ཨེ་ཝྃ་ཧོ།

གདོད་མའི་མགོན་པོ་མི་ཕམ་རིན་པོ་ཆེ་རྗེས་སུ་དྲན་པ་བཅོས་མིན་དད་པའི་གདུང་དབྱངས། ༡ རྒྱལ༵་ཀུན་མཁྱེན་པའི་མེ་ལོང་དྷཱིཿཡིག་མཚན།།རྒྱལ༵་བསྟན་དུས་ཀུན་གསལ་བྱེད་དམར་སེར་འཆང་།།རྒྱལ༵་སྲས་རིགས་གསུམ་སེམས་དཔའི་སྒྱུ་འཕྲུལ་བ།།རྒྱལ༵་དབང་མཚོ་སྐྱེས་བརྒྱུད་པར་བཅས་ལ་བསྔགས།། ༢དྲི༵་མེད་དྭངས་གཙང་འོ་མའི་མཚོ་གླིང་ནས།།དྲི༵་བྲལ་གཟི་དཔལ་བཀྲ་བའི་ཆུ་ཤེལ་དབང་།།དྲི༵་མའི་མུན་ཚོགས་གཏིང་ནས་ཡོངས་གསལ་བ།།དྲི༵་མེད་སྣང་གཏེར་མཚོ་སྐྱེས་བླ་མ་རྒྱལ།།༣གང༵་གི་བུ་སློབ་གསེར་རིའི་ལྷུན་པོའི་ཕྲེང་།།གང༵་ཞིག་སྨྲ་བའི་རྒྱལ་པོ་འཇིགས་བྲལ་བ།།གང༵་སྣང་བརྡ་དང་དཔེ་རུ་ཤར་གཟིགས་པ།།གང༵་ཞིག་མི་ཕམ་མི་ཡི་སེང་གེར་བསྔགས།།༤གངས་རིའི་མེ་ཏོག་འཛུམ་པའི་ས་ཡི་ཆར༵།།ཆར༵་ལྡན་ཟླ་ཀླུང་གཡུ་འབྲུག་ནོར་བུའི་ཚལ༵།།སྣོད་བཅུད་དགེ་བའི་ལེགས་ཚོགས་འཕེལ་བའི་གནས།།ཞིང༵་འདིར་ངོ་མཚར་སྐུ་ཡི་མེ་ཏོག་བཞད།།༥ཆུང་ནས༵་དད་དང་ངེས་འབྱུང་ནོར་གྱིས་ཕྱུག།ཡེ་ནས༵་ཐབས་དང་ཤེས་རབ་ཟུང་དུ་འཇུག།གདོད་ནས༵་ཆོས་སྐུའི་ངོ་བོར་སངས་རྒྱས་པ།།སྐྱེ་ནས༵་ཕྲེང་བར་མཛད་འཕྲིན་མཁའ་དང་མཉམ།།༦སྨྲ་བའི་སེང་གེའི་ཞལ་གཟིགས་ཁྱེད་ལ༵་ཐོབ། ། འཇམ་དབྱངས་མཁྱེན་བརྩེའི་ཐུགས་རྒྱུད་སྙིང་ལ༵་འཕོས། ། བློ་གཏེར་དབང་པོའི་བྱིན་རླབས་ཡིད་ལ༵་སྨིན། ། མི་ཕམ་འཇམ་པའི་དབྱངས་ལ་གསོ༵ལ་བ༵་འདེ༵བས། ། ༧གཏེར་སྟོན་བསོད་རྒྱལ་ཨ་འཛོམས་འབྲུག་སྤྲུལ་རྗེ༵། ། རྫོགས་སྤྲུལ་ལྔ་བ་དཔལ་སྤུངས་སི་ཏུ་རྗེ༵། ། ཀུན་བཟང་དཔལ་སོགས་གྲུབ་པའི་དབང་ཕྱུག་བཅས། །ཡབ་རྗེ་མི་ཕམ་མགོན་པོར་གསོ༵ལ་བ༵་འདེ༵བས། ། ༨བྷོ་ཊའི་མཁས་དབང་སྟོང་གིས་ཟླ་བྲལ་བ། ། དཔལ་རིའི་དགེ་བཤེས་བློ་བཟང་ར༵བ་གསལ་ལ། །བརྒལ་ལན་རྩོད་ལ་རིག་པའི་དཔའ་བོ་མཆོག ། མི་ཕམ་འཇམ་དབྱངས་བླ་མར་གསོ༵ལ་བ༵་འདེ༵བས། ། ༩རྒྱབ་བརྟེན་ལུང་གི་མདུན་ནས་ཁྱེད་མི༵་ཕམ༵། ། དམ་བཅའ་རྡོ་རྗེའི་ཁྲི་ལས་ཁྱེད་མི༵་ཕམ༵། ། རིགས་འཕྲུལ་ཁྲི་མ་འབུམ་གྱིས་ཁྱེད་མི༵་ཕམ༵། ། མི་ཕམ་ཡིད་བཞིན་ནོར་བུར་གསོ༵ལ་བ༵་འདེ༵བས། །༡༠སྤོབས་པ་གླང་པོའི་སྟོབས་ཀྱིས་ཁྱེད་མི༵་ཕམ༵། ། གཟི་བརྗིད་སེང་གེའི་འགྱིང་གིས་ཁྱེད་མི༵་ཕམ༵། ། ཐལ་ངག་ལྕགས་ཀྱི་སྡེར་མོས་ཁྱེད་མི༵་ཕམ༵། ། མི་ཕམ་ཐམས་ཅད་མཁྱེན་པར་གསོ༵ལ་བ༵་འདེ༵བས། ། ༡༡འཇམ་དཔལ་དྲག་པོས་མི་དང་མི་བཞི༵ན་རྩེད། ། གེ་སར་སྐྱེས་བུ་ལུས་དང་གྲིབ་བཞི༵ན་འགྲོགས། །ཆོས་སྐྱོང་དགྲ་ལྷས་མ་དང་བུ་བཞི༵ན་སྲུང་། །རྩ་གསུམ་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༢ངོ་བོ་ཆོས་སྐུ༵་དྲུག་པ་རྡོ་རྗེ་འཆང་། །རང་བཞིན་ལོངས་སྐུ༵་རྒྱན་དང་དཔེ་བྱད་ཅན། །སྣ་ཚོགས་སྤྲུལ་སྐུ༵་གང་ལ་གང་འདུལ་བ། །སྐུ༵་གསུ༵མ་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༣ཡེ་ན༵ས་སངས་རྒྱས་གོ་འཕང་མངོན་དུ་གྱུར། ། རིང་ན༵ས་ཆོས་ཀྱི་བདེན་པ་ཐུགས་ལ་གཏམས། ། གདོད་ན༵ས་རྒྱལ་སྲས་འཕགས་པའི་ཚུལ་འཛིན་པ། །དཀོན་མཆོག་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༤ཁྱེད༵་ཀྱི་ཡོན་ཏན་གངས་རི་ལས་ཀྱ༵ང་མཐོ། ། ཁྱེད༵་ཀྱི་བཀའ་དྲིན་ས་འཛིན་ལས་ཀྱ༵ང་བརྗིད། །ཁྱེད༵་ཀྱི་མཁྱེན་རྒྱ་ནམ་མཁའ་ལས་ཀྱ༵ང་ཆེ། །མཁྱེན་གཏེར་ནོར་བུའི་མཛོད་ལ་ཕྱ༵ག་འཚ༵ལ་ལོ༵། །༡༥སྤྱིར་ན་ཤཱཀྱའི་བསྟན་ལ་བཀའ་དྲིན་ཆེ༵། །ལྷག་ཏུ་སྔ་འགྱུར་ཡོངས་ཀྱི་མགོན་གཅིག་པུ། །ཁྱད་པར་རྫོགས་པ་ཆེན་པོའི་རང་ལུགས་ཆེ༵། །འཛིན་སྐྱོང་སྤེལ་ལ་ཟླ་བྲལ་ཕྱ༵ག་འཚ༵ལ་ལོ༵། །༡༦མ༵དོ་སྔག༵ས་ཤེས་བྱ་ཀུན་ལ་ཆགས་ཐོགས་དབེན། ། མ༵དོ་སྔག༵ས་རྒྱུད་སྡེ་རྒྱ་མཚོ་ཐུགས་སུ་ཆུད། ། མ༵དོ་སྔག༵ས་མཁས་གྲུབ་སྟོང་གིས་འགྲན་བྲལ་བ། ། རྣམ་དཔྱོད་མཚུངས་པ་མེད་ལ་ཕྱ༵ག་འཚ༵ལ་ལོ༵། ། ༡༧ཁྱེད༵་ནི༵་མཁའ་ལྡིང་དབང་པོའི་གཤོག་པ་ཡི༵ན། ། ཁྱེད༵་ནི་དམར་ཡག་སྟག་གི་ང་རོ་ཡི༵ན། ། ཁྱེད༵་ནི༵་དྲི་མེད་པདྨ་དཀར་པོ་ཡི༵ན། ། ཁྱེད༵་ནི༵་དགོས་འདོད་འབྱུང་བའི་ནོར་བུ་ཡི༵ན། ། ༡༨བསྟན་པའི་རྒྱལ་མཚན་བསྒྲེངས་པའི་ཐུགས་བསྐྱེད་དཀ༵ར།།འགྲོ་ཀུན་ཕ་མར་ཤེས་པའི་བྱམས་བརྩེ་དཀ༵ར།།མཛད་འཕྲིན་ཟླ་བྲལ་གངས་ཀྱི་ལྷུན་པོ་དཀ༵ར།།མཁས་བཙུན་སྙན་གྲགས་གླིང་བཞིའི་ཁྱོན་ན་དཀ༵ར།།༡༩ལེག༵ས་ལམ་སྟོན་པའི་བཤེས་ལ་བསྟེན་ཚུལ་ལེག༵ས།།ལེག༵ས་གསུང་ཆོས་ཚུལ་རྒྱ་མཚོ་བཞེས་ཚུལ་ལེག༵ས།།ལེག༵ས་པའི་མཛད་བཟང་བསྟན་འགྲོར་སྤེལ་ཚུལ་ལེག༵ས།།ལེག༵ས་བཤད་ལུང་རིགས་འདབ་མ་གྲོལ་ཚུལ་ལེག༵ས།།༢༠མཁ༵ས་པའི་མཚན་སྙན༵་མི་ནུབ་སྲིད་རྩེར་བསྒྲེངས། །བཙུ༵ན་པའི་སྤྱོད་བཟང་སྐྱེ་འགྲོའི་དཔལ་དུ་བསྐྲུན།།བཟ༵ང་པོའི་མཛད་འཕྲིན་རིས་མེད་བསྟན་པའི་རྒྱན།།ཁྱེད་ཉིད་ཟླ༵་བྲལ་ཀུན་མཁྱེན་ངག་གི་དབང་།།༢༡འཆ༵ད་ལ་ཐོགས་མེད་ཀླུ་ཐོགས་ཟུང་གི་གྲོག༵ས།།རྩོད༵་ལ་ཟླ་མེད་ཕྱོགས་གླང་ཡབ་སྲས་གྲོག༵ས།།རྩོམ༵་ལ་འགྲན་མེད་མཚོ་བྱུང་ལྷ་མོའི་གྲོག༵ས།།ལུང་རིགས་རྫོགས་པའི་པཎ་གྲུབ་མཁས་དགུའི་གྲོག༵ས།།༢༢དང་པོར་སྐྱེས་ཐོབ་ཤེས་རབ་སྒྲོན་མེ་སྦར།།བར་དུ་བས༵མ་པའི་ཉི་གཞོན་ནང༵་དུ་འཆར།།ཐ་མར་སྒོམ༵་པའི་ཐིག་ལེ་གས༵ང་བར་སྨིན།།ཐོས༵་བས༵མ་སྒོམ༵་པའི་གཏན་སྲིད་ཟིན་ལ་རྨད།། ༢༣ཆེ༵ད་དུ་སྦྱངས་ཤིང་ཆེ༵ད་དུ་མ་བསླབས་ཀྱང་། །ཤེ༵ས་བྱའི་གནས་ལ་ཤེ༵ས་རབ་ཕུལ་དུ་ཕྱིན། །རི༵ག་པའི་གཞོན་ཆུང་རི༵གས་ལམ་ཟླ་བྲལ་བས། །ངེས༵་ཤེས༵་སྒྲོན༵་མེ༵་དགུང་གྲངས་བདུན་ནས་བརྩམས། ། ༢༤འབེལ་གཏམ་བཀྲོལ་ལ་རོང་ཟོམ་ལས་ཀྱང༵་བཟང་། །སྔགས་ཀྱི་ཕྱོགས་ལ་དཔལ་སྤྲུལ་ལས་ཀྱང༵་མཁས། ། རིགས་ལམ་དགེ་བཤེས་ཁང་དམར་ལས་ཀྱང༵་རྣོ། ། ཟླ་བྲལ་ངག་གི་དབང་པོ་ཁྱེད་ལ་འདུད། ། ༢༥ནང་བསྟན་པད་དཀར་ལྗོན་པའི་སྡོང་པོ་མཛེ༵ས།།སྒྲ་དང་ཚད་མ་རིག་པའི་ཡལ་ག་མཛེ༵ས།།བཟོ་དང་གསོ་བའི་འབྲས་བུས་མངོན་པར་མཛེ༵ས།།ཡོངས་རྫོགས་རིག་གཞུང་མེ་ཏོག་ཁྱེད་ལ་བཞད། ། ༢༦འཇམ་དབྱངས་བླ་མ་དགྱེས་པའི་ཞལ་ལུང་རྨ༵ད། ། གསང་འབྲེལ་སྤྱི་དོན་ལུགས་ཀྱི་བསྟན་བཅོས་རྨ༵ད། ། ཕྱོགས་ལས་རྣམ་པར་རྒྱལ་བའི་རུ་མཚོན་རྨ༵ད། ། ཁྱེད་ཀྱི་གསུང་རབ་བོད་བརྒྱུད་ནང་བསྟན་རྒྱན།།༢༧ཁྱེད༵་ལ༵་མཁས་མདོག་དྲེགས་པའི་ཆེ་ཉམས་མེ༵ད། ། ཁྱེད༵་ལ༵་བཙུན་སྙམ་བཅོས་མའི་ཨོ་ཟོབ་མེ༵ད། ། ཁྱེད༵་ལ༵་སྐུ་འཁོར་སྟོང་གི་ཤོམ་ར་མེ༵ད། ། ཆོག་ཤེས་ནོམ་གྱིས་ཕྱུག་གི་ཆོས་པ་བ། །༢༨མཐོན་པོའི་གསེར་ཁྲིར་མི་དགྱེས་རང་ག་བ༵། །འབྱོར་བའི་ནོམ་ལ་མི་དགྱེས་གྲྭ་རྐྱང་བ༵། །ཚེ་འདིའི་གཡེང་བར་མི་དགྱེས་བྱ་བཏང་བ༵། །མི་ཕམ་མི་མེད་ལུང་བའི་སྒོམ་ཆེན་ཡིན། །༢༩རྨ༵ད་བྱུང༵་བསྟན་བཅོས་བང་རིམ་དཔང་མཐོ་བ༵། །རྨ༵ད་བྱུང༵་དཀའ་གནད་རིག་པའི་ལྗགས་རྣོ་བ༵། །རྨ༵ད་བྱུང༵་ལུང་རིགས་གཡུ་རལ་བརྗིད་ཆེ་བ༵། །རྨ༵ད་བྱུང༵་མི་ཕམ་མཁས་དགུའི་གཙུག་གི་རྒྱན། །༣༠དྲ༵ན་དབང་ནགས་མའི་ཀླུང་གི་ཁྱུ་བྱུག་ཁྱེ༵ད། །དྲ༵ན་གདུང་སྐར་ཚོགས་ཁྲོད་ཀྱི་དུང་ཟླ་ཁྱེ༵ད། །དྲ༵ན་འཛིན་གངས་ཀྱི་རི་བོའི་སེང་ཆེན་ཁྱེ༵ད། །དྲ༵ན་སྣང་དད་པའི་གདུང་དབྱངས་ཁྱེད་ལ་འབུལ། །༣༡རྗེས་དྲན་ངག་གི་གླིང་བུ་ཁྱེད་ལ་འབུད། །རྗེས་བཟུང་བདེན་ཚིག་གསོལ་སྨོན་ཁྱེད་ལ་ཞུ། །རྗེས་འཇུག་བུ་སློབ་ཐུགས་བརྩེས་མི་འདོར་བར། །རྗེས་བཟུང་འཁོར་གྱི་ཐོག་མར་སྐྱེ་བར་ཤོག །༣༢མཁྱེ༵ན་ནོ་མཁྱེ༵ན་ནོ་མི་ཕམ་རིན་པོ་ཆེ། ། དྲན༵་ནོ་དྲན༵་ནོ་འཇམ་དཔལ་ཡིད་བཞིན་ནོར། །དད༵་དོ་དད༵་དོ་ཚེ་རབས་ཐམས་ཅད་དུ། །མི༵་འབྲལ་མི༵་འབྲལ་རྗེས་སུ་འཛིན་གྱུར་ཅིག ། ཅེས་པ་འདི་སྔ་འགྱུར་རིག་འཛིན་བརྒྱུད་པའི་གྲལ་མཐའ་རུ་སྐྱེས་ཤིང་། ཀུན་མཁྱེན་མི་ཕམ་རྒྱ་མཚོ་ལ་སྐྱེ་ཀུན་ཚེ་རབས་ཐམས་ཅད་དུ་ལས་ཀྱི་མེ་ཏོག་ཕོག་ཅིང་། དམ་པ་ཁོང་ལ་མི་ཤིགས་པའི་དད་པ་ཅན་རྫ་འབྲུག་གྲགས་སྤྲུལ་སྐུ་ལུང་རྟོགས་བསྟན་པའི་ཉི་མར་འབོད་པ་དེས་འཇུ་དགོན་གསང་སྔགས་བཤད་སྒྲུབ་ཆོས་འཁོར་གླིང་གི་མཁན་སྤྲུལ་ལས་སྣེ་མཆེད་གྲོགས་རྣམ་པས་ཞུ་ངོ་མ་བཅག་པའི་དོད་དང་། ཁྱད་པར་འཇམ་མགོན་མི་ཕམ་རིན་པོ་ཆེ་དགོངས་པ་ཆོས་དབྱིངས་སུ་བསྡུས་ནས་ལོ་འཁོར་བརྒྱ་དང་བརྒྱད་ཀྱི་རྗེས་དྲན་ལ་བསོད་ནམས་ཀྱི་ཟེགས་མ་རེ་ཐོབ་པའི་ཆེད་དུ་སྒྲ་རྒྱན་གྱི་ལམ་ནས་༼ ཤོ་ལོ་ཀ་མཚན་བཟང་སོ་གཉིས་ཀྱི་གྲངས་དང་ལྡན་པ་༽ འདི་ཉིད་བོད་རབ་བྱུང་བཅུ་བདུན་པའི་ས་ཕག་ལོའི་༼…

