ཨེ་ཝྃ་ཧོ།

ཁྱབ་བདག་པའི་མཚན་གནས་བཞེས་སྐབས་ཀྱི་གསུང་བཤད། སྐལ་བཟང་གིསདེ་རིང་སྔ་འགྱུར་རྒྱལ་བ་རྫོགས་ཆེན་པའི་གདན་སའི་དཔལ་གྱི་སེངྒེ་རིའི་ཆོས་གྲྭ་ཆེན་པོ་འདི་ན། གངས་ལྗོངས་ཆོལ་གསུམ་ནས་ཕེབས་པའི་རིས་མེད་དགེ་འདུན་འདུས་པའི་སྡེ་ཆེན་པོ་འཁོར་རྣམ་པ་བཞི་དང་བཅས་པའི་ཁྱུ་ཚོགས། དད་ལྡན་རྒྱ་ཆེའི་ཆོས་དད་མང་ཚོགས་དང་བཅས་པ་སྟེ། ཕྱི་ན་ཉན་ནི། །ནང་ན་བལྟ་ནི། །གང་མང་མང་འཛོམས་ཡོད་ཅིང་། དེ་བཞིན་དབྱིངས་ན་བཞུགས་པའི་རྒྱལ་བ་སྲས་བཅས། བརྒྱུད་གསུམ་རིག་འཛིན་གྱི་བླ་མ། ཁྱད་པར་གྲུབ་དབང་རྫོགས་ཆེན་པ་ཡབ་སྲས་ཀྱིས་ཡེ་ཤེས་ཀྱི་སྤྱན་གྱིས་མི་མངོན་དབྱིངས་ནས་གཟིགས་ཡོད་པ་མ་ཟད། ཆོས་སྡེ་འདིའི་བཀའ་སྡོད་སྲུང་མ་མངོན་ཤེས་མཐུ་རྩལ་གྱི་བདག་པོ། ལས་དང་ཡེ་ཤེས་ཀྱི་འཕྲིན་ལས་པ་ཐམས་ཅད་ཀྱིས་ཀྱང་མེལ་ཚེ་དང་བྱ་ར་བྱེད་བཞིན་ཡོད་སྙམ།དཔལ་གྱི་སེངྒེའི་རིའི་ཆོས་གྲྭ་ཆེན་པོ་ཐུབ་བསྟན་བཤད་སྒྲུབ་མདོ་སྔགས་དར་རྒྱས་གླིང་འདི་སྔར་སེང་ཕྲུག་པདྨ་བཀྲ་ཤིས་ཀྱི་སྐུ་དུས་སུ་དབུ་བརྙེས། རྒྱལ་སྲས་གཞན་ཕན་མཐའ་ཡས་ཀྱིས་སྲོལ་གཏོད། མཁན་ཆེན་པདྨ་བཛྲ་གྱིས་རྒྱུན་བསྐྱངས། གཞན་ཕན་ཆོས་ཀྱི་སྣང་བས་དར་ཞིང་རྒྱས་པར་མཛད་པ་རེད། དེ་ནས་བཟུང་སྟེ་དུས་ཀྱི་ཆུ་རྒྱུན་མདུན་ཕྱོགས་སུ་བཞུར་བའི་འགྲོས་དང་བསྟུན་ནས་དར་རྒུད་འཕེལ་འགྲིབ་ཅི་རིགས་བྱུང་བ་དང་། ཁྱད་པར་བོད་ཁམས་སྤྱི་དང་བྱེ་བྲག་གི་བསྟན་པའི་ཉམས་གུད་ཆེན་པོའི་ལོ་མང་གི་རྗེས་སུ། གངས་ལྗོངས་བསྟན་པ་ཡང་དར་གྱི་སྐབས་འདིའི་ཆོས་གྲྭ་འདི་ཉིད་སླར་གསོ་རྒྱ་བསྐྱེད་ཀྱི་དབུ་དངོས་སུ་བཙུགས་པའི་དུས་ཚོད་དུས་རབས་སྔོན་མའི་ས་འབྲུག་ནས་དུས་རབས་འདིའི་ཆུ་ཕོ་འབྲུག་གི་ལོ་འདིའི་བར་དུ། མི་ལོ་ཧྲིལ་པོ་ཉི་ཤུ་རྩ་ལྔ་འཁོར་གྱིན་ཡོད་པའི་སྐབས་འདིར། ད་ཐེངས་ཆོས་གྲྭའི་དགེ་འདུན་གྱི་ཀུན་དགའ་ར་བའམ་སློབ་ཁྲིད་ཐོག་ཁང་ཆེན་མོ་ལུང་རིགས་དགའ་ཚལ་ཆོས་གླིང་གསར་བཞེངས་ཡོངས་སུ་གྲུབ་པའི་མཛད་སྒོའི་ཐོག་མ་རུ། རྒྱལ་བའི་ཆོས་འཁོར་དུས་ཆེན་དང་བསྟུན་ནས། ཁར་སེང་འཇམ་དཔལ་རྫོགས་པ་ཆེན་པོའི་དབང་དང་། གཞུང་ཆེན་བཅུ་གསུམ་རྒྱ་གཞུང་ངོ་མའི་འཆད་ཁྲིད་ཀྱི་