ཨེ་ཝྃ་ཧོ།

མཁའ་འགྲོ་དུས་བཟང་བསུ།།ཨེ།དེ་རིང་གི་ཉི་མ་དགུང་ལ་ཆས།།ཕྱག་རྒྱ་ལ་རྡོ་རྗེ་ཕུར་བུ་བསྣམས།།གར་གཏད་ལ་གཞི་མེད་རྩ་བྲལ་བྱེད།།འཁོར་འདས་ཀྱི་ཁྱབ་བདག་ཧེ་རུ་ཀ།ཤྲཱིས་སོ།

ཨ་མ་རིན་པོ་ཆེའི་རྗེས་དྲན་ཚེ་དབང་སྒྱུ་འཕྲུལ་རོལ་མོ་སྒྲ་སྙན་ཞེས་བྱ་བ།ཨེ་མ་ཧོ།ན་མོ་མ་ཧཱ་གུ་རུ་ཨ་མ་མ་ལོ་ཡེ།།༡༽ཨ་མ་མ་སྐྱེས་དབྱིངས་ཆེན་ནམ་མཁའ་ལས།།ཨ་མ་མ་འགགས་འོད་གསལ་ཉི་ཟླའི་གར།།ཨ་མ་མ་ལོས་བྱམས་བརྩེའི་ཕྲིན་ལས་འོད།།ཨ་མ་མ་གྱུར་འགྲོ་བའི་མགོན་པོ་མཛོད།།༢༽ཨ་མ་མ་དྲན་ཉི་མ་གཅིག་ཀྱང་མེད།།ཨ་མས་མ་བརྩེ༌ལོ་ཟླ་ཞག་དུས་དབེན།།ཨ་མ་མ་ལོའི་ལུས་ངག་དཀའ་ངལ་སེལ།།ཨ་མ་མ་སྨད་གཟི་མདངས་རྒྱས་གྱུར་ཅིག།༣༽ཨ་མ་མ་མཆིས་ང་ཡང་གནས་འདིར་མེད།།ཨ་མས་མ་ལུས་བདག་ལ་གཅེས་པར་སྐྱོང་།།ཨ་མ་ཟླ༌མེད༌ཨ༌བུ༌ཁེར༌རྐྱང་ངས་།།ཨ་མ་བདེ་བའི་སྨོན་ལམ་རྒྱ་མཚོ་འདེབས།།༤༽ཨ་མ་མ་གཡོགས་བསམ་པ་ང་ལ་མེད།།ཨ་མ་མ་བརྩེ་བསམ་པ་དེ་བས་མེད།།ཨ་མ་གཅེས་པའི་དགེ་བའི་རྩ་བ་འདིས།།ཨ་མ་འཛམ་གླིང་སྟེང་གི་དབུས་ན་བཞུགས།།༥༽ཨ་མའི་དོན་དུ་སྐྱབས་འགྲོ་སེམས་བསྐྱེད་ནས།།ཨ་མ་མཆོད་པའི་མཎྜལ་རྒྱུན་དུ་འབུལ།།ཨ་མ་བརྩེ་དུང་གུས་པས་ཕྱག་འཚལ་ཕྱིར།།ཨ་མ་མ་བརྙེས་ཐམས་ཅད་མཐོལ་ལོ་བཤགས།།༦༽ཨ་མའི་སྒོམ་སྒྲུབ་ཀུན་ལ་ཡི་རང་དང་།།ཨ་མའི་ཞལ་གདམས་ཆོས་ལ་བསྐུལ་བ་བྱས།།ཨ་མ་མྱ་ངན་མི་འདའ་བཞུགས་གསོལ་འདེབས།།ཨ༌མའི་དགེ་རྩ་ཀུན་ལ་བསྔོ་སྨོན་བྱ།།༧༽ཨ་མའི་སྐྱེ་བ་དམ་པའི་ཆོས་ཀྱིས་འཚོ།།ཨ་མའི་རྒ་བ་ཚེ་དང་སྒྲུབ་པ་མཉམ།།ཨ་མའི་ན་བ་བག་ཆགས་སྒྲིབ་པ་སྦྱོང་།།ཨ་མ་འཆི་བས་འཇའ་ལུས་འཕོ་ཆེན་ཤོག།༨༽ཨ་མའི་ལྟ་བ་རྫོགས་པ་ཆེན་པོས་ངང་།།ཨ་མའི་སྒོམ་པ་བདེ་བ་ཆེན་པོའི་