ཨེ་ཝྃ་ཧོ།

དགེ་རྒན་ཞིག་གི་མི་ཚེའི་བརྒྱུད་རིམ།འོད་གསལ་མཐའ་ཡས།༡རང་ཉིད་ནི་ཆུང་ལོ་ངོ་དྲུག་ནས་བཟུང་བྱམས་ལྡན་ཕ་ལོ་དང་ལྷན་དུ་སྐྱིད་སྡུག་འཚོ་བའི་གོམ་ཁ་བསྒྱུར་ནས་ནར་སོན་པའི་འབྲོག་ཕྲུག་ཅིག་ཡིན།ཆུང་དུས་ནས་ཨ་ཕས་ང་ལ་འབྲི་ཀློག་གི་ཡོན་ཏན་བསླབས། ངའི་མི་ཚེ་ཡི་རིན་ཐང་འཚོལ་ཕྱིར་ཨ་ཕའི་ལུས་ཀྱི་དཀའ་ལས་རི་ལྟར་ལྕི་ལ། སེམས་ཀྱི་ཁུར་བོ་འཚོ་ལྟར་ཟབ་ཀྱང་ངལ་བ་འབུམ་ཕྲག་གིས་བསྐྲུན་ཏེ་འདས་པའི་བགྲང་བྱ་ཉི་ཤུ་ལྷག་ལ་ཡོད་ཚད་ནས་ཡོད་ཚད་ངའི་ཕྱོགས་སུ་བཏང་ཡོད་པ་ནི། ནམ་ཡང་བརྗེད་དུ་མེད་པའི་དྲན་ཤིང་གི་རྡོ་རིང་ཞིག་ཏུ་ཆགས་ནས་ཡོད། ད་དུང་ཕ་ལོ་ལགས་ཀྱི་སྐུ་དྲིན་འོག་ངེས་མེད་ཀྱི་གྲྭ་ས་མང་པོ་ཞིག་ལ་འགྲིམ་པའི་གོ་སྐབས་ཐོབ། ༧ཆོས་རྗེ་དམ་པ་ཡིད་བཞིན་ནོར་བུའི་ཞལ་མཇལ་ཆོས་ཀྱི་འབྲེལ་བ་ཐོབ། མཚན་ལྡན་དགེ་བའི་བཤེས་གཉེན་ཟླ་བརྒྱུད་མ་ཧཱ་པནྟྲི་ཏ་མཁན་ཆེན་པད་མ་ཚེ་དབང་གི་སྐུ་མདུན་ནས། ལོ་གཅིག་ལྷག་སྤྱི་དོན་འོད་གསལ་སྙིང་པོ་སོགས་དམ་པའི་ཆོས་ཀྱི་འབྲེལ་བ་ཐོབ། མགོན་བླ་པདྨའི་སྐུ་མདུན་ནས་ཆོས་སྐྱོང་སྡེ་དགུའི་སྲོག་དབང་ཐོབ། དེ་ཡི་རྗེས་སུ་རྫ་ཀ་ཐོག་དགོན་གྱི་མཁན་སྨུག་ལྡོག་གི་མདུན་ནས་དམ་པའི་ཆོས་ཀྱི་འབྲེལ་བ་ཐོབ། གནས་དེ་ན་དབྱར་གནས་ཟླ་གཅིག་དང་ཟླ་ཕྱེད་དུ་གནས། དེའི་ཕྱིས་སུ་རང་དགོན་གྱི་༧མཁན་ཆེན་བླ་མ་རིན་པོ་ཆེ་དང་། ༧མཁན་བཤད་སྒྲུབ་རྒྱ་མཚོ། ༧མཁན་པོ་འཇམ་དབྱངས་བློ་གྲོས་༧མཆོག་སྤྲུལ་ཀུན་བཟང་རིག་རྩལ་གྱི་མདུན་ནས་ཟབ་མོའི་ཆོས་ཀྱི་གདམས་ངག་དུ་མ་ཐོབ། རང་དགོན་དུ་བགྲང་བྱ་གསུམ་ལྷག་ལ་དབྱར་གནས་དང་རིག་གཞུང་གི་ཕྱོགས་སུ་བརྩོན། དེའི་ཕྱིས་སུ་རང་གི་བཀའ་དྲིན་སུམ་ལྡན་གྱི་རྩ་བའི་བླ་མ་ངེས་གསང་རྫོགས་པ་ཆེན་པོའི་བསྟན་པའི་སྒྲོན་མེ་༧ཨ་འཛོམ་འབྲུག་སྤྲུལ་རྡོ་རྗེ་འཆང་གི་སྐུ་མདུན་ནས་ལོ་གསུམ་གྱི་རིང་ཁྲིད་ཡིག་ཡེ་ཤེས་བླ་མ་དང་།ཁྲིད་ཡིག་ཐར་ལམ་གསལ་སྒྲོན། ཀུན་བཟང་བླ་མའི་ཞལ་ལུང་། སྙིང་ཐིག་ཡབ་བཞིའི་དབང་ལུང་། བཀའ་མ་དབང་ལུང་ཆ་ཚང་སོགས་ཟབ་མོ་ཆོས་ཀྱི་བགོ་སྐལ་ཐོབ་པའི་སྐལ་ལྡན་དུ་གྱུར། ད་དུང་མཁན་ཆེན་ཟླ་བའི་དབང་པོའི་སྐུ་མདུན་ནས། གཞུང་ཆེན་ཀ་པོད་ལྔའི་ནང་ཚན་དབུ་འདུལ་གཉིས་སོགས་བགྲང་བྱ་གསུམ་གྱི་རིང་དུ་ཐོས་བསམ་བྱས། དེའི་ཕྱིས་སུ་རྫ་རྒྱུད་ལྕང་མ་རི་ཁྲོད་དུ་བགྲང་བྱ་གཅིག་ལྷག་གི་རིང་།གསེར་རྟའི་མཁན་ཆེན་ཞོ་རོགས་ཡེ་ཤེས་ལགས་ཀྱི་སྐུ་མདུན་ནས། གཞུང་ཆེན་དག་གི་སློབ་ཁྲིད་ལ་ཐོས་བསམ་བྱས། དེའི་ཕྱིས་སུ་སྔ་འགྱུར་རྒྱལ་བ་ཞེ་ཆེན་དགོན་ནས། ངེས་པའི་རྣལ་འབྱོར་བ་མཁན་ཆེན་པདྨ་རྡོ་རྗེའི་སྐུ་མདུན་ནས་ལོ་འཁོར་གསུམ་གྱི་རིང་དུ། རིག་པའི་གནས་ཆེན་གནས་ཆུང་དག་ལ་ཐོས་བསམ་ལྷོད་མེད་དུ་བྱས། དེ་ཡི་ཕྱིས་སུ་གསེར་ལྗོངས་བླ་མ་རུང་ལྔ་རིག་ནང་བསྟན་སློབ་གླིང་ནས། བགྲང་བྱ་ལྔའི་རིང་དུ་གཙོ་བོ་མཁས་པའི་ཁྱུ་མཆོག་༧མཁན་ཆོས་ཐོ། ༧མཁན་རིག་ལྔ། ༧མཁན་བརྩོན་འགྲུས་མཐར་ཕྱིན། ༧མཁན་བསོད་དབང་། མཁན་གང་བསམ་ལྷུན་འགྲུབ། ༧བླ་མ་གུ་རུ་སོགས་ཀྱི་མདུན་ནས་མདོ་རྒྱུད་ཀྱི་གདམས་ངག་དུ་མ་ལ་ཐོས་བསམ་སློབ་གཉེར་བྱས་པའི་དྲིན་གྱིས། བློ་བླ་མ་དཀོན་མཆོག་གསུམ་ལ་གཏད། ལས་རྒྱུ་འབྲས་ལ་བརྩི་སྲུང་ཡག་པོ་ཤེས། རང་མགོ་ཉི་མ་ཆོས་ཀྱིས་ཐོན་པའི་སློབ་གསོ་འཕྲོད་ནས་ཡོད་པའི་ལས་ཅན་ཞིག་ཏུ་གྱུར།དེ་དག་ནི་ཕྲན་གྱི་ཚེ་སྟོད་ཀྱི་ལོ་རྒྱུས་མདོར་བསྡུས་སུ་བཀོད་པའོ།།བར་སྐབས་ཀྱི་ཚིག་བཅད།ལང་ཚོའི་ལྟེ་ཁྲག་བསིལ་ལྡན་ལྗོངས་སུ་འཕོས། །ལས་ཀྱི་མེ་ཏོག་སྔ་འགྱུར་བསྟན་དང་མཇལ།།སངས་རྒྱས་དངོས་འདྲའི་བསྟན་འཛིན་སྐྱེས་ཆེན་འཕྲད།།ང་འདྲའི་བསོད་ནམས་ཅན་དེ་རེ་ཟུང་ཙམ།།༢དེ་ཡི་ཕྱིས་སུ་༢༠༡༠ལོར་ཕ་གཅིག་བླ་མ་རིན་པོ་ཆེ་མཁན་ཆེན་བླ་མའི་བཀའ་གསུང་ནང་བཞིན། རང་ཡུལ་གྱི་ཕྱོགས་སུ་བོད་རང་གི་རིག་གཞུང་ཉམས་རྒུད་དུ་འགྲོ་བཞིན་ཡོད་པ་ནི་ཉིན་རེ་ནས་ཉིན་རེ་བཞིན་ཉམས་ཇེ་དམའ་ཉག་ཇེ་ཕྲ་ཡིན་པ་སྨོས་མ་དགོས་པའི་ལོ་རྒྱུས་འབུར་དོད་ཞིག་ཏུ་ཆགས་ནས་ཡོད། རྒྱུ་མཚན་དེས་ན་བླ་མས་ང་ལ། ད་སྔོན་ཁྱོད་ཀྱིས་ཐོས་བསམ་གྱི་ཕྱོགས་སུ་ལོ་མང་ལ་འབད་བརྩོན་བྱས་པའི་གྲུབ་འབྲས་ནི། རབ་ན་མི་མེད་དབེན་པའི་རི་ལ་སྒྲུབ་པའི་རྒྱལ་མཚན་ཚུགས། འབྲིང་ན་ཐུན་མིན་བོད་ཀྱི་རིག་གཞུང་དར་སྤེལ་གཏོང་བའི་ཆེད་དུ་སྤྱི་ཚོགས་ཀྱི་ཁྲོད་ནས་ན་གཞོན་དུ་མ་རེ་ལ་གསོ་བ་རིག་པ་དང་ཡིག་རྨོངས་སེལ་བ། ད་སྔོན་ཁྱོད་ཀྱིས་རིག་གཞུང་ལ་ཧུར་བརྩོན་བྱས་པའི་ཡོན་ཏན་དེ་གཞན་ལ་སྤེལ་དགོས་པ་རེད་མ་གཏོགས། རང་གར་དཀོར་ཟས་དཀོར་ཆུ་ལ་རོལ་ཏེ་མི་ཚེའི་ཉི་མ་འཕུལ་ཐབས་བྱས་ན། མི་ལེགས་པའི་བྱ་བ་ཡིན་ཞེས་གསུངས། རང་ངོས་ནས་ནམ་རྒྱུན་བླ་རུང་ན་ཡོད་པའི་སྐབས་སུ་བརྩེ་བའི་མཆེད་པོ་དམ་པ། གསེར་བཟའི་ཀརྨ་འཕྲིན་ལས་དང་ལྷན་དུ་ཐུན་མིན་བོད་ཀྱི་རིག་གཞུང་དར་སྤེལ་དགོས་ཚུལ་གྱི་ཕྱོགས་རེ་བའི་རྨི་ལམ་གྱི་སྐད་ཆ་འགྲོ་ཞོར་འདུག་ཞོར་དུ་ལབ་ཀི་ཡོད། ནུབ་གཅིག་མཁན་ཆེན་བླ་མ་རིན་པོ་ཆེའི་ཞལ་པར་གནང་བྱུང་། དེ་ནས་བཟུང་རེ་བའི་རྨི་ལམ་མངོན་དུ་གྱུར་བའི་མགོ་རྩོམ། རང་ཡུལ་གྱི་ཕྱོགས་སུ་བོད་ལུགས་གསོ་བ་རིག་པ་དང་ཡིག་རྨོངས་སེལ་སའི་སློབ་གླིང་ཆུང་ཆུང་ཞིག་འཛུགས་རྒྱུ་ཐག་ཆོད་པར་བྱུང་ནས་༢༠༡༠ཟླ་བ་༡༢་ཚེས༡༥ཉིན་བླ་མའི་སློབ་མ་ཆོས་ལྡན་རྒྱ་མི་བསོད་ནམས་དཔལ་སྒྲོན་ལགས་ཀྱི་དམངས་སྒོར་ཁྲི༡༡དང་༨༠༠༠སྟེར་ནས་ཁྲི་འདུ་རྫ་སྟོད་གྲོང་བརྡལ་དུ་སློབ་གླིང་ཁང་ས་ཞིང་དང་བཅས་པ་སྨི་གྲུ་བཞི་མ་༧༨༠ཅན་ཞིག་ཉོས། ༢༠༡༡ལོའི་ཟླ༧ཚེས་༡ཉིན་དངོས་སུ་སློབ་མགོ་ཚུགས། གསོ་རིག་དགེ་རྒན་བླ་མ་རོང་ལེ། ལས་གྲོགས་ནད་མེད་ཚེ་རིང་གཙོ་བོ་ངེད་གསུམ་པོ་མཉམ་འབྲེལ་བྱས་ནས། རིན་མེད་ངང་ང་ཚོས་ནུས་ཚོད་དང་བསྟུན་ནས་དམངས་ལ་ཞབས་ཞུ་བསྒྲུབ་རྒྱུ་གྲོས་མ་བྱས་བསམ་པ་གཅིག་མཐུན་ངང་བྱས་པ་ཡིན། ལོ་འཁོར་མོ་གསུམ་གྱི་རིང་དུ་སྨན་རྫས་དང་སློབ་གྲྭའི་ཡོ་བྱད། སློབ་མའི་ཟས་གྲོན་ཚང་མ་ཕ་གཅིག་བླ་མ་རིན་པོ་ཆེས་དམངས་སྒོར་ཁྲི་༢༠ལྷག་གྲོན་སོང་གཏོང་ཡོད་པ་ཡིན། དེའི་ཕྱིས་སུ་སྨན་ཁང་ལ་ཡིག་ཆ་མེད། ལས་གྲོགས་ཚོའི་བསམ་བློ་གཅིག་མཐུན་དུ་མ་བྱུང་བར་རེ་ཞིག་བྱ་བ་དེ་འཚམས་འཇོག་བྱེད་དགོས་བྱུང་སོང་།བླ་མ་རོང་ལེ་ཁོང་གིས་ཀྱང་སློབ་གྲྭའི་མདུན་གྱི་ས་མི་ཆུང་བ་ཞིག་བདག་བཟུང་བྱས། སྨན་རྫས་སོགས་དངོས་པོའི་ཡོ་བྱད་ཇ་ནོམས་པ་ཞིག་ཐོབ་ཏེ་སེམས་བདེ་བོ་བྱས་ཏེ་ད་ལྟ་ཡང་སློབ་གླིང་གི་མདུན་ན་འཚོ་ཞིང་བཞུགས་བཞིན་པའོ།། དེ་དག་ནི་བསྔོའོ་འབུལ་ལོ་མཆོད་དོ་ལས་གཞན་མ་མཆིས་སོ།། ཡིན་ནའང་ཡིད་དགའ་འོས་པ་ཞིག་ལ་ད་ལྟ་གསོ་བ་རིག་པའི་རང་མགོ་ཐོན་པའི་རྒྱས་ཆེན་ཚུལ་ཁྲིམས་སྨོན་ལམ། དར་དམར་བརྩོན་འགྲུས་མཚོ་མོ། ད་དུང་རིག་གནས་ཕུལ་དུ་བྱུང་བའི་རྣམ་རྒྱལ་ཚེ་རིང་སོགས་སློབ་བུ་དུ་མ་ཞིག་རང་མགོ་རང་ཐོན་གྱི་འབྲས་བུ་སྨིན། བོད་རིགས་ན་ཆུང་བྱིས་པ་༣༠ལྷག་གི་ཡིག་རྨོངས་སེལ་ཏེ་རྒྱལ་ཁབ་སློབ་གྲྭ་རུ་བསྐྱོད་ཐུབ་པ་བྱུང་། དེ་དག་ནི་༢༠༡༡ལོ་ནས་བཟུང་༢༠༡༣ལོ་མཇུག་བར་གྱི་འབད་བརྩོན་བྱས་པའི་གྲུབ་འབྲས་ཡིན།བར་སྐབས་ཀྱི་ཚིག་བཅད།རྣམ་དག་རིག་པའི་གཞུང་ལ་ཐོས་བསམ་བྱས་ཏེ།།མི་ཚེའི་དོན་སྙིང་ལྷ་ཆོས་ཁོ་ནར་བཅོལ་ཡོད།།མི་རུ་ལན་གཅིག་སྐྱེས་པའི་དོན་སྙིང་སེམས་ཏེ།།ཡོད་ཚད་འགྲོ་ལ་ཕུལ་བའི་སེམས་བསྐྱེད་མ་ཉམས།། ༣༢༠༡༤ལོ་ནས་བཟུང་རང་གིས་ཡང་བསྐྱར་ས་གནས་དེ་ཡི་ན་གཞོན་ཚོའི་མི་ཚེའི་ཉི་མ་སྟོང་ཟད་དུ་མི་འགྲོ་བའི་ཐབས་དང་བོད་རང་གི་སྲོལ་རྒྱུན་རིག་གནས་ཆེ་བ་ལྔའི་ནང་ཚན་བཟོ་རིག་པའི་བསྟན་པ།དེ་ཡི་ནང་མཚན་ལྷ་རིས་རི་མོའི་སྲོལ་རྒྱུན་མི་ཆད་པའི་ཕྱིར་དུ། ངེད་རང་དགོན་གྱི་ཨ་སྐྱ་བླ་མའི་འཚམས་སྦྱོར་བྱས་ཏེ། སྒ་ཁྲི་འདུ་འཛོམ་ཉག་གི་ལྷ་རིས་པ་དགེ་རྒན་ཀུན་དགའ་ཆོས་འཕེལ་གདན་འདྲེན་བྱས་ཁོང་ལ་ཟླ་རེར་དམངས་སྒོར་༥༠༠༠གླ་ཕོགས་སྤྲད་རྒྱུ་བྱས་ཏེ། ༢༠༡༧ཟླ་༧ཚེས་༡ཉིན་དངོས་སུ་ཨེ་ཝཾ་ལས་རིགས་ལག་རྩལ་སློབ་གླིང་དབུ་ཚུགས། ད་དུང་དེ་ཡི་དུས་སུ་ད་ལྟའི་སློབ་ཁང་ཆེ་བའི་མདུན་ན་ཡོད་པའི་སློབ་ཁང་རྙིང་བ་སྨྲི་གྲུ་བཞི་མ་༢༤༠ཅན་དེ་ལ་དམངས་སྒོར་ཁྲི་༡༠ཡི་གྲོན་སོང་གཏོང་། དེ་ཡང་ད་སྔོན་སྦྱིན་པའི་བདག་མོ་བསོད་ནམས་དཔལ་སྒྲོན་རེད། དེ་ནས་བཟུང་ལོ་འཁོར་མོ་གསུམ་གྱི་རིང་ལ་དགེ་རྒན་གྱིས་སློབ་ཁྲིད་དཔེ་ཡག་པོ་བྱུང་སོང་། སློབ་མ་ཚོ་ལ་ཡང་འབྲས་བུ་ཕུན་སུམ་ཚོགས་པོ་ཞིག་ཐོབ། ལྷ་རིས་བ་ཡིན་ཤག་ཤག་ད་ལྟ་སློབ་མ་༢༠ལྷག་སྐྱེད་སྲིང་བྱས་པའི་འབྲས་བུ་མིག་མཐོང་ལག་ཟིན་དུ་ཡོད་པ་ཡིན་ནོ། ། དེ་ཡི་ལོ་གསུམ་གྱི་དགེ་རྒན་གྱི་ཟླ་ཕོག་ཇ་མའི་ཟླ་ཕོག་སློབ་མའི་ཟས་གྲོན་ཚང་མ་དམངས་སྒོར་ཁྲི་༣༠ལྷག་སོང་ཡོད་པ་རེད། དེ་ཡི་སྦྱིན་བདག་མཁན་ཆེན་བླ་མའི་སློབ་བུ་སོག་བླ་བསྟན་འཛིན་རྡོ་རྗེ་དང་ཁོང་གི་སློབ་བུ་ཚོ་རེད། ཁོ་ཚོ་ནི་ངེད་སློབ་གླིང་ལ་དཔེ་མི་སྲིད་པའི་བཀའ་དྲིན་ཆེན་པོ་ཡིན། རང་ངོས་ནས་ཁོང་ལ་ཡང་ཉིན་མཚན་ལྟོས་མེད་ངང་དུས་ཚོད་༢༤རིང་གཉིད་ཐུན་གཅིག་ཙམ་ཡང་མ་བྱས་པར་༢༠༡༣ལོར་རླངས་འཁོར་བསྐོར་ཏེ་མདོ་སྨད་ཕྱོགས་སུ་གནས་མཇལ་དུ་ཞབས་ཞུ་བྱས་པ་ཡིན། དེ་འདྲ་ལོ་རྟག་པར་བྱེད་དོན་ཡང་མི་རིགས་འདིའི་ཆེད་དུ་ཡིན་པ་ལས་རང་ཁ་མ་སོས་པར་ཉི་མ་འཕུལ་བྱེད་ཙམ་ཞིག་གཏན་ནས་མིན།དེ་ཡི་བར་ཞིག་ནས་ཨེ་འགོག་རང་མདུན་པ་ཞིག་ངོ་ཤེས་སོང་།དེ་ཡིས་ཉག་རོང་གི་བླ་མ་ཞིག་ཁྲིད་བྱུང་བླ་མ་དེས་ཁོ་ལ་ངོ་སྤྲོད་ཡི་གེ་ཕྲིས་དང་རོགས་སྐྱོར་བྱེད་ཟེར། ང་ནི་རྒྱ་བླ་མིན་ལ་འབྲོག་བླ་ནི་དེ་བས་ཀྱང་མིན་པའི་སྟོབས་ཀྱིས། ཡང་རེ་བ་ཆེན་པོ་ཞིག་བྱས་ཏེ་ཁོ་ལ་ངོ་སྤྲོད་ཡི་གེ་བྲིས་པ་ཡིན། ཁོས་ཀྱང་སློབ་གྲྭའི་གནས་ཚུལ་ཚང་མ་པོད་འཕྲིན་ཟེར་བའི་དྲྭ་ཚིགས་ཀྱི་སྟེང་དུ་བཀོད་འདུག་ཡིན་ནའང་རོགས་སྐྱོར་གང་ཡང་ཐོབ་མ་བྱུང་།དེ་ལྟར་༢༠༡༦ལོའི་ལོ་མཇུག་བར་དུ་རྒྱུན་འཁྱོངས་བྱས་པ་ཡིན།བར་སྐབས་ཀྱི་ངལ་གསོའི་ཚིག་བཅད།མི་རིགས་ཤིག་གི་སྲོལ་རྒྱུན་རིག་གནས་ལ།།ཁ་བཤད་སླ་ལ་ལག་ལེན་དཀའ་མོ་ཡིན།།སེམས་ཀྱི་གོ་ཆ་བརྟན་པོ་མེད་གྱུར་ན།།བྱ་བའི་རྒྱུན་འཁྱོངས་བྱེད་པར་དགོད་རེ་བྲོ།། ༤ད་ནི་༢༠༡༦ལོའི་སྤྱི་ཟླ་བརྒྱད་པ་ནས་བཟུང་། ད་ལྟའི་སློབ་ཁང་འདི་ཡི་ལོ་རྒྱུས་ཞིབ་ཏུ་སྨྲས་ན། ད་སྔོན་ཁང་པ་དེ་དག་ཚད་དང་ལྡན་པའི་རྨང་གཞི་སྲ་མོ་ཞིག་མེད་པ་དང་། སློབ་མ་ཚོ་ལ་ཡང་སློབ་ཁང་ཡག་པོ་ཞིག་འཛོམ་སོང་ན་འདི་ནི་མི་རབས་ནས་མི་རབས་བར་དུ་མི་རིགས་ཤིག་གི་སྲོལ་རྒྱུན་རིག་གནས་དར་སྤེལ་བྱེད་ཡུལ་ཡིན་པས། ཤེས་ལྡན་དང་བསམ་བཟང་དག་གིས་ཀྱང་རྒྱབ་སྐྱོར་བྱེད་ངེས། རྒྱུ་མཚན་ནམ་རྒྱུན་ངའི་རིགས་མཐུན་དག་གིས་དྲྭ་བའི་སྟེང་དུ་མི་རིགས་ལ་ཤ་ཞེན་ཡོད་ཚུལ། རྡོག་རྩ་གཅིག་སྒྲིལ། གདུང་སེམས་གཉམ་སྐྱེད། གྲུབ་མཐའ་རིས་མེད་སོགས། རིག་གནས་ཀྱི་ཆེད་དུ་སྲོག་ཀྱང་འབུལ་ཐུབ་རབས་ཀྱི་ལོ་རྒྱུས། བན་སྐྱ་སེར་དང་།…

རིག་འཛིན་འཇིགས་མེད་གླིང་པ་ངོ་སྤྲོད་མདོར་བསྡུས། རིག་འཛིན་འཇིགས་མེད་གླིང་པ་ནི་ཡུལ་ལྷོ་ཁ་ཡར་ལུང་གི་རྒྱུད་དུ་ཀུན་མཁྱེན་ཀློང་ཆེན་རབ་འབྱམས་དང་ཆོ་འབྲང་གཅིག་པའི་ཆོས་རྗེ་སྨོན་ལམ་བཟང་པོ་དང་།ཡུམ་མདོ་སྲིབ་སྟེང་ཁང་པའི་རིགས་ཀྱི་མེ་ཏོག་ཡན་ལག་མཆོག་དང་ལྡན་མ་གཉིས་གྱི་སྲས་སུ་སྤྱི་ལོ༡༧༢༩ལོར་སྐུ་འཁྲུངས།དགུང་ལོ་དྲུག་པར་དཔལ་གྱི་རི་འོད་གསལ་ཐེག་པ་ཆེན་པོའི་གླིང་དུ་སྤྲུལ་བའི་སྐུ་ངག་དབང་བློ་བཟང་པདྨ་ལས་རབ་ཏུ་བྱུང་ཞིང་མཚན་ལ་པདྨ་མཁྱེན་བརྩེ་འོད་ཟེར་ཞེས་གསོལ། དགུང་ལོ་བཅུར་སོན་སྐབས་སློབ་དཔོན་བོན་བཙན་པ་ལས་སྒྲ་དང་། རྩི ས། གསོ་རིག་བཅས་གསན་པས་ཚེགས་མེད་དུ་མཁྱེན། དྲུང་དམ་ཆོས་བློ་གསལ་དབང་པོ་ལས་སྙན་ངག་མེ་ལོང་མའི་བཤད་ཁྲོད་ཞུས་པས་ལྗགས་རྩོམ་གནང་བ་ལ་སྙན་འགྱུར་ཕུན་སུམ་ཚོགས་པའི་དཔལ་ཐོབ །གནས་བརྟན་ཀུན་བཟང་འོད་ཟེར་ལས་གྲོལ་ཏིག་དང་བླ་མ་དགོངས་འདུས་སོགས་ཀྱི་དབང་ལུང་གསན། དགུང་ལོ་བཅུ་གསུམ་པར་ཀརྨ་པ་ཐེག་མཆོག་རྡོ་རྗེ་དང་མཇལ་ཞིང་ཕྱག་རྒྱ་ཆེན་པོ་ཡེ་ཤེས་མཐོང་གྲོལ་གྱི་རྩ་དབང་དང་བསམ་པ་ལྷུན་གྲུབ་སོགས་སྨིན་བྱེད་ཀྱི་དབང་དང་གྲོལ་བྱེད་ཀྱི་ཁྲིད་གསན། དགུང་ལོ་བཅོ་ལྔ་པར་ངག་དབང་ཀུན་དགའ་ལེགས་པའི་འབྱུང་གནས་ཀྱི་དྲུང་དུ་དགེ་ཚུལ་གྱི་སྡོམ་པ་བཞེས། གཞན་ཡང་སྔ་ཕྱིར་གཏེར་ཆེན་དྲི་མེད་གླིང་པ། ཞང་སྟོད་ངྷརྨ་ཀིརྟི། སྨིན་གླིང་གྲུབ་དབང་ཤཱི་ནཱ་ཐ། བསྟན་འཛིན་ཡེ་ཤེས་ལྷུན་གྲུབ། འབྲོག་ཐང་དབོན་པདྨ་མཆོག་གྲུབ། མོན་རྫ་དཀར་བླ་མ་དར་རྒྱས་སོགས་ལས་སྔ་འགྱུར་བཀའ་མ་དང་གཏེར་ཁ་གོང་འོག་གཙོ་བོར་གྱུར་པའི་བཀའ་གཏེར་དང་། གསར་མའི་རྒྱུད་སྡེ་ཡང་ཅི་རིགས་པ་གསན་བཞེས་མཛད། སྐབས་དེ་དག་ཏུ་ཐུགས་ལ་ངེས་འབྱུང་དང་སྐྱོ་ཤས་ཚད་མེད་འཁྲུངས་ནས་ཤྭི་པ་རྦ་ཏའི་གླིང་དང་། བསམ་ཡས་མཆིམས་ཕུའི་གེའུ་འོག་ཉང་ཏིང་འཛིན་བཟང་པོའི་སྒྲུབ་ཕུག་ཏུ་གྲགས་པ་སོགས་སུ་ལོ་འཁོར་བསྟུན་མར་སྙིང་པོ་དོན་གྱི་སྒྲུབ་པ་ལ་གཞོལ་བར་མཛད། རང་དགོན་དཔལ་རི་པདྨ་འོད་གླིང་དུ་ལོ་གསུམ་གྱི་རིང་ལ་སྐུ་མཚམས་བཅད་རྒྱ་གནང་ནས་གཏེར་ཆེན་ཤེས་རབ་འོད་ཟེར་གྱི་ཟབ་གཏེར་གྲོལ་ཐིག་དགོངས་པ་རང་གྲོལ་གྱི་བསྐྱེད་རྫོགས་ལ་གཞོལ་བས་དྲོད་རྟགས་ཁྱད་པར་ཐོབ། ཁྱད་པར་དུ་བསམ་ཡས་འཆིམ་ཕུའི་གསང་ཆེན་མེ་ཏོག་ཕུག་ཏུ་ལོ་གསུམ་གྱི་རིང་ལ་སྙིང་པོའི་དོན་གྱི་སྒྲུབ་པ་ལ་གཞོལ་བའི་སྐབས་སུ་ཉམས་ལེན་གྱི་རྟོགས་པ་ཁྱད་པར་ཅན་མང་པོ་འཁྲུངས། དག་པའི་གཟིགས་སྣང་མཐའ་ཡས་པ་བྱུང་ཞིང་། ལྷག་པར་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་པའི་ཡེ་ཤེས་ཀྱི་སྐུའི་ཞལ་ལན་གསུམ་ དུ་མཇལ། སྐུ་གསུམ་ཐུགས་ཀྱི་བྱིན་རླབས་དངོས་སུ་འཕོས་ཤིང་གསུམ་གི་གནང་བ་ཆེན་པོ་ཐོབ་པ་ལ་བརྟེན་ནས་འཕགས་ལམ་དོན་གྱི་ཡེ་ཤེས་རྫོགས་པ་ཆེན་པོའི་བདེན་པ་མཐོང། ཟབ་གཏེར་མང་པོའི་བསྙེན་སྒྲུབ་མཐར་ཕྱིན་པས་རྣམ་སྨིན་རིག་འཛིན་གྱི་གདེངས་ཚད་མངོན་དུ་གྱུར།རྩ་རླུང་ཐིག་ལེའི་རྣལ་འབྱོར་ལ་གནད་དུ་བསྣུན་པས་མགྲིན་པ་ལོངས་སྤྱིད་ཀྱི་འཁོར་ལོའི་རྩ་མདུད་གྲོལ་ཏེ་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལ་མངའ་དབང་འབྱོར་བས་ཟབ་མོའི་གཏེར་ཁ་ཀློང་དུ་བརྡོལ། ཕྱིས་ཀྱང་སྐུ་ཚེ་ཧྲིལ་པོར་དགོན་གནས་དབེན་པ་ཁོ་ནར་ཐུགས་དམ་གྱི་མཐིལ་མཛད། འཕྱོང་རྒྱས་སྲོང་བཙན་བང་སོའི་འདབས་འབྲེལ་གྱི་གནས་ཁྱད་པར་ཅན་དུ་དཔལ་ཚེ་རིང་ལྗོངས་པདྨ་འོད་གསལ་ཐེག་མཆོག་གླིང་གི་རི་ཁྲོད་རྟེན་དང་བརྟེན་པར་བཅས་པ་གསར་དུ་བཏབ། ༼ཚེ་རིང་ལྗོངས་ནི་བོད་ཀྱི་དགོན་སྡེ་སྤྱི་མཚུངས་བཞིན་རིག་གནས་གསར་བརྗེའི་སྐབས་སུ་རྩ་གཏོར་བྱས་ཀྱང་རྗེས་སུ་བསྐྱར་བཞེངས་གྲུབ་ནས་བཙུན་མ་ལྔ་བཅུ་ཡས་མས་བཞུགས་ཤིང་། སྐུ་གསུང་ཐུགས་རྟེན་སྤུས་ལེགས་དང་། སྙིང་ཐིག་རང་རྐང་གི་ཆོག་འགྲིགས་དང་ཉམས་ལེན་གཞི་རྐང་ཚུགས་པ་བྱུང་ཡོད།༽ བསམ་ཡས་བར་ཁང་གཡུ་ཞལ་འབར་བའི་གཞི་སྟེང་དུ་རྒྱ་དངུལ་སྲང་ལྔ་བརྒྱ་ལས་གྲུབ་པའི་བྱང་ཆུབ་མཆོད་རྟེན་རིན་པོ་ཆེ་སྣ་ ཚོགས་ཀྱི་ཕྲ་རྒྱན་གྱིས་བརྒྱན་པ་བཞེངས།བསམ་ཡང་ཆོས་འཁོར་ཆེན་པོ་ལ་གསེར་སྲང་བརྒྱ་ལས་གྲུབ་པའི་འཁོར་ལོ་ཕུལ་ཅིང་།དངུལ་གྱི་རྒྱལ་བ་མི་ཕམ་པའི་སྣང་བསྙན་ཆེན་པོ་བཞེངས། སྲོང་བཙན་བང་སོ། བསམ་ཡས་མཆིམས་ཕུ། འཕྱོངས་རྒྱས་དཔལ་རི་སོགས་ སུ་ཨོ་རྒྱན་མདྨ་འབྱུང་གནས་དང་།ལོ་པཎ་རྣམས་ཀྱི་སྐུ་བརྙན་མང་པོ་གསར་བཞེངས་ དང་།ཁྱད་པར་རྒྱལ་བའི་འཕྲིན་ལས་ཆུད་མི་འཛའ་བའི་ཆེད་དུ་རྒྱུད་འབུམ་རིན་པོ་ཆེ་ཆ་ཚང་དང་། རྣམ་ཐར་ཤེས་བྲག་མ་སོགས་ཀྱི་བྲིས་ཐང་དྲུག་ཅུ་སྐོར་གསར་བཞེངས་གནང་། དེ་བཞིན་བསྟན་པའི་རྩ་བ་མདོ་སྒྱུ་སེམས་གསུམ་དང་དེ་དག་གི་གཞུང་དོན་མ་ནོར་བ་ནུབ་ལ་ཉེ་བས་ཤཱི་པརྦ་ཏའི་གླིང་དུ་སྒྲུབ་མཆོད་ཀྱི་རྒྱུན་གསར་འཛུགས་སོགས་སྔ་འགྱུར་རྡོ་རྗེ་ཐེག་པའི་བསྟན་པ་སླར་གསོའི་ཕྱག་རྗེས་བླ་ན་མེད་པ་བཞག རྗེ་འདིའི་སློབ་མའི་གྲས་ནི་རྡོ་གྲུབ་ཆེན་འཇིགས་མེད་འཕྲིན་ལས་འོད་ཟེར་དང་། འཇིག་མེད་རྒྱལ་བའི་མྱུ་གུ། མོན་བླ་འཇིགས་མེད་ཀུན་གྲོལ་རྣམ་རྒྱལ། དགེ་རྩེ་བླ་མ་འཇིགས་མེད་ངོ་མཚར་བཅས་འཇིགས་མེད་རྣམ་བཞི་དང་། འབྲི་གུང་རིན་པོ་ཆེ་ཉིན་བྱེད་འོད་ཟེར། ས་སྐྱའི་ཁྲི་ཆེན་ངག་དབང་དཔལ་ལྡན་ཆོས་སྐྱོང་སྐུ་མཆེད།དགའ་ལྡན་བྱང་ཤར་རྣམ་གཉིས། འཕྱོངས་རྒྱས་དཔལ་རི་སྤྲུལ་སྐུ། ལྩགས་ཟམ་སྤྲུལ་སྐུ། ཀོང་པོ་རྒོད་ཚང་སྤྲུལ་སྐུ་འཇིགས་མེད་བསྟན་པའི་རྒྱལ་མཚན། ལྷོ་བྲག་ཐུགས་སྲས། སྡེ་ དགེ་རྒྱལ་པོ་དང་བཙུན་མོ་ངང་ཚུལ་མ་སོགས་ཐུགས་རྒྱུད་ཟིན་པའི་སློབ་མ་མང་པོ་བྱུང་། རྗེ་འདི་པའི་བརྩམས་ཆོས་ལ་ཡོན་ཏན་རིན་པོ་ཆེའི་མཛོད་རྩ་འགྲེལ་དང་། རྫོགས་པ་ཆེན་པོ་མན་ངག་སྙིང་ཐིག་གི་ཁྲིད་ཡིག་ཡེ་ཤེས་བླ་མ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་འཛམ་གླིང་ཐ་གྲུར་ཁྱབ་པའི་རྒྱན། དགོངས་འདུས་ཆོ་གའི་བསྟན་བཅོས་ལུང་གི་གཏེར་མཛོད།བཀའ་ཡི་བསྡུ་བ་གསར་དུ་མཛད་པའི་ཕུར་པ་རྒྱུད་གཞུང་།ཐུགས་གཏེར་ཀློང་ཆེན་ཐིག་གཞུང་རྩ་བ་གསལ་བྱེད་དང་བཅས་པ། དབུ་རུ་ཞྭ་ལྷ་ཁང་གི་གཏམ།བཀྲ་ཤིས་སྲོང་བཙན་བང་སོའི་གཏམ་ལོ་རྒྱུས་ཀྱི་མཛོད་ཁང་། བཀྲ་ཤིས་སྲོང་བཙན་བང་སོའི་དཀར་ཆག། རི་དྭགས་ཀྱི་གཏམ་ངེས་འབྱུང་གི་ཕོ་ཉ། འདབ་ཆགས་ཀྱི་གཏམ་རིག་པ་རང་ཤར། ནགས་ཚལ་གྱི་གཏམ་ཨུ་དུམ་ཝཱ་རའི་ཆུན་པོ། བློ་ལྡན་བྷྲ་མ་རའི་གཏམ་ཚིག་ལ་མི་རྟོན་དོན་ལ་རྟོན་པ། རི་བོང་ཤིན་ཏུ་བརྟན་པའི་གཏམ་བྲག་རིའི་མགུལ་རྒྱན། རྒྱལ་པོ་དང་དམངས་ལ་སྤྲིངས་པའི་གཏམ་འཇིག་རྟེན་གསོ་བའི་སྨན། དམངས་ལ་སྤྲིངས་པའི་གཏམ་དཔེ་དོན་འབྲེལ་བ་སོགས་གསུང་འབུམ་པོད་དགུའི་པར་ཤིང་ཆ་ཚང་སྡེ་དགེ་དཔར་ཁང་དུ་བཞུགས། དགུང་ལོ་བདུན་ཅུར་སོན་པ་སྤྱི་ལོ༡༧༩༨ལོར་སྐུ་གཤེགས། རྣམ་ཐར་རྒྱས་པ་ནི་རང་རྣམ་­རིག་འཛིན་འཇིགས་མེད་གླིང་པའི་འཁྲུངས་རབས་རྣམ་ཐར་ཉུང་བསྡུས། རྫོགས་ཆེན་པ་རང་བྱུང་རྡོ་རྗེའི་དོན་ཀྱི་རྣམ་ཐར་དོ་ཧའི་རྒྱན། ཡུལ་ལྷོ་རྒྱུད་དུ་བྱུང་བའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱི་རྣམ་པར་ཐར་པ་ལེགས་བྱས་ཡོངས་འདུའི་སྙེ་མ། པདྨ་དབང་ཆེན་རོལ་པ་རྩལ་གྱིས་མཛད་པའི་རྣམ་ཐར་གྱི་མཇུག་མཐུད་སོགས་ཁུངས་བཙན་པ་དང་ཚིག་དོན་སྙན་ཞིང་ཟབ་པས་དེར་གཟིགས་པར་འཚལ༎ འཇིགས་མེད་གླིང་པའི་ཞལ་གདམས་ཀ་ཁ་སུམ་བཅུ་མ་བཞུཊ་སོ།། རྩོམ་པ་པོ། རིག་འཛིན་འཇིགས་མེད་གླིང་པ། སྤྱིར་བོད་འབངས་ཡོངས་ལ་བཀའ་དྲིན་ཆེ། །སྒོས་སྤྲང་རྒན་བདག་གི་སྐྱབས་གནས་མཆོག །རྗེ་སངས་རྒྱས་ཀུན་དངོས་ཨོ་རྒྱན་རྗེར། །སྙིང་རུས་པའི་གཏིང་ནས་གསོལ་བ་འདེབས། །བུ་ཀ་དག་སྤྲོས་བྲལ་ཕྱོགས་ཡན་ལ། །ཁ་དོག་བཟོ་དབྱིབས་མཚོན་པ་མེད། །ག་བུར་དབྱིངས་སུ་ཡལ་བ་ལྟར། །ང་བདག་རྩ་གདར་ཆོད་ལ་ཞོག ། བུ་ཅ་ཅོའི་ཚིག་ལ་མ་ཞེན་པར། །ཆ་མེད་པ་ས་མཐའི་ནགས་ཁྲོད་དེར། །ཇ་ཆང་འདོད་ཡོན་མ་བསམས་པར། །ཉ་ལྟར་རིག་པ་གཅེར་བུར་ཞོག ། བུ་ཏ་ན་གྷ་ནའི་སྤྱོད་པ་འདི། །ཐ་མལ་གྱི་ལམ་དུ་མི་ལྷངས་པས། །དྭ་ཕྲུག་ས་མཐར་འཁྱར་བ་ལྟར། །ན་དགའ་ཤི་སྐྱིད་ངང་དུ་ཞོག ། བུ་པ་སངས་ལྟ་བུའི་ལྷག་བསམ་གྱིས། །ཕ་རོལ་ཀུན་ལ་དག་སྣང་སྦྱང་།…

ཞི་དྲག་གི་ང་ཡི་མཁའ་འགྲོ།ཞི་བ་བྱ་བཞོན་རིག་འཛིན་དབྱངས་ཅན་མ།།དྲག་པོ་དྲེལ་བཞོན་དཔལ་ལྡན་ལྷ་མོ་ཉིད།།ཞི་དྲག་ཤིང་བཞོན་མཁའ་འགྲོ་ཆོས་ཀྱི་སྒྲོན།།གསོལ་ལོ་མཆོད་དོ་བསམ་དོན་ལྷུན་གྲུབ་མཛོད།།ཤྲཱིས་སོ།།

༧ཀུན་མཁྱེན་རིག་འཛིན་འཇིགས་མེད་གླིང་པ་དྲན་པའི་མེ་ལོང་།།ན་མོ་མ་ཧཱ་གུ་རུ་ཨ་བྷྱ་ཡ།།སྐུ་ཡི་དཀྱིལ་འཁོར་མཚན་དཔེ་ལྕང་ལོས་རྒྱན།།གསུང་གི་གདམས་ངག་རྫོགས་པ་ཆེན་པོའི་མཛོད།།ཐུགས་ཀྱི་ཡེ་ཤེས་དུས་གསུམ་རྒྱལ་བའི་ཐུགས།།རིག་འཛིན་འཇིགས་མེད་གླིང་པ་སྙིང་ནས་དྲན།།ཀུན་མཁྱེན་བརྒྱུད་པའི་མན་ངག་སྙིང་ནས་བྱུང།།ཁམས་གསུམ་ལས་ཅན་འདྲེན་པའི་བཀའ་དྲིན་ཅན།།ཨེ་ཝཾ་ལྷན་སྐྱེས་བདེ་དྲོད་སྤེལ་བའི་མགོན།།སྙིང་དབུས་གཉུག་མའི་གཤིས་སུ་རྟག་ཏུ་དྲན།།སྔོན་ཡང་སྔ་འགྱུར་བསྟན་པའི་བཀའ་དྲིན་ལས།།གངས་ལྗོངས་བཀྲ་ཤིས་བདེ་ལེགས་ཡོངས་སུ་གང་།།ད་ཡང་ཀུན་མཁྱེན་བརྒྱུད་པ་རིན་པོ་ཆེས།།ཕན་བདེས་ལེགས་ཚོགས་འཁོར་འདས་རྒྱན་དུ་མཛེས།།ཕྱིས་ཀྱང་བསྟན་པའི་མཐར་ཐུག་ཐེག་དགུའི་སྲོལ།།ཟུང་འཇུག་འཇའ་ལུས་གྲུབ་པའི་རྣལ་འབྱོར་རིགས།།མཆོག་ཐུན་དངོས་གྲུབ་བརྙེས་པའི་གྲུབ་ཐོབ་ཀུན།།ཀུན་མཁྱེན་ཡབ་སྲས་རྒྱུད་པ་འདི་ཁོ་ན།།འཕགས་ཡུལ་བསྟན་པའི་བཀའ་བསྟན་ཡང་དག་འཛིན།།བོད་ཡུལ་བཀའ་གཏེར་ཟབ་རྒྱས་རྩ་བ་སྐྱོང་།།ཡང་གསང་རྫོགས་ཆེན་སྙིང་ཐིག་བསྟན་པ་སྤེལ།།ཀུན་ཁྱབ་ཀུན་བཟང་བསྟན་པ་དར་རྒྱས་ཤོག།ཀུན་གསལ་ཁྱོན་ལ་གདལ་བའི་ཆོས་ལུགས་ལས།།སྔ་འགྱུར་བསྟན་པའི་གསང་མཛོད་བདུད་རྩིའི་ཆར།།མ་ལུས་འགྲོ་ཀུན་ཕན་བདེའི་སྤྲིན་ཆེན་པོས།།སྨིན་གྲོལ་དམ་པས་འཁོར་བ་དོང་སྤྲུགས་ཤོག།ཅེས་རབ་གནས་ས་ཕག་ལྷ་བབས་དུས་ཆེན་དང་ཀུན་མཁྱེན་འཇིགས་གླིང་པའི་འདས་མཆོད་སྐབས་སུ་ཤྲཱིཾཿཨེ་མ་ཧོས

