་རུ་སོང་བ་ཡིན།  ངའི་རྗེས་འཇུག་ཏུ་རློམ་པའི་བོད་ཡུལ་གྱི་བླ་ཆེན་དག་ནི་དམངས་སྒོར་ཁྲི་མང་པོ་ཅན་གྱི་རླངས་འཁོར་གྱི་ནང་དུ་འགྱིང་འདུག་པས།  ཁྱོད་ཚོ་ནི་ངའི་རྗེས་འཇུག་མ་ཡིན། 3  ང་སངས་རྒྱས་ནས་ཕྱིར་སེར་སྐྱའི་གྲོང་དུ་ལོག་དུས་ཡབ་རྒྱལ་པོ་ཟས་གཙང་དང་ཡུམ་སྐྱེ་དགུའི་བདག་མོ་སོགས་ཀྱིས་ཟས་སྣ་སྟོང་ཕྲག་མང་པོས་སྣེ་ལེན་བྱས་ཀྱང་།  ངས་བསོད་སྙོམས་ཀྱི་ཟས་ཙམ་མ་གཏོགས་མ་བཞེས།  བོད་ཡུལ་གྱི་ངའི་རྗེས་འཇུག་ཏུ་རློམ་པ་དག་གིས་ཤ་ཚོན་པོ་དང་ཟས་མངར་མོ་ཡོད་ཚད་ལ་རོལ་འདུག་པས།  ཁྱོད་ཚོ་ནི་ངའི་རྗེས་འཇུག་མ་ཡིན།   4  ངས་ཟབ་མོ་ཆོས་ཀྱི་གནས་ལུགས་རྣམས་དགེ་སློང་དག་ལ་ནགས་ཀྱི་ཁྲོད་དུ་གསུངས་པ་ཡིན་མོད།  བོད་ཡུལ་གྱི་ངའི་རྗེས་འཇུག་ཏུ་རློམ་པ་རྣམས་ནི་རྒྱལ་པོའི་ཕོ་བྲང་ལས་བརྗིད་པའི་འདུ་ཁང་གི་ནང་དུ་ངའོ་དང་བཅས་ཏེ་ཞུགས་པས།  ཁྱོད་ཚོ་ནི་ངའི་རྗེས་འཇུག་མ་ཡིན།  5   ང་ལ་ཡབ་རྒྱལ་པོ་ཟས་གཙང་གིས་གསེར་དངུལ་གྱིས་བསྐྲུན་པའི་ཕོ་བྲང་དུ་བཞུགས་པར་གསོལ་བ་བཏབ་མོད་ངས་དང་ལེན་མ་བྱས།  ངའི་རྗེས་འཇུག་ཏུ་ཁས་འཆེ་བའི་བྱང་ཕྱོགས་ཁ་བ་ཅན་གྱི་དགེ་སློང་དག་ནི་གསེར་ཁྲི་མཐོན་པོ་དང་ཁང་བཟང་བརྗིད་པོ་ཡི་ནང་དུ་བག་ཕེབས་ནས་ཞུགས་ཡོད་པས།  ཁྱོད་ཚོ་ནི་ངའི་རྗེས་འཇུག་མ་ཡིན། 6  ངས་ནི་རྒྱལ་སྲིད་མཆིལ་མའི་ཐལ་བ་བཞིན་དུ་དོར།  གཉེན་དང་ཉེ་བའི་འཆིང་ཐག་བཅད་ནས་སེམས་ཅན་ཐམས་ཅད་འཁོར་བ་ལས་སྒྲོལ་བའི་ཕྱིར་དུ་གཅིག་པུར་དབེན་པའི་ནགས་ཁྲོད་དུ་གཤེགས་ནས་ཆོས་ཉིད་ཞི་བའི་བདེན་པ་མངོན་དུ་བརྙེས།  ངའི་རྗེས་འཇུག་ཏུ་རློམ་པའི་བོད་ཀྱི་བླ་ཆེན་ངུར་སྨྲིག་གི་བླ་གོས་ཅན་དག་གིས་ནི།  རང་གི་ཁྱིམ་ཚང་གི་ཕྱིར་དུ་རྒྱུ་དང་འབྱོར་བ་སྒྲུབ།  གཉེན་དང་ཉེ་བ་ཡི་ཕྱོགས་བཟུང་ནས་གྱོད་དང་ཁ་མཆུ་བསླངས་པས།  ཁྱོད་ཚོ་ནི་ངའི་རྗེས་འཇུག་མ་ཡིན། 7   ངའི་དགེ་སློང་གི་ནང་དུ་རྫུ་འཕྲུལ་དང་མངོན་ཤེས་ལ་མངའ་བརྙེས་པའི་ཤཱ་རིའི་བུ་དང་མོའུ་འགལ་གྱི་བུ་སོགས་ཡོད་ཅིང་། སྐྱེ་བོ་རྣམས་ཆོས་ཟབ་མོའི་གནས་ལུགས་ཉམས་སུ་མི་ལེན་པར་མཐུ་དང་རྫུ་འཕྲུལ་ཙམ་གྱིས་ཡིད་བསླུ་བར་དགོངས་ནས་ཁོང་ཅག་ཞི་དུལ་གྱི་སྤྱོད་པ་འབའ་ཞིག་ལ་གནས་པར་གྱུར་མོད།  ངའི་རྗེས་སུ་འཇུག་ཏུ་རློམ་པའི་བོད་ཡུལ་གྱི་བླ་ཆེན་དུ་སྐད་པ་དག་གིས་ནི་གདུལ་བྱ་རྣམས་ལ་མི་ཆོས་བླ་མའི་རྫུན་གང་འདོད་དུ་བཤད་པས།  ཁྱོད་ཚོ་ནི་ངའི་རྗེས་འཇུག་མ་ཡིན། 8   ངའི་དགེ་སློང་དག་གི་ནང་དུ་རིན་པོ་ཆེར་རེག་པ་དང་ཕྱི་དྲོའི་ཁ་ཟས་ལ་བག་མེད་དུ་ལོངས་སྤྱོད་མཁན་གཅིག་ཀྱང་མེད་མོད།  བོད་ཡུལ་གྱི་བླ་མ་དང་སྤྲུལ་སྐུ་ཕལ་མོ་ཆེས་དུས་ངེས་མེད་དུ་བཟའ་བཏུང་ལ་རོལ་བ་དང་།  རིན་པོ་ཆེའི་རིགས་ཏེ།  གསེར་གྱི་ཁྲི་རྩོད་པ་དང་།  རིན་ཐང་གཞལ་དུ་མེད་པའི་ནོར་ལོངས་སྤྱོད་ལ་བདག་ཏུ་འཛིན་པས།  ཁྱོད་ཚོ་ནི་ངའི་རྗེས་འཇུག་མ་ཡིན། 9  ང་དང་ངའི་དགེ་སློང་དག་ནི“གཤེ་ཡང་སླར་མི་གཤེ་བ་དང་། ཁྲོས་ཀྱང་སླར་མི་ཁྲོ་བ། བརྡེགས་ཀྱང་སླར་མི་བརྡེག་པ། མཚང་བྲུས་ཀྱང་སླར་མཚང་མི་འབྲུ་བ”བཅས་ཀྱི་དགེ་སྦྱོང་གི་ཆོས་བཞི་ལ་ནམ་ཡང་གནས་པར་་གྱུར་མོད།  ངའི་རྗེས་འཇུག་ཏུ་ཁས་འཆེ་བའི་གངས་རིའི་ལྗོངས་ཀྱི་བླ་ཆེན་སྤྲུལ་ཆེན་རྣམས་ཀྱིས་ནི།  གྲུབ་མཐའ་དང་ཆོས་བརྒྱུད་བརྩད།  དགོན་པ་དང་མཆོད་གཞིས་བརྩད།  ཁྲི་རྐང་གི་མཐོ་དམན་བརྩད།  དམག་འཁྲུག་གི་མེ་ལྕེ་མཆེད།  མི་གསོད་ཀྱི་སྦྱོར་བ་སྤེལ།  ཀྱི་ཧུད་ངས་འཇིག་རྟེན་འདིར་གསར་དུ་བཏོད་པའི་རྣམ་གྲོལ་ཞི་བའི་ལམ་བཟང་ལ་དམའ་ཕབ་པས།  ཁྱོད་ཚོ་ནི་ངའི་རྗེས་འཇུག་མ་ཡིན། 10   ང་དང་ངའི་དགེ་སློང་དག་གིས་ནི་གོས་ཕྱགས་དར་ཁྲོད་དང་ཟས་བསོད་སྙོམས་ཙམ་ལས་མི་འཆིང་བར་འདོད་ཆུང་ཆོག་ཤེས་ཀྱི་འཚོ་བ་རོལ་མོད།  དེང་གི་ཁ་བ་ཅན་གྱི་དགེ་སློང་རྣམས་ནི་ནོར་དང་ལོངས་སྤྱོད་ཇི་ཙམ་ཐོབ་ཡང་ཆོག་ཤེས་མེད་པར།   ཉིན་མཚན་ཀུན་དུ་དཔལ་འབྱོར་རྩོལ་སྒྲུབ་ཀྱི་ལས་ཁོ་ནར་འབད་པས།  ཁྱོད་ཚོ་ནི་ངའི་རྗེས་འཇུག་མ་ཡིན།   11   ངས་ནི་དགེ་སློང་དག་ལ་བྱ་བ་ཉུང་བ་དང་།  དོན་ཉུང་བར་གདམས་མོད།  བོད་ཡུལ་གྱི་དགེ་སློང་རྣམས་ནི་ཁྱིམ་གྱི་དོན་དང་སྲིད་ཀྱི་དོན།  གཉེན་གྱི་དོན་སོགས་སུ་རྒྱུག་ཅིང་འདུར་རྐྱེན་བྱ་བ་མང་བ་དང་དོན་མང་བས།  ཁྱོད་ཚོ་ནི་ངའི་རྗེས་འཇུག་མ་ཡིན། 12   ངའི་རྗེས་སུ་འཇུག་པའི་དགེ་སློང་དག་ནི་ངས་བཤད་པའི་དྲང་ངེས་ཀྱི་རྣམ་བཞག་ལ་འཆད་ཉན་བྱེད་པ་དང་།  དེའི་དོན་ཚུལ་བཞིན་ཉམས་སུ་ལེན་པ་ཁོ་ནར་འབད་མོད།  བོད་ཡུལ་གྱི་བླ་བཙུན་དག་གིས་ནི།  རྩ་བ་ལྟ་བུའི་ཟབ་མོ་ཆོས་ཀྱི་གནས་ལུགས་ལ་ཐོས་བསམ་མི་བྱེད་པར།  ཡལ་ག་ལྟ་བུའི་མཆོད་རྟེན་བརྩིགས་པ་དང་ལྷ་ཁང་བཞེངས་བ་ཁོ་ནར་མགོ་འཁོར་འདུག་པས། …