གཏེར་ཆེན་རིག་འཛིན་པདྨ་དྲག་སྔགས་གླིང་པའི་རྣམ་ཐར་གེ་སར་སྙིང་པོ།ན་མོ་གུ་རུ་བུདྡྷ་ཛྙཱ་ན་ཡེ།།པདྨའི་ཐུགས་སྲས་སངས་རྒྱས་ཡེ་ཤེས་རྩལ།།པདྨའི་བཀའ་གཏེར་མཛོད་ལ་མངའ་དབང་བསྒྱུར།།པདྨའི་རྒྱལ་ཚབ་གསུམ་ལྡན་རྡོ་རྗེ་འཛིན།།པདྨ་དྲག་སྔགས་གླིང་པས་དགེ་ལེགས་སྩོལ།།སྙིགས་དུས་བསྟན་པ་སྤེལ་ལ་ཟླ་བྲལ་བ།།གཏེར་ཆེན་པདྨ་དྲག་སྔགས་གླིང་པ་ཡི།།གསང་གསུམ་རྣམ་ཐར་རྒྱ་མཚོ་ཆེན་པོ་ལས།།སྐྲ་རྩེའི་ཐིགས་ཙམ་དད་པའི་རྒྱན་ཏུ་སྤྲོ།།དེ་ཡང་གཏེར་ཆེན་དམ་པ་རིག་འཛིན་པདྨ་དྲག་སྔགས་གླིང་པའི་ཐུན་མོང་དང་ཐུན་མིན་གསང་བའི་མཛད་པ་རྒྱ་མཚོ་ལྟ་བུ་མཆིས་པ་ལས་འདིར་སྐྲ་རྩེའི་ཐིགས་ཙམ་ཅུང་ཟད་བསྡུས་ཏེ་བཤད་པ་ལ་གསུམ་ལས། དང་པོ་སྐུ་སྐྱེས་རབས། གསུང་གི་མཛད་པ། ཐུགས་རྗེའི་ཕྲིན་ལས་བཅས་ཡོད་པ་ལས། དང་པོ་གཏེར་ཆེན་རིག་འཛིན་པདྨ་དྲག་སྔགས་གླིང་པ་ནི་ཨ་ལྕགས་འབྲི་ཡི་རྒྱུད་པ་དཔའ་མཛངས་དང་རིགས་བཟང་ལས་བྱུང་བའི་འབྲི་ལྷ་རྒྱལ་རུས་པ་གཙང་པའི་མཆེད་པ་ཨ་སྐྱོང་ཁག་གསུམ་ཞེས་ཡོངས་སུ་གྲགས་པའི་མངའ་སྡེ་མང་དུ་མཆིས་པ་ལས། སྟག་ཐོག་རིན་ཆེན་མགོན་པོ་ཤེས་འཇམ་དཔལ་གཤིན་རྗེ་གཤེད་ཀྱི་བཀའ་བབས་གནོད་སྦྱིན་ཤན་པ་དམར་པོའི་སྤྲུལ་སྐུ་ཡིན་པ་སྡུག་ལ་འཛེམ་ཤིང་ཆོས་ལ་དགའ་བ། དཔའ་རྩལ་དྲུག་ཅུ་རྩ་བཞི་ལྡན་པའི་ཡ་རབས་ཀྱི་མི་རྒྱུད་དུ་ཡོངས་སུ་གསལ་བའི་ཡབ་མཆོག་དང་། ཡུམ་ཆེན་ཨ་སྐྱོང་ཁང་རྒན་དཔོན་་གྱི་སྲས་མོ་རིག་བྱེད་སྒྲོལ་མ་གཉིས་ཀྱི་སྲས་སུ་རབ་བྱུང་བཅོ་ལྔ་བའི་བགྲང་བྱ་དྲུག་པ་ཆུ་ཁྱི་སྟེ། སྤྱི་ལོ་༡༩༢༢་༥་༡ ལ། རྒྱལ་དབང་པདྨ་འབྱུང་གནས་ཀྱི་ཐུགས་སྲས། གནུབས་ཆེན་སངས་རྒྱས་ཡེ་ཤེས་ཀྱི་སྒྱུ་འཕྲུལ་རྣམ་པར་རོལ་བ། གླིང་དཀར་ལྷ་སྲས་དགྲ་ལྷ་རྩེ་རྒྱལ་གྱི་རོལ་གར། ཕྱི་མའི་དུས་སུ་སྤྲུལ་བའི་གཏེར་སྟོན་དང་མཁས་གྲུབ་སྐྱེས་བུ་དུ་མའི་རིགས་སུ་རྫུ་འཕྲུལ་གྱི་རིགས་སུ་ཅིག་ཆར་དུ་བསྟན་དང་འགྲོ་བའི་དཔལ་མགོན་དུ་ཐུགས་བསྐྱེད་སྨོན་ལམ་བསམ་གྱིས་མི་ཁྱབ་པའི་མཛད་ཕྲན་ཅན་གྱི་ཡ་གྱལ། སྤྲུལ་བའི་གཏེར་སྟོན་ཆེན་པོ་པདྨ་དྲག་སྔགས་གླིང་པ་ཉིད་ཕྱི་ནང་གསང་བའི་རྟེན་འབྲེལ་ལེགས་པའི་ལྟས་བཟང་བཅས་མཚན་དཔེའི་གསེར་ཞལ་སྙིགས་དུས་མུན་པ་བསལ་བའི་བགོ་སྐལ་དུ་སྐུ་འཁྲུངས། གཞན་ལས་ལོ་སྐྱེད་ལས་ཟླ་སྐྱེས་འཚར་བའི་ལང་ཚོ་དང་ལྷན་སྐྱེས་སུ་སྐྱེ་བ་དྲན་པ་དང་ལྷ་ཀླུ་མི་མ་ཡིན་མཐོང་བ་སོགས་བསམ་ཡུལ་ལས་འདས་པའི་མངོན་ཤེས་དང་གྲུབ་རྟགས་མཛད།གཉིས་པ་ནི། སྤྱི་ལོ་༡༩༢༩་དེ་དགུང་གྲངས་བདུན་ནས་ཡི་གེ་འབྲི་ཀློག་སོགས་ཐོགས་མེད་དུ་མཁྱེན། ཡབ་ལས་ཆོ་ག་ཆོས་སྤྱོད་ལ་བྱང་ཆུབ་པར་གྱུར། ཆུ་ཆེན་དང་ཤུག་གསེབ་དང་རི་རྩེ་རུ་གུ་རུ་རིན་པོ་ཆེ་སྒོམ་གྱིན་ཡིན་གསུངས་ནས་ཉིན་གང་བོར་དབེན་པར་ཁོ་ན་དགྱེས་པས་སྒོམ་ཆེན་དུ་གྲགས། ལོ་ནས་ལོར་རྟག་པར་དེ་དེ་བཞིན་དུ་མཛད།སྤྱི་ལོ་༡༠༣༧་ལོའམ། དགུང་གྲངས་བཅོ་ལྔའི་སྐབས་སུ་གློ་བུར་དུ་ངེས་འབྱུང་དྲག་པོ་ཞིག་གིས་ཐུགས་རྒྱུད་བསྐུལ་ནས་དཔལ་སྔ་འགྱུར་ཆོས་གྲྭ་ཆེན་པོ་རྡོ་གྲུབ་སྒར་དུ་ལོ་གསུམ་བཞུགས་ནས་བརྩོན་པ་དྲག་པོས་སློབ་གཉེར་མཛད་ནས་སྦྱངས་བ་མཐར་ཕྱིན་པ་དང་།སྤྱི་ལོ་༡༩༣༩ལོ་འམ་དགུང་གྲངས་བཅུ་བདུན་ལ་སོན་སྐབས་སུ་ཨ་པང་གཏེར་ཆེན་རིག་འཛིན་ཨོ་རྒྱན་ཕྲིན་ལས་གླིང་བའི་མདུན་དུ་བྱོན་ནས་གསང་སྔགས་ཕྱི་ནང་གསང་བའི་དབང་ལུང་མན་ངག་རྫོགས་པ་ཆེན་པོའི་མན་ངག་ཆིག་རྒྱུད་ཐམས་ཅད་བུམ་པ་གང་བྱོའི་ཚུལ་གྱིས་གསན་བསམ་སྒོམ་པར་མཛད།སྤྱི་ལོ་༡༩༤༥་ལོ་འམ་དགུང་གྲངས་ཉེར་གསུམ་སྟེང་མཁྱེན་བརྩེ་ཆོས་ཀྱི་བློ་གྲོས་ཀྱི་དྲུང་ནས་ཅིག་ཆར་བསྙེན་པར་རྫོགས་ཞིང་ཆོས་དང་གདམས་ངག་ཆ་ཚང་ཞུས་ཏེ་དཀའ་སྤྱད་དང་ཐུགས་སྨོན་རྒྱ་ཆེར་མཛད་ནས་ཕྱག་གཡོན་གྱི་སྲིན་མཛུབ་ཀྱང་མར་མེར་སྒྲོན་པ་སོགས་གཟུངས་སྤོབས་རླབས་ཆེན་དང་ངོ་མཚར་གྱི་བཀོད་པར་བསམ་ཡུལ་ལས་མཛད་པར་སྣང་ངོ་།སྤྱི་ལོ་༡༩༤༧་ལ་འམ་དགུང་གྲངས་ཉེར་ལྔ་ལ་འཇམ་དབྱངས་མཁྱེན་བརྩེ་རྡོ་རྗེ་འཆང་གིས་གནུབས་ཆེན་སངས་རྒྱས་ཡེ་ཤེས་ཀྱི་སྐྱེ་སྲིད་ཡིན་པ་དང་། རྒྱལ་དབང་པདྨ་ཀ་རའི་རྒྱལ་ཚབ་ཟབ་མོ་གཏེར་གྱི་གཏེར་གྱི་བཀའ་བབས་ཡིན་པར་གསལ་བར་གསུངས་ཏེ། རྟེན་བསྒྱུར་སྔགས་ལམ་ལ་ཞུགས་དགོས་པར་ལྡོག་མེད་ཀྱི་བཀའ་ལུང་སྤྱི་གཙུག་ཏུ་བབས་པ་དང་། གསང་མཚན་ལ་པདྨ་རང་གྲོལ་རྩལ་གནང་ཞིང་། གཏེར་སྟོན་གྱི་མཚན་ལ་པདྨ་དྲག་སྔགས་གླིང་པ་ཞེས་གསོལ་ནས། ཞབས་བརྟན་སྨོན་ཚིག་དང་གསོལ་འདེབས་ཚིགས་སུ་བཅད་པ་འདི་ཡང་གསུངས།ཨེ་མ་ཧོ།རིག་འཛིན་ཨོ་ཌཱི་ཡ་ནའི་སྒྱུ་འཕྲུལ་གར།།པད་འབྱུང་ཆོས་གཏེར་རྒྱ་མཚོས་གཏེར་རྒྱ་ཐོབ།།མཛད་དཀའ་རྒྱལ་བའི་སྲས་ཀྱི་སྤྱོད་པ་ཅན།།པདྨ་དྲག་སྔགས་གླིང་པར་གསོལ་བ་འདེབས།།ཞེས་སྐུ་གསུང་ཐུགས་རྟེན་བཅས་གནང་བ་དང་། མཁྱེན་བརྩེ་རིན་པོ་ཆེ་དང་། ཉིད་ཀྱི་སྐུ་མཆེད་སྣང་མཛད་གྲུབ་པའི་རྡོ་རྗེ་སོགས་ཀྱིས་བརྟག་བསྒྲིག་མཛད་ནས་ཤཱཀྱ་དེ་ཝའི་རྣམ་འཕྲུལ་འཇིགས་མེད་དཔལ་སྒྲོན་ནམ་པདྨ་གར་དབང་དཔལ་མོ་དང་། མནྡ་ར་ཝའི་སྤྲུལ་པ་གླིང་དཀར་བསོ་ཚེ་འབྱུང་གནས་ཀྱི་སྲས་མོ་འཇིགས་མེད་ཆོས་སྒྲོན་གཉིས་ཀྱང་ཁབ་ཏུ་བཞེས། ཁྱད་དུ་རིག་མ་མནྡ་ར་ཝའི་རྣམ་སྤྲུལ་དང་ཐབས་ཤེས་ཟུང་དུ་འབྲེལ་བས་ཟབ་གཏེར་གྱི་སྒོ་འཕར་བདེ་བླག་ཏུ་ཕྱེ་བའི་ཐོག་མའི་སྐབས་སུ་མཁྱེན་བརྩེ་རིན་པོ་ཆེ་དང་། རྒྱལ་བ་ཞེ་ཆེན་རབ་འབྱམས་རིན་པོ་ཆེ་སོགས་འཁོར་སློབ་སུམ་བརྒྱ་ལྷག་གི་དབུས་སུ་གུ་རུ་པདྨའི་ཚེ་བུམ་རྣམ་པ་དུང་དཀར་རིང་བསྲེལ་གྱིས་ཕྱུར་བུར་གཏམས་པ་སྤྱན་དྲངས་པ་མཁྱེན་བརྩེའི་རྟེན་ཁྲོད་དུ་བཞུགས། འཇམ་དཔལ་དབྱངས་དང་དབྱངས་ཅན་ཀྱི་རང་བྱུང་སྐུ་སོགས་དང་། གཞན་ཡང་། ཡེ་ཤེས་མཚོ་རྒྱལ་གྱི་རཀྟའི་སྒྲོམ་བུ་བརྡ་ཡིག་གིས་མཚན་པ་ཅན་དུ་མ་དང་། གེ་སར་བླ་རྡོ། ནད་སེལ་ཨ་རུ་རྣམ་རྒྱལ་སོགས་སྐུ་གསུང་ཐུགས་རྟེན་གྲངས་མང་དག་ས་གཏེར་བཞེས།གསུམ་པ་ནི།བླ་རྫོགས་ཐུགས་གསུམ་ལས་དང་པོ་བླ་མའི་རྣལ་འབྱོར་ལ། རིག་འཛིན་བླ་མའི་བསྒྲུབ་པ་དགོངས་བརྒྱུད་སྙིང་པོ་ཆིག་དྲིལ། རང་རིག་བླ་མའི་གསང་སྒྲུབ། དུས་འཁོར་བླ་མའི་རྣལ་འབྱོར། སྤྲོས་མེད་ཨ་ཏིའི་ལུགས་ཀྱི་གུ་རུ་དྲག་པོའི་ལུས་དཀྱིལ། གུ་རུ་དྲག་པོའི་རྒྱལ་འགོང་ཚར་གཅོད།་་་་་་་་་་

