ཨེ་ཝྃ་ཧོ།

བཀོད་པ་བཞུགས་སོ།། ༡༽འཁྲུངས་པའི་ཡུལ།༢༽རིགས་ཕུན་སུམ་ཚོགས་པ།༣༽གང་གིས་བསྐྱེད་པའི་ཡབ་ཡུམ།༤༽གང་དུ་བལྟམས་པའི་གནས།༥༽སྐུ་འཁྲུངས་པའི་དུས་ཕུན་སུམ་ཚོགས་པ།༦༽གང་ཞིག་འཁྲུངས་པའི་སྟོན་པ་ཕུན་སུམ་ཚོགས་པ།༧༽ལོ་ཆུང་བྱིས་པའི་སྐབས་ཀྱི་གནས་སྣང་ངོ་མཚར་བ།༨༽ལེགས་ཚོགས་ཀུན་གྱི་འབྱུང་གནས་ཡོན་ཏན་སྦྱོང་ཚུལ།༩༽དམ་ཆོས་འདུལ་བ་རིན་པོ་ཆེའི་སྒོར་ཞུགས་པའི་ཚུལ།༡༠༽རིགས་པའི་གནས་རྣམས་ལ་མཁས་པར་སྦྱོང་བའི་ཚུལ།༡༡༽སྙིང་ཐིག་སྔོན་འགྲོའི་བློ་སྦྱོང་ཉམས་ལེན་ཇི་ལྟར་གནང་ཚུལ།༡༢༽གཙུག་ལག་རྩིས་ཀྱི་སྐོར་ལ་ཇི་ལྟར་མཁས་པར་སྦྱོང་བའི་ཚུལ།༡༣༽འཕགས་ཆེན་སྤྲུལ་པའི་གང་ཟག་ཆེན་པོ་ཡིན་པར་རྡོ་རྗེའི་ལུང་།༡༤༽སམ་སྐྲྀ་ཏའི་སྐད་ལ་ཇི་ལྟར་མཁས་པར་སྦྱོང་བའི་ཚུལ།༡༥༽བཟོ་རིགས་སྣ་ཚོགས་ལ་ཇི་ལྟར་མཁས་པར་སྦྱོང་བའི་ཚུལ།༡༦༽འཕགས་བོད་ཀྱི་གཞུང་ཆེན་རྣམས་ལ་ཐོས་བསམ་སྒོམ་པ་མཛད་ཚུལ།༡༧༽བྱང་ཆུབ་སེམས་དཔའི་བསླབ་པ་རིན་པོ་ཆེ་ཉམས་སུ་བླངས་ཚུལ།༡༨༽ཉམས་རྟོགས་ཟབ་མོ་ཇི་ལྟར་ཐུགས་རྒྱུད་ལ་འཁྲུངས་པའི་ཚུལ།༡༩༽བསྙེན་རྫོགས་སྡོམ་པ་ཇི་ལྟར་ཐོབ་ཡོད་པའི་ཚུལ།༢༠༽སྐུ་མཚམས་སུ་བཞུགས་ནས་སྒྲུབ་པ་ཉམས་ལེན་གནང་ཚུལ།༢༡༽བསྟན་འགྲོའི་དོན་ཆེན་ཇི་ལྟར་མཛད་ཚུལ།༢༢༽ཐུགས་སྲས་སློབ་འབངས་རྣམས་ཇི་ལྟར་སྐྱོང་ཚུལ།༢༣༽ཕྱོགས་མེད་འགྲོ་དོན་ཆེན་པོ་ཇི་ལྟར་གནང་བའི་ཚུལ། ༄༅། །ན་མོ་གུ་ར་ཝེ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐྱབས་གནས་ཀུན་འདུས་དཔལ་ལྡན་རྩ་བའི་བླ་མ་རིན་པོ་ཆེའི་སྐུ་གསུང་ཐུགས་ཀྱི་རྣམ་ཐར་ཡོན་ཏན་ཡང་ནས་ཡང་དུ་དྲན་པར་བྱས་ན་ཕྱོགས་དུས་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་རང་རྒྱུད་ལ་མྱུར་དུ་འཇུག་པ་དང་ལས་ཉོན་ཀུན་རྨོངས་ཀྱི་སྡིག་སྒྲིབ་མ་ལུས་པ་བྱང་ནས་བསོད་ནམས་དང་ཡེ་ཤེས་ཀྱི་ཚོགས་གཉིས་མཉམ་དུ་རྫོགས་པར་འགྱུར་བ་དང་ཁྱད་པར་རྫོགས་པ་ཆེན་པོ་རིག་པ་རང་བྱུང་གི་ཡེ་ཤེས་མངོན་དུ་བྱ་བའི་ཕྱིར་གསང་སྔགས་རྡོ་རྗེ་ཐེག་པའི་ལམ་གྱི་རྩ་བ་དག་སྣང་བླ་མའི་རྣལ་འབྱོར་ལ་གནད་དུ་བསྣུན་དགོས་པ་མདོ་རྒྱུད་ཀུན་ལས་གསུང་བ་ལྟར་རང་གཞན་རྣམས་ཀྱི་སེམས་ལ་མོས་གུས་དང་དག་སྣང་གོང་ནས་གོང་དུ་འཕེལ་བའི་ཆེད་དུ་བླ་མ་རིན་པོ་ཆེའི་རྣམ་ཐར་དྲང་པོར་བརྗོད་པར་བྱའོ།། ༼༡༽ ཆོས་རྗེ་དམ་པ་མཆོག་ཉིད་གང་དུ་འཁྲུངས་པའི་ཡུལ་ལྗོངས་ཕུན་སུམ་ཚོགས་པ་ནི། དེ་ཡང་བོད་གངས་ཅན་ལྗོངས་ཀྱི་ཤར་ཕྱོགས། སྨད་མདོ་ཁམས་ཆུ་བཞི་སྒང་དྲུག་གི་ནང་ཚད་འཛམ་གླིང་ཡོངས་གྲགས་ཀྱི་ཆུ་བོ་ཆེན་པོ། གཡོན་དུ་རྨ་ཆུ་སྔོན་མོ་དང་། གཡས་སུ་རྫ་ཆུ་བསིལ་མའི་ཆུ་རྒྱུན་ནུབ་ནས་ཤར་དུ་དལ་གྱིས་འབབ་པའི་ལྷོ་བྱང་གཉིས་ཀྱི་དབུས་ཀྱི་ས་ཁུལ་ལ། རྨ་རྫ་སྒང་ཞེས་མཁས་གྲུབ་སྐྱེས་བུ་མང་པོས་བྱིན་གྱིས་བརླབས་ཤིང་། དཀར་ཕྱོགས་གཞི་བདག་མང་པོས་ཡོངས་སུ་སྲུང་བ། མཁའ་རླུང་གཙང་ཞིང་ནད་འཇོམས་སྨན་རིགས་སྣ་ཚོགས་སྐྱེས་པ། རྩ་ཆེའི་རི་སྐྱེས་སྲོག་ཆགས་སྡེ་ཚན་ཧ་ཅང་མང་པོ་བག་ཡངས་ཞི་བར་རྒྱུ་བ་སོགས་མཐོང་དཀོན་པའི་འཁོར་ཡུག་གི་མཛེས་ཆོས་ཡོངས་སུ་རྫོགས་པའི་གནས་ཡུལ་གྱི་བཀོད་པ་ཕུན་སུམ་ཚོགས་པའོ། ། ༼༢༽ གང་ལས་མཆེད་པའི་རིགས་ཕུན་སུམ་ཚོགས་པ་ནི། དུས་རབས་བཅོ་ལྔ་བ། རབ་བྱུང་བཅུ་བའི་ནང་ས་གནས་འདིར་གསར་དུ་གཞིས་ཆགས་པའི་མདོ་ཁམས་ཨ་རིག་སྡེ་བའི་ནི་གླིང་གི་མི་རྒྱུད་བློ་གྲོས་དང་དཔའ་རྩལ་ཤིན་ཏུ་ཆེ་ཞིང་མི་གཤིས་བཟང་པོའི་རིགས་རུས་རྒྱུན་མ་ཆད་པ་རིམ་པར་མཆེད་པ་ལས། དུས་རབས་བཅུ་བདུན་པ། རབ་བྱུང་བཅུ་བཞི་བའི་སྐབས་དེར་དབང་གྲགས་ཡོད་པའི་ཁྱིམ་བདག་ཕྱུག་པོ་རྒྱ་གར་ཞེས་པ་དེ། གཏེར་ཆེན་ཁྲག་འཐུང་བདུད་འཇོམས་གླིང་པ་སྐུ་ན་གཞོན་དུས་ཁྱིམ་དུ་གདན་འདྲེན་ཞུས་ནས་མདོ་ཆེན་བྲ་ནག་རྟིང་དཀར་སོགས་དགུ་ཚན་དགུའི་མཎྜལ་འབུལ་ལམ་ཞུས་པས་ཐུགས་དགྱེས་པ་ཆེན་པོས་ཁྱེད་ཀྱི་མིང་ནི་ཨ་རིག་རྒྱ་གར་ཞེས་ཆོས་ཀྱི་འབྱུང་གནས་འཕགས་ཡུལ་གྱི་མཚན་གྱིས་བརྒྱན་པ་དང་མདོ་ཆེན་བྲ་ནག་རྟིང་དཀར་འདི་ནི་ཆོས་སྐྱོང་གཟའ་ལྷ་ཤན་གསུམ་གྱི་བླ་རྟ་རུ་འོས་པས་འབྱུང་འགྱུར་ཁོ་བོས་ཟབ་གཏེར་སྒོ་བརྒྱ་འབྱེད་པའི་རྟེན་འབྲེལ་ལེགས་འགྲིག་བྱུང་བར་བརྟེན། ཨ་རིག་རྒྱ་གར་ཁྱེད་ཀྱི་མི་རབས་མི་རྒྱུད་ཐམས་ཅད་བསྟན་སྲུང་གཟའ་ལྷ་ཤན་གསུམ་གྱི་སྐྱབས་འོག་ལས་མི་འདའ་བའི་བཀའ་ཡི་གཉེར་གཏད་ཡོད་ཅེས་གསུངས་པ་ལྟར་རིགས་ཕུན་སུམ་ཚོགས་པའོ།། ༼༣༽ གང་གིས་བསྐྱེད་པའི་ཡབ་ཡུམ་ཕུན་སུམ་ཚོགས་པ་ནི། དེ་ནས་བཟུང་ཟབ་གཏེར་བསྟན་པ་སྤེལ་བའི་འཕྲིན་ལས་ཀྱི་ཁ་ལོ་བ་ཆེན་པོ་སྦྱིན་བདག་ཨ་རིག་རྒྱ་གར་མཆོག་གི་སྐུ་སྲས་ཡོངས་ཀྱི་ཐུ་བོ་རིག་སྔགས་འཆང་བ་གྲགས་པ་རྒྱལ་མཚན་ཞེས་སྐུ་ན་ཆུང་དུས་ནས་ཟབ་མོ་བླ་མའི་རྣལ་འབྱོར་གྱི་དྲོད་རྟགས་མངོན་དུ་གྱུར་ཏེ་རྒྱུན་དུ་དག་པའི་སྣང་བ་དང་འབྲལ་མེད་བརྟུལ་ཞུགས་སྤྱོད་པའི་ཉམས་ལེན་ལ་བརྩོན་པར་མཛད་པས། འབྲས་བུ་ཡིད་སྨོན་དུ་མ་ལུས་པའི་དངོས་གྲུབ་མངོན་སུམ་དུ་བརྙེད་ནས་དགུང་ལོ་བདུན་ཅུའི་དུས་ཞི་བར་གཤེགས་པའི་སྐབས་དེར། སེང་གེ་དཀར་མོ་ལ་ཞོན་ནས་ཤར་ཕྱོགས་མངོན་པར་དགའ་བའི་ཞིང་ཁམས་སུ་ཕེབས་སོང་བ་རྩོད་མེད་ཡོངས་་གྲགས་ཀྱི་གཏེར་སྟོན་དཔལ་སྤྲུལ་ནམ་མཁའ་འཇིགས་མེད་ལ་ཡང་ཟག་བྲལ་དག་པའི་སྤྱན་གྱིས་གཟིགས་སྣང་བྱུང་ཡོད་པ་རེད། དེ་ལྟར་ཉམས་རྟོགས་ཀྱི་གདེངས་དང་ལྡན་པའི་རྣལ་འབྱོར་པ་ཡབ་ཆེན་གྲགས་པ་རྒྱལ་མཚན་དེ་ཉིད་དགུང་གྲངས་སུམ་ཅུའི་དུས་སུ། རྩ་བའི་བླ་མའི་བཀའ་ལུང་དང་གཙུག་ལག་རྩིས་ཀྱི་མཐུན་སྦྱོར་ལྟར། ཞི་འཇམ་བྱམས་བརྩེའི་ཀུན་སྤྱོད་ཀྱིས་བརྒྱན་པའི་རིགས་བཟང་གི་མཁའ་འགྲོ་མ་དཀའ་ལྡོག་ལྷ་མོ་ཞེས་བྱ་བ་ཁབ་ཏུ་བཞེས་ནས། ཡབ་ཡུམ་གཉིས་ཀྱིས་ཆོས་མཐུན་བསོད་ནམས་ཀྱི་ལས་ལ་འབད་བཞིན་གཉུག་མར་གནས་པ་ལས་ལྕམ་སྲིང་གཉིས་འཁྲུངས་ཞིང་སྲིད་པའི་ཕུན་ཚོགས་ཀྱི་དཔལ་ཡོན་འཕེལ་ཞིང་རྒྱས་པར་གྱུར་ཏོ། ། ༼༤༽གང་དུ་བལྟམས་པའི་གནས་ཕུན་སུམ་ཚོགས་པ་ནི། སྡེ་དགེའི་ཆོས་རྒྱལ་བསྟན་པ་ཚེ་རིང་གི་མངའ་རིང་རོང་སྡེ་རྫོང་ཁག་ཉེར་ལྔ་དང་འབྲོག་སྡེ་ལྷོ་བྱང་གཉིས་སུ་ཡོད་དབྱེ་བའི་བྱང་སྡེ་རྫ་ཆུ་ཁ་ཞེས་ཡུལ་ཕྱོགས་སྐྱོང་བའི་དགེ་བསྙེན་རྫ་རྒྱལ་རྡོ་རྗེ་འཕེན་ཕྱུག་གིས་སྲུང་བའི་མདོ་ཁམས་ས་ཡི་རྩེ་མོ། ཡོངས་སུ་གྲགས་པའི་མཁས་གྲུབ་ཆེན་པོ་འཇིགས་མེད་རྒྱལ་བའི་མྱུ་གུ། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ། རྒྱལ་སྲས་གཞན་ཕན་མཐའ་ཡས། འཇམ་མགོན་མི་ཕམ་ཕྱོགས་ལས་རྣམ་རྒྱལ། མཁས་དབང་རྒྱ་སྐོང་མཁན་པོ་གཞན་དགའ། ལྕང་མའི་མཁན་ཆེན་ཐུབ་དགའ་ཡིད་བཞིན་ནོར་བུ་སོགས་སྐྱེས་བུ་དམ་པ་མང་པོ་སྐུ་འཁྲུངས་པའི་གནས་མཆོག་བཟང་པོ་དེ་ལས་དགེ་རྩེ་ཨ་རིག་རྫ་བ་ཞེས་ཕུན་ཚོགས་སྡེ་བཞིས་ཕྱུག་པའི་འབྲོག་སྡེ་ཆེན་པོ་དག་གི་དབྱར་ཀའི་མཚེར་ས་ཡུལ་སྐྱོང་ཟོ་དོར་གཉེན་པོ་རྫ་གར་སོགས་ལྷུན་བརྗིད་རི་བོ་མཐོན་པོས་གཡས་ནས་བསྐོར་ཞིང་། དྭངས་བསིལ་མཚོ་དང་མཚེའུ་བརྒྱ་ཕྲག་དུ་མས་གཡོན་ནས་བསྐོར་བའི། དལ་འབབ་གཙང་ཆབ་རིང་མོའི་ཆུ་མགོ །ན་ཐང་པདྨ་བཞད་པའི་ནེའུ་གསེང་། སྣ་ཚོགས་མེ་ཏོག་བཀྲ་བའི་དགའ་ཚལ། ཕུན་ཚོགས་འཇིག་རྟེན་ཁྱོན་གྱི་མཛེས་ལྗོངས་རྣམ་པར་བཀྲ་བའི་ས་ཡི་ཐིག་ལེ་དེར། ། ༼༥༽ ནམ་ཞིག་སྐུ་འཁྲུངས་པའི་དུས་ཕུན་སུམ་ཚོགས་པ་ནི། དུས་དེའི་ཚེ་ན་ཡབ་དང་ཡུམ་གཉིས་ལ་དགེ་བའི་སྣང་བ་དུ་མ་བྱུང་ཞིང་ཡུམ་ཡང་སྦྲུམ་པ་དང་ལྡན་པར་གྱུར་པས་ལྷ་དང་བླ་མའི་རྟགས་ལུང་ལྟར་བསོད་ནམས་རིམ་གྲོ་ཕུན་སུམ་ཚོགས་པ་སྒྲུབ་པ་ལ་སྒོ་ཀུན་ནས་འབད་པ་དུ་མས་ཞུགས་པར་བྱས་སོ། ། སྤྱི་ལོ་༡༩༣༡་དེ་ནས་རབ་བྱུང་བཅུ་དྲུག་པའི་སྐྱེས་བདག་ཅེས་པ་ལྕགས་མོ་ལུག་གི་ལོ། སྟོན་པ་ཐུགས་རྗེ་ཅན་གྱིས་ཟག་མེད་ཆོས་ཀྱི་འཁོར་ལོ་བསྐོར་བའི་དུས་ཆེན་ཏེ་བོད་ཟླ་དྲུག་པའི་འཕེལ་ཕྱོགས་ཀྱི་ཚེས་བཞིའི་ཉི་ཤར་འབྲུག་གི་སྔ་ཆ་བཟང་པོ་ལ། ། ༼༦༽ གང་ཞིག་འཁྲུངས་པའི་སྟོན་པ་ཕུན་སུམ་ཚོགས་པ་ནི། མཁའ་ཁྱབ་སེམས་ཅན་ཀུན་གྱི་མགོན་དང་སྐྱབས་སུ་གྱུར་པའི་ཕྱི་ལྟར་དགེ་བའི་བཤེས་གཉེན་ལོ་ཆེན་དྷརྨ་ཤྲི། ནང་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མཁན་ཆེན་བོ་དྷི་ས་ཏྭ་ཤནྟ་རཀྵི་ཏ། གསང་བ་རྒྱལ་ཀུན་བཀའ་ཡི་སྡུད་པོ་མཁྱེན་རབ་འཇམ་དཔལ་གཞོན་ནུ་སྟེ་རྣམ་གསུམ་དབྱེར་མེད་པའི་སྔོན་གྱི་ཐུགས་བསྐྱེད་སྨོན་ལམ་ཟབ་མོའི་མཐུ་ལས་མཁྱེན་བརྩེ་ནུས་པའི་སྒྱུ་འཕྲུལ་གདུལ་བར་བྱ་བའི་ཁམས་དབང་དང་མཐུན་པར་སྤྲུལ་པའི་རང་གཟུགས་བདག་ཅག་རྣམས་ལ་བསོད་ནམས་ཀྱི་དཔལ་དུ་དུས་ལས་གཡོལ་མེད་དུ་ཤར་བ་འདི་ཉིད་ནི། མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན། འཛམ་གླིང་འགྲོ་བའི་ལམ་སྟོན་རྨད་བྱུང་མཁས་གྲུབ་བྱེ་བའི་གཙུག་རྒྱན། ༧ སྐྱབས་རྗེ་ཆོས་ཀྱི་རྒྱལ་པོ་ཀུན་མཁྱེན་གནས་ལྔ་རིག་པའི་མ་ཧཱ་པཎྜི་ཏ་རྗེ་བཙུན་འཇམ་མགོན་བླ་མ་མཁན་ཆེན་ཡིད་བཞིན་ནོར་བུ་པདྨ་ཚེ་དབང་ལྷུན་གྲུབ་རིན་པོ་ཆེ་མཆོག་ཉིད་ངོ་མཚར་དགེ་བའི་རྟེན་འབྲེལ་བཟང་པོའི་སྣང་བ་དང་བཅས་ལྷར་བཅས་འགྲོ་བ་ཡོངས་ཀྱི་དཔལ་མགོན་དུ་སྐུ་འཁྲུངས་སོ། ། ༼༧༽ ལོ་ཆུང་བྱིས་པའི་སྐབས་ཀྱི་གནས་སྣང་ངོ་མཚར་བ་ནི། དེ་ནས་སྔོན་གྱི་དགེ་བའི་བག་ཆགས་ཆུང་དུས་ནས་སད་དེ་དགེ་སློང་གནས་བརྟན་རྒན་པོའི་མཛད་སྤྱོད་ལྟར་རྟག་ཏུ་ཁུ་སིམ་མེ། ཞི་འཇམ་བྱམས་བརྩེའི་སྤྱོད་ལམ་འབའ་ཞིག་གནང་བ་ལས་ཐ་མལ་བྱིས་པའི་ཀུན་སྤྱོད་ལྟར་སྨྲེ་ངག་གི་ངུ་བ་དང་། མ་བརྟགས་པའི་མཆོང་རྒྱུག །ཁོང་ཁྲོ་བའི་འཁྲུག་རྩོད་སོགས་གཏན་ནས་མི་གནང་བས་ཉེ་འཁོར་ཀུན་གྱིས་ཡིད་དུ་འོང་བའི་བྱིས་པ་ཆུང་ཆུང་འདི་ནི་ལོ་ན་དྲུག་ཅུ་ཟིན་པའི་རྒན་པོ་ལས་ལྷག་པའི་བག་ཡོད་ཀྱི་སྤྱོད་བཟང་ལ་ལྟོས་ཞེས། དེ་ཕྱོགས་སྐྱེ་བོ་ཀུན་གྱིས་བསྔགས་ཤིང་ཁ་སྨོན་གཅེས་བཀུར་བྱེད་སའི་མིག་དཔེ་བཟང་པོ་ཞིག་ཏུ་གྱུར། འོན་ཀྱང ༡༩༣༣་དགུང་ལོ་གཉིས་ཀྱི་སྐབས་སུ་སྐྱེད་ཡུམ་མཆོག་ཞིང་ལ་ཕེབས་པར་བརྟེན་ཆོས་རྗེ་དམ་པ་འདི་ཉིད་དགུང་གྲངས་བརྒྱད་མ་ལོན་བར་དུ་ཡབ་ཀྱིས་ཤིན་ཏུ་བྱམས་བརྩེ་ཆེན་པོས་ཉེ་བར་བསྐྱངས་ནས་བྱིས་པའི་ཤེས་རབ་འཕེལ་བའི་ཐུན་མོང་མ་ཡིན་པའི་བྱིན་རླབས་ཀྱི་རྟེན་འབྲེལ་བཟང་པོ་གནང་ཡོད་པ་རེད། ༼༨༽ ལེགས་ཚོགས་ཀུན་གྱི་འབྱུང་གནས་ཡོན་ཏན་བཟང་པོ་སྦྱོང་མགོ་བཙུགས་པའི་ཚུལ་ནི། སྤྱི་ལོ་༡༩༣༨་ལོ་དགུང་ལོ་བརྒྱད་ཀྱི་སྐབས་ཀློག་གི་སློབ་དཔོན་དཀོན་མཆོག་བསྟན་འཛིན་ལས་ཟླ་བ་གཅིག་གི་རིང་བོད་ཀྱི་དབྱངས་གསལ་ཡི་གེ་ལ་སློབ་སྦྱོང་གནང་བས་བརྡ་བསྟན་པ་ཙམ་གྱིས་དཀའ་ཚེགས་མེད་པར་བདེ་བླག་ཏུ་ལྗགས་ཀློག་ལེགས་པར་བྱང་ཆུབ་ནས། ལོ་འདིར་དགོན་པའི་འདོན་ཆོག་པུ་ཏི་ཀ་དུ་མ་ཐུགས་འཛིན་གནང་བས་ཀློག་བཟང་བའི་ཚད་དུ་གྱུར། སྤྱི་ལོ་༡༩༣༨་༩དགུང་ལོ་དགུ་བའི་སྐབས་སུ་འབྲི་ཀློག་ལེགས་པར་མཐར་ཕྱིན་པ་དང་རྒྱལ་བ་ཞེ་ཆེན་པའི་དགོན་ལག་ཆེ་ཤོས་ཨོ་རྒྱན་སྨིན་གྲོལ་གླིང་གི་ཕྱག་བཞེས་འཁྲུལ་མེད་དུ་སྐྱོང་བའི་ཆོས་སྡེ་ཆེན་པོ་རྫ་ཕུག་ཁང་དགོན་བདེ་ཆེན་ཆོས་འཁོར་ལྷུན་པོ་ལ་ཚོགས་ཞུགས་བྱས་ཤིང་། དུས་མཚུངས་སུ་ཨ་འཛོམས་འབྲུག་པ་སྣ་ཚོགས་རང་གྲོལ་གྱི་དངོས་སློབ་ཕུག་ཁང་མཁན་པོ་ཤེས་རབ་མཆོག་ནི་འདི་བའི་སྐུ་ཞང་ཡིན་པར་བརྟེན་དུ་ནས་བཟུང་སྟེ་སྐུ་ཞང་མཁན་པོས་གང་ཅིའི་ཐད་ནས་བདག་སྐྱོང་ལེགས་པོར་གནང་བས་མ་ཚད་རྟག་ཏུ་མཉམ་བཞུགས་མཉམ་ཕེབས་གནང་བས་བླ་མ་རིན་པོ་ཆེ་འདི་ཉིད་ཁོང་གིས་ཐུགས་ཟིན་གྱི་ཉེ་བའི་སྲས་སུ་གྱུར། སྤྱི་ལོ་༡༩༤༠ དགུང་གྲངས་བཅུ་བའི་དབྱར་ལོ་འདིར་རྫ་ཕུག་ཁང་དགོན་དུ་རྩོད་བྲལ་མཁས་གྲུབ་ཀྱི་བླ་མ་ཞེ་ཆེན་ཀོང་སྤྲུལ་རིན་པོ་ཆེ་གདན་ཞུས་ལྟར་ཕེབས་ཏེ་ཟླ་བ་དྲུག་གི་དུས་ཡུན་ལ་རིང་བརྒྱུད་བཀའ་མའི་དབང་ལུང་ཡོངས་རྫོགས་དང་སྨིན་གླིང་སྐུ་མཆེད་གཉིས་ཀྱི་བཀའ་འབུམ་གྱི་དབང་ལུང་ཆ་ཚང་། ཞེ་ཆེན་རྒྱལ་ཚབ་བཀའ་འབུམ་གྱི་ཁྲིད་ལུང་བཅས་བསྩལ་སྐབས་ཆད་ལྷག་མེད་པར་གསན་བཞེས་གནང་བ་དང་། མཁན་པོ་ཤེས་རབ་མཆོག་ནི་ཀོང་སྤྲུལ་རིན་པོ་ཆེའི་ནང་གི་ཕྱག་རོགས་སུ་ཡོད་པར་བརྟེན་བླ་མ་རིན་པོ་ཆེ་འདི་ཉིད་ཀྱང་རྒྱུན་དུ་ཀོང་སྤྲུལ་རིན་པོ་ཆེ་དང་མཉམ་བཞུགས་གནང་ཡོད་པས། ཀོང་སྤྲུལ་རིན་པོ་ཆེས་གདམས་ངག་མང་པོ་ཉིན་ལྟར་གནང་སྐྱོང་མཛད་ཡོད་པ་རེད། ༼༩༽ དེ་ནས་དམ་ཆོས་འདུལ་བ་རིན་པོ་ཆེའི་སྒོར་ཞུགས་པའི་ཚུལ་ནི། སྤྱི་ལོ་༡༩༤༡ དགུང་ལོ་བཅུ་གཅིག་པའི་དུས་སུ་བརྟེན་མཁས་ཡོན་ཏན་རྒྱ་མཚོའི་བདག་ཉིད་ཕུག་ཁང་མཁན་རྒན་དགེ་ལེགས་གྲགས་པ་སོགས་གྲངས་ཚང་བའི་དགེ་འདུན་ལས་སྦྱོར་དངོས་རྗེས་གསུམ་ཕུན་སུམ་ཚོགས་པར་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་སྡོམ་པ་ཞུས་ཤིང་དགེ་ལེགས་ཆོས་འཕེལ་ཞེས་རབ་ཏུ་བྱུང་བའི་མཚན་གྱི་ཅོ་པན་སྤྱི་བོར་བཀུར། དུས་འདི་ནས་བཟུང་ཕྱི་སོ་སོར་ཐར་བའི་བསླབ་གཞི་ཕྲ་མོའི་གནང་བཀག་ཅུང་ཟད་ལའང་བླང་དོར་ཚུལ་བཞིན་མཚུངས་པ་ཚངས་པར་སྤྱོད་པས་ཆོས་བཞིན་འདུལ་བ་བཞིན་བྱེད་མཁན་གནས་བརྟན་འདུལ་འཛིན་དམ་པ་འདི་དང་འདྲ་བ་འཛམ་གླིང་སའི་ཁྱོན་ན་ཤིན་ཏུ་དཀོན་པར་སྣང་ཞིང་། ཁྱད་པར་དུ་དགུང་གྲངས་བཅུ་གཅིག་ནས་ད་ལོ་བདུན་བཅུའི་བར་འཆང་བར་འོས་པའི་ཆོས་གོས་རྣམ་གསུམ་དང་ཤེས་རབ་ཀྱི་རྟེན་ཕྱག་དཔེ་འགའ་ཞིག་ལས་ཡོངས་སུ་བཟུང་བའི་དངོས་པོ་ཅི་ཡང་མེད་པ་ཀུན་སྤོང་བྱ་བྲལ་གྱི་སྤྱོད་པ་དང་དུ་བླངས་ནས་མི་ལོ་དྲུག་ཅུར་ཉེ་བར་སྦྱང་བའི་ཡོན་ཏན་གྱི་ཚུལ་ཁྲིམས་གཙང་མ་ལ་གནས་པ་འདི་ལྟ་བུའི་དགེ་སྦྱོང་ཆེན་པོ་དེང་སང་གི་དུས་འདིར་འཇིག་རྟེན་སྣང་བར་བྱེད་པའི་མཛེས་རྒྱན་དུ་གྱུར་ཡོད་པ་རེད། ༼༡༠༽ ད་ནི་རིགས་པའི་གནས་རྣམས་ལ་མཁས་པར་སྦྱོང་བའི་ཚུལ་ནི། སྤྱི་ལོ༡༩༤༢་དགུང་ལོ་བཅུ་གཉིས་སྐབས་སུ་སྐུ་ཞང་མཁན་པོ་ཤེས་རབ་མཆོག་ལས་ཀློང་ཆེན་སྙིང་ཐིག་སྔོན་འགྲོ་རྒྱས་འབྲིང་བསྡུས་གསུམ་གྱི་སྨིན་ཁྲིད་རྒྱས་པར་ཞུས་ནས་སྔོན་འགྲོའི་བསགས་སྦྱོང་ལ་གནད་དུ་ཁེལ་བའི་ཉམས་ལེན་འབད་འབུངས་ལྷོད་མེད་མཐར་ཆགས་སུ་གནང་ཡོད་པ་དང་།…

