ཨེ་ཝྃ་ཧོ།

༄༅།།དགེ་མང་མཁན་ཆེན་བསོད་ནམས་འོད་ཟེར་རིན་པོ་ཆེའི་ཞབས་བརྟན།Long Life Prayer for Gemang Khenchen Sonam Wozer Rinpoche格曼堪欽蘇南奧色仁波切長壽祈請文 རྩོམ་པ་པོ། རིག་འཛིན་དཔལ་དགྱེས་པ་རྡོ་རྗེ།By Vidyadhara Shri Ananta Vajra金剛持師利阿難陀金剛造 བླ་མ་མཁྱེན།།Guru, look at me!上師，請您鑒知我！ ཐུགས་རྗེ་ཆེན་པོས་མ་ལུས་འགྲོ་ལ་བྱམས།།You who have great Compassion and kindness for all sentient beings,您是一切眾生慈悲仁厚之怙主 ཤེས་རབ་ཆེན་པོས་ཤེས་བྱ་རབ་འབྱམས་གཟིགས།།With your great Wisdom, you see immeasurable noble knowable things.兼具廣大智慧統攝無量聖言教 མཁྱེན་བརྩེའི་བསོད་ནམས་འོད་ཟེར་རིན་པོ་ཆེ།།You who have Wisdom, love and great merit of precocious lights智慧慈愛功德光耀集結於一身 སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག།May you have a long life and all of your wishes come true spontaneously, I pray.願您長壽無礙諸事如意任運成 ཅེས་པ་མཁན་ཆེན་དམ་པ་ཉིད་དང་བཀའ་མོལ་བྱུང་བའི་མོད་ལ་རིག་འཛིན་དཔལ་དགྱེས་པ་རྡོ་རྗེས་སྙིང་ནས་སྨོན་པར་དགེའོ།། སྤྱི་ལོ་༡༢/༡/༢༠༢༠་ལ།།This is Precious Khenchen as spoken by Vidyadhara Shri Ananta Vajra come from essence mind. All the best to you. 12 January 2020金剛持師利阿難陀金剛從心間流出精華要義，造此文贈與堪欽如意寶，願堪欽一切如意吉祥；陽曆二零二零年一月十二日。愿你拥有美丽的新年所有的祝福。Wishing you all the…

ཏོག་དབྱིབས་ནད་དུག་གིས་བསྐྱེད་པའི་གློ་ཚད་གསར་པ་སྔོན་འགོག་བྱེད་ཐབསསྤྱིར་ཕྲན་ཆུང་ནི་ཨེ་འགོག་རང་འདུན་པ་ཞིག་ཡིན་པས།ནམ་རྒྱུན་ཨེ་འགོག་ཐད་ནས་རྒྱུན་ཤེས་དྲིལ་སྒྲོག་བྱ་མཁན་ཞིག་ཡིན་ལ། ཧུའུ་པེ་ཞིང་ཆེན་ཝུའུ་ཧན་གྲོང་ཁྱེར་ནས་བྱུང་བའི་ནད་དུག་འདི་ཨེ་ཛི་མིན་ལ་ཨེ་ཛི་དང་འབྲེལ་བ་མེད་རུང་།འགོ་ཚད་དང་ཚེ་སྲོག་འཆོར་ཚད་སོགས་གང་ཅིའི་ཐད་ནས་ཨེ་ཛི་ལས་ཚབས་ཆེ་བར་འདུག་ལ།མི་མང་པོས་དྲྭ་ལམ་བརྒྱུད་ནས་དྲི་བ་འདོན་ཡོང་བཞིན་འདུག་ཕྱིན།གཅིག་གྱུར་གྱིས་ལན་འདི་དག་གྲ་སྒྲིག་བྱས་པའོ། །ད་ཐེངས་ཧུའུ་པེ་ཞིང་ཆེན་གྱི་ཝུའུ་ཧན་གྲོང་ཁྱེར་ནས་བྱུང་བའི་གློ་ཚད་གསར་པ་འདི་ཏོག་དབྱིབས་ནད་དུག་གི་རིགས་ཁོངས་སུ་གཏོགས་ཤིང་།དེ་སྔོན་མིའི་རིགས་ལ་འགོ་སྲིད་པའི་ཏོག་དབྱིབས་ནད་དུག་རིགས་དྲུག་སྙེད་ཡོད་ཅིང་། ད་ཐེངས་ཝུའུ་ཧན་ནས་བྱུང་བའི་ནད་དུག་འདི་བརྩིས་ན།མིའི་རིགས་ལ་འགོ་སྲིད་པའི་ཏོག་དབྱིབས་ནད་དུག་རིགས་བདུན་ཡོད་པ་རེད་ཟེར།ཕྱི་ལོ༢༠༡༩ལོའི་ཟླ༡༢པ་ནས་བཟུང་།ཝུའུ་ཧན་གྲོང་ཁྱེར་དུ་ངོས་མི་ཟིན་པའི་ནད་དུག་གསར་པའི་གློ་ཚད་བསྟུན་མར་བྱུང་ཞིང་། ཕྱི་ལོ༢༠༢༠ལོའི་ཟླ༡ཚེས༨ཉིན་དངོས་སུ་ཏོག་དབྱིབས་ནད་དུག་གིས་བསྐྱེད་པའི་གློ་ཚད་གསར་པ་ཞེས་མིང་བཏགས་པ་ཞིག་རེད་འདུགནད་དུག་འདི་བྱུང་ནས་ད་བར་ཟླ་བ་གཉིས་ཀྱང་སོང་མེད་རུང་།ཧུའུ་པེ་ཞིང་ཆེན་ནས་ནད་པ༤༤༤བྱུང་ཡོད་པ་གསར་བསྒྲགས་བྱས་འདུག་ལ། དེ་ལས་ནད་པ༡༧གྱི་ཚེ་སྲོག་ཤོར་ཚར་འདུགཟླ་བ༡ཚེས༢༣ཉིན་གྱི་གསར་བསྒྲགས་ལྟར་ན། ད་བར་དུ་རྒྱལ་ཡོངས་ས་ཆ་སོ་སོ་ནས་གསར་རྙེད་བྱུང་བའི་ཏོག་དབྱིབས་ནད་དུག་གིས་བསྐྱེད་པའི་གློ་ཚད་གསར་པའི་ནད་པ༥༧༡འདུག་ཅིང་།དེ་དག་ནི་ཧུའུ་པེ་དང་། ལའོ་ནིང་། ཨན་ཧེ། ཧུ་ནན། ཧྥུ་ཅན། ཀའེ་ཀྲུའུ། སི་ཁྲོན།ཁྲོང་ཆིང་། ནིང་ཤ། ཧྲན་ཞི། ཀང་ཞི། ཧི་ནན། ཧྲན་ཏུང་། ཧི་པེ་སོགས་ཞིང་ཆེན༢༠ལྷག་དང་ཨ་རི་དང་འཇར་པན་ལ་སོགས་ཕྱིའི་རྒྱལ་ཁབ༤ནས་ནད་པ་གསར་རྙེད་བྱུང་འདུགགཅིག ནད་དུག་གི་འབྱུང་ཁོངས་སྐོར།སྤྱིར་ཏོག་དབྱིབས་ནད་དུག་ལ་འབྱུང་ཁོངས་ཀྱི་ཐད་ནས་དབྱེ་ན་རིགས་ཆེན་པོ་བཞི་ཡོད་པར་བཤད་ཅིང་།དེ་ལས་འོ་འཐུང་སྲོག་ཆགས་ཏེ། ཕ་ཝང་དང་ཕག ཁྱི། བྱི་ལ། ཙི་གུ། ཟོགརྟ་སོགས་ལས་བརྒྱུད་པའི་ཏོག་དབྱིབས་ནད་དུག་ནི་ཨར་ཧྥ་དང་པེ་ཐའི་རིགས་ཀྱི་ཏོག་དབྱིབས་ནད་དུག་ཏུ་གཏོགས་ལ།པེ་ཐའི་རིགས་ཀྱི་ཏོག་དབྱིབས་ནད་དུག་ལ་རིགས་ཀ་པ་དང་ཁ་པ།ག་པ་དང་ང་པ་ཞེས་མི་འདྲ་བར་བཞི་དབྱེ་རྒྱུ་ཡོད་ཅེས་གསུངས་འདུག གཞན་གཉིས་ནི་འདབ་ཆགས་ཏེ།ཁྱིམ་བྱ་དང་བྱ་དེ་མགྲིན་དམར། བྱིའུ། བྱ་གག། ངང་པ། ཕུན་རོན་སོགས་ལས་བརྒྱུད་པའི་ཏོག་དབྱིབས་ནད་དུག་ཀ་མ་དང་དར་ཐའི་རིགས་ཀྱི་ཏོག་དབྱིབས་ནད་དུག་ཏུ་གཏོགས་པ་རེད་ཟེར། གཞན་ད་ཐེངས་ཝུའུ་ཧན་གྲོང་ཁྱེར་ནས་བྱུང་བའི་ནད་དུག་འདི་གོང་གི་འབྱུང་ཁོངས་ཐད་ནས་དབྱེ་བའི་རིགས་བཞི་ཡོད་པ་ལས་གང་གི་ཁོངས་སུ་གཏོགས་པའི་སྐོར་ད་དུང་གསལ་བོ་ཞིག་བཤད་མི་འདུགགཉིས། ནད་དུག་གི་འགོ་ལམ་སྐོར།ནད་དུག་འདིའི་ལོ་ལམ་ནི་གཙོ་བོ་ཁ་སྣ་གཉིས་ཡིན་རུང་།ཁྱིམ་དུ་གློ་ཚད་གསར་བའི་ནད་པ་བྱུང་མཁན་གྱི་ཁྱིམ་ཚང་ཡིན་ན། ཁྱིམ་མི་གཞན་པ་ཚོས་ནད་པས་སྤྱོད་མྱོང་བའི་གོན་པ་དང་ཅ་ལགཁྱིམ་ཆས་སོགས་ལ་དུག་སེལ་ཡང་དག་བྱེད་དགོས་ལ། རང་ཉིད་ཀྱི་རྨ་ཁ་དང་འབྱར་སྐྱི་སོགས་ལའང་དུག་སེལ་ཡག་པོ་བྱེད་དགོས་ཞེས་གསུངས་འདུགགསུམ། ནད་དུག་འདི་སྔོན་འགོག་བྱེད་ཐབས།༡ ཕྱོགས་ཡར་མར་ལ་འགྲོ་འདུག་མི་མང་བ།༢ མི་མང་ཚོགས་ས་རུ་མི་འགྲོ་བ།༣ནམ་རྒྱུན་གྲོང་ནང་དུ་འགྲོ་སྐབས་སྨན་སྤྱོད་ཁ་ཤུབས་དང་། N95ཡི་ཚད་གཞིར་སླེབས་ཡོད་པའི་ཁ་ཤུབས་བེད་སྤྱོད་བྱ་བ།༤ དུས་རྒྱུན་ལག་པ་འདག་ཆལ་གྱིས་ལེགས་པོ་བཀྲུ་བ་དང་། སྦུག་ཆུ་སོགས་འབབ་ཆུའི་ནང་དུ་ལེགས་པོར་བཤལ་བ།༥ ཚོགས་ཁང་དང་སློབ་ཁང་སོགས་ཀྱི་སྒོ་དང་སྒེའུ་ཁུང་ལེགས་པར་ཕྱེ་ནས་མཁའ་དབུགས་ལེགས་པོར་རྒྱུ་རུ་འཇུག་པ་སོགས་སོ།།༦ སྦྲིད་པ་བརྒྱབས་རྗེས་ལག་པ་མ་བཀྲུས་པར་མིག་འཕུར་བ་སོགས་བྱ་མི་རུང་།༧ གོང་སྔོན་འགོག་བྱེད་ཐབས་ཚང་མ་སྤྱད་རྗེས།གཟུངས་སྔགས་རྡོ་རྗེ་གོ་ཁྲབ་སོགས་བཟླས་ན། རིག་སྔགས་ཀྱི་ནུས་པས་ཀྱང་ཕན་ཆེན་པོ་ཐོགས་སྲིད་པས།རྣམ་པ་ཚོས་རང་རང་གི་ས་ནས་བླ་མ་ཚད་ལྡན་རེའི་མདུན་རིག་སྔགས་འདི་ཞུས་ཤིང་བཟླ་བར་མཁྱེན། ཨོཾ་པདྨ་ཤ་བ་རི་ཕཊ༔ ནན་པར་ཤིག༔ ནཱ་ག་ནན༔ ཏདྱ་ཐཱ༔ སརྦ་ཝི་རི་ཏ༔ ཧ་ན་ཧ་ན་བཛྲེ་ན་རཀྵ་རཀྵ་སྭཱ་ཧཱ༔བཞི། ནད་དུག་འདི་ལ་ནད་རྟགས་གང་དག་ཡོད།ལུ་བ་རྒྱུན་མི་འཆད་པ་དང་།ཚ་བ་མཐོན་པོར་རྒྱས་པ། དབུགས་ལེན་དཀའ་བ་སོགས་ཀྱི་ནད་རྟགས་བྱུང་སྐབས་ངེས་པར་དུས་ལྟར་དུ་བརྟག་བཤེར་བྱ་རུ་འགྲོ་དགོས།ཡིན་ནའང་། འགྲོ་སྐབས་ཅི་ནུས་ཀྱིས་སྤྱི་སྤྱོད་རླངས་འཁོར་སོགས་ཀྱི་ནང་མི་འགྲོ་ཞིང་།མྱུར་སྐྱོབ་རླངས་འཁོར་དང་སྒེར་འཁོར་སོགས་ཀྱི་ནང་འགྲོ་བ་དང་།དེའང་ཁྱིམ་མི་སོགས་ནད་གཡོག་མང་པོ་མི་ཁྲིད་པ་དང་། མཉམ་འགྲོ་བྱེད་མཁན་ཚང་མས་དོགས་ཟོན་ནན་མོ་བྱ་བ་དང་།དུས་ལྟར་རྟོག་ཞིབ་ནན་མོ་བྱ་བ་ནི་རང་གཞན་ཚང་མར་འགན་ཁུར་བའི་རྟགས་ཤིག་ཡིན་ནོ། །ལྔ། ནད་དུག་འདི་ལ་བརྟག་བཤེར་ཅི་ལྟར་བྱ་དགོས།ནད་དུག་འདི་ཡོད་མེད་བརྟག་བཤེར་བྱ་སྐབས་ཉིང་སྐྱུར་བརྟག་ཐབས་ཤིག་བྱུང་ཡོད་པར་བཤད་ཀྱང་།ད་རུང་དྲྭ་ཐོག་ཏུ་འབྲེལ་ཡོད་བརྟག་ཤོག་ནི་བཙོང་རྒྱུ་བྱུང་མི་འདུག་པས།ངེས་པར་དུ་ཚད་ལྡན་སྨན་ཁང་ལས་ཞིབ་པར་བརྟག་དགོས་ཀྱི། ད་ལྟར་མ་བྱས་ན། ནད་དུག་འགོས་ནས་ཉིན་ཤས་ཀྱི་རྗེས་ནས་དབུགས་ལེན་མི་ཐུབ་པ་སོགས་སུ་གྱུར་ནས་ཚེ་སྲོག་འཆོར་བའི་ཉེན་ཁ་ཡོད་པ་རེད།གཞན་ད་དུང་ཤེས་དགོས་པ་ཞིག་ལ། གློ་གཅོང་དང་རྒྱུན་ལྡན་གློ་ཚད་སོགས་ལའང་གོང་གི་ནད་རྟགས་དག་ཡོད་སྲིད་པས།ངེས་པར་དུ་ཚད་ལྡན་སྨན་ཁང་ནས་བརྟག་བཅོས་ཡང་དག་གནང་རོགས།དྲུག ནད་དུག་འདི་སྨན་བཅོས་བྱ་ཐབས།ཏོག་དབྱིབས་ནད་དུག་གིས་བསྐྱེད་པའི་གློ་ཚད་གསར་པ་འདི་ལ་ད་བར་སངས་བཅོས་ཐུབ་པའི་སྨན་དམིགས་བསལ་བ་གཅིག་ཀྱང་བྱུང་མེད་རུང་།སྔ་བརྟག་དང་སྔ་བཅོས་བྱས་ན། རྟགས་བསྟུན་སྨན་བཅོས་ཀྱིས་ཕན་ངེས་ཅན་ཐོགས་བཞིན་ཡོད་པས།ད་བར་ནད་པ༡༩སངས་བཅོས་ཐུབ་ཅིང་ཕྱིར་རང་ཁྱིམ་དུ་ལོག་ཟིན་འདུག ད་རུང་ཝུའུ་ཧན་སློབ་ཆེན་གྱི་ཀྲུང་ནན་སྨན་ཁང་ཆེན་མོས་གློ་ཚབ་རམ་འདེགས་ཀྱི་སྨན་བཅོས་བྱེད་ཐབས་ཤིག་སྤྱད་ནས་མི་གཅིག་སངས་བཅོས་བྱུང་ཡོད་པའི་སྐོར་ཀྱང་གསུངས་བཞིན་འདུག་པས།དངངས་སྐྲག་ཐལ་དྲགས་པ་བྱ་མི་རུང་ལ། འབྲེལ་ཡོད་གཏམ་འཆལ་སྤེལ་མི་རུང་ཞིང་།ནམ་ཡང་རང་ལུས་རིན་པོ་ཆེ་ལ་བདག་སྲུང་ལེགས་པོ་གནང་རོགས་ཞེས། ཨེ་འགོག་རང་འདུན་པ།ཆོས་དཔལ་བཟང་པོས།ཕྱི་ལོ༢༠༢༠ལོའི་ཟླ༡ཚེས༢༢ཉིན།སྤོས་ལྡན་ནས།

བཀྲ་ཤིས་བདེ་ལེགས་ཕུན་སུམ་ཚོགས།།ཨེ་མ་ཧོ།།འབྱུང་བ་ཆ་མཉམ་ཕྱི་ཡི་བཀྲ་ཤིས་འཕེལ།།ཞི་ལྷག་ཆ་མཉམ་ནང་གི་བདེ་ལེགས་འཕེལ།།དད་གུས་དག་མཉམ་གསང་བ་ཕུན་སུམ་ཚོགས།།འཕགས་པ་ཀུན་ཏུ་བཟང་པོ་རྒྱལ་གྱུར་ཅིག།བཀྲ་ཤིས་གངས་དཀར་རི་བོ་བཀྲག་མདངས་གསལ།།བདེ་ལེགས་བྱང་ཆུབ་སེམས་ལ་མངའ་དབང་འབྱོར།།ཕུན་ཚོགས་མཐའ་དག་སྣོད་བཅུད་ཁྱབ་གྱུར་ནས།།ཕྱོགས་ལས་རྣམ་པར་རྒྱལ་བའི་དགེ་མཚན་གང་།།འཇིག་རྟེན་ཁམས་སུ་རིང་དུ་འཚོ་གྱུར་ཅིག།ཕྱོགས་དུས་རྒྱལ་བའི་སྐུ་གསུང་ཐུགས་ཡོན་བཀྲ།།རྒྱལ་སྲས་སེམས་དཔའི་དགོངས་དོན་ཡིད་བཞིན་ཤིས།།སྣོད་བཅུད་རྣམ་དག་གསང་གསུམ་དགྱེས་པས་བདེ།།དགེ་ལེགས་སྣང་བས་ས་གསུམ་ཁྱབ་པར་ཤོག།ཅེས་པ་འདི་ཡང་རབ་གནས་ས་ཕག་རྒྱལ་ཟླའི་དབང་ཕྱོགས་སྟོང་པ་གསུམ་པར་ཤྲཱིཿསྨྱོན་པས་དགེ་མང་ཨོ་རྒྱན་བསམ་གཏན་ཆོས་གླིང་གི་སེངྒྷ་གླིང་གི་རྫོགས་ཆེན་ཆོས་ཚོགས་གང་གི་གསོལ་ཇ་ཁང་ནས་དགེ་བསྙེན་རིག་པ་འཛིན་པ་ཏྲིག་སོན་གྱིས་དད་གུས་རྐྱེན་ལས་སྨོན་པར་དགེའོ།།

ཤེས་རབ་སྙིང་པོའི་མདོ་བཞུགས་སོ།། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན།།མ་སྐྱེས་མི་འགགས་ནམ་མཁའི་ངོ་བོ་ཉིད།།སོ་སོར་རང་རིགས་ཡེ་ཤེས་སྤྱོད་ཡུལ་བ།།དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ།།རྒྱ་གར་སྐད་དུ། བྷ་ག་ཝ་ཏི་པྲ་ཛྙཱ་པཱ་ར་མི་ཏཱ་ཧྲི་ད་ཡ། བོད་སྐད་དུ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་བོའི་རི་ལ་དགེ་སློང་གི་དགེ་འདུན་ཆེན་པོ་བྱང་ཆུབ་སེམས་དཔའི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་སྤྱོད་པ་ཉིད་ལ་རྣམ་པར་བལྟ་ཞིང་། ཕུང་བོ་ལྔ་བོ་དེ་དག་ལ་ཡང་རང་བཞིན་གྱིས་སྟོང་བར་རྣམ་པར་བལྟའོ། ། དེ་ནས་སངས་རྒྱས་ཀྱི་མཐུས། ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་སྤྱོད་པ་སྤྱད་པར་འདོད་པ་དེས། ཇི་ལྟར་བསླབ་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །ཤཱ་རིའི་བུ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་སྤྱོད་པ་སྤྱད་པར་འདོད་པ་དེས་འདི་ལྟར་རྣམ་པར་བལྟ་བར་བྱ་སྟེ། ཕུང་བོ་ལྔ་བོ་དེ་དག་ཀྱང་། རང་བཞིན་གྱིས་སྟོང་བར་ཡང་དག་པར་རྗེས་སུ་བལྟའོ། །གཟུགས་སྟོང་བའོ། །སྟོང་བ་ཉིད་གཟུགས་སོ། །གཟུགས་ལས་ཀྱང་སྟོང་བ་ཉིད་གཞན་མ་ཡིན། སྟོང་བ་ཉིད་ལས་ཀྱང་གཟུགས་གཞན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་སྟོང་བའོ། ། ཤཱ་རིའི་བུ། དེ་ལྟ་བས་ན་ཆོས་ཐམས་ཅད་སྟོང་བ་ཉིད་དེ། མཚན་ཉིད་མེད་པ། མ་སྐྱེས་པ། མ་འགགས་པ། དྲི་མ་མེད་པ། དྲི་མ་དང་བྲལ་བ་མེད་པ། བྲི་བ་མེད་པ། གང་བ་མེད་པའོ། ། ཤཱ་རིའི་བུ། དེ་ལྟ་བས་ན་སྟོང་བ་ཉིད་ལ་གཟུགས་མེད། ཚོར་བ་མེད། འདུ་ཤེས་མེད། འདུ་བྱེད་རྣམས་མེད། རྣམ་པར་ཤེས་པ་མེད། མིག་མེད། རྣ་མེད། སྣ་མེད། ལྕེ་མེད། ལུས་མེད། ཡིད་མེད། གཟུགས་མེད། སྒྲ་མེད། དྲི་མེད། རོ་མེད། རེག་བྱ་མེད། ཆོས་མེད། མིག་གི་ཁམས་མེད་པ་ནས་ཡིད་ཀྱི་ཁམས་མེད། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་ཡང་མེད་དོ། །མ་རིག་པ་མེད། མ་རིག་པ་ཟད་པ་མེད་པ་ནས་རྒ་ཤི་མེད། རྒ་ཤི་ཟད་པའི་བར་དུ་ཡང་མད་དོ། །དེ་བཞིན་དུ་སྡུག་བསྔལ་བ་དང་། ཀུན་འབྱུང་པ་དང་། འགོག་པ་དང་། ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ། ། ཤཱ་རིའི་བུ། དེ་ལྟ་བས་ན། བྱང་ཆུབ་སེམས་དཔའ་རྣམས་ལ་ཐོབ་པ་མེད་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་བརྟེན་ཅིང་གནས་ཏེ། སེམས་ལ་སྒྲིབ་པ་མེད་ཅིང་སྐྲག་པ་མེད་དེ། ཕྱིན་ཅི་ལོག་ལས་ཤིན་ཏུ་འདས་ནས། མྱ་ངན་ལས་འདས་པའི་མཐར་ཕྱིན་ཏོ། །དུས་གསུམ་དུ་མངོན་པར་བཞུགས་པའི་སངས་རྒྱས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་བརྟེན་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས། རིག་པ་ཆེན་པོའི་སྔགས། བླ་ན་མེད་པའི་སྔགས། མི་མཉམ་པ་དང་མཉམ་པར་བྱེད་པའི་སྔགས། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས། མི་རྫུན་པས་ན་བདེན་པར་ཤེས་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་སྨྲས་པ། ཏདྱ་ཐཱ། ཨོཾ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་བསླབ་པར་བྱའོ།…

ཤར་ཕྱོགས་སུ་འཕུར་རན་ཐལ།ཨེ་མ་ཧོ།།ཨེ་མ་དཀོན་མཆོག་གསུམ་ལ་ཕྱག་འཚལ་ལོ།།ཨ་ཧོ་རྩ་གསུམ་ཆོས་སྲུང་བརྔན་གསོལ་བཅས།།བསྟན་དང་འགྲོ་ལ་ཕན་བདེའི་ཀུན་སློང་ངང་།།ཁྲི་ཕྲག་ལེ་བར་བརྒལ་ནས་ཆོས་འཆད་དོ།།སྙིགས་ལྔའི་མུན་ནག་རབ་ཏུ་འཁྲིགས་ན་ཡང་།།ཨེ་ཝཾ་ཉི་ཟླའི་སྤྱན་རས་གཡོ་བའི་མོད།།བསྐལ་མང་བག་ལ་ཡིབ་པའི་རྨོངས་མུན་ཀུན།།སྐད་ཅིག་སེལ་མཛད་བུདྡྷ་ཛྙཱ་ན་རྒྱལ།།ལུས་ཀྱི་བདེ་ཐང་འབྱུང་བ་ཆ་རེ་མཉམས།།སེམས་ཀྱི་བདེ་ཐང་གུ་ཡངས་བློ་བདེའི་ངང་།།རང་ཚོད་རང་གིས་ཟིན་པའི་རྒྱལ་ཁམས་པ།།རེ་ཞིག་ཤར་ཕྱོགས་ཡུལ་དུ་འགྲོ་དོན་མཆིས།།མཁའ་འགྲོ་སྔོན་མོས་ལུང་བསྟན་དངོས་སུ་བྱུང་།།དམ་ཚིག་ལྡན་པས་སྔོན་རྗེས་བསུ་མ་བཅས།།ཨ་མ་བླ་མ་མཆོད་པའི་སྟ་གོན་རིགས།།ཅི་དགོས་འདོད་དོན་བསྐང་བའི་གྲོགས་བཟང་རྒྱལ།།རྒྱ་ནག་ནད་ངན་རིགས་ལ་དོག་ཟོན་དགོས།།བོད་ནག་ཕྲག་དོག་འཁན་ལ་དེ་བས་གཟབ།།བྱེའུ་ཆུང་ཁྲ་མོས་རྒུ་འབུ་འཐུ་བ་བཞིན།།ཆོས་བཞིན་སྤྱོད་པའི་གྲོགས་ལས་བག་ཡོད་དགོས།།རིག་འཛིན་མཁའ་འགྲོ་དགྱེས་པའི་ཚེ་སྒྲུབ་དང་།།དབྱངས་ཅན་ཚངས་དབང་གྲུབ་པའི་ཆོས་སྒྲ་སྒྲོག།ལྷ་དང་ལྷ་མོ་དགའ་བའི་དགའ་སྟོན་བཅས།།ཆོས་མཐུན་ལོ་གསར་བསུ་བའི་རྟེན་འབྲེལ་བཟང་།།ཀུན་མཁྱེན་རྒྱལ་བའི་བསྟན་པ་ཕྱོགས་ཀུན་ཁྱབ།།གསང་ཆེན་ཆོས་ཀྱི་དགའ་སྟོན་རྟག་ཏུ་རོལ།།ཨེ་ཝཾ་སྙིང་ཏིག་པདྨ་དྲག་གླིང་གི།གཏེར་གསར་བསྟན་པས་འགྲོ་ཀུན་སྨིན་གྲོལ་ཤོགཅེས་རབ་གནས་ས་ཕག་རྒྱལ་ཟླའི་དབང་ཚེས་རྒྱལ་བ་གསུམ་པར་དད་བརྩོན་ཤེས་རབ་ལྡན་པའི་རྫོགས་པ་ཆེན་པོའི་རྣལ་འབྱོར་མ་པདྨ་མཁའ་འགྲོས་ངོར་ཤྲཱིཿསྨྱོན་པས་མེན་ཆི་སི་ཏྲཱིའི་རྒྱལ་སྤྱིའི་གནམ་ཐང་ནས་བྲིས་པར་དགེའོ།།