དབྱིན་ཡུལ་གྱི་གངས་ལྡན་རི་བོ།།ཨེ་མ་ཧོ།།རི་བོ་མཐོ་ཞིང་རི་རྩེ་དགུང་དང་མཉམས།།རི་མགུལ་ཡངས་ཤིང་རིའི་མཐར་ནགས་ཀླུང་མཛེས།།རི་རབ་ལྷུན་པོའི་གཡས་གཡོན་རི་ཕྲན་ཀུན།།རི་རྒྱལ་དཔོན་ལ་དཔུང་གིས་བསྐོར་བཞིན་གསལ།།རི་ལུང་དག་གཙང་ནེའུ་གསེང་སྨན་ལྗོན་ལ།།མཚོ་དང་མཚོའུ་པའི་ཕྲེང་བ་ཡིད་དུ་འོང་༎རང་བྱུང་སྨན་དང་མེ་ཏོག་དྲི་བཟང་འཐུལ༎ཕྱི་ནང་ཀུན་བཟང་སེམས་ཀྱི་དག་ཞིང་སྟེ༎ འཁྱམས་པོའི་ཚེ་མཇུག་སྐྱེལ་སའི་དགོན་པར་ལགས།།གོང་ན་དཔོན་མེད་བར་དོའི་འཁྲུག་རྩོད་དབེན།།བདག་ལ་དབང་བའི་ས་ཞིང་ཨེ་ཀལ་བརྒྱའ།།ལྷན་སྐྱེས་བཟའ་བཅའ་བཏུང་བའི་རྩི་ཤིང་རིགས།།ཅི་དགོས་འཕང་མེད་ལོངས་སུ་སྤྱོད་པར་ཡོད།།རྩ་གསུམ་བསྙེན་པའི་རྔ་ཏིང་རོལ་དབྱངས་དང་།།རྙེད་དཀའི་ལུས་སེམས་ཞི་བདེ་འབྱུང་བའི་གནས།།ཨེ་ཝཾ་རྫོགས་ཆེན་དུས་འཁོར་ཆོས་གླིང་དུ་།།འཁོར་འདས་བདེ་སྐྱིད་འབད་མེད་ལྷུན་གྲུབ་ཡོད།།སངས་རྒྱས་བསྟན་པའི་རྒྱལ་ས་འདི་ནས་ཟིན།།དམ་ཆོས་བདེན་པའི་རྒྱལ་རྔ་འདི་ནས་བརྡུངས།།དགེ་འདུན་དཀོན་མཆོག་བཤད་སྒྲུབ་འདི་ནས་དར།།སྔ་འགྱུར་བསྟན་པའི་རྒྱལ་མཚན་བསྒྲེངས་གྱུར་ཅིག།།ཅེས་པ་འདི་ཡང་རབ་གནས་ས་ཕག་ས་ག་ཟླ་བའི་གནམ་སྟོང་ཉི་འཛིན་ཨ་ཧྥུ་རི་ཀ་ནས་སྒྲ་གཅན་ལས་གྲོལ་མ་ཐག་ཏུ་མཁའ་འགྲོ་རིག་འཛིན་དབྱངས་ལྷ་མོས་བསྐུལ་ངོར་གདན་ས་དེ་ཉིད་ནས་ཤྲཱིཿསྨྱོན་ཨེ་མ་ཧོས་བགྱིས་པར་དགེའོ།།

འཇུ་མི་ཕམ་རྣམ་རྒྱལ་རྒྱ་མཚོ་ལ་ན་མོ།།ན་མོ་གུ་རུ་ཨ་ཛི་ཏ་བི་ཛ་ཡེ།།ཀ་དག་དབྱིངས་ཆེན་ལ་གཟིམས་འཇམ་གནང་ཡང་།།ལྷུན་གྲུབ་འོད་གསལ་གྱི་མལ་སའི་དཀྱིལ་ནས།།ཟུང་འཇུག་བདེ་ཆེན་གྱི་རྟུལ་ཞུགས་སྤྱོད་པ།།འཇུ་རིགས་དཔའ་བོ་ལ་རིག་མས་སྒུག་ཡོད།།དད་གུས་འདོད་གདུང་ཉིད་ཁྱེད་ལ་ཕྱོགས་པས།།བློ་གྲོས་དགའ་མ་ལ་ཕྱག་རྒྱ་ཆེན་པོས།།སོ་གཉིས་ལང་ཚོ་ཡིས་སྤྲོ་དགས་རོལ་ནས།།ཉེར་གཅིག་མདུད་པ་ཉིད་ངང་གིས་གྲོལ་ཐལ།།ལྟ་བ་རྫོགས་ཆེན་ལ་བལྟད་མོར་བལྟ་ཞོར།།སྒོམ་པ་ཕྱག་ཆེན་ལ་བདེ་དྲོད་འབར་ནས།།སྤྱོད་པ་དབུ་སེམས་ལ་ཕྱིན་དྲུག་བརྩོན་སྟེ།།འབྲས་ཆོས་ཉེར་ལྔ་ལ་ཅི་དགར་ཕྱིན་འགྲོ།།ཞེས་པ་འདི་ཡང་རབ་གནས་ས་ཕག་ས་ག་ཟླ་བའི་ཉེར་དགུའི་ཉིན་ནམ་མི་ཕམ་རིན་པོ་ཆེའི་དགོངས་རྫོགས་སྐབས་མཁའ་འགྲོ་པདྨ་གཡང་འཛོམས་ངོར་འཇམ་དཔལ་དགྱེས་པ་རྡོ་རྗེ་རུ་འབོད་པས་ཨེ་ཝཾ་ཀུན་བཟང་རི་ཁྲོད་ཀྱི་མཚོ་རྒྱལ་བླ་མཚོའི་ཁ་ནས་སྨོན་པར་དགེའོ།། །།

