August 2019

བླ་མ་དང་སློབ་མའི་དམ་ཚིག་ཡིད་བཞིན་ནོར་བུ།།

བླ་མ་དང་སློབ་མའི་དམ་ཚིག་ཡིད་བཞིན་ནོར་བུ།།
ན་མོ་གུ་རུ་ཡེ། 
ཕྱོགས་དུས་རྒྱལ་བ་སྲས་བཅས་ཐམས་ཅད་ཀྱི།།
མཁྱེན་བརྩེ་ཐུགས་རྗེའི་རོལ་གར་བླ་མ་ལ།།
སེམས་ཉིད་རང་ངོར་ཤེས་པས་གསོལ་བ་འདེབས།།
སྐུ་གསུམ་དབྱེར་མེད་བླ་མས་བྱིན་གྱིས་རློབས།།
བླ་མ་སངས་རྒྱས་མཇལ་བའི་བསོད་ནམས་དང་།།
ཟབ་ལམ་གདམས་ངག་ཐོས་པའི་ཕན་ཡོན་ལས།།
བྱིན་རླབས་བཙན་ཐབས་འཇུག་པའི་ཨེ་ཝཾ་ཆོས།།
སྙིང་གི་བུ་ལ་གདམས་པ་འདི་ལྟར་ལགས།།
དད་གུས་དག་སྣང་ལྟ་བ་བླ་མའི་ཐུགས།།
རང་ངོར་གསལ་བཞག་གནས་པ་སྒོམ་པ་ཡིན།།
གཏད་མེད་རང་གྲོལ་སྤྱོད་པ་རྣམ་ཐར་ལ།།
འབྲས་བུས་རང་བཞིན་རྫོགས་པའི་ས་མཆོག་གོ།
རང་སེམས་ངོ་བོ་བླ་མ་དབྱེར་མེད་ངང་།།
བདེན་ཚིག་རང་བཞིན་གསོལ་བ་སྙིང་ནས་འདེབས།།
ཐུགས་ཡིད་དབྱེར་མེད་གནས་པའི་བར་མཚམས་ནས།།
སངས་རྒྱས་ཀུན་འདུས་སྙིང་དབུས་དཀྱིལ་ནས་རྙེད།།
བླ་མ་དཀོན་མཆོག་ཀུན་འདུས་ངོ་བོར་མཁྱེན།།
མ་ལུས་འགྲོ་བ་ཀུན་ལ་རང་བཞིན་བརྩེ།།
ཕྲིན་ལས་རབ་འབྱམས་དབང་བའི་ཐུགས་རྗེའི་བདག།
གནུབས་ཆེན་སངས་རྒྱས་ཡེ་ཤེས་དེ་ཀ་ལགས།།
བདག་གཞན་མ་ལུས་སེམས་ཅན་ཐམས་ཅད་ཀུན།།
ཀུན་བཟང་རྫོགས་པའི་སངས་རྒྱས་མ་ཐོབ་བར།།
དམ་བཅའ་མ་གཡེལ་ཕྲིན་ལས་རྒྱུན་དུ་སྐྱོངས།།
རྣམ་སྨིན་རིག་འཛིན་རྒྱལ་བའི་སྐུ་རུ་བཞེངས།།
འཆི་མེད་ཚེ་དབང་རིག་འཛིན་བརྙེས་པའི་ཚེ།།
བདེ་ཆེན་ཕྱག་རྒྱའི་དགོངས་པ་མངོན་དུ་གྱུར།།
ལྷུན་གྲུབ་ཆོས་སྐུའི་དབྱིངས་དང་མཉམ་པ་ལ།།
སྐུ་གསུམ་རྒྱལ་བའི་རྒྱལ་སར་ཕྱིན་པར་ལགས།།
ཀུན་ཏུ་བཟང་པོ་མཁྱེན་པའི་ཡེ་ཤེས་གསལ།།
ཐུགས་རྗེ་ཆེན་པོ་བརྩེ་ཆེན་རབ་ཏུ་རྒྱས།།
པདྨ་འབྱུང་གནས་ཕྲིན་ལས་རྫོགས་པའི་ཚེ།།
འོད་གསལ་སྙིང་པོའི་བསྟན་པའི་རྣལ་འབྱོར་ལགས།།
ཨེ་ཝཾ་སྒྲོན་དྲུག་ཨ་ཏིའི་གསང་ལམ་ནས།།
ཆོས་ཟད་དགོངས་པ་མཐར་ཕྱིན་དམ་ཚིག་ཅན།།
དད་ལྡན་སངས་རྒྱས་རྒྱ་མཚོས་སྐུལ་བའི་ངོར།།
ཤྲཱིཿསྤྲུལ་དཔལ་དགྱེས་རྡོ་རྗེས་ཐོལ་བྱུང་བྲིས།།
ཞེས་རབ་གནས་ས་ཕག་ཁྲུམས་ཟླའི་དབྱར་གནས་སྐབས་སུ་ཨེ་ཝཾ་སངས་རྒྱས་ཡེ་ཤེས་ཆོས་གླིང་ནས་ཨེ་མ་ཧོས་བགྱིས་པར་དགེའོ།། །།

Leave a Reply

Your email address will not be published. Required fields are marked *