ཨེ་ཝྃ་ཧོ།

༸ཨོ་རྒྱན་གུ་རུ་རིན་པོ་ཆེའི་རྣམ་ཐར་དཔག་བསམ་ལྗོན་ཤིང་།ཟབ་པ་སྐོར་བདུན་ལས༔ ཨོ་རྒྱན་རྣམ་ཐར་དཔག་བསམ་ལྗོན་ཤིང་བཞུགས་སོ༔ ཐཾཊ།བྱ།རྩ།༔ཨེ་མ་ཧོ༔ཐེག་གསུམ་དམ་པའི་ཆོས་ལ་རྣམ་སྦྱངས་ཤིང་༔འགྲོ་ལ་ཕན་བདེའི་མཛད་པ་རྒྱུན་མི་འཆད༔དུས་གསུམ་རྟག་པར་ཆོས་འཁོར་བསྐོར་བ་ཡི༔པདྨ་བདག་གི་རྣམ་ཐར་འདིར་བཀོད་བྱ༔ དེ་ལ་འགྲོ་དྲུག་སེམས་ཅན་མ་ལུས་པ༔མ་རིག་འཁྲུལ་པས་འཁོར་བར་གཏན་འཁྱམས་ཏེ༔ཁྱད་པར་རྩོད་དུས་སྙིགས་མའི་འགྲོ་བ་རྣམས༔དུག་ལྔ་རགས་ཤིང་འབྱོལ་ཉོག་སྤྱོད་པའི་ཚེ༔ཤིན་ཏུ་གདུལ་དཀའ་དེ་རྣམས་འདུལ་བའི་ཕྱིར༔ཆོས་སྐུའི་སངས་རྒྱས་རྣམས་ཀྱིས་དགོངས་པ་གཏད༔ལོངས་སྐུའི་སངས་རྒྱས་རྣམས་ཀྱིས་ལུང་བསྟན་ཅིང་༔སྤྲུལ་སྐུའི་སངས་རྒྱས་ཐམས་ཅད་བཀའ་བགྲོས་ནས༔པདྨ་བདག་ཉིད་འཛམ་བུའི་གླིང་དུ་འོང་༔ དེ་ཡང་ཁ་ཅིག་སྣང་ངོར་ཨོ་རྒྱན་ཡུལ༔དྷ་ན་ཀོ་ཥར་པད་སྡོང་རྩེ་ལས་སྤྲུལ༔ཁ་ཅིག་སྣང་ངོར་ཨོ་རྒྱན་རྒྱལ་པོའི་སྲས༔ཁ་ཅིག་སྣང་ངོར་གནམ་ལྕགས་ཡོད་པའི་རྩེར༔ཐོག་བབས་ཚུལ་དུ་བྱུང་ཞེས་ཐ་དད་ཀྱང་༔ ཐུབ་དབང་འདས་ནས་ཉི་ཤུ་རྩ་བཞིའི་ཚེ༔འོད་དཔག་མེད་ནི་བྱང་སེམས་ཚུལ་བཟུང་བའི༔འཕགས་པ་ཐུགས་རྗེ་ཆེན་པོའི་ཐུགས་ཀ་ནས༔པདྨ་བདག་ཉིད་ཧྲཱིཿཡིག་ཚུལ་དུ་སྤྲུལ༔ དེ་ཡང་བྱེ་བ་ས་ཡ་གྲངས་མེད་པ༔འཇིག་རྟེན་ཀུན་ཏུ་ཆར་བབས་ཚུལ་དུ་འོང་༔རྒྱལ་བའི་མཛད་པ་བསམ་གྱིས་མི་ཁྱབ་པ༔ཚད་བཟུང་རིས་སུ་བཅད་པར་སུ་ཡིས་ནུས༔ འོན་ཀྱང་འཛམ་གླིང་འདི་རུ་སྤྲུལ་ཚུལ་ནི༔ཨོ་རྒྱན་རྒྱལ་པོའི་སྲས་ཀྱི་སྐལ་པར་མཛད༔རྒྱལ་སྲིད་བཟུང་ནས་ཐེག་ཆེན་ཆོས་འཁོར་བསྐོར༔གཅིག་ཀྱང་མ་ལུས་ཚོམ་བུར་མངོན་སངས་རྒྱས༔དེ་ནས་རྒྱ་གར་ཡུལ་གྱི་ཕྱོགས་སུ་འོང་༔རིག་པའི་གནས་ལྔ་དག་ལ་མཁས་པར་སྦྱངས༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ འཇིག་རྟེན་དུ་བྱོན་ཚུལ་དང་རིག་པའི་གནས་ལ་སྦྱངས་པའི་ལེའུ་སྟེ་དང་པོའོ༔ ཐ་ཅ།ཐརྒྱ༔ དེ་ནས་སངས་རྒྱས་ཤཱཀྱ་ཐུབ་པ་ཡི༔ཉེ་གནས་ཀུན་དགའ་བོ་ལ་མདོ་དྲིས་ཏེ༔པྲ་བྷ་ཧ་སྟིའི་སྤྱན་སྔར་རབ་ཏུ་བྱུང་༔ཡོ་ག་རྣམ་གསུམ་ཆོས་ལ་སྦྱང་པ་མཛད༔ སློབ་དཔོན་དགའ་རབ་རྡོ་རྗེའི་དྲུང་དུ་བྱོན༔རྫོགས་ཆེན་སྙིང་ཐིག་ཆོས་རྣམས་མ་ལུས་ཞུས༔སློབ་དཔོན་སངས་རྒྱས་གསང་བའི་སྤྱན་སྔ་ནས༔གསང་བ་སྙིང་པོ་སྒྱུ་འཕྲུལ་བརྒྱ་རྩ་ཞུས༔ སློབ་དཔོན་ཤྲཱི་སིཾ་ཧའི་ཞབས་དྲུང་བཏུད༔ཆེ་མཆོག་ཧེ་རུ་ཀ་ཡི་རྒྱུད་རྣམས་ཞུས༔སློབ་དཔོན་འཇམ་དཔལ་བཤེས་གཉེན་སྤྱན་སྔར་ཕྱིན༔འཇམ་དཔལ་གཤིན་རྗེའི་རྒྱུད་རྣམས་མ་ལུས་ཞུས༔ སློབ་དཔོན་ཆེན་པོ་ཀླུ་སྒྲུབ་སྤྱན་སྔར་ཕྱིན༔པདྨ་གསུང་གི་རྒྱུད་དང་སྒྲུབ་ཐབས་ཞུས༔སློབ་དཔོན་ཧཱུྂ་ཆེན་ཀ་རའི་སྤྱན་སྔར་གཏུགས༔ཡང་དག་ཐུགས་ཀྱི་རྒྱུད་དང་སྒྲུབ་ཐབས་ཞུས༔ སློབ་དཔོན་བི་མ་མི་ཏྲའི་ཞལ་སྔ་ནས༔བདུད་རྩི་ཡོན་ཏན་རྒྱུད་དང་སྒྲུབ་ཐབས་ཞུས༔སློབ་དཔོན་དྷ་ན་སཾ་སྐྲྀ་ཏ་ཡི་དྲུང་༔ཕུར་པ་ཕྲིན་ལས་རྒྱུད་དང་སྒྲུབ་ཐབས་ཞུས༔ སླར་ཡང་པྲ་བྷ་ཧ་སྟིའི་སྤྱན་སྔ་ནས༔ཕུར་པ་བི་ཏོ་ཏ་མ་འབུམ་སྡེ་ཞུས༔སློབ་དཔོན་ཆེན་པོ་ཤཱནྟིཾ་གརྦྷའི་དྲུང་༔མཆོད་བསྟོད་དྲག་སྔགས་རྒྱུད་དང་སྒྲུབ་ཐབས་ཞུས༔ གཞན་ཡང་གྲུབ་པའི་སློབ་དཔོན་དུ་མ་ལས༔སྡེ་སྣོད་གསུམ་དང་གསང་སྔགས་ཕྱི་ནང་གི༔རྒྱུད་དང་ལུང་དང་སྒྲུབ་ཐབས་དུ་མ་ཡི༔དབང་བསྐུར་རྒྱུད་བཤད་མན་ངག་དུ་མ་ཞུས༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ སློབ་དཔོན་རྣམས་ལ་མན་ངག་ཞུས་ཤིང་སྒྲོ་འདོགས་བཅད་པའི་ལེའུ་སྟེ་གཉིས་པའོ༔ ཐ་ཅ། ཐརྒྱ༔ དེ་ནས་རྒྱ་གར་དུར་ཁྲོད་ཆེན་པོ་བརྒྱད༔གནས་མཆོག་རྣམས་སུ་སྒྲུབ་པ་མཐར་ཕྱིན་ཏེ༔གྲུབ་རྟགས་ཡ་མ་ཟུང་གིས་བདུད་སྡེ་བཏུལ༔ཁྱད་པར་རྒྱ་གར་རྡོ་རྗེ་གདན་ལ་ནི༔མུ་སྟེགས་ནག་པོའི་འཇིགས་པ་བྱུང་བའི་ཚེ༔རིག་པས་བརྩད་ཅིང་ནུས་པས་རྒོལ་བ་བཅོམ༔པཎ་ཆེན་ལྔ་བརྒྱས་བདག་ལ་མངའ་གསོལ་མཛད༔སངས་རྒྱས་ཞལ་ཚབ་བསྟན་པ་ལོ་བརྒྱར་བསྐྱངས༔རྒྱལ་ཚབ་པཎ་ཆེན་བི་མ་མི་ཏྲ་བཞུགས༔ ཨོ་རྒྱན་ང་ཉིད་ཟ་ཧོར་ཡུལ་དུ་སོང་༔ཟ་ཧོར་རྒྱལ་པོས་མ་ཤེས་གསོན་བསྲེག་བྱས༔མེ་དཔུང་མཚོ་རུ་བསྒྱུར་པའི་རྫུ་འཕྲུལ་བསྟན༔ཟ་ཧོར་རྒྱལ་ཁམས་ཐམས་ཅད་ཆོས་ལ་བཀོད༔སངས་རྒྱས་བསྟན་པ་ཉིས་བརྒྱར་ཡུལ་དེར་བསྐྱངས༔ མཱ་ར་ཏི་ཀར་འཆི་མེད་ཚེ་སྒྲུབ་བྱས༔མགོན་པོ་ཚེ་དཔག་མེད་པ་དངོས་སུ་བྱོན༔ཚེ་ཡི་སྒྲུབ་ཐབས་བརྒྱ་དང་རྩ་བརྒྱད་གནང་༔འོག་མིན་སྟུག་པོ་བཀོད་པའི་ཞིང་ཁམས་དང་༔རིགས་ལྔའི་ཞིང་ཁམས་རྣམས་སུ་བདག་ཕྱིན་ཏེ༔བདེ་བར་གཤེགས་པ་རྣམས་ལ་རྒྱུད་ཞུས་ཏེ༔སྤྲུལ་སྐུའི་སངས་རྒྱས་རྣམས་དང་བགྲོ་གླེང་བྱས༔སེམས་འདི་མ་གཏོགས་སངས་རྒྱས་གཞན་མེད་གསུངས༔ ཕྱག་རྒྱ་ཆེན་པོའི་དངོས་གྲུབ་བསྒྲུབ་པའི་ཕྱིར༔ཡང་ལེ་ཤོད་ཀྱི་སྒྲུབ་ཕུག་གོང་མ་རུ༔དཔལ་ཆེན་ཡང་དག་ཧེ་རུ་ཀ་དཔལ་བསྒྲུབས༔དེ་ལ་བར་གཅོད་རྒྱ་བལ་སྡུག་བསྔལ་ནས༔སློབ་དཔོན་རྣམས་ལ་བཟློག་ཐབས་ཆོས་བསྐུར་བསྲིངས༔ཕུར་པ་བི་ཏོ་ཏཱ་མ་མི་ཁུར་བརྫངས༔བལ་པོར་ཕེབས་པ་ཙམ་གྱིས་བར་ཆད་ཞི༔བདག་གིས་ཕྱག་ཆེན་མཆོག་གི་དངོས་གྲུབ་ཐོབ༔ སླར་ཡང་གཡའ་རི་གོང་དུ་སྒྲུབ་པའི་ཚེ༔རྡོ་རྗེ་གདན་དུ་མུ་སྟེགས་རྩོད་པ་བྱུང༔པཎ་ཆེན་ལྔ་བརྒྱར་མཁའ་འགྲོས་ལུང་བསྟན་ནས༔རྒྱ་གར་རྒྱལ་པོ་ཉི་མ་སེང་གེ་དང་༔ཡོན་མཆོད་རྣམས་ཀྱིས་བདག་ལ་བཀའ་འཕྲིན་བྱུང་༔རྡོ་རྗེ་གདན་ཕྱིན་མུ་སྟེགས་ཐམས་ཅད་བཏུལ༔ སློབ་དཔོན་བརྒྱད་བཅས་བསིལ་བའི་ཚལ་དུ་བྱོན༔ཞག་བདུན་དགོངས་པ་མཛད་པའི་གུང་ཐུན་ལ༔མཆོད་རྟེན་ཆེན་པོ་བདེ་བྱེད་བརྩེགས་པ་ལ༔ཐམས་ཅད་དགོངས་པ་མཛད་ནས་གཟིགས་པའི་ཚེ༔མཆོད་རྟེན་འོད་འབར་མེ་སྟག་ཕྲོམ་ཕྲོམ་བྱུང་༔མཁའ་འགྲོ་མ་ཡིས་གཏེར་སྒྲོམ་དངོས་སུ་གཏད༔བདག་ལ་བདེ་གཤེགས་འདུས་པའི་བཀའ་བབས་ཤིང་༔སློབ་དཔོན་རྣམས་ལ་རང་རང་བཀའ་བབ་གྱུར༔རྡོ་རྗེ་གདན་དུ་བསྟན་པ་ཡུན་རིང་བསྐྱངས༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ རྒྱ་གར་ཡུལ་དུ་བསྟན་པ་བསྐྱངས་ཤིང་ཡུལ་ཁམས་ཆོས་ལ་བཀོད་པའི་ལེའུ་སྟེ་གསུམ་པའོ༔ ཐ་ཅ།ཐརྒྱ༔ དེ་ནས་སྔོན་གྱི་སྨོན་ལམ་མཐུ་བཙན་པས༔ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས༔ཆོས་ཀྱི་བསམ་པ་སྐྱེས་ནས་གཙུག་ལག་བཞེངས༔ས་འདུལ་དོན་དུ་མཁན་ཆེན་ཞི་བ་འཚོ༔གདན་དྲངས་ས་གཞི་འདུལ་བར་ཚེགས་མེད་ཀྱང་༔མ་ཐུལ་ཚུལ་མཛད་བདག་ཉིད་ལུང་བསྟན་ཏེ༔ བཀའ་འཕྲིན་གསེར་དང་བང་ཆེན་མི་གསུམ་བྱུང་༔རྒྱ་གར་ཆོས་རྒྱལ་ཡོན་མཆོད་ཐམས་ཅད་ལ༔བདག་ཉིད་གནང་བ་ཞུས་འདུག་བཀའ་བགྲོས་པས༔རྒྱ་གར་ཡུལ་འདི་མུ་སྟེགས་ཉེན་ཆེ་ཡང་༔བོད་དུ་བསྟན་པ་འཕེལ་བའི་ལུང་བསྟན་རྣམས༔དུས་ལ་བབ་པས་འགྲོ་བར་གྲོས་ཐག་ཆོད༔བཀའ་འཕྲིན་བྱས་ཤིང་བང་ཆེན་སྔོན་དུ་བཏང་༔དེ་ནས་བདག་ཉིད་རྒྱ་གར་ཡུལ་ནས་ཐེག༔བལ་ཡུལ་མཐིལ་སླེབས་བོད་ཀྱི་ལྷ་སྲིན་རྣམས༔སེམས་ལ་འཁུ་འཕྲིག་ཐམས་ཅད་ཟིང་ངེར་སོང་༔སླར་ཡང་ཡང་བསྐྱར་བང་ཆེན་མི་ལྔ་བྱུང་༔མང་ཡུལ་དུ་འཕྲད་ཁོ་བོའི་རྫུ་འཕྲུལ་ལ༔བོད་ཀྱི་མི་ལྔ་ཡིད་ཆེས་དད་པ་ཐོབ༔ བོད་ཡུལ་ཉི་མ་ཁུད་ཀྱི་མཚོ་འགྲམ་དུ༔གནོད་སྦྱིན་སྲིན་པོ་ཐམས་ཅད་དམ་ལ་བཏགས༔ཁ་ལའི་ལ་ཐོག་བརྟན་མ་བཅུ་གཉིས་དང་༔གངས་དཀར་ཤ་མེད་བྱང་གི་ཏིང་སྨན་དང་༔ཏིང་ལོ་སྨན་དང་བྱང་རིགས་གཞི་བདག་དང་༔གཙང་གི་འོ་ཡུག་ཤང་གི་གཉན་ཕུ་རུ༔རྡོ་རྗེ་ལེགས་པ་གཡས་རུ་གཡོན་རུ་ཡི༔འདྲེ་སྲིན་འོ་ཤམ་ཐང་ལྷ་དམ་ལ་བཏགས༔ ཏི་སེའི་གནས་སུ་རྒྱུ་སྐར་དམ་ལ་བཏགས༔སྟར་སྒོ་གངས་ལ་གཟའ་བདུད་དམ་ལ་བཏགས༔ གནམ་མཚོ་ཕྱུག་མོར་སྨན་བཙུན་དམ་ལ་བཏགས༔རྨ་མཚོ་སྔོན་མོར་ཀླུ་སྨན་དམ་ལ་བཏགས༔དན་ཏིག་བྲག་ཏུ་རྨ་རྒྱལ་དམ་ལ་བཏགས༔རོ་ཏམ་ནག་པོར་མ་ཡམས་དམ་ལ་བཏགས༔ ཨ་ཏ་རོང་དུ་འགོང་པོ་དམ་ལ་བཏགས༔མེ་ལུང་བྲག་ལ་དགེ་བསྙེན་དམ་ལ་བཏགས༔དབང་ཞུ་དམར་པོར་ལྷ་བཙན་དམ་ལ་བཏགས༔ཀཾ་གྱི་གངས་ལ་ཀླུ་བཙན་དམ་ལ་བཏགས༔ བཞག་ར་ལྷ་རྩེར་སྐུ་ལྷ་དམ་ལ་བཏགས༔ཐོད་དཀར་ནག་པོར་ལྷ་བཙན་དམ་ལ་བཏགས༔ཁྲི་སྒོ་ནག་པོར་རྒྱ་ལྷ་དམ་ལ་བཏགས༔ལྕང་ར་སྨུག་པོར་རྒྱལ་པོ་དམ་ལ་བཏགས༔ ཚ་བ་རོང་དུ་ས་བདག་དམ་ལ་བཏགས༔གླ་བ་རྐང་གཅིག་ཐེའུ་རང་དམ་ལ་བཏགས༔འབོ་ཡི་རོང་དུ་ཀླུ་བཙན་དམ་ལ་བཏགས༔གནས་དྲུག་སྒང་དུ་ཀླུ་བདུད་དམ་ལ་བཏགས༔ ཨན་ཆུང་རྫོང་དུ་དགེ་བསྙེན་བསུ་བར་བྱུང་༔སེངྒེ་རྫོང་དུ་གཡའ་སྤངས་དམ་ལ་བཏགས༔ནམ་མཁའ་རྫོང་དུ་ལྷ་གཉེན་དམ་ལ་བཏགས༔བདུད་ཀྱི་བྲག་ལ་བར་བློན་དམ་ལ་བཏགས༔ མ་ཡོ་གངས་ལ་གཉན་ཆེན་དམ་ལ་བཏགས༔སྤོ་ཡི་བྲག་ལ་བདུད་སྨན་དམ་ལ་བཏགས༔ཁྱུང་ཐོ་ནག་པོར་བདུད་བཙན་དམ་ལ་བཏགས༔བདུད་རི་ནག་པོ་བདུད་རྒྱལ་དམ་ལ་བཏགས༔ བུ་ཆུའི་གནས་སུ་ཀླུ་ཕྲན་དམ་ལ་བཏགས༔ལྷ་རུ་རྩེ་རུ་ལྷ་བྲན་དམ་ལ་བཏགས༔དྭགས་པོའི་གནས་སུ་མགུར་ལྷ་དམ་ལ་བཏགས༔མལ་གྲོའི་གནས་སུ་ཀླུ་རྣམས་དམ་ལ་བཏགས༔ མོན་གྱི་ཡུལ་དུ་རྨུ་བདུད་དམ་ལ་བཏགས༔འབྲས་མོ་གཤོང་དུ་རོང་བདུད་དམ་ལ་བཏགས༔ལ་ཕྱི་གངས་སུ་བསྭེ་བཞི་དམ་ལ་བཏགས༔སྐྱོ་རོང་བྱམས་སྤྲིན་མ་མོ་དམ་ལ་བཏགས༔ གཙང་གི་རོང་དུ་ལྷ་མིའི་སྔ་བསུ་དང་༔སྟོད་ལུང་ནང་དུ་ཐམས་ཅད་བསུ་བར་བྱུང་༔དོང་བའི་གདོང་ནས་གྲུབ་ཆུ་བདུད་རྩི་བྱུང་༔ བྲག་དམར་འོམ་བུའི་ཚུལ་དུ་རྒྱལ་པོ་མཇལ༔འཇམ་དཔལ་སྤྲུལ་པའི་རྒྱལ་པོ་ཡིན་ན་ཡང་༔མངལ་གྱི་སྒྲིབ་པ་ཤིན་ཏུ་འཐུག་དྲག་པས༔ང་ཡི་ཡོན་ཏན་ཚུལ་བཞིན་མ་རྟོགས་ཏེ༔ རྒྱལ་པོ་ཁེངས་པས་དྲེགས་ཏེ་ཕྱག་མ་འཆམ༔བདག་གིས་ང་ཆེའི་གླུ་དང་རྫུ་འཕྲུལ་བྱས༔རྒྱལ་པོ་དད་པ་སྐྱེས་ནས་ཕྱག་འཚལ་ནས༔རྒྱལ་པོས་གསེར་གྱི་ཁྲི་བཤམས་སྤྱན་གཟིགས་བཅས༔བོད་ཡུལ་ལྷ་མི་ཀུན་གྱིས་མཆོད་པར་བྱས༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ བོད་ཀྱི་རྒྱལ་པོས་གདན་དྲངས་ཤིང་ལྷ་འདྲེ་བཏུལ་བའི་ལེའུ་སྟེ་བཞི་པའོ༔ ཐ་ཅ།ཐརྒྱ༔ དེ་ནས་བོད་ཡུལ་ལྷ་འདྲེ་ཐམས་ཅད་བསྡུས༔བཀའ་བསྒོས་དམ་བཞག་ས་གཞི་བྱིན་གྱིས་བརླབས༔རྡོ་རྗེའི་འགྲོས་བྱས་ཧཱུྂ་གིས་དབང་དུ་བསྡུས༔བསམ་ཡས་རྨང་བཞག་ཉིན་མོ་མི་ཡིས་བརྩིགས༔མཚན་མོ་ལྷ་འདྲེ་རྣམས་ཀྱིས་བརྩིགས་བྱས་ཏེ༔རྒྱལ་ཆེན་སྡེ་བཞི་རྣམས་ཀྱིས་ལས་དཔོན་བྱས༔ཀུ་ཅོའི་སྒྲ་དང་བཅས་པས་གྱང་བཏང་ངོ་༔ཉིན་མོ་མི་བས་མཚན་མོ་ལྷ་འདྲེའི་མཐོ༔ བར་དེར་རྒྱལ་པོ་ཀླུ་དང་ཤག་པོ་བྱས༔ཀླུ་ལ་གྲོགས་བཅོལ་གསེར་ཕྱེས་ལུང་པ་བཀང་༔བསམ་ཡས་བརྩིགས་པ་མི་འདྲ་སྐྱེས་པ་འདྲ༔དབུ་རྩེ་རིམ་གསུམ་རི་རབ་ཚུལ་དུ་བྱས༔ཡཀྴ་ལྟག་འོག་ཉི་མ་ཟླ་བའི་ཚུལ༔གླིང་ཆེན་བཞི་དང་གླིང་ཕྲན་བརྒྱད་ཀྱིས་བརྒྱན༔ལྕགས་རིའི་སྟེང་ན་མཆོད་རྟེན་བརྒྱ་རྩ་བརྒྱད༔རྡོ་རིང་བཞི་ལ་ཟངས་ཀྱི་ཁྱི་མོ་བཞི༔ཐོག་གསུམ་རྒྱ་གར་རྒྱ་ནག་བོད་ཀྱི་ལུགས༔སྟེང་ཁང་གཙོ་བོ་ཀུན་ཏུ་བཟང་པོ་ལ༔རྣམ་སྣང་མངོན་བྱང་དཀྱིལ་འཁོར་ལྷ་ཚོགས་བཞུགས༔བར་ཁང་གཙོ་བོ་རྣམ་པར་སྣང་མཛད་ལ༔རྡོ་རྗེ་དབྱིངས་ཀྱི་དཀྱིལ་འཁོར་ལྷ་ཚོགས་བཞུགས༔འོག་ཁང་གཙོ་བོ་བྱང་ཆུབ་ཆེན་པོ་ལ༔ཕྱོགས་བཅུའི་སངས་རྒྱས་ཉེ་སྲས་མ་ལུས་བཞུགས༔ གཙུག་ལག་ཁང་ལ་རབ་གནས་མེ་ཏོག་འཐོར༔ལྷ་རྣམས་ཀུན་ལ་ཡེ་ཤེས་མངོན་སུམ་ཕེབས༔འོད་ཟེར་འབར་དང་རོལ་མོའི་རང་སྒྲ་བསྒྲགས༔ལྷ་རྣམས་ཀུན་གྱིས་མེ་ཏོག་ཆར་པ་ཕབས༔ཀླུ་རྣམས་ཀུན་གྱིས་ནོར་བུ་འབུལ་བ་དང་༔འཇིག་རྟེན་བཀྲ་ཤིས་ཀུན་གྱིས་གང་བར་བྱས༔ མ་མགོན་ལྕམ་དྲལ་ལྷ་ཁང་ཐོ་ཕྱིར་བྱོན༔རྡོ་རིང་རྣམས་ལ་མེ་འབར་ཁྱི་མོ་ཟུག༔ཨ་རུ་ར་ཡི་ཆར་པ་ལན་གསུམ་བབས༔བོད་ཁམས་ཀུན་ཏུ་དགེ་ཞིང་ཤིས་པར་གྱུར༔ལྷ་དང་མི་རྣམས་སྤྲོ་བ་ཡང་ཡང་སྐྱེས༔སྙན་པའི་བ་དན་ཕྱོགས་རྣམས་ཀུན་ཏུ་ཁྱབ༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ བསམ་ཡས་བཞེངས་ཤིང་རབ་གནས་འཐོར་བའི་ལེའུ་སྟེ་ལྔ་པའོ༔ ཐ་ཅ། ཐརྒྱ༔ དེ་ནས་མཁན་སློབ་རྣམ་གཉིས་ཐུགས་བགྲོས་ཏེ༔བོད་ཀྱི་ཡུལ་འདི་སྲིན་པོའི་ཡུལ་ཡིན་འདུག༔དགེ་སྡིག་མི་ཤེས་ཆོས་བཤད་ག་ལ་ནུས༔བོད་ཀྱི་བློན་པོ་ཕྲག་དོག་ཆེ་བས་ན༔རྗེ་ཡི་བསམ་པ་འགྲུབ་ཚེ་རང་ཡུལ་ལོག༔ དེ་ལྟར་བགྲོས་ཏེ་རྒྱལ་པོའི་སྙན་དུ་གསོལ༔རྒྱལ་པོ་ཐུགས་མུག་བཤུམས་པ་དང་བཅས་ཏེ༔སླར་ཡང་གསེར་གྱི་མཎྜལ་དཔག་མེད་བཅས༔ བཀའ་དྲིན་ཅན་གྱི་སློབ་དཔོན་རྣམ་གཉིས་གསོན༔ཁྲི་སྲོང་ལྡེའུ་བཙན་བསམ་པ་རྒྱ་ཆེ་སྟེ༔བོད་འདི་མུན་གླིང་སྲིན་པོའི་ཡུལ་ཡིན་པས༔འདི་ན་ཆོས་ཀྱི་སྒྲ་ཡང་མི་གྲགས་པས༔སློབ་དཔོན་ཐུགས་སུན་གྱུར་ཀྱང་བརྩེ་བས་དགོངས༔བྱང་ཆུབ་སེམས་ཀྱིས་ཐུགས་རྗེས་གཟུང་དུ་གསོལ༔ དགེ་མེད་གླིང་དུ་སངས་རྒྱས་སྤྲུལ་པ་བྱོན༔གཞན་དོན་མཛད་པའི་བྱང་ཆུབ་སེམས་དཔའ་ལ༔འགྲོ་བའི་དོན་ལས་གཞན་གྱི་མཛད་པ་མེད༔ཁྲི་སྲོང་ལྡེའུ་བཙན་བསམ་པ་བསྒྲུབ་ཏུ་གསོལ༔ བདག་གིས་སྐུ་གསུང་ཐུགས་རྟེན་བཞེངས་ན་ཡང་༔བོད་འདིར་མདོ་སྔགས་ཆོས་རྣམས་གདན་དྲངས་ནས༔ཉན་བཤད་སྒོམ་སྒྲུབ་བསྟན་པ་སྤེལ་སྙམ་པས༔སློབ་དཔོན་རྣམ་གཉིས་དེ་ལྟར་མཛད་དུ་གསོལ༔མཁན་སློབ་མི་བཞུད་བོད་དུ་བཞུགས་པར་ཞུ༔ དེ་ནས་མཁན་སློབ་བཀའ་བགྲོས་བཞུགས་ཐག་བཅད༔བོད་ཕྲུག་རིགས་བཟང་ཐམས་ཅད་ལུང་བསྟན་ཏེ༔ཐམས་ཅད་བསྡུས་ནས་ཀུན་ལ་ལོ་ཙཱ་བསླབ༔སྐ་ཅོག་ཞང་གསུམ་ཁྱད་པར་བཻ་རོ་སོགས༔མང་པོའི་ནང་ནས་ལོ་ཙཱ་བརྒྱ་རྩ་བྱུང་༔བདག་གིས་གསང་སྔགས་ཕྱི་ནང་ཐམས་ཅད་བསྒྱུར༔མཁན་པོས་མདོ་དང་འདུལ་བ་ཐམས་ཅད་བསྒྱུར༔ བསྟན་པའི་གཞི་མ་དགེ་འདུན་རིན་ཆེན་ཡིན༔བོད་ཕྲུག་སྟོང་དང་བརྒྱ་རྩ་རབ་ཏུ་བྱུང་༔རྒྱ་གར་སློབ་དཔོན་ཐམས་ཅད་མཚན་སྨོས་ཞིང་༔ལོ་ཙཱ་བརྒྱ་རྩ་རྒྱ་གར་ཡུལ་དུ་བརྫངས༔ བི་མ་མི་ཏྲ་སངས་རྒྱས་གསང་བ་སོགས༔པཎ་ཆེན་བརྒྱ་རྩ་བོད་དུ་སྤྱན་དྲངས་ཏེ༔ལོ་པཎ་མཁན་སློབ་གཙུག་ལག་ཁང་དུ་བཞུགས༔མཐོ་མཛེས་ཁྲི་བརྩེགས་ཟ་འོག་ན་བཟའ་གསོལ༔ཞིམ་རྒུའི་ཟས་དྲངས་གསེར་གྱི་མཎྜལ་ཕུལ༔ མདོ་སྔགས་ཆོས་རྣམས་མ་ལུས་བསྒྱུར་བ་ནི༔འདུལ་བ་མདོ་སྡེ་མངོན་པའི་སྡེ་སྣོད་དང་༔ཕར་ཕྱིན་རྒྱས་འབྲིང་བསྡུས་གསུམ་ལ་སོགས་པའི༔མདོ་ཡི་ཆོས་རྣམས་མ་ལུས་ཐམས་ཅད་བསྒྱུར༔མྱ་ངན་འདས་མདོ་ཆེན་པོ་ལ་སོགས་པའི༔ངེས་པའི་བཀའ་རྣམས་མ་ལུས་ཐམས་ཅད་བསྒྱུར༔ ཀྲི་ཡཱ་ཡོ་ག་རྡོ་རྗེ་རྩེ་མོ་སོགས༔གསང་སྔགས་ཕྱི་པའི་རྒྱུད་རྣམས་མ་ལུས་བསྒྱུར༔གསང་བ་སྙིང་པོ་སྒྱུ་འཕྲུལ་རྒྱུད་བརྒྱད་དང་༔འདུས་པ་མདོ་ཡི་མདོ་ལུང་སེམས་སྡེའི་སྐོར༔སྒྲུབ་པ་བཀའ་བརྒྱད་རྩ་བའི་རྒྱུད་ལྔ་དང་༔བྱེ་བྲག་རྒྱུད་བཅུ་རྒྱུད་ནི་བཅོ་ལྔ་དང་༔གསང་སྔགས་ནང་གི་རྒྱུད་སྡེ་གྲངས་མེད་བསྒྱུར༔ གཞན་ཡང་མདོ་སྔགས་ཆོས་ནི་གྲངས་མེད་པ༔ཉིན་མཚན་ཀུན་ཏུ་བསྒྱུར་ཞིང་བཤད་དང་ཉན༔བོད་ཡུལ་ཀུན་ཏུ་བཤད་པའི་ཆོས་སྡེ་བཙུགས༔མདོ་སྔགས་ཐམས་ཅད་གླེགས་བམ་གྲངས་མེད་བྱས༔ གདུགས་དང་རྒྱལ་མཚན་བ་དན་ཕྱེ་ཕུར་དང་༔མཆོད་པའི་ཡོ་བྱད་དཔག་ཏུ་མེད་པ་དང་༔མཛེས་ཤིང་རྣམ་པར་བཀྲ་བའི་བཀོད་པ་བཅས༔རབ་བྱུང་རྣམས་ཀྱི་རྒྱབ་ཏུ་གླེགས་བམ་ཁུར༔དེ་དག་བར་དུ་མཆོད་རྫས་ཐམས་ཅད་ཐོགས༔ ལོ་པཎ་ཐམས་ཅད་ཤིང་རྟའི་སྟེང་དུ་བཞུགས༔སྟེང་དུ་གདུགས་ཕུབ་གཡས་གཡོན་རྒྱལ་མཚན་ཕྱར༔རོལ་མོའི་བྱེ་བྲག་དཔག་མེད་སྒྲ་བསྒྲགས་ཏེ༔སྤོས་ཀྱིས་སྣ་དྲངས་གཙུག་ལག་བསྐོར་བ་བྱས༔དེ་ཉིན་ནམ་མཁའི་སྙིང་པོས་རྫུ་འཕྲུལ་བསྟན༔གླེགས་བམ་ཐམས་ཅད་བར་ཁང་ནང་དུ་བཞུགས༔ ཡོ་འབོག་ཐང་དུ་ཀུན་ལ་ཁྲི་བརྩིགས་ཏེ༔གསེར་གྱི་མཎྜལ་གསེར་གྱི་པ་ཏྲ་རེ༔ན་བཟའ་རེ་དང་དར་ཡུག་གོས་ཡུག་རེ༔རྟ་རེ་དྲེལ་རེ་མཛོ་ཕོ་མཛོ་མོ་རེ༔ཕྲུག་བཟང་ཐེར་སྲབ་དོས་རེ་ཇ་དོས་རེ༔གསེར་སྲང་བརྒྱ་དང་དངུལ་སྲང་སྟོང་ཕྲག་རེ༔ ཕུལ་ཏེ་རྒྱལ་པོ་གྲལ་གྱི་གཤམ་ནས་བཞེངས༔རྒྱལ་བརྒྱུད་བོད་ལུགས་ཐུགས་ཀྱི་དགོངས་ཚུལ་དང་༔ལོ་པཎ་བཀའ་དྲིན་ཆེ་རབས་བཤད་པ་བཏང་༔བི་མ་མི་ཏྲ་ལ་སོགས་པཎ་ཆེན་གྱིས༔ཆོས་ཀྱི་བྱུང་ཁུངས་ཆོས་ཀྱི་ཆེ་བ་བརྗོད༔ བཻ་རོ་ཙ་ན་ལ་སོགས་ལོ་ཙཱ་ཡིས༔པཎ་ཆེན་ཆེ་བ་ཆོས་ཀྱི་འགྱུར་ལུགས་བཤད༔འགོས་ལ་སོགས་པའི་བོད་ཀྱི་བློན་པོ་ཡིས༔འབུལ་བ་རེ་བྱས་བསམ་པ་འགྲུབ་ལུགས་བཤད༔འབངས་རྣམས་ཀུན་གྱིས་ཅི་འབྱོར་ཚོགས་བསགས་བྱས༔ རང་རང་ལོ་ཙཱ་འབངས་ཀྱིས་ཞབས་ཞུ་བཅས༔པཎ་ཆེན་ཐམས་ཅད་རང་གི་ཡུལ་དུ་སོང་༔བོད་ལ་ཆོས་ཀྱི་བསྟན་པ་ཉི་བཞིན་ཤར༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ ལོ་པཎ་སྤྱན་དྲངས་ཤིང་མདོ་སྔགས་ཀྱི་ཆོས་བསྒྱུར་པའི་ལེའུ་སྟེ་དྲུག་པའོ༔ ཐ་ཅ།ཐརྒྱ༔ དེ་ནས་བསམ་ཡས་མཆིམས་ཕུའི་དབེན་གནས་སུ༔པདྨ་བདག་ཉིད་སྒྲུབ་པ་བྱེད་པའི་ཚེ༔བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དང་༔ནམ་མཁའི་སྙིང་པོ་སངས་རྒྱས་ཡེ་ཤེས་དང་༔རྒྱལ་བ་མཆོག་དབྱངས་ཡེ་ཤེས་མཚོ་རྒྱལ་མ༔དཔལ་གྱི་དབང་ཕྱུག་རྡོ་རྗེ་བདུད་འཇོམས་དང་༔བཻ་རོ་ཙ་ན་ལ་སོགས་རྗེ་འབངས་ཀྱིས༔གསེར་གྱི་མཎྜལ་ཕུལ་ནས་ཡང་ཡང་དུ༔བདེ་གཤེགས་འདུས་པའི་དཀྱིལ་འཁོར་ཞལ་ཕྱེ་གསོལ༔ དེ་ནས་བདག་གིས་དཀྱིལ་འཁོར་ཞལ་ཕྱེས་ནས༔རྗེ་འབངས་རྣམས་ལ་འདུས་པའི་དབང་ཆེན་བསྐུར༔དེ་ཚེ་རྒྱལ་པོའི་མེ་ཏོག་ཆེ་མཆོག་ལ༔ནམ་མཁའི་སྙིང་པོའི་མེ་ཏོག་ཡང་དག་ལ༔སངས་རྒྱས་ཡེ་ཤེས་མེ་ཏོག་གཤིན་རྗེར་བབས༔རྒྱལ་བ་མཆོག་དབྱངས་མེ་ཏོག་རྟ་མགྲིན་ལ༔ཡེ་ཤེས་མཚོ་རྒྱལ་མེ་ཏོག་ཕུར་པ་ལ༔དཔལ་གྱི་དབང་ཕྱུག་མེ་ཏོག་མ་མོར་བབས༔རྡོ་རྗེ་བདུད་འཇོམས་མེ་ཏོག་མཆོད་བསྟོད་ལ༔བཻ་རོ་ཙ་ནའི་མེ་ཏོག་དྲག་སྔགས་ལ༔བབས་ཏེ་དེ་ཡི་དཀྱིལ་འཁོར་རང་རང་བསྒྲུབས༔ རྗེ་འབངས་རྣམས་ཀྱིས་གྲུབ་རྟགས་རེ་རེ་ཐོན༔ཁྲི་སྲོང་ལྡེའུ་བཙན་གཞན་སྣང་ཟིལ་གྱིས་གནོན༔ནམ་མཁའི་སྙིང་པོ་ཉི་མའི་ཟེར་ལ་ཆིབས༔སངས་རྒྱས་ཡེ་ཤེས་བྲག་ལ་ཕུར་པ་བཏབ༔རྒྱལ་བ་མཆོག་དབྱངས་གཙུག་ནས་རྟ་སྐད་ཐོན༔ཡེ་ཤེས་མཚོ་རྒྱལ་བསད་པའི་མི་རོ་སློང་༔དཔལ་གྱི་དབང་ཕྱུག་ཕུར་པ་གདེངས་ཚད་གུམ༔རྡོ་རྗེ་བདུད་འཇོམས་རླུང་ལྟར་ཐོགས་མེད་རྒྱུག༔བཻ་རོ་ཙ་ན་དྲེགས་པ་བྲན་ཏུ་ཁོལ༔གཞན་ཡང་རྗེ་འབངས་གྲུབ་རྟགས་མང་དུ་ཐོན༔ གཞན་ཡང་བླ་མ་དགོངས་པ་འདུས་པ་དང་༔ཡི་དམ་དགོངས་འདུས་མཁའ་འགྲོ་དགོངས་འདུས་དང་༔ཆོས་སྐྱོང་དགོངས་འདུས་དཀྱིལ་འཁོར་རབ་འབྱམས་ཀྱི༔སྨིན་བྱེད་དབང་བསྐུར་གྲོལ་བྱེད་མན་ངག་བསྟན༔བོད་དུ་སྒོམ་གྲྭའི་བསྟན་པ་དར་བར་བྱས༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ སྨིན་བྱེད་དབང་བསྐུར་ནས༔ རྗེ་འབངས་རྣམས་ཀྱིས་གྲུབ་རྟགས་ཐོན་པའི་ལེའུ་སྟེ་བདུན་པའོ༔ ཐ་ཅ། ཐརྒྱ༔ དེ་ནས་པདྨ་བདག་གི་དགོངས་པ་ལ༔བོད་འདིར་མདོ་སྔགས་ཆོས་རྣམས་ཐམས་ཅད་དང་༔གསང་སྔགས་ཕྱི་ནང་ཡང་ཟབ་སྙིང་པོ་རྣམས༔འཆད་ཉན་སྒོམ་སྒྲུབ་གྲུབ་རྟགས་ཐོན་ན་ཡང་༔ཀུན་གྱི་ཡང་དྲིལ་མེད་ཐབས་མེད་པའི་ཆོས༔བཀའ་འདུས་ཆོས་ཀྱི་རྒྱ་མཚོ་འདི་ཉིད་ནི༔བརྩེ་བས་རྗེ་འབངས་རྣམས་ལ་སྦྱིན་པར་སེམས༔དེ་ཚེ་རྒྱལ་པོ་ཡབ་སྲས་གསུམ་རྣམས་ཀྱིས༔ཞུ་བ་ཕུལ་ནས་མཆིམས་ཕུར་རྒྱས་པར་བསྐུར༔ སླར་ཡང་ཐུགས་གཏེར་མང་པོ་སྦས་པའི་ཚེ༔བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དང་༔ལྷ་སྲས་ཆེ་བ་མུ་ནེ་བཙན་པོ་དང་༔ལྷ་སྲས་འབྲིང་བ་མུ་རུབ་བཙན་པོ་དང་༔ལྷ་སྲས་ཆུང་བ་མུ་ཏིག་བཙན་པོ་དང་༔རྒྱལ་བ་མཆོག་དབྱངས་ལང་གྲོ་ལོ་ཙཱ་དང་༔གཉགས་ཆེན་ཛྙཱ་ན་ཀུ་མཱ་ར་སོགས་དང་༔བཻ་རོ་ཙ་ན་ཤུད་བུ་དཔལ་སེང་དང་༔ཏིང་འཛིན་བཟང་པོ་རྡོ་རྗེ་བདུད་འཇོམས་དང་༔དཔལ་གྱི་དབང་ཕྱུག་འོ་བྲན་དབང་ཕྱུག་དང་༔ཨཱ་ཙར་ས་ལེ་ཤེལ་དཀར་རྡོ་རྗེ་མཚོ༔འབྲོག་བན་ལོ་ཙཱ་མཚོ་རྒྱལ་བྲན་གསུམ་དང་༔ལྷ་སྲས་གསུམ་གྱི་བཙུན་མོ་རྣམ་གསུམ་སོགས༔འཁོར་བཅས་ཁམས་ཀྱི་ནམ་མཁའ་རྫོང་དུ་བྱོན༔ བཀའ་འདུས་ཆོས་ཀྱི་རྒྱ་མཚོ་ཞལ་ཕྱེས་ཏེ༔རྗེ་འབངས་རྣམས་ལ་སྨིན་བྱེད་དབང་བསྐུར་ནས༔གྲོལ་བྱེད་མན་ངག་གནད་རྣམས་ལེགས་པར་བཀྲལ༔འཁོར་བཅས་ལོ་བདུན་བར་དུ་རྩེ་གཅིག་བསྒྲུབས༔མངའ་བདག་རྒྱལ་པོས་རི་བྲག་ཟང་ཐལ་མཛད༔མུ་ནེ་བཙན་པོས་ལྷ་ཞལ་དངོས་སུ་གཟིགས༔མུ་རུབ་བཙན་པོས་བདེ་ཆེན་ཡེ་ཤེས་བརྙེས༔མུ་ཁྲི་བཙན་པོས་རང་སེམས་ངོ་བོ་མཐོང་༔བཻ་རོ་ཙ་ན་ནམ་མཁར་བྱ་ལྟར་ལྡིང་༔རྒྱལ་བ་མཆོག་དབྱངས་སྐུ་ནི་མེ་དཔུང་བསྒྱུར༔ལང་གྲོ་དཀོན་མཆོག་འོད་ཀྱི་ཕུང་པོར་གྱུར༔སངས་རྒྱས་ཡེ་ཤེས་ཀུན་འོད་ས་ལ་སྙེགས༔གཉགས་ཆེན་ཛྙཱ་ན་ཆོས་ཉིད་ཟད་སར་འཁྱོལ༔མཁར་ཆེན་མཚོ་རྒྱལ་བྲག་ལ་ཚེ་ཆུ་ཐོན༔ཨཱ་ཙར་ས་ལེས་ཕྱག་གིས་བྲག་རི་གཏོར༔འབྲོག་མི་དཔལ་ཡེས་སྤྱན་གྱིས་ནགས་ཚལ་བསྲེག༔རྡོ་རྗེ་བདུད་འཇོམས་སྤྱན་གྱིས་རྒྱ་མཚོ་སྐེམ༔ཏིང་འཛིན་བཟང་པོས་རི་བྲག་ཟང་ཐལ་ཕུག༔ཤེལ་དཀར་བཟའ་ཡིས་མ་མོ་བྲན་ཏུ་ཁོལ༔གཞན་ཡང་རྗེ་འབངས་རྣམས་ཀྱིས་གྲུབ་རྟགས་མང་༔ ཕྱག་དཔེ་ཐམས་ཅད་འཕྲུལ་གྱི་ཡི་གེ་བཏབ༔གནས་མཆོག་བདུན་ཏུ་གཏེར་ཁ་སོ་སོར་སྦས༔འདོན་པའི་སྐྱེས་བུ་དག་ཀྱང་ལུང་བསྟན་ཏེ༔བཀའ་རྒྱས་བཏབ་ཏེ་སྨོན་ལམ་དབང་བསྐུར་བྱས༔རྩོད་དུས་སྙིགས་མ་སུམ་ཅུ་ཁ་རལ་ལ༔འདོན་པའི་དུས་སུ་ལུང་བསྟན་ས་མ་ཡ༔ པདྨ་བདག་གི་རྣམ་ཐར་དཔག་བསམ་ལྗོན་ཤིང་ལས༔ བཀའ་འདུས་ཆོས་ཀྱི་རྒྱ་མཚོ་ཞལ་ཕྱེས་ཏེ་གཏེར་དུ་སྦས་པའི་ལེའུ་སྟེ་བརྒྱད་པའོ༔ ཐ་ཅ། ཐརྒྱ༔…

སྒྲོལ་དཀར་ལ་གདམས་ཚིག་ཨུཏྤལ་དཀར་པོ།།ན་མོ་གུ་ར་ཝེ།།བློ་གཏད་བླ་མ་དམ་པ་སྐྱབས་འགྲོ་ཡི་མཐར་ཐུག།གཞན་དོན་ལྷུར་ལེན་བྱེད་པ་སེམས་བསྐྱེད་ཀྱི་རྒྱལ་པོ།།དྲན་ཤེས་བག་ཡོད་སྐྱོང་བ་མདོ་སྔགས་ཀྱི་ལམ་འཁྱེར།།ཀུན་བཟང་རྒྱལ་བའི་ལམ་ལ་བདེ་མྱུར་ཏུ་ཕེབས་ཤོག།ཨེ་མ་ཧོས

༄༅༎བླ་མའི་རྣལ་འབྱོར་དད་པའི་གསོས་སྨན་བཞུགས་སོ༎དང་འདོད་ཡིད་ཆེས་ཀྱི་དད་པ་དྲག་ཏུ་བསྐྱེད་དེ།སངས་རྒྱས་ཀུན་གྱིས་འཕྲིན་ལས་གཅིག་འདུས་པ༎མ་ལུས་འགྲོ་བ་ཡོངས་ཀྱི་གཉེན་གཅིག་པུ༎དཀྱིལ་འཁོར་ཡོངས་ཀྱི་སྤྲོ་བསྡུས་སྤྱི་དཔལ་རྗེ༎སྐལ་ལྡན་བདག་གི་གཏན་གྱི་སྐྱབས་གནས་མཆོག།སྟོན་ཟླའི་མཚན་མོ་དཀར་བའི་རི་བོང་འཛིན༎རྒྱུ་སྐར་ཡོངས་ཀྱི་དབུས་ན་མཛེས་པ་ལྟར༎དད་ལྡན་བྱེ་བས་མངོན་པར་བཀུར་བ་ཡི༎མཐོང་བའི་མི་ངོམས་སྐུ་མཆོག་མིག་གིས་སྨན༎ཆར་ལྡན་དུས་སྟོན་དར་བའི་སྐབས་ཞིག་ན༎ལྷང་ལྷང་ལྡིར་བའི་སྤྲིན་གྱི་རོལ་མོ་བཞིན༎ཚར་གཅོད་རྗེས་སུ་འཛིན་ལ་དབང་འབྱོར་བའི༎དགག་བཞག་སྤོང་བའི་གསུང་འདི་རྣ་བར་འཇེབས༎སྤྲོས་ཟད་མཁའ་ལ་མཁྱེན་པའི་ཉི་འོད་ཀྱིས༎ལྔ་བདོའི་རྒུད་པའི་མུན་ཚོགས་དབྱིངས་སུ་བསྙིལ༎སྐལ་ལྡན་བློ་ཡི་འདབས་སྟོང་ཅིར་ཡང་བཞད༎ཐུགས་རྗེའི་ཐུགས་འདི་ཡིད་ལ་ཡང་ཡང་འཁོར༎ཞེས་གསལ་བཏབ་ལ།གསོལ་བ་གདབ་པ་ནི།ཀྱེེ་མ་བླ་མ་རིན་པོ་ཆེ། །བདག་ལ་ཐུགས་རྗེའི་ཉེར་དགོངས་ལ༎ཁྱེད་དང་སྐལ་བ་མཉམ་པ་རུ༎ད་ལྟ་ཉིད་དུ་བྱིན་གྱིས་རློབས༎ཐུན་འཇོག་པར།མཐར་ནི་བླ་མ་རང་ལ་ཐིམ༎རང་སེམས་སྐྱེ་མེད་འོད་གསལ་འདི༎ལྷ་དང་བླ་མ་དབྱེར་མེད་པར༎ཐག་ཆོད་ངང་ལ་མཉམ་པར་བཞག། ཨ་ཨ་ཨ།ཞེས་སྣང་སྲིད་ཐམས་ཅད་བླ་མའི་ངོ་བོར་མོས་ལ་དགེ་རྩ་བྱང་ཆུབ་ཏུ་བསྔོ་བར་བྱའོ༎ ཞེས་པ་འདི་ནི་དད་སློབ་མཁན་ཤེས་རབ་བཟང་པོའི་ངོ་ཆེན་པ་བྱས་ཏེ་ཕུ་ཁང་ཆོས་གྲྭལ་ན་འཁོད་པའི་མཁན་སློབ་འགའ་ཞིག་གིས་ནན་ཟབ་བསྐུལ་བའི་ངོར་རབ་བྱུང་༡༧པའི་མེ་གླང་ཟླ་༣ཚེས་༡༠ལ་ངག་དབང་བློ་གྲོས་མཚུངས་མེད་པས་སྤེལ་བ་དགེ། བསྐུལ་བ་པོ་ཁོང་རྣམས་ཀྱིས་ཐུགས་ལ་འཕྲོད་པའི་ཚིག་དོན་ལེགས་པོ་ཞིག་མ་བྱུང་ཡང་ཁོ་བོའི་ཚེ་གང་བོ་ལ་རྩོལ་མེད་དུ་རང་གི་ཡིད་ངོར་ཤར་བ་བཞིན་མ་གཏོགས་ཚིག་དོན་གཉིས་ཆར་ལ་བསྒྱུར་བཅོས་བྱེད་མ་མྱོང་བས་ཐུགས་ཁྲེལ་མེད་པར་ཞུ།སྤྱི་ལོ་༡༩༩༧ལོའི་ཟླ་༣ཚེས་༢༤ལའོ༎ཨོཾ་གུ་རུ་ཀལྱ་དྷརྨ་བརྡྷ་སིདྡྷི་ཨཿཧཱུྃ།

