མཚམས་སུ་ཆས་པའི་ལམ་ཀ་ནས་བྱེའུ་དང་བགྲོ་གླེང་།།ཀྭ་ཀྭ། ཨེ་མ་ཧོ།།བྱེའུ་ཆུང་སེར་པོས་ཆོས་ཤིག་གསུངས་དང་གསུང་།།ཆོས་ནི་ཅི་བཤད་འབ་འབུ་མ་བསད་དང་།།འཚེ་བ་མེད་པར་ཆོས་ཀྱི་རྩ་བ་ཡིན།།སྐྱབས་སུ་འགྲོ་བ་ནང་པའི་འཇུག་སྒོ་ལགས།།དེ་སྐད་བཤད་པས་བྱེའུ་ཆུང་གད་མོ་བཅས།།སྐྲ་རིང་ཨོག་ཚོམ་མཛེས་པའི་རྣལ་འབྱོར་ཁྱོད།།གང་ནས་འོང་ཡིན་གང་དུ་འགྲོ་བར་ལགས།།ནགས་ཀློང་འདི་ན་སྲོག་ཆགས་དུང་ཕྱུར་ནི།།བརྒྱད་བརྒྱ་གྱ་བཅུ་གྱ་བརྒྱད་ཕལ་ཆེ་བ།།གཅིག་ལ་གཅིག་ཟ་མེད་པར་མི་སྲིད་དོ།།ཁྱོད་ཀྱང་གནས་འདིར་ཡོང་བའི་བར་ལམ་ནས།།འབུམ་ཕྲག་དུ་མའི་ཚེ་སྲོག་བརླགས་པ་ལ།།འབ་འབུ་མ་བསད་ཞེས་པ་ཅི་ཞིག་ཡིན།།འཁོར་བ་སྡུག་ཀུན་ཡིན་པ་ངས་ཀྱང་ཤེས།།དེ་བས་རྒྱུ་འབྲས་ལས་འདས་རྫོགས་ཆེན་ཆོས།།ངེད་ཅག་དབེན་རིར་གནས་པའི་སྲོག་ཆགས་ལ།།མ་ནོར་ཇི་བཞིན་གསུང་ན་མི་ཆོག་གམ།།ཤིང་ཐོག་ཅི་དགོས་ཚོགས་འཁོར་བཤམས་ན་ཆོག།འཇིག་རྟེན་འཁྲུལ་སྣང་འཁོར་བའི་གྲོང་ཁྱེར་ན།།གཡོ་སྒྱུའི་མཁན་པོ་ཁྱེད་འདྲ་མཐོང་བའི་ཚེ།།དམ་ཆོས་ཟེར་བ་མཛུབ་མོ་གཙུགས་ས་ཞིག།མེད་ན་དབེན་པའི་རི་ལ་ཅི་ཕྱིར་འོང་།།ཨ་ཙི་མགོ་མཇུག་ནག་པོའི་བྱེའུ་ཁྱོད།།བྱ་བྱེད་མང་པའི་བྲེལ་དོའི་བྱ་ཚེ་ཟད།།དག་སྣང་མེད་པར་རྒྱུ་འབྲས་ཁྱད་བསད་ན།།རྫོགས་ཆེན་ལྟ་ཅི་ནང་པ་མ་ཡིན་ནོ།།དང་པོ་སྔོན་འགྲོའི་འབུམ་ལྔ་བསགས་སྦྱོང་གྱིས།།བར་དུ་ཕྱི་ནང་སྔོན་འགྲོའི་རུ་ཤན་གྱིས།།དེ་རྗེས་བླ་མ་སངས་རྒྱས་དངོས་མཐོང་ན།།ད་གཟོད་རྫོགས་པ་ཆེན་པོ་བཤད་ན་ཆོག།ཁ་ལ་གསེར་ཞག་ཆགས་པའི་མཁའ་འགྲོ་མ།།རྒྱབ་མདུན་སེར་ག྄ོས་གྱོན་པའི་གྲོགས་པོ་ཁྱོད།།རེ་ཞིག་བློ་ལྡོག་རྣམ་བཞི་ཡང་ཡང་གོམས།།དབེན་པ་བསྟེན་ཀྱང་དག་སྣང་མ་སྐྱེ་ན།།གྲོང་ནག་སྡིག་པའི་ཡུལ་དང་ཁྱད་པར་མེད།།ལེ་ལོ་སྡིག་སེམས་ངན་པ་ཡོང་དོར་ཏེ།།སྐྱབས་འགྲོ་སེམས་བསྐྱེད་རྣལ་མ་ཤིན་ཏུ་གལ།།

