ཨེ་ཝྃ་ཧོ།

སློབ་དཔོན་ཆེན་པོས་བཀའ་སྩལ་བཿ འོ་རིགས་ཀྱི་བུ་མོ་ཿབཛྲ་གུ་རུ་ཞེས་པ་ནིཿ ང་གཅིག་པུའི་སྙིང་པོ་མ་ཡིན་ཏེཿ ཡི་དམ་རྒྱུད་སྡེ་བཞི་དང་ཿ ཐེག་པ་རིམ་དགུ་དང་ཿ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་སོགས་པའི་སྲོག་སྙིང་ཿ དུས་གསུམ་སངས་རྒྱས་ཐམས་ཅད་དང་ཿ བླ་མ་ཡི་དམ་མཁའ་འགྲོ་ཆོས་སྐྱོང་ལ་སོགས་པའི་སྙིང་པོ་འདི་ལ་ཚང་བའོཿ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ཨོྃ་ཨཱཿཧཱུྃ་གིས་དུག་གསུམ་ལས་གྱུར་སྒྲིབ་པ་འདགཿ བཛྲ་ཞེ་སྡང་ལས་གྱུར་སྒྲིབ་པ་འདགཿ གུ་རུས་ང་རྒྱལ་ལས་གྱུར་སྒྲིབ་པ་འདགཿ པདྨས་འདོད་ཆགས་ལས་གྱུར་སྒྲིབ་པ་འདགཿ སིདྡྷིས་ཕྲག་དོག་ལས་གྱུར་སྒྲིབ་པ་འདགཿ ཧཱུྃ་གིས་ཉོན་མོངས་ལས་གྱུར་སྒྲིབ་པ་འདགཿ ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱྃཿ བཛྲ་གུ་རུ་ལན་གཅིག་བརྗོད་པ་ཡིཿ དེ་ལ་གཟུགས་མཆིས་འཛམ་གླིང་སྣོད་དུ་ཆུང་ཿ འདི་ཉིད་མཐོང་ཐོས་དྲན་པའི་སེམས་ཅན་ཀུནཿ རིག་འཛིན་ཕོ་མོའི་གྲལ་ལ་འཁོད་པར་ངེསཿ བསླུ་མེད་བཛྲ་གུ་རུའི་བདེན་ཚིག་ལཿ གང་འདོད་བཀའ་བཞིན་འགྲུབ་པར་མ་གྱུར་ནཿ པདྨ་ང་ཡིས་སེམས་ཅན་བསླུ་བ་ཨང་ཿ མི་བསླུ་ངེས་པས་བཀའ་བཞིན་བསྒྲུབ་པར་གྱིསཿ བཟླས་པ་མི་ནུབ་རྒྱལ་མཚན་རྩེ་ལ་ཕྱོརཿ རླུང་ཕོག་སེམས་ཅན་གྲོལ་བར་ཐེ་ཚོམ་མེདཿ ཡང་ན་ས་ཤིང་རྡོ་ཡི་ལོགས་སུ་བྲིཿ རབ་གནས་བྱས་ནས་ལམ་ལ་བཀྲམ་ན་ཡང་ཿ མཐོང་བ་ཙམ་གྱིས་ནད་གདོན་སྒྲིབ་པ་འདགཿ ས་དེར་གནས་པའི་འདྲེ་སྲིན་རྒྱུ་ལམ་ཆོདཿ མཐིང་ཤོག་དག་ལ་གསེར་གྱི་བྲིས་ལ་འདོགསཿ གདོན་བགེགས་འབྱུང་པོས་གནོད་པ་བྱེད་མི་ནུསཿ ཤི་ནས་རོ་དང་མ་བྲལ་བསྲེགས་ན་ནིཿ འཇའ་ཚོན་འཁྱུག་ཅིང་བདེ་ཆེན་འཕོ་བར་ངེསཿ འབྲི་ཀློག་འདོན་པའི་ཡོན་ཏན་ཚད་ལས་འདསཿ མ་འོངས་སེམས་ཅན་དོན་དུ་བཀོད་དེ་སྦསཿ སྐལ་ལྡན་ལས་ཅན་བུ་དང་འཕྲད་པར་ཤོགཿ ས་མ་ཡཿ རྒྱ་རྒྱ་རྒྱཿ ལོག་ལྟ་ཅན་ལ་གསང་རྒྱ་རྒྱ་རྒྱཿ དམ་ཚིག་ཅན་ལ་གཏད་རྒྱ་རྒྱ་རྒྱཿ སྤྲུལ་སྐུ་ཀརྨ་གླིང་པས་གཏེར་ནས་གདན་དྲ

སྙིང་ཉེ་བའི་དྲ་གྲོགས་དང་རྡོ་རྗེ་མཆེད་པོ་ཡོངས་ལ་ཞུ་འབྲས། ༧སྐྱབས་རྗེ་དམ་པ་གནམ་ལྕགས་གླིང་པའི་གསུང་བྱིན་ཅན་གྱི་༧ཀུན་མཁྱེན་བླ་མ་ཚུལ་ཁྲིམས་བློ་གྲོས་ཀྱི་ཞབས་བརྟན་འདི་ཚར་བརྒྱ་རེ་ནི་ཀུན་གྱིས་གསུང་རོགས། རྟེན་འབྲེལ་དང་དགོས་གལ་ཤིན་ཏུ་ཆེའོ།། ཨེ་མ་ཧོས

1. སྐད་ཡིག་ལྷན་ཐབས། ཀློག་གི་སྐོར།ནོར་བུ་བཀྲ་ཤིས། ༡༩༨༠ ལོར་མདོ་སྨད་མགོ་ལོག་གི་ཡུལ་དུ་སྐྱེས། ལོ་བརྒྱད་ཀྱི་ཐོག་ཕ་རྒན་གྱི་དྲུང་ནས་བོད་ཡིག་གི་ཀློག་སྦྱངས་ཏེ་རིམ་བཞིན་དགོན་སྡེ་ཆེ་ཆུང་དུ་མར་འགྲིམས་ཤིང་གྲུབ་མཐའ་གསར་རྙིང་རིས་སུ་མ་ཆད་པའི་དགེ་བའི་བཤེས་གཉེན་བཅུ་ཕྲག་འགའ་བསྟེན་ཏེ། མདོ་སྔགས་རིག་གནས་དང་བཅས་པ་ལ་སྦྱངས་པ་བྱས་དང་བྱེད་བཞིན་པ་དང་། ཁྱད་པར་དུ་བགྲང་བྱ་ཉེར་ལྔ་ལྷག་གི་རིང་ལ་བོད་མདོ་དབུས་ཁམས་གསུམ་དང་། ཧི་མ་ལ་ཡ་རི་རྒྱུད་དང་བཅས་པའི་དགེ་རྒན་མང་པོ་ཞིག་ཆེད་དུ་བསྟེན་ནས་བོད་རང་གི་ཐུན་མོང་མ་ཡིན་པའི་ཡིག་ཀློག་གི་སྐོར་ལ་བསྐྱར་སྦྱོང་ཡང་ཡང་བྱས་པ་དང་འབྲེལ་བརྡ་དག་ཚད་ལྡན་གྱི་གཞུང་ལུགས་དང་། ཀློག་སློབ་པའི་སློབ་དཔོན་མཁས་པའི་ཡིག་ཀློག་གི་མན་ངག་དང་། གནའ་དེང་གི་ཡང་དག་པའི་ངག་དང་། བརྡ་གསར་རྙིང་དང་། སྐད་བརྡ་རིག་པ་རྣམས་གཞི་ལ་བཞག་སྟེ། ལུང་རིགས་དང་མི་འགལ་བར་གཙོ་བོ་བོད་ཡུལ་སྟོད་སྨད་བར་གསུམ་དང་བཅས་པས་བོད་ཡིག་གི་ཀློག་འདོན་བྱེད་ཚུལ་དང་། བོད་ཀྱི་སྐད་བརྡ་ལ་ཆེད་དུ་ཉམས་ཞིབ་དང་ཞིབ་འཇུག་གི་ལས་ལ་ད་ལྟའི་བར་དུ་ནུས་ཚོད་ལྟར་སྒོ་དུ་མ་ནས་འབད་བརྩོན་བྱས་དང་བྱེད་བཞིན་པ་ལགས་སོ། ༄༅། །ཡུལ་གངས་ཅན་གྱི་བརྡ་སྤྲོད་པའམ་སྒྲ་རིག་པའི་བྱེ་བྲག་སུམ་རྟགས་དག་གསུམ་གྱི་སྔོན་འགྲོ་བོད་ཡིག་གི་ཀློག་ཐབས་མན་ངག་དང་བཅས་པ་མདོར་བསྡུས་ཏེ་བསྟན་པ་ཐུ་མིའི་དགོངས་གཏེར་རྒྱ་མཚོ་ཆེན་པོའི་ཆུ་ཐིགས་ཞེས་བྱ་བ་བཞུགས་སོ།། ༈ བོད་ཀྱི་ལོ་ཙཱ་བ་ཆེན་པོ་མཁས་མཆོག་སློབ་དཔོན་ཐུ་མི་སམྦྷོ་ཊ་དང་བརྡ་སྤྲོད་སྨྲ་བའི་དབང་ཕྱུག་གནའ་དེང་གི་ལོ་པཎ་བཀའ་དྲིན་ཅན་རྣམ་པ་ཡོངས་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ། །གསལ་བྱེད་སོ་བཞིའི་དབྱངས་རྟ་ངག་ལ་དྲངས། །ངག་གི་སྒྱུ་རྩལ་མཁས་རྣམས་དལ་གཅིག་གསོན། །སྙན་ངག་གྱེར་མཁན་དབུ་མཛད་རྡུང་ལེན་མཁན། །གསར་འགྱུར་བཤད་མཁན་དགེ་རྒན་སྒྲུང་པ་དང་། །རྩོད་ལ་མཁས་པའི་དགེ་བཤེས་ལྷ་རམས་པ། །འཆད་མཁས་དྲན་དབང་མཁན་སྤྲུལ་བླ་སློབ་ཚོགས། །རྩོམ་མཁས་དཔྱོད་ལྡན་རིགས་སྨྲ་ཁ་ཤགས་མཁན། །སྐད་སྒྱུར་ཡིག་སྒྱུར་བྱེད་པའི་ལོ་པཎ་དང་། །རིམ་གྲོ་འདྲ་མིན་བྱེད་པའི་ཨ་མཆོད་དང་། །སྙན་ཞུ་སྣ་ཚོགས་ཀློག་པའི་ཆོས་ཁྲིམས་པ། །གླུ་གཞས་སྒྲོགས་སྦྱང་བྱེད་མཁས་གཏམ་བཤད་མཁན། །སྐྲ་ལོ་དུང་ལྟར་དཀར་བའི་རྒན་འཁོགས་དང་། །བཀུར་འོས་ཕ་མ་ལས་བྱེད་ཤེས་ལྡན་པ། །གཞོན་ཆུང་རྣམ་རིག་བཀྲ་བའི་གཅེས་ཕྲུག་ཚོ། །མདོར་ན་མཐོ་སར་བཞུགས་པའི་མི་ཆེན་དང་། །དམའ་བའི་གྲལ་ལ་སྡོད་མཁན་སུ་ཡིན་རུང་། །ལྷག་ཏུ་ཀློག་སློབ་མཁན་རྣམས་ཐུགས་རྒྱུད་བསྐུལ། །རང་རེའི་སྐད་ཡིག་ཚེ་སྲོག་ཆད་ལ་ཁད། །མཐོན་པོའི་གསུང་དང་དམའ་བའི་ངག་ཀུན་ལ། །ཀློག་སྐྱོན་ནད་ཚབས་ཆེན་པོས་ཟིན་པར་བརྟེན། །ཁྱེད་རྣམས་ངག་རྩལ་ཡིག་ཀློག་བྱང་ཆུབ་ན། །ཤིན་ཏུ་ཕན་པའི་ཡོན་ཏན་བརྗོད་མི་ལང་། །རྒྱལ་བས་བཀྲ་ཤིས་བརྩེགས་པར་ཀློག་ཉེས་པ། །བཀྲ་མི་ཤིས་པར་གསུངས་པ་གཟིགས་ལགས་སམ། །གཞན་ཡང་མདོ་སྔགས་རིག་གནས་གཞུང་ཀུན་ལས། །ལན་གཅིག་ཙམ་མིན་གཟབ་ནན་ཚུལ་གྱིས་གསུངས། །ཀློག་དོན་ཞིབ་ཏུ་འཚོལ་ལ་ཐུགས་རྗེས་གཟིགས། །དབྱངས་གསལ་སོ་བཞིའི་ཐུན་མིན་སྒྲ་རྩོལ་ཀུན། །ཁ་ནས་གང་ཐོན་མ་ལགས་ཤིན་ཏུ་གཟབ། །མ་དག་རྒྱུན་འབྱམས་གང་ཡོད་ཞིབ་ཏུ་དཔྱོད། །སྐྱེ་གནས་བྱེད་རྩོལ་ཇི་བཞིན་མཐར་ཕྱིན་མཛོད། །སྔོན་འགྲོ་ཡིག་ཀློག་ཡང་དག་མེད་བཞིན་དུ། །སུམ་རྟགས་དག་གསུམ་གངས་ལྗོངས་སྒྲ་རིག་པ། །ཤེས་དཀའ་ཤེས་ཀྱང་ཕལ་ཆེར་མྱོང་བས་དབེན། །གལ་ཏེ་ཀློག་རྩལ་ཕུན་སུམ་ཚོགས་གྱུར་ན། །དག་ཡིག་གཞུང་ལུགས་ཕལ་ཆེར་མེད་ཀྱང་རུང་། །ཀུན་ཀྱང་མི་འདྲ་ཁྱད་འབྱེད་སུ་ཞིག་ནོར། །བརྟགས་ན་ཤིན་ཏུ་མི་འདྲ་ནོར་མི་སྲིད། །དཔེར་ན་ཕ་མ་ཕན་ཚུན་སུ་ཞིག་ནོར། །བརྗོད་བྱ་རྗོད་བྱེད་ཐ་དད་ཡིན་བཞིན་དུ། །ངག་ནས་ཁྱད་མེད་བཀླགས་ན་ནོར་འཁྲུལ་མང་། །དཔེར་ཀ་དཀའ་རྐ་ལྐ་སྐ་ཕན་ཚུན་ནོར། །དེ་བཞིན་དབྱངས་ཡིག་ཕན་ཚུན་ནོར་བའང་མང་། །མི་རེའི་ངག་ན་ཡིག་ཀློག་གསེར་འདྲ་བ། །མེད་མཁན་མེད་ཀྱང་ཀློག་སྐྱོན་རི་འདྲ་བ། །མེད་མཁན་མེད་ཕྱིར་གཟུར་གནས་ནན་ཏན་བསྐྱེད། །མདོར་ན་ཀློག་གི་སྐྱོན་ཡོན་ངོས་ཟིན་ཏེ། །ལེགས་སྤེལ་ཉེས་འགོག་བྱེད་ལ་རྟག་ཏུ་འབད། །རིགས་མཐུན་ཁ་བ་ཅན་གྱི་སྤུན་ཟླ་ཚོ། །ལྟོས་བཅས་ཡོངས་ལ་སེམས་གཏམ་སྙིང་ནས་ཞུ། ༈ ཀ་ཁ་ག་ང་། ཅ་ཆ་ཇ་ཉ། ཏ་ཐ་ད་ན། པ་ཕ་བ་མ། ཙ་ཚ་ཛ་ཝ། ཞ་ཟ་འ་ཡ། ར་ལ་ཤ་ས། ཧ་ཨ། ཨི་ཨུ་ཨེ་ཨོ། ༈ ཀ་ཁ་ག་ང་ང་ཚོའི་ཡི་གེ་ཡིན། །ཅ་ཆ་ཇ་ཉ་ཉ་གང་ཟླ་བ་འདྲ། །ཏ་ཐ་ད་ན་ན་ཚོད་གཞོན་དུས་སྦྱང་། །པ་ཕ་བ་མ་མ་རིག་མུན་པ་སེལ། །ཙ་ཚ་ཛ་ཝ་ཝ་ཚོགས་རྒོལ་ངན་འཇོམས། །ཞ་ཟ་འ་ཡ་ཡ་རབས་དམ་པའི་སྲོལ། །ར་ལ་ཤ་ས་ས་གཞིའི་མེ་ཏོག་འཛུམ། །ཧ་ཨ་ཨཱ་ལི་ཀཱ་ལིའི་དབྱངས་རྟ་གྱེར། །རྐྱང་པ་གསལ་བྱེད་སུམ་ཅུ་ཁོ་ན་ཀློག །སྒྲ་རྩོལ་ཐུན་མིན་མི་འདྲ་སུམ་ཅུ་ཡོད། །དེ་ལྟར་བཀླགས་པ་དྲང་པོའི་ང་རོ་ཡིན། །གཙོ་བོ་སྐྱེ་གནས་བྱེད་རྩོལ་ཟབ་ནན་སྦྱང་། །ལྷག་ཏུ་སྡེ་པ་སོ་སོའི་གསུམ་པ་སྟེ། །ག་ཇ་ད་བ་ཛ་འ་ཤ་འདི་རྣམས།…

རྗེ་བཙུན་བླ་མ་དམ་པའི་གསོལ་འདེབས་དད་པའི་འཁྲི་ཤིང་ཞེས་བྱ་བ་བཞུགས་སོ། ། མཁས་དབང་རྫ་རྒྱལ་ཐུབ་བེ། ཐུབ་གསུང་ཆོས་ཕུང་བརྒྱད་ཁྲིའི་བརྗོད་བྱའི་གཏམ།།རྒྱལ་བསྟན་རིན་ཆེན་གནས་པའི་གཞི་མ་དངོས།།ཟབ་ཡངས་ཆོས་འདུལ་བདུད་རྩིའི་མཛོད་བཟང་པོ།།འཕེལ་མཛད་དྲིན་ཆེན་བླ་མར་ཕྱག་བགྱིའོ།། རྗེ་ཁྱོད་དག་ཆེན་ཡེ་ཤེས་རོལ་བ་ཡིས།།སྤྲུལ་པའི་ཟློས་གར་འབྱམས་སུ་ཀླས་པ་ལས།།ཆེར་སྙིཊ་ལྔ་བདོའི་འགྲོ་ལ་རྗེས་བརྩེ་བས།།བདག་ཅག་མགོན་པོར་ཕེབས་ལ་གསོལ་བ་འདེབས།། མདོ་ཁམས་རྡོ་རྗེ་འཕན་པོས་བསྲུང་བའི་གནས།།ཟླ་ཀླུང་དལ་གྱིས་འབབ་པའི་གཡས་འགྲམ་ཕྱོཊ།།པཱ་ཐུར་ཞེས་སུ་གྲགས་པའི་ཡུལ་གྲུ་རུ།།འཁྲུངས་བའི་གནས་སུ་མཛད་ལ་གསོལ་བ་འདེབས།། རབ་ཚེས་མི་ཟད་མེ་ཁྱིའི་ཆོ་འཕྲུལ་ཟླའི།།དཀར་ཕྱོགས་དགའ་བ་དང་པོའི་ནམ་ལང་ཆར།།དྲང་སྲོང་ཉི་མ་རྒྱུ་སྐར་མོན་གྲེ་ཟུང་།།འགྲོགས་པའི་དུས་སུ་བལྟམས་ལ་གསོལ་བ་འདེབས།། དགེ་རྩེ་ཞེས་བྱ་སྨུག་པོ་གདུང་གི་རིགས།།ཡབ་ཡུམ་ཆོ་འབྲངས་ཡ་རབས་དྲ་མའི་རྒྱུད།།ཕུན་ཚོགས་དགེ་མཚན་ལང་ཚོ་དར་བཞིན་དུ།།སྐྱེ་བའི་མྱུ་གུ་བཟུང་ལ་གསོལ་བ་འདེབས།། ཙནྡན་མཆོག་ལ་དྲི་བསུང་ཇི་བཞིན་དུ།།ཆུང་ངུའི་དུས་ནས་སྐྱེས་ཐོབ་མཁྱེན་རབ་དང་།།དད་སོགས་སྙིང་རྗེ་རིགས་ཀྱི་རྟགས་ངོམ་པའི།།དམ་པའི་སྐྱེས་བུ་ཁྱེད་ལ་གསོལ་བ་འདེབས།། བཅུ་གཅིག་ལོ་ནང་ཡི་གེའི་ཕྱི་མོ་རྣམས།།སྦྱངས་བའི་ཚུལ་མཛད་ཀློག་པ་མཐར་སོན་ནས།།སྙིང་ཐིག་ཆོས་གྲྭ་ཕུན་ཚོགས་ནོར་གླིང་དུ།།བསྟན་པའི་སྒོ་རུ་ཞུགས་ལ་གསོལ་བ་འདེབས།། རྒྱལ་བསྟན་རྟགས་ཀྱི་ཆེ་བ་ལ་དགོངས་ནས།།བརྟན་མཁས་དབང་ཕྱུག་གུ་ཎའི་མཚན་ཅན་ལས།།སྤོང་བཅུའི་བརྟུལ་བཞུཊ་དགེ་ཚུལ་སྡོམ་པ་མནོས།།སྡོམ་བརྩོན་དབང་བོ་ཁྱོད་ལ་གསོལ་བ་འདེབས།། ཉི་ཤུ་རྩ་བཞིར་ཡོན་ཏན་རྒྱ་མཚོའི་གཙོའི།།འདུལ་བ་འཛིན་པའི་དགེ་འདུན་གྲངས་ཚང་དབུས།།ཚད་ལྡན་གསོལ་བཞིའི་ཆོ་ག་ལ་བརྟེན་ནས།།བསྙེན་པར་རྫོཊ་པར་མཛད་ལ་གསོལ་བ་འདེབས།། ལྷུན་གྲུབ་བདེ་ཆེན་གླིང་གི་དབེན་ཁྲོད་དུ།།བགྲང་བྱ་དུ་མར་མདོ་སྔགས་གཞུང་མང་པོ།།གསན་འཆད་བརྒལ་བརྟག་ཐུཊ་འཛིན་གནང་བ་སོཊ།།འགྲན་མེད་སྦྱངས་པ་མཛད་ལ་གསོལ་བ་འདེབས།། གཞན་ཡང་བརྡ་སྤྲོད་གསོ་རིག་རྟོག་གེའི་གཞུང་།།དཀར་ནག་གཙུག་ལག་སྙན་ངག་ལ་སོགས་པ།།ཐལ་རྒྱུག་ཙམ་མིན་རྡོ་རུས་ཐུག་པ་ཡིས།།ཤེས་བྱ་ཕྱོགས་མེད་སྦྱངས་ལ་གསོལ་བ་འདེབས།། གྲུབ་རིགས་རྒྱ་མཚོའི་འཁོར་བསྒྱུར་མཆོག་གཉིས་དང་།།ཁྱད་དུ་འཕཊ་པའི་མཁན་ཆེན་རྣམ་གསུམ་སོཊ།།མདོར་ན་རིས་མེད་ཡོངས་འཛིན་མང་པོ་ལས།།སྨིན་གྲོལ་བདུད་རྩི་བཞེས་ལ་གསོལ་བ་འདེབས།། བཀའ་གཏེར་སྤྱི་དང་སྙིང་ཐིག་གསར་རྙིང་གི།།ཡི་དམ་མང་པོའི་བསྙེན་བསྒྲུབ་ཉམས་སུ་བསྟར།།བསྐྱེད་རྫོཊ་གནད་བསྣུན་བརྒྱུད་པའི་གྲལ་དུ་གཤེཊ།།འཇིཊ་མེད་སྒྲུབ་བརྩོན་དབང་བོར་གསོལ་བ་འདེབས།། དེ་ནས་མགོན་ཁྱོད་དགུང་གྲངས་ཞེ་བདུན་པ།།ཆུ་ཕོ་སྤྲེལ་ལོ་སྨིན་ཟླའི་བཅུ་དྲུག་ལ།།ལྕང་རིའི་ཆོས་གྲྭ་བསམ་གཏན་དར་རྒྱས་གླིང་།།བསྟན་འགྲོའི་དཔལ་དུ་བཏབ་ལ་གསོལ་བ་འདེབས།། ཡུལ་རིགས་མི་གཅིག་སྐད་རིགས་མི་མཐུན་པའི།།ཁམས་དབུས་གཙང་གསུམ་ཐར་བ་དོན་གཉེར་བའི།།འདུལ་སྤྱོད་གཙང་མར་སྐྱོང་བ་ཤ་སྟག་གིས།།གུས་པས་བསྙེན་པ་ཁྱོད་ལ་གསོལ་བ་འདེབས།། དེའི་ཚེ་གདུལ་བྱ་རང་རང་བློར་འཚམས་པའིི།།མ་གི་འདུལ་བ་ཀཱ་རི་ཀཱ་ནས་བཟུང་།།ཡ་ཀི་རྒྱུད་རྒྱལ་གསང་བ་སྙིང་བོའི་བར།།ཆོས་ཆར་ཆད་མེད་ཕབ་ལ་གསོལ་བ་འདེབས།། མདོ་སྔགས་གཞུང་བརྒྱའི་སྲོག་ཤིང་དུ་གཟིགས་ནས།།བྱང་ཆུབ་ལམ་གྱི་རིམ་པ་སྤྱོད་འཇུག་དང་།།རྒྱུད་རྒྱལ་སྒྱུ་འཕྲུལ་གསང་བ་སྙིང་བོ་གཉིས།།འཆད་ཉན་གཙོ་བོར་མཛད་ལ་གསོལ་བ་འདེབས།། སྡོམ་བརྩོན་ཞི་དུལ་འདུལ་བ་འཛིན་པའི་གཞུང་།།ལུང་རིགས་མགྲིན་རྔ་ལྡིར་བའི་མཁས་པའི་ཚོགས།།གསུང་ལས་སྐྱེས་པའི་སློབ་མ་མང་དུ་བསྐྲུན།།བསྟན་འཛིན་ཕྲེང་བ་སྤེལ་ལ་གསོལ་བ་འདེབས།། དགོན་སྡེ་རྣམས་སུ་རྒྱུད་སྡེའི་བཤད་སྲོལ་བཞག།ཆོས་གྲྭའི་མཐུན་རྐྱེན་ཞིང་སྒྲུབ་བཙུགས་པ་དང།།གཞི་གསུམ་ཕྱག་བཞེས་དག་ཐེར་མཛད་པ་སོགས།བསྟན་པའི་སྲོག་རྩ་མཐུད་ལ་གསོལ་བ་འདེབས།། ཁྱིམ་པ་རྣམས་ཀྱང་བདེ་ལྡན་ཞིང་མཆོག་གི།སྐྱེ་བའི་རྒྱུ་བཞི་སྒྲུབ་ལ་འགོད་པ་དང།།ཁ་སྣའི་དུད་སོགས་ཉེས་མང་རྒྱུན་བཅད་ནས།དཀར་པོའི་གླིང་དུ་བསྒྱུར་ལ་གསོལ་བ་འདེབས།། དད་གཤིན་དཀོར་རྫས་ཆུད་དུ་མི་གསན་པར།གཙུག་ལག་ཁང་དང་རྟེན་མཆོག་གྲངས་མང་བཞེངས།།ཚོགས་མཆོད་མར་མེ་འགྱེད་གཏོང་སྲོག་བླུ་བགྱིས།བགྲང་ཡས་ཚོགས་བསཊ་མཛད་ལ་གསོལ་འདེབས།། མགོན་པོ་ཁྱེད་ཀྱི་རྗེས་སུ་ལེགས་བཟུང་བའི།།ཁྱིམ་པ་རྣམས་ཀྱིས་གནའ་བོའི་ལུགས་བཟང་འཛིན།།རབ་བྱུང་རྣམས་ནི་མང་ཐོས་ཀུན་སྤྱོད་གཙང་།།འབྲེལ་ཚད་དོན་ལྡན་བླ་མར་གསོལ་བ་འདེབས།། དེ་ལྟར་མཛད་འཕྲིན་འཆད་ཉན་འཁོར་སློབ་ཚོགས།།གོང་ནས་གོང་དུ་ཡར་ངོའི་ཟླ་བཞིན་དུ།།དགུང་གྲངས་བདུན་ཅུ་རྩ་གཅིག་བར་དུ་བཞུགས།།མཛད་པ་མཐར་ཕྱིན་ཁྱོད་ལ་གསོལ་བ་འདེབས།། མེ་སྤྲེལ་ཆུ་སྟོད་ཟླ་བའི་དམར་ཕྱོགས་ཀྱི།།སྟོང་པ་དང་པོའི་ཉི་མ་ནུབ་པའི་དུས།།ནམ་མཁར་སྒྲ་དང་སེངྒེའི་ཉལ་སྟབས་ཀྱིས།།ཞི་བའི་དབྱིངས་སུ་གཤེགས་ལ་གསོལ་བ་འདེབས།། དེ་ནས་སྐུ་གདུང་ཞུགས་ལ་སྦྱངས་བའི་ཚེ།།དབུ་ཐོད་འཕར་དང་ནམ་མཁར་འཇའ་འོད་འཁྲིགས།།ཆར་ཟིམ་གསར་དུ་འབབ་པའི་ཡ་མཚན་ངོམ།།སྐྱབས་གཅིག་དྲིན་ཆེན་བླ་མར་གསོལ་བ་འདེབས།། རྣམ་ཐར་བདུད་རྩིའི་ཕྲེང་བ་འདི་སྤེལ་མཐུས།།དཔལ་མགོན་བླ་མའི་སྐུ་གསུང་ཐུགས་གསུམ་གྱི།།དམ་ཚིག་ཉམས་པ་ཐམས་ཅད་སོར་ཆུད་ནས།།དགྱེས་བཞིན་རྗེས་སུ་འཛིན་པའི་རྒྱུར་གྱུར་ཅིག། ལས་ངན་བདག་གི་སྐྱེ་བའི་ཕྲེང་བ་ཀུན།།རྗེ་བཙུན་ཁྱེད་ཀྱི་བརྩེ་བས་ལེགས་བསྐྱངས་ནས།།རྗེས་བསྟན་གདམས་པའི་གསུང་གི་ཟུར་ཙམཡང།།འགལ་བ་མེད་པར་ཇི་བཞིན་བསྒྲུབ་ནུས་ཤོག། གནས་སྐབས་མགོན་པོ་ཁྱེད་ཀྱི་རྣམ་ཐར་ལ།།ལེགས་པར་བསླབས་ནས་ས་ལམ་རིམ་པ་རྫོགས།།མཐའ་ཐུག་ཟབ་གསལ་གཉུག་མའི་དགོངས་ཀློང་དང་།།རོ་གཅིག་འདྲེས་ནས་གདུལ་འགྲོའི་དོན་བྱེད་ཤོག།དེ་ལྟར་ཐུགས་རྗེ་དང་བཀའ་དྲིན་མཚུངས་མེད་དཔལ་མགོན་བླ་མ་མཆོག་གི་ཐུན་མོང་ཕྱིའི་རྣམ་ཐར་མདོར་བསྡུས་པ་དང་སྦྱར་བའི་གསོལ་འདེབས་དད་པའི་འཁྲི་ཤིང་ཞེས་པ་འདི་ནི་དགེ་རྒན་དགོན་པ་སྐྱབས་ཀྱིས་ལན་གྲངས་མང་པོར་གསུངས་བསྐུལ་གནང་བའི་ལན་མ་ལྡོག་པའི་ཆེད་དང་བསམ་བརླག་རང་གི་ཉམ་ཆགས་ཉེས་ལྟུང་གི་གཉེན་པོར་དམིགས་ཏེ་རབ་རྒྱལ་རྣམ་འཕྱང་ལོའི་སྨིན་ཟླའི་དམར་ཕྱོགས་ཀྱི་རྫོགས་པ་དང་པོར་གཙུགས་ལག་གི་བཏགས་མིང་ཙམ་དུ་འཇིགས་མེད་ལུང་རྟོགས་རྒྱ་མཚོར་འབོད་པ་དེས་གྲུབ་པར་བགྱིས་པ་འདིས་ཀྱང་རྗེ་བཙུན་བླ་མ་མཆོག་གི་རྗེས་སུ་འཛིན་པའི་རྒྱུར་གྱུར་གཅིག དགེའོ། ། བཀྲ་ཤིས་ཤོག

བཀོད་པ་བཞུགས་སོ།། ༡༽འཁྲུངས་པའི་ཡུལ།༢༽རིགས་ཕུན་སུམ་ཚོགས་པ།༣༽གང་གིས་བསྐྱེད་པའི་ཡབ་ཡུམ།༤༽གང་དུ་བལྟམས་པའི་གནས།༥༽སྐུ་འཁྲུངས་པའི་དུས་ཕུན་སུམ་ཚོགས་པ།༦༽གང་ཞིག་འཁྲུངས་པའི་སྟོན་པ་ཕུན་སུམ་ཚོགས་པ།༧༽ལོ་ཆུང་བྱིས་པའི་སྐབས་ཀྱི་གནས་སྣང་ངོ་མཚར་བ།༨༽ལེགས་ཚོགས་ཀུན་གྱི་འབྱུང་གནས་ཡོན་ཏན་སྦྱོང་ཚུལ།༩༽དམ་ཆོས་འདུལ་བ་རིན་པོ་ཆེའི་སྒོར་ཞུགས་པའི་ཚུལ།༡༠༽རིགས་པའི་གནས་རྣམས་ལ་མཁས་པར་སྦྱོང་བའི་ཚུལ།༡༡༽སྙིང་ཐིག་སྔོན་འགྲོའི་བློ་སྦྱོང་ཉམས་ལེན་ཇི་ལྟར་གནང་ཚུལ།༡༢༽གཙུག་ལག་རྩིས་ཀྱི་སྐོར་ལ་ཇི་ལྟར་མཁས་པར་སྦྱོང་བའི་ཚུལ།༡༣༽འཕགས་ཆེན་སྤྲུལ་པའི་གང་ཟག་ཆེན་པོ་ཡིན་པར་རྡོ་རྗེའི་ལུང་།༡༤༽སམ་སྐྲྀ་ཏའི་སྐད་ལ་ཇི་ལྟར་མཁས་པར་སྦྱོང་བའི་ཚུལ།༡༥༽བཟོ་རིགས་སྣ་ཚོགས་ལ་ཇི་ལྟར་མཁས་པར་སྦྱོང་བའི་ཚུལ།༡༦༽འཕགས་བོད་ཀྱི་གཞུང་ཆེན་རྣམས་ལ་ཐོས་བསམ་སྒོམ་པ་མཛད་ཚུལ།༡༧༽བྱང་ཆུབ་སེམས་དཔའི་བསླབ་པ་རིན་པོ་ཆེ་ཉམས་སུ་བླངས་ཚུལ།༡༨༽ཉམས་རྟོགས་ཟབ་མོ་ཇི་ལྟར་ཐུགས་རྒྱུད་ལ་འཁྲུངས་པའི་ཚུལ།༡༩༽བསྙེན་རྫོགས་སྡོམ་པ་ཇི་ལྟར་ཐོབ་ཡོད་པའི་ཚུལ།༢༠༽སྐུ་མཚམས་སུ་བཞུགས་ནས་སྒྲུབ་པ་ཉམས་ལེན་གནང་ཚུལ།༢༡༽བསྟན་འགྲོའི་དོན་ཆེན་ཇི་ལྟར་མཛད་ཚུལ།༢༢༽ཐུགས་སྲས་སློབ་འབངས་རྣམས་ཇི་ལྟར་སྐྱོང་ཚུལ།༢༣༽ཕྱོགས་མེད་འགྲོ་དོན་ཆེན་པོ་ཇི་ལྟར་གནང་བའི་ཚུལ། ༄༅། །ན་མོ་གུ་ར་ཝེ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐྱབས་གནས་ཀུན་འདུས་དཔལ་ལྡན་རྩ་བའི་བླ་མ་རིན་པོ་ཆེའི་སྐུ་གསུང་ཐུགས་ཀྱི་རྣམ་ཐར་ཡོན་ཏན་ཡང་ནས་ཡང་དུ་དྲན་པར་བྱས་ན་ཕྱོགས་དུས་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་རང་རྒྱུད་ལ་མྱུར་དུ་འཇུག་པ་དང་ལས་ཉོན་ཀུན་རྨོངས་ཀྱི་སྡིག་སྒྲིབ་མ་ལུས་པ་བྱང་ནས་བསོད་ནམས་དང་ཡེ་ཤེས་ཀྱི་ཚོགས་གཉིས་མཉམ་དུ་རྫོགས་པར་འགྱུར་བ་དང་ཁྱད་པར་རྫོགས་པ་ཆེན་པོ་རིག་པ་རང་བྱུང་གི་ཡེ་ཤེས་མངོན་དུ་བྱ་བའི་ཕྱིར་གསང་སྔགས་རྡོ་རྗེ་ཐེག་པའི་ལམ་གྱི་རྩ་བ་དག་སྣང་བླ་མའི་རྣལ་འབྱོར་ལ་གནད་དུ་བསྣུན་དགོས་པ་མདོ་རྒྱུད་ཀུན་ལས་གསུང་བ་ལྟར་རང་གཞན་རྣམས་ཀྱི་སེམས་ལ་མོས་གུས་དང་དག་སྣང་གོང་ནས་གོང་དུ་འཕེལ་བའི་ཆེད་དུ་བླ་མ་རིན་པོ་ཆེའི་རྣམ་ཐར་དྲང་པོར་བརྗོད་པར་བྱའོ།། ༼༡༽ ཆོས་རྗེ་དམ་པ་མཆོག་ཉིད་གང་དུ་འཁྲུངས་པའི་ཡུལ་ལྗོངས་ཕུན་སུམ་ཚོགས་པ་ནི། དེ་ཡང་བོད་གངས་ཅན་ལྗོངས་ཀྱི་ཤར་ཕྱོགས། སྨད་མདོ་ཁམས་ཆུ་བཞི་སྒང་དྲུག་གི་ནང་ཚད་འཛམ་གླིང་ཡོངས་གྲགས་ཀྱི་ཆུ་བོ་ཆེན་པོ། གཡོན་དུ་རྨ་ཆུ་སྔོན་མོ་དང་། གཡས་སུ་རྫ་ཆུ་བསིལ་མའི་ཆུ་རྒྱུན་ནུབ་ནས་ཤར་དུ་དལ་གྱིས་འབབ་པའི་ལྷོ་བྱང་གཉིས་ཀྱི་དབུས་ཀྱི་ས་ཁུལ་ལ། རྨ་རྫ་སྒང་ཞེས་མཁས་གྲུབ་སྐྱེས་བུ་མང་པོས་བྱིན་གྱིས་བརླབས་ཤིང་། དཀར་ཕྱོགས་གཞི་བདག་མང་པོས་ཡོངས་སུ་སྲུང་བ། མཁའ་རླུང་གཙང་ཞིང་ནད་འཇོམས་སྨན་རིགས་སྣ་ཚོགས་སྐྱེས་པ། རྩ་ཆེའི་རི་སྐྱེས་སྲོག་ཆགས་སྡེ་ཚན་ཧ་ཅང་མང་པོ་བག་ཡངས་ཞི་བར་རྒྱུ་བ་སོགས་མཐོང་དཀོན་པའི་འཁོར་ཡུག་གི་མཛེས་ཆོས་ཡོངས་སུ་རྫོགས་པའི་གནས་ཡུལ་གྱི་བཀོད་པ་ཕུན་སུམ་ཚོགས་པའོ། ། ༼༢༽ གང་ལས་མཆེད་པའི་རིགས་ཕུན་སུམ་ཚོགས་པ་ནི། དུས་རབས་བཅོ་ལྔ་བ། རབ་བྱུང་བཅུ་བའི་ནང་ས་གནས་འདིར་གསར་དུ་གཞིས་ཆགས་པའི་མདོ་ཁམས་ཨ་རིག་སྡེ་བའི་ནི་གླིང་གི་མི་རྒྱུད་བློ་གྲོས་དང་དཔའ་རྩལ་ཤིན་ཏུ་ཆེ་ཞིང་མི་གཤིས་བཟང་པོའི་རིགས་རུས་རྒྱུན་མ་ཆད་པ་རིམ་པར་མཆེད་པ་ལས། དུས་རབས་བཅུ་བདུན་པ། རབ་བྱུང་བཅུ་བཞི་བའི་སྐབས་དེར་དབང་གྲགས་ཡོད་པའི་ཁྱིམ་བདག་ཕྱུག་པོ་རྒྱ་གར་ཞེས་པ་དེ། གཏེར་ཆེན་ཁྲག་འཐུང་བདུད་འཇོམས་གླིང་པ་སྐུ་ན་གཞོན་དུས་ཁྱིམ་དུ་གདན་འདྲེན་ཞུས་ནས་མདོ་ཆེན་བྲ་ནག་རྟིང་དཀར་སོགས་དགུ་ཚན་དགུའི་མཎྜལ་འབུལ་ལམ་ཞུས་པས་ཐུགས་དགྱེས་པ་ཆེན་པོས་ཁྱེད་ཀྱི་མིང་ནི་ཨ་རིག་རྒྱ་གར་ཞེས་ཆོས་ཀྱི་འབྱུང་གནས་འཕགས་ཡུལ་གྱི་མཚན་གྱིས་བརྒྱན་པ་དང་མདོ་ཆེན་བྲ་ནག་རྟིང་དཀར་འདི་ནི་ཆོས་སྐྱོང་གཟའ་ལྷ་ཤན་གསུམ་གྱི་བླ་རྟ་རུ་འོས་པས་འབྱུང་འགྱུར་ཁོ་བོས་ཟབ་གཏེར་སྒོ་བརྒྱ་འབྱེད་པའི་རྟེན་འབྲེལ་ལེགས་འགྲིག་བྱུང་བར་བརྟེན། ཨ་རིག་རྒྱ་གར་ཁྱེད་ཀྱི་མི་རབས་མི་རྒྱུད་ཐམས་ཅད་བསྟན་སྲུང་གཟའ་ལྷ་ཤན་གསུམ་གྱི་སྐྱབས་འོག་ལས་མི་འདའ་བའི་བཀའ་ཡི་གཉེར་གཏད་ཡོད་ཅེས་གསུངས་པ་ལྟར་རིགས་ཕུན་སུམ་ཚོགས་པའོ།། ༼༣༽ གང་གིས་བསྐྱེད་པའི་ཡབ་ཡུམ་ཕུན་སུམ་ཚོགས་པ་ནི། དེ་ནས་བཟུང་ཟབ་གཏེར་བསྟན་པ་སྤེལ་བའི་འཕྲིན་ལས་ཀྱི་ཁ་ལོ་བ་ཆེན་པོ་སྦྱིན་བདག་ཨ་རིག་རྒྱ་གར་མཆོག་གི་སྐུ་སྲས་ཡོངས་ཀྱི་ཐུ་བོ་རིག་སྔགས་འཆང་བ་གྲགས་པ་རྒྱལ་མཚན་ཞེས་སྐུ་ན་ཆུང་དུས་ནས་ཟབ་མོ་བླ་མའི་རྣལ་འབྱོར་གྱི་དྲོད་རྟགས་མངོན་དུ་གྱུར་ཏེ་རྒྱུན་དུ་དག་པའི་སྣང་བ་དང་འབྲལ་མེད་བརྟུལ་ཞུགས་སྤྱོད་པའི་ཉམས་ལེན་ལ་བརྩོན་པར་མཛད་པས། འབྲས་བུ་ཡིད་སྨོན་དུ་མ་ལུས་པའི་དངོས་གྲུབ་མངོན་སུམ་དུ་བརྙེད་ནས་དགུང་ལོ་བདུན་ཅུའི་དུས་ཞི་བར་གཤེགས་པའི་སྐབས་དེར། སེང་གེ་དཀར་མོ་ལ་ཞོན་ནས་ཤར་ཕྱོགས་མངོན་པར་དགའ་བའི་ཞིང་ཁམས་སུ་ཕེབས་སོང་བ་རྩོད་མེད་ཡོངས་་གྲགས་ཀྱི་གཏེར་སྟོན་དཔལ་སྤྲུལ་ནམ་མཁའ་འཇིགས་མེད་ལ་ཡང་ཟག་བྲལ་དག་པའི་སྤྱན་གྱིས་གཟིགས་སྣང་བྱུང་ཡོད་པ་རེད། དེ་ལྟར་ཉམས་རྟོགས་ཀྱི་གདེངས་དང་ལྡན་པའི་རྣལ་འབྱོར་པ་ཡབ་ཆེན་གྲགས་པ་རྒྱལ་མཚན་དེ་ཉིད་དགུང་གྲངས་སུམ་ཅུའི་དུས་སུ། རྩ་བའི་བླ་མའི་བཀའ་ལུང་དང་གཙུག་ལག་རྩིས་ཀྱི་མཐུན་སྦྱོར་ལྟར། ཞི་འཇམ་བྱམས་བརྩེའི་ཀུན་སྤྱོད་ཀྱིས་བརྒྱན་པའི་རིགས་བཟང་གི་མཁའ་འགྲོ་མ་དཀའ་ལྡོག་ལྷ་མོ་ཞེས་བྱ་བ་ཁབ་ཏུ་བཞེས་ནས། ཡབ་ཡུམ་གཉིས་ཀྱིས་ཆོས་མཐུན་བསོད་ནམས་ཀྱི་ལས་ལ་འབད་བཞིན་གཉུག་མར་གནས་པ་ལས་ལྕམ་སྲིང་གཉིས་འཁྲུངས་ཞིང་སྲིད་པའི་ཕུན་ཚོགས་ཀྱི་དཔལ་ཡོན་འཕེལ་ཞིང་རྒྱས་པར་གྱུར་ཏོ། ། ༼༤༽གང་དུ་བལྟམས་པའི་གནས་ཕུན་སུམ་ཚོགས་པ་ནི། སྡེ་དགེའི་ཆོས་རྒྱལ་བསྟན་པ་ཚེ་རིང་གི་མངའ་རིང་རོང་སྡེ་རྫོང་ཁག་ཉེར་ལྔ་དང་འབྲོག་སྡེ་ལྷོ་བྱང་གཉིས་སུ་ཡོད་དབྱེ་བའི་བྱང་སྡེ་རྫ་ཆུ་ཁ་ཞེས་ཡུལ་ཕྱོགས་སྐྱོང་བའི་དགེ་བསྙེན་རྫ་རྒྱལ་རྡོ་རྗེ་འཕེན་ཕྱུག་གིས་སྲུང་བའི་མདོ་ཁམས་ས་ཡི་རྩེ་མོ། ཡོངས་སུ་གྲགས་པའི་མཁས་གྲུབ་ཆེན་པོ་འཇིགས་མེད་རྒྱལ་བའི་མྱུ་གུ། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ། རྒྱལ་སྲས་གཞན་ཕན་མཐའ་ཡས། འཇམ་མགོན་མི་ཕམ་ཕྱོགས་ལས་རྣམ་རྒྱལ། མཁས་དབང་རྒྱ་སྐོང་མཁན་པོ་གཞན་དགའ། ལྕང་མའི་མཁན་ཆེན་ཐུབ་དགའ་ཡིད་བཞིན་ནོར་བུ་སོགས་སྐྱེས་བུ་དམ་པ་མང་པོ་སྐུ་འཁྲུངས་པའི་གནས་མཆོག་བཟང་པོ་དེ་ལས་དགེ་རྩེ་ཨ་རིག་རྫ་བ་ཞེས་ཕུན་ཚོགས་སྡེ་བཞིས་ཕྱུག་པའི་འབྲོག་སྡེ་ཆེན་པོ་དག་གི་དབྱར་ཀའི་མཚེར་ས་ཡུལ་སྐྱོང་ཟོ་དོར་གཉེན་པོ་རྫ་གར་སོགས་ལྷུན་བརྗིད་རི་བོ་མཐོན་པོས་གཡས་ནས་བསྐོར་ཞིང་། དྭངས་བསིལ་མཚོ་དང་མཚེའུ་བརྒྱ་ཕྲག་དུ་མས་གཡོན་ནས་བསྐོར་བའི། དལ་འབབ་གཙང་ཆབ་རིང་མོའི་ཆུ་མགོ །ན་ཐང་པདྨ་བཞད་པའི་ནེའུ་གསེང་། སྣ་ཚོགས་མེ་ཏོག་བཀྲ་བའི་དགའ་ཚལ། ཕུན་ཚོགས་འཇིག་རྟེན་ཁྱོན་གྱི་མཛེས་ལྗོངས་རྣམ་པར་བཀྲ་བའི་ས་ཡི་ཐིག་ལེ་དེར། ། ༼༥༽ ནམ་ཞིག་སྐུ་འཁྲུངས་པའི་དུས་ཕུན་སུམ་ཚོགས་པ་ནི། དུས་དེའི་ཚེ་ན་ཡབ་དང་ཡུམ་གཉིས་ལ་དགེ་བའི་སྣང་བ་དུ་མ་བྱུང་ཞིང་ཡུམ་ཡང་སྦྲུམ་པ་དང་ལྡན་པར་གྱུར་པས་ལྷ་དང་བླ་མའི་རྟགས་ལུང་ལྟར་བསོད་ནམས་རིམ་གྲོ་ཕུན་སུམ་ཚོགས་པ་སྒྲུབ་པ་ལ་སྒོ་ཀུན་ནས་འབད་པ་དུ་མས་ཞུགས་པར་བྱས་སོ། ། སྤྱི་ལོ་༡༩༣༡་དེ་ནས་རབ་བྱུང་བཅུ་དྲུག་པའི་སྐྱེས་བདག་ཅེས་པ་ལྕགས་མོ་ལུག་གི་ལོ། སྟོན་པ་ཐུགས་རྗེ་ཅན་གྱིས་ཟག་མེད་ཆོས་ཀྱི་འཁོར་ལོ་བསྐོར་བའི་དུས་ཆེན་ཏེ་བོད་ཟླ་དྲུག་པའི་འཕེལ་ཕྱོགས་ཀྱི་ཚེས་བཞིའི་ཉི་ཤར་འབྲུག་གི་སྔ་ཆ་བཟང་པོ་ལ། ། ༼༦༽ གང་ཞིག་འཁྲུངས་པའི་སྟོན་པ་ཕུན་སུམ་ཚོགས་པ་ནི། མཁའ་ཁྱབ་སེམས་ཅན་ཀུན་གྱི་མགོན་དང་སྐྱབས་སུ་གྱུར་པའི་ཕྱི་ལྟར་དགེ་བའི་བཤེས་གཉེན་ལོ་ཆེན་དྷརྨ་ཤྲི། ནང་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མཁན་ཆེན་བོ་དྷི་ས་ཏྭ་ཤནྟ་རཀྵི་ཏ། གསང་བ་རྒྱལ་ཀུན་བཀའ་ཡི་སྡུད་པོ་མཁྱེན་རབ་འཇམ་དཔལ་གཞོན་ནུ་སྟེ་རྣམ་གསུམ་དབྱེར་མེད་པའི་སྔོན་གྱི་ཐུགས་བསྐྱེད་སྨོན་ལམ་ཟབ་མོའི་མཐུ་ལས་མཁྱེན་བརྩེ་ནུས་པའི་སྒྱུ་འཕྲུལ་གདུལ་བར་བྱ་བའི་ཁམས་དབང་དང་མཐུན་པར་སྤྲུལ་པའི་རང་གཟུགས་བདག་ཅག་རྣམས་ལ་བསོད་ནམས་ཀྱི་དཔལ་དུ་དུས་ལས་གཡོལ་མེད་དུ་ཤར་བ་འདི་ཉིད་ནི། མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན། འཛམ་གླིང་འགྲོ་བའི་ལམ་སྟོན་རྨད་བྱུང་མཁས་གྲུབ་བྱེ་བའི་གཙུག་རྒྱན། ༧ སྐྱབས་རྗེ་ཆོས་ཀྱི་རྒྱལ་པོ་ཀུན་མཁྱེན་གནས་ལྔ་རིག་པའི་མ་ཧཱ་པཎྜི་ཏ་རྗེ་བཙུན་འཇམ་མགོན་བླ་མ་མཁན་ཆེན་ཡིད་བཞིན་ནོར་བུ་པདྨ་ཚེ་དབང་ལྷུན་གྲུབ་རིན་པོ་ཆེ་མཆོག་ཉིད་ངོ་མཚར་དགེ་བའི་རྟེན་འབྲེལ་བཟང་པོའི་སྣང་བ་དང་བཅས་ལྷར་བཅས་འགྲོ་བ་ཡོངས་ཀྱི་དཔལ་མགོན་དུ་སྐུ་འཁྲུངས་སོ། ། ༼༧༽ ལོ་ཆུང་བྱིས་པའི་སྐབས་ཀྱི་གནས་སྣང་ངོ་མཚར་བ་ནི། དེ་ནས་སྔོན་གྱི་དགེ་བའི་བག་ཆགས་ཆུང་དུས་ནས་སད་དེ་དགེ་སློང་གནས་བརྟན་རྒན་པོའི་མཛད་སྤྱོད་ལྟར་རྟག་ཏུ་ཁུ་སིམ་མེ། ཞི་འཇམ་བྱམས་བརྩེའི་སྤྱོད་ལམ་འབའ་ཞིག་གནང་བ་ལས་ཐ་མལ་བྱིས་པའི་ཀུན་སྤྱོད་ལྟར་སྨྲེ་ངག་གི་ངུ་བ་དང་། མ་བརྟགས་པའི་མཆོང་རྒྱུག །ཁོང་ཁྲོ་བའི་འཁྲུག་རྩོད་སོགས་གཏན་ནས་མི་གནང་བས་ཉེ་འཁོར་ཀུན་གྱིས་ཡིད་དུ་འོང་བའི་བྱིས་པ་ཆུང་ཆུང་འདི་ནི་ལོ་ན་དྲུག་ཅུ་ཟིན་པའི་རྒན་པོ་ལས་ལྷག་པའི་བག་ཡོད་ཀྱི་སྤྱོད་བཟང་ལ་ལྟོས་ཞེས། དེ་ཕྱོགས་སྐྱེ་བོ་ཀུན་གྱིས་བསྔགས་ཤིང་ཁ་སྨོན་གཅེས་བཀུར་བྱེད་སའི་མིག་དཔེ་བཟང་པོ་ཞིག་ཏུ་གྱུར། འོན་ཀྱང ༡༩༣༣་དགུང་ལོ་གཉིས་ཀྱི་སྐབས་སུ་སྐྱེད་ཡུམ་མཆོག་ཞིང་ལ་ཕེབས་པར་བརྟེན་ཆོས་རྗེ་དམ་པ་འདི་ཉིད་དགུང་གྲངས་བརྒྱད་མ་ལོན་བར་དུ་ཡབ་ཀྱིས་ཤིན་ཏུ་བྱམས་བརྩེ་ཆེན་པོས་ཉེ་བར་བསྐྱངས་ནས་བྱིས་པའི་ཤེས་རབ་འཕེལ་བའི་ཐུན་མོང་མ་ཡིན་པའི་བྱིན་རླབས་ཀྱི་རྟེན་འབྲེལ་བཟང་པོ་གནང་ཡོད་པ་རེད། ༼༨༽ ལེགས་ཚོགས་ཀུན་གྱི་འབྱུང་གནས་ཡོན་ཏན་བཟང་པོ་སྦྱོང་མགོ་བཙུགས་པའི་ཚུལ་ནི། སྤྱི་ལོ་༡༩༣༨་ལོ་དགུང་ལོ་བརྒྱད་ཀྱི་སྐབས་ཀློག་གི་སློབ་དཔོན་དཀོན་མཆོག་བསྟན་འཛིན་ལས་ཟླ་བ་གཅིག་གི་རིང་བོད་ཀྱི་དབྱངས་གསལ་ཡི་གེ་ལ་སློབ་སྦྱོང་གནང་བས་བརྡ་བསྟན་པ་ཙམ་གྱིས་དཀའ་ཚེགས་མེད་པར་བདེ་བླག་ཏུ་ལྗགས་ཀློག་ལེགས་པར་བྱང་ཆུབ་ནས། ལོ་འདིར་དགོན་པའི་འདོན་ཆོག་པུ་ཏི་ཀ་དུ་མ་ཐུགས་འཛིན་གནང་བས་ཀློག་བཟང་བའི་ཚད་དུ་གྱུར། སྤྱི་ལོ་༡༩༣༨་༩དགུང་ལོ་དགུ་བའི་སྐབས་སུ་འབྲི་ཀློག་ལེགས་པར་མཐར་ཕྱིན་པ་དང་རྒྱལ་བ་ཞེ་ཆེན་པའི་དགོན་ལག་ཆེ་ཤོས་ཨོ་རྒྱན་སྨིན་གྲོལ་གླིང་གི་ཕྱག་བཞེས་འཁྲུལ་མེད་དུ་སྐྱོང་བའི་ཆོས་སྡེ་ཆེན་པོ་རྫ་ཕུག་ཁང་དགོན་བདེ་ཆེན་ཆོས་འཁོར་ལྷུན་པོ་ལ་ཚོགས་ཞུགས་བྱས་ཤིང་། དུས་མཚུངས་སུ་ཨ་འཛོམས་འབྲུག་པ་སྣ་ཚོགས་རང་གྲོལ་གྱི་དངོས་སློབ་ཕུག་ཁང་མཁན་པོ་ཤེས་རབ་མཆོག་ནི་འདི་བའི་སྐུ་ཞང་ཡིན་པར་བརྟེན་དུ་ནས་བཟུང་སྟེ་སྐུ་ཞང་མཁན་པོས་གང་ཅིའི་ཐད་ནས་བདག་སྐྱོང་ལེགས་པོར་གནང་བས་མ་ཚད་རྟག་ཏུ་མཉམ་བཞུགས་མཉམ་ཕེབས་གནང་བས་བླ་མ་རིན་པོ་ཆེ་འདི་ཉིད་ཁོང་གིས་ཐུགས་ཟིན་གྱི་ཉེ་བའི་སྲས་སུ་གྱུར། སྤྱི་ལོ་༡༩༤༠ དགུང་གྲངས་བཅུ་བའི་དབྱར་ལོ་འདིར་རྫ་ཕུག་ཁང་དགོན་དུ་རྩོད་བྲལ་མཁས་གྲུབ་ཀྱི་བླ་མ་ཞེ་ཆེན་ཀོང་སྤྲུལ་རིན་པོ་ཆེ་གདན་ཞུས་ལྟར་ཕེབས་ཏེ་ཟླ་བ་དྲུག་གི་དུས་ཡུན་ལ་རིང་བརྒྱུད་བཀའ་མའི་དབང་ལུང་ཡོངས་རྫོགས་དང་སྨིན་གླིང་སྐུ་མཆེད་གཉིས་ཀྱི་བཀའ་འབུམ་གྱི་དབང་ལུང་ཆ་ཚང་། ཞེ་ཆེན་རྒྱལ་ཚབ་བཀའ་འབུམ་གྱི་ཁྲིད་ལུང་བཅས་བསྩལ་སྐབས་ཆད་ལྷག་མེད་པར་གསན་བཞེས་གནང་བ་དང་། མཁན་པོ་ཤེས་རབ་མཆོག་ནི་ཀོང་སྤྲུལ་རིན་པོ་ཆེའི་ནང་གི་ཕྱག་རོགས་སུ་ཡོད་པར་བརྟེན་བླ་མ་རིན་པོ་ཆེ་འདི་ཉིད་ཀྱང་རྒྱུན་དུ་ཀོང་སྤྲུལ་རིན་པོ་ཆེ་དང་མཉམ་བཞུགས་གནང་ཡོད་པས། ཀོང་སྤྲུལ་རིན་པོ་ཆེས་གདམས་ངག་མང་པོ་ཉིན་ལྟར་གནང་སྐྱོང་མཛད་ཡོད་པ་རེད། ༼༩༽ དེ་ནས་དམ་ཆོས་འདུལ་བ་རིན་པོ་ཆེའི་སྒོར་ཞུགས་པའི་ཚུལ་ནི། སྤྱི་ལོ་༡༩༤༡ དགུང་ལོ་བཅུ་གཅིག་པའི་དུས་སུ་བརྟེན་མཁས་ཡོན་ཏན་རྒྱ་མཚོའི་བདག་ཉིད་ཕུག་ཁང་མཁན་རྒན་དགེ་ལེགས་གྲགས་པ་སོགས་གྲངས་ཚང་བའི་དགེ་འདུན་ལས་སྦྱོར་དངོས་རྗེས་གསུམ་ཕུན་སུམ་ཚོགས་པར་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་སྡོམ་པ་ཞུས་ཤིང་དགེ་ལེགས་ཆོས་འཕེལ་ཞེས་རབ་ཏུ་བྱུང་བའི་མཚན་གྱི་ཅོ་པན་སྤྱི་བོར་བཀུར། དུས་འདི་ནས་བཟུང་ཕྱི་སོ་སོར་ཐར་བའི་བསླབ་གཞི་ཕྲ་མོའི་གནང་བཀག་ཅུང་ཟད་ལའང་བླང་དོར་ཚུལ་བཞིན་མཚུངས་པ་ཚངས་པར་སྤྱོད་པས་ཆོས་བཞིན་འདུལ་བ་བཞིན་བྱེད་མཁན་གནས་བརྟན་འདུལ་འཛིན་དམ་པ་འདི་དང་འདྲ་བ་འཛམ་གླིང་སའི་ཁྱོན་ན་ཤིན་ཏུ་དཀོན་པར་སྣང་ཞིང་། ཁྱད་པར་དུ་དགུང་གྲངས་བཅུ་གཅིག་ནས་ད་ལོ་བདུན་བཅུའི་བར་འཆང་བར་འོས་པའི་ཆོས་གོས་རྣམ་གསུམ་དང་ཤེས་རབ་ཀྱི་རྟེན་ཕྱག་དཔེ་འགའ་ཞིག་ལས་ཡོངས་སུ་བཟུང་བའི་དངོས་པོ་ཅི་ཡང་མེད་པ་ཀུན་སྤོང་བྱ་བྲལ་གྱི་སྤྱོད་པ་དང་དུ་བླངས་ནས་མི་ལོ་དྲུག་ཅུར་ཉེ་བར་སྦྱང་བའི་ཡོན་ཏན་གྱི་ཚུལ་ཁྲིམས་གཙང་མ་ལ་གནས་པ་འདི་ལྟ་བུའི་དགེ་སྦྱོང་ཆེན་པོ་དེང་སང་གི་དུས་འདིར་འཇིག་རྟེན་སྣང་བར་བྱེད་པའི་མཛེས་རྒྱན་དུ་གྱུར་ཡོད་པ་རེད། ༼༡༠༽ ད་ནི་རིགས་པའི་གནས་རྣམས་ལ་མཁས་པར་སྦྱོང་བའི་ཚུལ་ནི། སྤྱི་ལོ༡༩༤༢་དགུང་ལོ་བཅུ་གཉིས་སྐབས་སུ་སྐུ་ཞང་མཁན་པོ་ཤེས་རབ་མཆོག་ལས་ཀློང་ཆེན་སྙིང་ཐིག་སྔོན་འགྲོ་རྒྱས་འབྲིང་བསྡུས་གསུམ་གྱི་སྨིན་ཁྲིད་རྒྱས་པར་ཞུས་ནས་སྔོན་འགྲོའི་བསགས་སྦྱོང་ལ་གནད་དུ་ཁེལ་བའི་ཉམས་ལེན་འབད་འབུངས་ལྷོད་མེད་མཐར་ཆགས་སུ་གནང་ཡོད་པ་དང་།…