༄༅། །༧ཀུན་གཟིགས་པན་ཆེན་པདྨ་ཚེ་དབང་ལྷུན་གྲུབ་ རིན་པོ་ཆེའི་རྗེས་དྲན་མ་རིག་མུན་སེལ་ ཞེས་བྱ་བ་བཞུགས་སོ།། ན་མོ་མ་ཧྰ་གུ་རུ་པདྨ་ཛྙྰ་ན་ཡེ། ། གང་མཚན་ཐོས་པས་སྲིད་པའི་མུན་སེལ་བ། །འཇམ་དཔལ་ཡིད་བཞིན་ནོར་བུ་རིན་པོ་ཆེ། ། བསམ་བཞིན་སྲིད་པར་བཟུང་བའི་དགེ་བའི་བཤེས། །ཀུན་གཟིགས་པན་ཆེན་བླ་མས་དུས་ཀུན་སྐྱོངས། ། གང་གི་སྐྱེས་རབས་འོད་གསལ་སྙིང་པོ་ལས། །བསྟན་པའི་ཕྲིན་ལས་མུ་མཐའ་རྒྱ་མཚོའི་འཇིངས། ། བླུན་རྨོངས་བདག་གིས་གཞལ་བར་མི་ནུས་ཀྱང་། །དད་གུས་ཆུ་ཐིགས་ཙམ་དུ་མཆོད་འབུལ་སྤྲོ། ། ཆུ་བཞི་སྒང་དྲུག་ནང་ཚན་ས་སྐྱོང་རྗེ། །སྡེ་དགེའི་རྒྱལ་ཁབ་འབྲོག་སྡེ་ལྷོ་བྱང་དུ། ། ཀུན་གཟིགས་པན་ཆེན་པདྨ་ཚེ་དབང་གི ། ལྷུན་གྲུབ་རིག་འཛིན་སྐུ་ཡི་རྡོ་རྗེ་བལྟམས། ། ངོ་མཚར་འབུམ་གྱིས་གཏམས་པའི་གངས་ཅན་ལྗོངས། །ཤར་ཕྱོགས་མདོ་ཁམས་བོད་ཡུལ་ཟླ་རྒྱུད་དུ། ། རབ་ཚེས་སྐྱེས་བདག་ཟླ་ཚེས་དགེ་བའི་ཆར། །གྲགས་པ་རྒྱལ་མཚན་དཀར་ལྷའི་རྟེན་འབྲེལ་སྨིན། ། ཆུང་ནས་དགེ་བའི་བག་ཆགས་ཡོངས་སད་དེ། །དགེ་སློང་གནས་བརྟན་རྗེ་ལྟར་ཞི་དུལ་གྱི། ། བག་ཡོད་བཟང་པོ་སྤྱོད་པའི་རྣལ་འབྱོར་པ། །ཆོས་མཆོག་བཟོད་པའི་ཏིང་འཛིན་ངང་དུ་བཞུགས། ། དགུང་བརྒྱད་སོན་སྐབས་སློབ་དཔོན་དཀོན་བསྟན་ལས། །ཟླ་གཅིག་རིང་དུ་བོད་ཡིག་ཀློག་འདོན་གྱིས། ། དཀའ་ཚེགས་མེད་པར་སློབ་སྦྱོང་བྱང་ཆུབ་ནས། །བདེ་ཆེན་ཆོས་འཁོར་ལྷུན་པོའི་ཚོགས་གྲལ་ཞུགས། ། ཤེས་རབ་དད་བརྩོན་ཆེ་བའི་ཚད་དུ་གླེང་། །སྔ་འགྱུར་བཀའ་འབུམ་སྨིན་གླིང་སྐུ་མཆེད་གསུང་། ། ཡོངས་རྫོགས་དབང་ལུང་ཁྲིད་རྒྱུན་མན་ངག་བཅས། །ཞེ་ཆེན་ཀོང་སྤྲུལ་མདུན་ནས་ཆ་ཚང་གསན། ། ཁྱད་པར་བརྟན་མཁས་ཡོན་ཏན་རྒྱ་མཚོའི་བདག །མཁན་ཆེན་དགེ་ལེགས་གྲགས་པའི་ཞལ་སྔ་ནས། ། ངེས་འབྱུང་རྣལ་མའི་རབ་བྱུང་སྡོམ་པ་ཞུས། །དགེ་ལེགས་ཆོས་འཕེལ་མཚན་གྱི་ཅོད་པན་བཞེས། ། དེ་ནས་བཟུང་སྟེ་སྐུ་ཚེ་གང་བོར་རུ། །སོ་ཐར་བསླབ་གཞི་ཕྲ་མོའི་གནང་བཀག་ཀུན། ། ཚུལ་བཞིན་ཉམས་སུ་བཞེས་པའི་དགེ་བའི་བཤེས། །དམ་པ་གོང་མའི་རྣམ་ཐར་བདག་གིར་མཛད། ། དྲན་པའི་མཁར་རྫོང་བརྟན་པའི་དགྲ་བཅོམ་པ། །ཤེས་བཞིན་བྱ་ར་མཁས་པའི་བྱང་ཆུབ་སེམས། ། གསང་ཆེན་སྦས་པའི་རྣལ་འབྱོར་རྡོ་རྗེ་འཆང་། །ངེས་དོན་རྒྱལ་བའི་སྲས་པོ་ཡོངས་སུ་གྲགས། ། ཡེ་རྫོགས་གདོད་མའི་མགོན་དུ་སངས་རྒྱས་ཀྱང་། །ཕྱི་ནང་གསང་བའི་ཟབ་གནད་ཡོངས་ཁེལ་བའི། ། ཀློང་ཆེན་སྙིང་ཐིག་སྔོན་འགྲོར་བསགས་སྦྱང་ཀུན། །མ་ནོར་ཉམས་ལེན་མཛད་པ་མཐར་ཕྱིན་གནང༌། ། བརྒྱུད་པའི་ཕྱག་བཞེས་ཀུན་ལ་བྱང་ཆུབ་ནས། །རྩིས་གཞུང་རྒྱས་པ་བཻ་དཀར་ཆ་ལག་བཅས། ། མཁས་ཤིང་མཛུབ་ཁྲིད་བྱེད་གྲུབ་ཟུང་འབྲེལ་གྱི། །དབྱངས་འཆར་རིག་པའི་གཏེར་མཛོད་ཁྱེད་ལ་དབང་། ། རྫ་རྒྱུད་གདོད་མའི་མགོན་པོ་ཀུན་ཏུ་བཟང་། །གྲུབ་དབང་དཔལ་སྤྲུལ་ནམ་མཁའ་འཇིགས་མེད་ལས། ། འོད་གསལ་གསང་བའི་སྙིང་ཐིག་ཆོས་སྐོར་ཀྱི། །སྨིན་གྲོལ་མན་ངག་བཀའ་དབང་ཡོངས་རྫོགས་གནང་། ། སེམས་དཔའི་རིགས་རྒྱུད་དམ་པའི་སྐྱེས་བུ་ཉིད། །སྒྲ་ཚིག་རང་མཚན་སྦྱང་པར་མི་དགོས་ཀྱང་། ། ཀ་ཙན་དབྱངས་ཅན་སྡེབ་སྦྱོར་ལེགས་སྦྱང་ནས། །ཚད་མའི་དེ་ཉིད་མཁྱེན་པ་ཕུལ་བྱུང་གྱུར། ། གར་ཐིག་སྒྱུ་འཕྲུལ་བཟོ་ཡི་རིག་གནས་དང་། །གསོ་བྱེད་རིག་པའི་གཞུང་ལུགས་དེ་ཉིད་མཐོང་། །…

