རང་ཉིད་སྐྱེས་ནས་འཆི་བའི་ནང་མོ་བར།།ཁོམ་མེད་འཁོར་བའི་བྱ་བ་བསྒྲུབ་བསྒྲུབ་ནས།།དམ་པའི་ཆོས་ལ་བརྩོན་པ་ཉུང་ཉུང་ནས།།འགྱོད་པའི་ཉིན་མོར་ཐོན་དུས་ཅི་ཞིག་བྱ།། ཐར་འདོད་ལམ་ལ་ཁ་ཡིས་བཤད་བཤད་ནས།།ཐར་མེད་འཁོར་བའི་འདམ་དུ་ཆགས་ཆགས་ནས།།དལ་བའི་རྟེན་བཟང་དོན་མེད་སོང་བ་འདི།།རང་ཉིད་རང་གིས་བསླུས་འདི་ཨ་རེ་ཙ།། དམ་ཆོས་བསྒྲུབ་བསམ་ཡ་ཐོད་གཉེར་མས་ཁེངས།།ཐར་བའི་ལམ་འདོད་དབང་པོ་ཉམས་ནས་སོང་།།བློ་ཁོག་གྱོང་བོ་འདི་ལ་བསམ་བསམ་ནས།།སང་ཉིན་གནང་ཉིན་བརྩིས་ནས་ཡོད་ཚད་ཤོར།། འཆི་བ་བསམ་ནས་དམ་ཆོས་ཅི་ཐུབ་གལ།།མི་རྟག་ལ་སྒོམ་ངེས་འབྱུང་རྩ་བ་གལ།།འདི་བདེ་ཕྱི་སྐྱིད་དུག་ལྔའི་གཉེན་པོ་གལ།།གལ་ཆེན་འདི་དག་གཙོ་བྱས་འཆི་བར་སོམས།། རང་གིས་རང་ལ་བྲིས་པའི་མགུར་མ་འདི།།ངེས་འབྱུང་སྐད་ཅིག་མ་ཡིས་བསྐུལ་བྱས་ནས།།རང་གཅེས་ཞེན་ཆགས་ཆེ་བའི་རང་ཉིད་ལ།།རང་གི་རྣམ་རྟོགས་ཤར་ཆ་ཤར་མར་བྲིས།། ______རང་ཉིད་ལ། གཙང་པས

རྒྱ་གར་གྱི་ཆོས་དང་སྲིད་འཛིན་པ་མུ་དྷཱི་ལ་བསྟོད་ཚིག་གསེར་གྱི་མཎྜལ།ཨེ་མ་ཧོ།།རྒྱལ་སྤྱིའི་སྟེང་ན་གཟི་དཔལ་རབ་ཏུ་བརྗིད།།ལྷ་ལ་གུས་ཤིང་སངས་རྒྱས་དད་པ་བཞགས།ལུས་སྦྱོང་གནང་ཞིང་པདྨ་འབྱུང་གནས་གསོལ།།ཆོས་སྲིད་ཁྱབ་བདག་ཁྱེད་ལ་མངོན་པར་བསྟོད།།འཕགས་ཡུལ་སྲིད་དོན་བྲེལ་ཚབ་ཆེ་ན་ཡང་།།ཉིན་བཞིན་སྒོམ་ལ་བརྩོན་པའི་མུ་དྷཱིཿཉིད།།ཆོས་དང་འཇིག་རྟེན་འཛིན་པའི་དཔའ་བོ་ཁྱེད།།སྐུ་ཚེ་བརྟན་ཅིང་བསམ་དོན་མྱུར་འགྲུབ་ཤོག།ལྷ་འདྲེ་རྩོད་གཞིའི་ཁ་མཆུ་ཁྱེད་ལ་མེད།།དྲིན་ལན་ལོག་འཇལ་གཡོ་ཟོལ་དེ་བས་དབེན།།གྲགས་པ་དོན་ལྡན་ཞི་བདེའི་སྲིད་འཛིན་ཉིད།།འཛམ་གླིང་རྒྱན་ཏུ་ཡུན་རིང་འཚོ་གྱུར་ཅིག།ཅེས་པ་འདི་ཡང་རྒྱལ་གར་སྲིད་བློན་ཆེན་པོ་མུ་དྷཱི་ཉིད་དཔལ་ལྡན་འབྲུག་གི་རྒྱལ་ཁབ་ནས་སྒོམ་རྒྱག་པ་དང་མཚོ་སྐྱེས་རྒྱལ་བའི་སྐུ་ལ་ཕྱག་འཚལ་སོགས་བརྙན་འཁོར་ལས་བཟང་རབ་མཐོང་མ་ཐག་གང་ཤར་ཤྲཱིཿཨེ་མ་ཧོས་དབྱིན་ཡུལ་ནས་བསྟོད་པར་དགེའོ།།