རྒྱུན་སྤེལ་བའི་དབུ་བཙུགས། དེ་རིང་དེ་ལ་མཐུད་དེ། ང་ལ་བརྟན་བཞུགས་ཤིག་འབུལ་དགོས་ཞེས་མཁན་ཆེན་ཁྲི་བ་ཚང་གིས་དབུ་མཛད་དེ་དགེ་འདུན་འདུས་པ་མང་ཚོགས་ཀྱིས་ཨུ་ཚུགས་ནན་གསུང་མཛད་པ་ལ། ངས་མཐའ་གཅིག་ཏུ་སྐུ་ངོ་ལྡོག་སྟེ་མིན་ཞེས་ཞུ་གི་མ་བསྡད་པ་རེད། སྤྱིར་བརྟན་བཞུགས་འབུལ་རྒྱུ་དེ་རྟེན་འབྲེལ་ལེགས་མཚོན་གྱི་དར་སྲོལ་ཙམ་ཞིག་རེད། ཁྱེད་ལྷན་རྒྱས་ཀྱི་ངོས་ནས་དག་སྣང་བོང་བ་གསེར་གཟིགས་རེད་མོད་ཀྱང་། ངའི་ངོས་ནས་མངའ་དབུལ་མཛད་པ་ལས་དགེ་འདུན་པའི་ཐུགས་རྗེའི་སྐྱབས་འོག་ནས་མ་བོར་ན་དེ་རང་དགའ་བསམ་པ་རེད། དེ་བཞིན་རྒྱུ་ནོར་ཟང་ཟིང་གི་འབུལ་བ་རི་ཁྲོད་ཀྱི་ཆོས་པ་ལ་དེ་བས་ཀྱང་མི་དགོས། ཡང་སྒོས་ལོ་ན་བདུན་ཅུའི་ཚེ་མཇུག་གི་ཚེ་ཡི་ལྷག་མས་དུས་འདའ་བཞིན་ཡོད་པ་ཞིག་ལ། རྒྱུ་ནོར་རྫས་ཀྱི་དངོས་པོས་ཅི་ཡང་ལས་རྒྱུ་མི་འདུག དེས་ན་ཆོས་གྲྭ་གཞུང་གི་དངོས་འབུལ་འདི་ཚོའི་ནང་ནས་རྟེན་འབྲེལ་མཚོན་བྱེད་ཙམ་དུ་་་་་་་་ལེན་པ་ལས་གཞན་ཚང་མ་ཕྱིར་འབུལ་རྒྱུ་ཡིན། དེ་རིང་གི་མཛད་རིམ་གྱི་ནང་ནས་ངས་དོན་ཆེན་དུ་མཐོང་བ་ཞིག་ལ། ཆོས་གྲྭའི་མཁན་སློབ་དགེ་འདུན་འདུས་པ་སྤྱི་ཁྱབ་ཀྱིས་ཐུགས་སེམས་གཅིག་མཐུན་མགྲིན་དབྱངས་གཅིག་གྱུར་གྱིས་ཆོས་སྡེ་འདིའི་མཚན་གནས་ཐམས་ཅད་ཀྱི་ནང་ནས་རིམ་པ་མཐོ་ཤོས། ཁྱབ་བདག་པའི་མཚན་གནས་དེ་ང་ལ་གནང་རྒྱུ་ཡིན་གསུངས་པ་དེ་ལ། ངས་སྤྲོ་བ་དང་བཅས་ཏེ་རྟེན་འབྲེལ་གྱི་ཆེ་བས་དང་ལེན་ཞུ་དགོས་རྒྱུ་རེད་བསམ་གྱིན་ཡོད། འདིའི་མཚན་གནས་དང་པོ་བཞེས་མཁན་དེ་ཁྱབ་བདག་བཀའ་འགྱུར་བ་ཆེན་པོ་རྒྱས་སྲས་གཞན་ཕན་མཐའ་ཡས་རེད། སྔར་རྫོགས་ཆེན་སྐུ་ཕྲེང་བཞི་པ་མི་འགྱུར་ནམ་མཁའི་རྡོ་རྗེའི་སྐུ་དུས་ཤིག་ལ། དེའི་མཚན་གནས་དེ་ཉིད་རྒྱ་གར་ལ་གསེར་བྱིན་ཏེ་བླངས་པ་མ་རེད། རྒྱ་ནག་ལ་སྡེ་སྤྲད་དེ་ཉོས་པའང་མ་རེད། དོན་ཐོབ་ཀྱི་མཚན་མང་མོས་ཀྱིས་གསོལ་བ་དེ་ལ། རྗེས་སུ་ངོས་ལེན་དང་རྒྱབ་སྐྱོར་གྱི་ཆོ་ལོ་ཆེན་པོ་འགའ་རེས་ཕུལ་བའི་ལོ་རྒྱུས་ཡོད་པ་དེ་འདྲ་ཞིག་རེད། དེ་ནས་བརྩིས་ན་མི་ལོ་བརྒྱ་དང་ལྔ་བཅུས་མ་ཚད་ཉིས་བརྒྱར་ཉེ་བ་ཞིག་ཨེ་ཡིན་ནམ། དེ་འདྲའི་ལོ་མང་ཞིག་འདས་པའི་དེང་གི་དུས་རབས