༄༅། །མཁན་ཆེན་བླ་མ་དཔལ་དགྱེས་པ་རྡོ་རྗེའི་ ངོ་སྤྲོད་མདོར་བསྡུས། །མཁན་ཆེན་བླ་མ་དཔལ་དགྱེས་པ་རྡོ་རྗེ་ནི་སྤྱི་ལོ་༡༩༧༨ལོའི་ཟླ་༥་པའི་ཚེས་༡་ཉིན་དམ་ པའི་སྐྱེས་བུ་ཆེན་པོའི་ལྟས་བཟང་དང་བཅས་མདོ་སྟོད་ཁྲྭ་ཁོག་གི་གཞུ་ཆུ་བར་མའི་ མཚེའུ་དཀར་འཁྱིལ་གྱི་ཉེ་དྲུང་སྤང་ལྷས་ སྒང་དུ་ཡབ་དབྲ་ཆེན་ཨ་མྱེ་ཞི་ཁྲོ་དང་ཡུམ་ཡ་བཟའ་ཨོ་རྒྱན་སྒྲོལ་མ་གཉིས་ཀྱི་ སྲས་སུ་མཚན་དཔེའི་སྐུ་ཡི་མེ་ཏོག་ལྷམ་མེར་བལྟམས།སྐུ་ན་ཕྲ་མོའི་དུས་ནས་ཀུན་ གྱིས་མཐོང་ན་དགའ་བའི་བྱིས་པ་ཡ་རབས་སྤྱོད་བཟང་གཤིས་རྒྱུད་བཟང་ཞིང་བློ་རིག་ གསལ་བ་དམན་མཉོམ་ཆུང་ལ་སྙིང་བརྩེ་རང་ཆས་སུ་མངའ་བ་ཞིག་ཡོད།དགུང་གྲངས་དྲུག་ བདུན་སྐབས་བརྩེ་བའི་མཁན་ཆེན་འཇིགས་མེད་རྣམ་རྒྱལ་གྱི་སྐུ་གམ་དུ་ཡི་གེ་འབྲི་ ཀློག་བསླབ་ཚེ་ལན་རེ་མ་གཏོགས་སློབ་མི་དགོས་པར་ཚེགས་མེད་དུ་མཁྱེན་པས་མཁན་ཆེན་ཡང་ ཐུགས་ཤིན་ཏུ་མཉེས་པར་གྱུར།དགུང་གྲངས་བཅུ་གསུམ་པར་དགེའུ་དགོན་དུ་ཆིབས་ བསྒྱུར་གནང་སྟེ་འདོན་ཆོག་གི་སྐོར་དང་རྒྱ་གཞུང་གི་རྩ་བ་རྣམས་ཐུགས་འཛིན་གནང་ བས་ཡུན་ཐུང་ངུར་བདེ་བླག་ཏུ་ཐུགས་སུ་ཆུད་པ་དང་། རྫ་རྒྱུད་དགེ་མང་རི་ཁྲོད་ཀྱི་མཁན་པོ་ཕྲིན་ལས་དབང་རྒྱལ་ལས་རབ་ཏུ་བྱུང་། དེ་ ནས་བཟུང་མུ་འཐུད་དེ་རྫ་ལྕང་མ་རི་ཁྲོད་ཀྱི་བཤད་གྲྭ་དང་སེར་ཤུལ་བཤད་གྲྭ་སོགས་ སུ་ཕེབས་ནས་བློ་གྲོས་ཀྱི་སྒོ་ཡངས་པོར་ཕྱེས་ཏེ་ཐོས་བསམ་གྱི་གསན་བཞེས་རྒྱ་ ཆེར་མཛད་ལྷག་པར་དུ་མཁན་ཆེན་པདྨ་ཚེ་དབང་ལྷུན་གྲུབ་མཆོག་གི་ཞབས་ཀྱི་པདྨོ་ མཉེས་པ་གསུམ་གྱི་སྤྱི་བོས་བསྙེན་ཏེ་མདོ་སྔགས་རིག་གནས་དང་བཅས་པ་ལ་བརྩོན་པ་ ཆུ་བོས་རྒྱུན་བཞིན་བརྟེན་པས་མཁས་པའི་ཡང་རྩེར་སོན།མཁན་ཆེན་པདྨ་ཚེ་དབང་མཆོག་ ནས་མཁས་བཙུན་བཟང་པོའི་དན་རྟགས་སུ་གཟེངས་བསྟོད་དང་བཅས་མཁན་པོའི་མཚན་གསོལ་ཏེ་ མཁན་རྟགས་གནང་།སླར་ཡང་རྒྱ་མཚོ་ཆེན་པོ་ཆུ་ཡི་མི་ངོམས་པ་བཞིན་མདོ་སྨད་གསེར་ཐང་ ཕྱོགས་སུ་ཕེབས་ཏེ་མཁས་གྲུབ་གཉིས་ལྡན་གྱི་བཤེས་གཉེན་མཁན་ཆེན་ཆོས་དབྱིངས་ཁྱབ་ བརྡལ། མཁན་ཆེན་ཚུལ་ཁྲིམས་བློ་གྲོས།རྨེ་སྤྲུལ་བསྟན་འཛིན་རྒྱ་མཚོ་སོགས་ཀྱི་ཞབས་སེན་ སྤྱི་བོར་བསྙེན་དེ་ཉིན་མཚན་འཁོར་ལོ་བར་མེད་དུ་ཐོས་བསམ་ལ་སྤྲོ་དགས་གཞོལ་བར་ མཛད་པས་ཐོས་པ་རྒྱ་མཚོ་ཆེན་པོའི་ཕ་རོལ་ཏུ་སོན།གསང་ཆེན་བསྟན་པའི་སྒྲོན་མེ་༧ ཆོས་རྗེ་ཡིད་བཞིན་ནོར་བུས་རྗེས་སུ་བཟུང་སྟེ་སྨིན་བྱེད་ཀྱི་དབང་དང་གྲོལ་ བྱེད་ཀྱི་ཁྲིད་རྒྱབ་རྟེན་མན་ངག་དང་བཅས་པ་མནོག་ཆོས་སུ་བསྩལ་བ་དང་ཆབ་ཅིག་མཁན་རྟགས་གནང་སྟེ་མཁན་པོའི་མཚན་གྱི་ཅོད་པན་དབུ་ལ་སྒྲོན།དེ་རྗེས་སྔ་འགྱུར་སྐྱེན་པོ་དགོན་དུ་ཕེབས་ཏེ་བཤད་གྲྭ་གསར་བཞེངས་དང་དགེ་འདུན་གྱི་སྡེ་གསར་འཛུགས་གནང་ནས་ཉེ་བའི་གདུལ་བྱ་རྣམས་སྨིན་གྲོལ་ཆོས་ཀྱི་འཁོར་ལོས་ཚིམས་པར་མཛད། དགུང་ གྲངས་༣༢་ལ་ཕེབས་སྐབས་རེ་ཞིག་འགྲོ་དོན་གཞན་དུ་ཡོད་པར་དགོངས་ནས་ཆིབས་པའི་ཁ་ ལོ་འཕགས་པའི་ཡུལ་དུ་བརྟོལ།དེར་ཕྱོགས་རྣམས་སུ་གྲྭ་སྐོར་ལ་ཕེབས་ཏེ་ཤིན་ཏུ་ མཁས་པའི་དབུས་སུ་ཆོས་ཀྱི་བགྲོ་གླེང་དང་གཞུང་གི་དམ་བཅའ་བཞག་ཚེ་རྩོད་པའི་ གཡུལ་ལས་རྒྱལ་ཏེ་མཁས་པ་མཁས་པའི་དབུས་ ན་མཛེས་ཞེས་པ་ལྟར་གྲགས་པའི་མཚན་སྙན་མཁས་པའི་དབུས་སུ་ཐོབ།གཞན་ཡང་རྒྱ་སྐད་དང་ རྒྱ་ཡིག་དབྱིན་སྐད་དང་དབྱིན་ཡིག་སོགས་རྒྱལ་ཕྱི་ནང་གི་སྐད་རིགས་དང་ཡིག་རིགས་ དུ་མ་ལ་མཁྱེན་མཐར་ཕྱིན་ནས་རིག་པའི་གནས་མཐའ་དག་ལ་མཁས་པའི་པཎྜིཏ་ཞིག་ཏུ་གྱུར་ཏེ་མཚན་སྙན་གྱི་འབྲུག་སྒྲས་རྒྱལ་ཁབ་ཕྱི་ནང་ཀུན་འགེངས་པར་མཛད་པ་དང་།ཕྱིའི་རྒྱལ་ཁབ་མང་པོར་བོད་བརྒྱུད་རྣལ་འབྱོར་ཆོས་ཚོགས་ཆེན་མོས་གཙོས་ཆོས་ཚོགས་གྲངས་ལས་འདས་པ་གཙུགས་ནས་འཚེ་མེད་ཞི་བདེའི་གཞི་རྩ་ཕུན་ སུམ་ཚོགས་པོ་བོད་བརྒྱུད་ནང་བསྟན་རིན་པོ་ཆེ་དང་བཅུ་ཕྲག་རིག་པའི་གཞུང་ལུགས་ ཕྱི་གླིང་རྒྱལ་ཁབ་མང་པོར་ཡོངས་སུ་དར་བར་མཛད་པའི་ཕྲིན་ལས་ཀྱི་འོད་སྣང་དཀར་ པོས་ས་གསུམ་ལ་ཁྱབ་པའི་བསྟན་ དང་འགྲོ་བ་ལ་བཀའ་དྲིན་གཞལ་དུ་མེད་པའི་བསྟན་འཛིན་གྱི་སྐྱེས་བུ་ཆེན་པོ་ཞིག་ ཏུ་མཆིས་སོ། ། འདིར་༢༠༠༩ལོ་ཟླ༨་ཚེས་༡་ལ་ཁོང་གི་བརྩམས་པའི་སྒྲོལ་མ་ཉེར་གཅིག་གི་བསྟོད་པ་ རྣམ་འགྲེལ་ཟེར་བ་ཞིག་དང་ཁོང་གི་མཛད་རྣམ་བསྡུས་པ་ཞིག་བདག་གི་ལག་ཏུ་སོན་མ་ཐག་ སྙིང་དབུས་ནས་དད་པ་བཅོས་མིན་ཞིག་བསྐྱེད་ནས་དེར་བརྟེན་ད་རེས་ཁོང་གི་སྐུ་ཚེ་ བརྟན་ཞིང་མཛད་ཕྲིན་རྒྱལ་ཕྱི་ནང་ཀུན་ཏུ་ཁྱབ་པའི་སྨོན་ཚིག་ཏུ་ཁོང་ལ་བསྟོད་པ་ ཕྱོགས་བསྒྲིགས་འདི་ལྷ་ས་ཞིང་ཆེན་ལྷོ་ཁ་རྣམ་རྒྱལ་ཞོལ་གྱི་ཤེས་རབ་ཆོས་འབྱོར་ གྱིས་ཆེད་དུ་བསྒྲིག་ནས་རྒྱ་ཆེའི་གཟིགས་པ་པོའི་སྤྱན་ལམ་དུ་བདར་བར་སྤྲོ། ཞེས་རྣམ་ཞོལ་ཤེས་རབ་ཆོས་འབྱོར་དུ་འབོད་པས་གསེར་ཐང་བླ་མ་རུང་ལྔ་རིག་ནང་བསྟན་སློབ་གླིང་གི་ ཤར་ཉེས་ཚོགས་རང་གྲོལ་གླིང་ནས་༢༠༠༩ ཟླ་༩ཚེས་༡ཉིན་བྲིས་པ་དགེ ། ༄༅། །མཁན་ཆེན་དཔལ་དགྱེས་པ་རྡོ་རྗེར་བསྟོད་པ་ སྙན་འཇེབས་ཡིད་འཕྲོག་གླིང་བུ་ ཞེས་བྱ་བ་བཞུགས་སོ། ། དེབ་དང་པོ། ལྷ་ས་ཞིང་ཆེན་ལྷོ་ཁ་རྣམ་ཞོལ་ཤེས་རབ་ཆོས་འབྱོར་གྱིས་བསྒྲིགས། ཤིས་ཚིག ཚངས་སྲས་རྒྱུད་མངས་གདངས་ལ་འགྲན་པ་ཡི། ། སྙན༵་འཇེབས༵་ཡིད༵་འཕྲོག༵་གླིང༵་བུ༵འི་འགྱུར་ཁུགས་ལས། ། སྐལ་བཟང་སྙིང་ལ་སྤྲོ་དགའ་རབ་འཕེལ་ཏེ། ། རྫོགས་ལྡན་གསར་བའི་དཔལ་ལ་རོལ་གྱུར་ཅིག ། ཅེས་གསེར་ཐང་བླ་རུང་ཆོས་ཀྱི་གྲོང་ཁྱེར་ནས་ཤར་མི་ཉག་པ་གང་བསམ་ལྷུན་གྲུབ་ཏུ་འབོད་པས་ ས་གླང་ལོ་ཟླ་༨ཚེས་༢༦ཉིན་བྲིས་པ་ཀུན་ཏུ་དགེ་གྱུར་ཅིག ། ༄༅། །མཁན་ཆེན་བླ་མ་དཔལ་དགྱེས་པ་རྡོ་རྗེའི་ ངོ་སྤྲོད་མདོར་བསྡུས། ། མཁན་ ཆེན་བླ་མ་དཔལ་དགྱེས་པ་རྡོ་རྗེ་ནི་སྤྱི་ལོ་༡༩༧༠ལོའི་ཟླ་༥་པའི་ཚེས་༡་ཉིན་དམ་ པའི་སྐྱེས་བུ་ཆེན་པོའི་ལྟས་བཟང་དང་བཅས་མདོ་སྟོད་ཁྲྭ་ཁོག་གི་གཞུ་ཆུ་བར་མའི་ མཚེའུ་དཀར་འཁྱིལ་གྱི་ཉེ་དྲུང་སྤང་ལྷས་ སྒང་དུ་ཡབ་དབྲ་ཆེན་ཨ་མྱེ་ཞི་ཁྲོ་དང་ཡུམ་ཡ་བཟའ་ཨོ་རྒྱན་སྒྲོལ་མ་གཉིས་ཀྱི་ སྲས་སུ་མཚན་དཔེའི་སྐུ་ཡི་མེ་ཏོག་ལྷམ་མེར་བལྟམས།སྐུ་ན་ཕྲ་མོའི་དུས་ནས་ཀུན་ གྱིས་མཐོང་ན་དགའ་བའི་བྱིས་པ་ཡ་རབས་སྤྱོད་བཟང་གཤིས་རྒྱུད་བཟང་ཞིང་བློ་རིག་ གསལ་བ་དམན་མཉོམ་ཆུང་ལ་སྙིང་བརྩེ་རང་ཆས་སུ་མངའ་བ་ཞིག་ཡོད།དགུང་གྲངས་དྲུག་ བདུན་སྐབས་བརྩེ་བའི་མཁན་ཆེན་འཇིགས་མེད་རྣམ་རྒྱལ་གྱི་སྐུ་གམ་དུ་ཡི་གེ་འབྲི་ ཀློག་བསླབ་ཚེ་ལན་རེ་མ་གཏོགས་སློབ་མི་དགོས་པར་ཚེགས་མེད་དུ་མཁྱེན་པས་མཁན་ཆེན་ཡང་ ཐུགས་ཤིན་ཏུ་མཉེས་པར་གྱུར།དགུང་གྲངས་བཅུ་གསུམ་པར་དགེའུ་དགོན་དུ་ཆིབས་ བསྒྱུར་གནང་སྟེ་འདོན་ཆོག་གི་སྐོར་དང་རྒྱ་གཞུང་གི་རྩ་བ་རྣམས་ཐུགས་འཛིན་གནང་ བས་ཡུན་ཐུང་ངུར་བདེ་བླག་ཏུ་ཐུགས་སུ་ཆུད་པ་དང་། རྫ་རྒྱུད་དགེ་མང་རི་ཁྲོད་ཀྱི་མཁན་པོ་ཕྲིན་ལས་དབང་རྒྱལ་ལས་རབ་ཏུ་བྱུང་། དེ་ ནས་བཟུང་མུ་འཐུད་དེ་རྫ་ལྕང་མ་རི་ཁྲོད་ཀྱི་བཤད་གྲྭ་དང་སེར་ཤུལ་བཤད་གྲྭ་སོགས་…

མཐོང་དཀོན་པའི་གསོལ་འདེབས་བསམ་པ་ལྷུན་འགྲུབ་ཀྱི་ཞལ་ཐང་། ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ སྣང་བ་མཐའ་ཡས་ཐུགས་རྗེའི་བྱིན་རླབ་གཡོ༔ སྤྲུལ་སྐུ་པདྨ་འབྱུང་གནས་བྱིན་བརླབས་ཏེ༔ འཛམ་བུའི་གླིང་དུ་འགྲོ་བའི་དོན་ལ་བྱོན༔ འགྲོ་དོན་རྒྱུན་ཆད་མེད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྒྱལ་པོ་ཁྲི་སྲོང་ལྡེའུ་བཙན་མན་ཆད་ནས༔ ཆོས་རྒྱལ་གདུང་བརྒྱུད་མཐའ་ལ་མ་སྟོང་བར༔ དུས་གསུམ་རྒྱུན་ཆད་མེད་པར་བྱིན་གྱིས་རློབས༔ བོད་ཀྱི་ཆོས་སྐྱོང་རྒྱལ་པོའི་གཉེན་གཅིག་པུ༔ རྒྱལ་པོ་ཆོས་སྤྱོད་སྐྱོང་བའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྐུ་ནི་ལྷོ་ནུབ་སྲིན་པོའི་ཁ་གནོན་མཛད༔ ཐུགས་རྗེས་བོད་ཀྱི་སེམས་ཅན་ཡོངས་ལ་གཟིགས༔ མ་རིག་ལོག་པའི་སེམས་ཅན་འདྲེན་པའི་དཔལ༔ ཉོན་མོངས་གདུལ་དཀའི་སེམས་ཅན་ཐབས་ཀྱི་འདུལ༔ བརྩེ་གདུང་རྒྱུན་ཆད་མེད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ དུས་ངན་སྙིགས་མའི་མཐའ་ལ་ཐུག་པའི་ཚེ༔ ནང་རེ་དགོངས་རེ་བོད་ཀྱི་དོན་ལ་བྱོན༔ ཉི་ཟེར་ཆར་སྡུད་མདངས་ལ་བཅིབས་ཏེ་བྱོན༔ ཡར་ངོ་ཚེས་བཅུ་འི་དུས་སུ་དངོས་སུ་བྱོན༔ འགྲོ་དོན་སྟོབས་ཆེན་མཛད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྔ་བརྒྱའི་ཐ་མ་རྩོད་དུས་སྙིགས་མ་ལ༔ སེམས་ཅན་ཐམས་ཅད་ཉོན་མོངས་དུག་ལྔ་རགས༔ ཉོན་མོངས་དུག་ལྔ་རང་རྒྱུད་སྤྱོད་པའི་ཚེ༔ དེ་འདྲའི་དུས་ན་ཁྱེད་འདྲའི་ཐུགས་རྗེས་སྐྱོབས༔ དད་ལྡན་མཐོ་རིས་འདྲེན་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཧོར་སོག་འཇིགས་པའི་དམག་གིས་མཐའ་བསྐོར་ནས༔ ཆོས་འཁོར་གཉན་པོ་འཇིག་ལ་ཐུག་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ལྷ་སྲིན་སྡེ་བརྒྱད་འཁོར་གྱིས་བསྐོར༔ ཧོར་སོག་དམག་དཔུང་བཟློག་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སེམས་ཅན་རྒྱུ་ལུས་འཇིག་པའི་ནད་བྱུང་ཚེ༔ མི་བཟོད་སྡུག་བསྔལ་ནད་ཀྱིས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་སྨན་གྱི་བླ་དང་དབྱེར་མེད་པས༔ ཚེ་ཟད་མ་ཡིན་བར་ཆད་ངེས་པར་སེལ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འབྱུང་བ་དགྲར་ལངས་ས་བཅུད་ཉམས་པའི་ཚེ༔ སེམས་ཅན་མུ་གེའི་ནད་ཀྱིས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་མཁའ་འགྲོ་ནོར་ལྷའི་ཚོགས་དང་བཅས༔ དབུལ་ཕོངས་བཀྲེས་སྐོམས་སེལ་བར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལས་ཅན་འགྲོ་བའི་དོན་དུ་གཏེར་འདོན་ན༔ དམ་ཚིག་ཟོལ་ཟོག་མེད་པའི་དཔའ་གདིང་གིས༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཡི་དམ་ལྷ་དང་དབྱེར་མེད་པའི༔ ཕ་ནོར་བུ་ཡི་ལོན་པ་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྦས་ཡུལ་ནག་ཁྲོད་དབེན་ས་སྙོགས་པའི་ཚེ༔ ཁ་ཆར་བུ་ཡུག་འཚུབས་ཤིང་ལམ་འགགས་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་གཞི་བདག་གཉན་པོའི་འཁོར་གྱིས་བསྐོར༔ ཆོས་མཛད་ལམ་སྣ་འདྲེན་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྟག་གཟིག་དོམ་དྲེད་དུག་སྦྲུལ་མཆེ་བ་ཅན༔ འབྲོག་ཆེན་འཇིགས་པའི་འཕྲང་ལ་འགྲིམས་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་དཔའ་བོའི་གིང་དང་སྲུང་མར་བཅས༔ གདུག་པའི་སེམས་ཅན་སྐྲོད་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ས་ཆུ་མེ་རླུང་འབྱུང་བའི་བར་ཆད་ཀྱིས༔ སྒྱུ་ལུས་ཉེན་ཅིང་འཇིག་པའི་དུས་བྱུང་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་འབྱུང་བ་བཞི་ཡི་ལྷ་མོར་བཅས༔ འབྱུང་བ་རང་སར་ཞི་བར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལམ་སྲང་འཇིགས་པའི་འཕྲང་ལ་འགྲིམ་པའི་ཚེ༔ བསད་ཁྱེར་ཇག་པ་ཆོམ་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཕྱག་རྒྱ་བཞི་ཡི་དགོངས་པར་ལྡན༔ ཙཽ་ར་མི་རྒོད་རྔམ་སེམས་བརླག་པར་བྱེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གང་ཞིག་གཤེད་མའི་དམག་གིས་མཐའ་སྐོར་ནས༔…

བྱིས་པ་ཞིག་གི་ཨ་རིའི་སྲིད་འཛིན་ཁྲོམ་རྒན་ལ་འཐབ་ཡིག་བསྐུར་འདུགཟླ་གཅིག་ལ་དཀར་ཟས་རོལ་ཐུབ་ཚེ། ངས་ཨ་སྒོར་ཁྲི་༡༠༠ཞལ་འདེབས་ཕུལ་ངེས།ཚེ་སྲོག་ཕྲ་མོ།ཉེ་ཆར་ཨ་རིའི་འཕྲིན་སྦྱོར་གྲགས་ཆེན་དག་གིས་འགྲན་འགོད་གནང་བ་ནི། ལོ་ན་དགུ་ཅན་གྱི་བྱིས་པ་ཆུང་ཆུང་ཞིག་གིས་ཨ་རིའི་སྲིད་འཛིན་ཁྲོམ་ཕུ་ལ་འཐབ་ཡིག་བསྐུར་འདུག དོན་དག་འདི་ཅི་ཞིག་ཡིན་ནམ་ཞེ་ན། འདྲ་པར་ནང་གི་བྱིས་པ་ནི་ཤ་ཚ་ཞིང་སྐྱེས་ཡག་ཅིག་འདུག མཛེས་སྡུག་གི་ཞལ་ངོ་ཡི་བྱིས་ཉམས་དེ་མཐོང་དུས། བྱིས་དུས་ནི་ཅི་འདྲ་སྐྱིད་པ་ལ་ཨང་སྙམ་བྱུང་། བྱིས་པའི་མིང་ལ་Evan LeFevre ༼ ཨེ་ལེན ༽ཕ་ཡུལ་ཨ་རི་ནས་ཡིན། ད་ལོར་ལོ་དགུར་སླེབས་འདུག ཁོང་ནི་བྱིས་པ་གཞན་དང་འདྲ་བར། གྲུང་ཞིང་ཡིད་དུ་འོང་བ། ཁམས་དྭངས་ལ་རྩེད་མོར་དགའ་བ་ཞིག་ཡིན། འོན་ཏེ་བྱིས་པ་གཞན་དང་མི་འདྲ་བ་ཞིག་ཀྱང་ཡིན་ཏེ། ཁོང་ནི་ཆུང་དུས་ནས་བྱ་འགུལ་མཁན་ཞིག་ཡིན། གཟའ་འཁོར་སྔོན་མར། ཨེ་ལན་གྱིས་ཡང་བསྐྱར་སྐད་གྲགས་བཞག རྒྱུ་མཚན་ནི་མངོན་གསལ་འཛེམ་མེད་དུ་ཨ་རིའི་སྲིད་འཛིན་ཁྲོམ་ཕུ་ལ་འགྲན་སློང་བྱེད། འགྲན་སློང་བྱེད་དོན་ནི། ཁྲོམ་ཕུ་ནི་ང་ཚོའི་རྒྱལ་ཁབ་ཀྱི་སྲིད་འཛིན་རེད། ཕལ་ཆེར་འབངས་མི་ཡོངས་ཀྱིས་བདེ་ཐང་ཅན་གྱི་སྲིད་འཛིན་ཞིག་ཡོད་པའི་རེ་བ་ཡོད་ཅེས་ཨེ་ལེན་གྱིས་བཤད་བྱུང་། རང་ཉིད་ཀྱི་གདན་ཞུ་ཡི་གེ་དེ་སྲིད་འཛིན་གྱིས་མཐོང་ཆེད། ཨེ་ལེན་གྱིས་འགྲེམ་བརྡ་བྱང་བུ་དང་བརྙན་འཕྲིན་འཕྲིན་སྦྱོར། མ་ཟད་ཉོའུ་ཡོག་ཚགས་པར་སོགས་ཤོག་སྦྱོར་སྟེང་དུ།ཁྲོམ་ཕུ་ལ་བྲིས་པའི་འཕྲིན་ཡིག་དེ་བཀོད་འདུག འཕྲིན་ཡིག་ལས་རྩི་ཤིང་རང་བཞིན་ཅན་གྱི་བཟའ་བཏུང་གི་ཕན་ནུས་དང་ནད་ཡམས་གྱི་ཁུར་ཆེན་དག་གསལ་བཤད་གནང་འདུག འཕྲིན་གྱི་མགོར་ཨེ་ལེན་གྱིས་འདི་ལྟར་བྲིས་འདུག གལ་ཏེ་ཁྱོད་ཀྱིས་སང་ལོ་ཟླ་བ་དང་པོའི་ནང་དུ་དཀར་ཟས་པ་བྱེད་ན། ངས་དམག་ཁུངས་ནས་ཕྱིར་ལོག་པའི་དམག་མི་ལ་ཨ་སྒོར་ཁྲི་བརྒྱ་ཞལ་འདེབས་གནང་ངེས། བརྙན་འཕྲིན་ཁང་གིས་བཅར་འདྲི་གནང་སྐབས། ངའི་རེ་བ་ནི་ཨ་རི་ལ་བདེ་ཐང་ཡོང་བའོ།། རྩི་ཤིང་རང་བཞིན་ཅན་གྱི་ཟས་རིགས་རོལ་བ་ནི་རྩོམ་གཞི་ཡང་དག་པ་ཞིག་ཡིན་ཞེས་ཨེ་ལེན་གྱིས་བཤད། ང་ཚོའི་དམག་ཁུངས་ནས་ཕྱིར་ལོག་པའི་དམག་མི་ལ་ཨ་སྒོར་ཁྲི་༡༠༠ཐོབ་པ་མ་ཟད། ཁྱོད་ཀྱིས་ཀྱང་རྩི་ཤིང་རང་བཞིན་གྱི་ཟས་རིགས་མཆོག་ཅིག་རོལ་ཐུབ། བློ་མཐུན་སྲིད་འཛིན་ལགས། འུ་གཉིས་ཀས་ཉོ་ཚོང་བྱེད་དམ་ཞེས་བཤད་མོད། ཁྲོམ་ཕུ་ཡིས་ད་དུང་དངོས་ལན་གནང་མེད། གསར་འགྱུར་འདི་ཡོངས་ལ་བསྒྲགས་རྗེས། མི་མང་པོ་ཞིག་འགྲན་སློང་འདིས་ཧང་སང་སོང་། བྱིས་པ་ལོ་༩ཅན་ལ་འདི་འདྲའི་སྙིང་སྟོབས་ལྡན་པ་ནི་ཡིད་ཆེས་མི་ཐུབ་པའི་གནས་སུ་སྣང་། གནམ་རྒན་མ།ང་རང་ལོ་དགུའི་སྐབས་སུ་ཅི་ཞིག་བྱེད་ཀིན་འདུག