དཔལ།།ཨ་མའི་སྤྱོད་པ་གནས་བརྟན་ཉེ་བ་འཁོར།།ཨ་མའི་གྲུབ་འབྲས་ཚེ་གཅིག་གཏན་སྲིད་ཟིན།།༩༽ཨ་མ་རྒྱ༌མཚོའི༌གཏིང༌གི་ནོར་བུ་བཞིན།།ཨ་མ་སྙིང་ནས་དུང་བ་རིན་པོ་ཆེ།།ཨ་མས་མི་ལུས་རིན༌ཆེན༌རང་ལག་ཏུ།།ཨ་མས་སྐལ་བཟང་གནང་བར་བཀའ་དྲིན་ཆེ།།༡༠༽ཨ་མས་མི་རྟག་བདེན་བཞིས་ཆོས་འཁོར་བསྐོར།།ཨ་མ་སྣོད་བཅུད་ཐམས་ཅད་བདེན་མེད་གསུངས།།ཨ་མ་སྒེག་མོས་མི་རྟག་མངོན་སུམ་སྟོན།།ཨ་མས་འདུས་བྱས་ཐམས་ཅད་མི་རྟག་བསྟན།།༡༡༽ཨ་མས་ལས་འབྲས་རྟེན་འབྲེལ་བསླུ་མེད་མཛད།།ཨ་མའི་སྙིང༌གི༌མཐིལ༌ན་དགེ་སེམས་མཆིས།།ཨ་མར་ལན་ཆགས་བསགས་པ་ཐམས་ཅད་དག།ཨ་མའི་དྲིན་ལན་འཇལ་བའི་རྒྱུ་འབྲས་ཟབ།།༡༢༽ཨ་མས་དཀའ་ངལ་འཁོར་བའི་སྡུག་བསྔལ་མྱོང་།།ཨ་མ་ཆུང་དུས་ཕ་མའི་གཞན་དབང་སོང་།།ཨ་མ་ཆེ་དུས་དབེན་པའི་རི་ལ་བྲོས།།ཨ་མའི་གཤིས་ཀ་དྲང་བདེན་རིན་པོ་ཆེ།།༡༣༽ཨ་མ་འཁོར་བའི་གནས་ལས་ངེས་པར་འབྱུང་།།ཨ་མ་རབ་བྱུང་ཚུལ་ཁྲིམས་རྣམ་པར་དག།ཨ་མའི་བྱམས་བརྩེ་དུང་པ་ལྷ་ལས་ལྷག།ཨ་མའི་སྙིང་རྗེ་ཀུན་ལས་ཁྱད་པར་འཕགས།།༡༤༽ཨ་མས་སངས་རྒྱས་དད་པ་འགྱུར་བ་མེད།།ཨ་མས་སེམས་ཅན་དགའ་བ་མཚུངས་པ་མེད།།ཨ་མས་བྱང་ཆུབ་སེམས་ལ་གཡོ་བ་མེད།།ཨ་མ་བྱང་ཆུབ་སེམས་དཔའ་རིན་པོ་ཆེ།།༡༥༽ཨ་མས་སྦྱིན་གཏོང་འཁོར་འདས་ཆགས་པ་མེད།།ཨ་མའི་སྡོམ་པ་སྲུང་བར་རློམ་སེམས་མེད།།ཨ་མ་བཟོད་པའི་གོ་ཆ་མཆོག་ཏུ་བརྟན།།ཨ་མ་ཉིན་མཚན་བར་མེད་ཆོས་ལ་བརྩོན།།༡༦༽ཨ་མ་ཏིང་འཛིན་རྒྱལ་པོའི་གཏན་སྲིད་ཟིན།།ཨ་མ་ཤེས་རབ་ཕ་རོལ་ཕྱིན་པར་ཐོབ།།ཨ་མའི་ཐབས་མཁས་དམིགས་མེད་སྙིང་རྗེ་ཆེ།།ཨ་མའི་མཐུ་སྟོབས་ནུས་པ་བསམ་མི་ཁྱབ།།༡༧༽ཨ་མ་སྨོན་ལམ་རྒྱ་མཚོའི་གཏེར་རྒྱ་ཅན།།ཨ་མ་ཡེ་ཤེས་དམ་པའི་དགོངས་པ་ཅན།།ཨ་མ་དག་སྣང་རབ་འབྱམས་ཕྲིན་ལས་ཅན།།ཨ་མ་ཀུན་བཟང་རྒྱལ་བ་རིན་པོ་ཆེ།།༡༨༽ཨ་མས་ཆོས་བརྒྱད་ཞེན་པ་རྩ་ནས་བཅད།།ཨ་མའི་ཚོགས་དྲུག་སྣང་བ་དག་པར་ཤར།།ཨ་མ་ཐུན་དང་ཐུན་མཚམས་དབྱེ་བ་མེད།།ཨ་མ་ཡང་དག་རྣལ་འབྱོར་རིན་པོ་ཆེ།།༡༩༽ཨ་མས་བླ་མ་ཀུན་ལ་དད་གུས་ཆེ།།ཨ་མས་ཡི་དམ་ཐམས་ཅད་བསྙེན་ཚད་ཕྱིན།།ཨ་མས་མཁའ་འགྲོ་རྒྱ་མཚོའི་སྒྲུབ་མཛད།།ཨ་མ་ཆོས་སྐྱོང་སྲུང་མ་རིན་པོ་ཆེ།།༢༠༽ཨ་མས་སྡུག་ཀུན་ཤེས་དང་སྤོངས་བར་མཛད།།ཨ་མས་ལམ་བཟང་བསྟེན་ནས་འགོགས་པ་ཐོབ།།ཨ་མའི་ལུས་སྲོག་དཀར་པོ་དགེ་བའི་ལུགས།།ཨ་མ་རྒྱུན་དུ་དྲན་ཉེར་བཞི་ལ་གནས།།༢༡༽ཨ་མ་སྲིད་དོན་འཆམས་པའི་བཙུན་གཟུགས་མིན།།ཨ་མ་གསེར་ཁྲིར་འགྱིངས་པའི་བདག་མོ་མིན།།ཨ་མ་རྒྱ་བོད་དཀོར་གཟན་དེ་བས་མིན།།ཨ་མ་ཉམ་ཆུང་ཆོས་པ་རྣམ་དག་ལགས།།༢༢༽ཨ་མ་སྐྱབས་རྗེ་མིང་གི་བརྫིག་རོ་དབེན།།ཨ་མ་ཁྱབ་བདག་མིང་གིས་ཁྱབ་བསྒྲགས་མེད།།ཨ་མའི་ལྷ་ཁང་གསེར་དངུལ་རྒྱུ་ངོམས་བྲལ།།ཨ་མ་བྱ་བྲལ་མཚན་ཉིད་ལྡན་པ་ལགས།།༢༣༽ཨ་མས་བསྡུས་གྲྭར་མ་སྦྱོང་ངེས་འབྱུང་འཁྲུངས།།ཨ་མས་རྩོད་གྲྭར་མ་རྒྱུགས་བྱང་སེམས་སྐྱེས།།ཨ་མས་གོས་དཀར་མ་གྱོན་དག་སྣང་ཅན།།ཨ་མ་གསུམ་ལྡན་རྡོ་རྗེ་འཛིན་མ་དངོས།།༢༤༽ཨ་མ་མཁའ་འགྲོའི་བཏགས་མིང་དགའ་བ་མེད།།ཨ་མ་སྤྲུལ་སྐུའི་ཐམ་ཁ་དེ་བས་དབེན།།ཨ་མས་ཟོག་པོ་བྱས་པ་སྣ་གཅིག་མེད།།ཨ་མ་འདི་ནི་བདེན་པ་རིན་པོ་ཆེ།།༢༥༽ཨ་མའི་དགའ་ས་གསང་གསུམ་དབེན་པའི་གནས།།ཨ་མའི་ཟ་མ་དཀར་ཟས་ཁོ་ནར་དགྱེས།།ཨ་མའི་ལས་ཀ་ཐམས་ཅད་འགྲོ་ཀུན་དོན།།ཨ་མའི་རྣམ་ཐར་ངེས་དོན་རྒྱལ་བའི་སྲས།།༢༦༽ཨ་མས་སྙིང་གྲོགས་བསླུ་པའི་ལོ་རྒྱུས་མེད།།ཨ་མས་དྲིན་ལན་ལོག་འཇལ་བྱས་པ་མེད།།ཨ་མ་ཞེ་སྡང་སྐྱེས་པ་མཐོང་མྱོང་མེད།།ཨ་མ་དྲིན་ཆེན་དྲང་སྲོང་རྒྱལ་བ་ལགས།།༢༧ཨ་མའི་གནའ་རབས་གཤིས་བཟང་འགྱུར་བ་མེད།།ཨ་མ་དེང་རབས་མིག་འཕྲུལ་དགའ་དུང་དབེན།།ཨ་མ་ཀུན་བཟང་བླ་མའི་མཚན་གཞི་ཡིན།།ཨ་མ་སྲིད་ན་དཀོན་པའི་ནོར་བུ་ལགས།།༢༨ཨ་མ་ང་རྒྱལ་དྲེགས་པའི་ཁེངས་སེམས་མེད།།ཨ་མ་ཆགས་བྲལ་ཉན་རང་དགྲ་བཅོན་དངོས།།ཨ་མ་འགྲོ་ལ་བརྩེ་བའི་ཏཱ་ར་ཉིད།།ཨ་མའི་མི་ཚེ་གང་གི་ཐུགས་དམ་ལགས།།༢༩༽ཨ་མ་ལྟ་བ་མཁའ་བཞིན་མཐོ་ན་ཡང་།།ཨ་མའི་རྒྱུ་འབྲས་བག་བྱེ་བས་ཀྱང་ཟབ།།ཨ་མ་ཧ་ཤང་ལས་ལྷག་དག་སྣང་མཁན།།ཨ་མ་རིག་འཛིན་གྲུབ་པ་མཐར་ཕྱིན་ལགས།།༣༠༽ཨ་མའི་ཕྱུགས་ལ་བྱམས་པའི་རྣམ་ཐར་དང་།།ཨ་མའི་བུ་ལ་བརྩེ་བས་མགོན་སྐྱབས་རིགས།།ཨ་མས་རི་ཁྲོད་བཞུགས་པའི་དཀའ་སྤྱད་སོགས།།ཨ་མ་མི་ལ་རས་པ་ལས་ཀྱང་ལྷག།༣༡༽ཨ་མས་ཀུན་མཁྱེན་བརྒྱུད་པའི་བསྟན་པ་འཛིན།།ཨ་མས་ཉིན་མཚན་བར་མེད་སྒོམ་པས་སྐྱོང་།།ཨ་མས་བཟང་པོ་སྤྱོད་པའི་སྨོན་ལམ་སྤེལ།།ཨ་མ་དམ་པའི་ཆོས་དང་ཀུན་ནས་འབྲེལ།།༣༢༽ཨ་མ་མཁའ་འགྲོ་བརྗོད་ན་མིན་ནོ་གསུངས།།ཨ་མ་ཡང་སྲིད་གྲངས་མེད་ཡོད་དོ་གསུངས།།ཨ་མ་སྐྱབས་འགྲོ་བྱང་སེམས་ལྡན་པར་གསུངས།།ཨ་མས་ནམ་ཡང་དུས་ཚོད་བརླགས་མེད་གསུངས།།༣༣༽ཨ་མ་ཨོ་རྒྱན་བཏགས་ལ་མིང་དོན་མཚུངས།།ཨ་མ་སྒྲོལ་མ་འབོད་པ་དོན་ལ་གནས།།ཨ་མ་ཨོ་རྒྱན་སྒྲོལ་མ་རིན་པོ་ཆེ།།ཨ་མ་དད་གུས་བཅས་ཏེ་ཕྱག་འཚལ་བསྟོད།།༣༤༽ཨ་མ་སྤྱི་བོའི་གཙུག་གི་ནོར་བུ་དང་།།ཨ་མ་སྙིང་གི་ཡིད་བཞིན་ནོར་བུ་ཡིན།།ཨ་མ་རྩ་བའི་བླ་མ་རིན་པོ་ཆེ།།ཨ་མའི་མན་ངག་འཁོར་འདས་རང་གྲོལ་ལགས།།༣༥༽ཨ་མ་རྒྱ་མ་དྲང་པོའི་རྒྱ་རྡོ་བཞིན།།ཨ་མ་མ་འདྲིས་བཤེས་ཆེན་པོ་ལགས།།ཨ་མ་ཕྱོགས་རིས་མེད་པའི་མི་མོ་ཉིད།།ཨ་མ་མཁས་གྲུབ་དམ་པའི་མཚན་ཉིད