༧སྐྱབས་རྗེ་མཁན་ཆེན་བླ་མ་རིན་པོ་ཆེ།།བླ་མ་མཁྱེན་ནོ།།བསླབ་གསུམ་དྲི་མ་མེད་པའི་རྒྱ་མཚོ་ལ།།མདོ་སྔགས་ཟབ་རྒྱས་གདམས་པའི་བདུད་རྩི་འཁྱིལ།།གང་བསམ་ཡིད་བཞིན་ནོར་བུ་རིན་པོ་ཆེ།།མཁན་ཆེན་བླ་མ་དཔལ་དགྱེས་རྡོ་རྗེ་མཁྱེན།།ཆོས་གོས་རྣམ་གསུམ་མཛེས་པའི་ལྷུན་པོ་ལ།།གཞན་ཕན་ཕྱིན་དྲུག་འབྲས་བུའི་ཁུར་གྱིས་ཕྱུག།བཤད་སྒྲུབ་བསྟན་པའི་ཚོགས་ལ་རྟག་བརྩོན་པའི། །མཚན་ཉིད་ཀུན་ལྡན་མཁན་ཆེན་བླ་མ་མཁྱེན།།འཆད་པ་ཐོགས་མེད་མཁས་པར་དགའ་བ་སྟེར།།རྩོད་པ་ཟླ་མེད་ལོག་རྟོག་སེལ་བའི་གཉེན།།རྩོམ་པ་མཚུངས་མེད་ཟབ་གཏེར་འགྱེད་པའི་མགོན།།རྩ་བའི་བླ་མ་དཔལ་དགྱེས་རྡོ་རྗེ་མཁྱེན།།མཐའ་བྲལ་དབུ་མའི་ལྟ་བ་ངེས་ཤེས་འཁྲུངས།།མི་མེད་དབེན་པའི་གནས་སུ་སྒྲུབ་པ་མཛད།།རྟེན་འབྱུང་བསླུ་མེད་སྣང་བར་རོལ་རྩེད་འཁན།།རིག་འཛིན་ཨེ་མ་ཧོ་ལ་གསོལ་བ་འདེབས།།སྲིད་ལས་ངེས་པར་འབྱུང་ནས་ས་མཐར་བསྐྱོད།།མཐའ་འཁོབ་ཆོས་ལ་བཀོད་མཁས་བྱང་ཆུབ་སེམས།།དག་པ་རབ་འབྱམས་རྒྱལ་བའི་ཕྲིན་ལས་ཅན།།དགེ་ལེགས་ཡར་འཕེལ་ཞབས་ལ་གསོལ་བ་འདེབས།།ཚུལ་ཁྲིམས་རྣམ་དག་མང་ཐོས་སྡེ་སྣོད་འཛིན།།ཏིང་འཛིན་ཞི་ལྷག་ཟུང་འབྲེལ་བསྟན་པ་སྐྱོང་།།སྟོང་ཉིད་སྙིང་རྗེ་རྟེན་འབྲེལ་གཞན་དོན་སྤེལ།།གྲུབ་དབང་ཆོས་དབྱིངས་བློ་གྲོས་གསོལ་བ་འདེབས།།ཐེག་རྩེའི་ལྟ་བ་མཐོན་པོ་གངས་རིའི་སྤོར། །རྨད་བྱུང་སྒོམ་པ་ཆུ་འཛིན་ཁ་བས་བསིལ།།ཡང་དག་གོ་ལའི་སྲོག་རྩ་འབྱུང་བའི་གནས།།གཏེར་ཆེན་པདྨ་གླིང་པར་གསོལ་བ་འདེབས།།སྔོན་བྱོན་མཁས་གྲུབ་དམ་པའི་བཀའ་གཏེར་དང་།།ད་ལྟའི་ཆོས་ཚན་རིག་གནས་མ་ལུས་ཀུན།།ཁོང་དུ་ཆུད་པའི་མཁྱེན་རབ་ཕུལ་བྱུང་བ།།མཁྱེན་ཆེན་བླ་མའི་ཞབས་ལ་གསོལ་བ་འདེབས།།འདོད་ཡོན་བདུད་ཀྱི་གཡབ་མོས་མ་ཁུག་ཅིང་།།ཉིན་མཚན་དབྱེར་མེད་ལུང་རྟོགས་གཉིས་ལ་བརྩོན།།བཤད་སྒྲུབ་བསྟན་པའི་རྒྱལ་མཚན་བསྒྲིངས་པའི་མགོན།།ཆོས་རྗེ་ཡིད་བཞིན་ནོར་བུ་གསོལ་བ་འདེབས།།དབང་བཞི་ཡོངས་སུ་ཐོབ་པར་བྱིན་གྱིས་རློབས།།སྒྲིབ་བཞི་ཡོངས་སུ་དག་པའི་དངོས་གྲུབ་སྩོལ།།ཕྲིན་ལས་རྣམ་བཞི་ཡོངས་སུ་ལྷུན་གྱིས་གྲུབ།།སྐུ་བཞི་རྒྱལ་བའི་གོ་འཕང་མྱུར་ཐོབ་ཤོག།——-འབྲུག་རྡོ་རྗེ་ཕུན་ཚོགས་ནས་གུས་ཕུལ།།

