སྟོན་པ་བཀའ་དྲིན་ཅན་ལ་ཕྱག་འཚལ་ལོ། ། འདི་ལྟར་ཏེ། ངོ་མཚར་ཆེ་བའི་འཇིག་རྟེན་གྱི་ཡུལ་གྲུ་ཞིག་ཁྱབ་ནས་འདིའི་ནང་འཚོ་གནས་བྱས་པའི་ང་ཚོ་ཚང་མ་ངེས་པར་དུ་འགྲུལ་བཞུད་དགོས་པའི་གཅིག་མཚུངས་ཀྱི་ལམ་ཁ་དེ་ཚེ་ཕྱི་མ་ཡིན་ལ། ལམ་དེ་མེད་པའི་མི་སུ་ཡང་མེད་པ། ལམ་དེ་ལ་མ་བསམ་བཞིན་དུ་འགྲོ་དགོས་པ། ལམ་དེ་ཉིད་ལ་འགྲོ་ཚེ་གཞན་གྱིས་ཆ་ངག་ཅི་ཡང་མེད་པ། ལམ་དེ་ལ་འཇིག་ནའང་རང་དབང་མེད་པ་མདུན་དུ་གྲུབ་འོང་པ་ཞིག་ལས་ཀྱིས་བཀོད་སྒྲིག་སྔ་ནས་བཟོ་ཚར་བ་ཡིན་སྟབས། དགེ་སྡིག་གི་ལམ་རྒྱགས་ཤིག་ཁུར་ནས་འཇིག་རྟེན་ཕ་རོལ་ན་བགྲོད་ཚེ། རྒྱ་ཆེ་བའི་བདེ་སྡུག་གི་ཁྱིམ་གཞིས་གང་རུང་ནང་དུ་རེ་བ་བསྡད་དེ། ལ་ལས་སྤྲོ་བ་མྱོང་། ལ་ལས་སྡུག་བསྔལ་མྱོང་བ་སོགས་བསམ་ན། སྐྱེ་བ་ད་རེས་ལུས་སེམས་འདིའི་སྟེང་ཚེ་ཕྱི་མའི་གྲོ་ཁ་བཟང་པོ་ཁུར་རྒྱུ་ཞིག་བསྒྲུབ་ཐུབ་ན་ངོ་མ་དགའ་འོས་པ་དེ་ལས་གཞན་གང་ཡང་མེད་པས། དེའི་ཕྱིར་ཁྱེད་ཀྱིས་ཉིན་མཚན་མི་དལ་གྱི་སྒོ་ནས་ལས་ཀ་ཆེ་ཆུང་སྒྲུབ་པའི་ཁྲོད། ཚེ་ཕྱི་མའི་བརྒྱགས་ཕྱེ་ལ་བསམ་གཞིགས་ཅི་ཙམ་བྱས་ཡོད་པ་ཡིན་ནམ། གལ་ཏེ་སང་ཉིན་འཆི་འགྲོ་ན་ཁྱེད་རང་གང་དུ་སྐྱེ་བ་ལེན་པ་ལ་བསམ་བློ་ག་ཚོད་བྱས་ཡོད་དམ་ལགས། ཁྱེད་རང་གིས་སྒྲུབ་པའི་དེ་རིང་གི་བྱ་བ་འདིས་ཚེ་ཕྱི་མ་ལ་ཕན་ཐོགས་ཅི་ཙམ་ཡོང་བ་ལ་བསམ་བློ་ག་ཚོད་བྱས་ཡོད་དམ། གང་ལྟར་སྤྱིར་ན་མི་རྣམས་ལ་མཁོ་དགོས་ཆེ་ཤོས་ནི་དཔལ་འབྱོར་དང་ཤོག་སྒོར་ཡིན་ལ། འདི་དག་གི་དོན་དུ་རང་སྲོག་ཀྱང་ཡ་ང་བག་ཚ་ཅི་ཡང་མེད་ན་དེ་མིན་བྱ་བ་སྡུག་མོ་དང་འབྲེལ་ནས་འབྱོར་ལྡན་བྱེད་པ་ནི་བཤད་ཅི་ཡང་མི་དགོས་པ་ཞིག ལྷག་པར་དུ་ཤེས་བཞིན་དུ་སྡིག་པ་ཁྱད་གསོད་བྱེད་ནས་གཡོ་རྫུན་གྱི་ཁུར་པོ་ཆེན་མོ་སྒྲུབ། ཅུང་ཙམ་བསགས་པའི་རྒྱུ་ནོར་དེའང་། ཡར་དཀོན་མཆོག་གསུམ་དང་མར་སྤྲང་པོ་ཡོངས་ལ་མཆོད་སྦྱིན་ཅི་ཡང་མེད་པ་མ་ཟད། སེར་སྣའི་མདུད་པས་བཅིངས་ནས་སྒོམ་ཆུང་ཕྲ་མོ་ནང་དུ་ཉར་ཚགས་འོག ཤི་མིག་གསོན་བལྟས་བྱེད་ཞོར་ཡི་དྭགས་ཀྱི་འཇིག་རྟེན་ནང་སྐྱེ། བཀྲེས་སྐོམ་གྱི་སྡུག་བསྔལ་བསམ་གྱིས་མི་ཁྱབ་པ་མྱོང་ངེས་པའི་ལས་ཀ་འདི་འདྲ་ནམ་ཡང་མི་བརྩོན་པ། ལག་ཏུ་ཡོད་པའི་སྒོར་མོ་མང་ཉུང་ཇི་འདྲ་ཡོད་ན་ཡང་། གཙང་མ་གཙང་རྐྱང་། དྭངས་གཙང་གི་ཆུ་བོ་བཞིན། ཡར་མཆོད་མར་སྦྱིན་བྱས་ནས་དགེ་བ་ཕྲན་བུ་ཙམ་བསྒྲུབ་དོ་བའི་རེ་བ་ལགས། དེ་བཞིན་དུ་འཚོ་བའི་ཁྲོད་ནམ་རྒྱུན་བཟའ་བཏུང་ཞིམ་པོ་རོལ་ནས། བདེ་སྐྱིད་ཀྱི་དགོད་སྒྲ་ཕན་ཚུན་ངོམ་ཞིང་། ཅུང་ཙམ་དགའ་སྟོན་དང་དུས་ཆེན་ཉིན། ཉམ་ཆུང་དུད་འགྲོའི་སྲོག་བཅད་པ་ལས་བྱུང་བའི་དམར་ཟས་མང་པོ་མདུན་དུ་སྒྲིག་ནས། ད་དུང་ཤ་འདི་མེད་ན་འཚོ་ཐབས་བྲལ་བའི་མི་སྙན་པའི་གྲོས་མོལ་སོགས་མ་གཏོགས། མ་འོངས་པའི་རྣམ་སྨིན་དང་། ཚེ་ཕྱི་མའི་འཇིག་རྟེན་ཟེར་བའི་བསམ་བློ་དེ་རྒྱང་དུ་གྱེས་ནས། ད་ལྟའི་གནས་བབས་ཙམ་ལ་དམིགས་ཏེ་ཤ་ཁྲག་ལོངས་སུ་སྤྱོད་ན་ཡང་། ཁ་ནས་མ་ཎི་དང་ཁོག་ནས་སྙིང་རྗེ་ཅུང་ཙམ་ཞིག་མ་ཐོན་ན་གླེན་ལྐུག་ཞིག་དང་ཅིས་མི་མཚུངས། ལྷག་པར་དུ་གསོད་པའི་ཚེ་དུད་འགྲོ་ཉིད་ལ་ན་ཟུག་དྲག་པོ་ཡོད་པ་དག་དྲན་བཞིན་དུ་བསྔོ་སྨོན་སོགས་བྱ་མ་ཐུབ་ན། རང་གཞན་གྱི་ཚེ་ཕྱི་མ་དེ་ཐག་རིང་པོ་གང་ཡང་མ་ཡིན་པས་འཆི་བདག་གཤིན་རྗེ་མཇལ་བའི་དུས་སུ་ཨ་ཁ་ཁ་ཟེར་དགོས་པའི་ཚེ།…