་ཚང་།།༣༦༽ཨ་མས་འགྲོ་བ་ཀུན་ལ་ཕ་མ་ཤེས།།ཨ་མས་བླ་མ་ཐམས་ཅད་སངས་རྒྱས་མཇལ།།ཨ་མའི་མཁྱེན་བརྩེ་ཡོན་ཏན་རིན་པོ་ཆེ།།ཨ་མ་ཡང་དག་ཆོས་པའི་མཚན་གཞི་དངོས།།༣༧༽ཨ་མས་སིདྡྷིའི་བསྙེན་པ་དུང་ཕྱུར་གྲངས།།ཨ་མས་མ་ཎི་དུང་ཕྱུར་དུ་མ་བསགས།།ཨ་མས་སྒྲོལ་མ་འདོན་པ་གྲངས་མ་མཆིས།།ཨ་མ་བསྐྱེད་རྫོགས་རིག་པ་འཛིན་མ་ལགས།།༣༨༽ཨ་མས་ཚན་རིག་པ་ལ་ངོ་དགའ་མེད།།ཨ་མས་ལྷ་འདྲེ་མཆོད་ལ་ཆགས་སྡང་མེད།།ཨ་མ་ཀུན་ལ་བྱམས་པའི་མ་མ་དངོས།།ཨ་མ་འདི་འདྲའི་སྲིད་ཞིའི་ཁམས་ན་དཀོན།།༣༩༽ཨ་མས་རང་ཚུགས་མ་ཤོར་རང་རིག་རྟོགས།།ཨ་མས་གཞན་སེམས་མ་དཀྲུགས་ཞི་བདེ་བསྐྲུན།།ཨ་མ་ཐེག་ཆེན་དགོངས་དོན་རྒྱུད་ལ་འབྱོར།།ཨ་མ་ཡུམ་ཆེན་ཤེས་རབ་ཕ་རོལ་ཕྱིན།།༤༠༽ཨ་མས་གཙང་སྦྲ་ཕྱི་ནང་གསང་བ་མཛད།།ཨ་མའི་བསྐྱེད་རྫོགས་སྲོག་སྡོམ་གཟེར་བཞི་ལྡན།།ཨ་མ་རྫོགས་པ་ཆེན་པོའི་དགོངས་པ་ཅན།།ཨ་མ་རྒྱལ་ཡུམ་དམ་པ་ཀུན་བཟང་མོ།།༤༡༽ཨ་མའི་སྐུ་ལུས་མཚན་དཔེ་ལང་ཚོ་བཀྲ།།ཨ་མའི་གསུང་སྙན་ཚངས་དབྱངས་ཆོས་སྒྲ་ཤིས།།ཨ་མའི་ཐུགས་རྗེ་སྟོབས་བཅུའི་ནུས་མཐུ་བདེ།།ཨ་མའི་ཀུན་བཟང་ཕྲིན་ལས་ཀུན་ཁྱབ་ལེགས།།༤༢༽ཨ་མ་དད་གུས་དུང་བའི་ཚོར་བ་རྣམས།།ཨ་མ་ཡོད་པའི་འགྲོ་ཡོངས་ལ་འབུལ།།ཨ་མ་ཀུན་གྱི་བསམ་དོན་ལྷུན་གྱིས་གྲུབ།།ཨ་མ་མ་གྱུར་འགྲོ་ཀུན་སངས་རྒྱས་ཤོག།ཅེས་པ་འདི་ཡང་རབ་གནས་ས་ཕག་རྒྱལ་ཟླ་བའི་ཡར་ངོས་ཚེས་བཅུ་ལ་དྲིན་ཆེན་ཨ་མའི་ཕྱག་གཡོག་པ་དཔལ་དགྱེས་པ་རྡོ་རྗེ་རུ་འབོད་པས་དངོས་ཡོད་ཨ་མའི་མི་ཚེའི་རང་གཤིས་ལ་རྩི་མཐོང་ཡོད་པ་སོ་སོའི་བློ་སྤོབས་ཆེན་པོས་གང་སྣང་དག་མདོར་བསྡུས་པ་ཙམ་ཨེ་ཝཾ་ཀུན་བཟང་ཆོས་གླིང་གི་ཛྙཱ་ན་གུ་རུའི་ལྷ་ཁང་། ཨ་མ་རིན་པོ་ཆེའི་སྐུ་དྲུང་ནས་ཡོངས་སུ་བགྱིས་པར་དགེའོ།། །། ཤྲཱིཿསརྦ་ལོ་ཀ་བི་ཛ་ཡནྟུ།།

མཁའ་འགྲོའི་དུས་ཆེན་བསུ།།ཨེ་མ་ཧོ།།ཆོས་སྐུའི་དབྱིངས་ན་མཁའ་འགྲོ་ཀུན་ཏུ་བཟང་།།ལོངས་སྐུའི་ཞིང་དུ་མཁའ་འགྲོ་ཝ་ར་ཧི།།སྤྲུལ་སྐུའི་ཀློང་དུ་མཁའ་འགྲོ་མཚོ་རྒྱལ་མ།།སྐུ་གསུམ་ཡོངས་ཀྱི་མཁའ་འགྲོའི་ཚོགས་ལ་འདུད།།གསང་གསུམ་བསྟན་འགྲོར་སྨན་པའི་དགེ་ལེགས་སྩོལ།།ཅེས་པ་མཁའ་འགྲོའི་དུས་ཆེན་ལ་ཐོལ་བྱུང་དུ་ཤྲཱིཿཨེ་མ་ཧོས་སྨྲས་པར་དགེའོ།། །།

མཁན་སྤྲུལ་ཐུབ་བསྟན་ཚུལ་ཁྲིམས་ཀྱི་ཞབས་བརྟན་རིན་པོ་ཆེ། ཨོཾ་སྭ་སྟི་ཨེ་མ་ཧོ།།ཀ་དག་གདོད་མའི་མགོན་པོ་ཀུན་ཏུ་བཟང་།།ལྷུན་གྲུབ་རིག་པའི་དབང་ཕྱུག་རྡོ་རྗེ་འཆང་།།ཟུང་འཇུག་སྤྲུལ་པའི་སྐུ་མཆོག་པདྨ་འབྱུང་།།དབྱེར་མེད་རྩ་བའི་བླ་མས་དུས་ཀུན་སྐྱོངས།།སྐུ་བསོད་ཚེ་དཔལ་ལང་ཚོའི་པདྨ་བཞད།།གསུང་མཛད་དམ་ཆོས་སྟོན་པའི་སྒྲ་དབྱངས་སྙན།།ཐུགས་རྗེ་རྫོགས་ཆེན་བསྟན་པའི་ཁྱབ་བདག་མཆོག།མཁན་སྤྲུལ་ཐུབ་བསྟན་ཚུལ་ཁྲིམས་ཞབས་བརྟན་ཤོག།ཐུབ་བསྟན་སྤྱི་དང་ཁྱད་པར་སྔ་འགྱུར་པའི།།བཤད་སྒྲུབ་ཕྲིན་ནས་ཚུལ་བཞིན་སྤེལ་བའི་མགོན།།ཉམས་ཐག་འགྲོ་བ་འདྲེན་པའི་སྤྲུལ་མཁན་སྤྲུལ་ཉིད།།སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག། ཅེས་པ་འདི་ཡང་རབ་གནས་ས་ཕག་ཧོར་ཟླ་དྲུག་པའི་ཡར་ངོའི་ཚེས་པ་བཅུའི་ཉིན། རིག་འཛིན་འདུས་པའི་ཚོགས་འཁོར་སྐབས་སུ་མཁའ་འགྲོ་མ་དམ་པ་རིག་འཛིན་དབྱངས་ཅན་ལྷ་མོས་བཀའ་མོལ་གྱི་རྐྱེན་ལས་མཁན་སྤྲུལ་དམ་པའི་ཞབས་བརྟན་ཏུ་དབྱིན་ཡུལ་ཨེ་ཝྃ་ཛྙྰ་ན་གུ་རུའི་ལྷ་ཁང་དུ་ཤྲྰིཿཨེ་མ་ཧོས་དེ་ཉིད་སྨོན་པས་དམ་པའི་གང་གི་འཕྲིན་ལས་ཕྱོགས་ཀུན་ཏུ་རྒྱས་པའི་དཔལ་དུ་གྱུར་ཅིག་གུ།། །།

