རྨི་ལམ་ནང་གི་ཨ་མ་མཇལ།ཨེ་མ་ཧོ།།ཀ་དག་ཀུན་བཟང་གི་ཞིང་ཁམས་དེ་ན།།ཁ་སྦྱོར་བདུན་ལྡན་གྱི་ཡོན་ཏན་ཚང་ཕྱིར།།ག་བུར་མདངས་འཛིན་གྱི་དཀྱིལ་འཁོར་དབུས་སུ།།ང་ཡི་ཨ་མ་ཉིད་དངོས་སུ་མཇལ་སོང་།།ཅ་ཅོ་འདུ་ལོང་གི་བྲེལ་ཟིང་དབེན་ཅིང་།།ཆ་ལུགས་ཀུནབཟང་གི་རྣལ་འབྱོར་ཕོ་མོ།།ཇ་ཆང་ཚོགས་འཁོར་ལ་ཅི་དགའ་རོལ་བར།།ཉ་མོ་མཚོ་འཁོར་བཞིན་བདེ་དགའ་བརྟས་སོང་།།ཏ་ཐཱ་ག་ཏ་ཡི་ཞིང་ཁམས་དེ་ན།།ཐ་མལ་སྣང་ཤེས་ཀྱི་ཆགས་སྡང་དབེན་ཕྱིར།།ད་ལྟའི་དུས་རབས་ཀྱིས་འགྲན་བཟོད་མིན་པར།།ན་ཚོད་ཁྱད་མེད་པར་ཆོས་ཀྱིས་གྲོལ་འདུག།པ་ལོས་དབུ་རྒྱན་གྱི་རྣལ་འབྱོར་མང་གི།ཕ་མ་དྲིན་ཅན་གཉིས་དེ་ན་བཞུགས་འདུག།བཛྲ་ཐེག་པ་ཡི་ལྟ་སྒོམ་ཟབ་རྒྱས།།མ་ལུས་ཀུན་མཇལ་འདི་སྐལ་བ་བཟང་ཐལ།།ཙ་ར་མ་གཅོད་པར་རྨི་ལམ་འཕྲུལ་ཐབས།།ཚ་གྲང་དཀའ་སྤྱད་སོགས་གང་ཡང་མེད་པར།།ཛ་ཡའི་ཡུམ་ཆེན་གྱི་ཨོ་རྒྱན་སྒྲོལ་མ།།ཝ་ལེར་མཇལ་བ་འདི་སྔོན་བསགས་བསོད་ནམས།།ཞྭ་དམར་བསྟན་པ་ལ་སྙིང་ནས་བརྩེ་བའི།།ཟ་ཧོར་མཁན་སློབ་ཀྱི་བརྒྱུད་འཛིན་རྣམ་དག།འ་ཅག་སྐལ་བཟང་གི་དད་ལྡན་སློབ་མས།།ཡ་ཀི་རྫོགས་ཆེན་ཉིད་རིང་ན་མི་འདུག།ར་བ་གངས་རི་ལ་ཕྱི་མིག་ཤོར་ནས།།ལ་ལུང་མང་པོ་ཞིག་ཐོད་ཀྱིས་བརྒལ་སྟེ།།ཤ་ཆང་ཚོགས་གྲལ་དངོས་སུ་སླེབས་ནས།།ས་ཐོབ་སེམས་དཔའ་ཚོས་སྤྱན་འདྲེན་གནང་སོང་།།ཧ་ཅང་རྣམ་དག་གི་རྨི་ལམ་འོད་གསལ།།ཨ་ཧོ་མཉམ་འཛོམས་ཀྱི་མ་བུ་མཇལ་འཕྲད།།ཨོ་རྒྱན་གྲོང་ཁྱེར་ལས་དགའ་སྟོན་ཚོགས་གྲལ།།ཨེ་མ་བསམ་ཡས་ཀྱི་ལས་སྨོན་རྟེན་འབྲེལ།།ཨུ་ཚུགས་མི་དགོས་པར་མངོན་སུམ་ངང་ནས།།ཨི་གོ་གཅེས་ཕྲུག་ཚོར་བརྡ་ཙམ་སྟོན་ཡ།།ཨ་མ་དྲིན་ཆེན་མའི་ཕྱག་ལ་འཇུས་ནས།།ཧ་ཅང་དགའ་གདུང་གི་མཆུ་མ་གཏོང་གིན།།ས་ཐོབ་རིག་འཛིན་ལ་བདེ་མོ་བྱས་ཏེ།།ཤ་ཁྲག་ལུས་ཕུང་ལ་སླར་ཡང་ཞུགས་སོ།།ལ་རྒྱའི་རྨི་ལམ་དེ་ཡིད་ལ་འཁོར་ཚེ།།ར་རུ་སེམས་ཁམས་ལ་ཞི་བདེ་དངོས་མ།།ཝ་ལེར་འོད་གསལ་ངང་ཨེ་ཝཾ་ཀུན་བཟང་།།ཛ་ཡའི་བསྟན་པ་ཡི་སྙིང་ནོར་དམ་པ།།ཚ་ཁོ་དབྲ་སྲས་ལ་བཞགས་པ་བཟང་ཡང་།།ཙྭ་རིའི་རྣལ་འབྱོར་གྱི་ཨ་མ་མི་དོ།།མ་རྒན་དྲིན་ཆེན་གྱི་རྣམ་ཐར་དྲན་ཚེ།།བ་ལང་རྟུལ་ཞུགས་ཚོ་དགོས་ཡ་མི་འདུག།ཕ་མས་བརྒྱུད་འཛིན་གྱི་སངས་རྒྱས་ཡེ་ཤེས།།པ་ལོ་དཀར་ནག་ངང་མི་ཚེ་ཟད་རུང་།།ན་ཚོད་དར་རྒུད་ལ་ཁྱད་པར་མི་འདུག།ད་ལྟའི་དུས་རབས་བཞིན་བསྟན་པ་སྤེལ་ཡ།།ཐ་དག་མགུ་ཐབས་ཀྱི་བཟོད་སྒོམ་མེད་ཀྱང་།།ཏ་ཐཱ་ག་ཏ་ཡི་སྙིང་པོ་དམ་པ།།ཉ་གང་ཟླ་བ་བཞིན་རྫོགས་ཆེན་བཀའ་གཏེར།།ཇ་ཞིང་སྨན་ཚལ་ལྟར་ཀུན་ལ་འབུལ་ལོ།།ཆ་འཇོག་ཡོད་མེད་དེ་གཞན་ལ་དབང་ཡང་།།ཅ་དག་སྤྱོད་པ་ཡི་བསྡུ་བཞིས་ཕན་བདེ།།ང་ཡི་དམ་བཅའ་ལ་འགྱུར་བ་མེད་ཕྱིར།།ག་སར་གང་དར་རུ་ཨེ་ཝཾ་སྤེལ་ཡོད།།ཁ་ཁོག་ཀུན་ཚང་གི་དཔལ་དགྱེས་རྡོ་རྗེས།།ཀ་མ་ལ་བཞིན་གྱི་ལྷག་བསམ་དྲི་མེད།།ཨི་ལྡན་དབྱངས་གསལ་གྱིས་མཆོད་པ་འདི་དག།ཨུ་ཚུགས་མི་དགོས་པར་ཐོལ་གྱིས་བྲིས་སོ།།ཨེ་ཝཾ་གཉུག་སེམས་ཀྱི་རྨི་ལམ་འོད་གསལ།།ཨོ་ཚོད་མི་དགོས་པར་ཕྱི་གསལ་ནང་གསལ།།ཨ་ཏིའི་ཟབ་དོན་གྱི་བསྟན་པ་རིན་ཆེན།།ཨ་མ་དྲིན་ཆེན་གྱི་བཀའ་དགོངས་ཇི་བཞིན།།ཨ་ཕོ་ཤྲཱིཿསྨྱོན་གྱིས་འཛིན་སྐྱོང་སྤེལ་ན།།ཨ་བུ་སྙིང་གྲོགས་ཚོ་དགྱེས་པར་ཆོས་ཉིད།།ཅེས་ཤྲཱིས་སོ།། སྤྱི་ལོ་༧/༧/༢༠༡༩་ལའོ།།

རྡོར་དྲིལ་རང་བྱུང་གི་ཨེ་ཝཾ་མེ་ཏོགཨེ་མ་ཧོ།།འབྱུང་ལྔ་རྣམ་དག་རླུང་རྟ་སྒྲོན་པའི་ཚེ།།ཉི་ཟླ་གཉིས་ཀ་དུས་གཅིག་འཆར་བ་དང་།།རྡོར་དྲིལ་རང་བྱུང་ཨེ་ཝཾ་མེ་ཏོག་བཞད།།རྟེན་འབྲེལ་ཀུན་བཟང་ཤར་པས་བཀྲ་ཤིས་ཤོག།ཤར་ནུབ་ནམ་མཁའ་རྒྱ་མཚོ་རྒྱ་ཆེ་ཡང་།།ངོ་ལྐོག་དམ་ཚིག་གཅིག་པའི་སྙིང་གྲོགས་ལ།།ནམ་ཡང་འབྲལ་མེད་དམ་ཚིག་ཨི་ཐིམ་རྒྱ།།བསྟན་འགྲོར་ཕན་བདེའི་ཕྲིན་ལས་ལྷུན་གྱིས་གྲུབ།།ཨེ་མ་ཆོས་རིག་སྣང་བའི་བར་གསེང་ཀུན།།མ་ལུས་ཕན་བདེའི་ནོར་འཛིན་བཀྲ་ཤིས་འཕེལ།།ཨ་ཧོ་ཕུན་ཚོགས་ལོངས་སྤྱོད་བདེ་ལེགས་དཔལ།།རབ་འབྱམས་ཞིང་ཀུན་སྣང་བས་ཁྱབ་གྱུར་ཅིག།ཤྲཱིཿཨེ་མ་ཧོས

ཤུག་པའི་སྒོམ་ཁང་དུ་དལ་ཅིག་གཉིད་ཁུག་ཀྱང་འབྲུག་པའི་མཁས་དབང་ཕུབ་རྡོ་རྗེས་མཁན་ཆེན་བླ་མ་མཁྱེན་ནོ་ཞེས་འབོད་པར་ཐོས་ནས་གཉིད་ལས་སད་ཡིན། གང་ལྟར་ཁོ་ལ་དད་པ་བཅོས་མིན་གྱིས་གསོལ་བ་འདེབས་ཀྱིན་ཡོད་པ་ཏན་ཏན་རེད། ཤྲཱིཿཨེ་མ་ཧོས་དེ་ཉིད་དུ་བགྱིས་པའོ།།

ཡི་རང་དང་བསྔགས་བརྗོད་པདྨ་ར་གའི་མཎྜལ།།ན་མོ་གུ་རུ་རཏྣ་ཏྲ་ཡཱ་ཡ།།ཕུན་ཚོགས་ལྔ་ལྡན་ཐེག་མཆོག་ཆོས་གླིང་དུ།།ཁྱད་ཆོས་དྲུག་ལྡན་རྒྱལ་བ་སྔ་འགྱུར་ལུགས།།མི་འགྱུར་ཆོས་བདུན་ངོ་བོར་འཚོ་བཞེས་པའི།།བཀྲ་ཤིས་རྟགས་བརྒྱད་རྟེན་འབྲེལ་ལྷུན་གྱིས་གྲུབ།།དམ་ཆོས་དུང་གི་སྒྲ་དབྱངས་ས་གསུམ་བསྒྲགས།།ཕན་བདེའི་གདུགས་དཀར་ནམ་མཁའི་ཁྱོན་ཀུན་ཁྱབ།།སྔ་འགྱུར་བསྟན་པའི་རྒྱལ་མཚན་དབྱིངས་ལས་མཐོ།།རྨད་བྱུང་དཔལ་བེའུའི་རྟེན་འབྲེལ་རྒྱ་མཚོར་འཁྱིལ།།ཕུན་ཚོགས་འདོད་འཇོའི་བུམ་བཟང་བདུད་རྩིས་གཏམས།།སྐལ་བཟང་གསེར་ཉའི་མཁྱེན་རབ་སྤྱན་ཟུང་རྒྱས།།རང་བྱུང་སྒྱུ་འཕྲུལ་དཀྱིལ་འཁོར་ལྷུན་གྱིས་གྲུབ།།ངོ་མཚར་པདྨ་དཀར་པོའི་རྣམ་ཐར་ལེགས།།བཀའ་གཏེར་ཟབ་དགུའི་སྲོལ་འགྱེད་སྔ་འགྱུར་བའི།།མདོ་སྔགས་བཤད་སྒྲུབ་ཕྲིན་ལས་རབ་ཏུ་རྒྱས།།མ་ལུས་འགྲོ་བའི་མ་རིག་ཀུན་སེལ་ནས།།རྩ་བརྒྱུད་བླ་མའི་བཞེད་དོན་ལྷུན་འགྲུབ་ཤོགཅེས་པ་འདི་ཡང་རབ་གནས་ས་ཕག་སྣྲོན་ཟླའི་དཀར་ཕྱོགས་དགའ་བ་དང་པོར་དཔལ་རྒྱལ་བ་སྔ་འགྱུར་བསྟན་པའི་ཁྱབ་བདག་ཆེན་པོ་༧རྒྱལ་དབང་ཞེ་ཆེན་རབ་འབྱམས་རིན་པོ་ཆེ་ཉིད་༧སྐྱབས་རྗེ་ནམ་མཁའ་རིག་འཛིན་རྒྱ་མཚོས་ཡོ་རོབ་སུད་སིའི་ཐེག་མཆོག་གླིང་དུ་གདན་འདྲེན་ཞུས་པའི་སྐུ་དཔར་མཇལ་བའི་མོད་ལ་ཤྲཱིཿཨེ་མ་ཧོས་དབྱིན་ཡུལ་ཨེ་ཝཾ་རྫོགས་ཆེན་དུས་འཁོར་འོད་གསལ་རི་ཁྲོད་ནས་ཡི་རང་སྨོན་ཚིག་ཏུ་བགྱིས་པར་དགེའོ།། །།

ཨེ་ཝཾ་དམ་པའི་གདན་ས་རྒྱལ།།ཨེ་མ་ཧོ།།དཀྱིལ་འཁོར་དབུས་སུ་ཛྙཱ་ན་གུ་རུའི་གླིང་།།ཤར་དུ་དུས་འཁོར་ལྷོ་རུ་དབྱངས་ཅན་གླིང་།།ནུབ་ཕྱོགས་རྫོགས་ཆེན་བྱང་དུ་གེ་སར་གླིང་།།གླིང་ཆེན་ལྔ་དང་གླིང་ཕྲན་བཞི་ཡིས་མཛེས།།ཤར་ལྷོ་ཏཱ་ར་ལྷོ་ནུབ་གྷ་རུ་ཌཱ།།ནུབ་བྱང་ཇོ་གུར་བྱང་ཤར་ཐོད་རྒལ་གླིང་།།རྒྱལ་ཡོངས་ནགས་ཀློང་དབུས་སུ་རྒྱན་པ་འདི།།སྔ་འགྱུར་རིག་འཛིན་བརྒྱུད་པར་མཎྜལ་འབུལ།།ལུང་རྟོགས་བསྟན་པའི་ཉི་མ་རབ་ཏུ་གསལ།།བཤད་སྒྲུབ་ཕྲིན་ལས་ཟླ་བ་ཀུན་ཏུ་ཤིས།།དགེ་འདུན་འདུས་སྡེ་སྐར་ཚོགས་བཞིན་དུ་བཀྲ།།འཁོར་འདས་དགེ་བའི་བདེ་ལེགས་རྒྱས་གྱུར་ཅིག།བདུད་རྩི་འགྲུབ་སྦྱོར་དགེ་བར་ཨེ་ཝཾ་གླིང་ནས་ཨེ་མ་ཧོས་