༄། ༧སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་ནས་འདི་ག་ཕ་རན་སི་ལས་རབ་གླིང་ཆོས་ཚོགས་སུ་དཔལ་སྤྲུལ་རིན་པོ་ཆེའི་ཐོག་མཐའ་བར་གསུམ་དགེ་བའི་གཏམ་གྱི་གསུང་བཤད་དང་འབྲེལ་སྙིང་ཐིག་ཐུགས་རྗེ་ཆེན་པོ་སྡུག་བསྔལ་རང་གྲོར་གྱི་བཀའ་དབང་བཅས་བཀའ་དྲིན་བསྩལ་གནང་མཛད། གསོལ་འདེབས་ཨུཏྤལ་དཀར་པོ།།ཨེ་མ་ཧོ།།ཕུལ་བྱུང་མཁྱེན་རབ་དམ་པ་སྨྲ་བའི་རྒྱལ།།འགྱུར་མེད་ཆོས་ཀྱི་སེངྒེའི་སྒྲ་ཆེན་སྒྲོག།སྒྱུ་འཕྲུལ་དྲྭ་བའི་ཐུགས་རྗེའི་ཁྱབ་བདག་རྗེ།།ཀུན་བཟང་འགྲོ་འདུལ་དམ་པས་བདག་སྐྱོངས་ཤིག།གསོལ་འདེབས་བུ་ལ་བྱིན་རླབས་མྱུར་དུ་སྩོལ།། སྐྱེ་དང་ཚེ་རབས་ཀུན་ཏུ་ཐུགས་རྗེས་བཟུངས།།སྙིང་ཐིག་གདམས་པས་ས་ལམ་ཡོན་ཏན་རྒྱས།།མཐར་ཐུག་ཆོས་དབྱིངས་དགོངས་པར་མཉམ་རྫོགས་ཤོག། ཅེས་པའང་གང་དྲན་དུ་སྙིང་ནས་གསོལ་འདེབས་སུ་རིག་འཛིན་དཔལ་དགྱེས་པ་རྡོ་རྗེས་སོ།། །།

གསོལ་འདེབས་ཨུཏྤལ་དཀར་པོ།།ཨེ་མ་ཧོ།།ཕུལ་བྱུང་མཁྱེན་རབ་དམ་པ་སྨྲ་བའི་རྒྱལ།།འགྱུར་མེད་ཆོས་ཀྱི་སེངྒེའི་སྒྲ་ཆེན་སྒྲོག།སྒྱུ་འཕྲུལ་དྲྭ་བའི་ཐུགས་རྗེའི་ཁྱབ་བདག་རྗེ།།ཀུན་བཟང་འགྲོ་འདུལ་དམ་པས་བདག་སྐྱོངས་ཤིག།གསོལ་འདེབས་བུ་ལ་བྱིན་རླབས་མྱུར་ཏུ་སྩོལ།། སྐྱེ་དང་ཚེ་རབས་ཀུན་ཏུ་ཐུགས་རྗེས་བཟུང་།།སྙིང་ཐིག་གདམས་པས་ས་ལམ་ཡོན་ཏན་རྒྱས།།མཐར་ཐུག་ཆོས་དབྱིངས་དགོངས་པར་མཉམ་རྫོགས་ཤོག། ཅེས་པའང་གང་དྲན་དུ་སྙིང་ནས་གསོལ་འདེབས་སུ་རིག་འཛིན་དཔལ་དགྱེས་པ་རྡོ་རྗེས་སོ།། །།

༧མཁན་ཆེན་ཤེས་རབ་བཟང་པོའི་ཞབས་བརྟན་མ་ཎི་ཀ།ཨོཾ་སྭ་སྟི།།ཤེས༵་རབ༵་ཆེན་པོས་མདོ་སྔགས་བསྟན་པ་འཛིན།།བཟང༵་པོ༵་སྤྱོད་པས་དགེ་བའི་ལམ་བཟང་སྐྱོང་།།མཁྱེན་བརྩེ་ནུས་མཐུས་བཤད་སྒྲུབ་ཚུལ་བཞིན་སྤེལ།།མཁན་ཆེན་དམ་པའི་བཞེད་དོན་ལྷུན་གྲུབ་ཤོག།ཅེས་པ་འང་ཨ་ཤེར་དོན་གྲུབ་ངོར་ཨེ་མ་ཧོས་ཝ་ཡེལ་སིའི་ཨེ་ཝཾ་རི་ཁྲོད་ནས་གུས་ཕུལ།།སྤྱི་ལོ་༢༠༡༩/༨/༡༤་ལ།།

གཟིམས་འཇམ་གནང་།།ཨེ་མ་ཧོ།།བླ་མ་ཡི་དམ་མཁའ་འགྲོ་རབ་ཏུ་གསལ།།གཟུངས་སྔགས་བསྙེན་པ་ངག་ཡིད་བཟླས་པ་ཟབ།།བསྐྱེད་རྫོགས་རྫོགས་ཆེན་སྒོམ་པའི་རྨི་ལམ་བཟང་།།གསང་གསུམ་གཟིམ་འཇམ་བདེའོ་སྙིང་གྲོགས་རྣམས།།ཉིན་ཉལ་མཚན་ཉལ་གྱི་ཨེ་མ་ཧོས་གུས་པས་ཕུལ།།