ཚིག་གསུམ་གནད་བརྡེག་གི་མན་ངག་ནོར་བུའི་དོ་ཤལ།།ཨེ་མ་ཧོ། །ཨེ༵་རིག་སྟོང་པའི་ངོ་བོ་སྤྲོས་མཐའ་བརྒྱད་བྲལ་ནམ་མཁའ་ལྟ་བུར་ངོ་འཕྲོད་ཀྱང་། །མ༵་ལུས་འགྲོ་ལ་སྙིང་བརྩེའི་རང་བཞིན་འོད་གསལ་རིག་པས་བདག་ཏུ་སྐྱོང་། །ཨ་ཧོ༵་རིག་འཛིན་གྲུབ་པའི་རྟུལ་ཞུགས་མཛད་པའི་ཐུགས་རྗེ་ཀུན་ཁྱབ་ཡེ་ཤེས་རྩལ། །སྒྱུ་འཕྲུལ་དྲ་བའི་སྨིན་གྲོལ་སྟོན་པའི་མཚན་ཉིད་ཀུན་ལྡན་རང་རིག་བླ་མས་རྟག་ཏུ་སྐྱོངས། ། ཞེས་པ་རབ་རྒྱན་ཆུ་འབྲུག་ཟླ་༡ཚེས་༣དགེ་བར་རིག་འཛིན་ནམ་མཁའ་རྒྱ་མཚོ་ལ་གཅེས་ནོར་དུ་ཤྲཱིཿསྨྱོན་པས་གདམས་པ་དགེའོ། །

དྲིན་ཆེན་ཨ་མའི་སྐུ་གདུང་གི་ཕྱིར་ཏུ་འབྲེལ་འཇོག་དང་སྦྱིན་བདག་ཆེད་དུ་བྱས་པ་ཚང་མ་ལ་བཀའ་དྲིན་ཆེ་ཞུ་དང་མུ་འཐུད་ནས་ཨེ་ཝཾ་རྫོགས་ཆེན་དུས་འཁོར་འོད་གསལ་ཆོས་གླིང་དུ་བཞེང་རྒྱུ་གཏན་ཁེལ་བས་ལེགས་གྲུབ་ཡོང་བའི་སྨོན་ལམ་དང་སྦྱིད་བདག་ཡོང་ལ་བཀའ་དྲིན་ཆེ་ཞུའོ།། ཨེ་མ་ཧོས་་་ Update on Urgen Drolma Lama Relic Stupa and King Gesar Statue Sponsorships We are pleased to inform all we received donations for our Urgen Drolma Lama Relic Stupa project from 4 new sponsors from the country of Malaysia and United Kingdom via online donation. Thank you to all sponsors for your kind donation to support Rinpoche’s vision to built Dakini Urgen Drolma Lama’s Stupa in his retreat land in United Kingdom. In addition, we received 2 new King Gesar Statue Sponsorships from the USA via online donation. 1) Updated King Gesar Sponsor…