་ཏེ། དུས་རབས་གཉིས་ཀྱིས་མ་ཚད་གསུམ་ལ་ཉེ་བ་ཞིག་འདས་པའི་ཕྱི་མའི་དུས་འདིའི་བསྟན་པའི་གོད་ཆག་གི་དུས་འགྱུར་ཆེན་པོའི་རྗེས་ཀྱི་བསྟན་པ་ཡང་དར་གྱི་སྐབས་འདིར། དེའི་མཚན་གནས་ཀྱི་ཅོད་པན་གཉིས་པ་དེ་རིང་ང་ལ་གནང་བ་འདི། སྤྱིར་བཏང་གི་བླུན་པོ་བ་ལང་གསེར་རྒྱན་ཅན་ཁ་ཤས་ཀྱིས་མ་ཚད། རྨོངས་པ་བརྒྱ་ཚོ་དང་སྟོང་ཚོའི་ཁྱུ་ཚོགས་ཏེ། གཅིག་རྒྱབ་གཅིག་གིས་འཚོས། །རྫུན་རྒྱབ་ཤོབ་ཀྱིས་བསུམ། །ཟོག་པོའི་འཕོངས་གླེན་པས་བཀབ་པ་དང་། སྲིད་དོན་པ་འགའ་རེས་སྲིད་ཁྲིའི་གར་སྟེགས་ཀྱི་སྟེང་ནས། གཡོ་སྒྱུའི་ཚོང་ཟོག་ཟློས་གར་དུ་འཁྲབ་པ་དེ་ཚོ་དང་མི་འདྲ་བར། མཁས་མང་ཚོགས་པའི་ལྷ་གྲལ་གྱི་དཔྱད་པ་སྔོན་ལ་བཏང་སྟེ་གཏན་ལ་ཕབས་པ་ལ། མ་བརྟགས་གྱ་ཚོམ་སྨྲ་བའི་ཐོ་ཅོའི་མཛད་པ་དམ་པའི་རང་གཤིས་ལ་ཅི་ལ་འདྲེས། བསྲེག་བཅད་བརྡར་བའི་གསེར་བཞིན་དུ་དོན་གཅིག་གི་སྔ་བར་ཕྱི་གསུམ། ཟུར་བཞི་ལོགས་དང་བརྒྱད་ནས་གཟིགས་ཡོད་རྒྱུ་རེད་བསམས། ང་རང་ཉིད་ལ་མཚོན་ན། རང་བློ་རང་ལ་ལྐོག་ཏུ་མ་གྱུར་པས་དམ་པའི་ཡོན་ཏན་ཅན་ཞིག་མ་ཡིན་ཡང་། སྔར་གྱི་བླ་མ་གོང་མ་དག་གི་ཞལ་ཆེམས་དང་ད་ལྟའི་དངོས་ཡོད་ཀྱི་བྱུང་བ་འདི་དག་བབ་ས་གཅིག་ལ་འབབ་པ་མཐོང་ཚེ། དགོས་དབང་ཁྱད་པར་ཅན་ཞིག་ཡོད་སྙམ་གྱི་སྤོབས་པ་བསྐྱེད་བཞིན་དུ། དགའ་སྤྲོ་དང་བཅས་ཏེ་གཟི་བརྗིད་ཅན་གྱི་མཚན་གནས་འདི་དང་ལེན་ཞུ་འོས་པ་རེད་བསམས།ང་ཆུང་མ་ལས་སྐྱེས་པའི་ཟླ་བ་ཁ་ཤས་ཀྱི་མཚམས་སུ་དམ་པ་གོང་མའི་སྐྱེ་སྲིད་ཀྱི་མཚན་བཏགས་ཏེ་ལོ་བརྒྱད་ཀྱི་སྟེང་གཙུག་སྐྲ་སོར་གསུམ་བཅད། ཕོ་ལོ་བཅུ་གསུམ་པའི་སྟེང་དམ་པའི་ཆོས་སྒོར་དངོས་སུ་ཞུགས་པ་ཡིན། རང་ལོ་བཅུ་དྲུག་ནས་ཉེ་བའི་ལོ་ཤས་ཀྱི་བར་དུས་ཀྱི་རྒུད་པའི་སྐལ་ངན་ཚེས་རུང་། རང་རྒྱུད་བསྟན་པའི་བྱི་དོར་ལ་རེམ་ནས་རླབས་དྲག་རླུང་འཚུབ་ལྟ་བུའི་རྐྱེན་ངན་མང་པོ་གཤགས་ཏེ་ཡོང་། མདོར་ན་བཅུ་གསུམ་ལོན་ནས་ད་ལྟ་བདུན་ཅུ་ལ་མ་ཐོན་གྱི་བར་དོན་གྱི་བསྟན་པ་སྲོག་གིས་གཅེས་པར་བསྲུངས་པའི་མཐའ་འབྲས་སུ། དེ་རིང་འདི་ནས་ཤྲཱི་སེང་ཆོས་གྲྭའི་ཆོས་སྲིད་ལུགས་གཉིས་ཀྱི་མཁྱེན་ཡོན་དང་རྣམ་དཔྱོད་ལྡན་པའི་བོད་ཡུལ་གངས་ལྗོངས་ཆོལ་གསུམ་ནས་ཕེབས་པའི་མཁན་སྤྲུལ། དགེ་སློབ། དགེ་འདུན་གྱི་སྡེ་དང་བཅས་པས། མ་བགྲོས་ཐུགས་སེམས་གཅིག་མཐུན་གྱིས་འདིའི་མཚན་གནས་ང་ལ་གནང་ཞིང་། འདིའི་གནང་ཡུལ། གནང་མཁན། ཇི་ལྟར་གནང་བའི་བརྒྱུད་རིམ་དང་བཅས་པ་གང་ལ་བསམ་བློ་བཏང་ན་དགོས་གནད་ཁྱད་པར་ཅན་གྱི་མཛད་པ་མ་འོངས་ཕྱི་མའི་དུས་རབས་ཀྱི་ཆོས་སྡེ་འདིའི་ལོ་རྒྱུས་ཀྱི་ལེ་ཚན་གསར་པ་ཞིག་ཡིན་པས་མ་ཚད། སྔ་འགྱུར་ཆོས་བརྒྱུད་ཆེན་པོའི་ཡོངས་གྲགས་ཀྱི་གཏམ་དོན་སོ་མ་དགེ་མཚན་ཡོད་པ་ཞིག་ཏུ་འགྱུར་བར་སྙམ།འདས་པའི་ལོ་རྒྱུས་ལ་ཕྱིར་བལྟས་བྱས་ན། ཁྱབ་བདག་བཀའ་འགྱུར་བ་ཆེན་པོ་བྱོན་ནས་ད་ལྟའི་བར་མི་ལོ་བརྒྱ་ལྷག ཉིས་བརྒྱ་ཟིན་ལ་མ་ཟིན་ཙམ་གྱི་དུས་རིང་ནང་། ཁྱབ་བདག་པ་གཉིས་པ་དང་གསུམ་པའི་མཚན་གནས་འབུལ་འོས་ཡུལ་དང་། བཞེས་འོས་པ་མ་ཕེབས་པ་མ་ཡིན། ཁོ་བོ་ཅག་དང་འདྲ་བ་ཡིས། བརྒྱ་འགྱུར་དང་སྟོང་འགྱུར། ཁྲི་འགྱུར་དང་འབུམ་འགྱུར་གྱིས་དེ་དག་རྣམས་ཀྱི་གསང་བ་གསུམ་གྱི་ཡོན་ཏན་དང་འཕྲིན་ལས་ཆ་ཤས་ཙམ་ཡང་གཞལ་ཐབས་མེད་པའི་མཁས་གྲུབ་གཉིས་ལྡན་གསེར་རིའི་ཕྲེང་བ་ལྟ་བུ་མང་པོ་བྱོན་མྱོང་བ་མངོན་གསལ་ཡིན་མོད། གང་ལྟར་སྙིགས་མར་ཕྱོགས་པའི་དུས་ཀྱི་རྒུད་པ་དང་ཉེ་ཡོང་བ་ཡིན་དུས། བོད་བསོད་ནམས་དབང་ཐང་མར་ཟད་ཀྱི་སྐབས་དང་ཁེལ་ནས། ཇི་ལྟར་བཤད་རུང་བླུན་པོ་དབང་འབྱོར་ཅན་གྱི་བླ་དཔོན་ངན་པས་ཤུགས་བཟུང་བའི་དབང་དུ་ཤོར་ནས། ཆོས་མཐུན་བཀུར་སྟིའི་བཞུགས་གྲལ་མཚམས་རེས་མི་ཚད་ཡུན་རིང་མགོ་གཞུག་ལྡོག་པ་འདིའི་ལོ་རྒྱུས་རྐྱང་པས་ཀྱང་མཚོན་ཐུབ་པར་བསམས། དེའི་མི་ཚད་དེ་དང་འདྲ་བར། ཆུ་ཆེ་ཆུང་རང་གི་སྒོ་རྩ་རེད། གངས་ལྗོངས་ལུགས་གཉིས་སྲོལ་བཟང་གི་བྱ་བཞག་མང་པོ་ཞིག་དེ་ལྟར་ཉམ་ཉེས་སུ་སོང་བ་ཡང་དཔོག་ཐུབ་པ་རེད། དཔེ་མཚོན་གྱི་འདྲ་གཟུགས་ཐད་ན་ཡོད་པ་དེ་ཚོར་བལྟས་ན། ད་རེས་ཀྱི་དུས་སྐབས་སུ་ས་ཆ་ཡུལ་ལུང་འདི་ལ་མཚོན་ན། ད་ལྟའི་གནས་སྐབས་ན་གསར་གཏོད་ཀྱི་རྣམ་དཔྱོད་དང་། གདོང་མཆོང་གི་སྤོབས་པས་ཁེངས་པའི་མི་རབས་གསར་པའི་ན་གཞོན་སྡེ་སྣོད་འཛིན་པ། མཁྱེན་ཡོན།…

ངུ་ངག་གི་འབོད་སྒྲ། དྷཱིཿཧར་སངས།། འདི་དང་ཕྱི་མའི་སྐྱབས་གནས་ཡིད་བཞིན་གྱི་ནོར་བུ།།གཏན་གྱི་མགོན་པོ་གཅིག་ཆོག་ཡིད་བཞིན་གྱི་ནོར་བུ།།སྐྱེ་དང་ཕྲེང་བའི་ལམ་སྟོན་ཡིད་བཞིན་གྱི་ནོར་བུ།།སྐྱབས་གཅིག་པདྨ་དབང་རྒྱལ་སྙིང་དབུས་ནས་དྲན་ནོ།། རེ་བའི་རྨི་ལམ་སྟོར་བའི་དུས་ངན་གྱི་སྨག་རུམ།།ཡོད་ཚད་སྣང་ཤེས་སྟོང་བའི་ངུ་སྒྲ་ཡི་ལོ་ཟླ།།ཉམ་ཆུང་སྐྱབས་གནས་བྲལ་བའི་སུན་སྣང་གི་མི་ཚེ།།ལས་དབང་སྙིང་ལ་སྨིན་པའི་ན་ཟུག་འདི་སྐྱོ་བ།། བསམ་ན་བརྗེད་དུ་མེད་པའི་སྡུག་བསྔལ་གྱི་ཁུར་པོ།།དྲན་ན་མཇལ་བར་དཀའ་བའི་ཡབ་རྗེ་ཡི་ཞལ་རས།།སྙིང་ཁམས་སྟོང་བར་གྱུར་བའི་སྣང་ཤེས་དང་འགྲོགས་ཏེ།།རྨི་ལམ་ཞིང་ནས་མགོན་པོ་ཁྱེད་ཉིད་ལ་སྒུག་ཡོད།། གནས་ཚུལ་དོན་དམ་བླ་མའི་རང་ཞལ་དེ་མ་མཐོང་།།སྣང་གྲགས་བརྡའ་ཡི་བླ་མ་ཞིང་གཞན་དུ་ཕེབས་སོང་།།ད་ནི་མགོན་མེད་ཐང་འཁྱམས་ཇི་བཞིན་དུ་གྱུར་བའི།།སྐྱོ་སྡུག་ཁྲི་མུན་འོག་གི་འཚོ་བ་ལ་ཐིམ་ཡོད།། དུག་ལྔའི་འོབས་སུ་ཚུད་པའི་ཉམ་ཆུང་གི་སློབ་བུ།།ལྟ་སྒོམ་རྟོགས་པ་བུལ་བའི་མདོ་མེད་ཀྱི་སྤྲང་འཁྱམས།།གཏན་གྱི་འདུན་མ་མགོན་པོ་ཁྱེད་ཉིད་ལ་བཅོལ་ན།།དམན་བུ་ཐུགས་ཀྱིས་མ་དོར་དྲིན་ལྡན་གྱི་བླ་མ།།

ཨ་ཉ་རིན་པོ་ཆེ་ལ་གདམས་པ་སྙིང་གི་མ་ཎི་ཀན་མོ་གུ་རུ་ཨ་དྷཱི་ཛྙཱ་ན་ཡེ།ཆོས་དབྱིངས་ངོ་བོར་བཞུགས་པའི་བདེ་གཤེགས་དང་།།འོད་གསལ་རང་བཞིན་སྣང་བའི་ཞིང་ཁམས་རིགས།།ཟུང་འཇུག་ཐུགས་རྗེའི་བདག་ཉིད་བཅོམ་ལྡན་འདས།།དབྱེར་མེད་དྲིན་ཆེན་བླ་མས་བདག་སོགས་སྐྱོངས།།༡༽དད་གུས་དག་སྣང་ཕྱུག་པའི་སློབ་མ་མཆོག།སྲས་བཅས་རྒྱལ་ཀུན་ཚོགས་ཀྱིས་རྟག་ཏུ་སྐྱོབས།།ཚེ་རབས་ལས་ཀྱིས་འབྲེལ་བའི་བླ་མ་ཉིད།།སྤྱི་གཙུག་ཛ་ལནྡྷ་རའི་མཛེས་རྒྱན་དུ་སྒོམས།།༢༽ཕྱག་ཆེན་རིག་འཛིན་གྲུབ་པའི་དབང་ཕྱུག་གི།རྨི་ལམ་འོད་གསལ་སྟོན་པའི་དེད་དཔོན་རྗེ།།དགོངས་བརྒྱུད་རྟོགས་པའི་ཕ་ཕོག་སྩོལ་བའི་མགོན།།མགྲིན་པ་ལོངས་སྤྱོད་འཁོར་ལོའི་རྒྱན་དུ་སྒོམས།།།༣༽སེམས་ཉིད་མ་བཅོས་ཀ་དག་གཉུག་མའི་རང་གཤིས།།རྩོལ་མེད་རང་བཞག་ངང་ནས་རང་བབས་མཐོང་།།སྨྲ་བསམ་བརྗོད་མེད་སྟོན་པའི་བླ་མ་རྗེ།།སྙིང་དབུས་དཀྱིལ་འཁོར་འཁོར་ལོའི་རྒྱན་དུ་སྒོམས།།༤༽འཁྲུལ་མེད་ཆོས་སྐུ་རིག་པའི་གནས་ལུགས་མཇལ།།གནས་ན་ཆོས་སྐུ་འཕྲོ་ན་ཆོས་སྐུ་འི་རང་རྩལ།།གང་ཤར་ཆོས་སྐུར་གྲོལ་བའི་བླ་མ་ཉིད།།ལྟེ་སྤྲུལ་སྟོང་ཉིད་དབུ་མའི་དཀྱིལ་འཁོར་སྒོམས།།༥༽རྣམ་རྟོག་ཐམས་ཅད་བདེ་བའི་ཡེ་ཤེས་ངང་།།དགའ་བ་མཆོག་དགའ་དགའ་བྲལ་ལྷན་སྐྱེས་དགའི།།ཕྱག་རྒྱ་ཆེན་པོའི་དངོས་གྲུབ་བླ་མ་རྗེ།།གསང་གནས་དྲུག་ཅུའི་རྩ་བཞིས་དཀྱིལ་འཁོར་སྒོམས།།༦༽གཉུག་མའི་གནས་ལུགས་གཤིས་སུ་སོན་པའི་ཚེ།།འོད་གསལ་རིག་པ་སྙིང་གི་དཀྱིལ་ནས་ཤར།།གསང་ཆེན་ཨ་ཏི་ཡོ་གའི་བླ་མ་ཉིད།།ཡེ་གྲོལ་ཀུན་བཟང་ཡབ་ཡུམ་རྒྱུན་དུ་སྒོམས།།༧༽གང་ཤར་ཚོགས་དྲུག་རིག་སྟོང་ཟང་ཐལ་ངང་།།ཡེ་ཤེས་དཀྱིལ་འཁོར་དག་པ་རབ་འབྱམས་ཀྱི།།དག་མཉམ་རྒྱལ་བའི་ཞིང་ཁམས་ཕྱོགས་ལྷུང་བྲལ།།གསང་ཆེན་བླ་མེད་རྒྱུད་ཀྱི་དགོངས་དོན་རྟོགས།།༨༽གསང་གསུམ་དད་གུས་མོས་པའི་རྟེན་འབྲེལ་ལས།།བཀའ་དྲིན་མཚུངས་མེད་བླ་མའི་གདམས་ཟབ་དཔལ།།དགྱེས་པ་རྡོ་རྗེ་འཆང་གིས་སྐལ་བཟང་ཐོབ།བསྟན་འགྲོར་ཕན་བདེའི་ཕྲིན་ལས་ལྷུན་གྲུབ་ཤོག།ཅེས་པ་རབ་གནས་ལྕགས་བྱིའི་ལོ་སར་སྐབས་སུ་མགར་ཆེན་ཨ་ཉ་རིན་པོ་ཆེས་དད་གུས་ཀྱིས་རྐྱེན་ལས་གང་ཤར་ཏུ་ཤྲཱིཿཨེ་མ་ཧོས་གདམས་པར་དགེའོ།། དགེའོ།། དགེའོ།། དགེའོོ།།

བརྡ་ཁྱབ།ཨེ་ཝཾ་ལས་རིགས་ལག་རྩལ་སློབ་གླིང་གི་སློ་ཕྲུག་དག་ལ་ཞུ་བྱ། ད་ལོའི་གནས་བབས་དང་བསྟུན་ང་ཚོ་སློབ་གླིང་དུ་ལྷན་འཛོམ་ད་དུང་ཟླ་གཅིག་ལྷག་ཕྱིར་འཐེན་བྱེད་རྒྱུ་ཡིན། ཟླ་བཞི་བའི་ནང་ནད་དུག་གི་གནས་ཚུལ་ལ་ལྟས་ནས། སློབ་གླིང་ལ་ནམ་དུ་འཛོམ་དགོས་ན་དེ་ལུགས་ཁྱབ་སྒྲག་བྱེད་ངེས། རྒྱ་བོད་དབྱིན་གསུམ་གྱི་དགེ་རྒན་དག་གིས་ཟླ་གསུམ་པའི་ཚེས་གཅིག་ནས་བཟུང་དྲྭ་ལམ་ནས་སློབ་ཁྲིད་ཡོད། སྔ་དྲོའི་དུས་ཚོད་༡༠ནས་༡༡ཕྱེད་ཀྱི་བར་དབྱིན་ཡིག་དགེ་རྒན་ཚེ་རིང་དབང་རྒྱལ་གྱི་སློབ་ཁྲིད། ཕྱི་དྲོའི་དུས་ཚོད་༣ནས་༤ཕྱེད་ཀྱི་བར་དུ་རྒྱ་ཡིག་དགེ་རྒན་གཡང་དཀར་གྱི་སློབ་ཁྲིད། དགོང་མོའི་དུས་ཚོད་༦ནས་༧གྱི་བར་དུ་བོད་ཡིག་དགེ་རྒན་སྤྱིར་ང་རང་ཉིད་ཡིན་ནའང་ད་དུང་ཆེད་མཁས་པ་གདན་འདྲེན་ཞུས་ཏེ་བོད་ཡིག་སློབ་ཁྲིད། ལྷ་རིས་འཛིན་གྲྭ་གོང་མའི་དགེ་རྒན་རིག་འཛིན་གྲགས་པས་ཉིན་ལྟར་ལྷ་དཔེ་ཡི་ལས་བྱ་ཚོགས་པའི་ནང་དུ་སྤེལ་དགོས་པ། འཛིན་གྲྭ་འོག