ཨེ་ཝྃ་ཧོ།

དེ་རིང་ཉེར་ལྔ་མཁའ་འགྲོའི་དུས་ཆེན་ལ་རྟེན་འབྲེལ་བཟང་པོ་བྱུང་།སྔ་འགྱུར་རིག་འཛིན་དུས་དེབ་ཏུ་ངའི་སྨོན་ལམ་དེ་ཡང་བཀོད་འདུགབཀའ་དྲིན་ཆེ་ཞུ་དང་་་་་་་རྨི་ལམ་དང་སྣང་བ་སྤྲོ། དུས་རྩིས་ངོ་མཚར་ཉི་མ་ལྟར་སྨོན་ལམ་དང་རིང་འཚོས་མཚམས་སྦྱར་ཀྱང་།ཇི་སྐད་དུ།།ཐུབ་བསྟན་རིག་འཛིན་རྒྱ་མཚོ་སྐུ་ཚེ་བརྟན།ན་མོ་གུ་རུ་པུནྱེ་ཡ།།ཚེ་དཔག་མེད་མགོན་རྒྱལ་བ་སྲས་བཅས་དང་།།རིང་འཚོའི་མཐུ་སྟོབས་ལྡན་པའི་ལྷ་ཚོགས་ལ།།ཐུགས་དམ་སྐུལ་ལོ་ཕྱི་ནང་བར་ཆད་སོལ།།ཐུབ་བསྟན་རིག་འཛིན་རྒྱ་མཚོ་ཞབས་བརྟན་ཤོག།ཤྲཱིས་སོ།

མི་ཕམ་རིན་པོ་ཆེའི་ཐུན་མིན་གསང་བའི་རྣམ་ཐར།དིལ་མགོའི་མཁྱེན་བརྩེས་མཛད། སྤྱིར་སྐུ་གསུང་ཐུགས་ཀྱི་གསང་བ་བསམ་མི་ཁྱབ་པའི་སྤང་རྟོོགས་ཀྱི་ཡོན་ཏན་ཟབ་མོའི་མཐའ་ནི་སོ་སོའི་སྐྱེ་བོ་དག་གི་ལྟ་ཅི། འཕགས་ལམ་ཆོས་ཉིད་ཀྱི་བདེན་པ་མངོན་སུམ་གཟིགས་པའི་བྱང་ཆུབ་སེམས་དཔའ་དག་གིས་ཀྱང་མཐའ་དག་བསམ་གྱིས་མི་ཁྱབ་སྟེ་འཇམ་དཔལ་སྒྱུ་འཕྲུལ་དྲ་བའི་རྒྱུད་ཕྱི་མ་ལས། སྟོང་ཉིད་ཅི་ལའང་མ་རེག་ལྷུན་གྱིས་གྲུབ། །དོན་ཀུན་འབྱོར་བས་བླང་དོར་མེད་པ་ཡི། །བདག་ཉིད་རང་བཞིན་བཞག་དང་འཇམ་དཔལ་ཉིད། །བསམ་གྱིས་མི་ཁྱབ་མི་གནས་མི་སེམས་ན། །འཇམ་དཔལ་ཉིད་དང་ཡོན་ཏན་རྫོགས་པར་མཉམ། །ཞེས་དང་གོང་དུའང་མདོ་ཙམ་བསྟན་པས་ཀྱང་ཤེས་པར་ནུས་མོད་འོན་ཀྱང་སྐྱེས་རབས་ལས། བསོད་ནམས་སྟོབས་ཀྱིས་མངོན་པར་འཕགས་གྱུར་ཅིང་། །བློ་གྲོས་རྣམ་པར་དག་པ་དེ་དག་ནི། །རྟགས་ལ་བརྟེན་ནས་མངོན་སུམ་བཞིན་དུ་མཐོང་། །ཇི་ལྟར་དུ་བའི་རྟག་ལས་མེ་མཐོང་བཞིན། །ཞེས་གསུངས་པ་ལྟར་འཕགས་མཆོག་དཔའ་བོ་ཆེན་པོ་རྣམས་ཕྱི་ལུས་ངག་གི་རྟགས་ལས་རྗེས་སུ་དཔག་པས་ཀྱང་ཚུར་མཐོང་བྱིས་པའི་རང་བཞིན་ལས་ཁྱད་པར་དུ་གྱུར་པའི་མངོན་རྟགས་དངོས་ཤུགས་དུ་མས་ཤེས་པར་ནུས་མོད་སྐལ་བཟང་གི་སྐྱེ་བོ་དག་གིས་སྒྲོ་བཀུར་དང་བྲལ་བར་མཐོང་ཆོས་སུ་གྱུར་པའི་སྤང་རྟོགས་ཕྲ་མོས་ཀྱང་ཆུ་ཐིག་གཅིག་མྱོང་བས་རྒྱ་མཚོ་ཆེན་པོའི་རོ་རྟོགས་པ་ནུས་བཞིན་ཆེ་བའི་ཡོན་ཏན་ཕྱོགས་ཙམ་ཤེས་ནུས་པས་ལོ་རྒྱུས་ཁོང་ཐུབ་ལས་བྱུང་བའི་རིགས་འདི་ལྟར་དཀར་མོ་སྟག་ཚང་ནས་བྱམས་པ་ཚད་མེད་ཀྱི་ཏིང་འཛིན་ལ་ཐུགས་གཞོལ་བས་དམྱལ་བའི་སེམས་གྱི་སྡུག་བསྔལ་ལ་དགོངས་ཚེ་ཐུགས་སྐྱོ་ཆེས་པའི་ཡུས་ཀྱིས་བརྣང་སྟེ་གསོལ་ཆས་ཀྱང་ཡི་ག་ལྡོག་ནས་སླར་ཆོས་ཉིད་སྟོང་པའི་དོན་ལ་ཐུགས་ངལ་བསོ་དགོས་པར་བྱུང་བར་གསུངས་པ་དང་། ལབ་རྫུ་འཕྲུལ་ཕུག་པར་མ་ཏིའི་འཇམ་དཔལ་དཀར་པོའི་བསྙེན་དམིགས་ལ་ཐུགས་འཛིན་གནང་བས་སྔགས་ཕྲེང་དང་འཁོར་ལོ་ཧ་ཅང་མྱུར་བར་གསལ་ཐེབས་པས་སྣང་བ་ཐམས་ཅད་ཤིང་རྟའི་འཁོར་ལོ་བཞིན་འཁོར་བའི་ཐུགས་སྣང་དང་། ཐ་མལ་གྱི་སྣང་ཤས་རགས་པ་འགག་སྟེ་གཞུང་ནས་བཤད་པ་ལྟ་བུའི་ཏིང་འཛིན་གྱི་དུས་འདའ་བར་ཞིག་བྱུང་བ་དེ་སྐབས་བླ་མའི་བྱིན་རླབས་ཀྱིས་ཡིན་པ་འདྲ་ཞེས་གསུངས་པ་དང་ཀློང་ཐང་སྒྲོལ་མའི་གཙུག་ལག་ཁང་ལ་ཕྱག་བསྐོར་མཆོད་འབུལ་གནང་བས་རྗེ་བཙུན་འཕགས་མས་ཞལ་བསྟན་ཞིང་ལུང་བསྟན་ཀྱང་སྩལ་བར་གསུངས་པ་དང་། ལར་ཁོ་བོ་མཚམས་ལ་ལོ་མང་དུ་གནས་པའི་ཚེ་གཞུང་སོ་སོར་ནས་བཤད་པའི་བསྐྱེད་རྫོགས་རྩེ་གཅིག་པའི་ཏིང་ངེ་འཛིན་ཁོ་ནའི་ངང་དུ་གནས་པ་ལས། རང་བཞིན་ཡེངས་མ་ལམ་གྱི་བསྙེན་པ་ཕྲེང་སྐོར་གཅིག་ཀྱང་བཟླ་མ་མྱོང་ཞེས་ཞལ་འཕྲོས་སུ་ཕེབས་པ་དང་།ཡང་སྐབས་ཤིག་རྗེ་ཉིད་འཇམ་མགོན་བླ་མ་མཁྱེན་བརྩེའི་མདུན་ཕེབས་པའི་གསུང་གླེང་ལ། ཁྱེད་མཚམས་ལ་བཞུགས་སྐབས་ཉམས་བཞེས་ཅི་འདྲ་མཛད་ཀྱིན་ཡོད་གསུངས་པར། ཕྲན་ནས་སློབ་གཉེར་བྱེད་དུས་དཔྱད་པ་དཔྱིས་ཕྱིན་པ་ཞིག་དང་ཡི་དམ་གྱི་བསྙེན་མཚམས་བྱེད་དུས་བསྐྱེད་རིིམ་མཐར་ཕྱིན་པ་ཞིག་ཨེ་ཐོན་ལྟ་དགོས་པས་བསྐྱེད་རིམ་ལ་གཟབ་གཟབ་བྱེད་ཀྱིན་ཡོད་ཞུས་པས། དེ་ཚོ་དཀའ་མོ་རེད། ཀུན་མཁྱེན་ཆེན་པོའི་ཅི་ཡང་མི་བྱེད་པར་འདུག་རྒྱུ་ཞིག་གསུངས་ཨི་མི་ཡོད་དེ། ཁོ་བོ་ནི་དེ་བཞིན་བྱས་འདུག་པས་སེམས་ངོ་ཟེར་བའི་དཀར་ཤ་དམར་མདངས་ཅན་ཞིག་མ་མཐོང་ཡང་། ད་ཤི་རུང་ཡ་ང་བག་ཚ་རྡུལ་ཙམ་ཡང་མི་འདུག་གསུངས་ནས་བཞད་མོ་མཛད། དེ་བླ་མའི་གདམས་ངག་ཡིན་པར་གོ་རུང་ད་དུང་བསྐྱེད་རིམ་ལ་ནན་ཏན་བྱས་པས་ད་ལྟ་ཉམས་ལྔའི་ནང་གོམས་པའི་ཉམས་དལ་འབབས་ཀྱི་ཆུ་བོ་ལྟ་བུའི་སྐབས་སུ་སླེབ་འདུགད་ཕན་ཞི་གནས་འདིས་སེམས་རྩེ་གཅིག་ཞིག་ཨེ་འགྲུབ་བསམ། ཞི་གནས་ཞིག་འགྲུབ་ན་ལྷག་མཐོང་ནི་ཆུང་ངུའི་དུས་ནས་ཡོད་དར་གསུངས་པ་ལ་དཔག་ན་སྐྱེས་སྦྱངས་ཀྱི་རིགས་སད་པའི་སྟོབས་ཀྱིས་ཐོག་མ་ཉིད་ནས་ཆོས་ཉིད་དགོངས་པའི་གནས་ལུགས་མངོན་སུམ་དུ་གྱུར་པས་རྟོགས་གྲོལ་དུས་མཉམ་གྱི་རིག་པའི་རྩལ་ཤུགས་རྫོགས་པར་ཞལ་གྱིས་བཞེས་པ་ཤེས་ནུས་ཤིང་། སྟག་ཚང་དུ་འཇམ་དཔལ་ཡ་མནྟ་ཀའི་བསྙེན་སྒྲུབ་ཀྱི་སྐབས་སུ་གཞུང་ནས་བཤད་པའི་རྟགས་ཚད་ཐམས་ཅད་དངོས་ཉམས་རྨི་ལམ་དུ་མ་རྫོགས་པ་གཅིག་ཀྱང་མེད་ཅེས་གསུངས་པ་དང་། བཀའ་བརྒྱད་ཀྱི་ལྗགས་བསྙེན་དུས་སུ་ཚེ་བརྒྱད་ཞིག་གི་ནུབ་ནམ་མཁར་ཧེ་རུ་ཀ་ཉིད་ཞི་མཱུ་ཁ་ལེ་ལ་མཁའ་འགྲོ་མ་བྱེ་བ་དུང་ཕྱུར་གྱིས་བསྐོར་བའི་སྣང་སྲིད་མ་མོའི་དཀྱིལ་འཁོར་ཆེན་པོ་ཡོངས་སུ་རྫོགས་པའི་མདུན་དུ་མ་གཅིག་དཔལ་ལྷ་མོ་རེ་མ་ཏི་བྲན་མོའི་ཚུལ་གྱིས་དེ་དག་ལ་གར་སྟབས་ཀྱིས་ཕྱག་འཚལ་བའི་ཚུལ་ཅན་དངོས་སུ་གཟིགས་པས་རེ་སྐོང་གི་གྲུབ་ཐོབ་རིགས་འདུས་དྲག་པོ་རྩལ་གྱི་ལྷ་མོའི་གསོལ་བྱང་ལ་ཁ་སྐོང་བཅས་གནང་བར་གསུངས་པ་དང་། ཡང་དེ་སྐོར་ཞིག་ལ་ཉེ་གནས་བླ་མ་རིན་པོ་ཆེའི་ནང་སྔ་བར་ཞིག་གསོལ་ཇ་བསྣམས་ཏེ་བྱོན་པས་ད་ནང་མཁའ་འགྲོ་མ་ཞིག་གིས་གདངས་འགྱུར་ཤིན་ཏུ་སྙན་པས་ཚིགས་བདུན་གསོལ་འདེབས་ཞིག་དབྱངས་རྟ་ལ་དྲངས་ནས་སོང་བས་ཨེ་ཐོས་གསུངས། མ་ཐོས་ཞུས་པས་ཨ་ཅང་ཀུ་རེ་ཡིན་རྐྱེན་དེའི་དབང་གིས་རྡོ་རྗེ་ཚིགས་བདུན་གྱི་བླ་མའི་རྣལ་འབྱོར་འདི་བྲིས་ཡོད་པས་ཁྱོད་ནས་འདོན་ན་དགོས་པ་ཆེ་བའི་ཚུལ་གསུངས་ཏེ་ཁྲིད་དང་བཅས་རྩལ་བས་བླ་མ་རིན་པོ་ཆེ་འོད་གསལ་ནས་ཀྱང་སྔ་ཕྱིར་ཚིགས་བདུན་གསོལ་འདེབས་འབུམ་ཕྲག་བཅུ་གསུམ་གསུངས་པས་གྲུབ་པའི་རྟག་མཚན་ངོ་མཚར་ཅན་དུ་མ་བྱུང་བ་དང་། ཚིག་བདུན་རྣམ་བཤད་པདྨ་དཀར་པོའང་ཞུ་བསྐུལ་ཡང་ཡང་མཛད་པ་སྐྱེན་འདི་དག་གིས་ཡིན་པར་འདུག་ལ། འཇམ་དཔལ་ཚེ་བདག་གི་ལས་སྦྱོར་གྱི་ཟོར་འཕང་རྗེས་ཤོག་ལོང་ལ་རྗེ་ཉིད་ནས་མེ་མདའི་འཁྲུལ་འཁོར་རྒྱབ་པས་གཏོ་ཁང་མེ་རང་འབར་དུ་སོང་བ་དང་། བཀའ་བརྒྱད་བདེ་གཤེགས་འདུས་པའི་ལས་བྱང་ཆོག་ཁྲིགས་སུ་སྩལ་སྟེ་ཡི་གེ་གཉིས་པ་བླ་མ་རིན་པོ་ཆེ་འོད་གསལ་ནས་ཞལ་བཤུས་གནང་བས་གཟིམས་ཁང་སྐྱིས་ཤུགས་ཀྱི་མེ་རང་འབར་དུ་བྱུང་བ་དང་། སྟག་ཚང་ནས་བླ་མ་པདྨའི་རིམ་གྲོར་ཉང་གཏེར་རྟ་ནག་གི་བཟློག་པ་ཞག་བཞི་མཛད་ནས་གཏོར་རྒྱགས་གནང་བའི་ཟོར་སྣ་གཏད་ཡུལ་གྱི་བྲག་རི་ཞིག་ཡོད་པ་དེ་ལ་མེ་དུད་དཀྲིས་པས་ཕྱི་ཉིན་ཕྱེ་མར་ཞིག་སྟེ་འཐོར་བ་དང་། ཡང་གནས་དེའི་བྲག་རྩེར་ས་དམིགས་ཆེད་བཙལ་གྱིས་སྒྲུབ་ཁང་གསར་བསྐྲུན་གྱི་ས་འདུལ་མཛད་དུ་བྱོན་པས་བྲག་ཁ་ཐོག་བརྩེགས་གསུམ་བཞི་ཡོད་པ་ཞིག་ནས་གློ་བུར་དུ་ལྷུང་བ་ལྟར་མཛད་པ་ཉེ་གནས་བླ་མ་རིན་པོ་ཆེ་ཐུགས་སྐྲག་དངངས་བཅས་འོག་ཏུ་ཕེབས་པས་ཅི་ཡང་མ་ཉེས་པར་སྐྱིལ་ཀྲུང་གིས་བདེ་བར་བཞུགས་པ་དང་སྡེ་དགེའི་སྲས་མོ་སྙུན་ཏེ་བླ་བསླུ་མཛད་པས་བླ་ལུག་ལ་ཐུགས་གཏད་པ་ཙམ་གྱིས་རང་བཞིན་གྱིས་ཁ་བསྐོར་བ་ཀུན་གྱི་མཐོང་སྣང་དུ་བྱུང་བ་དང་། སྨད་ཤོད་ཕྱོགས་སུ་ཐན་པས་ཤིན་ཏུ་ཉེན་སྟེ་སྡེ་དགེ་མ་ཡུམ་ནས་གསུངས་བསྐུལ་གནང་བ་ལྟར་སེ་ངུ་གཡུ་མཚོར་ཆར་འབེབ་བྱོན་ནས་ད་ལྟ་བཀའ་འབུམ་དུ་གསལ་བའི་ཆར་ཆོག་གི་ལས་སྦྱོར་མཛད་པ་བརྩམ་ནས་ཆར་གྱི་རྒྱུན་ཆེས་དྲགས་པས་རི་རྩེར་ཁ་བ་ཆགས་ཏེེ་བྱོན་བཞུད་ཀྱང་དཀའ་ཙམ་བྱུང་བ་དང་། ཡང་སྐྱབས་རྗེ་མཁྱེན་བརྩེ་རིན་པོ་ཆེའི་གསུང་བསྐུལ་གྱིས་སྡེ་དགེ་མ་ཡུམ་དང་། དཔལ་སྤུང་ནས་སི་ཏུ་མཆོག་སྤྲུལ་གྱི་སྦྱིན་བདག་གིས་འཇམ་དཔལ་སྨྲ་སེང་གི་རིལ་བུ་སྒྲུབ་གནང་མཛད་པས་རིལ་བུ་འཕེལ་སྟེ་དཀྱིལ་འཁོར་གྱི་སྟེང་ཁེབས་པ་ཙམ་གྱི་མངོན་རྟགས་གསལ་བ་དང་། རུ་དམ་ནགས་ཆུང་ཡང་དབེན་པདྨ་བསམ་གཏན་བདེ་ལྡན་གླིང་དུ་བཞུགས་སྐབས་རྒྱལ་པོའི་ཆོ་འཕྲུལ་གྱིས་གངས་ཆེན་པོ་བབས་པ་ལ་སྔགས་དང་ཏིང་འཛིན་གྱིས་ཞག་བདུན་དུ་གཟིར་ཏེེ་བེ་ཅོན་གྱིས་བརྡུང་བས་གཙིགས་ལ་ཕབ་ནས་དེའི་དུས་ཀྱི་སྒྲུབ་གནང་གི་གཤིན་རྗེའི་ཕྱག་མཚན་བེ་ཅོན་གང་དུ་མཆིས་པའི་དཔག་ཚད་ཚུན་རྒྱལ་འགོང་ཉེ་མི་ནུས་པར་གསུངས་པ་དང་། ཚེ་སྒྲུབ་གསང་བ་འདུས་པའི་བསྙེན་བཟླས་སྐབས་བུམ་པའི་བདུད་རྩི་དང་སྨན་རཀ་འཕྱུར་སྟེ་དཀྱིལ་འཁོར་གྱི་སྟེང་མེར་གྱིས་ཁྱབ་པ་བྱུང་ཞིང་། དེ་སྐབས་ཞེ་ཆེན་རབ་འབྱམས་བཞི་པ་སྐུ་མདུན་དུ་ཕེབས་པས་རྗེ་བླ་མས་ཁོ་བོའི་ཚེ་སྒྲུབ་ལོ་གཅིག་བྱས་རིང་རྒྱུན་བཞག་གི་ཚེ་ཆང་འདི་དབྱར་མ་རུལ། དགུན་མ་འཁེང་བ་དང་པོ་བཤམས་པ་ལྟར་འདུག་པས་ལྷ་གྲུབ་པའི་རྟགས་མཚན་ཞིག་ལོས་ཡིན་གསུངས་སྟེ་དངོས་གྲུབ་ལེན་ཆོག་དཔོན་སློབ་ལྷན་རྒྱས་ནས་གནང་བའི་ཚེ་རྫས་སོགས་ཡབ་གཞིས་ཀྱི་སྐུ་ངོ་རྣམས་ལའང་སྩལ་བ་དེ་རིགས་ཀྱང་ཕྱིས་ཚེ་མཐར་ཕྱིན་པ་ཤ་སྟག་བྱུང་བ་དང་། དེ་རྗེས་རྫོགས་ཆེན་མཆོག་སྤྲུལ་རིན་པོ་ཆེ་ཐུབ་བསྟན་ཆོས་ཀྱི་རྡོ་རྗེ་ལ་སྐུ་ཚེ་དང་ཕྲིན་ལས་ཀྱི་དཔལ་དུ་ཚེ་གསང་གི་སྟོང་མཆོད་ཆེན་མོ་བཙུགས་དགོས་པར་བཀའ་གནང་གིས་རུ་དམ་རྫོགས་ཆེན་དགོན་དུ་སྟོང་མཆོད་ཤིན་ཏུ་རྒྱས་པ་བཙུགས་ཏེེ་རྗེ་བླ་མས་དགོངས་པ་གཏད་ཅིང་དབུ་བཞུགས་སུ་བླ་མ་རིན་པོ་ཆེ་འོད་གསལ་ཕེབས་པའི་ཚེ་ཡང་སྨན་རཀ་རྣམས་ཁོལ་བ་དང་། མཆོད་པའི་ཞལ་ཟས་ལས་བདུད་རྩི་ཞག་བདུན་དུ་བབ་པའི་གྲུབ་རྟགས་ཀྱི་དགེ་མཚན་ཀྱང་བྱུང་བ་དང་། ཡང་བར་སྐབས་ཤིག་ཏུ་འཇུ་ཉུང་མ་རླུང་རྟ་གུད་དེ་དགྲ་ཇག་གིས་འཚེ་བ་ལ་ཕྲིན་བཅོལ་གནང་སྟེ་རླུང་རྟའི་སྟོབས་སྤེལ་མཛད་པས་མནལ་ལམ་དུ་འབྲུ་རྒ་བདེ་ཆོས་སྐྱོང་བེར་ནག་དེ་རྟ་ནག་པོ་ཞིག་ཆིབས་ནས། ཕྱགས་ན་མདུང་ཞིག་བསྣམས་འདུག་པ་དེས་འཇུ་ཉུང་མའི་ཡུལ་གྱི་སྟེང་ནས་རེ་བ་ནག་པོ་ཞིག་བླང་སྡེ་རྒྱང་རིང་དུ་འཕང་སོང་བའི་མཚན་ལྟས་གསལ་བར་གཟིགས་པས་དེ་ཕྱིན་འཇུ་པ་དགྲ་ཤེད་ཇེ་ཆེ་ལ་སོང་སྟེ་རླུང་རྟའི་སྟོབས་རྩལ་རྒྱས་པ་འདི་ཁོ་བོའི་དྲིན་ཡིན་ཀྱང་སུས་ཤེས་པར་མི་འདུག་ཅེས་གསུངས་པ་དང་རྒ་སྟོད་སྒྲུབ་བརྒྱུད་དགོན་དུ་བཞུགས་སྐབས་ཕྱི་ལིང་གཉིས་འོང་བ་རྗེ་ཉིད་བཞུགས་ཕྱོགས་སུ་སླེབ་ཉེའི་སྐབས་ཁ་བ་ཆེས་ཆེ་བར་བབ་སྟེ་མིག་ཕྱིད། བཞུགས་གནས་ཀྱི་ཉེ་ལོགས་ནས་རྒྱ་ལམ་ཡིན་ཀྱང་འོང་མ་ནུསཔ་དེ་ལས་བྱོལ་ཏེ་སོང་བས་གཟིམས་ཆུང་རྒྱང་རིང་པོ་ནས་མཐོང་ཙམ་གྱིས་དྲེལ་ཞིག་ཡོད་པ་གློ་བུར་དུ་འགྲོགས་ཏེ་ས་སྣ་ཆུ་སྣ་རྒྱབ་གཅིག་ཡོད་པ་གཏོར་སྟེ་སོང་བ་དང་། དེ་ནས་ཁྲི་འདུའི་ཕྱོགས་སུ་ཚུར་ཕེབས་ལམ་དུ་གྲོ་ཚུགས་ཁར་བྱ་རྒོད་ཆེས་མང་བར་བབ་སྟེ་དེ་ནུབ་ཀྱི་བཞུགས་གནས་བར་རྗེ་བླ་མ་གར་ཕེབས་ཀྱི་ཕྱོགས་སུ་འཕུར་ཏེ་བྱུང་ཞིང་། རྒོད་འགའ་ཞིག་དེ་ནུབ་ཀྱང་བཞུགས་གནས་དེར་ཉལ་ཞིང་ནང་བར་འཕུར་སོང་བ་དང་། སྒ་སྟོད་སྟག་མགོར་བཞུགས་པའི་སྟོན་པ་ཐུབ་པའི་དབང་པོའི་རིང་བསྲེལ་ལ་མཆོད་འབུལ་དང་ཁྲུས་གསོལ་གནང་མ་ཐག་རིང་བསྲེལ་དུ་མ་འཕེལ་ཏེ་བྱུང་བ་དང་། སྒ་སྟོད་ཁྲ་འགུའི་རི་ཁྲོད་དུ་བཞུགས་སྐབས་རི་དེའི་ཞོལ་ནས་ལམ་སྲང་དུ་རྒྱ་དམག་མང་པོ་ཞིག་འོང་བས་གཟིམས་ཁང་མཇལ་མ་ཐག་དམག་དར་གྱི་ཡུ་བ་སྐེད་པ་ནས་ཆག་པ་དང་དེ་རྗེས་རྒྱ་དཔོན་བྱུང་བས་རྟ་གློ་བུར་དུ་ཉལ་ནས་འགྲོར་མ་གཏུབས་པ་དང་། ཆབ་མདོར་བཞུགས་སྐབས་རྒྱ་དམག་གི་འུར་ཟིང་ཆེ་བས་བླ་མ་དམ་པ་འོད་གསལ་ཐུགས་གཟན་ཆེ་བ་ལ། ཀླ་ཀློ་འཇོམས་པའི་གཤེད་མ་རིགས་ལྡན་དྲག་པོ་ལྕགས་འཁོར་ཅན་ཡིན། བདག་ཀྱང་དེའི་དམག་དཔོན་གྱི་ཆེ་ཤོས་ཞིག་ཡིན་པས། ད་ལྟའི་དམག་དཔུང་གི་འཚེ་ག་ལ་ནུས། ཨ་འུ་ཙའི་ཞེས་གསུངས་པ་དང་། དེ་སྐབས་དཔལ་དུས་ཀྱི་འཁོར་ལོའི་འགྲེལ་ཆེན་རྡོ་རྗེ་ཉི་མའི་སྣང་བ་ཐོག་མར་ལྗགས་བརྩམས་ཀྱི་ཉིན་རྡོ་རྗེ་འཆང་མཁྱེན་བརྩེའི་མདུན་ནས་སྩལ་བའི་སྒྲོལ་དཀར་གྱི་ཞལ་ཐང་བཤམས་པའི་མདུན་དུ་མཆོད་འབུལ་གནང་སྟེ་གསོལ་འདེབས་མཛད་པས་ཞལ་ཐང་དེའི་རྒྱབ་བྱང་དུ་དོན་གྱི་རྒྱུ་མཚན་ཆེན་པོ་བཞི་དང་འབྲེལ་བའི་རྗེ་ཉིད་ཀྱི་མཚན་བཀྲ་བའི་ཞབས་བསྟན་ཚིགས་སུ་བཅད་པ་རང་སྒྲ་གྲགས་པ་དང་། ལྡན་ཡུལ་དིལ་མགོའི་རི་ཁྲོད་དུ་ས་དམིགས་ཆེད་བཙལ་གྱིས་གཟིམས་སྐྱིལ་ཞིག་གྲུབ་ན་ཆོས་རྒྱལ་སྡེ་དགེའི་མངའ་རིས་ལ་ཅུང་ཕན་པར་འདུག་གསུངས་སྟེ་གནས་དེའི་ཕྱོགས་ཀུན་ཏུ་ཕེབས་པས་ཡིག་འབྲུ་དང་། དྷཱ་ཀིའི་ཞབས་རྗེས་སོགས་རང་བྱོན་ངོ་མཚར་ཅན་དུ་མའང་བརྡ་སྤྲོད་དང་ཆབས་ཅིག་གསེར་ལྡན་དལ་འབབ་འབྲི་ཀླུང་གི་འགྲམ་ངོགས་སུ་བྱོན་སྟེ་བོད་ཁམས་བདེ་བའི་སྨོན་ལམ་དང་ས་བཅུད་གསོ་བའི་རྟེན་འབྲེལ་དུ་རིན་ཆེན་འབྲུ་དར་ཀླུ་སྨན་བདུད་རྩི་མྱོང་གྲོལ་སོགས་ཀྱི་མཚོ་འབུལ། མདའ་ཞིག་གི་མགུལ་བསྡམས་ཏེ་ཕྱག་གིས་ཆུ་དཀྱིལ་དུ་འཕང་བས། མདའི་རྩ་བ་ཆུ་གཏིང་དུ་ས་ལ་ཟུག་པ་བཞིན་བསྡད་པའི་མདའི་མགུལ་གྱི་དར་ཚོན་རླུང་གིས་བསྐྱོད་དེ་གནས་པ་ལ། ཆུ་འགྲམ་ནས་གྱེན་དུ་སྨོན་ལམ་ཤིས་བརྗོད་དུ་མ་གསུངས་བཞིན་དལ་བུས་ཕེབས་རིང་མདའ་ཡང་དར་ཚོན་ཆུ་སྟེང་བཀྲམ་པ་ལྟར་བྱུང་སྟེ་གྱེན་ལ་ཤར་གྱིས་བྱུང་བ་དེར་འཁོད་ཐམས་ཅད་ཀྱིས་མཇལ་བ་དང་། གོ་ཐིའི་གནས་ཀྱི་ལྟེ་བའི་ས་དམིགས་ལ་ཐོག་མར་ས་འདུལ་མཛད་དེ་གར་གྱི་སྟང་སྟབས་གནང་བ་དང་བྱ་རྒོད་དུ་མ་ནམ་མཁའ་ལས་བབ་ནས་གཤོག་པ་བརྒྱང་སྟེ་གནས་པ་སོགས་དེ་འདྲའི་རྟགས་མཚན་ཁྱད་པར་ཅན་དུ་མ་བྱུང་བ་དང་། སྤྱིར་གསུང་བརྩམས་གང་གནང་སྐབས་སུ་ཐུགས་དམ་རྟེན་འཇམ་དཔལ་ཡེ་ཤེས་སེམས་དཔའི་སྣང་བསྙན་གྱི་ཐུགས་ཀ་ནས་འོད་ཀྱི་ཟེར་ཐག་ཞིག་འཕྲོས་ཏེ་རྗེ་བླ་མའི་ཐུགས་ཀར་ཐིམ་པ་དང་བརྩམ་བྱ་གང་ཡིན་ཐུགས་ལས་རང་བརྡོལ་གྱིས་ཐོགས་པ་མེད་པར་འབྲི་བ་དང་། རེས་འཇམ་དཔལ་གྱི་ཐུགས་ཀའི་འོད་ཟེར་གྱི་རྩེ་ལས་ཡིག་འབྲུ་རྣམས་ཁྲ་ཁྱུག་གེར་གསལ་བ་ལ་གཟིགས་སྟེ་བསྟན་བཅོས་རྣམས་མཛད་པ་གསུངས་ཤིང་། བསྟོད་པ་བཀྲ་ཤིས་མི་འགྱུར་མ་སོགས་འགའ་ཞིག་ནི་སྐུ་རྟེན་ཉིད་འཇམ་དཔལ་དངོས་སུ་གྱུར་ཏེ་གསུངས་པའང་ཡོད་འདུག་ལ་སྐུ་རྟེན་འཇམ་དཔལ་དངོས་སུ་གྱུར་ནས་རྗེ་བླ་མ་ལ་ལུང་ཡང་ཡང་བསྟན་པའང་། རྗེ་བླ་མ་འོད་གསལ་གྱིས་དངོས་སུ་གསན་པར་གསུངས་ཤིང་། ཐུགས་དམ་རྟེན་འཇམ་དཔལ་གྱི་སྐུ་འདི་ཡང་སྔར་རྫ་རྒྱལ་དུ་ཕེབས་སྐབས་ཤིག་རྟེན་འབྲེལ་གྱི་སྒོ་འཕར་ཁྱད་པར་ཅན་དུ་མ་རང་འགྲིགས་ཀྱིས་ཕྱག་ཏུ་ཕོག་པ་དེ་ནས་བཟུང་རྒྱུན་པར་ཐུགས་དམ་གྱི་རྟེན་དུ་འབྲལ་སྤང་གནང་ཞིང་ཁོ་བོའི་འཆད་རྩོད་རྩོམ་པ་ཐམས་ཅད་འདིའི་བྱིན་རླབས་ཀྱི་མཐུ་ཡིན་ཞེས་འཇམ་དཔལ་དངོས་དང་རྣམ་དབྱེར་མེད་པའི་ཐུགས་རྩིས་ཤིན་ཏུ་ཆེ་བར་ཕྱིས་སྐུ་གཤེགས་རྗེས་ཞལ་ཆེམས་བཞིན་འཇམ་དཔལ་གྱི་སྣང་བརྙན་ཁྱད་འཕགས་ཞེ་ཆེན་བསྟན་གཉིས་དར་རྒྱས་གླིང་ས་སྙིང་ལྷ་ཁང་དུ། ཆོས་རྗེ་བླ་མ་རིན་པོ་ཆེ་འོད་གསལ་གྱིས་བཞེངས་པའི་ཐུགས་ཀར་བཞུགས་སུ་གསོལ་བས་བདུད་རྩི་སྔ་ཕྱི་མང་དུ་བབ་པ་དང་། འཇམ་མགོན་བླ་མ་རིན་པོ་ཆེའི་ཐུགས་སྲས་རྒྱལ་ཚབ་གདོད་མའི་མགོན་པོའི་ཀྱང་གཉུག་སེམས་སྐོར་ལྗགས་བསྒྲིགས་ཀྱི་ཚེ་དང་པོ་བསྒྲིགས་དཀའ་བ་ཞིག་བྱུང་བས་རྗེ་བླ་མ་རིན་པོ་ཆེའི་སྐུ་གདུང་མདུན་མཆོད་འབུལ་གསོལ་འདེབས་ཡང་ཡང་མཛད་པས་དགོངས་པ་ཕྱིན་ཅི་མ་ལོག་པ་ཐུགས་ལ་འཁྲུངས་ཏེ་བསྒྲིགས་ཆོག་པ་བྱུང་ཞེས་གསུངས་པ་སོགས་བྱིན་རླབས་ཀྱི་གཟི་འོད་མཚུངས་པ་མེད་པ་འདི་ཉིད་ཡིན་ནོ། །དེར་མ་ཟད་གོང་དུ་སྨོས་པའི་ཐུགས་དམ་གྱི་ལྷ་སོ་སོའི་བསྐྱེད་བཟླས་སྐབས་དཀྱིལ་འཁོར་དེའི་གཙོ་བོ་རྣམས་དང་གཉིས་སུ་མེད་པར་ལྟ་བུར་གྱུར་ནས་དེའི་བྱིན་རླབས་ཀྱིས་རིག་རྩལ་གཡོས་ཏེ་ཡེ་ཤེས་ཀྱི་རྩ་ཁ་བྱེ་བས་སྒྲུབ་ཐབས་དང་བསྟོད་ཚོགས་སོགས་དགོངས་ཀློང་ལས་རང་བརྡོལ་དུ་བྱུང་བར་གསུངས་ཤིང་། སྐྱབས་རྗེ་རྒྱལ་ཚབ་རིན་པོ་ཆེའི་བཀའ་བརྒྱད་རྣམ་བཤད་མཛད་ཐུབ་ཀྱི་གསུངས་བསྐུལ་གནང་སྐབས་ཀྱི་ཞལ་འཕྲོས་སུ་རང་བཞིན་གྱི་བསམ་མནོ་བཏང་སྟེ་བྲིས་ན་སུ་ལའང་བྲི་རྒྱུ་ཡོད་མོད། དེ་ལ་དགོས་པ་མེད། སྐབས་འགར་བླ་མ་དང་ལྷག་པའི་ལྷའི་ཐུགས་རྗེ་ལ་བརྟེན་ནས་རང་བཞིན་གྱིས་སེམས་ལ་ཤར་ཏེ་བཟོ་བཅོས་སོགས་ཆེར་མ་དགོས་པར་འབད་མེད་དུ་བྲི་ཆོག་པ་ཞིག་ཡོང་རྒྱུ་ཡོད་དར་བབ་དེ་ལྟར་བྱུང་ན་ལས་སླ་ཞིང་དགོས་པ་ཆེ་བ་ཞིག་ཡོད་པས་དེ་བར་རེ་ཞིག་སྒུགས་ལ། ཁྱེད་ནས་ཀྱང་བླ་མ་དང་ཡི་དམ་ལ་གསོལ་བ་ཐོབས། ཆོས་སྲུང་ལ་ཕྲིན་བཅོལ་རེ་གྱིས་ཞེས་བཀའ་ཕེབས་པ་དང་། འཇམ་མགོན་ཐམས་ཅད་མཁྱེན་པ་མཁྱེན་བརྩེ་རིན་པོ་ཆེའི་ཀྱང་རྗེ་བླ་མ་མི་ཕམ་ལ་གསུངས་བརྩམས་རིགས་བསྐུལ་མ་ཇི་ལྟར་བྱས་རུང་ལྷག་པའི་ལྷའི་བྱིན་རླབས་ཀྱིས་དུས་ལ་བབ་ཅིང་དགོས་པའི་གནས་ཁྱད་པར་ཅན་མངོན་དུ་མ་གྱུར་བར་རང་བཞིན་གྱིས་བརྩམས་པར་དཀའ་ཞེས་གསུངས་པ་དང་། དད་ལྡན་འགའ་ཞིག་ལའང་ཁོ་བོའི་མཁས་པའི་རྣམ་དཔྱོད་འབའ་ཞིག་གིས་བྲིས་ན་བཀའ་དང་བསྟན་འགྱུར་ཙམ་གྱི་པུསྟིའི་གྲངས་སུ་སོན་པ་ཙམ་ཞིག་བྲིས་ཀྱང་ཟད་མཐའ་མེད་མོད་དེ་རིགས་ལ་དགོས་པ་ཆུང་ཞིང་། ད་ལྟ་བརྩམས་པ་འདི་རིག་བྱིན་རླབས་ཀྱི་བབ་དང་དགོས་པ་ཁྱད་པར་ཅན་རེ་ཡོད་ངེས་ཁོ་ན་ཡིན་པས་སྐལ་བཟང་དག་གིས་ཀྱང་བློ་གཏད་ཐུབ་པ་ཡོད་ཅེས་དངོས་སུ་གསུངས་པ་དང་སྤྱིར་དུས་རྒྱུན་པར་སྲོད་ལའང་མར་མེ་དང་། ཤོག་བུ་ལྡེབ་ཆ་ཤས་བཅས་སྐུའི་ཉེ་ལོགས་སུ་རྟག་ཏུ་བཞག་ནས་མཚན་མོ་ཡང་ལྗགས་བརྩམས་མཛད་དགོས་ཅན་དུ་མ་ཡོད་འདུག་ཅིང་། མཁན་ཆེན་བླ་མ་མངྒ་ལས་འཇམ་དཔལ་མཚན་བརྗོད་ཀྱི་འགྲེལ་ཆེན་ཞིག་མཛད་ཐུབ་ལན་དུ་མར་གསུངས་བསྐུལ་ཚེ་དེ་ད་ལྟ་བྲི་འོས་མིན། རང་བརྩམས་ཐམས་ཅད་ཀྱི་མཇུག་སྡུད་ཡིན་ཞེས་ཕེབས་པ་སོགས་ལ་དཔག་ན་རང་བཞིན་བབ་བརྩམས་མིན་ཚུལ་ཤེས་ནུས་པ་དང་། ཕྱིས་སྐུ་གཤེགས་ཁར་མཚན་བརྗོད་འགྲེལ་བ་ལོགས་སུ་བྲི་རྒྱུ་མ་བྱུང་ཡང་དོན་གནད་ཐམས་ཅད་དུས་འཁོར་འགྲེལ་ཆེན་དུ་ཚང་བར་ཡོད་ཅེས་གསུངས་པ་དང་། རྗེ་རང་ཉིད་ཀྱི་ཞལ་ནས་ཀྱང་། འཇམ་དབྱངས་བློ་ལྡན་མཆོག་སྲེད་རྩལ། །སྙིང་གི་པདྨོར་བཀོད་པ་ལས། །ཟབ་མོའི་ཆོས་མཆོག་ནོར་བུའི་གཏེར། །ཡིད་ཀྱི་མཚོ་ལས་བརྡོལ་བ་ཡིན། །ཞེས་སོགས་གསུངས་ཕལ་ཆེར་གྱི་གཤམ་དུ་གསལ་བ་ལྟར་དོན་དུ་ཀུན་མཁྱེན་ཆོས་ཀྱི་རྒྱལ་པོའི་སྙིང་ཐིག་གི་སྐོར་དང་། མཛོད་ཆེན་བདུན་སོགས་བཞིན་དགོངས་གཏེར་བསྟན་བཅོས་ཀྱི་ཚུལ་དུ་སྣང་བར་མཛད་པར་ངེས་ཤིང་། དེར་མ་ཟད་གསུངས་འགའ་ཞིག་གི་ནང་བརྡའ་ཡིག་སོགས་ཀྱང་བཀོད་པར་མཛད་གནང་ལྟར་ཡིན་ལ། དུས་འཁོར་བསྡུས་རྒྱུད་སོགས་གསུང་འགའ་ཞིག་མཛད་པའི་སྐབས་སུ་འཚུབ་སློང་གིས་སྙུན་ཁམས་འཁྲུགས་པ་སོགས་བྱུང་ཞིང་། ཕྱིས་རྒྱུད་བཤད་ཀྱི་སྐབས་སུ་ཡང་སྔ་མོ་ནས་རྒྱུད་ཀྱི་གསང་བ་འདི་ལ་འགྲེལ་བ་བྲི་འདུན་ཡོད་ཀྱང་ད་ལྟའི་བར་དུས་ལ་མ་བབ། ད་ནད་བབ་ལྗི་ཞིང་ན་ཚོད་རྒས་པས་འཆད་སྤེལ་ཞུས་དག་སོགས་དབང་པོས་ལྕོགས་དཀའ་བར་འདུག་གསུངས་པ་སོགས་ཀྱང་གསུང་བའི་བཀའ་རྒྱ་དཀྲོལ་བའི་དུས་སོགས་སོ་སོར་ངེས་དཀྲིགས་སུ་མཛད་དགོས་པར་མངོན་ལ།…

འོད་ལུས་སུ་བཤེགས་པའི་དཔའ་བོ།།ན་མོ་གུ་རུ་ཨེ་མ་ཧོ།༼༡༽ཨེ་རིག་སྟོང་པ་རྟོགས་པས་རྡུལ་ཕྲན་དེངས།།ཝཾ་སྙིང་རྗེ་བས་སྙིགས་ལྔའི་གདུང་བ་སེལ།།ཕན་བདེའི་རྣལ་འབྱོར་འོད་ཀྱི་ཕུང་པོ་ཅན།།ཆགས་སྡང་རྨོངས་གཅོད་དམ་པའི་ངང་ཚུལ་རྒྱལ།།༼༢༽ཞི་གནས་ཏིང་འཛིན་བདུད་རྩི་འཐུང་བའི་སྟོབས།།འདུ་འཛིའི་རྒྱུན་བཅད་དབེན་པའི་རི་ལ་བཞུགས།།གསང་བའི་སྒྲུབ་ཁང་རྣམ་གཡེངས་གཡུལ་ལས་གྲོལ།།དྲན་ཤེས་བག་ཡོད་དམ་པའི་རྣལ་འབྱོར་རྒྱལ།།༼༣༽ཆོས་བརྒྱད་ཞེན་པའི་གྲིབ་མ་ཡོངས་སུ་བྲལ།།མཚོ་གླིང་ཉི་ཟླ་རི་རྩེ་གྲོགས་སུ་སྒྲོན།།འོད་གསལ་གོམས་པ་རྩེ་གཅིག་གྲུབ་པའི་མཐུས།།