ཨ་རིག་མཁན་ཆེན་བླ་མ་སྐུ་གཤེགས་ནས་ལོ་འཁོར་༡༨ ལོན་པའི་རྗེས་དྲན་བསུ། ࿐ཕ་ཅིག་བླ་མ་དྲན་པའི་གསོལ་འདེབས་མ་བཅོས་བྱིས་པའི་གདུངས་འབོད། རྗེ་སངས་རྒྱས་མི་གཟུགས་བྱོན་པ་ཞིག །དུས་སྙིགས་མ་ལྔ་བདོའི་མགོན་དུ་ཕེབས། །མཚན་བརྗོད་ན་དགེ་ལེགས་ཆོས་འཕེལ་ཞེས། །ཕ་བླ་མ་དེ་ལ་གསོལ་བ་འདེབས། ། བཀའ་མདོ་རྒྱུད་རྒྱ་མཚོའི་ཕ་རོལ་ཕྱིན། །བྱམས་སྙིང་རྗེའི་ཐུགས་རྒྱུད་ཀུན་ནས་ཕྱུག །ཆོས་རྫོགས་ཆེན་ལྟ་བའི་རང་ཞལ་མཇལ། །རྗེ་པདྨ་ཚེ་དབང་ལྷུན་གྲུབ་མཁྱེན། ། མཚན་ཐོས་ན་ཐར་བའི་ས་བོན་འདེབས། །ཞལ་མཇལ་བ་ཙམ་གྱིས་མོས་གུས་སྐྱེ། །གསུང་ཐོས་ན་བླང་དོར་འཇུག་ལྡོག་ཤེས། །མགོན་ལེགས་བཤད་སྨྲ་བའི་ཉི་མ་མཁྱེན། ། བྱིན་བརྒྱུད་ཀྱི་རྟོགས་པ་ཁྱེད་ལ་རེ། །མཆོག་ཐུན་གྱི་དངོས་གྲུབ་ཁྱེད་ལ་ཞུ། །ལས་བཞི་ཡི་ཕྲིན་ལས་ཁྱེད་ཀྱི་སྒྲུབ། །ཕ་ཁྱེད་ལས་གཞན་པའི་སྐྱབས་ཅིག་མེད། ། ཕྱི་ཆོས་བརྒྱད་ཀྱི་འུར་ཟིང་ཁྱེད་ལ་མེད། །ནང་རེ་དོགས་དང་ཆགས་སྡང་ཁྱེད་ལ་མེད། །བར་མཚན་འཛིན་གྱི་སྤྲོས་པ་ཁྱེད་ལ་མེད། །ཕ་ཁྱེད་ནི་རྫོགས་པའི་སངས་རྒྱས་ཡིན། ། བཀའ་སྡེ་སྣོད་གསུམ་གྱི་དགོངས་དོན་ཤེས། །ལམ་བསླབ་པ་གསུམ་པོ་ཚུལ་བཞིན་བསྲུང་། །མདོ་རྒྱུད་ཀྱི་གཞུང་དང་ཞུ་དག་ཕེར། །ཕ་བླ་མ་ཁྱེད་བསམ་བཞིན་ཇེ་དྲན་རེད། ། ས་ཆེན་པོའི་ཁྱོན་འདིར་བླ་མས་གང་། །མཁས་བཙུན་གྱི་སྐད་གྲགས་མང་ནའང་། །རྗེ་ཁྱེད་ཀྱི་རྣམ་ཐར་བསམ་ཙ་ན། །ཕ་ཁྱེད་དང་མཚུངས་བ་ཉིན་སྐར་ཙམ། ། དཔལ་མཉམ་མེད་དི་པམ་ཀ་ར་སོགས། །སྔོན་བཀའ་གདམས་གོང་མའི་རྣམ་ཐར་རྣམས། །ཚུལ་བཞིན་དུ་ཕྱག་ལེན་གནང་མཁན་དེ། །ངའི་བླ་མ་ལྟ་བུ་ཕལ་ཆེར་དཀོན། ། སྡོམ་དམ་ཚིག་ཉམས་ཆགས་དྲི་མས་གོས། །སེམས་ཆགས་སྡང་ཆོས་བརྒྱད་དུག་ཆུས་བསླད། །ཕྱི་ལྟར་སྣང་ཆོས་གཟུགས་ཀྱི་ལས་ངན་པོ། །བུ་ང་ལ་རེ་ས་ཁྱེད་ལས་མེད། ། ཚེ་འདི་ཕྱི་བར་དོ་ཐམས་ཅད་དུ། །ཕ་ཁྱེད་ཀྱི་ཐུགས་རྗེས་ཕྱག་གིས་སྐྱོབས། །སེམས་བསམ་པ་ཆོས་བཞིན་འགྲུབ་པ་དང་། །ནུབ་བདེ་ཆེན་ཞིང་དུ་སྐྱེ་བར་ཤོག ། ཞེས་ཐུགས་རྗེ་དང་བཀའ་དྲིན་མཚུངས་པ་མེད་པའི་ཀུན་གཟིགས་མཁན་ཆེན་བླ་མའི་རྗེས་དྲན་ཉུང་ངུ་འདི་ཉིད་ཆོས་གྲོགས་འགའི་ཐུགས་བཞེད་ལྟར།འཇིགས་བྲལ་པདྨ་རིག་འཛིན་ནས་གང་དྲན་ལྷུག་པར་འབོལ་རྩོམ་དུ་རབ་གནས་ལྕགས་བྱི་ཟླ་དང་པོའི་ཚེས ༡༠ སྤྱི་ལོ་༢༠༢༠ཟླ་༣ཚེས་༤ལ་བྲིས་པ་དགེ་བར་རྗེས་དྲན་མ་བཅོས་སེམས་ཀྱི་འཆར་སྒོ། རྣམ་འདྲེན་ཐུབ་པའི་དབང་པོའི་ཞལ་ཚབ་ནི་སྒྱུར་ཞིང་། །བཀའ་དྲིན་མཚུངས་པ་མེད་པའི་དྲིན་ལྡན་གྱི་བླ་མ། །སྐྱབས་རྗེ་ཀུན་གཟིགས་མཁན་ཆེན་དགེ་ལེགས་ནི་ཆོས་འཕེལ། །བྱང་ཆུབ་སྙིང་པོའི་བར་དུ་འབྲལ་མེད་དུ་འདུད་དོ། ། གང་གི་ཐུགས་བསྐྱེད་སྨོན་ལམ་ཟབ་མོ་ཡི་མཐུ་དང་། །རང་གི་སྔོན་བསགས་ལས་འཕྲོ་བཟང་པོ་ཡི་སྟོབས་ཀྱིས། །མཁན་ཆེན་ཆོས་ཀྱི་རྒྱལ་པོའི་ཞབས་པད་ལ་བརྟེན་ནས། །ཟབ་རྒྱས་ཆོས་ཀུན་ཐོབ་པའི་དུས་བཟང་དེ་སྤྲོ་བྱུང་། ། འོན་ཀྱང་སྙིགས་ལྔའི་གདུལ་འགྲོའི་བསོད་ནམས་ནི་ཞན་པས། །སྣ་ཚོགས་ཆོ་འཕྲུལ་ཟླ་བའི་དམར་ཕྱོགས་ནི་ཉེར་ལྔར། །རིགས་གསུམ་མི་འགྱུར་དཔལ་གྱི་བསམ་ཡས་ཀྱི་མདུན་ཞོལ། །ཕ་གཅིག་བླ་མའི་དགོངས་པ་ཞིང་ཁམས་ལ་གཏད་སོང་། ། བཀའ་དྲིན་ཅན་གྱི་བླ་མ་ཞིང་ཁམས་ལ་ཕེབས་ནས། །ལས་ངན་ཁུར་གྱིས་དུབ་པའི་བཙུན་གཟུགས་ང་བསྐྱུར་སོང་། །བླ་སློབ་བྲལ་དགོས་བྱུང་བའི་དུས་སྐབས་འདི་བསམས་ཚེ། །བཅོས་མིན་དུངས་བའི་སྨྲེ་སྔགས་དབང་མེད་དུ་ཤོར་ཐལ། ། ད་སྐབས་བདེ་སྐྱིད་ཉམས་དགའི་ཞིང་མཆོག་ནི་གང་ན། །གྲུབ་བརྙེས་རིག་འཛིན་རྒྱ་མཚོ་སྤྲིན་ཕུང་བཞིན་འཁྲིགས་པའི། །ང་ཡི་བླ་མས་ཟབ་གསང་ཐེག་ཆེན་གྱི་ཆོས་འཁོར། །བསྐོར་བའི་ངང་ཚུལ་ཡིད་ཡུལ་འགོག་མེད་དུ་ཤར་བྱུང་། ། སྔར་ཞིག་མདུན་ན་བཞུགས་པའི་ཀུན་མཁྱེན་གྱི་བླ་མ། །ད་ལྟར་ཞལ་རིས་མཇལ་བའི་སྐལ་བ་དང་བྲལ་ནས། །གཟུགས་བརྙན་དཔེ་རིས་ཙམ་ཞིག་མཆོད་གྲལ་དུ་འཇོག་པའི། །དབང་མེད་སེམས་ཀྱི་མྱ་ངན་བཟློག་ཐབས་ནི་མ་བྱུང་། ། ཕ་གཅིག་བླ་མ་དག་པའི་ཞིང་ཁམས་ན་སྐྱིད་ཀྱང་། །ལས་ངན་གདུལ་བྱ་མ་དག་འཁོར་བ་ན་སྡུག་པའི། །རང་ཉིད་བདེ་དགའ་ཙམ་ཞིག་དང་ལེན་ནི་བྱ་བ། །ཐེག་ཆེན་སེམས་དཔའ་ཁྱེད་ལ་མཛའ་བ་ཞིག་མ་ལགས། ། བརྩེ་ཆེན་དྲི་བྲལ་སྤྱན་གྱིས་ས་ལེར་ནི་གཟིགས་པས། །སྙིགས་ལྔའི་འགྲོ་ཁམས་འདི་ལ་རིང་མིན་གྱི་དགོངས་པ། །རྒྱལ་བསྟན་གཞིར་བཞེངས་ནུས་པའི་ཐུགས་རྗེ་ཡི་ཡང་སྤྲུལ།…

