བདེ་སྨོན།ཨེ་མ་ཧོ།།གོ་ལའི་ནད་མུག་གླིང་གི་བར་གསེང་ནས།།སྐྱབས་གཅིག་རྡོ་རྗེ་གོ་ཁྲབ་ཡང་ཡང་བསྙེན།།འགྲོ་བའི་ནད་རིམས་ངན་པ་མྱུར་སེལ་ནས།།ཀུན་ཀྱང་དགའ་བདེའི་དཔལ་ལ་སྤྱོད་པར་ཤོག།ཕྱི་སྣང་དག་པ་རབ་འབྱམས་ཡོངས་སུ་ཤར།།ནང་བཅུད་བྱམས་བརྩེ་བྱང་ཆུབ་སེམས་ཉིད་བརྟས།།གསང་ཆེན་རང་རིག་བླ་མའི་དེ་ཉིད་རྟོགས།།ཡད་གསང་སངས་རྒྱས་ཡེ་ཤེས་མཐར་ཕྱིན་ཤོག།བླ་མ་ཨོ་རྒྱན་ཆེན་པོས་རྟག་ཏུ་སྐྱབས།།ཡི་དམ་རྡོ་རྗེ་གོ་ཁྲབ་བརྟན་དུ་སྲུང་།།མཁའ་འགྲོ་རྗེ་བཙུན་སྒྲོལ་མས་བར་ཆད་སེལ།།ཆོས་སྐྱོང་གེ་སར་རྒྱལ་པོས་དངོས་གྲུབ་སྩོལ།།ཨོཾ་ཨཱཿཧཱུཾ་ཧྲཱིཿབྷྲཱུཾ་སྭཱ་ཧཱ།།ཤྲཱིས་སོ།

གུ་རུ་རྒྱལ་བ་རིགས་ལྔའི་གསོལ་འདེབས་ཙིཏྟ་མ་ཎི་ཀ།ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ།།༼༡༽ཨོཾ་དབྱིངས་ངོ་བོ་ཀ་དག་སྤྲོས་བྲལ་ལས༔ཨཱཿདབྱངས་རང་བཞིན་ལྷུན་གྲུབ་འོད་གསལ་དཔལ༔ཧཱུཾ་ཉིད་ཐུགས་རྗེའི་རྩལ་སྣང་སྤྲུལ་པའི་སྐུ༔སྐུ་གསུམ་ཀུན་འདུས་པདྨ་འབྱུང་གནས་མཁྱེན༔ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔༼༢༽བཛྲ་སེམས་དཔའ་ཆེན་དང་མ་མ་ཀི༔གུ་རུ་རཏྣ་དཔལ་དང་སངས་རྒྱས་སྤྱན༔པདྨ་སྣང་བ་མཐའ་ཡས་གོས་དཀར་མོ༔ཞི་རྒྱས་གར་དབང་རྒྱལ་པོར་གསོལ་བ་འདེབས༔ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔༼༣༽སིདྡྷི་དོན་ཡོད་གྲུབ་དང་དམ་ཚིག་སྒྲོན༔ཧཱུཾ་མཆོག་རྣམ་པར་སྣང་མཛད་དབྱིངས་ཕྱུག་མ༔གུ་རུ་རྒྱལ་བ་རིགས་ལྔར་གསོལ་བ་འདེབས༔འབྲས་ཆོས་ཉེར་ལྔའི་དགོངས་པ་མཐར་ཕྱིན་ཤོག༔ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔ཞེས་པ་འདི་ཡང་རབ་གནས་ས་ཕག་སྟོན་ཟླ་འགོ་མའི་ཡར་ངོའི་ཚེས་བཅུ་ལ་རིག་འཛིན་ཨེ་མ་ཧོས་སྙིང་དབུས་མི་ཕྱེད་དད་པའི་ཡིད་མཚོ་ལས་བྱུང་བར་བཞིན་ཨེ་ཝཾ་ཡོ་ག་ཆོས་ཚོགས་ནས་གསོལ་བར་འདེབས་པར་དགེའོ།།

སྣང་སྲིད་དབང་དུ་སྡུད་པའི་གསོལ་འདེབས་བྱིན་རླབས་སྤྲིན་ཆེན།ཨོཾ་ཨཱཿཧཱུྃ་ཧྲཱིཿབདེ་ཆེན་འབར་བ་དབང་གི་ཕོ་བྲང་དུ། །བདེ་སྟོང་སོ་སོར་རྟོག་པའི་ཡེ་ཤེས་སྐུ། །མ་ཆགས་བདེ་ལྡན་པདྨའི་རང་བཞིན་ལས། །རྡོ་རྗེ་ཉི་མ་སྣང་བ་ཆེན་པོའི་དཔལ། །ཆོས་སྐུ་སྣང་བ་མཐའ་ཡས་རྡོ་རྗེ་ཆོས། །འཇིག་རྟེན་དབང་ཕྱུག་ཐུགས་རྗེ་རྗེས་ཆགས་གཟུགས། །པདྨ་རྒྱལ་པོ་འཁོར་འདས་མངའ་དབང་བསྒྱུར། །སྣང་སྲིད་ཟིལ་གནོན་དབང་ཆེན་ཧེ་རུ་ཀ །གསང་བ་ཡེ་ཤེས་བཛྲ་ཝཱ་ར་ཧི། །བདེ་མཆོག་འདོད་པའི་རྒྱལ་པོ་བདེ་ཆེན་གཏེར། །མ་ལུས་སྐྱེ་རྒུའི་ཡིད་འཕྲོག་རིགས་བྱེད་མ། །མཆོག་ཐུན་ཕྱག་རྒྱའི་དབང་ཕྱུག་བདེ་སྟོང་གར། །དབང་མཛད་རྡོ་རྗེ་དཔའ་བོ་ཌཱ་ཀིའི་ཚོགས། །སྣང་སྟོང་མཉམ་པ་ཆེན་པོའི་ངང་ཉིད་དུ། །རྡོ་རྗེ་སྐུ་ཡི་གར་གྱིས་སྲིད་གསུམ་གཡོ། །འགག་མེད་གསུང་གི་བཞད་སྒྲས་ཁམས་གསུམ་འགུགས། །འོད་ཟེར་དམར་པོས་འཁོར་འདས་ཡོངས་ལ་ཁྱབ། །སྲིད་ཞིའི་དྭངས་བཅུད་གཡོ་ཞིང་སྡུད་པར་བྱེད། །རྡོ་རྗེ་ཆགས་པ་ཆེན་པོའི་ཐུགས་ཀྱིས་ནི། །རྣམ་གཉིས་དངོས་གྲུབ་འདོད་རྒུའི་མཆོག་སྩོལ་ཞིང༌། །རྡོ་རྗེ་ལྕགས་ཀྱུ་ཞགས་པ་ཆེན་པོ་ཡིས། །སྣང་སྲིད་བདེ་བ་ཆེན་པོར་སྡོམ་བྱེད་པ། །མཐའ་ཡས་སྒྱུ་འཕྲུལ་དྲྭ་བའི་རོལ་གར་ཅན། །ཏིལ་གྱི་གོང་བུ་ཕྱེ་བ་བཞིན་བཞུགས་པའི། །རབ་འབྱམས་རྩ་གསུམ་དབང་གི་ལྷ་ཚོགས་ལ། །གུས་པས་གསོལ་བ་འདེབས་སོ་བྱིན་གྱིས་རློབས། །མཆོག་ཐུན་དངོས་གྲུབ་འདོད་རྒུའི་དཔལ་མཐའ་དག །ཐོགས་མེད་དབང་དུ་བྱེད་པའི་དངོས་གྲུབ་སྩོལ། །ཅེས་པའང་རབ་ཚེས་ས་ཡོས་ཟླ༧་ཚེས༡་ལ་དྷཱིཿམིང་པས་སྤེལ། གསོལ་བ་བཏབ་ན་གང་ཟག་སུ་ཡང་རུང་སྟེ་དབང་གི་ལས་ཀུན་ཇི་ལྟར་བསམ་པ་བཞིན་འགྲུབ་པར་གདོན་མི་ཟའོ། །དར་དམར་ལ་བྲིས་ཏེ་ཕྱར་བའམ་མེ་རླུང་ལ་འཁོར་ལོ་བྱས་ཀྱང་འགྲུབ་བོ། །མངྒ་ལཾ།། །།

࿐ སངས་རྒྱས་འཚོ་མོ་རྒྱལ་ལོ།ཨེ་མ་ཧོ།།ཚེ་འདིར་བློ་བཏངས་དབེན་པའི་རི་ལ་འགྲིམས།།བྱང་ཆུབ་སེམས་སྒོམ་རྩེ་གཅིག་སྒྲུབ་ལ་བརྩོན།།ཆོས་བརྒྱད་དོར་བའི་རྗེ་བཙུན་རྣལ་འབྱོར་མ།།སངས་རྒྱས་འཚོ་མོའི་ཞབས་ལ་གསོལ་བ་འདེབས།།བསྟན་འགྲོའི་དོན་ཀུན་བདེ་མྱུར་ལྷུན་གྲུབ་ཤོག།གདུང་མཆོད་ཕྱིར་དུ་ཤྲཱིས་སྨོན་པར་དགེའོ།། །། ཨ་ནེ་སངས་རྒྱས་མཚོ་མོའམ་རི་ཁྲོད་ཚེ་མཚམས་མ་ཞེས་བཤད་ན་གནས་ལུགས་དང་མཐུན་པའི་སྐད་ཆ་ཡིན།གངས་ལྗོངས་རིག་བཅུས།ནང་དོན་གནད་བསྡུས།ཡ་་་། ཚང་མས་ཨ་ནེ་སངས་རྒྱས་མཚོ་མོའི་སྐོར་ལ་བགྲོ་གླེང་གནང་བཞིན་འདུག དེ་ཚོ་ཧ་ལས་པའི་ཡག་པོ་རེད། དེང་སང་གི་དུས་འདིར་འཇིག་རྟེན་འཁོར་བའི་ཕུན་ཚོགས་ཡོད་ཚད་བློས་བཏང་སྟེ། ཆོས་ལ་ཡིད་ཕྱོགས་ནས་མི་ཚེ་ཡོངས་རྫོགས་མཇུག་ཕུད་ནུས་པ་ཧ་ཅང་དཀའ་མོ་རེད། དེ་མི་སུ་ཡིན་གང་ཡིན་གྱིས་སྒྲུབ་ཐུབ་པ་ཞིག་མ་རེད།དེ་ཡིན་ན་མདོ་སྨད་བླ་བྲང་གི་ཕྱོགས་ན་ཚེ་མཚམས་མ་འདི་འདྲ་ཡོད་པ་ནི་ཧ་ལས་པའི་དོན་བཟང་བྱ་གསར། སངས་རྒྱས་ཀྱི་བསྟན་པའི་རྒྱན་དུ་ཆེ་བ་ཞིག་ལ་གོ་བ་ལེན་གི་ཡོད།སྤྱིར་བཏང་གི་འདི་འདྲ་ལ་དཔྱད་པ་འདྲ་མིན་སྣ་ཚོགས་ཤིག་གཏོང་བ་དེ་འཇིག་རྟེན་གྱི་ཆོས་ཉིད་རེད། དྲང་མོར་བཤད་ན། ཨ་ནེ་ཁོང་གི་རྒྱུ་མཚན་ལ་ལ་ཞིག་གིས་གོ་མདོག་དང་། ཤེས་མདོག་ཁ་བོས་མང་པོ་ཞིག་བཤད་གི་ཡོད་པ་དེ་ཚོ་གནས་ལུགས་ཡོད་པའི་སྐད་ཆ་མ་རེད། ཨ་ནེ་ཁོང་རང་གི་ཁྱིམ་མིས་ཀྱང་གར་སོང་འདིར་སོང་རྩད་མ་ཆོད། མ་ཤེས་པར་ཡུན་རིང་འགོར་མྱོང་བས་མཚོན་རང་གཞན་ཡོངས་སུ་རྫོགས་པ་ལ་གསང་བ་ཞིག་རེད། ང་ཡང་རྒན་གྱའི་བྲག་དཀར་ལ་མང་པོ་འགྲོ་མྱོང་། བླ་མ་གྲྭ་བ་མང་པོ་ཁྲིད་ནས་ཀྱང་འགྲོ་མྱོང་། ཐེངས་རེར་བླ་གྲྭ་དྲུག་ཅུ་བདུན་ཅུ་ཡོད་དུས་ཀྱང་ཡོད་ལ་ཉིན་གཅིག་དང་གཉིས་ཙམ་ལ་བསྡད་པའང་ཡོད། ཡིན་ནའང་ཨ་ནེ་ཁོང་རི་མགོའི་རི་དྭགས་དང་འདྲ་བར་མི་མཐོང་དུས་བྲོས་འགྲོ་བ། མི་དང་ཉེ་བར་མི་གཅར་བ་དེ་འདྲ་ཞིག་རེད། ཕར་བཙལ་ནས་འཕྲད་ཀྱང་མི་དང་སྐད་ཆ་མི་ལབ་པ་དེ་འདྲ་ཞིག་ཡིན།ཁོང་ཆོས་པ་ཚོ་དེ་འདྲ་རེད། འཇིག་རྟེན་དང་མཐུན་འཇུག་མི་བྱེད་པ། མིའི་སྤྱོད་པ་དང་མི་མཐུན་པ་རེད། བུད་སྙེགས་ཐོབ་གསུམ་སྟེ། མི་གྲལ་ནས་བུད། ཁྱི་གྲལ་དུ་སྙེགས། ལྷ་གྲལ་ཐོབ། ཅེས་པ་ལྟར་དང་། བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གྲོག་ལ་གཏད། ཅེས་པ་དེ་འདྲ་བ་ལ་སྙན་གྲགས་བསྙེན་བཀུར་ཞིག་རྩ་བ་ནས་དགོས་པ་མ་རེད། འཇིག་རྟེན་གྱི་བྱ་བ་མཐའ་དག་བསྐྱུར་ནས་ཡོད་པས། གཞན་དོན་དུའང་མི་ཞིག་ལ་བཀའ་བགོ་བྱིན་རླབས་བྱེད་པའང་མ་རེད། མི་གྲལ་ནས་བུད་དེ་མིའི་སྤྱོད་པ་མ་བྱས་ན། ཁ་དཔེ་ལ། གྲུབ་ཆེན་ཟེར་ན་སྨྱན་ནེ་སྨྱོན་ནེ། རྣལ་འབྱོར་ཟེར་ན་ལྡ་ངེ་ལྡང་ངེ་། ཟེར་བ་ལྟར་འཇིག་རྟེན་པའི་སྣང་ངོར།…

རྗེ་བཙུན་སྒྲོལ་མའི་གསོལ་འདེབས་ནད་རིགས་ཀུན་སེལ།ཨོཾ་ཨཱཿཧཱུཾ་ཧྲཱིཿཏཱཾཿ༡༽ཨོཾ་ཕྱག་འཚལ་རྗེ་བཙུན་ཏ་རེ་ལྷ་མོ།།ཏུཏྟ་རེ་ཞེས་ནད་རིགས་ཀུན་སེལ།།ཐུགས་རྗེ་ཐོགས་མེད་ཏུ་རེ་དཔལ་མོས།།བདག་སོགས་ནད་རིམས་སོལ་ཅིག་སྭཱ་ཧཱ།།ཨོཾ་ཏཱ་རེ་ཏུཏྟ་ཏུ་རེ་སྭཱ་ཧཱ།།༢༽སྤྱི་གཙུག་བདེ་ཆེན་འཁོར་ལོའི་རྩ་དཀྱིལ་ན།།རྗེ་བཙུན་སྒྲོལ་མ་རྣམ་རྒྱལ་དཀར་མོ་བཞུགས།།གསོལ་བ་འདེབས་སོ་ཕྱོགས་ལས་རྣམ་པར་རྒྱལ།།འཁོར་འདས་སྣང་སྲིད་དག་པ་རབ་འབྱམས་ངང་།།སྐུ་གསུམ་རྒྱལ་བའི་ཞིང་ཁམས་མངོན་གྱུར་ཤོག།ཨོཾ་ཏཱ་རེ་ཏུཏྟ་ཏུ་རེ་སྭཱ་ཧཱ།།༣༽མགྲིན་པ་ལོངས་སྤྱོད་འཁོར་ལོའི་རྩ་དཀྱིལ་ན།།རྗེ་བཙུན་སྒྲོལ་མ་རིག་བྱེད་དམར་མོ་བཞུགས།།གསོལ་བ་འདེབས་སོ་སྣང་སྲིད་དབང་དུ་བསྡུད།།ཀ་དག་ལྷུན་གྲུབ་དགོངས་པ་མཐར་ཕྱིན་ངང་།།བསྟན་འགྲོའི་དོན་ཀུན་བདེ་མྱུར་འགྲུབ་པར་ཤོག།ཨཱཿཏཱ་རེ་ཏུཏྟ་ཏུ་རེ་སྭཱ་ཧཱ།།༤༽སྙིང་ཁ་ཆོས་འཁོར་རྩ་འདབ་འོད་དཀྱིལ་ན།།རྗེ་བཙུན་སྒྲོལ་མ་ཁྲོ་གཉེར་སྔོན་མོ་བཞུགས།།གསོལ་བ་འདེབས་སོ་འཇིགས་སྐྲག་ཀུན་ནས་ཞི།།དམ་པའི་ཆོས་སྦྱིན་མཛད་པ་བསམ་མི་ཁྱབ།།ཞི་བདེས་ཕན་ནུས་གཞན་ལ་སྨན་པར་ཤོག།ཧཱུྃ་ཏཱ་རེ་ཏུཏྟ་ཏུ་རེ་སྭཱ་ཧཱ།།༥༽ལྟེ་བ་སྤྲུལ་པའི་འཁོར་ལོའི་རྩ་དཀྱིལ་ན།།རྗེ་བཙུན་སྒྲོལ་མ་དོན་གྲུབ་སེར་མོ་བཞུགས།།གསོལ་བ་འདེབས་སོ་བཀྲ་ཤིས་བདེ་ལེགས་ངང་།།ཕུན་སུམ་ཚོགས་པའི་དོན་ཀུན་མ་ལུས་པ།།གང་བསམ་ཡིད་བཞིན་ནོར་བུའི་དཔལ་ཐོབ་ཤོག།ཏྲཱྃ་ཏཱ་རེ་ཏུཏྟ་ཏུ་རེ་སྭཱ་ཧཱ།།༦༽གསང་གནས་བདེ་སྐྱོང་འཁོར་ལོའི་རྩ་དཀྱིལ་ན།།རྗེ་བཙུན་སྒྲོལ་མ་སེང་ལྡེང་ལྗང་མོ་བཞུགས།།གསོལ་བ་འདེབས་སོ་གསང་གསུམ་བར་ཆད་སོལ།།ཕྲིན་ལས་རབ་འབྱམས་མཛད་པ་མཐར་ཕྱིན་ནས།།ཀུན་བཟང་རིག་འཛིན་དགོངས་མངོན་གྱུར་ཤོག།ཧྲཱིཿཏཱ་རེ་ཏུཏྟ་ཏུ་རེ་སྭཱ་ཧཱ།།༧༽ཕྱི་རོལ་འབྱུང་ལྔའི་དུག་རྡུལ་དབྱིངས་སུ་སོལ།།ནང་ནས་དུག་ལྔའི་རྟོག་པ་འོད་དུ་ཡལ།།གསང་བ་སྐུ་ལྔའི་མནོལ་གྲིབ་མུན་རྒྱུན་ཆད།།ཡང་གསང་ཡེ་ལྔའི་སྒྲོན་མེ་རྟག་འབར་ནས།།འགྲོ་ཀུན་སངས་རྒྱས་ཡེ་ཤེས་མངོན་གྱུར་ཤོག།ཨོཾ་ཏཱ་རེ་ཏུཏྟ་ཏུ་རེ་སྭཱ་ཧཱ།།ཅེས་པ་འདི་ཡང་རབ་གནས་ལྕགས་བྱིའི་དབོ་ཟླའི་དགའ་བ་དང་པོའི་ཐོ་རངས་སྐབས་སུ་ཀླུ་སྨྱོན་ཧེ་རུ་ཀ་སྣ་ཚོགས་རང་གྲོལ་དང་རིག་འཛིན་དབྱངས་ཅན་ལྷ་མོས་གསུང་སྐུལ་ལྟར་རྨི་ལམ་འོད་གསལ་ལས་ཤར་བ་ལྟར་གང་སྣང་ལ་བཅོས་བསྒྱུར་མེད་པར་ཨེ་ཝཾ་རྫོགས་ཆེན་ཆོས་སྒར་གྱི་ཡང་དབེན་ཛྙཱ་ན་གུ་རུའི་ལྷ་ཁང་དུ་ཤྲཱིཿསྨྱོན་ཨེ་མ་ཧོས་འཕགས་མའི་ཚོགས་ལ་སྙིང་ནས་གསོལ་བ་འདེབས་པར་དགེའོ།། །།

༄༅། །ཨེ་ཝཾ་རྫོགས་ཆེན་ཆོས་སྒར་ལ་བསྔགས་པ་ཀུན་བཟང་རོལ་མོ།།ན་མོ་མ་ཧཱ་གུ་རུ་བུདྡྷ་ཛྙཱ་ན་ཡེ།།ཀུན་བཟང་རྫོགས་ཆེན་བརྒྱུད་པའི་བྱིན་རླབས་དཔལ།།དགྱེས་པའི་ཐུགས་ལ་གཏམས་མཁས་མ་ཎི་ཀ།རྡོ་རྗེ་འཆང་དངོས་འཇིགས་མེད་རྣམ་རྒྱལ་ལ།།གསོལ་བ་འདེབས་སོ་ཀུན་ཏུ་ཤིས་པ་སྩོལ།། ཀ་དཔལ་ཀུན་རིགས་ཞེས་པའི་ནགས་ཀླུང་འདིར།།གངས་ལྡན་རི་དང་རྒྱ་མཚོའི་འགྲམ་ངོགས་སུ།།རང་བྱུང་མཛེས་སྡུག་ཡིད་འོང་ཐམས་ཅད་ཀུན།།ཀུན་བཟང་མཆོད་པའི་སྤྲིན་དུ་རྣམ་པར་བཀྲ།། རྨད་བྱུང་སྙན་ངག་མཁན་གྱི་སྨྱུག་རྩེ་ནས།།འཁོར་ཡུག་ལྷན་སྐྱེས་དྲོད་ཁོལ་རྟོགས་མིན་ཀྱང་།།སྣང་སྲིད་བཟང་དགུའི་ཕྱུག་པའི་ནགས་ཀླུང་འདིར།།ལྷ་དང་དྲང་སྲོང་ཀུན་གྱིས་ཡིད་སྨོན་ཤོར།། རྡོ་ལྕགས་བཞུས་མའི་གྲོང་ཁྱེར་འདི་ན་དབེན།།ཁྲི་ཕྲག་ལོ་ཟླར་གད་སྙིགས་མ་ལྷད་པར།།དཔའ་བོའི་དུང་སོ་སྤུངས་འདྲའི་རི་ཕྲེང་དབུས།།མཛེས་སྡུག་མ་ལུས་དཀྱིལ་འཁོར་ལྷུན་གྱིས་གྲུབ།། རིག་འཛིན་རྒྱལ་བུ་མྱུ་གུ་དབྱངས་ཅན་མས།།བརྩེ་དུང་ནགས་ཀླུང་འགྲིམ་པའི་དྲི་ཞིམ་དཔལ།།དགྱེས་པའི་ལྷ་མོ་ཁྱོད་དང་ལྷན་གཅིག་འབྲེལ།།སྙན་འཇེབས་རྡོ་རྗེའི་གཏམ་བུ་འདི་ནས་དཀྲོལ།། ནགས་ཀླུང་ཁྲོད་དུ་ནགས་ཀྱི་ལྷ་མོའི་རིགས།།དགའ་གྲོགས་བྱོན་ནས་དབྱངས་སྙན་རོལ་མོ་བཅས།།ཨེ་ཝཾ་དགོན་ཆུང་འགངས་པའི་སྤྲོ་སྣང་ལ།།བསམས་ཚེ་དགའ་ལྡན་ཡིད་དགའ་ལས་ཀྱང་ལྷག། ཤར་ནས་ཉི་མའི་འོད་སྣང་དྲོ་ལྷང་ངེ་།།ལྷོ་ཡི་ཙནྡན་དྲི་བསུང་འཇམ་ལྷན་ནེ།།ནུབ་ནས་ཀུན་བཟང་དྲི་ཆབ་བསིལ་ལྷམ་མེ།།བྱང་ཐང་གཡང་དཀར་འབའ་སྒྲ་དེ་སྙན།། ཞོགས་པའི་མཚམས་སྤྲིན་རི་ཀླུང་མགུལ་ནས་འཁྱུད།།དྭངས་གསལ་མཁའ་རླུང་གཙང་མས་ཞལ་བསིལ་བསངས།།གཡང་དྭགས་རི་སྐྱེས་སྒོམ་ཁང་གམ་ནས་གཉེར།།ཨེ་མ་ང་ཡི་ཕ་ཁྱིམ་ཡི་གར་འོངས།། བྱ་རྒོད་ཁྱུ་ཚོགས་བྲག་རིའི་གསེབ་ནས་གཟིགས།།མཐའ་དབུས་ཡངས་པའི་སྔོ་བསང་འཁོར་ལོའི་དབྱིབས།།ནོར་འཛིན་པདྨ་འདབ་བརྒྱད་རི་བོས་བརྗིད།།ཕྱོགས་མཚམས་མ་འདྲིས་གསལ་བ་ཨེ་མ་ཧོ།། རྡོ་རྗེ་གདན་གྱི་བྱང་ཆུབ་ཤིང་སྡོང་མཛེས།།རི་བོ་རྩེ་ལྔའི་གདོང་དྲུག་ལོ་མ་བཤམས།།གངས་རིའི་ལྗོངས་ཀྱི་སྟག་མའི་མེ་ཏོག་བཞད།།ཀུན་འདུས་ཤིང་སྣ་འཛོམས་པའི་ཨེ་ཝཾ་ཀླུངས།། རྒྱལ་བས་བཟའ་ཤིང་འཚོལ་བའི་རི་ཁྲོད་བརྟས།།དྲང་སྲོང་ཏིང་འཛིན་གོམས་པའི་ཞི་གནས་གླིང་།།དགེ་སྦྱོང་ངེས་འབྱུང་བསྐུལ་བའི་བསྟི་གནས་ཆེ།།ཀུན་བཟང་ནགས་ཀླུང་རྒྱས་པའི་རྫོགས་ཆེན་སྒར།། བུདྡྷ་ཛྙཱ་ནའི་ཆོས་གླིང་ཞེས་ཀྱང་གསོལ།།ཛྙཱ་ན་གུ་རུའི་གནས་ཡུལ་ཡོངས་སུ་གྲགས།།ཨེ་ཝཾ་རྫོགས་ཆེན་ཆོས་སྒར་སྦས་ཡུལ་ན།།གསང་ཆེན་ཉམས་བཞེས་མཛད་པའི་ཆོས་གྲོགས་བཞུགས།། དཔྱིད་དུས་ཤིང་དྲིལ་སྔོན་པོས་ཤག་སྒྲ་འདིས།།མི་རྟག་བརྡ་གླུ་ལེན་པའི་སློབ་དཔོན་མཆིས།།དབྱར་དུས་སྦྲང་ཆར་འཇའ་རིས་གསལ་བའི་འོད།།ཏིང་འཛིན་ཡེ་ཤེས་བསྐྱེད་པའི་ཟླ་གྲོགས་ཡོད།། སྟོན་དུས་ནམ་མཁའ་དྭངས་པའི་བསིལ་རླུང་ཁྲོད།།དབྱིངས་རིག་མ་བུ་འདྲེས་པའི་རྟེན་འབྲེལ་བཟང་།།དགུན་དུས་ཁ་བས་གཏམས་པའི་ནགས་ཀླུང་དབུས།།གཏམ་མོའི་སྒྱུ་ལུས་འཕེལ་བའི་ཟབ་གསང་གནས།། ཉིན་མོ་བྱ་བྱེའུའི་རི་དྭགས་བག་ཡངས་རྒྱུ།།མཚན་མོ་འུག་པ་ཕ་བོང་སྒྱུ་རྩལ་ངོམས།།ཐུན་བཞི་ལས་དྲུག་བརྩོན་པའི་རྣལ་འབྱོར་པས།།གནས་འདིར་དགའ་མགུར་རོལ་བ་ཨེ་མ་ཧོ།། མི་ཚེ་ས་མཐར་བསྐྱལ་བའི་སྙན་ངག་པ།།ཤྲཱིཿསྨྱོན་དགྱེས་པ་རྡོ་རྗེས་དེ་སྐད་ཐལ།།ཀུན་ཀྱང་དབེན་གསུམ་ཡོན་ཏན་རབ་རྫོགས་ནས།།ཀུན་བཟང་རྒྱལ་ས་ཀུན་གྱིས་ཐོབ་གྱུར་ཅིག།ཅེས་པ་འདི་ཡང་རབ་གནས་ལྕགས་བྱིའི་དབོ་ཟླའི་ཚེས་པ་གཅིག་གམ་སྤྱི་ལོ་ ༢༠༢༠ ལོའི་ཟླ་ ༣ ཚེས་༢༦ ཞོགས་པར་ཆུ་ཚོད་ལྔ་བ་ལ་ཤྲཱིཿཨེ་མ་ཧོས་ཤར་མར་བྲིས་པར་དགེའོ།།