་མའི་དགེ་རྒན་ཨོ་རྒྱན་རྡོ་རྗེ་ཡིས་ཉིན་ལྟར་ལྷ་དཔེ་ཡི་ལས་བྱ་ཚོགས་པའི་ནང་དུ་སྤེལ་དགོས་པ། འདི་ནི་ང་ཚོའི་རྒྱལ་ཁབ་ཀྱི་བདེ་འཇག་དང་རང་རང་སོ་སོའི་ཚེ་སྲོག་ལ་གཅེས་སྤྲས་ཀྱི་ཆེད་དུ་ཡིན་པས། ཆེད་མཁས་སྨན་པའི་ངག་དང་། དམ་པའི་སྐྱེས་བུ་དག་གི་བསླབ་བྱ་ནང་བཞིན་དོན་ཡོད་པའི་བྱ་བ་དག་ང་ཚོས་ཁ་བཤད་ཙམ་མ་ཡིན་པར་ལག་ལེན་གྱི་སྟེང་དུ་ངེས་པར་དུ་སྨིན་དགོས་པས། དེ་ལུགས་ཐུགས་སུ་འཇག་པར་འཚལ། ༢༠༢༠–༢–༢༧ཉིན།

ཆོས་རྗེ་དམ་པ་ཡིད་བཞིན་ནོར་བུའི་འཁྲུངས་སྐར་བསུ།།ཨེ་མ་ཧོ།།ཀུན་བཟང་འཇམ་དཔལ་གཞོན་ནུའི་རྣམ་རོལ་བ།།སྙིགས་དུས་མུན་ནག་བསལ་བའི་འོད་གསལ་སྐུ།།བརྒྱུད་གསུམ་རིག་འཛིན་བླ་མའི་རྒྱལ་ཚབ་མཆོག།།ཞིང་འདིར་མཚན་དཔེ་བཞད་པ་སླར་ཡང་དྲན།།དྲན་རིག་རྒྱལ་པོ་ཡིད་བཞིན་ནོར་བུའི་སྐུ།།བཀའ་གཏེར་ཀུན་འདུས་དམ་ཆོས་འཁོར་ལོའི་གསུང་།།ངག་དབང་བློ་གྲོས་མཚུངས་མེད་རྒྱལ་ཀུན་ཐུགས།།དཀོན་མཆོག་རྩ་གསུམ་བླ་མ་སྙིང་ནས་དྲན།།དད་གུས་དམ་ཚིག་ཀུན་བཟང་བདག་ཅག་ཅག་ལ།།མཁྱེན་རབ་གཟུངས་སྤོབས་ནོར་བུའི་གཏེར་ཆེན་སྩོལ།།བསྟན་དང་འགྲོ་ལ་ཕན་བདེ་རླབས་ཆེན་འགྲུབ།།འགྲོ་ཀུན་བྱང་ཆུབ་ལམ་ལ་འགོད་ནུས་མཁྱེན།།ཞེས་པ་རབ་གནས་མེ་བྱའི་ཆོ་འ྄ཕྲུལ་ཟླ་བའི་ལེགས་པ་བརྒྱད་འཛོམས་ཀྱི་ཐོ་རངས་ཁར་རྨི་ལམ་བཟང་པོའི་སྣང་ངོར་དྲིན་ཆེན་བླ་མའི་ཞལ་རས་ལྷང་ལྷང་འཆར་པའི་སྐབས་སུ་གང་ཤར་བཅོས་བསྒྱུར་མེད་པར་སྙིང་ནས་ཤྲཱིས་གསོལ་བ་བཏབས་པར་དགེའོ།། །།

དྷཱིཿ མཐོ་རིས་ཡོན་ཏན་བདུན་ལྡན་སྲིད་ཀྱི་གཡང་།། འཕགས་པའི་ནོར་བདུན་ལྡན་པ་ཆོས་ཀྱི་གཡང་།། ཁ་སྦྱོར་ཡན་ལག་བདུན་ལྡན་འབྲས་བུའི་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། བསླབ་གསུམ་ལྡན་པ་རི་ཁྲོད་པ་ཡི་གཡང་།། བཤད་སྒྲུབ་ལས་གསུམ་དར་བ་དགོན་སྡེའི་གཡང་།། བཙན་ཕྱུག་འཕན་གསུམ་དར་བ་ཡུལ་གྲོང་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། མཁས་བཙུན་བཟང་གསུམ་གྲུབ་བརྙེས་བླ་མའི་གཡང་།། ཤེས་བརྩོན་དག་སྣང་ཆེ་བ་སློབ་མའི་གཡང་།། དད་གཏོང་འབྱོར་བ་རྒྱས་པ་སྦྱིན་བདག་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། དཔྱད་