March 2020

༄༅༎བླ་མའི་རྣལ་འབྱོར་དད་པའི་གསོས་སྨན་བཞུགས་སོ༎
དང་འདོད་ཡིད་ཆེས་ཀྱི་དད་པ་དྲག་ཏུ་བསྐྱེད་དེ།
སངས་རྒྱས་ཀུན་གྱིས་འཕྲིན་ལས་གཅིག་འདུས་པ༎
མ་ལུས་འགྲོ་བ་ཡོངས་ཀྱི་གཉེན་གཅིག་པུ༎
དཀྱིལ་འཁོར་ཡོངས་ཀྱི་སྤྲོ་བསྡུས་སྤྱི་དཔལ་རྗེ༎
སྐལ་ལྡན་བདག་གི་གཏན་གྱི་སྐྱབས་གནས་མཆོག།
སྟོན་ཟླའི་མཚན་མོ་དཀར་བའི་རི་བོང་འཛིན༎
རྒྱུ་སྐར་ཡོངས་ཀྱི་དབུས་ན་མཛེས་པ་ལྟར༎
དད་ལྡན་བྱེ་བས་མངོན་པར་བཀུར་བ་ཡི༎
མཐོང་བའི་མི་ངོམས་སྐུ་མཆོག་མིག་གིས་སྨན༎
ཆར་ལྡན་དུས་སྟོན་དར་བའི་སྐབས་ཞིག་ན༎
ལྷང་ལྷང་ལྡིར་བའི་སྤྲིན་གྱི་རོལ་མོ་བཞིན༎
ཚར་གཅོད་རྗེས་སུ་འཛིན་ལ་དབང་འབྱོར་བའི༎
དགག་བཞག་སྤོང་བའི་གསུང་འདི་རྣ་བར་འཇེབས༎
སྤྲོས་ཟད་མཁའ་ལ་མཁྱེན་པའི་ཉི་འོད་ཀྱིས༎
ལྔ་བདོའི་རྒུད་པའི་མུན་ཚོགས་དབྱིངས་སུ་བསྙིལ༎
སྐལ་ལྡན་བློ་ཡི་འདབས་སྟོང་ཅིར་ཡང་བཞད༎
ཐུགས་རྗེའི་ཐུགས་འདི་ཡིད་ལ་ཡང་ཡང་འཁོར༎
ཞེས་གསལ་བཏབ་ལ།
གསོལ་བ་གདབ་པ་ནི།
ཀྱེེ་མ་བླ་མ་རིན་པོ་ཆེ། །
བདག་ལ་ཐུགས་རྗེའི་ཉེར་དགོངས་ལ༎
ཁྱེད་དང་སྐལ་བ་མཉམ་པ་རུ༎
ད་ལྟ་ཉིད་དུ་བྱིན་གྱིས་རློབས༎
ཐུན་འཇོག་པར།
མཐར་ནི་བླ་མ་རང་ལ་ཐིམ༎
རང་སེམས་སྐྱེ་མེད་འོད་གསལ་འདི༎
ལྷ་དང་བླ་མ་དབྱེར་མེད་པར༎
ཐག་ཆོད་ངང་ལ་མཉམ་པར་བཞག། ཨ་ཨ་ཨ།
ཞེས་སྣང་སྲིད་ཐམས་ཅད་བླ་མའི་ངོ་བོར་མོས་ལ་དགེ་རྩ་བྱང་ཆུབ་ཏུ་བསྔོ་བར་བྱའོ༎ ཞེས་པ་འདི་ནི་དད་སློབ་མཁན་ཤེས་རབ་བཟང་པོའི་ངོ་ཆེན་པ་བྱས་ཏེ་ཕུ་ཁང་ཆོས་གྲྭལ་ན་འཁོད་པའི་མཁན་སློབ་འགའ་ཞིག་གིས་ནན་ཟབ་བསྐུལ་བའི་ངོར་རབ་བྱུང་༡༧པའི་མེ་གླང་ཟླ་༣ཚེས་༡༠ལ་ངག་དབང་བློ་གྲོས་མཚུངས་མེད་པས་སྤེལ་བ་དགེ། བསྐུལ་བ་པོ་ཁོང་རྣམས་ཀྱིས་ཐུགས་ལ་འཕྲོད་པའི་ཚིག་དོན་ལེགས་པོ་ཞིག་མ་བྱུང་ཡང་ཁོ་བོའི་ཚེ་གང་བོ་ལ་རྩོལ་མེད་དུ་རང་གི་ཡིད་ངོར་ཤར་བ་བཞིན་མ་གཏོགས་ཚིག་དོན་གཉིས་ཆར་ལ་བསྒྱུར་བཅོས་བྱེད་མ་མྱོང་བས་ཐུགས་ཁྲེལ་མེད་པར་ཞུ།
སྤྱི་ལོ་༡༩༩༧ལོའི་ཟླ་༣ཚེས་༢༤ལའོ༎
ཨོཾ་གུ་རུ་ཀལྱ་དྷརྨ་བརྡྷ་སིདྡྷི་ཨཿཧཱུྃ།

Leave a Reply

Your email address will not be published.