འཇམ་དཔལ་རྩ་རྒྱུད་ལས། ན་མཿསམྣ་བུདྡྷ་ནཱཾ་ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཨོཾ་ཁ་ཁ་ཁཱ་ཧི་ཧཱུཾ་ཧཱུཾ་ཛྭ་ལ་ཛྭ་ལ་པྲ་ཛྭ་ལ་པྲ་ཛྭ་ལ་ཏིཥྛ་ཏིཥྛ་ཕཊ་ཕཊཿསརྦ་དུརྣི་མི་ཏེ་དུར་སུབ་ཤིནྟིཾ་ཀུ་རུ་སྭཱ་ཧཱ།། ད་ནངས་ངས་རྨིས་པ་ཚང་མར་ཕྱིར་བཟློག་བྱས། མུན་ཀློང་ལས་འབུ་སྲིན་སྡིག་པ་ཞིག་གིས་གྲོགས་ལ་སྡིགས་པ་རྨིས།།ཀྱེ་མ་ཧོ།་་་་་ཤྲཱིས་སོ།

ངོས་ནི་ལོ་ངོ་བཅུ་བཞིའི་སྐབས་སུ་དགེ་ཚུལ་སློང་ཞུ་སའི་༧སྐྱབས་རྗེ་དགེ་མང་མཁན་ཆེན་དབང་དྷཱིའི་རིན་པོ་ཆེ་དང་གནས་བརྟན་ལས་གྲལ་བ་མཁན་ཆེན་བསོད་ནམས་རིན་པོ་ཆེ་ནི་ངའི་ལས་སློབ་དང་བླ་མ་ཡིན། ཁོང་ནི་ཡང་དག་དགེ་སློང་དང་། དམ་པའི་ཚུལ་དགུ་ལྡན་པ། ངོས་ལ་བྱམས་སྐྱོང་རྒྱུན་དུ་གནང་འཁན་ཞིག་ཡིན། དེ་རིང་དམིགས་བསལ་བཀའ་མོལ་བྱུང་བས་དགའ་སྤྲོ་བརྟས། ཨེ་མ་ཧོས

མི་ཞིག་ལ་སངས་རྒྱས་སུ་བལྟས་ཀྱང་མི་དེས་ཁྱོད་ལ་ཁྱི་རུ་བལྟ་སྲིད། དེས་ན་སངས་རྒྱས་ཞིག་ལ་མི་རུ་བཟུང་ན་བྱིན་རླབས་ཡང་ཁྱི་ལས་མི་འབྱུང་ཚུལ་གསུངས་པ་ཅི་མ་བདེན། གང་ལྟར་དེ་རིང་ནས་ང་ཉིད་སངས་རྒྱས་ཡེ་ཤེས་འཛིན་པ་དེ་ནོར་མི་འདུག གཞན་དག་སུ་མ་འགུ་ཡང་ཞེ་བློ་བདེ་བ་ཞིག་བྱུང་། དགྲ་གྲོགས་སུ་ཞིག་ཡིན་རུང་བཏང་སྙོམས་ངང་ལས་སེམས་ཁུར་ཡེ་མི་དགོས་པ་ཞིག་ཆགས་སོང་། རྨི་ལམ་དང་འཁྲུལ་བ་བདེན་པ་བཟུང་ནས་མུ་འཐུད་དུ་བསྟན་འགྲོ་ལ་ཕན་བདེ་སྒྲུབ་པ་དམ་བཅའ་དང་བདེན་ཚིག་ཏུ་སྨོན་པའོ།། རྩ་གསུམ་རྒྱལ་བའི་ཐུགས་སྲས་ཨེ་མ་ཧོས