<<རྡོ་རྗེ་ལྷ་མོ་བཅུ་དྲུག་གི་མཆོད་ཕྲེང་དྲི་ཟའི་རྒྱུད་མང་>>ཞེས་པ་འདི་ནི་ངག་དབང་དབྱངས་ཅན་ལྷ་མོས་རིག་འཛིན་འཇིགས་མེད་གླིང་པ་ལ་དངོས་སུ་གནང་བའི་མཆོད་ཕྲེང་ཞིག་སྟེ། ༈ འཕགས་པ་ཀུན་ཏུ་བཟང་པོ་དང་བྱང་ཆུབ་མཆོད་པའི་ལྷ་མོ་རྣམས་ལ་ཕྱག་འཚལ་ལོ། །རྡོ་རྗེ་ལྷ་མོ་བཅུ་དྲུག་གི་མཆོད་ཕྲེང་དྲི་ཟའི་རྒྱུད་མང་ནི། མཆོད་རྫས་རྣམས་ལ་བསང་ཆུ་འཐོར་ཞིང་། ཨོཾ་ཧཱུཾ་ཏྲཱཾ་ཧྲཱིཿཨཱཿ ལྷ་རྫས་དང་ཏིང་ངེ་འཛིན་ལས་གྲུབ་པའི་ཕྱི་ནང་གསང་བའི་མཆོད་སྤྲིན་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་འདོད་ཡོན་གྱི་སྤྲིན་ཕུང་ཟད་མི་ཤེས་པ་ཀུན་ཏུ་བཟང་པོའི་མཆོད་པའི་རྣམ་རོལ་དུ་རྒྱས་པར་གྱུར་ཅིག །ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས་ལན་གསུམ་བརྗོད། སྤྲོ་ན་མཆོད་པའི་སྤྲིན་གྱི་གཟུངས་ཀྱང་འདོན། དེ་ནས་དབྱངས་ཤིན་ཏུ་སྙན་པ་དང་བཅས། ༡༽ པདྨ་རྒྱས་པ་ལྟ་བུའི་ལང་ཚོ་ཅན།།རེག་ན་བདེ་བའི་མཆོག་སྟེར་ཨུཏྤལ་མིག།གཟུགས་ཀྱི་རྣམ་འགྱུར་ངོམ་པའི་ཡིད་འཕྲོག་མ།།རྡོ་རྗེ་སྒེག་མོ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་ལཱ་སྱེ་ཧཱུཾ་པྲ་ཏཱིཙྪ་ཧོཿ ༢༽ སྲིད་ན་རྣམ་པར་མཛེས་པའི་ཟླ་བས་ཀྱང་།།བལྟ་ན་སྡུག་པའི་གཟུགས་ཀྱི་ཆར་མི་ཉེ།།ནོར་བུའི་དོ་ཤལ་འཛིན་པའི་ཡིད་འོང་མ།།རྡོ་རྗེ་ཕྲེང་བ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་མཱ་ལྱེ་ཏྲཱཾཿཔྲ་ཏཱིཙྪ་ཧོཿ ༣༽ འཇམ་མཉེན་པུཎྜ་རི་ཀའི་ལང་ཚོ་ལ།།རེག་འཇམ་དབང་པོའི་གཞུ་ཡི་འཁྲི་ཤིང་ཅན།།སྐད་སྙན་འགྱུར་ཁུགས་སྟོང་གི་གླུ་ལེན་མ།།རྡོ་རྗེ་གླུ་མའི་ཚོགས་ཀྱིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་གཱིརྟི་ཧྲཱིཿ་པྲ་ཏཱིཙྪ་ཧོཿ ༤༽ བུང་བ་པདྨའི་ཚལ་ན་གཡོ་བ་བཞིན།།ཕྱག་ཞབས་གསེར་གཡུའི་གདུ་བུས་མཛེས་པའི་གར།།མིག་འཕྲུལ་ལྟ་བུར་བསྒྱུར་བའི་གཡོ་ལྡན་མ།།རྡོ་རྗེ་གར་མའི་ཚོགས་ཀྱིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་ནིརྟི་ཨཱཿཔྲ་ཏཱིཙྪ་ཧོཿ ༥༽ བཅུ་དྲུག་ལང་ཚོས་མྱོས་པའི་རྣམ་འགྱུར་དེས།།སྙིང་ལ་དགའ་བའི་ཡ་མཚན་ཅིར་ཡང་སྟེར།།དྲི་ཞིམ་སྤོས་ཕོར་ཐོགས་པའི་སྨིན་ལེགས་མ།།རྡོ་རྗེ་བདུག་སྤོས་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་དྷཱུ་པེ་ཧཱུཾ་པྲ་ཏཱིཙྪ་ཧོཿ ༦༽ ཚངས་དབང་འཆི་མེད་བུ་མོའི་འཇོ་སྒེག་ཀྱང་།།ཤིན་ཏུ་མཛེས་པའི་ལང་ཚོས་བརྟན་པ་འཕྲོག།ཨུ་དུམ་ཝཱ་རའི་ཆུན་འཕྱང་ཡིད་འཕྲོག་མ།།རྡོ་རྗེ་མེ་ཏོག་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་པུཥྤེ་ཏྲཱཾཿཔྲ་ཏཱིཙྪ་ཧོཿ ༧༽ ཡིད་འོང་བལྟ་ན་སྡུག་པའི་མཁུར་ཚོས་ལ།།ལི་ཁྲིའི་ཐིག་ལེས་བསྐུས་པའི་རི་དྭགས་མིག།ཉི་ཟླའི་སྒྲོན་མེ་ཐོགས་པའི་བཞིན་བཟང་མ།།རྡོ་རྗེ་སྣང་གསལ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་ཨཱ་ལོ་ཀེ་ཧྲཱིཿཔྲ་ཏཱིཙྪ་ཧོཿ ༨༽ འཆི་མེད་བུ་མོའི་དཔལ་འཛིན་སྨིན་ལེགས་གཟུགས།།ཞལ་ནས་ཨུཏྤ་ལ་ཡི་དྲི་འཐུལ་ཞིང་།།བཟང་དྲུག་སྨན་གྱི་བྱུག་པས་དགྱེས་པ་སྐོང་།།རྡོ་རྗེ་དྲི་ཆབ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་གནྡྷེ་ཨཱཿཔྲ་ཏཱིཙྪ་ཧོཿ ༩༽ ལང་ཚོའི་ཆ་ཤས་རྫོགས་པའི་པདྨ་དང་།།རྣམ་འགྱུར་ཅིར་ཡང་འཆར་བའི་ཨ་དར་ཤ།ཕན་ཚུན་འགྲན་པ་ལྟ་བུའི་གཟུགས་མཛེས་མ།།རྡོ་རྗེ་མེ་ལོང་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་རཱུ་པ་ཨོཾཿཔྲ་ཏཱིཙྪ་ཧོཿ ༡༠༽ ཏིང་འཛིན་རི་མོ་མཁན་གྱིས་བྲིས་པའི་གཟུགས།།བཞིན་མཛེས་མནྡྷཱ་ར་བའི་ཐོད་བཅིངས་ཅན།།ཟླུམ་པོའི་རྔ་ལས་བདེ་སྟོང་སྒྲ་འབྱིན་མ།།རྡོ་རྗེ་རྔ་ཟླུམ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་ཝི་ནི་ཧཱུཾ་པྲ་ཏཱིཙྪ་ཧོཿ ༡༡༽ དགའ་བ་བཅུ་དྲུག་རླུང་གི་རྟར་བསྐྱོན་ནས།།ཐིག་ལེ་བཅུ་དྲུག་གནས་སུ་དག་པ་ལས།།སྟོང་ཉིད་བཅུ་དྲུག་གླིང་བུའི་སྒྲར་སྟོན་པའི།།རྡོ་རྗེ་གླིང་བུ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་ཝཾ་སེ་ཏྲཱཾཿཔྲ་ཏཱིཙྪ་ཧོཿ ༡༢༽ ཟླ་གཞོན་པད་དཀར་ལྟ་བུའི་ལང་ཚོའི་དཔལ།།མིག་གི་བདུད་རྩིར་སྦྱིན་དང་ཆབས་ཅིག་པར།།སྙན་འགྱུར་རྫ་རྔའི་སྒྲ་སྒྲོག་ན་ཆུང་མ།།རྡོ་རྗེ་རྫ་རྔ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་མུ་རཉྫ་ཨཱཿཔྲ་ཏཱིཙྪ་ཧོཿ ༡༣༽ སྟོང་ཉིད་ནམ་མཁའི་རྒྱན་གྱུར་ལྷ་ཡི་གོས།།རིན་ཐང་བརྗོད་དུ་མེད་པའི་པཉྩ་ལི།།འཕྲུལ་ལྡན་སོར་རྩེས་བསྒྲོན་པའི་མཛའ་ན་མོ།།རྡོ་རྗེ་རེག་བྱ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་སྤརྴེ་ཏྲཱཾཿ་པྲ་ཏཱིཙྪ་ཧོཿ ༡༤༽ ཆགས་མེད་ཆགས་པ་ཆེན་པོའི་ཟུར་མིག་གིས།།དཔའ་བོའི་ཡིད་ལ་མྱོས་པའི་ཆོམ་རྐུན་འཇུག།ལག་ན་རོ་བརྒྱའི་དཔལ་འཛིན་ཞལ་ཟས་ཐོགས།།རྡོ་རྗེ་རོ་མའི་ཚོགས་ཀྱིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་རཱ་ས་ཧྲཱིཿཔྲ་ཏཱིཙྪ་ཧོཿ ༡༥༽ བདེ་བས་བདེ་བའི་མཐར་སོན་སྟོང་པ་ཉིད།།བདེ་ཆེན་ཆོས་ཀྱི་འབྱུང་གནས་མངལ་ཁུར་ཅན།།བདེ་སྟོང་ངང་ལས་རྒྱལ་ཀུན་སྐྱེད་པའི་ཡུམ།།ཆོས་ཀྱི་རྡོ་རྗེ་མ་ཡིས་མཉེས་གྱུར་ཅིག།གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་དྷརྨཱ་དྷཱ་ཏུ་ཨཱཿཔྲ་ཏཱིཙྪ་ཧོཿ དེ་ལྟར་ཤིན་ཏུ་རྨད་དུ་བྱུང་བ་རྡོ་རྗེའི་ལྷ་མོ་བཅུ་དྲུག་ལ་ནང་གསེས་ཀྱིས་དབྱེ་ན། ཕྱི་སྒེག་བཞི། ནང་སྒེག་བཞི། སྐུ་གསུང་ཐུགས་ཡོན་ཏན་འཕྲིན་ལས་ཏེ་གསང་རིག་མ་ལྔ། ཐུན་མོང་འདོད་ཡོན་གྱི་ལྷ་མོ་གསུམ་སྟེ་དེ་ཉིད་རྣམ་པ་བཅུ་དྲུག་གི་རང་བཞིན་དུ་བསྙད་པ་ལས། དང་པོ་ཕྱི་སྒེག་བཞིའི་ཕྱག་རྒྱ་ནི་བཛྲ་ལཱ་སྱེ་ལ་རྡོ་རྗེ་ཁུ་ཚུར་གཉིས་དཀུར་བརྟེན་ནས་གཡོན་དུ་ཅུང་ཟད་འགྱིངས་པའོ། །བཛྲ་མཱ་ལྱེ་ལ་རྡོ་རྗེ་ཐལ་མོ་གཉིས་ནང་ནས་ཐུར་ལྡོག་གཡོ་བས་ཕྲེང་བ་འདོགས་པའི་ཚུལ་ལོ། །བཛྲ་གཱིརྟི་ནི་གླུ་མ་སྟེ། གླུ་མའི་ཕྱག་མཚན་པི་ཝང་ཡིན་པས་དེ་ཉིད་བསྒྲེང་བའི་ཚུལ་འོག་ནས་འབྱུང་ངོ་། །བཛྲ་ནིརྟི་ནི་རྡོ་རྗེ་ཁུ་ཚུར་གཉིས་ཀྱིས་སྤྱི་བོར་གར་བྱེད་པའི་ཚུལ་ལོ། །གཉིས་པ་ནང་སྒེག་བཞིའི་ཕྱག་རྒྱ་ནི། བཛྲ་དྷཱུ་པེ་ནི་ཐལ་སྦྱར་ཚིགས་པ་བཅད་པ་བདུག་སྤོས་ཀྱི་ཁང་པ་ལྟར་རོ། །བཛྲ་པུཥྤེ་ནི་རྡོ་རྗེ་ཁུ་ཚུར་གཉིས་ཁ་བཀན་ལ་མེ་ཏོག་འཐོར་བའི་ཚུལ་ལོ། །བཛྲ་ཨཱ་ལོ་ཀེ་ནི་རྡོ་རྗེ་ཁུ་ཚུར་ལས་མཐེ་བོང་གཉིས་མར་མེ་ལྟར་བསྒྲེང་བའོ། །བཛྲ་གྷནྡྷེ་ནི་གཡོན་པའི་མཐེབ་མཛུབ་སྦྱར་གཞན་རྣམས་བརྐྱངས་པ་ཁ་བཀན་ཏེ་དུང་ཆོས་ལྟར་བྱས་པའི་སྙིམ་པ་ནས་གཡས་པའི་མཐེབ་མཛུབ་ཀྱིས་དྲིའི་བྱུག་པ་འགྱེད་པའི་ཚུལ་ལོ། །གསུམ་པ་གསང་བའི་རིག་མ་ལྔ་ལས། སྐུའི་རིག་མ་བཛྲ་རཱུ་པ་ནི། གཡོན་པའི་ཁུ་ཚུར་གྱི་སྟེང་དུ་གཡས་པའི་ཐལ་མོ་སྙིང་གར་ཕྱིར་བསྟན་པ་མེ་ལོང་ལྟར་བྱའོ། །གསུང་གི་རིག་མ་བཛྲ་མྲི་ཏི་གི་ནི་རྔ་ཟླུམ་བརྡུང་བ་ལྟར་གཡོན་པ་ཅུང་ཟད་གྱེན་ལ་ཕྱོགས་གཡས་པའི་སོར་མོ་རྣམས་གཡོབས་པའོ། །ཐུགས་ཀྱི་རིག་མ་བཛྲ་ཝི་ནིའི་ཕྱག་རྒྱ་ནི་པི་ཝང་བསྒྲེངས་པ་ལྟར་གཡོན་གྱེན་དུ་བསྒྲེངས་པའི་མཐེ་བོང་གིས་གུང་སྲིན་མནན་ཏེ་མཛུབ་མོ་དང་མཐེའུ་ཆུང་བརྐྱང་། གཡས་པའང་དེ་བཞིན་བྱས་པས་བསྒྲེངས་པའོ། །ཡོན་ཏན་གྱི་རིག་མ་བཛྲ་ཝཾ་སེ་ཏྲཾ་ནི་གླིང་བུ་འབུད་པའི་ཕྱག་རྒྱ་སྙིང་གའི་མདུན་ན་བྱེད་པའོ། །འཕྲིན་ལས་ཀྱི་རིག་མ་བཛྲ་མུ་རཉྫ་ནི་ལག་པ་གཉིས་ཀ་སྙིང་གའི་ཐད་ནས་ཁ་ཕྱིར་བསྟན་ལ་སོར་མོ་རྣམས་གཡོབ་པས་རྫ་རྔ་བརྡུང་པ་ལྟར་བྱེད་པའོ། །བཞི་པ་ཐུན་མོང་འདོད་ཡོན་གྱི་ལྷ་མོ་གསུམ་ལས། བཛྲ་སྤརྴེ་ནི་ལག་པ་སོ་སོའི་མཐེབ་མཛུབ་གུང་སྲིན་རྣམས་རྩེ་སྤྲད། མཐེ་ཆུང་བསྒྲེངས་ལ་གོས་འབུལ་བའི་ཚུལ་ལོ། །བཛྲ་རཱ་ས་ནི་རྡོ་རྗེ་ཐལ་མོ་ཁ་སྦུབས་ལ་བརྐྱང་བ་སླར་གྱེན་དུ་ལྡོག་པ་བཤས་འདེགས་པའི་ཚུལ་ལོ། །བཛྲ་དྷརྨཱ་ནི་མཁའ་དབྱིངས་ཆོས་འབྱུང་གི་ཕྱག་རྒྱ་སྟེ། མཐེ་བོང་གཉིས་རྩེ་སྤྲད། གཞན་རྣམས་བརྐྱངས་པའི་སྲིན་ལག་གཉིས་རྩེ་སྤྲད་པའོ། །ཀུན་ལ་པད་ཀོར་གྱིས་སྔོན་བསུས་ནས་རང་སྔགས་དང་ཕྱག་རྒྱ་བསྟུན་ཞིང་། རྡོ་རྗེ་སེ་གོལ་གཏོགས་པས་བསྣོལ་ཏེ་ནུ་མ་གཡས་གཡོན་གྱི་སྟེང་དུ་འཇོག་པའོ། ། དེ་ལྟར་རྡོ་རྗེའི་རིག་མ་བཅུ་དྲུག་གི།མཆོད་ཕྲེང་དྲི་ཟའི་བུ་མོས་བླངས་པའི་གླུ།།རྒྱུད་མང་སྟོང་གི་འགྱུར་དང་ལྡན་པ་འདི།།ངག་དབང་དབྱངས་ཅན་ལྷ་མོས་བདག་ལ་བྱིན།།དགེའོ།། །།