སྤྲུལ་སྐུ་ཚེ་རིང་རྡོ་རྗེ་ལ་བསྟོད་པ་པདྨ་དཀར་པོའི་དོ་ཤལ།ན་མོ་མ་ཧཱ་གུ་རུ་པདྨ་ཀ་ར་ཡེ།།རྒྱལ་ཀུན་ཡེ་ཤེས་ཀུན་འདུས་ཀུན་ཏུ་བཟང་།།སྙིགས་དུས་འདྲེན་མཆོག་མཚུངས་མེད་མ་ཎི་ཀ།རིགས་ཀུན་ཁྱབ་བདག་བཅོམ་ལྡན་རྡོ་རྗེ་འཆང་།།མཚོ་སྐྱེས་རྡོ་རྗེས་ཚེ་རབས་ཀུན་ཏུ་སྐྱོངས།།སྙིང་ཀར་ལྷག་བསམ་རྟ་བདུན་དབང་པོ་ཚེས།།དྲི་མེད་པདྨའི་འདབ་ཡངས་ཕྱོགས་ཀུན་ཁྱབ།།གངས་ཅན་པདྨའི་ཕྲིན་ལས་སྤེལ་བའི་སྐུ།།རྣམ་ཐར་ཀུན་བཟང་འཛམ་གླིང་རྒྱན་དུ་བཞགས།།ཨོ་རྒྱན་པདྨ་ཀ་རའི་རྣམ་ཐར་འཛིན།།བསྟན་པ་ཡར་བསྐུལ་ཐེག་པའི་འགྲོ་ཁམས་སྐྱོང་།།འཛམ་གླིང་སེང་ཆེན་རྒྱལ་པོའི་སྒྲུང་གཏམ་སྤེལ།།སྤྲུལ་སྐུའི་མཛད་བཟང་ཉིད་ལ་ཡི་རང་ངོ་།།རང་དགོན་རེ་འདོད་ཞགས་པས་མ་འཆིང་ཞིང་།།རང་དོན་སྒེར་སྤྱོད་ཆགས་པས་མ་བཟི་ནས།།རང་གཞན་སྤྱི་དོན་སྒྲུབ་མཁས་སྤྲུལ་པའི་སྐུ།།རང་ཆོས་བསྟན་པའི་ཁྱབ་བདག་རྒྱལ་གྱུར་ཅིག།རྒྱལ་བ་རབ་འབྱམས་ཞིང་ཁམས་རྒྱ་མཚོའི་དཔལ།།ཕན་བདེ་མཐའ་ཡས་འགྲོ་བའི་དོན་དགྱེས་པ།།རྒྱལ་སྲས་བྱང་སེམས་རིག་འཛིན་རྡོ་རྗེ་མཆོག།སྤྲུལ་སྐུ་ཚེ་རིང་རྡོ་རྗེ་ཞབས་བརྟན་ཤོག།ཕྱི་ལྟར་ངུར་སྨྲིག་རྒྱལ་མཚན་དཔལ་གྱིས་མཛེས།།ནང་དུ་ཟབ་རྒྱས་ལེགས་བཤད་བདུད་རྩིས་གཏམས།།གསང་བ་རྣལ་འབྱོར་གྲུབ་པའི་དབང་ཕྱུག་མཆོག།རྫོགས་ཆེན་བསྟན་པའི་ཁྱབ་བདག་ཞབས་བརྟན་ཤོག།ཅེས་པ་རབ་གནས་ས་ཁྱིའི་སྤྲེལ་ཀྱི་ཟླ་ཚེས་དགེ་བར་ཝེར་མ་དཀར་པོས་འབོད་སྐུལ་དང་དམ་པ་ཁོང་གིས་བོད་ཀྱི་རིག་གཞུང་ཀུན་འདུས་ཧི་མ་ལའི་རིག་མཛོད་ཆེན་མོ་དང་གུ་རུའི་རྣམ་ཐར་སྟོང་ཐང་ཆེན་མོའི་ལས་གཞི་གལ་ཆེན་གཉིས་ཀྱི་ཆེད་དུ་སྙིང་རུས་དཀའ་སྤྱད་ཀྱི་འགན་འཁྲི་ཕྲག་ཏུ་བཞེས་པ་དང་། ཁྱད་པར་ད་ལྟ་གུ་རུའི་རྣམ་ཐར་སྟོང་སྐུ་ཆེན་མོ་སྟེ་ལེ་དབར་གསུམ་གྱི་རིང་ཚད་ཅན་གྱི་ཞལ་ཐང་སྟོང་གཅིག་དང་སུམ་བརྒྱའི་བདག་ཉིད་ཅན་དེ། ད་སྔོན་ལྷ་རིས་པ་བཅུ་ཕྲག་ལྔས་བགྲང་བྱ་བཅུ་གཉིས་ཀྱི་ཡུན་ལ་བསྟུད་མར་བྲིས་པའི་སྟོང་ཐང་ཆེན་མོ་ད་ལྟ་འགྲུབ་ལ་ཉེ་བ་སོགས་དགའ་འོས་པ་དག་ལ་ཡི་རང་བཅས་དབྱིན་ཡུལ་ཨེ་ཝཾ་རྫོགས་ཆེན་དུས་འཁོར་འོད་གསལ་ཆོས་གླིང་ནས་ཤྲཱིཿཨེ་མ་ཧོས་གང་ཤར་སྨོན་ཚིག་ཏུ་བྱས་པར་དགེའོ།། །།

ཀུན་གཟིགས་རྨེ་སྤྲུལ་བསྟན་འཛིན་རྒྱ་མཚོ་མཆོག་གི་གསོལ་འདེབས།丹增活佛祈祷文ལུང་རྟོགས་བསྟན་པ་འཛིན་པའི་གཉེན་གཅིག་པུ༎龙朵丹巴增毕宁杰波执掌教证圣法唯一怙Holder of the Dharma of transmission and realization,the sole protector, བསླབ་གསུམ་ཡོན་ཏན་རྒྱ་མཚོའི་མཛོད་འཆང་བ༎拉森云丹嘉促作强瓦三学功德海藏持有尊Possessor of an ocean of treasure-like qualities of the threefold training, སྔ་འགྱུར་བསྟན་པའི་གཙུག་རྒྱན་ཆོས་ཀྱི་རྗེ༎阿杰丹毕则坚秋吉杰前译教法顶饰之法主Crowning ornament of the Nyingma teachings,Lord of Dharma, བསྟན་འཛིན་རྒྱ་མཚོའི་ཞབས་ལ་གསོལ་བ་འདེབས།།丹增嘉促夏拉所瓦得丹增嘉措足下诚祈祷Tenzin Gyatso, at your feet we pray! ཨོྃ་གུ་རུ་ཤཱ་ས་ན་དྷ་ར་སཱ་ག་ར་སིདྡྷི་ཨཱཿཧཱུྃ།oṃ guru śāsanadhara sāgara siddhi āḥ hūṃ嗡格热夏萨那达ra,萨嘎ra,色德阿吽༧ཆོས་རྗེ་དམ་པ་ཡིད་བཞིན་ནོར་བུའི་རྣམ་ཐར་རྒྱས་པ་དེ་ཆ་ཚང་ལྗགས་ལུང་དྲ་ལམ་ཐད་གཏོང་ལས་ཞུས་ཟིན་པ་ཡིན། ༧ཀུན་གཟིགས་སྤྲུལ་བའི་སྐུ་མཆོག་བསྟན་འཛིན་རྒྱ་མཚོ་རིན་པོ་ཆེ་ལ་བཀའ་དྲིན་ཆེ་ཞུ་བ་དང་། དྲ་བའི་ཐད་གཏོང་ལས་འགན་ཁུར་འཁན་ཡོངས་ལ་བཀའ་དྲིན་ཆེ་ཞུ་དང་བཟང་སྤྱོད་དང་བཅས་པ་མཉམ་དུ་འཚོགས་ཡོད།