ཕུང་ཁམས་སྐྱེ་མཆེད་འོད་གསལ་དབྱིངས་སུ་ཐིམས།༼༤༽ཡེངས་མེད་ངང་ལ་རྒྱུན་ཆགས་འགྲོ་བའི་དོན།།ཇི་གནས་སེམས་ཅན་མ་སྟོང་བར་དུ་མཛད།།འགྲོ་དོན་ཐུགས་བསྐྱེད་ཟབ་རྒྱས་སེམས་དཔའ་ཆེ།།འཇིགས་མེད་རྟུལ་ཞུགས་སྤྱོད་པའི་རྣལ་འབྱོར་རྒྱལ།།༼༥༽དང་པོ་དཀའ་སྤྱད་བསྲན་ཚུགས་བརྩོན་པ་སྤེལ། །བར་དུ་ཞི་ལྷག་རྒྱུན་ཆགས་བར་མེད་འབད། །ཐ་མ་སྙིང་སྟོབས་རྙེད་པའི་དགའ་འབྲས་མྱོང་། །གྲུབ་པ་མཐར་ཕྱིན་ཀུན་བཟང་རྣལ་འབྱོར་རྒྱལ།།གློག་བརྙན་འདིས་རྐྱེན་ལས་ཤྲཱིཿསྨྱོན་ཨེ་མ་ཧོས་དེ་ཉིད་དུ་ཐོལ་བྱུང་དུ་བྲིས་པ་དོན་དང་ལྡན་པར་གྱུར་ཅིག་གུ།། །།

ཚེ་རིང་སྒྲོལ་མ་གདམས་པ་མི་ཚེ་ནང་གི་དམ་པ།།ཨེ་མ་ཧོ།།འདི་དང་ཕྱི་མར་ཕན་བདེའི་དོན།།ཤིན་ཏུ་རྒྱ་ཆེར་འགྲུབ་འདོད་ནས།།རྒྱལ་དང་རྒྱལ་སྲས་བསྟེན་པ་ཉིད།།དམ་པའི་རྣམ་ཐར་བཞིན་དུ་འབོད།། བསླུ་མེད་སྐྱབས་འོས་དམ་པ་ལ།།བདེན་པའི་གནས་ལུགས་ཡེ་ནས་རྫོགས།རྒྱུ་འབྲས་མི་བསླུའི་རྟེན་འབྲེལ་ལམ།།ཡིད་ཆེས་དད་པས་རབ་ཏུ་བརྩོན།། ཆོས་ཀྱི་རྩ་བ་དད་པ་བརྟས།།གསང་སྔགས་སྙིང་པོ་དག་སྣང་ལས།།དད་དང་བསོད་ནམས་ཚོགས་འཕེལ་ཞིང་།།ཀུན་བཟང་འཇུག་པའི་སྒོ་ཆེན་འབྱེད།། དད་པ་ཡིད་བཞིན་ནོར་བུ་ལ།།སངས་རྒྱས་ཆོས་དང་དགེ་འདུན་ཚང་།།ནམ་ཡང་མི་བསླུའི་སྐྱབས་གནས་ལ།།ཡིད་ཆེས་དད་གུས་རྟག་ཏུ་བྱ།། དལ་འབྱོར་རྙེད་པ་དཀའ་བ་དང་།།མི་རྟག་སྒྱུ་མའི་ཚུལ་ལ་བསམ།།ལས་འབྲས་དཀར་ནག་རྣམ་སྨིན་ལས།།འཁོར་དང་མྱ་ངན་འདས་པར་གདམས།། བདེན་པའི་དཀོན་མཆོག་ཡིད་ཆེས་ངང་།།དྲང་པོའི་ལམ་ཁ་མ་ནོར་དང་།།འདི་ཕྱིའི་ཕུན་སུམ་སུམ་ཚོགས་པ་ཀུན།།མ་འབད་ལྷུན་གྱིས་འགྲུབ་པར་ངེས།། བློ་ལྡན་ཟུང་ཐུབ་དེས་པ་དགོས།།ཁྲེལ་དང་བག་ཡོད་ངང་ཚུལ་གྱིས།།དྲང་དང་དམ་བརྟན་གཞི་གཟུང་ནས། །བྱས་པ་ཤེས་ཤིང་དྲིན་བཟོ་མཛོད།། ཐབས་དང་ཤེས་རབ་ཟུང་ལྡན་ན།།དད་དང་གཏོང་བའི་ཤུགས་བསྐྱེད་འཕེལ།།འདི་དང་ཕྱི་མའི་གནས་སྐབས་བདེ།།ཚེ་རིང་ནད་མེད་ཡིད་འོང་འབྱོར།། དྲན་པ་ཀུན་བཟང་རྒྱུད་ལ་སྐྱེས།།ཤེས་བཞིན་བླང་དོར་མ་ཉམས་ཕྱིར།།བག་ཡོད་གསེར་གྱི་ར་བ་ལས།།ནམ་ཡང་མ་འདས་སྙིང་གི་གྲོགས།། བསྟན་ལ་ཕན་པའི་ཉམས་ལེན་དང་།།འགྲོ་ལ་སྨིན་པའི་བསོད་ནམས་ཚོགས།།ཡེ་ཤེས་ཡོན་ཏན་ཡར་ཟླ་བཞིན།།བཀྲ་ཤིས་བདེ་ལེགས་ཕུན་ཚོགས་ཤོག།ཞེས་པ་འདི་ཡང་རབ་གནས་ས་ཕག་རྒྱལ་ཟླའི་དབང་ཚེས་དགེ་བར་ཚ་མོ་སྒྲོལ་མ་ཚེ་རིང་ངོར་ཞེས་བསྐུལ་ངོར་འཇམ་དཔལ་དགྱེས་པ་རྡོ་རྗེ་རུ་འབོད་པས་ཨེ་ཝཾ་ཀུན་བཟང་ཆོས་གླིང་དུ་བྲིས་པ་མངྒ་ལཾ།། དགེའོ།།དགེའོ།།དགེའོ།།།།

དྷྱཱྃ།༔ ཆོས་ཉིད་འོད་གསལ་རིག་པའི་གསང་མཛོད་ལས༔པདྨའི་རྣམ་ཐར་འདོད་འཇོའི་བུམ་བཟང་སྐལ་ལྡན་དད་པའི་རྒྱུད་བསྐུལ་ཌཱ་ཀི་དགྱེས་པའི་ཞལ་ལུང་པདྨ་འོད་དུ་བགྲོད་པའི་ཐེམ་སྐས་ཞེས་བྱ་བ་བཞུགས་སོ༔དྷྱཱྃ།༔ དྡ།དྡྷྱ།།ཉྭ།ཟྭ།༔ཧྱ།གྷྱ།དྷྱབྷྱེ།།༔ ན་མོ་གུ་རུ་བྷུདྡྷ་དྷརྨ་ སངྒཱ་ཡ༔ ཀ་ཡ་ཝཱཀྐ་ ཙིཏྟ་ཧྲཱི་ད་ཡ༔ ཨཽཊི་ཡ་ན་པདྨ་ཀ་ར་ཝེ༔ མ་ཎི་རཏྣ་སིདྡྷི་ཕ་ལ་ཧཱུྃ༔ ཕྱག་འཚལ་བླ་མ་ སངས་རྒྱས་ཆོས་དགེ་མདུན༔ སྐུ་གསུངས་ཐུགས་ཀྱི་སྙིང་པོ་གཅིག་བསྡུས་པ༔ ཨོ་ རྒྱན་ཆེན་པོ་པདྨ་འབྱུང་གནས་ཞེས༔ ཡིད་བཞིན་ནོར་བུ་མཆོག་དེས་དངོས་གྲུབ་སྩོལ༔ ཨེ་མ་ཧོ༔ སྔོན་ཚེ་རྒྱལ་པོ་རྩིབས་ཀྱི་མི་འཁྱུད་ཀྱི༔ ཕྱི་ནང་བློན་འཁོར་བུ་སྟོང་བྲན་རྣམས་ ཀྱིས༔ སངས་རྒྱས་མཆོད་ནས་དམ་པའི་ཆོས་ཉན་ཏེ༔ ཕྱོགས་བཅུའི་ཞིང་དག་བཟུང་ བར་དམ་བཅས་ཚེ༔ རྒྱ་མཚོའི་རྡུལ་གྱི་མི་མཇེད་ཞིང་ཁམས་སུ༔ ངོ་མཚར་རྨད་བྱུང་ སྨོན་ལམ་ལྔ་བརྒྱ་གཏབ༔ སྙིང་སྟོབས་ཆེན་པོས་ཚོགས་གཉིས་སྒྲིབ་པ་སྦྱོང་༔ རྩོད་ལྡན་ ཞིང་བཟུང་པད་དཀར་ལྟར་སྔགས་པའི༔ འདྲེན་པ་མཚན་ཐོས་ཕྱིར་མི་ལྡོག་པ་དེས༔ ལྷ་ཡུལ་ཏོག་དཀར་རྒྱལ་ཚབ་བྱམས་པར་གསོལ༔ ང་འོག་ཁྱེད་ཉིད་སངས་རྒྱས་འགྱུར་རོ་ གསུངས༔ ས་གའི་ཡར་ཚེས་ཐལ་དཀར་མཆེ་དྲུག་སྤྲུལ༔ གསོ་སྦྱོང་ལ་གནས་ལྷ་མོའི་ ལྷུམས་སུ་བཞུགས༔ བཀྲ་ཤིས་ལུམ་བིའི་ཚལ་འཁྲུངས་ས་ཆེན་སྟེང་༔ གོམ་པ་བདུན་བོར་ འཇིག་རྟེན་མཆོག་ང་གསུངས༔ ལང་ཚོའི་ཚད་རྫོགས་བཙུན་མོ་ཁབ་ཏུ་བཞེས༔ གྲོང་ ཁྱེར་སེར་སྐྱའི་ཤཀྱའི་རྒྱལ་སྲིད་བཟུང་༔ རྒྱུ་རྩལ་བློ་རིག་ཟླ་མེད་སྟོབས་དང་ལྡན༔ མི་ཡི་ སེང་གེ་ལྷ་ཡི་ལྷ་ཞེས་གྲགས༔ ཕོ་བྲང་རྩེར་གཟིགས་དགའ་ན་མཆི་བ་དང༔ དགེ་སྦྱོང་ གཟུགས་མཐོང་འཁོར་བར་ཡིད་སྐྱོ་ནས༔ ཁྱིམ་ནས་བྱུང་སྟེ་མཁར་གཤེགས་ཆིབས་ཁ་ བསྒྱུར༔ རྣམ་དག་མཆོད་རྟེན་དྲུང་དུ་དབུ་སྐྲ་གསིལ༔ ནེ་ར་ཛྙ་ནར་ལོ་དྲུག་ཏིང་འཛིན་ བསྒོམས༔ དཀའ་ཐུབ་མཐར་ཕྱིན་འོ་མའི་བསྙེན་བཀུར་མཐུས༔ གསེར་མདོག་ལང་ཚོ་ དལ་བབ་མཚན་བཟང་མངོན༔ བྱང་ཆུབ་ཤིང་དྲུང་རྩྭ་གདན་སྐྱིལ་ཀྲུང་བཅས༔ མི་གཡོ་ དམ་བཅའ་རྟན་པོར་མངོན་སངས་རྒྱས༔ རྒྱལ་པོའི་ཁབ་དང་གྲོང་ཁྱེར་ཡངས་པ་ཅན༔ གླང་སྨྱོན་བཏུལ་ནས་སྤྲེའུས་སྦྲང་རྩི་ཕུལ༔ མ་ག་དྷ་རུ་ཐུབ་པ་མངོན་བྱང་ཆུབ༔ ཆོས་1 བསྟན་མ་གོ་སྐྱོ་བའི་ཚུལ་མཛད་ཚེ༔ ཚངས་པ་བརྒྱ་བྱིན་གསེར་འཁོར་ཆོས་དུང་ཕུལ༔ ཝ་ ར་ཎ་སིར་ཆོས་ཀྱི་འཁོར་ལོ་བསྐོར༔ ཛེ་ཏའི་ཚལ་དུ་ཆོ་འཕྲུལ་བདུད་བཅོམ་ནས༔ དངོས་ དང་དངོས་མེད་འགྲོ་བ་མཐའ་དག་ལ༔ ཆོས་ཀྱི་འཁོར་ལོ་རྣམ་པ་བཞི་རུ་བསྐོར༔ ས་གའི་ ཉ་ལ་རྩྭ་མཆོག་དྲུང་དུ་བྱོན༔ རྟག་འཛིན་བྱིས་བློ་མ་རིག་ལས་སློང་ཕྱིར༔ ང་ནི་འདི་ནས་མྱ་ ངན་འདའ་འོ་གསུངས༔ ཀུན་དགའ་བོ་སོགས་མྱ་ངན་མ་མཛད་ཅིག༔ ལྷོ་ནུབ་མདང་ལྡན་ གཡུ་མདོག་མཚོ་དབུས་སུ༔ རྫུས་སྐྱེས་ང་སྤྲུལ་ང་ལས་ལྷག་པ་འཁྲུངས༔ ཨོ་རྒྱན་མ་ལ་ཡ་ དང་གནམ་ལྕགས་རྩེར༔ གསང་སྔགས་བསྟན་པ་མཁའ་ལ་ཉི་བཞིན་གསལ༔ ང་ཡི་བསྟན་ པ་བྱང་ནས་བྱང་དུ་དར༔ ཞེས་གསུངས་ལུང་བསྟན་ཞི་བའི་དབྱིངས་སུ་གཟིམས༔ བསོད་ ནམ་ཞིང་དུ་མཆོད་རྟེན་རིང་བསྲེལ་བཞག༔ དེ་ཚེ་ནུབ་ཕྱོགས་བདེ་ཆེན་ཞིང་ཁམས་ནས༔ རིགས་ཀྱི་བདག་པོ་སྣང་བ་མཐའ་ཡས་ཀྱིས༔ འགྲོ་འདུལ་གཟིགས་སྟངས་རྣམ་པ་གསུམ་ ལ་གཟིགས༔ བཞུགས་སྟངས་སྐུ་ལས་སྤྲུལ་བ་རྣམ་གསུམ་འབྱེད༔ ཕྱག་གཡས་འོད་ཟེར་ སྤྱན་གཟིགས་གཡོན་སྒྲོལ་མ༔…

ཡེ་ཤུའི་ཆོས་སྤེལ་བ་སྨན་བླ་སྐྱབས་དང་སེང་རྡོར།དེང་སྐབས་བོད་ནང་གི་ཡེ་ཤུའི་ཆོས་སྤེལ་བའི་སྐོར་གླེང་དགོས་ན། ཨ་མདོའི་རྩེད་མཚར་བཤད་མཁན་ལས་བྱེད་པ་སྨན་བླ་སྐྱབས་དང། སེང་རྡོར་དྲ་ཚིགས་ཀྱི་བདག་པོ་སེང་རྡོར་གཉིས་ཀྱི་སྐོར་མི་བཤད་ཐབས་མེད་རེད། རྒྱུ་མཚན་ཅི་ཡིན་ཟེར་ན། གཅིག་ནི། སྨན་བླ་སྐྱབས་དང། སེང་རྡོར་གཉིས་ཀ་བརྙན་འཕྲིན་དང། གློག་བརྙན། དྲ་རྒྱ་དང། དེ་བཞིན་དཔེ་དེབ་སོགས་སུ་མཐོང་རྒྱུ་མང་པོ་འདུག་པས། ཁོ་གཉིས་བོད་མི་མང་པོ་ཞིག་གིས་ཤེས་བ་དང། དེ་བས་དོ་སྣང་བྱེད་དགོས་བའི་ཆགས་པའི་མི་གཉིས་རེད། སྤྱིར་བཏང་མི་འདི་གཉིས་ཀྱི་སྙན་གྲགས་དང་གོ་གནས༼སེང་རྡོར་ལ་གོ་གནས་མི་འདུག༽་ཀྱང། སྔོན་གྱི་མཁས་བ་དག་གི་འགྲོ་ལུགས་དང། ཡང་ན་ནུབ་ཀྱི་སྲོལ་ལུགས་ལྟར། ངེས་པ་དོན་གྱིས་སློབ་གཉེར་དང།དཀའ་སྤྱད་ཀྱི་ལས་ཀ་བྱས་པ་དེ་འདྲ་མ་ཡིན་པར། གཙོ་བོ་སྲིད་གཞུང་དང། དེང་རབས་ཀྱི་འཕྲུལ་ཆས་ཀྱི་རམ་འདེགས། གློག་ལྟར་འགྱུར་བཞིན་པའི་ཆབ་སྲིད་ཀྱི་གར་སྟེགས། གློག་ཀླད་ཀྱི་འཕྲོད་སྤྱོར་བཅས་ལ་བརྟེན་ནས་བྱུང་བ་ཞིག་རེད། དོན་གྱིས་འཕྲུལ་རིགས་ཀྱིས་མི་རིགས་ལ་བཟོས་བའི་ཤུགས་རྐྱེན་དང། ཆབ་སྲིད་ལས་འཕྲོས་བའི་དཔའ་བོ་དང། མཁས་བ་བཟོ་སྟངས་དང། མི་གྲགས་ཅན་བཟོ་སྟངས་ཀྱིས་ནུབ་ཀྱི་མིའི་རིགས་རིག་པའི་དཔྱད་ཚུལ་ལྟར། དཔྱད་པར་བྱ་བ་མང་དུ་འདུག་མོད། འདི་རུ་ཁོ་གཉིས་དཔེར་མཚོན་ཞིག་ལ་བཞག་ནས། བོད་ནང་གི་ཡེ་ཤུའི་ཆོས་སྤེལ་བ་དང། ཁོང་གཉིས་ཀྱིས་དེའི་ཐད་ལ་བཏང་བའི་བྱེད་ནུས་སོགས་ཀྱི་ཐད་ལ་གཏམ་འགའ་གླེང་རྒྱུ་དེ་ཡིན། དེ་ཡང་ཕྱོགས་གཅིག་ནས་བཤད་ན། བོད་ཀྱི་རྙིང་གཏོར་གསར་བརྗེ་བ་དག་གིས་དུས་རྒྱུན་བཤད་བཞིན་པའི་༼ཤུགས་རྐྱེན༽ཟེར་པ་དེའི་སྐོར་ཡིན། ཤུགས་རྐྱེན་ཟེར་པ་འདི་གླེང་དུས། དམག་དོན། ཆབ་སྲིད། ཆོས་ལུགས་དང་གྲུབ་མཐའ་སྣ་ཚོགས་མང་པོ་ཞིག་སྐོར་ནས་གླེང་དགོས་བ་ཞིག་རེད། འདི་རུ་གཙོ་བོ། ཁོ་གཉིས་ཀྱིས་མི་སོ་སོའི་འདུན་མོས་དང། ལོངས་སྤྱོད་སོགས་ཕར་བཞག་ནས། ཁོ་གཉིས་ཀྱིས་ཡེ་ཤུའི་ཆོས་སྤེལ་བ་ཚོ་ལ་ཞབས་འདེགས་ཇི་ལྟར་བྱས་བ་དང། དེ་ལས་བྱུང་བའི་བོད་མི་རིགས་དང། ཆབ་སྲིད། རིག་གཞུང་བཅས་ལ་འཇོག་སྲིད་པའི་ཤུགས་རྐྱེན་དེ་ཡིན། ༼པར་འདི་དྲ་ཐོག་ནས་བླངས་པ་ཡིན།༽ ཨ་མདོའི་མི་ཞིག་ཡིན་ན། སྨན་བླ་སྐྱབས་མི་ཤེས་པ་མེད་པ་ལྟ་བུ་རེད།ང་ཡང་ཆུང་དུས་ཐེངས་གཅིག་ཁོ་ལ་འཕྲད་མྱོང། དེ་ཡང་ཕལ་ཆེར་ལོ་ཉི་ཤུ་ཙམ་གྱི་གོང་རེད། དེ་དུས་ཁོ་རང་མོས་སྙན་ངག་ཟེར་པ། དོན་གྱིས་རིག་གནས་གསར་བརྗེའི་ཆེན་མོ་ལྷག་མའི་སྐད་འབོད་ལས་བྱུང་བའི་སྙན་ངག་འབྲི་བའི་སྐབས་རེད། དེའི་རྗེས་ཁོ་ཨ་རི་ལ་༼བོད་ཀྱི་སྒྱུ་རྩལ་པ་ཞིག་༽གིས་མིང་ཐོགས་ནས་གདན་འདྲེན་བྱས་དུས། ཕྲན་ནས་ཁོའི་སྐད་གྲགས་ཅན་གྱི་ཁ་འཚར་༼གེ་སར་རྟ་རྫི༽ཟེར་པ་དེ་དབྱིན་བསྒྱུར་བྱས་ནས། དེའི་སྐབས་ཕྱི་གླིང་པའི་ཁྲོད་དུ་སྐད་གྲགས་ཅུང་ཟད་བྱུང་པ་མ་ཟད། རྗེས་སུ་བོད་ཕྱི་ནང་གཉིས་སུ་དབྱིན་མ་གང་དུ་བཀྲམས་ཡོད་པ་དེ་བཞིན་རེད། དེ་མིན་སོ་སོའི་ངོས་ནས་ཁོ་ངོ་མི་ཤེས་ལ། ལྟ་བའི་ཐོག་ནས་ཀྱང་གསལ་ཆ་ཆེན་པོ་མེད། སྤྱིར་བཏང་ཁོ་རང་ནི་སྲིད་གཞུང་གིས་སྒྲུབ་པའི་གར་སྟེགས་སྟེང། ཁ་མཚར་བཤད་མཁས་བ་ལས། ཕྱི་ནང་གི་རིག་གཞུང་སོགས་ལ་སློབ་གཉེར་དེ་འདྲ་ཆེན་པོ་མེད་པ་འདྲ། ཡིནའང་ཧ་ལས་པའི་རྙིང་གཏོར་གསར་བརྗེ་བ་ཞིག་ཡིན་པ་མ་ཟད། ཁ་ཁོག་མེད་པར་བོད་ཀྱི་ཤེས་རིག་ལ་སྡང་མཁན་ཞིག་རེད། དེའི་སྔོན་ཞིག་ལ་བོད་ཀྱི་གླུ་གཞས་ནི་ཆོས་པ་ཚོས་འཕྲོག་ནས། བླ་མ་དང་དགེ་བཤེས་སོགས་ལ་བསྟོད་གླུ་འགའ་ཤས་ཀྱིས་བཀང་འདུག་ཅེས་ཟིན་ཐོ་ཞིག་ཀྱང་སྤེལ་འདུག། སེང་རྡོར་གྱི་སྐོར་བཤད་ན། ང་ཁོ་ལ་འཕྲད་མྱོང་མེད། ཡིནའང་སེང་རྡོར་དྲ་ཚུགས་ལ་མང་པོ་འགྲོ་མྱོང་བ་མ་ཟད། སྐབས་རེ་ཟིན་ཐོ་འགོད་པ་དང། མཆན་ཀྱང་མང་པོ་སྤེལ་མྱོང་། ཁོས་སྒྲུབ་པའི་དྲ་ཚུགས་༼ད་ལྟ་སྒོ་རྒྱབ་ཟིན༽་ཆ་ནས་དྲ་ཚུགས་གཞན་དང། ཁྱད་པར་ཏུ་ཕྱི་རྒྱལ་དུ་ཡོད་པའི་ཁ་བརྡ་དྲ་བ་སོགས་ལས་ཡག་ཤོས་སུ་མཐོང། ཅི་ཡིན་ཞེ་ན་ཁོས་ལྟ་ཚུལ་འཐད་མིན་ལ་མ་ལྟོས་བར། ཟིན་ཐོ་མང་པོ་ཞིག་འགོད་ཅི་ཐུབ་བྱེད་བཞིན་འདུག་པས། ཁོ་ལ་དགའ་གུས་བསྔགས་བརྗོད་ཀྱང་བྱས་མྱོང། ཁོང་གིས་ཁོས་བྲིས་བའི་དེབ་འགའ་ཤས་ལ་ཡོད་པ་དེ་དག་ལ་ཟུར་བལྟ་བྱས་མྱོང་མོད། རིག་གཞུང་གི་ཐད་ནས་ལེན་པ་དང། དོ་སྣང་བྱེད་དགོས་བ་ཅི་ཡང་མི་འདུག། ཡིནའང་ལོ་རྒྱུས་གནད་འགག་ཅན་འདི་འདྲའི་སྐབས་སུ། བོད་ཡིག་གི་ཐོག་ནས་དཔེ་དེབ་ཅིག་བྲིས་བ་དེ་ཙམ་ཡང་ཡག་པོར་མཐོང་ནས་དམིགས་གསལ་གྱི་སྐད་ཆ་བཤད་པ་ཅི་ཡང་མེད། ལྷག་པར་ཏུ་སློབ་གཉེར་སོགས་སྔོན་གྱི་ལུགས་སྲོལ་བཞིན་བྱས་ཡོད་པ་ཐོས་མྱོང་ཡོད་པས། སྐབས་རེ་ཡག་པོ་འདུག་བསམ་མྱོང། དེ་ནས་ལོ་འདི་དག་གི་རིང་ལ་མི་འདི་གཉིས་ཀྱི་སྐོར་ལ་སྐད་ཆ་གོ་རྒྱུ་མང་པོ་འདུག་པ་མ་ཟད། ཡེ་ཤུའི་ཆོས་ཚོགས་སུ་ཞུགས་ཡོད་ཚུལ་དང། ཡེ་ཤུའི་ཆོས་པ་ཡིན་ཚུལ་སོགས་ཀྱང་སྐད་ཆ་མང་པོ་གོ་མྱོང། སྔོན་ཆད་སྐད་ཆ་དེ་དག་ལ་དོ་སྣང་ཅི་ཡང་བྱས་མེད། རྒྱུ་མཚན་ནི། དེ་ནི་མི་སྒེར་གྱི་དད་མོས་དང། འདུ་ཤེས། སེམས་ཀྱི་འཁྱེར་ཚུལ་ཞིག་དང། ཁོ་ཚོའི་རང་གི་དད་མོས་སོགས་ཅི་ཡིན་ཀྱང་ང་ལ་ཁྱད་པར་སྤུ་ཙམ་ཀྱང་མེད་བསམ་ནས། སྐད་ཆ་གཅིག་ཀྱང་བཤད་མེད། ང་ནི་བོད་ཀྱི་ནང་ཆོས་སྤྱངས་ནས་ལས་རྒྱུ་འབྲས་ལ་ཡིད་ཆེས་ཡོད་པ་ཞིག་དང། ནུབ་ཀྱི་དམངས་གཙོའི་རིང་ལུགས་སྤྱངས་བ་གང་ཟད་ཡོད་པའི་མི་ཞིག་ཡིན་པས། མི་སོ་སོས་རང་དབང་ལ་མཐའ་གཅིག་ཏུ་བརྩི་མཁན་ཞིག་ཡིན། ཡིན་ནའང་ཉེ་ལམ་ཞིག་ལ། མི་འདི་གཉིས་གཙོ་བྱས་བའི་ཟི་ལིང་གི་མི་ཁ་ཅིག་གིས་སོ་སོའི་སྒེར་གྱི་དད་མོས་དང། འདུ་ཤེས། སེམས་ཀྱི་འཁྱེར་སྟངས་ལས་ཕར་བརྒལ་ནས།…