༄༅། །༧ཀུན་གཟིགས་པན་ཆེན་པདྨ་ཚེ་དབང་ལྷུན་གྲུབ་ རིན་པོ་ཆེའི་རྗེས་དྲན་མ་རིག་མུན་སེལ་ ཞེས་བྱ་བ་བཞུགས་སོ།། ན་མོ་མ་ཧྰ་གུ་རུ་པདྨ་ཛྙྰ་ན་ཡེ། ། གང་མཚན་ཐོས་པས་སྲིད་པའི་མུན་སེལ་བ། །འཇམ་དཔལ་ཡིད་བཞིན་ནོར་བུ་རིན་པོ་ཆེ། ། བསམ་བཞིན་སྲིད་པར་བཟུང་བའི་དགེ་བའི་བཤེས། །ཀུན་གཟིགས་པན་ཆེན་བླ་མས་དུས་ཀུན་སྐྱོངས། ། གང་གི་སྐྱེས་རབས་འོད་གསལ་སྙིང་པོ་ལས། །བསྟན་པའི་ཕྲིན་ལས་མུ་མཐའ་རྒྱ་མཚོའི་འཇིངས། ། བླུན་རྨོངས་བདག་གིས་གཞལ་བར་མི་ནུས་ཀྱང་། །དད་གུས་ཆུ་ཐིགས་ཙམ་དུ་མཆོད་འབུལ་སྤྲོ། ། ཆུ་བཞི་སྒང་དྲུག་ནང་ཚན་ས་སྐྱོང་རྗེ། །སྡེ་དགེའི་རྒྱལ་ཁབ་འབྲོག་སྡེ་ལྷོ་བྱང་དུ། ། ཀུན་གཟིགས་པན་ཆེན་པདྨ་ཚེ་དབང་གི ། ལྷུན་གྲུབ་རིག་འཛིན་སྐུ་ཡི་རྡོ་རྗེ་བལྟམས། ། ངོ་མཚར་འབུམ་གྱིས་གཏམས་པའི་གངས་ཅན་ལྗོངས། །ཤར་ཕྱོགས་མདོ་ཁམས་བོད་ཡུལ་ཟླ་རྒྱུད་དུ། ། རབ་ཚེས་སྐྱེས་བདག་ཟླ་ཚེས་དགེ་བའི་ཆར། །གྲགས་པ་རྒྱལ་མཚན་དཀར་ལྷའི་རྟེན་འབྲེལ་སྨིན། ། ཆུང་ནས་དགེ་བའི་བག་ཆགས་ཡོངས་སད་དེ། །དགེ་སློང་གནས་བརྟན་རྗེ་ལྟར་ཞི་དུལ་གྱི། ། བག་ཡོད་བཟང་པོ་སྤྱོད་པའི་རྣལ་འབྱོར་པ། །ཆོས་མཆོག་བཟོད་པའི་ཏིང་འཛིན་ངང་དུ་བཞུགས། ། དགུང་བརྒྱད་སོན་སྐབས་སློབ་དཔོན་དཀོན་བསྟན་ལས། །ཟླ་གཅིག་རིང་དུ་བོད་ཡིག་ཀློག་འདོན་གྱིས། ། དཀའ་ཚེགས་མེད་པར་སློབ་སྦྱོང་བྱང་ཆུབ་ནས། །བདེ་ཆེན་ཆོས་འཁོར་ལྷུན་པོའི་ཚོགས་གྲལ་ཞུགས། ། ཤེས་རབ་དད་བརྩོན་ཆེ་བའི་ཚད་དུ་གླེང་། །སྔ་འགྱུར་བཀའ་འབུམ་སྨིན་གླིང་སྐུ་མཆེད་གསུང་། ། ཡོངས་རྫོགས་དབང་ལུང་ཁྲིད་རྒྱུན་མན་ངག་བཅས། །ཞེ་ཆེན་ཀོང་སྤྲུལ་མདུན་ནས་ཆ་ཚང་གསན། ། ཁྱད་པར་བརྟན་མཁས་ཡོན་ཏན་རྒྱ་མཚོའི་བདག །མཁན་ཆེན་དགེ་ལེགས་གྲགས་པའི་ཞལ་སྔ་ནས། ། ངེས་འབྱུང་རྣལ་མའི་རབ་བྱུང་སྡོམ་པ་ཞུས། །དགེ་ལེགས་ཆོས་འཕེལ་མཚན་གྱི་ཅོད་པན་བཞེས། ། དེ་ནས་བཟུང་སྟེ་སྐུ་ཚེ་གང་བོར་རུ། །སོ་ཐར་བསླབ་གཞི་ཕྲ་མོའི་གནང་བཀག་ཀུན། ། ཚུལ་བཞིན་ཉམས་སུ་བཞེས་པའི་དགེ་བའི་བཤེས། །དམ་པ་གོང་མའི་རྣམ་ཐར་བདག་གིར་མཛད། ། དྲན་པའི་མཁར་རྫོང་བརྟན་པའི་དགྲ་བཅོམ་པ། །ཤེས་བཞིན་བྱ་ར་མཁས་པའི་བྱང་ཆུབ་སེམས། ། གསང་ཆེན་སྦས་པའི་རྣལ་འབྱོར་རྡོ་རྗེ་འཆང་། །ངེས་དོན་རྒྱལ་བའི་སྲས་པོ་ཡོངས་སུ་གྲགས། ། ཡེ་རྫོགས་གདོད་མའི་མགོན་དུ་སངས་རྒྱས་ཀྱང་། །ཕྱི་ནང་གསང་བའི་ཟབ་གནད་ཡོངས་ཁེལ་བའི། ། ཀློང་ཆེན་སྙིང་ཐིག་སྔོན་འགྲོར་བསགས་སྦྱང་ཀུན། །མ་ནོར་ཉམས་ལེན་མཛད་པ་མཐར་ཕྱིན་གནང༌། ། བརྒྱུད་པའི་ཕྱག་བཞེས་ཀུན་ལ་བྱང་ཆུབ་ནས། །རྩིས་གཞུང་རྒྱས་པ་བཻ་དཀར་ཆ་ལག་བཅས། ། མཁས་ཤིང་མཛུབ་ཁྲིད་བྱེད་གྲུབ་ཟུང་འབྲེལ་གྱི། །དབྱངས་འཆར་རིག་པའི་གཏེར་མཛོད་ཁྱེད་ལ་དབང་། ། རྫ་རྒྱུད་གདོད་མའི་མགོན་པོ་ཀུན་ཏུ་བཟང་། །གྲུབ་དབང་དཔལ་སྤྲུལ་ནམ་མཁའ་འཇིགས་མེད་ལས། ། འོད་གསལ་གསང་བའི་སྙིང་ཐིག་ཆོས་སྐོར་ཀྱི། །སྨིན་གྲོལ་མན་ངག་བཀའ་དབང་ཡོངས་རྫོགས་གནང་། ། སེམས་དཔའི་རིགས་རྒྱུད་དམ་པའི་སྐྱེས་བུ་ཉིད། །སྒྲ་ཚིག་རང་མཚན་སྦྱང་པར་མི་དགོས་ཀྱང་། ། ཀ་ཙན་དབྱངས་ཅན་སྡེབ་སྦྱོར་ལེགས་སྦྱང་ནས། །ཚད་མའི་དེ་ཉིད་མཁྱེན་པ་ཕུལ་བྱུང་གྱུར། ། གར་ཐིག་སྒྱུ་འཕྲུལ་བཟོ་ཡི་རིག་གནས་དང་། །གསོ་བྱེད་རིག་པའི་གཞུང་ལུགས་དེ་ཉིད་མཐོང་། །…