སྐྱེན་པོའི་དགེ་སློང་པདྨ་བསམ་འཛིན་གྱི་རྣམ་ཐར་ཀུན་བཟང་ཞིང་གི་ནོར་བུ།།ཨེ་མ་ཧོ།།བརྒྱུད་གསུམ་རིག་འཛིན་བླ་མའི་བཀའ་གཏེར་བདག།གཏེར་ཆེན་དྲག་སྔགས་གླིང་པའི་ཐུགས་སྲས་མཆོག།གསང་གསུམ་བཤད་སྒྲུབ་ཕྲིན་ལས་རྟག་བརྩོན་པའི།།རྣམ་དག་དགེ་སློང་པདྨ་བསམ་འཛིན་རྟག་ཏུ་རྒྱལ།།དེ་ཡང་བསླབ་གསུམ་ནོར་བུའི་མཛོད་འཆང་། སྐྱེན་པོའི་དགེ་སློང་ངམ་པདྨ་བསམ་འཛིན་ནི། སྤྱི་༡༩༡༡ལོར་ཡབ་སྐྱེན་པོའི་འབྱུང་གནས་དང་། ཡུམ་སྒྲོལ་མ་ལྷ་དཀར་གཉིས་ཀྱི་སྲས་སུ་འཁྲུངས། ཆུང་ནས་བཟུང་དམ་པའི་ཡོན་ཏན་དང་ལྡན་ཞིང་བྱམས་དང་སྙིང་རྗེའི་ཤེས་རབ་ལྷན་སྐྱེས་སུ་མངའ་བ། ཁྱད་པར་སེམས་ཅན་ཀུན་ལ་སྙིང་རྗེ་ཆེ་བ་དང་། སངས་རྒྱས་བྱང་སེམས་ལ་བཅོས་མིན་གྱི་དད་པ་ལྡན་པའི་སྐྱེས་བུ་དམ་པའི་ཚུལ་དང་ལྡན་པའོ། དེ་ནས་ནར་སོན་པའི་དུས་ལ་ཡང་ཤེས་བརྩོན་ནི་ཆོས་ལ་སྦྱོང་འདོད་ཀྱི་བློ་དང་། འཁོར་བ་མཐའ་དག་ལས་ངེས་འབྱུང་གི་བློ་བཅོས་མིན་འཁྲུངས་ཏེ་ཕ་མ་ལ་རབ་ཏུ་བྱུང་བར་བསྐུལ་བས། ཕ་མས་ཀྱང་དེ་བཞིན་འཐད་པར་བྱུང་། པཱ་ཐུར་མཁན་པོ་༧ཐུབ་དགའ་ཡིད་བཞིན་ནོར་བུའི་སྐུ་མདུན་ནས་རབ་ཏུ་བྱུང་བ་དང་། དགེ་མང་མཁན་པོ་ཡོན་ཏན་རྒྱ་མཚོ་དང་དགེ་གུང་མཁན་པོ་ཀུན་དཔལ་དང་དེ་བཞིན་བླ་མ་དགེ་བའི་བཤེས་གཉེན་དུ་མ་ལ་བསྟེན། ཁྱད་པར་དུ་ཞེ་ཆེན་དྲུག་པ་༧སྣང་མཛད་གྲུབ་པའི་རྡོ་རྗེའི་སློབ་མར་གྱུར། ད་དུང་༧མཁན་པོ་རྒྱ་མཚོ་དང་། ༧རྫ་རྒྱལ་ཐུབ་བེའི་སྐུ་མདུན་ནས་རིག་གནས་དང་འདོན་ཆོག་བསྐོར་གསན་བསམ་གནང་། གཞན་ཡང་མཁྱེན་ཀོང་མཆོག་ལས་བརྒྱུད་་པའི་གཏེར་མཛོད་དང་། ཞེ་ཆེན་༧ཀོང་སྤྲུལ་ལས་བརྒྱུད་པའི་བཀའ་མ་དང་གཏེར་མའི་དབང་ལུང་ཆ་ཚང་གསན་བསམ་སྒོམ་པ་དང་། གཞན་ལ་བཀའ་མ་ཚར་གཉིས་དང་། གཏེར་མཛོད་ཚར་གསུམ་གྱི་ཁྲིད་ལུང་སྤེལ་བར་མཛད་དོ། དམིགས་བསལ་ཐུན་མིན་རྩ་བའི་བླ་མ་༧གཏེར་ཆེན་པདྨ་དྲག་སྔགས་གླིང་བའི་དངོས་སློབ་ཏུ་འགྱུར།དྲག་གླིང་གི་སྐུ་མདུན་ནས་རིག་པ་གཅེར་མཐོང་རང་གྲོལ་དང་ཡེ་ཤེས་བླ་མའི་དབང་ཁྲིད་ཞུས།གཏེར་ཆེན་བླ་མས་རིག་པའི་རྩལ་དབང་ཞུས་ཏེ་བླ་སློབ་དགོངས་པ་གཅིག་ཏུ་གྱུར། དེ་ནས་སྒོམ་དཅ་རི་ཁྲོད་ཁོ་ལ་ན་ལ་སྒོམ་རྩེ་གཅིག་བརྦོན། ཁྱད་པར་རིག་འཛིན་དྲག་གླིང་གི་གཏེར་ཆོས་ཡོངས་རྫོགས་ཞུས། ཡང་དགོས་རྫོགས་པ་ཆེན་པོའི་སྙིང་དོན་སུམ་ཅུ་ལ་ཐུགས་དམ་དུ་བཞེས་ནས་གྲུབ་པའི་གོ་འཕང་མཐོན་པོ་ལ་བཤེགས། དམ་པ་ཁོང་ཐུན་མིན་གྱི་བཞུགས་གནས། སྔ་འགྱུར་རྒྱལ་བ་ཞེ་ཆེན་དགོན་གྱི་སྒྲུབ་ཁང་གོང་མའི་ནང་དུ་སྐུ་མཚམས་མི་ལོ་བཞི་བཅུ་ལྷག་བཞུགས་སོ། དེས་སྐབས་སུ་༧ཞེ་ཆེན་རབ་འབྱམས་རིན་པོ་ཆེ་དང་། ༧ཞེ་ཆེན་རྒྱལ་ཚབ་དག་གིས་འཚོ་བའི་མཐུན་རྐྱེན་སྦྱར། འཇིག་རྟེན་འདི་འཛིའི་བྱ་བ་ཐམས་ཅད་རིང་དུ་སྤོང་། ཆོས་བརྒྱད་རྒྱབ་དུ་དོར། ངག་བཅད་མི་ལོ་ལྔ་བཅུ་ལ་བྱས། ཕྱི་ལྟར་ན་རྒྱུན་དུ་ཞི་ཞིང་དུལ་བ་དགེ་སྦྱོང་གནས་བརྟན་ཆེན་པོ། ནང་དུ་བྱང་ཆུབ་སེམས་པའི་ཐུགས་ཀྱི་སྤྱོད་པ་སེམས་ཅན་ཀུན་ལ་བཅོས་མིན་གྱི་སྙིང་རྗེ་ཆེན་པོ་མངའ་བའི་སེམས་ཅན་གྱི་དོན་ཁོ་ན་བརྩོན་པའི་བྱང་ཆུབ་སེམས་དཔའ་ཆེན་པོ་ཞིག་དང་། གསང་བ་རྫོགས་པ་ཆེན་པོའི་ཁྲེགས་ཆོད་ཀྱི་དགོངས་པ་མཐར་ཕྱིན། ལྷུན་གྲུབ་ཀྱི་སྣང་ཆ་ཉམས་གོང་འཕེལ་རིག་པ་ཚད་ལ་ཕེབས་ནས་ཆོས་ཉིད་ཟད་སར་མངའ་དབང་འབྱོར། ཕྱིས་སུ་སྤྱི་ལོ་༡༩༥༨ལོར་རྒྱ་དུས་ལོག་པའི་དུས་སྡེ་དམག་རུ་ཁག་དག་བླ་མ་འཛིན་དུ་རི་ཁྲོད་ན་ཡོང་བའི་དུས། ཁོ་ཚོ་མ་ཐོན་གོང་དུ་བླ་མ་སྐྱེ་འཆི་ལ་མངའ་དབང་འབྱོར་བའི་སྟོབས་ཀྱིས། ཞིང་གཞན་དུ་གཤེགས་ཟིན་འདུག དེ་ཡི་དུས་སྐུ་གདུང་ལ་བདག་སྐྱོང་སོགས་བྱེད་པའི་དུས་ཚོད་དང་དབང་ཆ་ཀྱང་མེད། ཆོས་ལ་སྡང་ཞུགས་ཆེ་བའི་དུས་མཐའི་རླུང་ནག་མཚུབ་མའི་ཁྲོད་ནས་ཉི་མ་དང་འདྲ་བའི་བླ་མ་ཁོང་གི་འགྲོ་དོན་རེ་ཞིག་མཇུག་རྫོགས་པར་བྱས་སོ། །མཆོག་གསུམ་རིན་ཆེན་སྣང་བ་རྟག་འགྲོགས་ཤིང་།།བསླབ་གསུམ་ཡོན་ཏན་རྒྱ་མཚོའི་གཏེར་ལ་དབང་།།ཁམས་གསུམ་འགྲོ་དོན་མཛད་པ་མཐར་ཕྱིན་པའི།།བརྒྱུད་གསུམ་བླ་མའི་ཕྲིན་ལས་ལྷུན་གྲུབ་ཤོག།ཅེས་པ་རབ་གནས་ལྕགས་བྱི་ཆོ་འཕྲུལ་ཟླ་བའི་དུས་ཚེས་དགེ་བར་པདྨའི་དགའ་ཚལ་གླིང་ཆོས་མཆེད་གླེང་མོལ་ལ་སྐྱེན་པོའི་རྒན་པ་འགའ་ཞིག་གི་ངག་རྒྱུན་བཞིན་དུ་དཔལ་དགྱེས་པ་རྡོ་རྗེས་སེང་གླིང་དགེ་མང་རྫོགས་ཆེན་དགོན་དུ་བྲིས་པར་དགེའོ།།

