བློ་སྦྱོང་ཚིག་རྐང་བརྒྱད་མ་བཞུགས་སོ།།རྗེ་གླང་རི་ཐང་པ།—— བདག་ནི་སེམས་ཅན་ཐམས་ཅད་ལ། །ཡིད་བཞིན་ནོར་བུ་ལས་ལྷག་པའི། །དོན་མཆོག་སྒྲུབ་པའི་བསམ་པ་ཡིས། །རྟག་ཏུ་གཅེས་པར་འཛིན་པར་ཤོག ། གང་དུ་སུ་དང་འགྲོགས་པའི་ཚེ། །བདག་ཉིད་ཀུན་ལས་དམན་ལྟ་ཞིང་། །གཞན་ལ་བསམ་པ་ཐག་པ་ཡིས། །གཞན་ཉིད་གཅེས་པར་འཛིན་པར་ཤོག ། སྤྱོད་ལམ་ཀུན་ཏུ་རང་རྒྱུད་ལ། །རྟོག་ཅིང་ཉོན་མོངས་སྐྱེས་མ་ཐག ། བདག་གཞན་མ་རུངས་བྱེད་པས་ན། །བཙན་ཐབས་གདོང་ནས་བཟློག་པར་ཤོག ། རང་བཞིན་ངན་པའི་སེམས་ཅན་རྣམས། །སྡིག་སྡུག་དྲག་པོས་ནོན་མཐོང་ཚེ། །རིན་ཆེན་གཏེར་དང་འཕྲད་པ་ལྟར། །རྙེད་པར་དཀའ་བས་གཅེས་འཛིན་ཤོག ། བདག་ལ་གཞན་གྱིས་ཕྲག་དོག་གིས། ། གཤེ་སྐུར་ལ་སོགས་མི་རིགས་པའི། །གྱོང་ཁ་རང་གིས་ལེན་པ་དང་། །རྒྱལ་ཁ་གཞན་ལ་འབུལ་བར་ཤོག ། གང་ལ་བདག་གིས་ཕན་བཏགས་པའམ། །རེ་བ་ཆེ་བ་འགའ་ཞིག་གིས། །ཤིན་ཏུ་མི་རིགས་གནོད་བྱེད་ནའང་། །བཤེས་གཉེན་དམ་པར་བལྟ་བར་ཤོག ། མདོར་ན་དངོས་སམ་བརྒྱུད་པ་ཡིས ། །ཕན་བདེ་མ་རྣམས་ཀུན་ལ་འབུལ། །མ་ཡི་གནོད་དང་སྡུག་བསྔལ་ཀུན། །གསང་བས་བདག་ལ་ལེན་པར་ཤོག ། དེ་དག་ཀུན་ཀྱང་ཆོས་བརྒྱད་ཀྱི།།རྟོག་པའི་དྲི་མས་མ་སྦགས་ཤིང་། །ཆོས་ཀུན་སྒྱུ་མར་ཤེས་པའི་བློས། །ཞེན་པའི་འཆིང་བ་ལས་གྲོལ་ཤོག…

པར་རྙིང་ཞིག་ལས་རྙིང་མའི་དགོན་ཆེན་དྲུག་གི་ལོ་རྒྱུས་ལ་འཇལ་བ།གྲྭ་ཕྱི་ཨོ་རྒྱན་སྨིན་གྲོལ་གླིང་།གྲྭ་ཕྱི་ཨོ་རྒྱན་སྨིན་གྲོལ་གླིང་ནི། རབ་བྱུང་བཅུ་གཅིག་པའི་མེ་འབྲུག ཕྱི་ལོ་ ༡༦༧༦ ལོར་བཏབ། མཁས་བཙུན་བཟང་གསུམ་གྱི་ཡོན་ཏན་…. བུས་རྒྱུད་ཡོངས་སུ་ཕྱུག་པའི་དགེ་འདུན་གྲངས་མང་དུ་འཕེལ་ཞིང་། གསང་སྔགས་ཕྲིན་སྒྲུབ་ཀྱི་ཕྱག་བཞེས་ཕྱོགས་ཀྱི་…། དགོན་མ་ལག་ཆེས་གྲངས་མང་བས་བོད་ལྗོངས་ཀུན་ཏུ་ཁྱབ་པར་གྱུར། སྔ་འགྱུར་གཉོས་ཀྱི་གདུང་བརྒྱུད་….. རབ་རིམ་བྱོན་བཅས་ཀྱིས་ཡོངས་སུ་འཛིན་པར་མཛད་དོ། ། ཐུབ་བསྟན་རྡོ་རྗེ་བྲགཐུབ་བསྟན་རྡོ་རྗེ་བྲག་ནི། རིག་འཛིན་ངག་གི་དབང་པོས་རབ་བྱུང་བཅུ་གཅིག་པའི་ས་སྤྲེལ་ ཕྱི་ལོ་ ༡༦༥༩༼༡༦༦༧༽ལ་བཏབ། བཤད་སྒྲུབ་ཀྱི་ཕྲིན་ལས་དབྱར་མཚོ་ལྟར་རྒྱས་པས་སྔ་འགྱུར་བསྟན་པའི་འབྱུང་ངོགས་དམ་པར་གྱུར་ཏེ། བོད་ཡུལ་སྟོད་སྨན་ཀུན་ཏུ་ཆོས་རྒྱུད་དང་། ཕྲིན་ལས་ཀྱིས་ཡོངས་སུ་ཁྱབ་པར་གྱུར་ཏོ། །ཞེ་ཆེན་བསྟན་གཉིས་དར་རྒྱས་གླིང་།ཞེ་ཆེན་བསྟན་གཉིས་དར་རྒྱས་གླིང་ནི། རབ་འབྱམས་འགྱུར་མེད་ཀུན་བཟང་རྣམ་རྒྱལ་གྱིས། རབ་བྱུང་བཅུ་གཅིག་པའི་ཤིང་སྟག ཕྱི་ལོ་ ༡༦༧༤ ལ་བཏབ། འོག་མིན་གཉིས་པ་ཨྱོན་སྨིན་གྲོལ་གླིང་གི་ཕྱག་བཞེས་འཕྱུག་མེད་དུ་སྐྱོང་ཞིང་། དམ་པའི་སྐྱེས་བུ་མང་པོའི་བསྟི་གནས་སུ་གྱུར་ཏེ། བཤད་སྒྲུབ་ལས་གསུམ་གྱི་སྒོ་ནས་བསྟན་པ་རིན་པོ་ཆེ་ཆེས་ཆེར་གསལ་བར་མཛད་དོ། ། རྫོགས་ཆེན་རུ་དམ་བསམ་གཏན་ཆོས་གླིང་གླིང་།རྫོགས་ཆེན་རུ་དམ་བསམ་གཏན་ཆོས་གླིང་གླིང་ནི། གྲུབ་དབང་པདྨ་རིག་འཛིན་གྱིས། རབ་བྱུང་བཅུ་གཅིག་པའི་ཤིང་གླང་། ཕྱི་ལོ་ ༡༥༨༥༼༡༦༨༥༽ ལ་བཏབ། སྡོམ་པ་གསུམ་གྱི་གནང་བཀག་གི་མཚམས་ལས་མི་འདའ་ཞིང་། མཁས་ཚུལ་དགུ་ལ་དབང་འབྱོར་བ་དང་། རིམ་གཉིས་ཀྱི་གདེང་ཚད་དང་ལྡན་པའི་སྤྲུལ་སྤྲུལ་སྐུ་རིམ་བྱོན་རྒྱུ་སྐར་ཕྲེང་བ་ལྟ་བུ་དང་། དགེ་འདུན་པ་མང་པོའི་བསྟི་གནས་སུ་གྱུར་ཅིང་། མདོ་ཁམས་སྟོད་སྨན་ཀུན་ཏུ་ཆོས་བརྒྱུད་ཀྱི་ཕྲིན་ལས་ཤིན་ཏུ་དར་རྒྱས་གྱུར་ཏོ།…

ཡུམ་ཆེན་ཕག་མོ་འཚོ་ཉིད་བདེ་བར་སྨོན།།ཨོཾ་ཨ་མི་དྷཱེ་ཝ་ཧྲཱིཿཆོས་སྐུ་སྣང་བ་མཐའ་ཡས་རྡོ་རྗེ་ཆོས།།སྤྱན་རས་གཟིགས་དབང་ཕྱག་ན་རྡོ་རྗེ་ལ།།གསོལ་བ་འདེབས་སོ་ཐུགས་རྗེ་ཤུགས་བྱུང་ནས།།མ་ལུས་འགྲོ་རྣམས་ཕན་བདེའི་བྱིན་རླབས་སྩོལ།།ཁྱད་པར་སྙིང་བརྩེའི་ཡུམ་ཆེན་ཕག་མོ་འཚོ།།ཕྱི་ནང་རྐྱེན་ངན་གཞན་དབང་མི་འགྲོ་བར།།གནད་གཅོད་སྡུག་བསྔལ་མིང་ཡང་མི་གྲགས་པའི།།བདེ་ལྡན་དགོངས་པའི་བཞེད་དོན་ལྷུན་གྲུབ་ཤོག།གནས་སྐབས་ཞིང་གཞན་ཕེབས་མོས་དབེན་པའི་ཚེ།།ཚེ་རིང་ནད་ཞི་གཅེས་ཕྲུག་རིན་ཆེན་དང་།།འཇིག་རྟེན་བདེ་བའི་དཔལ་ལ་སྤྱོད་པར་ཤོག།དཀོན་མཆོག་རྩ་གསུམ་རྒྱ་མཚོའི་བྱིན་རླབས་དང་།།རྟེན་འབྲེལ་བསླུ་བ་མེད་པའི་བདེན་མཐུ་དང་།།བདག་གིས་ལྷག་བསམ་དག་པས་བསྔོ་སྨོན་འདིས།།འདི་བདེ་ཕྱི་སྐྱིད་དགེ་བས་རྟག་འབྱོར་ཤོག།ཅེས་པ་རབ་གནས་ས་ཕག་ཁྲུམས་ཟླའི་དབང་ཕྱོགས་བཟང་པོ་དང་པོ་ལ་སྙིང་རྗེའི་བདག་ཉིད་དམ་པའི་གྲོགས་ཀྱིས་སྐུལ་བའི་རྐྱེན་དང་འཕོ་བ་དང་ཐར་མདོ་བཟང་སྤྱོད་འདོན་པའི་ཚོར་སྣང་བཅས་དབྱིན་ཡུལ་ཨེ་ཝཾ་བུདྡྷ་ཛྙཱ་ནའི་ཆོས་གླིང་ནསཨེ་མ་ཧོས་གསོལ་བ་འདེབས་པར་དེ་དེ་བཞིན་དུ་འགྲུབ་པར་གྱུར་ཅིག་གུ།།

ཨེ་མ་ཧོ་ལྷ་རྒྱལ་ལོ།།ན་མོ་གུ་རུ་དེ་ཝ་ཡེ།།མགོན་པདྨའི་རྒྱལ་ཚབ་ཨེ་མ་ཧོ།།ཆོས་རྫོགས་པ་ཆེན་པོའི་བསྟན་པ་སྤེལ།།ལས་རྟེན་འབྲེལ་ཕུན་སུམ་ཚོགས་ལ།།ལྷ་བླ་མས་ཀུན་ནས་བཀྲ་ཤིས་སྩོལ།།དཔལ་རབ་བྱུང་དགེ་ལེགས་ཡར་འཕེལ་ལ།།དགྱེས་བྱང་སེམས་ཕྱིན་དྲུག་སྤྱོད་པ་མཛད།།ཞིང་རྡོ་རྗེ་ཐེག་པའི་དེད་དཔོན་ལ།།ལུང་རྟོགས་པའི་ཉི་ཟླའི་སྣང་བ་གསལ།།དགྲ་ནག་པོའི་མི་ཚུགས་རང་དབང་ཅན།།གཉེན་ངན་པས་མི་གནོད་རྒྱང་ཐག་རིང་།།བདུད་བགེགས་རིགས་འཇོམས་པའི་དཔའ་བོ་ངས།།ཕྱོགས་ཀུན་ལས་རྒྱལ་བའི་རྒྱལ་རྔ་བརྡུང་།།ཡབ་འབུམ་པ་ཞལ་ལུས་གཡས་ནས་རྔམས།།ཡུམ་དར་བཟའ་དཔའ་མོས་མདུན་ནས་བསུས།།དཔའ་ཆོས་སྐྱོང་སྲུང་མ་སྤྲིན་ལྟར་གཏམས།།བུ་དམ་ཚིག་རྩེ་རྒྱལ་འཛུམ་མདངས་རྒྱས།།ཨེ་ཨ་ཏི་མི་བུ་ལྷ་རྒྱལ་ལོ།།མ་འགྲོ་དྲུག་ཆོས་ལ་བསྒྱུར་བ་པོས།།ཧོ་མཉྫུ་གོང་མའི་གདན་ས་ནས།།དཔལ་དུས་བཟང་འཁོར་ལོ་ངང་གིས་བསྐོར།།ཅ་ཡུ་ནག་ཁྲག་དར་ཐུར་ཏུ་གཡུགས།།སྔགས་གོས་དཀར་ཆོས་དར་གྱེན་དུ་བསྒྲིངས།།སེ་ཁྱུང་སྲས་སྟངས་མ་དགུང་དང་མཉམས།།ཕྱོགས་ཀུན་ལ་བཀྲ་ཤིས་བདེ་ལེགས་སྨིན།།ཞེས་རབ་གནས་ས་ཕག་སྣྲོན་ཟླའི་ཚེས་བཅུ་ལ་ཉམས་འུར་དཔའ་བོ་གད་རྒྱང་དུ་ཤྲཱིས་རྟེན་འབྲེལ་དགེ་བའི་བརྡ་རྟགས་སུ་ཨེ་ཝཾ་བུདྡྷ་ཛྙཱ་ནའི་ཆོས་གླིང་གི་སྐྱེད་ཚལ་ནས་བགྱིས་པར་དགེའོ།། །།