གདོད་མའི་མགོན་པོ་མི་ཕམ་རིན་པོ་ཆེ་རྗེས་སུ་དྲན་པ་བཅོས་མིན་དད་པའི་གདུང་དབྱངས། ༡ རྒྱལ༵་ཀུན་མཁྱེན་པའི་མེ་ལོང་དྷཱིཿཡིག་མཚན།།རྒྱལ༵་བསྟན་དུས་ཀུན་གསལ་བྱེད་དམར་སེར་འཆང་།།རྒྱལ༵་སྲས་རིགས་གསུམ་སེམས་དཔའི་སྒྱུ་འཕྲུལ་བ།།རྒྱལ༵་དབང་མཚོ་སྐྱེས་བརྒྱུད་པར་བཅས་ལ་བསྔགས།། ༢དྲི༵་མེད་དྭངས་གཙང་འོ་མའི་མཚོ་གླིང་ནས།།དྲི༵་བྲལ་གཟི་དཔལ་བཀྲ་བའི་ཆུ་ཤེལ་དབང་།།དྲི༵་མའི་མུན་ཚོགས་གཏིང་ནས་ཡོངས་གསལ་བ།།དྲི༵་མེད་སྣང་གཏེར་མཚོ་སྐྱེས་བླ་མ་རྒྱལ།།༣གང༵་གི་བུ་སློབ་གསེར་རིའི་ལྷུན་པོའི་ཕྲེང་།།གང༵་ཞིག་སྨྲ་བའི་རྒྱལ་པོ་འཇིགས་བྲལ་བ།།གང༵་སྣང་བརྡ་དང་དཔེ་རུ་ཤར་གཟིགས་པ།།གང༵་ཞིག་མི་ཕམ་མི་ཡི་སེང་གེར་བསྔགས།།༤གངས་རིའི་མེ་ཏོག་འཛུམ་པའི་ས་ཡི་ཆར༵།།ཆར༵་ལྡན་ཟླ་ཀླུང་གཡུ་འབྲུག་ནོར་བུའི་ཚལ༵།།སྣོད་བཅུད་དགེ་བའི་ལེགས་ཚོགས་འཕེལ་བའི་གནས།།ཞིང༵་འདིར་ངོ་མཚར་སྐུ་ཡི་མེ་ཏོག་བཞད།།༥ཆུང་ནས༵་དད་དང་ངེས་འབྱུང་ནོར་གྱིས་ཕྱུག།ཡེ་ནས༵་ཐབས་དང་ཤེས་རབ་ཟུང་དུ་འཇུག།གདོད་ནས༵་ཆོས་སྐུའི་ངོ་བོར་སངས་རྒྱས་པ།།སྐྱེ་ནས༵་ཕྲེང་བར་མཛད་འཕྲིན་མཁའ་དང་མཉམ།།༦སྨྲ་བའི་སེང་གེའི་ཞལ་གཟིགས་ཁྱེད་ལ༵་ཐོབ། ། འཇམ་དབྱངས་མཁྱེན་བརྩེའི་ཐུགས་རྒྱུད་སྙིང་ལ༵་འཕོས། ། བློ་གཏེར་དབང་པོའི་བྱིན་རླབས་ཡིད་ལ༵་སྨིན། ། མི་ཕམ་འཇམ་པའི་དབྱངས་ལ་གསོ༵ལ་བ༵་འདེ༵བས། ། ༧གཏེར་སྟོན་བསོད་རྒྱལ་ཨ་འཛོམས་འབྲུག་སྤྲུལ་རྗེ༵། ། རྫོགས་སྤྲུལ་ལྔ་བ་དཔལ་སྤུངས་སི་ཏུ་རྗེ༵། ། ཀུན་བཟང་དཔལ་སོགས་གྲུབ་པའི་དབང་ཕྱུག་བཅས། །ཡབ་རྗེ་མི་ཕམ་མགོན་པོར་གསོ༵ལ་བ༵་འདེ༵བས། ། ༨བྷོ་ཊའི་མཁས་དབང་སྟོང་གིས་ཟླ་བྲལ་བ། ། དཔལ་རིའི་དགེ་བཤེས་བློ་བཟང་ར༵བ་གསལ་ལ། །བརྒལ་ལན་རྩོད་ལ་རིག་པའི་དཔའ་བོ་མཆོག ། མི་ཕམ་འཇམ་དབྱངས་བླ་མར་གསོ༵ལ་བ༵་འདེ༵བས། ། ༩རྒྱབ་བརྟེན་ལུང་གི་མདུན་ནས་ཁྱེད་མི༵་ཕམ༵། ། དམ་བཅའ་རྡོ་རྗེའི་ཁྲི་ལས་ཁྱེད་མི༵་ཕམ༵། ། རིགས་འཕྲུལ་ཁྲི་མ་འབུམ་གྱིས་ཁྱེད་མི༵་ཕམ༵། ། མི་ཕམ་ཡིད་བཞིན་ནོར་བུར་གསོ༵ལ་བ༵་འདེ༵བས། །༡༠སྤོབས་པ་གླང་པོའི་སྟོབས་ཀྱིས་ཁྱེད་མི༵་ཕམ༵། ། གཟི་བརྗིད་སེང་གེའི་འགྱིང་གིས་ཁྱེད་མི༵་ཕམ༵། ། ཐལ་ངག་ལྕགས་ཀྱི་སྡེར་མོས་ཁྱེད་མི༵་ཕམ༵། ། མི་ཕམ་ཐམས་ཅད་མཁྱེན་པར་གསོ༵ལ་བ༵་འདེ༵བས། ། ༡༡འཇམ་དཔལ་དྲག་པོས་མི་དང་མི་བཞི༵ན་རྩེད། ། གེ་སར་སྐྱེས་བུ་ལུས་དང་གྲིབ་བཞི༵ན་འགྲོགས། །ཆོས་སྐྱོང་དགྲ་ལྷས་མ་དང་བུ་བཞི༵ན་སྲུང་། །རྩ་གསུམ་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༢ངོ་བོ་ཆོས་སྐུ༵་དྲུག་པ་རྡོ་རྗེ་འཆང་། །རང་བཞིན་ལོངས་སྐུ༵་རྒྱན་དང་དཔེ་བྱད་ཅན། །སྣ་ཚོགས་སྤྲུལ་སྐུ༵་གང་ལ་གང་འདུལ་བ། །སྐུ༵་གསུ༵མ་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༣ཡེ་ན༵ས་སངས་རྒྱས་གོ་འཕང་མངོན་དུ་གྱུར། ། རིང་ན༵ས་ཆོས་ཀྱི་བདེན་པ་ཐུགས་ལ་གཏམས། ། གདོད་ན༵ས་རྒྱལ་སྲས་འཕགས་པའི་ཚུལ་འཛིན་པ། །དཀོན་མཆོག་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༤ཁྱེད༵་ཀྱི་ཡོན་ཏན་གངས་རི་ལས་ཀྱ༵ང་མཐོ། ། ཁྱེད༵་ཀྱི་བཀའ་དྲིན་ས་འཛིན་ལས་ཀྱ༵ང་བརྗིད། །ཁྱེད༵་ཀྱི་མཁྱེན་རྒྱ་ནམ་མཁའ་ལས་ཀྱ༵ང་ཆེ། །མཁྱེན་གཏེར་ནོར་བུའི་མཛོད་ལ་ཕྱ༵ག་འཚ༵ལ་ལོ༵། །༡༥སྤྱིར་ན་ཤཱཀྱའི་བསྟན་ལ་བཀའ་དྲིན་ཆེ༵། །ལྷག་ཏུ་སྔ་འགྱུར་ཡོངས་ཀྱི་མགོན་གཅིག་པུ།…