ཐོད་པ་བརྟག་ཐབས། ཀ་པཱ་ལ། ཀ་པཱ་ལ་ཞེས་པ་ལེགས་སྦྱར་གྱི་སྐད་དེ། བོད་སྐད་དུ་ཐོད་པའི་མིང་ཡིན། དེ་ལ་མཁས་གྲུབ་རྗེའི་རྣལ་འབྱོར་རོལ་བའི་དགའ་སྟོན་དུ། དེ་ཡང་བླ་མ་དང་དཀྱིལ་འཁོར་གྱི་ལྷ་དང་དཔའ་བོ་དང་རྣལ་འབྱོར་མ་དག་ལ་ཚོགས་ཀྱི་འཁོར་ལོ་དང་། དཔའ་བོའི་སྟོན་མོ་དང་། དཀྱིལ་འཁོར་བསྒྲུབ་ཅིང་མཆོད་པའི་གནས་སྐབས་ལ་སོགས་པ་དུས་ཁྱད་པར་བ་དང་། དུས་ནར་མ་བའི་ཚེ་བདག་དང་ལྷ་ལ་སོགས་པ་བདུད་རྩིའི་མཆོད་པས་ཚིམ་པར་བྱེད་པའི་བཏུང་པའི་སྣོད་དང་། ལྷ་དང་མཁའ་འགྲོ་ཆོས་སྐྱོང་དང་འབྱུང་བོ་ལ་སོགས་པ་གཏོར་མས་ཚིམ་པར་བྱ་བའི་སྣོད་རྣལ་འབྱོར་བའི་ལྷུང་བཟེད་ཅེས་གསུངས་པ་ནི་ཐོད་པ་ཡིན་པས་འདིར་དེའི་རྣམ་གཞག་བཤད་པར་བྱ་སྟེ། རྗེས་དཀར་ཨོ་རྒྱན་བརྩོན་འགྲུས་ཀྱི་སྔགས་ཆས་རྣམ་པཤད་ལས། གསང་སྔགས་ཀྱི་དམ་རྫས་བདུད་རྩིའི་སྣོད་དང་རྣལ་འབྱོར་པའི་ཁམ་ཕོར་ལ་ནི་འཇིམ་པ་ལས་བྱས་པའི་སྣོད་དང་། རུས་སྦལ་གྱི་རུས་ཁོག་དང་། འཁར་བ་དང་། ཟངས་མ་དང་། ལྕགས་དང་། གསེར་དང་། དངུལ་དང་། དུང་དང་། ཉ་ཕྱིས་ཀྱི་ཁམ་ཕོར་དང་། བལ་བོ་སེའུའི་འབྲས་ཤུན་དང་། རྭ་ཅོ་དང་། ཤིང་ཕོར་དང་། རྡོ་སྣོད་དང་། ཐོད་ཕོར་བཅས་དུ་མ་ཞིག་ལ་བྱ་རུང་བ་ཡིན་ཏེ། བདེ་མཆོག་སྡོམ་འབྱུང་ལས། དེ་ནས་དེ་ཕྱིར་སྣོད་ཀྱི་ནི། །མཚན་ཉིད་མཆོག་ནི་ཡང་དག་བཤད། །འཇིམ་པའམ་དེ་བཞིན་རུས་སྦལ་སྣོད། །འཁར་བའམ་ཟངས་སམ་ལྕགས་ལས་བྱས། །གསེར་རམ་དངུལ་ལས་བྱས་པའམ། དུང་ངམ་དེ་བཞིན་ཉ་ཕྱིས་ཏེ། བལ་བོ་སེའུ་ཡི་འབྲས་བུ་མཚོག། དེ་བཞིན་གཞན་ཡང་གསར་བྱུང་བ། །རྭ་ལས་བྱུང་དང་ཤིང་སྣོད་སོགས། །གཞན་ཡང་རྡོ་སྣོད་ཁྱད་པར་རོ། །ཞེས་གསུངས་པའི་ཕྱིར་རོ། །རྒྱ་ཡིག་གི་མིང་། 颅骨、颅器རྒྱུ་ཆ། མིའི་ཐོད་རུས།1ངོས་འཛིན།ཀ་པཱ་ལ་ཞེས་པ་ལེགས་སྦྱར་གྱི་སྐད་དེ། བོད་སྐད་དུ་ཐོད་པའི་མིང་ཡིན། མཁས་གྲུབ་རྗེའི་རྣལ་འབྱོར་རོལ་བའི་དགའ་སྟོན་དུ། བླ་མ་དང་དཀྱིལ་འཁོར་གྱི་ལྷ་དང་དཔའ་བོ་དང་རྣལ་འབྱོར་མ་དག་ལ་ཚོགས་ཀྱི་འཁོར་ལོ་དང་། དཔའ་བོའི་སྟོན་མོ་དང་། དཀྱིལ་འཁོར་བསྒྲུབ་ཅིང་མཆོད་པའི་གནས་སྐབས་ལ་སོགས་པ་དུས་ཁྱད་པར་བ་དང་། དུས་ནར་མ་བའི་ཚེ་བདག་དང་ལྷ་ལ་སོགས་པ་བདུད་རྩིའི་མཆོད་པས་ཚིམ་པར་བྱེད་པའི་བཏུང་པའི་སྣོད་དང་། ལྷ་དང་མཁའ་འགྲོ་ཆོས་སྐྱོང་དང་འབྱུང་བོ་ལ་སོགས་པ་གཏོར་མས་ཚིམ་པར་བྱ་བའི་སྣོད་རྣལ་འབྱོར་བའི་ལྷུང་བཟེད་ཅེས་པ་དེ་ཡིན་གསུངས།2བརྟག་ཐབས།2_1གསོན་དུས་ཀྱི་བརྟག་ཐབས།གསོན་དུས་ཀྱི་བརྟག་ཐབས་ལ་སྔགས་ཆས་རྣམ་བཤད་ལས། དང་པོ་ནི། ཕོ་མོ་གང་ཡིན་ཡང་གསོན་དུས་སུ་བྱད་མདོག་སྔོ་ཞིང་ནག་པ་དང་། མིག་ཕུག་ཟབ་པ། སོ་སྐྱ་བ། སྐྲ་སེན་ཆེ་ལ་རྩུབ་པ། སྣ་ཆེ་ཞིང་རྩེ་རྣོ་བ། མཚོག་མ་འབུར་བ། སྨིན་མ་འབྲེལ་ཞིང་རིང་བ། མིག་དཀར་བ། མཁུར་མཐོ་བ། སོ་ཟོར་བ། མཆེ་བ་རིང་བ། མཆུ་གཡོར་བ། བསོད་ནམས་དང་ཟ་ཐང་ཆུང་བའི་ཐོད་པ་དེ་བཟང་པོ་ཡིན་པར་ཐེ་ཚོམ་མི་དགོས་པར་ཐོད་བཤད་རྣམས་སུ་བཤད་དོ། །ཞེས་གསུངས་པའི་ཕྱིར།2_2མ་བྲེགས་གོང་གི་ཁ་བལྟ་ཕྱོགས་ལས་བརྟག་པ།མ་བྲེགས་གོང་གི་ཁ་བལྟ་ཕྱོགས་ལས་བརྟག་པ་ལ་མཁས་གྲུབ་རྗེས་རྣལ་འབྱོར་རོལ་བའི་དགའ་སྟོན་དུ། དང་པོ་ནི། སྡོམ་འབྱུང་ལས། ས་གཞི་ལེགས་མཉམ་ཡུལ་དང་ནི། །ཐམས་ཅད་བྱེ་མའི་བཤོང་དག་ཏུ། །སྔགས་པས་བསྒྲུབ་པ་བྱའོ་དེར། །དེ་ཡིས་འགྱེལ་བ་བརྟག་པར་བྱ། །ལྷོ་རུ་ཁ་བལྟས་བྲམ་ཟེ་འཇོམས། །བདེན་བྲལ་དུ་འགྱེལ་བ་གླང་འཇོམས། །ཆུ་རུ་བལྟས་པས་སྔགས་པས་དམན། །རླུང་བལྟས་སྔགས་ནི་འཇིག་པར་བྱེད། །བྱང་དུ་ཁ་བལྟས་དབང་ཕྱུག་འགྱུར། །དབང་ལྡན་སྔགས་ཀྱི་དངོས་གྲུབ་སྟེ། །མ་ཉམས་པ་ཡི་བརྟུལ་ཞུགས་རྒྱུན། །མེ་དང་ལྡན་པ་ཉེ་བར་འཕྲོག །དེ་བཞིན་འོག་བལྟས་ཆོམ་རྐུན་ནོ། །སྟེང་དུ་ཁ་བལྟས་བུད་མེད་འཇོམས། །ལོགས་སུ་འགྱེལ་བ་གཏུམ་མོ་སྟེ། །སྣོད་ཀྱི་མཚན་ཉིད་རྣམས་ཤེས་བྱ། །ཞེས་གསུངས་སོ། །ཤོང་བློའི་འགྱུར་དུ་དེ་ལྟར་འབྱུང་ཞིང་། རྒྱུད་ཀྱི་འགྱུར་རྙིང་དུ། སྔགས་པས་དེར་ནི་བསྒྲུབ་བྱས་ལ། །དེའི་ལྟུང་བ་བརྟག་པར་བྱ། །ཞེས་དང་། བརྟུལ་ཞུགས་རྒྱུན་ནི་ཉམས་པ་མེད། །མེར་བལྟས་ཉེ་བར་འཕྲོག་པ་སྟེ། །ཞེས་འབྱུང་ངོ་། །དེ་ལ་བོད་ཀྱི་བླ་མ་སྔ་མ་ཁ་ཅིག འཇིགས་བྱེད་ཀྱི་རྒྱུད་ཀྱི་དུམ་བུར་བཞེད་ཅིང་། ཕྱིས་ཀྱི་མཁས་པ་ཁ་ཅིག ཡིད་བརྟན་དཀའ་བར་བཞེད་པའི་ལྷ་མོ་གནས་མཁར་གྱི་རྒྱུད་ཅེས་བྱ་བ་དང་། དེ་བ་ཨ་ཀ་ར་ཙནྟྲས་བྱས་ཟེར་བའི་ཐོད་པའི་མཚན་ཉིད་བརྟག་ལ་སོགས་གནས་མཁར་ཇི་ལྟ་བར་བྲིས་པ་སོགས་ལྟར་ན།…