༄༅༅།།གནམ་ལྕགས་གླིང་པ་མི་ཡི་སེངྒེ་རྒྱལ།།ཨེ་མ་ཧོ།།གཞི་དབྱིངས་ཆོས་སྐུ་ཀ་དག་ཀུན་ཏུ་བཟང་།།ལམ་མཆོག་ལོངས་སྐུ་འོད་གསལ་རྡོ་རྗེ་འཆང་།།འབྲས་བུ་སྤྲུལ་སྐུ་ཕྲིན་ལས་གནམ་ལྕགས་དབང་།།འཇིགས་མེད་མི་ཡི་སེང་ཆེན་རྟག་ཏུ་རྒྱལ།།རྒྱལ་ཀུན་སྤྱི་གཟུགས་པདྨ་འབྱུང་གནས་དང་།།རྒྱལ་བ་མཆོག་དབྱངས་ཡེ་ཤེས་སྒྱུ་མའི་འཕྲུལ།།རྒྱལ་ཁམས་འདྲེན་པའི་རྒྱལ་སྲས་ཚུལ་འཛིན་པ།།རྒྱལ་དབང་གནམ་ལྕགས་གླིང་པ་རྒྱལ་གྱུར་ཅིག།ཨ་རིའི་ཡུལ་ཏུ་སངས་རྒྱས་སྐྱེད་ཚལ་བསྐྲུན།།གངས་ཅན་ལྗོངས་སུ་ཆོས་ཀྱི་འཁོར་ལོ་བསྐོར།།འཛམ་བུ་གླིང་ཀུན་མཆོད་རྟེན་ཡོངས་སུ་གཏམས།།ཕྲིན་ལས་ཀུན་ཁྱབ་གསང་སྔགས་བསྟན་འཛིན་རྒྱལ།།འཁོར་འདས་རྒྱན་ཏུ་ཨེ་ཝཾ་གནུབས་ཆེན་བཞེངས།།གནུབས་ལུགས་བཀའ་གཏེར་བསྟན་པའི་ཁྱབ་བདག་རྗེ།།རྒྱལ་བསྟན་སྤྱི་དང་སྔ་འགྱུར་བསྟན་དོན་ཕྱིར།།སྐུ་ཚེ་རབ་བརྟན་བཞེད་དོན་ལྷུན་གྲུབ་ཤོག།དཀོན་མཆོག་རྩ་གསུམ་རྒྱ་མཚོའི་བྱིན་རླབས་དང་།།རྟེན་འབྲེལ་བསླུ་བ་མེད་པའི་བདེན་པ་དང་།།རིག་འཛིན་བརྒྱུད་གསུམ་བླ་མའི་ཐུགས་རྗེ་མཐུས།།གང་བསམ་ལྷུན་གྱིས་གྲུབ་པའི་བཀྲ་ཤིས་ཤོག།ཅེས་པ་རབ་གནས་ས་ཕག་ཁྲུམས་ཟླའི་ཉ་ལ་རང་གི་རྨི་ལམ་ཞིག་དང་ཆོས་དང་འཇིག་རྟེན་གྱིས་བདག་ལ་ཐུགས་བརྩེས་ལྷག་པར་སྐྱོང་བའི་མགོན་པོ་གང་ཉིད་དྲན་པའི་མོད་ལ་གསང་གསུམ་གཡུལ་ལས་རྒྱལ་བའི་རྟེན་འབྲེལ་ཏུ་ཤྲཱིཿཨེ་མ་ཧོས་དབྱིན་ཡུལ་ཨེ་ཝཾ་སངས་རྒྱས་ཡེ་ཤེས་ཀྱི་རི་ཁྲོད་ནས་སྨོན་པར་དགེའོ།། །།

མཚམས་སུ་ཆས་པའི་ལམ་ཀ་ནས་བྱེའུ་དང་བགྲོ་གླེང་།།ཀྭ་ཀྭ། ཨེ་མ་ཧོ།།བྱེའུ་ཆུང་སེར་པོས་ཆོས་ཤིག་གསུངས་དང་གསུང་།།ཆོས་ནི་ཅི་བཤད་འབ་འབུ་མ་བསད་དང་།།འཚེ་བ་མེད་པར་ཆོས་ཀྱི་རྩ་བ་ཡིན།།སྐྱབས་སུ་འགྲོ་བ་ནང་པའི་འཇུག་སྒོ་ལགས།།དེ་སྐད་བཤད་པས་བྱེའུ་ཆུང་གད་མོ་བཅས།།སྐྲ་རིང་ཨོག་ཚོམ་མཛེས་པའི་རྣལ་འབྱོར་ཁྱོད།།གང་ནས་འོང་ཡིན་གང་དུ་འགྲོ་བར་ལགས།།ནགས་ཀློང་འདི་ན་སྲོག་ཆགས་དུང་ཕྱུར་ནི།།བརྒྱད་བརྒྱ་གྱ་བཅུ་གྱ་བརྒྱད་ཕལ་ཆེ་བ།།གཅིག་ལ་གཅིག་ཟ་མེད་པར་མི་སྲིད་དོ།།ཁྱོད་ཀྱང་གནས་འདིར་ཡོང་བའི་བར་ལམ་ནས།།འབུམ་ཕྲག་དུ་མའི་ཚེ་སྲོག་བརླགས་པ་ལ།།འབ་འབུ་མ་བསད་ཞེས་པ་ཅི་ཞིག་ཡིན།།འཁོར་བ་སྡུག་ཀུན་ཡིན་པ་ངས་ཀྱང་ཤེས།།དེ་བས་རྒྱུ་འབྲས་ལས་འདས་རྫོགས་ཆེན་ཆོས།།ངེད་ཅག་དབེན་རིར་གནས་པའི་སྲོག་ཆགས་ལ།།མ་ནོར་ཇི་བཞིན་གསུང་ན་མི་ཆོག་གམ།།ཤིང་ཐོག་ཅི་དགོས་ཚོགས་འཁོར་བཤམས་ན་ཆོག།འཇིག་རྟེན་འཁྲུལ་སྣང་འཁོར་བའི་གྲོང་ཁྱེར་ན།།གཡོ་སྒྱུའི་མཁན་པོ་ཁྱེད་འདྲ་མཐོང་བའི་ཚེ།།དམ་ཆོས་ཟེར་བ་མཛུབ་མོ་གཙུགས་ས་ཞིག།མེད་ན་དབེན་པའི་རི་ལ་ཅི་ཕྱིར་འོང་།།ཨ་ཙི་མགོ་མཇུག་ནག་པོའི་བྱེའུ་ཁྱོད།།བྱ་བྱེད་མང་པའི་བྲེལ་དོའི་བྱ་ཚེ་ཟད།།དག་སྣང་མེད་པར་རྒྱུ་འབྲས་ཁྱད་བསད་ན།།རྫོགས་ཆེན་ལྟ་ཅི་ནང་པ་མ་ཡིན་ནོ།།དང་པོ་སྔོན་འགྲོའི་འབུམ་ལྔ་བསགས་སྦྱོང་གྱིས།།བར་དུ་ཕྱི་ནང་སྔོན་འགྲོའི་རུ་ཤན་གྱིས།།དེ་རྗེས་བླ་མ་སངས་རྒྱས་དངོས་མཐོང་ན།།ད་གཟོད་རྫོགས་པ་ཆེན་པོ་བཤད་ན་ཆོག།ཁ་ལ་གསེར་ཞག་ཆགས་པའི་མཁའ་འགྲོ་མ།།རྒྱབ་མདུན་སེར་ག྄ོས་གྱོན་པའི་གྲོགས་པོ་ཁྱོད།།རེ་ཞིག་བློ་ལྡོག་རྣམ་བཞི་ཡང་ཡང་གོམས།།དབེན་པ་བསྟེན་ཀྱང་དག་སྣང་མ་སྐྱེ་ན།།གྲོང་ནག་སྡིག་པའི་ཡུལ་དང་ཁྱད་པར་མེད།།ལེ་ལོ་སྡིག་སེམས་ངན་པ་ཡོང་དོར་ཏེ།།སྐྱབས་འགྲོ་སེམས་བསྐྱེད་རྣལ་མ་ཤིན་ཏུ་གལ།།

༄། ༧སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་ནས་འདི་ག་ཕ་རན་སི་ལས་རབ་གླིང་ཆོས་ཚོགས་སུ་དཔལ་སྤྲུལ་རིན་པོ་ཆེའི་ཐོག་མཐའ་བར་གསུམ་དགེ་བའི་གཏམ་གྱི་གསུང་བཤད་དང་འབྲེལ་སྙིང་ཐིག་ཐུགས་རྗེ་ཆེན་པོ་སྡུག་བསྔལ་རང་གྲོར་གྱི་བཀའ་དབང་བཅས་བཀའ་དྲིན་བསྩལ་གནང་མཛད། གསོལ་འདེབས་ཨུཏྤལ་དཀར་པོ།།ཨེ་མ་ཧོ།།ཕུལ་བྱུང་མཁྱེན་རབ་དམ་པ་སྨྲ་བའི་རྒྱལ།།འགྱུར་མེད་ཆོས་ཀྱི་སེངྒེའི་སྒྲ་ཆེན་སྒྲོག།སྒྱུ་འཕྲུལ་དྲྭ་བའི་ཐུགས་རྗེའི་ཁྱབ་བདག་རྗེ།།ཀུན་བཟང་འགྲོ་འདུལ་དམ་པས་བདག་སྐྱོངས་ཤིག།གསོལ་འདེབས་བུ་ལ་བྱིན་རླབས་མྱུར་དུ་སྩོལ།། སྐྱེ་དང་ཚེ་རབས་ཀུན་ཏུ་ཐུགས་རྗེས་བཟུངས།།སྙིང་ཐིག་གདམས་པས་ས་ལམ་ཡོན་ཏན་རྒྱས།།མཐར་ཐུག་ཆོས་དབྱིངས་དགོངས་པར་མཉམ་རྫོགས་ཤོག། ཅེས་པའང་གང་དྲན་དུ་སྙིང་ནས་གསོལ་འདེབས་སུ་རིག་འཛིན་དཔལ་དགྱེས་པ་རྡོ་རྗེས་སོ།། །།