གསུམ་རྣམ་པར་དག་པ་ལུང་གི་གཡང་།། དགག་སྤོང་སྒྲུབ་པ་སྐྱོན་བྲལ་རིགས་པའི་གཡང་།། ཟབ་རྒྱས་བདེ་བླག་འདོམས་པ་མན་ངག་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། ཉེས་སྤྱོད་རྒྱང་དུ་བསྐྲད་པ་སོ་ཐར་གཡང་།། འགྲོ་ལ་བདག་བས་བརྩེ་བ་བྱང་སེམས་གཡང་།། སྣང་སྲིད་དག་མཉམ་ཤར་བ་གསང་སྔགས་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། བསྙེན་སྒྲུབ་ལས་གསུམ་མཐར་འཁྱོལ་བསྐྱེད་རིམ་གཡང་།། བདེ་གསལ་མི་རྟོག་ཉམས་འཕེལ་རྫོགས་རིམ་གཡང་།། སྣང་བཞིའི་རྟགས་ཚད་སྨིན་པ་རྫོགས་ཆེན་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། ཁོང་ཡངས་བློ་གསལ་འཁོར་བརྩེ་གཙོ་བོའི་གཡང་།། དགེ་བཅུའི་ཁྲིམས་ལ་གནས་པ་མངའ་འབངས་གཡང་།། ཉམས་དགའ་འབྲས་སྨིན་འཚེ་བྲལ་ཡུལ་གྱི་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། ནད་མུག་འཁྲུག་རྩོད་ཞི་བ་དུས་ཀྱི་གཡང་།། བཙའ་སད་སེར་གསུམ་བྲལ་བ་ཞིང་གི་གཡང་།། དགྲ་ཀུན་གཅན་གཟན་ནད་མེད་ཕྱུགས་ཀྱི་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། རྟ་ཟོག་ར་ལུག་འཕེལ་བ་སྒོ་ཡི་གཡང་།། ཟས་ནོར་རིན་ཆེན་དཔངས་མཐོ་བང་མཛོད་གཡང་།། ཕ་མ་བུ་ཚ་གཡོག་མང་ཁྱིམ་གྱི་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། ཡང་འཇམ་མདོག་བཟང་བདེ་སྐྱིད་གོས་ཀྱི་གཡང་།། རོ་བཅུད་མཆོག་ལྡན་ཡིད་འོང་ཟས་ཀྱི་གཡང་།། ཀུན་སྨོན་རིན་ཆེན་འདོད་སྟེར་རྒྱན་གྱི་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། ནད་མེད་དབྱིབས་ལེགས་མདོག་མཛེས་ལང་ཚོའི་གཡང་།། སྟོབས་ཆེ་རྩལ་བདེ་ངལ་མེད་སྒྱུ་རྩལ་གཡང་།། སྨྲ་མཁས་ངག་སྙན་དཔའ་མཛངས་ངག་ཡིད་གཡང་།། དེ་གསུམ་མཉམ་དུ་འཛོམས་པའི་གཡང་ཁུག་ཅིག། མདོར་ན་བརྟན་གཡོ་སྲིད་ཞིའི་ཕྱྭ་གཡང་ཀུན།། ལྷ་སྔགས་ཕྱག་རྒྱ་ཏིང་འཛིན་རྣམ་དག་མཐུས།། འདིར་ཁུག་འདིར་འདུས་འཕེལ་རྒྱས་ནུབ་མེད་པར།། བཀྲ་ཤིས་དགེ་མཚན་སྣང་བས་ཁྱབ་གྱུར་ཅིག། ཅེས་བརྗོད་པས་ཕྱྭ་གཡང་ཁུགས་པའི་དགེ་མཚན་མངོན་དུ་འགྱུར་ངེས་སོ། ཞེས་ངག་དབང་བློ་གྲོས་མཚུངས་མེད་པའི་ཡིད་ངོར་ཤར་བ་ཡི་གེར་སྤེལ་བ་དགེའོ།། །།