༄༅། །སྐྱིད་གླུ་བཞུགས་སོ། །སངས་རྒྱས་ཀུན་དངོས་བརྒྱུད་གསུམ་བླ་མ་ཡི་དགོངས་བཅུད། །བསྟན་པའི་སྙིང་པོ་ནང་རྒྱུད་སྡེ་གསུམ་གྱི་ཟབ་གནད། །མ་ནོར་ལེགས་པར་འཛིན་མཛད་མཆོག་ཚོགས་ཀྱི་འདུས་པ། །ཕན་བདེའི་འབྱུང་གནས་ཡིད་བཞིན་དབང་མཆོག་གི་རྒྱལ་པོ། །གཙུག་ཏུ་བཀོད་ནས་སྐལ་ལྡན་བདག་ཉིད་དང་བདག་འདྲའི། །ལེགས་སྨོན་དུས་སུ་སྨིན་པའི་བློ་ལྡན་གྱི་ཚོགས་སུ། །རང་སྙེམས་ཞེན་པ་མེད་པའི་བདེན་གཏམ་གྱི་རང་བཞིན། །ཉམས་དབྱངས་སྐྱིད་གླུ་ལེན་ནོ་ཤེས་ལྡན་གྱི་གྲོགས་པོ། །སྙིགས་མ་ལྔ་པོ་བདོ་བ་དེང་སང་གི་དུས་ན། །བསྒྲིམ་བསྒྲིམ་ཇི་ལྟར་འབད་ཀྱང་རྩོལ་བཅས་ཀྱི་ཐེག་པས། །ཤིན་ཏུ་གདུལ་བར་དཀའ་ཡང་རྩོལ་མེད་ཀྱི་ཉམས་ལེན། །ཆོས་ཕུང་བརྒྱད་ཁྲིའི་འགགས་མདུད་རང་གྲོལ་དུ་གཏོང་བ། །སྙིང་དབུས་མི་ཟད་ཆོས་ཀྱི་གཏེར་སྒོ་དེ་འབྱེད་པའི། །ལམ་མཆོག་འདི་དང་ལྡན་ན་ནགས་ཚལ་ལ་མེ་བཞིན། །སྙིགས་མའི་རྐྱེན་ངན་སྣ་ཚོགས་ལམ་ཁྱེར་དུ་ནུས་པའི། །རྣལ་འབྱོར་སྐལ་ལྡན་དེ་ཚོ་སྐྱིད་པ་ཡི་རབ་མཆོག །ཕ་མེས་རིག་འཛིན་བརྒྱུད་པའི་ཕ་འབབ་ལ་བརྟེན་ཏེ། །གཞན་གྱིས་བསྐལ་མང་འབད་པས་བསྒྲུབ་ནའང་དཀའ་བའི། །སྲིད་གསུམ་འཁོར་བའི་གཡང་ས་རིག་རྩལ་གྱིས་གཅོད་ཅིང་༌། །གྲུབ་མཆོག་རིག་འཛིན་དཔའ་བོའི་དགའ་ཚལ་ལ་ཡུད་ཀྱིས། །མཁའ་ལ་ཁྱུང་ལྡིང་བཞིན་དུ་གཅིག་རྗེས་གཅིག་སླེབ་པའི། །གྲུབ་བརྙེས་བརྒྱུད་ལྡན་བླ་མའི་གྲལ་རིམ་ལ་བསམ་ན། །གྲལ་མཐའི་བཙུན་ཆུང་བདག་ཀྱང་ཉམས་དགའ་ཡི་ངང་ནས། །སྐྱིད་པའི་གླུ་ཆུང་ལེན་སྙིང་འདོད་པ་ཞིག་བྱུང་ངོ་༌། །གཟུང་འཛིན་ཚ་དབལ་འཁྲུགས་པའི་ཀུན་རྟོག་གི་སེམས་ལ། །ཅིར་བྱས་ཅིར་མི་ལོ་བའི་རང་གཤིས་སུ་ཤོར་བས། །མང་ཐོས་མང་སྨྲ་མང་དུ་བསམ་པ་ཡི་སྐྱེ་བོ། །མང་ཞིག་ཚོགས་ཀྱང་དམུས་ལོང་རྣམས་ཀྱིས་ནི་ཉི་ཟླ། །ཇི་བཞིན་ཕྱོགས་ཙམ་མི་ཤེས་ཆོ་ངེ་རང་སྒྲོག་མོད། །བརྒྱུད་ལྡན་བླ་མའི་མན་ངག་ཡིད་གཏིང་དུ་ཁེལ་བས། །བློ་འདས་ཡེ་ཤེས་རྩི་སྨན་ཅུང་ཟད་ཅིག་ཐེབས་པས། །མ་གོམས་དེ་གར་ལུས་ཀྱང་སྐྱིད་པོ་རང་འདུག་གོ །རིགས་གསུམ་རྒྱལ་བ་འདུས་པའི་ངོ་བོ་ཡི་བླ་མ། །མཚན་ཙམ་དྲན་པས་བྱིན་རླབས་ཆར་སྤྲིན་ལྟར་གཡོ་བ། །བོད་ལ་བཀའ་དྲིན་མཚུངས་མེད་རིག་འཛིན་གྱི་སློབ་དཔོན། །མཚོ་སྐྱེས་རྡོ་རྗེའི་ཞབས་པད་འདོད་འབྱུང་གི་ནོར་བུ། །སྤྱི་བོའི་གཙུག་ཏུ་བསྒོམ་པའི་སྐལ་བཟང་འདི་ཐོབ་པ། །ལྷ་སྐལ་ཆད་པའི་དད་མེད་འགའ་ཞིག་ལ་བསམ་ན། །དད་པའི་གནས་ལ་དད་པ་རྙེད་པ་འདི་རྙེད་པའི། །མཆོག་ཏུ་ཡིད་ཆེས་དེ་ཕྱིར་སྐྱིད་པོ་རང་འདུག་གོ །སྔ་འགྱུར་གསང་སྔགས་གདམས་པ་བདུད་རྩི་ཡི་བཅུད་བཟང་༌། །རྣ་ལམ་འལ་འོལ་བྱུང་ཡང་སྙིང་ག་རུ་མ་སོན། །ཟབ་མོའི་གནས་ལས་ཕྱིར་ཕྱོགས་རིག་འཛིན་གྱི་བགོ་སྐལ། །ཆད་པའི་སྐྱེ་བོ་མང་ཞིག་སྙིང་རྗེ་ཡི་འོས་ཀྱང་༌། །བླ་མ་ལྷ་དང་དཀྱིལ་འཁོར་དམ་ཚིག་གི་གྲོགས་པོ། །རང་སྣང་དག་པའི་ངོས་ན་དབྱེར་མེད་ཀྱི་ཚོམ་བུ། །རྔ་ཡབ་དཔལ་རིར་འགྲོགས་པའི་དགའ་སྟོན་ལ་བསམ་ན། །ཉམས་དགའི་སྐྱིད་བྲོ་མི་འཁྲབ་རང་དབང་ནི་མི་འདུག །མ་ཧཱ་གུ་རུ་བློ་ལྡན་མཆོག་སྲེད་ཀྱི་ངོ་བོ། །ཁྱབ་བདག་འཇམ་དཔལ་རྡོ་རྗེའི་བདག་ཉིད་དུ་བཞུགས་ལ། །ཡིད་ཆེས་དད་པས་གསོལ་འདེབས་ཉུང་ཤས་ཤིག་བགྱིས་ཀྱང་༌། །སྤོབས་པའི་གཏེར་ཆེན་བརྒྱད་ཀྱི་སྒོ་འཕར་དེ་འབྱེད་ལ། །སྐྱེས་བུའི་མིག་འཛུམ་ཙམ་ཀྱི་དཀའ་བ་ནི་མེད་ཚོད། །དུས་ངན་ལྟ་བའི་སྙིགས་མ་བདོ་བར་ནི་ལྷུང་ཕྱིར། །རང་དབང་ཟབ་དོན་རྟོགས་པ་དཀའ་ཚོད་དུ་འདུག་ཀྱང༌། །མོས་ལྡན་རེ་ཟུང་ཡོད་ན་སྐྱིད་པོ་རུ་འདུག་གོ །རིག་སྟོང་གཉུག་མ་ཆོས་སྐུ་ཆེན་པོ་ཡི་རང་ཞལ། །གྲངས་མེད་དཀའ་བ་སྤྱད་པའི་ཐ་མ་ལས་གཞན་དུ། །མཐོང་བའི་རེ་བ་བྲལ་ཡང་ཟབ་དོན་གྱི་མན་ངག །གནད་དུ་འབྱོར་ན་མི་ཚེ་འདི་ཉིད་ཀྱི་ཕྱེད་ལ། །མཐོང་ལ་ལ་ཐང་མེད་ཕྱིར་བླ་མ་ཡི་གདམས་ངག །དཀོན་ལ་དཀོན་པར་མཐོང་ནས་ཡིད་ཆེས་ཀྱི་དད་པ། ནགས་ལ་མེ་བཞིན་འཕེལ་བས་གཞན་ཟེར་གྱི་ཚང་ཚིང་༌། །ཐེ་ཚོམ་དྲྭ་བ་ཆོད་པ་དེ་ཕྱིར་དེང་སྐྱིད་དོ། །དེང་དུས་ལེགས་ལེགས་ཚིག་སྐམ་ཆོ་ག་ཡི་ལྗོན་ཤིང་༌། །དོན་བརྒྱུད་བྱིན་རླབས་རླན་བྲལ་འབྲས་མེད་ཀྱི་བསྟི་གནས། །སྐལ་མེད་བྱ་ཚོགས་མང་པོས་བསྟེན་པ་རུ་མཐོང་ཚེ། །བླ་མའི་བྱིན་རླབས་སྤྲིན་ལས་གདམས་ངག་གི་ཆར་རྒྱུན། །གང་དུ་ཕེབ་པར་རྩ་གསུམ་སྲུང་མ་ཡི་དགྱེས་ཞལ། །ལྷག་ལྷག་ངོམས་པས་དོན་གཉིས་འབྲས་བཟང་དུ་སྨིན་ནས། །ཚར་གཅོད་རྗེས་འཛིན་མཐུ་སྟོབས་ནུས་པ་ཡི་མངའ་དབང༌། །མི་འབྱོར་རང་དབང་མེད་འདི་སྐྱིད་པོ་རུ་གདའོ། །ཟབ་དོན་མཁའ་འགྲོའི་གསང་མཛོད་བཀའ་གཏེར་གྱི་མཛོད་ཁང་༌། །ཕ་ཕོག་བུ་ལ་གདམས་ལྟར་གུ་རུ་ཡི་ཐུགས་རྗེས། །སྔ་འགྱུར་རིང་ལུགས་འཛིན་ལ་བགོ་སྐལ་དུ་གནས་པས། །བློ་ལྡན་མོས་ལྡན་སྐལ་ལྡན་ཀུན་ཚང་ཞིག་སྲིད་ན། །ནོར་བུའི་གླིང་ནས་ས་རྡོ་ཕལ་པ་ཡི་གླིང་དུ། །མ་བགྲོད་འདིར་འདུས་འདིར་ལྟོས་འདི་ཉིད་ལ་ཞུགས་དང་༌། །དོན་གཉིས་འགྲུབ་ལ་ལ་ཐང་མེད་པ་འདྲ་འདུག་པས། །དོན་གྲུབ་བཟང་པོས་སྨྲས་འདི་དོན་ལྡན་དུ་མཛོད་ཅིག །དེ་སྐད་སྨྲས་པ་དེ་ལ་དེ་བཞིན་དུ་དད་པའི། །སྐལ་ལྡན་དེ་ལ་རྩ་གསུམ་སྲུང་མ་ཡི་དགྱེས་ཞལ། །མངོན་དུ་ཕྱོགས་བཞིན་དགེ་མཚན་དབུགས་དབྱུང་གི་གསུང་གདངས། །འབྲུག་སྒྲ་སྟོང་ལྟར་སྒྲོག་ཅིང་དགེ་ལེགས་ཀྱི་མེ་ཏོག །སིལ་སིལ་ཆར་དུ་བསྙིལ་ནས་མི་མཐུན་པའི་ཕྱོགས་ལས། །རྟག་ཏུ་རྣམ་པར་རྒྱལ་བའི་གྲགས་སྙན་གྱི་བ་དན། །སྲིད་པ་གསུམ་ན་མཚུངས་མེད་མངོན་པར་ནི་མཐོ་བའི། །བཀྲ་ཤིས་སྣང་བ་མཆོག་གིས་མངའ་གསོལ་དུ་མཛོད་ཅིག ། ཅེས་པའང་མི་ཕམ་རྣམ་པར་རྒྱལ་བས་བྲིས་པ་དགེ་ལེགས་འཕེལ་ལོ། །མངྒ་ལཾ།། །།…