ཁོང་ནི་དངོས་གནས་སྙིང་སྟོབས་ཅན་རེད་ཅེས་མང་པོས་བཤད། བྱིས་པ་ཁོང་གི་སྐད་གྲགས་བཞག་ཐེངས་དང་པོ་ནི་ལོ་གཉིས་ཀྱི་གོང་རེད། དེ་དུས་ལོ་བདུན་རེད། ཁོ་རང་གྲགས་ཆེ་དོན་ནི་ལོ་ལྔའི་སྐབས་སུ་བརྙན་ཞིག་ཕབ་འདུག བརྙན་དེའི་ནང་དུ་ཨེ་ལེན་གྱིས་མི་རྣམས་ལ་རང་ཉིད་ཀྱིས་དཀར་ཟས་རོལ་དོན་ངོ་སྤྲོད་གནང་། ཁོང་གིས་ཟེར་ན། མིའི་རིགས་ཀྱིས་སྲོག་ཆགས་དག་ལ་བཤུ་གཤོག་དང་དམར་གསོད་བྱས་ཏེ་ཤ་ཟ་བ་མཐོང་རྗེས། ཁོ་རང་ཧ་ཅང་སྐྱོ་ཞིང་དངངས་ཏེ། དཀར་ཟས་ལ་རོལ་མགོ་བརྩམ། དེ་དུས་ཁོང་གི་སྐད་ཆའི་གོ་རིམ་དེ་ཧ་ཅང་ཁ་གསལ་མོ་ཆགས་འདུག གལ་ཏེ་ཁོང་གི་ཞལ་ངོ་དང་བྱིས་པའི་སྒྲ་གདངས་ལ་མཐོང་ཐོས་མེད་ཙང་། སྐད་ཆ་དེ་དག་ལོ་ལྔ་ཅན་གྱིས་བཤད་པར་ཡིད་ཆེས་དཀའ། ཤ་ཟོས་ན་ང་ཚོ་འཚོ་གནས་བྱེད་པའི་གོ་ལ་ལ་གནོད་འཚེ་བྱེད་སྲིད། ང་རང་དཀར་ཟས་ལ་ཧ་ཅང་དགའ། རྒྱུ་མཚན་ངས་གོ་ལ་འདི་སྐྱོབས་བཞིན་ཡོད། ང་རང་དཀར་ཟས་རོལ་བ་ལ་འགྱོད་པ་མེད་ཅེས་བཤད། དཀར་ཟས་པ་ཆུང་ཆུང་འདིའི་བརྙན་ཐུང་ནང་གི་ཤ་ཚ་བའི་སྐད་ཆ་དང་རྣམ་འགྱུར་དག་གིས་དྲྭ་གྲོགས་མང་པོ་ཞིག་གི་ཡིད་དབང་འཕྲོག་སོང་། བརྙན་ཐུང་འདི་ངོ་དེབ་རྐྱང་པའི་སྟེང་དུ་བལྟས་གྲངས་ཁྲི་༡༧༠བརྒལ་འདུག ད་དུང་དྲྭ་གྲོགས་འགས་དཔྱད་བརྗོད་དགོད་སློང་བ་འདི་ལྟར་སྤེལ། ཁོང་ལྷ་སུ་ཡི་ཕོ་ཉ་རེད།བརྐུས་ནས་ཁྱིམ་ནང་དུ་ཁྲིད་འགྲོ་བསམ་གི ༢༠༠༧ལོར། ཨེ་ལེན་ནི་PETA༼སྲོག་ཆགས་གཅེས་སྐྱོང་རྩ་འཛུགས༽ཚང་གིས་ཆེས་ཤ་ཚ་བའི་དཀར་ཟས་མི་སྣ་རུ་བདམས་འདུག ཨེ་ལེན་གྱི་ལྷག་བསམ་དང་ཟོལ་མེད་ནི་ཁྱིམ་པའི་སློབ་གསོ་དང་འབྲེལ་བ་ལོས་ཡོད། ཨེ་ལེན་ལོ་༤སྐབས་སུ་ཤ་རིགས་དོར་རྒྱུ་གཏན་ཁེལ་བྱེད་སྐབས། ཁྱིམ་ཚང་གིས་ངོ་རྒོལ་གཏན་ནས་མ་བྱེད། ཨེ་ལེན་གྱི་ཨ་མ་ནི་དཀར་ཟས་པ་ཡིན། ཁོང་གིས་ཨེ་ལེན་སྦྲུམ་པའི་སྐབས་སུ་རྩི་ཤིང་རང་བཞིན་གྱི་བཟའ་བཏུང་རྒྱུན་སྐྱོང་བྱེད་ཡོད། ཨ་མས་ཨེ་ལེན་རང་ཉིད་ལ་གདམ་ག་བྱེད་དུ་བཅུག་པ་ལས་ཨེ་ལེན་དཀར་ཟས་པ་ཞིག་ཏུ་གསོ་སྐྱོང་བྱེད་འདོད་མེད། ཨེ་ལེན་གྱིས་དཀར་ཟས་རོལ་པ་ཐག་གཅོད་སྐབས། ཨ་མས་ཨེ་ལེན་ལ་འདི་ལྟར་བཤད། ད་ཕྱིན་ཆད་ཁྱོད་རང་སློབ་གྲྭ་ནས་ཕི་ཟས་སྤྲོ་ཚོགས་ལ་རོལ་མི་ཐུབ་ཅིང་། སློབ་གྲོགས་ཀྱི་སྐྱེ་སྐར་སྐབས་ཁྱོད་ལ་ཤོག་ཕོར་སྤྲི་གོར་ཡང་མེད། ད་དུང་ཁྱོད་ཀྱིས་རང་ཉིད་ཀྱི་དགའ་ཕྱོགས་མང་པོ་ཞིག་རོལ་ཐུབ་མེད། འོན་ཀྱང་ཨེ་ལེན་གྱིས་ཨ་མ་ལ་བསམ་ཡུལ་ལས་འདས་པའི་ལན་ཞིག་ཕུལ། ཨ་མ་ལགས། ངས་དེ་དག་ལ་དོ་སྣང་མི་བྱེད། གལ་ཏེ་སྲོག་ཆགས་ཚོ་ལ་རྨས་སྐྱོན་ཕོག་ན་ང་ལ་དགའ་ཕྱོགས་དེ་དག་མེད་ན་ཡང་འགྲིག་གི་རེད། ང་རང་དཀར་ཟས་དག་མ་ལ་དགའ། ངས་མི་ཚེ་གང་བོར་དཀར་ཟས་རོལ་ངེས་ཡིན། ང་ཚོས་སྲོག་ཆགས་དང་གོ་ལ་ལ་གནོད་པ་མ་བྱེད་ན་ཡང་། ལྟོ་གོས་ཐག་གཅོད་གནང་ཐུབ་ཅེས་བཤད། ཐེངས་ཤིག་ལ། ཨ་མ་བགད་ཞོར་ཀུ་རེ་ངང་། ང་ཚོས་ཤ་ཟ་མགོ་རྩོམ། འུ་བུ་ཅག་ཁོ་ནའི་ནུས་པ་ཡིས་གོ་ལ་འདི་སྲུང་སྐྱོབ་མི་ཐུབ། ཤ་ཟོས་ན་ང་ཚོའི་ལུས་པོ་སྟོབས་ལྡན་དུ་འགྱུར་སྲིད་ཅེས་བཤད། ཨེ་ལེན་གྱིས་ཨ་མ་ལ། ང་ཡིད་མི་ཆེས། དེ་ནི་ངས་ཤེས་པའི་དོན་དངོས་དང་འགལ་བ་ཆགས་འདུག་ཅེས་ངོ་རྒོལ་གནང་། འདི་ཧ་ལས་པ་གལ་ཆེན་ཡིན། ཁོ་རང་ཁྲོས་ནས་ཨ་མ་ལ་ངས་དཀར་ཟས་རོལ་དགོས་ཞེས་བཤད།ཨེ་ལེན་ནི་ད་ལྟ་Animal…

༧ཀུན་མཁྱེན་བླ་མ་ཚུལ་ཁྲིམས་བློ་གྲོས་ཀྱི་ཞབས་བརྟན་རིན་པོ་ཆེ།།A Precious Long Life Prayer for H.H.Kunkhyen Lama Tsultrim Lodo Rinpocheཨེ་མ་ཧོ།།Marvellous!ཀུན་བཟང་རྒྱལ་བའི་དགོངས་པ་ཇི་བཞིན་གཟིགས།།Realised the mind of the Victorious Buddha, Samantabhadra;ཀུན་ཁྱབ་འགྲོ་ཁམས་འདྲེན་པའི་ཐུགས་རྗེ་ཅན།།Compassionate one who guides all sentient beings of omnipresent samsaric world;ཀུན་འདུས་ཡིད་བཞིན་ནོར་བུ་ཆོས་ཀྱི་རྒྱལ།།The king of Dharma and all-assembled wish-fulfilling jewel;ཀུན་མཁྱེན་ཚུལ་ཁྲིམས་བློ་གྲོས་ཞབས་བརྟན་ཤོག།May long live the Omniscient one, Kunkhyen Lama Tsultrim Lodo Rinpoche!.ཅེས་པ་རབ་རྒྱན་ཤིང་རྟའི་དབོ་ཟླའི་ཉ་ལ་ཤྲཱིཿཨ་ནནྟ་བཛྲས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་ནས་གུས་ཕུལ།།By Shri Anenta Vajra from the Tibetan Yoga Centre United Kingdom.