སེངྒྷ་གླིང་གི་རྒྱལ་སྟོན་བསུ།།ཨེ་མ་ཧོ།།དཀའ་སྤྱོད་སྙིང་རུས་ནུས་ཐུབ་པའི་དཔའ་སྟོབས་གཅིག།མཐུན་ལམ་སྤྱི་ཕན་སྒྲུབ་པའི་ལྷག་བསམ་གཉིས།།རྒྱལ་དོན་ཕྱི་ནང་གཙང་མའི་ཆིག་སྒྲིལ་གསུམ།།བཟང་གསུམ་ལྡན་པའི་རྒྱལ་ཁྱབ་རྒྱལ་གྱུར་ཅིག།ཤྲཱིཿཨེ་མ་ཧོས

༧སྐྱབས་རྗེ་དམ་པ་༧གྲུབ་དབང་པདྨ་ནོར་བུའི་ཕྱག་རྒྱས་བཀའ་དྲིན་སྐྱོང་བའི་སྔ་འགྱུར་འཕགས་ཡུལ་རྣམ་གྲོལ་གླིང་ནི་འཕགས་ཡུལ་ནས་དཔལ་ཡུལ་བ་ཚོས་སྔ་འགྱུར་རྣམ་དག་ཏུ་རྒྱུན་འཛིན་སྐྱོང་སྤེལ་དགོས་པར་ཤིན་ཏུ་གལ་ཆེའོ།། ༧སྐྱབས་རྗེ་དམ་པ་གྲུབ་དབང་བླ་མ་བཀའ་དྲིན་ཅན་ཁྱེད་ཉིད་ཤིན་ཏུ་དྲན། སྔ་འགྱུར་པ་ལ་ཆོས་རྗེ་དམ་པ་ཡིད་བཞིན་ནོར་བུ་དང་ཁྱེད་ཀྱི་དྲིན་ནི་ནམ་ཡང་བརྗེད་ཐབས་བྲལ། ཤར་ནུབ་ཀྱི་ཉི་ཟླ་རྣམ་གཉིས། ཁྱེད་རྣམ་གཉིས་ནི་སྔ་འགྱུར་པའི་མིག་གཡས་གཡོན་བཞིན་དུའོ། I miss you very much!ཕྱོགས་དུས་རྒྱལ་བའི་སྐུ་གསུང་ཐུགས་རྡོ་རྗེ། །རིགས་གསུམ་སེམས་དཔའི་སྒྱུ་འཕྲུལ་རོལ་མོ་ཡིས། །གངས་ཅན་ཕན་བདེའི་ཉི་མ་གསལ་བ་མཛད། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག ། ཀུན་མཁྱེན་མི་ཕམ་པས་སོ། །

ཨེ་ཝཾ་སྨོན་ལམ་ཆེན་མོ།།ཨེ་མ་ཧོ།།སྙིང་རྗེ་ཆེན་པོས་འགྲོ་ཀུན་སྙིང་བཞིན་གཅེས།།ཤེས་རབ་ཆེན་པོས་ཐར་ལམ་འདྲེན་པར་མཛད།།ཨེ་ཝཾ་སྨོན་ལམ་ཡེ་ཤེས་མཐར་ཕྱིན་ནས།།བསྟན་འགྲོར་སྨན་པའི་སྨིན་གྲོལ་ཐོབ་གྱུར་ཅིག།ཅེས་པ་ཤྲཱིས་ཨེ་ཝཾ་སྨོན་ལམ་ཆེན་མོའི་བདེན་ཚིག་དུ་བགྱིས་པར་དགེའོ།། །།

གནམ་མཐའ་མཚོ་དང་འདྲས་པའི་རྒྱང་རིང་གན།།མི་ལྡོམ་འཁྱམས་པོས་གནས་མལ་ཨེ་ཆོག་གམ།།ཆང་དམར་འཐུང་རོགས་མེད་པའི་དོ་ནུབ་ངས།།ཚོར་བས་བཟི་ཁ་བདུད་རྩིའི་ལྷག་ཞིག་རེད།། ཆུ་བོའི་རླབས་རྒྱུན་བྲག་རིའི་ངོས་སུ་རྡེབ།།ངང་དཀར་ཆ་གཅིག་ལྷིང་འཇགས་ཁད་ཀྱི་དཀྲོགས།།མེ་ཏོག་འདབ་མོ་རྙིད་པའི་དབེན་ཐང་ནས།།གྲོགས་བྲལ་གདུང་བས་མིག་ཆུ་ལྐོག་མིད་བྱེད།། སེམས་ཀྱི་སྐྱོ་དབྱངས་སྨྱུག་གླིང་གདངས་སུ་བསྲེས།།རྩྭ་ཞྭའི་འོག་ནས་ཕྱི་དྲན་སེམས་སུ་ཕབ།།དོ་ནུབ་སེམས་ཀྱི་ཕྱེད་ཀ་འཁྱག་གིས་བཟུང་།།གཙང་བོའི་འགྲམ་ནས་ཁེར་རྐྱང་སྣང་ཤེས་སྐྱོ།། ཆང་དཀར་འཐུང་གིན་འཐུང་གིན་ཡོད་ཚད་བརྗེད།།སང་ཉིན་ཆང་ནད་ཕོག་ནོ་སུ་ཡིས་རྟོག།རྨི་ལམ་དམར་པོས་ཡོལ་བ་མཐེན་ས་ནས།།མི་ཚེའི་གཏམ་གྱི་རྫོགས་ཚིག་འདི་ལས་ཅི།།

༧རྒྱལ་དབང་ཀརྨ་པ་ཨོ་རྒྱན་མཐའ་ཡས་རྡོ་རྗེ་རྒྱལ་ལོ།། ན་མོ་གུ་རུ་བུདྡྷ་ཀརྨ་ས་ཏྭ་ཡེ།། ཨོ༵་རྒྱན༵་པདྨ་ཀ་རའི་བྱིན་རླབས་མཐུས།། ཕྲིན༵་ལས༵་རབ་འབྱམས་སྒྱུ་འཕྲུལ་དྲྭ་བ་ཅན།། མཐའ༵་ཡས༵་སེམས་ཅན་མ་ལུས་སྨིན་མཛད་དཔལ།། རྡོ༵་རྗེ༵་འཆང་ཆེན་རྒྱལ་དབང་ཀརྨ་པ།། སྐུ་ཚེ་བརྟན་ཅིང་བསྟན་དོན་ལྷུན་གྲུབ་ཤོག། ཅེས་པ་འདི་ཡང་རབ་གནས་ས་ཕག་ཆོས་འཁོར་དུས་ཆེན་ལ་ཀརྨ་པའི་སྐུ་འཁོར་ནང་ཚེགས་འགས་དེ་རིང་གི་ཀརྨ་པའི་མཛད་འཕྲིན་ལ་མཁན་ཆེན་བླ་མ་རིན་པོ་ཆེས་རྩོམ་ཞིག་གི་རོགས་པ་གནང་རོགས་སྐུ་མཁྱེན་ཞེས་ཡང་ཡང་སྐུལ་ངོར་རྒྱ་བོད་སྒེར་སྤྱོད་པ་ཚོས་ཇི་ལྟར་གཉའ་གནོན་དང་མ་ཉེས་ཁ་གཡོགས་བྱས་ཀྱང་རྐྱེན་ངན་གྲོགས་སུ་ཤར་ནས་དབང་ཐང་གི་མེ་ལྕེ་དགུང་ལ་མཆེད་ཅིང་། བར་ཆད་ཀུན་ལས་བརྩེ་བའི་དུང་གི་ཟླ་བ་གཟའ་སྒྲ་གཅན་ལས་ཐར་བ་བཞིན་གྱུར་ནས་ལོ་རྒྱུས་རང་བཞིན་ལྡན་པའི་རྒྱལ་དབང་ཀརྨ་པ་ཞྭ་དམར་ནག་གཉིས་ལྷན་འཛོམས་ཐོག་ཡོ་རོབ་ཏུ་གསེར་མདོག་ལྕང་ལོ་ཅན་གྱི་དགེ་འདུན་པ་ཁྲི་ཕྲག་ལ་རྒྱལ་སྲས་ལག་ལེན་གྱི་ཆོས་འཁོར་བསྐོར་བ་ལ་ཡི་རང་བཅས་དབྱིན་ཡུལ་ཨེ་ཝཾ་སངས་རྒྱས་ཡེ་ཤེས་ཆོས་གླིང་ནས་རིག་འཛིན་དཔལ་དགྱེས་པ་རྡོ་རྗེ་རུ་འབོད་པས་བགྱིས་པར་དགེའོ།། །།