November 2019

རང་རིག་བླ་མའི་རྣལ་འབྱོར་ཙིཏྟ་མ་ཎི།།
ན་མོ་གུ་རུ་བུདྡྷ་ཛྙཱ་ན་ཡེ།།
ཨེ་མ་ཀུན་བཟང་རྒྱལ་བའི་ཐུགས།།
མ་ལུས་འོད་གསལ་རང་བཞིན་དཔལ།།
ཨ་ཧོ་ཀ་ལྷུན་ངོ་བོ་ཉིད།།
བསླུ་མེད་ཡིད་བཞིན་ནོར་བུ་མཁྱེན།།
སྐྱབས་གཅིག་འདྲེན་མཆོག་ཆོས་ཀྱི་རྒྱལ།།
ཡེངས་མེད་འཛིན་མེད་མཐའ་བྲལ་ངང་།།
གསང་གསུམ་རང་སེམས་དབྱེར་མེད་པར།།
བདེ་གསལ་མི་རྟོག་དྲན་པར་བརྟས།།
རང་ངོ་ཤེས་ཞིང་རང་བབས་བཞག།
ངོ་བོ་སྟོང་པ་ཆོས་སྐུའི་ཞལ།།
རང་བཞིན་ལྷུན་གྲུབ་ལོངས་སྐུའི་རྩལ།།
ཐུགས་རྗེ་ཀུན་ཁྱབ་འགྲོ་དོན་མཛད།།
སྙིང་དབུས་གཉུག་མའི་དཀྱིལ་འཁོར་དུ།།
རྩ་ཐིག་རླུང་སེམས་བདེ་བ་ཆེ།།
རིག་པ་ཟང་ཐལ་འོད་ཀྱི་སྐུ།།
ཀུན་བཟང་རྒྱལ་བའི་ཞལ་ལ་བལྟའ།།
ཕྱི་ན་དད་གུས་ས་གཞི་བརྟན།།
ནང་དུ་དམ་ཚིག་ལྗོན་བཟང་འཕེལ།།
གསང་བ་འབྲས་བུ་རྗེན་པར་རྟག།
ཡང་གསང་ཡིད་བཞིན་ནོར་བུ་ཤར།།
ཤར་གྲོལ་དུས་མཉམ་ཀུན་ཏུ་བཟང་།།
བླ་མའི་བཀའ་དྲིན་རྫོགས་པ་ཆེ།།
ཡེ་སངས་རྒྱས་པ་ཨེ་མ་ཧོ།།
ཕྲིན་ལས་ཀུན་ཁྱབ་ལྷ་རྒྱལ་ལོ།།
ཨོཾ་གུ་རུ་བུདྡྷ་ཛྙཱ་ན་སིདྡྷི་ཧཱུཾ་ཧྲཱིཿ
ཞེས་པ་ས་ཕག་ཐ་སྐར་ཟླ་བའི་གཟའ་ཚེས་དགེ་བར་ལས་སྨོན་གྱིས་འབྲེལ་བའི་འབྲུག་མཁས་དབང་དམ་པ་ཕུབ་རྡོ་རྗེ་དབང་དང་ཨེ་ཝཾ་ལ་ལྷག་པར་དད་པའི་དོལ་པོ་པ་བཀྲ་ཤིས་ལྷུན་གྲུབ་ཀྱིས་ངོར་ཤྲཱིཿཨེ་མ་ཧོས་ཨེ་ཝཾ་ཛྙཱ་ན་གུ་རུའི་ལྷ་ཁང་ནས་ཐོལ་བྱུང་དུ་ཕུལ་བར་དགེའོ།། །། སྤྱི་ལོ་༢༠༡༩ ཟླ་བ༡༡ ཚེས་༡༡་ལ།།

Leave a Reply

Your email address will not be published.