ལྟ་མགུར་ཀུན་བཟང་མེ་ལོང་།ཨེ་མ་ཧོ།།༡༽ཀ་དག་གི་རིག་པ་ཟང་ཀ་ནི་རྒྱ་ཡན།།མཐའ་གྲོལ་ཀྱི་ཀློང་དུ་ཕྱམ་ཕྱམ་དུ་སྐྱོང་ཚེ།།ཀུན་རྟོག་གི་སྤྲོས་པའི་ལྷན་པ་དེས་ཅི་བྱ།།གུ་ཡངས་ཀྱི་བློ་བདེའི་རྣལ་འབྱོར་ང་སྐྱིད་པ།།༢༽ལྷུན་གྲུབ་ཀྱི་རིག་པ་འོད་གསལ་གྱི་ངང་དུ།།སྒྲོན་དྲུག་གི་འཇའ་ཟེར་རང་བཞིན་གྱིས་ཤར་ཚེ།།བསྐྱེད་རྫོགས་ཀྱི་ངལ་བས་བྲེལ་བ་དེས་ཅི་བྱ།།ཡེ་གྲོལ་གྱི་ཞིང་ཁམས་མཇལ་བ་འདི་སྐྱིད་པ།།༣༽གང་ཤར་གྱི་རིག་པ་རྣམ་རྟོག་གིས་མ་གོས།།འགྱུ་དྲན་གྱི་ཤེས་པ་བདེ་ཆེན་དུ་མཐོང་ཚེ།།ཟག་བཅས་ཀྱིས་བསྐྲུན་པའི་ཕྱག་རྒྱ་དེས་ཅི་བྱ།།རང་གྲོལ་གྱི་གྲོལ་ལམ་རྫོགས་ཆེན་ཉིད་སྐྱིད་པ།།༤༽གཅེར་གྲོལ་གྱི་རིག་པ་ཡེ་ཤེས་ཀྱི་བླ་མ།།བློ་འདས་ཀྱི་ལྟ་བ་དག་མཉམ་དུ་གནས་ཚེ།།ཞི་གནས་གྱི་དྲན་པའི་ཚན་རིག་དེས་ཅི་བྱ།།ཀུན་བཟང་གི་རིག་འཛིན་འདི་ཕྱི་ཀུན་སྐྱིད་པ།།༥༽སྣང་སྟོང་གི་རིག་པ་རྟག་ཆད་དུ་མ་གོལ།།བདེ་སྟོང་གི་ཡེ་ཤེས་བརྗེན་གཅེར་དུ་རོལ་ཚེ།།རིག་སྟོང་གི་སངས་རྒྱས་དཀའ་སྤྱད་དེས་ཅི་བྱ།།ཁྱབ་བདག་གི་སྟོན་པའི་གཉུག་སེམས་འདི་སྐྱིད་པ།།ཅེས་པ་འདི་ཡང་རབ་གནས་ས་ཕག་མགོ་ཟླའི་ཟླ་བ་ཉ་ཡོངས་སུ་གང་བའི་ཉིན་ལ་མཁའ་འགྲོ་རྗེ་བཙུན་མས་ཐལ་སྦྱར་བཅས་མཆོག་ཉིད་སྐྱིད་པོ་བདེ་མོ་ཡིན་ནམ་ཞེས་པའི་ལན་དུ་གང་ཤར་དུ་ཤྲཱིཿཨེ་མ་ཧོས་ཨེ་ཝྃ་ཛྙཱ་ན་གུ་རུ་ལྷ་ཁང་ནས་གླུ་རུ་བླངས་པར་དགེའོ།། །།

དེ་རིང་འཛམ་གླིང་གང་སར་ཕལ་མོ་ཆེར་ཆར་དང་ཁ་བས་གཡོག་བཞིན་པའི་ཚེ། བསམ་ཡས་ལུགས་གསུམ་མི་འགྱུར་ལྷུན་གྱིས་གྲུབ་པ་བཞེང་དུས་དང་རྟེན་འབྲེལ་མ་བསྒྲིག་རང་འགྲིགས་ཀྱིས་ཨེ་ཝཾ་གེ་སར་དགོན་པའི་བྲག་ཁང་དང་འཁོར་ཡུག་ལ་འཇའ་འོད་སྨུག་ཀློང་གི་ཁྲོད་ནས་ཆུ་རེགས་དང་གློག་འཕྲུལ་དང་བླ་གབ་ཞིབ་ཚེགས་མཛད་པའི་ཚེ་ས་བདག་ཕག་ནག་དང་ཕག་ཁྲ་རིགས་བརྒྱད་བྱུང་ནས་ས་རྔོག་དང་རྔོག་བཞིན་མཆིས་སོ། གང་བསམ་ལྷུན་འགྲུབ་འབྱུང་སྨོན་བཅས་ཤྲཱིས་སོ། །