འཆི་གསོན་བདེ་བའི་མགུར་དབྱངས།།ཨེ་མ་ཧོ།།༼༡༽མི་སྐྱེས་པའི་སྙིང་པོ་དམ་ཆོས་གོ།རྒྱུ་ཡོད་པའི་དོན་སྒོ་ཟས་གོས་མྱོང་།།ཡུལ་སྐྱིད་པའི་རང་དབང་ཇི་བཞིན་རྟོགས།།ད་འཆི་གསོན་ཅི་བྱུང་དགའ་ཡ་ལེ།།༼༢༽གནས་དག་པ་རང་བྱུང་སྨན་སྣས་གང་།།གྲོགས་བཟང་པོ་བྱས་ཤེས་དྲིན་བཟོ་མང་།།ཞིང་གསང་བ་རྒྱལ་ཡོངས་རང་དབང་ཆེ།།དུས་ཀུན་ཏུ་འབྱུང་ཁམས་སྤྲོ་སངས་སེ།།༼༣༽དྲི་ཞིམ་པས་མཁའ་རླུང་འཇམ་ཤར་རེ།།གླུ་མགུར་མའི་སྒྲ་དབྱངས་སྙན་ལྷང་ངེ་།།ཟས་གྲོ་བའི་རྩི་བཅུད་སྨན་ལྷན་ནེ།།ལས་རྟེན་འབྲེལ་སྨོན་ལམ་གསལ་ལྷམ་མེ།།ཞེས་པ་རབ་གནས་ས་ཕག་ཟླ་ཚེས་དགེ་བར་དབྱིན་ཡུལ་ཨེ་ཝཾ་སྦྲང་རྩིའི་ཟས་ཁང་ནས་ཤྲཱིཿསྨྱོན་པས་ཨ་མ་འདས་པའི་སྡུག་ཁུར་པོ་འོག་ནས་སྐྱིད་གླུ་ཐུང་ཐུང་རུ་བླངས་པར་དགེའོ།། །།

༄༅།།ཤེས་བྱ་༧ཀུན་གཟིགས་ཞྭ་དམར་རིན་པོ་ཆེའི་ཡང་སྲིད་རིན་པོ་ཆེའི་སྐོར།།ཨེ་མ་ཧོ།།ཤེས་བྱ་ཀུན་གཟིགས་ཀུན་མཁྱེན་ཞྭ་དམར་པ།།གཟུགས་སྐུའི་བཀོད་པ་བདེ་ཆེན་ཞིང་ཕེབས་ཀྱང་།།ཐུགས་བརྩེ་མི་འགྱུར་དུང་ཟླ་དཀར་པོའི་གཤིས།།གངས་དཀར་ཤར་རིའི་རྩེ་ནས་སླར་ཡང་འཆར།།བཀའ་བརྒྱུད་བསྟན་པ་ཕྱག་རྒྱ་ཆེན་པོའི་གར།།སྒྲུབ་བརྒྱུད་གོང་མའི་གཞི་ལམ་འབྲས་བུའི་ཆོས།།ཚུལ་བཞིན་ཉམས་བཞེས་མཛད་མཁས་ཞྭ་དམར་པ།།འཛམ་གླིང་འཛིན་མའི་རྒྱན་ཏུ་སླར་ཡང་བྱོན།།ཨེ་ཝྃ་མཁའ་ཀློང་ཡངས་པའི་དཀྱིལ་འཁོར་ནས།།པདྨ་ཟླ་བས་རབ་མཛེས་རྒྱལ་བུའི་སྲས།།སྐལ་བཟང་དམ་གཙང་མགོན་དུ་ཕེབས་ངེས་གསུངས།།ཞེས་པ་རབ་རྒྱན་ཤིང་རྟའི་ཟླ་ཚེས་དགེ་བར་ཆོས་དང་དཔལ་འབྱོར་གང་གི་ཆ་ནས་འབྲེལ་འདྲིས་མེད་ཀྱང་རྨི་ལམ་བཟང་པོའི་བསྐུལ་མ་དང་ཆོས་མཆེད་ཞིག་གིས་ངོར་རིག་འཛིན་ཨེ་མ་ཧོ་འམ་རྨི་ལམ་དབང་ཕྱུག་གིས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་ནས་བྲིས་པར་དགེའོ།། །།